Գործ թիվ ԵԿԴ/0063/01/12




Ո Ր Ո Շ ՈՒ Մ
քրեական գործի վարույթը կարճելու և քրեական
հետապնդումը դադարեցնելու մասին


« 12 » հունիսի 2012թ. ք. Երևան


Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը (այսուհետ` Դատարան),

նախագահությամբ դատավոր` Արշակ Վարդանյանի,
քարտուղարությամբ` Ժենյա Ավետիսյանի,

մասնակցությամբ`

մեղադրող, Երևանի Կենտրոն
և Նորք-Մարաշ վարչական շրջանների
դատախազության դատախազ` Մամիկոն Գեղամյանի,
տուժող` Արմեն Սարգսյանի,


նույն դատարանում` խորհրդակցական սենյակում, քննության առնելով քրեական գործն ըստ մեղադրանքի`
Լևոն Գուրգենի Նալբանդյանի `
(ծնված 1984թ. նոյեմբերի 13-ին, Հրազդան քաղաքում, ազգությամբ հայ, ՀՀ քաղաքացի, ութամյա կրթությամբ, չի աշխատում, Երևանի Էրեբունի և Նուբարաշեն վարչական շրջանների ընդհանուր իրավասության դատարանի 2011թ. հուլիսի 19-ի դատավճռով ՀՀ քրեական օրենսգրքի 258-րդ հոդվածի 2-րդ մասով դատապարտված տուգանքի 100.000 ՀՀ դրամի չափով, դատվածությունը չմարված, հաշվառված է Հրազդան քաղաքի Րաֆֆու փողոց 1-ին շենքի 24-րդ բնակարանում, փաստացի բնակվում է Երևանի Շենգավիթ 16 փողոցի 16 տանը), սույն գործով մեղադրվում է ՀՀ քրեական օրենսգրքի 177-րդ հոդվածի 1-ին մասով նախատեսված հանցավոր արարքի կատարման մեջ)

Պ Ա Ր Զ Ե Ց`

Մասնավոր մեղադրանքի վերաբերյալ թիվ 13109012 քրեական գործն հարուցվել է 2012թ. փետրվարի 24-ին ՀՀ ոստիկանության Կենտրոնականի քննչական բաժնում ՀՀ քրեական օրենսգրքի 177-րդ հոդվածի 1-ին մասի հատկանիշներով` գործով տուժող քաղաքացի Արմեն Սարգսյանի հաղորդման հիման վրա։
2012թ. մարտին 30-ին Լևոն Նալբադյանը ներգրավվել է որպես մեղադրյալ ՀՀ քրեական օրենսգրքի 177-րդ հոդվածի 1-ին մասով, նրա նկատմամբ նույն օրն հայտարարվել է հետախուզում, որպես խափանման միջոց է կիրառվել չհեռանալու մասին ստորագրություն։
2012թ. ապրիլի 18-ին մեղադրյալ Լ.Նալբանդյանն հայտնաբերվել է, նրան մեղադրանք է առաջադրվել ՀՀ քրեական օրենսգրքի 177-րդ հոդվածի 1-ին մասով։
2012թ. ապրիլի 27-ին քրեական գործը Լևոն Նալբադյանի նկատմամբ ՀՀ քրեական օրենսգքրի 177-րդ հոդվածի 1-ին մասով հաստատված մեղադրական եզրակացությամբ ուղարկվել է Երևանի Կնետրոն և Նորք-Մարաշ վարչական շրջանների ընդհանուր իրավասության դատարան և 2012թ. ապրիլի 28-ին ընդունվել վարույթ։
2012թ. մայիսի 11-ին որոշում է կայացվել սույն քրեական գործով դատական քննություն նշանակելու մասին։
Համաձայն մեղադրական եզրակացության` Լևոն Նալբանդյանին մեղադրանք է առաջադրվել նրանում, որ նա 2012թ. փետրվարի 1-ին` ժամը 23։30-ի սահմաններում, Երևան քաղաքի Մ.Խորենացու փողոցի թիվ 69 հասցեում գործող հացի արտադրամասի պահակ Արմեն Սեյրանի Սարգսյանի աշխատասենյակից գաղտնի հափշտակել է վերջինիս պատկանող 8000 ՀՀ դրամ արժողությամբ «PRIMA XDP-980» մոդելի DVD ֆորմատի նվարգակիչը, 30.000 ՀՀ դրամ արժողությամբ Nokia N-70 մակնշի բջջային հեռախոսը և 3000 ՀՀ դրամ արժողությամբ էլեկտրական սափրիչը։
2012թ. հունիսի 12-ին կայացած դատական նիստի ընթացքում տուժող Արմեն Սարգսյանը, ծանոթացվելով իր իրավունքերին և պարտականություններին, հայտնեց, որ հաշտվել է ամբաստանյալ Լ.Նալբանդյանի հետ` հայտարարելով, որ գիտակցում է դրա իրավական հետևանքները, առ այն, որ քրեական գործի վարույթն այդ պարագայում ենթակա է կարճման, իսկ Լ.Նալբանդյանի նկատմամբ հարուցած քրեական հետապնդումը` դադարեցման։
Ամբաստանյալ Լ.Նալբանդյանն իր նկատմամբ հարուցված հետապնդումը վերնոշյալ ոչ արդարացնող հիմքով դադարեցնելու դեմ չառարկեց։
Դատարանը, հաշվի առնելով դատաական նիստի ընթացքում տուժող Ա.Սարգսյանի դիրքորոշման փոփոխությունը, գտնում է, որ քրեական գործի վարույթը ենթակա է կարճման, իսկ ամբաստանյալ Լ.Նալբանդյանի նկատմամբ հարուցված քրեական հետապնդումը` դադարեցման, որպիսի հետևության հանգում է հետևյալ իրավական վերլուծությունների արդյունքներով.
ՀՀ քրեական դտավարական օրենսգրքի 33-րդ հոդվածի համաձայն` մասնավոր մեղադրանքի գործեր են համարվում նույն օրենսգրքի 183-րդ հոդվածում նախատեսված հանցագործությունների վերաբերյալ գործերը։
Ի թիվս ՀՀ քրեական դատավարական օրենսգրքի 183-րդ հոդվածում թվարկվածների` ՀՀ քրեական օրենսգրքի …..(…) 177-րդ հոդվածի 1-ին մասով նախատեսված հանցագործությունների վերաբերյալ գործերը ևս հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման։ Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը։
ՀՀ քրեական դատավարական օրենսգրքի 35-րդ հոդվածի 1-ին մասի 5-րդ կետի համաձայն` քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարական օրենսգրքով հատկապես նախատեսված դեպքերում տուժողը հաշտվել է կասկածյալի կամ մեղադրյալի հետ։ Նույն հոդվածի 5-րդ մասի համաձայն` Դատարանը, հայտնաբերելով քրեական հետապնդումը բացառող հանգամանքներ, լուծում է ամբաստանյալի նկատմամբ քրեական հետապնդումը դադարեցնելու հարցը։
ՀՀ քրեական դատավարական օրենսգրքի 36-րդ հոդվածի համաձայն` մասնավոր հետապնդման գործերի վարույթը կարճվում է և փաստվում է քրեական հետապնդում իրականացնելու հրաժարում, երբ տուժողն հաշտվում է մեղադրյալի հետ։
ՀՀ քրեական դատավարական օրենսգրքի 64-րդ հոդվածի 2-րդ մասի համաձայն` մեղադրյալը, ում վերաբերյալ գործը նշանակված է դատական քննության, կոչում է ամբաստանյալ, հետևաբար` ՀՀ քրեական դատավարական օրենսգրքի 35-րդ և 36-րդ հոդվածների վերոնշյալ մեկնաբանությունները վերաբերելի են նաև սույն գործով ամբաստանյալի կարգավիճակ ունեցող Լևոն Նալբանդյանի նկատմամբ։
ՀՀ քրեական դատավարական օրենսգքրի 294-րդ հոդվածի 2-րդ մասի համաձայն` գործով վարույթը կարճելու և/կամ քրեական հետապնդումը դադարեցնելու մասին որոշումն ընդգրկում է նախնական քննության փուլում ընտրված խափանման և վնասի հատուցման ապահովման միջոցները, քրեադատավարական հարկադրանքի այլ միջոցները վերացնելու մասին որոշում, ինչպես նաև որոշում է իրեղեն ապացույցների ճակատագրի հարցը։
ՀՀ քրեական դատավարական օրենսգրքի 151-րդ հոդվածի 2-րդ մասի համաձայն` խափանման միջոցը վերացվում է, երբ վերանում է դրա անհրաժեշտությունը, հետևաբար` վերոնշյալ տրամաբանությամբ ամբաստանյալ Լ.Նալբանդյանի նկատմամբ ընտրված խափանման միջոց չհեռանալու մասին ստորագրությունը ենթակա է վերացման` սույն որոշումն օրինական ուժի մեջ մտնելուց հետո։
Դատարանը գտնում է, որ իրեղեն ապացույց ճանաչված և տուժող Ա.Սարգսյանին ի պահ հանձնված նրա «PRIMA XDP-980» մոդելի DVD ֆորմատի նվարգակիչն անհրաժեշտ է թողնել նրա տնօրինությանը` սույն որոշումն օրինական ուժի մեջ մտնելուց հետո։
Դատարանն արձանագրում է նաև, որ սույն քրեական գործով քաղաքացիական հայց չի ներկայացվել, ամբաստանյալ Լ.Նալբանդյանի շարժական կամ անշարժ գույքի նկատմամբ արգելանքի որևէ միջոց չի կիրառվել։
Վերոգրյալի հիման վրա, ղեկավարվելով ՀՀ քրեական դատավարական օրենսգրքի 35-րդ հոդվածի 1-ին մասի 5-րդ կետով, 41-րդ հոդվածի 2-րդ մասի 8-րդ կետով, 119-րդ, 183-րդ, 294-րդ և 313-րդ հոդվածներով, ինչպես նաև 379-րդ հոդվածի 1-ին մասի 1-ին կետով, Դատարանը

Ո Ր Ո Շ Ե Ց `

1. Ամբաստանյալ Լևոն Գուրգենի Նալբանդյանի նկատմամբ ՀՀ քրեական օրենսգրքի 177-րդ հոդվածի 1-ին մասով հարուցված քրեական հետապնդումը դադարեցնել, թիվ ԵԿԴ/0063/01/12 քրեական գործի վարույթը կարճել` վերջինիս հետ տուժող Արմեն Սարգսյանի հաշտության հիմքով։
2. Վերացնել ամբաստանյալ Լևոն Նալբանդյանի նկատմամբ որպես խափանման միջոց ընտրված չհեռանալու մասին ստորագրությունը։
3. Իրեղեն ապացույց ճանաչված և տուժող Արմեն Սարգսյանին ի պահ հանձնված «PRIMA XDP-980» մոդելի DVD ֆորմատի նվարգակիչը թողնել վերջինիս տնօրինությանը։
4. Սույն որոշումը կարող է բողոքարկվել ՀՀ քրեական վերաքննիչ դատարան` հրապարակման օրվանից մեկամսյա ժամկետում։

ԴԱՏԱՎՈՐ` Ա.ՎԱՐԴԱՆՅԱՆ