ԵԿԴ/0041/01/12







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«19» ապրիլի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Հ.Ենոքյան
պաշտպան Կ.Քամալյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Սասունիկ Բագրատի Անդրեասյանի` ծնված 1955 թվականի փետրվարի 13-ին Թալին քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնալուծված, նախկինում չդատապարտված, չի աշխատում, հաշվառված է Երևան քաղաքի Մաշտոցի պողոտայի 7-րդ շենքի 46-րդ բնակարանում, մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2011 թվականի մայիսի 16-ին ՀՀ գլխավոր դատախազության պետական շահերի պաշտպանության վարչության պետ Ա.Նիկողոսյանի որոշմամբ ՀՀ քրեական օրենսգրքի 179-րդ հոդվածի 3-ին մասի 1-ին կետով, 308-րդ հոդվածի 2-րդ մասով և 314-րդ հոդվածի 1-ին մասով նախատեսված հանցագործությունների հատկանիշներով հարուցվել և վարույթ է ընդունվել թիվ 61203311 քրեական գործը:
2011 թվականի մայիսի 20-ին ՀՀ ոստիկանության քննչական գլխավոր վարչության ՀԿԳ քննության վարչության 1-ին բաժնի պետի տեղակալ Է.Հակոբյանի որոշմամբ թիվ 61203311 քրեական գործն ընդունվել է վարույթ:
2011 թվականի օգոստոսի 9-ին ՀՀ ոստիկանության պետի տեղակալ, քննչական գլխավոր վարչության պետ Գ.Համբարձումյանի որոշմամբ թիվ 61203311 քրեական գործի նախաքննությունը հանձնարարվել է քննչական խմբին: Քննչական խմբի ղեկավար է նշանակվել ՀՀ ոստիկանության քննչական գլխավոր վարչության ՀԿԳ քննության վարչության 1-ին բաժնի պետի տեղակալ Է.Հակոբյանը:
2011 թվականի օգոստոսի 9-ին ՀՀ ոստիկանության քննչական գլխավոր վարչության ՀԿԳ քննության վարչության 1-ին բաժնի պետի տեղակալ Է.Հակոբյանի որոշմամբ թիվ 61203311 քրեական գործն ընդունվել է վարույթ:
2012 թվականի փետրվարի 1-ին ՀՀ ոստիկանության քննչական գլխավոր վարչության ՀԿԳ քննության վարչության 1-ին բաժնի պետի տեղակալ Է.Հակոբյանի որոշմամբ թիվ 61203311 քրեական գործով Սասունիկ Բագրատի Անդրեասյանին մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով:
2012 թվականի մարտի 20-ին ՀՀ ոստիկանության քննչական գլխավոր վարչության ՀԿԳ քննության վարչության 1-ին բաժնի պետի տեղակալ Է.Հակոբյանի որոշմամբ թիվ 61203311 քրեական գործից անջատվել է Սասունիկ Բագրատի Անդրեասյանի վերաբերյալ մասը, որին շնորհվել է 69102612 համարը:
2012 թվականի մարտի 23-ին Սասունիկ Բագրատի Անդրեասյանի վերաբերյալ թիվ 69102612 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0041/01/12 համարը:
Սասունիկ Բագրատի Անդրեասյանին մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով` այն արարքի համար, որ նա, հանդիսանալով 2007 թվականի հունվարի 14-ից հանգուցյալ կենսաթոշակառու Զարիկ Հարությունյանի որդին, 2007-2010 թվականները ընկած ժամանակահատվածում Հայաստանի Հանրապետության սոցիալական ապահովության պետական ծառայության աշխատակազմի վճարային ծառայության Երևան քաղաքի «Կենտրոն-1» տարածքային բաժանմունքից խարդախությամբ հափշտակել է խոշոր չափերի` 1.119.200 ՀՀ դրամ կենսաթոշակի գումար, որն արտահայտվել է հետևյալում. Սասունիկ Անդրեասյանը, ունենալով խարդախությամբ խոշոր չափերի հասնող գումար հափշտակելու ուղղակի դիտավորություն, կենսաթոշակառու մոր մահվան վկայականը չի ներկայացրել «Կենտրոն-2» տարածքային բաժին, այդ փաստը թաքցնելով և չարաշահելով նույն տարածքային բաժնի վճարող-տեսուչ Ազնիվ Ռուշանյանի վստահությունը` վերջինին ներկայացրել է, թե իբր մայրն անկողնային հիվանդ է, այդ եղանակով խաբեությամբ յուրաքանչյուր ամիս անհիմն ստացել է մոր անվամբ դուրս գրված ընդհանուր` 1.119.200 ՀՀ դրամ կենսաթոշակի գումարը` պետությանը պատճառելով խոշոր չափերի հասնող գույքային վնաս:
2. Արագացված դատական քննություն.
Մինչ դատաքննությունն սկսելն ամբաստանյալ Սասունիկ Բագրատի Անդրեասյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Սասունիկ Բագրատի Անդրեասյանը կատարել է արարք` նախատեսված ՀՀ քրեական օրենսգրքի 178-րդ հոդվածի 2-րդ մասի 2-րդ կետով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ՀՀ ոստիկանության ինֆորմացիոն կենտրոնի պահանջագիրը, բնութագիրը, «ՎՏԲ-Հայաստան բանկ» ՓԲ ընկերության կողմից տրված անդորրագրերը և դիպլոմի պատճենը, եկավ հետևյալ եզրահանգման.
Սասունիկ Անդրեասյանի անձը դրականորեն բնութագրող հանգամանքներ են բարձրագույն կրթություն ունենալը և կատարածի համար զղջալը:
Սասունիկ Անդրեասյանի պատասխանատվությունն ու պատիժը մեղմացնող հանգամանք է հանցագործությամբ պատճառված վնասն ամբողջությամբ կամովին վերականգնելը:
Դատարանը գտնում է, որ Սասունիկ Անդրեասյանի պատասխանատվությունն ու պատիժը մեղմացնող հանգամանքներ պետք է դիտել նաև նախկինում արատավորված` դատապարտված չլինելը և դրականորեն բնութագրվելը:
Դատարանը միաժամանակ արձանագրում է, որ Սասունիկ Անդրեասյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Սասունիկ Անդրեասյանը ենթակա է քրեական պատասխանատվության և պատժի:
Դատարանը, հաշվի առնելով Սասունիկ Անդրեասյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պատիժ պետք է նշանակել տուգանքի ձևով:
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման (այսուհետ նաև` Համաներման որոշում) 1-ին կետի 3-րդ ենթակետի համաձայն` պատժից պետք է ազատել, բացառությամբ այդ որոշման 8-րդ կետի 4-րդ և 5-րդ ենթակետերով նախատեսված դեպքերի, այն անձանց, որոնց նկատմամբ նշանակվել է ազատությունից զրկելու հետ չկապված պատիժ: Նույն որոշման 15-րդ կետի համաձայն` Համաներման որոշումը կիրառվում է այն անձանց նկատմամբ, որոնք հանցագործություն են կատարել մինչև 2011 թվականի մայիսի 1-ը ներառյալ, իսկ Սասունիկ Անդրեասյանը հանրորեն վտանգավոր արարքը կատարել է 2007-2010 թվականներն ընկած ժամանակահատվածում: Համաներման որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը, սակայն սույն քրեական գործի նյութերում բացակայում է Համաներման որոշման 9-րդ կետում նշված այն սահմանափակումները, որոնք կարող են արգելք հանդիսանալ Սասունիկ Անդրեասյանի նկատմամբ Համաներման որոշման կիրառման համար: Հիմք ընդունելով վերը նշվածը` Դատարանը գտնում է, որ ամբաստանյալ Սասունիկ Անդրեասյանին Համաներման որոշման կիրառմամբ պետք է ազատել նշանակված պաժից:
Դատարանը գտնում է, որ Սասունիկ Անդրեասյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերն ամբաստանյալ Սասունիկ Անդրեասյանից ենթակա չեն բռնագանձման, քանի որ հանցագործությամբ պատճառված գույքային վնասը վերականգնված է: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մաuի 2-8-րդ կետերով նախատեսված դատական ծախսերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի` ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը

ՎՃՌԵՑ

Սասունիկ Բագրատի Անդրեասյանին մեղավոր ճանաչել ՀՀ քրեական օրենսգրքի 178-րդ հոդվածի 2-րդ մասի 2-րդ կետով և պատիժ նշանակել տուգանք` նվազագույն աշխատավարձի ութհարյուրապատիկի չափով:
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման 1-ին կետի 3-րդ ենթակետի կիրառմամբ Սասունիկ Բագրատի Անդրեասյանին պատժից ազատել:
Սասունիկ Բագրատի Անդրեասյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին մասի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ