ԵԿԴ/0033/01/12







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«5» ապրիլի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Ա.Գալստյան
տուժող Լ.Զաքարյան
պաշտպան Ն.Մեհրաբյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Գալուստ Օնիկի Հակոբյանի` ծնված 1975 թվականի օգոստոսի 30-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, նախկինում չդատապարտված, չի աշխատում, հաշվառված է Երևան քաղաքի Սունդուկյան փողոցի 5/3-րդ տանը, մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով, արգելանքի տակ է 2012 թվականի փետրվարի 26-ից:
1. Գործի դատավարական նախապատմությունը.
2010 թվականի հուլիսի 7-ին ՀՀ ոստիկանության Կենտրոնականի քննչական բաժնի ավագ քննիչ Հ.Սարգսյանի որոշմամբ ՀՀ քրեական օրենսգրքի 112-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 13133110 քրեական գործը:
2010 թվականի հուլիսի 15-ին ՀՀ ոստիկանության Կենտրոնականի քննչական բաժնի ավագ քննիչ Հ.Սարգսյանի որոշմամբ թիվ 13133110 քրեական գործով Գալուստ Օնիկի Հակոբյանը ՀՀ քրեական օրենսգրքի 112-րդ հոդվածի 1-ին մասով ներգրավվել է որպես մեղադրյալ:
2010 թվականի հուլիսի 15-ին ՀՀ ոստիկանության Կենտրոնականի քննչական բաժնի ավագ քննիչ Հ.Սարգսյանի որոշմամբ թիվ 13133110 քրեական գործով մեղադրյալ Գալուստ Օնիկի Հակոբյանի նկատմամբ հայտարարվել է հետախուզում:
2010 թվականի օգոստոսի 30-ին ՀՀ ոստիկանության Կենտրոնականի քննչական բաժնի ավագ քննիչ Հ.Սարգսյանի որոշմամբ թիվ 13133110 քրեական գործով Գալուստ Օնիկի Հակոբյանին առաջադրված մեղադրանքը փոփոխվել է և նրան նոր մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով:
2010 թվականի սեպտեմբերի 6-ին ՀՀ ոստիկանության Կենտրոնականի քննչական բաժնի ավագ քննիչ Հ.Սարգսյանի որոշմամբ թիվ 13133110 քրեական գործով վարույթը կասեցվել է մինչև մեղադրյալ Գալուստ Օնիկի Հակոբյանին հայտնաբերելը:
2012 թվականի փետրվարի 27-ին ՀՀ ոստիկանության Կենտրոնականի քննչական բաժնի ՀԿԳ ավագ քննիչ Հ.Սարգսյանի որոշմամբ թիվ 13133110 քրեական գործով կասեցված վարույթը վերսկսվել է:
2012 թվականի մարտի 14-ին Գալուստ Օնիկի Հակոբյանի վերաբերյալ թիվ 13133110 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0033/01/12 համարը:
Գալուստ Օնիկի Հակոբյանին մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով` այն արարքի համար, որ նա 2010 թվականի հուլիսի 7-ին` ժամը 03:30-ի սահմաններում, Երևան քաղաքի Թումանյան փողոցի 4 հասցեում գործող «Նիկա» բար-սրճարանի դիմաց` մայթեզրին, տեղի ունեցած վիճաբանության ընթացքում իր մոտ եղած դանակով դիտավորությամբ հարվածել է Լևոն Մանվելի Զաքարյանի դեմքին և կրծքավանդակի ձախ հատվածներին` վերջինի առողջությանը պատճառելով կյանքին վտանգ սպառնացող ծանր վնաս` մեծ ճարպոնի հեռացումով, ներքին արյունահոսությունով, երկրորդից երրրորդ աստիճանի հեմոռագիկ շոկով ուղեկցված ձախից կրծքավանդակի ծակած-կտրած թափածակող վերքի ձևով, ինչպես նաև դեմքի ձախ կեսի շրջանում ականջախեցու վերին եզրից մինչև բերանի ձախ անկյունը ձգվող` իրենց չափերով մեծ և երկուսից ավելի անատոմիական միավոր ընդգրկող, դեմքի գեղագիտական ամբողջականությունը խախտող և այն այլանդակող, 10սմ երկարությամբ և 0,5-2սմ լայնությամբ անջնջելի սպիների ձևով:
2. Արագացված դատական քննություն.
Մինչ դատաքննությունն սկսելն ամբաստանյալ Գալուստ Օնիկի Հակոբյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Գալուստ Օնիկի Հակոբյանը կատարել է արարք` նախատեսված ՀՀ քրեական օրենսգրքի 112-րդ հոդվածի 1-ին մասով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ՀՀ ոստիկանության ինֆորմացիոն կենտրոնի պահանջագիրը, բնութագրերը, Արաբկիր վարչական շրջանի թիվ 10 թաղային կոմիտեի նախագահի կողմից տրված տեղեկանքը, տուժող Լևոն Զաքարյանի կողմից ստորագրված ստացականը և ամբաստանյալի մոր` Նոռա Պարիկյանի դիմումը, եկավ հետևյալ եզրահանգման.
Գալուստ Հակոբյանը անձը դրականորեն բնութագրող հանգամանքներ են փաստական ամուսնական հարաբերությունների մեջ լինելը, ինքնակամ ներկայանալը և կատարածի համար զղջալը:
Դատարանը գտնում է, որ Գալուստ Հակոբյանի պատասխանատվությունն ու պատիժը մեղմացնող հանգամանքներ են տուժողի բուժման համար ծախսված 500.000 ՀՀ դրամը փոխհատուցելը, նախկինում արատավորված` դատապարտված չլինելը և դրականորեն բնութագրվելը:
Դատարանը միաժամանակ արձանագրում է, որ Գալուստ Հակոբյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Գալուստ Հակոբյանը ենթակա է քրեական պատասխանատվության և պատժի:
Դատարանը, հաշվի առնելով Գալուստ Հակոբյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Գալուստ Հակոբյանի կատարած արարքի համար ՀՀ քրեական օրենսգրքի 112-րդ հոդվածի 1-ին մասի սանկցիայով նախատեսված է պատիժ միայն ազատազրկման ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի:
ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Գալուստ Հակոբյանի պատժի կրման սկիզբը պետք է հաշվել 2012 թվականի փետրվարի 26-ից, քանի որ նա արգելանքի է վերցվել այդ օրը:
Դատարանը գտնում է, որ Գալուստ Հակոբյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո` 2010 թվականի օգոստոսի 30-ի որոշմամբ իրեղեն ապացույց ճանաչված` արնանման հետքերով 6 բամբակե խծուծները պետք է ոչնչացնել, Լևոն Զաքարյանի հագուստները պետք է վերադարձնել նրան, իսկ «Դեյվու» մակնիշի տաքսի մեքենայի առջևի աջ նստատեղի մեջքի հատվածի մոխրագույն պաստառը` թողնել Ալիկ Գալստյանի տնօրինությանը:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերը դատարանի նախաձեռնությամբ ամբաստանյալ Գալուստ Հակոբյանից ենթակա չեն բռնագանձման, քանի որ տուժողի բուժման համար ծախսված 500.000 ՀՀ դրամը փոխհատուցվել է: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մաuի 2-8-րդ կետերով նախատեսված դատական ծախսերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի` ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը
ՎՃՌԵՑ

Գալուստ Օնիկի Հակոբյանին մեղավոր ճանաչել ՀՀ քրեական օրենսգրքի 112-րդ հոդվածի 1-ին մասով և պատիժ նշանակել ազատազրկում` 3 (երեք) տարի ժամկետով` պատժի կրման սկիզբը հաշվելով 2012 թվականի փետրվարի 26-ից:
Գալուստ Օնիկի Հակոբյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո` 2010 թվականի օգոստոսի 30-ի որոշմամբ իրեղեն ապացույց ճանաչված` արնանման հետքերով 6 բամբակե խծուծները ոչնչացնել, Լևոն Զաքարյանի հագուստները վերադարձնել նրան, իսկ «Դեյվու» մակնիշի տաքսի մեքենայի առջևի աջ նստատեղի մեջքի հատվածի մոխրագույն պաստառը թողնել Ալիկ Գալստյանի տնօրինությանը:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ