ԵԿԴ/0026/01/12







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«30» մարտի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Ա.Փանոսյան
տուժողի իրավահաջորդ Մ.Սուքիասյան
տուժողի իրավահաջորդի ներկայացուցիչ Ա.Սուքիասյան
պաշտպան Ռ.Բաբայան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Արտակ Էմիլի Խաչատրյանի` ծնված 1972 թվականի հունիսի 3-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, նախկինում չդատապարտված, չի աշխատում, հաշվառված է Երևան քաղաքի Վրացական փողոցի 8-րդ շենքի 2-րդ բնակարանում, մեղադրանք է առաջադրվել ՀՀ քրեական օրենսգրքի 242-րդ հոդվածի 2-րդ մասով, արգելանքի տակ է 2011 թվականի դեկտեմբերի 1-ից,
1. Գործի դատավարական նախապատմությունը.
2011 թվականի դեկտեմբերի 1-ին ՀՀ ոստիկանության Երևան քաղաքի քննչական վարչության ՃՏՀ քննության բաժնի ավագ քննիչ Ա.Վանյանի որոշմամբ ՀՀ քրեական օրենսգրքի 242-րդ հոդվածի 2-րդ մասով և 244-րդ հոդվածի նախատեսված հանցագործության հատկանիշներով հարուցվել և վարույթ է ընդունվել թիվ 60134911 քրեական գործը:
2011 թվականի դեկտեմբերի 3-ին ՀՀ ոստիկանության Երևան քաղաքի քննչական վարչության ՃՏՀ քննության բաժնի ավագ քննիչ Ա.Վանյանի որոշմամբ թիվ 60134911 քրեական գործով Արտակ Էմիլի Խաչատրյանին մեղադրանք է առաջադրվել ՀՀ քրեական օրենսգրքի 242-րդ հոդվածի 2-րդ մասով և 244-րդ հոդվածով:
2012 թվականի փետրվարի 10-ին ՀՀ ոստիկանության Երևան քաղաքի քննչական վարչության ՃՏՀ քննության բաժնի ավագ քննիչ Ա.Վանյանի որոշմամբ թիվ 60134911 քրեական գործով Արտակ Էմիլի Խաչատրյանի նկատմամբ ՀՀ քրեական օրենսգրքի 244-րդ հոդվածով քրեական հետապնդումը դադարեցվել է և նրան նոր մեղադրանք է առաջադրվել ՀՀ քրեական օրենսգրքի 242-րդ հոդվածի 2-րդ մասով:
2012 թվականի փետրվարի 24-ին Արտակ Էմիլի Խաչատրյանի վերաբերյալ թիվ 60134911 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0026/01/12 համարը:
Արտակ Էմիլի Խաչատրյանին մեղադրանք է առաջադրվել ՀՀ քրեական օրենսգրքի 242-րդ հոդվածի 2-րդ մասով` այն արարքի համար, որ նա 2011 թվականի դեկտեմբերի 1-ին` ժամը 01:00-ի սահմաններում, իր անձնական օգտագործման «Մերսեդես-Բենց» մակնիշի 81ՍT111 պետհամարանիշի ավտոմեքենայով Երևան քաղաքի Գայի պողոտայի կողմից Հերացի փողոցով դեպի Խանջան փողոցի ուղղությամբ երթևեկելիս, խախտել է ՃԵԿ-ի 65-րդ և 66-րդ կետերի և «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ մասի պահանջները, այն է` մեքենան վարելով տվյալ ճանապարհահատվածում երթևեկության համար սահմանված թույլատրելի առավելագույն 60 կմ/ժամ արագությունը գերազանցող` շուրջ 70 կմ/ժամ արագությամբ, որով իրականացրել է մեքենայի ոչ պատշաճ և անվտանգ կառավարում, որի արդյունքում դեպքի վայրի դեպի ձախ շրջադարձային հատվածում կորցրել է մեքենայի կառավարումն ապահովելու և տվյալ շրջադարձն իր ընթացքի ուղղության երթևեկելի ուղեմասով առանց հանդիպակաց ուղեմաս մուտք գործելու, անվտանգ կատարելու հնարավորությունը, տվյալ շրջադարձային հատվածում մեքենան դուրս է բերել հանդիպակաց երթևեկելի ուղեմաս, ինչը վտանգավոր է եղել երթևեկության և այդ ուղեմասով մոտեցող «Զազ-Սենս» մակնիշի Տ6954 պետհամարանիշի ավտոմեքենայի վարորդ Ռ.Սուքիասյանի համար, որի հետևանքով ընդհարվել է նշված ավտոմեքենային, որի արդյունքում ավտովարորդ Ռ.Սուքիասյանին անզգուշությամբ պատճառել է մահ` ինքն իրեն զրկելով ավտովթարը կանխելու տեխնիկական հնարավորությունից:
2. Արագացված դատական քննություն.
Մինչ դատաքննությունն սկսելն ամբաստանյալ Արտակ Էմիլի Խաչատրյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արտակ Էմիլի Խաչատրյանը կատարել է արարք` նախատեսված ՀՀ քրեական օրենսգրքի 242-րդ հոդվածի 2-րդ մասով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ՀՀ ոստիկանության ինֆորմացիոն կենտրոնի պահանջագիրը, բնութագիրը, ինքնակամ ներկայանալու մասին արձանագրությունը, ընտանիքի կազմի վերաբերյալ տեղեկանքը, Արաբկիրի զինվորական կոմիսարի կողմից տրված տեղեկանքը, առողջական վիճակի վերաբերյալ փաստաթղթերը, եկավ հետևյալ եզրահանգման.
Արտակ Խաչատրյանը անձը դրականորեն բնութագրող հանգամանք է կատարածի համար զղջալը:
Արտակ Խաչատրյանի պատասխանատվությունն ու պատիժը մեղմացնող հանգամանքներ են մեղայականով ներկայանալը, խնամքին 14 տարին չլրացած երեխայի (Արթուր Ավետիսի Մխիթարյան` ծնված 2011 թվականի հունիսի 3-ին) և հղի կնոջ առկայությունը:
Դատարանը գտնում է, որ Արտակ Խաչատրյանը պատասխանատվությունն ու պատիժը մեղմացնող հանգամանքներ պետք է դիտել նաև վատառողջ լինելը, նախկինում արատավորված` դատապարտված չլինելը, դրականորեն բնութագրվելը և վատառողջ հորը խնամելը:
Դատարանը միաժամանակ արձանագրում է, որ Արտակ Խաչատրյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Արտակ Խաչատրյանը ենթակա է քրեական պատասխանատվության և պատժի:
Դատարանը, հաշվի առնելով Արտակ Խաչատրյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալը, պատասխանատվությունն ու պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ Արտակ Խաչատրյանի կողմից կատարված արարքի համար ՀՀ քրեական օրենսգրքի 242-րդ հոդվածի 2-րդ մասի սանկցիայով` որպես հիմնական պատիժ, նախատեսված է միայն ազատազրկում, իսկ որպես պարտադիր լրացուցիչ պատիժ` որոշակի պաշտոններ զբաղեցնելու և որոշակի գործունեությամբ զբաղվելու իրավունքից զրկել, գտնում է, որ նրա նկատմամբ հիմնական պատիժ պետք է նշանակել ազատազրկման ձևով, իսկ լրացուցիչ պատիժ` որոշակի գործունեությամբ` վարորդությամբ զբաղվելու իրավունքից զրկելու ձևով, որը նա պետք է կրի:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Արտակ Խաչատրյանի պատժի կրման սկիզբը պետք է հաշվել 2011 թվականի դեկտեմբերի 1-ից, քանի որ նա ձերբակալվել է այդ օրը, իսկ 2011 թվականի դեկտեմբերի 3-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Արտակ Խաչատրյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
ՀՀ քրեական դատավարության օրենսգրքի 360-րդ հոդվածի 1-ին մասի 10-րդ կետի համաձայն` դատավճիռ կայացնելիս դատարանը լուծում է այն հարցը, թե քաղաքացիական հայցը ենթակա է արդյոք բավարարման, ում օգտին և ինչ չափով:
Սույն քրեական գործով տուժողի իրավահաջորդ Մարտին Սերյոժայի Սուքիասյանը ներկայացրել է քաղաքացիական հայց, որով պահանջել է ամբաստանյալ Արտակ Էմիլի Խաչատրյանից բռնագանձել հանցագործությամբ պատճառված վնասը` թաղման և հոգեհացի արարողության համար ծախսված 3.000.000 ՀՀ դրամը: Դատարանը, նկատի ունենալով, որ ամբաստանյալ Արտակ Խաչատրյանը կամավոր ընդունել է նշված քաղաքացիական հայցի պահանջը, գտնում է, որ Մարտին Սերյոժայի Սուքիասյանի քաղաքացիական հայցը պետք է բավարարել, և Արտակ Էմիլի Խաչատրյանից հօգուտ Մարտին Սերյոժայի Սուքիասյանի, որպես հանցագործությամբ պատճառված վնաս, բռնագանձել 3.000.000 (երեք միլիոն) ՀՀ դրամ, քանի որ դա չի հակասում օրենքին և չի վերաբերվում այլ անձանց իրավունքներին:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերը դատարանի նախաձեռնությամբ ամբաստանյալ Արտակ Խաչատրյանից ենթակա չեն բռնագանձման, քանի որ հանցագործությամբ պատճառված վնասի հատուցման համար տուժողի իրավահաջորդի կողմից ներկայացված քաղաքացիական հայցը վերոգրյալ հիմնավորմամբ պետք է բավարարվի: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մաuի 2-8-րդ կետերով նախատեսված դատական ծախսերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի` ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը

ՎՃՌԵՑ

Արտակ Էմիլի Խաչատրյանին մեղավոր ճանաչել ՀՀ քրեական օրենսգրքի 242-րդ հոդվածի 2-րդ մասով և պատիժ նշանակել ազատազրկում` 1 (մեկ) տարի ժամկետով` զրկելով որոշակի գործունեությամբ` վարորդությամբ զբաղվելու իրավունքից` 2 (երկու) տարի ժամկետով:
Արտակ Էմիլի Խաչատրյանի նկատմամբ ազատազրկման ձևով նշանակված պատժի կրման սկիզբը հաշվել 2011 թվականի դեկտեմբերի 1-ից:
Արտակ Էմիլի Խաչատրյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Մարտին Սերյոժայի Սուքիասյանի քաղաքացիական հայցը բավարարել. Արտակ Էմիլի Խաչատրյանից հօգուտ Մարտին Սերյոժայի Սուքիասյանի, որպես հանցագործությամբ պատճառված վնաս, բռնագանձել 3.000.000 (երեք միլիոն) ՀՀ դրամ:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ