ԵԿԴ/0017/01/12







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«20» մարտի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Գ.Հարությունյան
պաշտպան Ռ.Թովմասյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Նարեկ Հովհաննեսի Զաքարյանի` ծնված 1991 թվականի հուլիսի 14-ին Արմավիրի մարզի Մերձավան գյուղում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, նախկինում չդատապարտված, չի աշխատում, բնակվում է Արմավիրի մարզի Մերձավան գյուղի Երևանյան խճուղու 4-րդ նրբանցքի 7-րդ շենքի 4-րդ բնակարանում, մեղադրանք է առաջադրվել ՀՀ քրեական օրենսգրքի 244-րդ հոդվածով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2011 թվականի դեկտեմբերի 29-ին ՀՀ ոստիկանության Երևան քաղաքի քննչական վարչության ՃՏՀ քննության բաժնի ավագ քննիչ Գ.Հարությունյանի որոշմամբ ՀՀ քրեական օրենսգրքի 244-րդ հոդվածով նախատեսված հանցագործության հատկանիշներով հարուցվել և վարույթ է ընդունվել թիվ 60139711 քրեական գործը:
2012 թվականի փետրվարի 10-ին ՀՀ ոստիկանության Երևան քաղաքի քննչական վարչության ՃՏՀ քննության բաժնի ավագ քննիչ Գ.Հարությունյանի որոշմամբ թիվ 60139711 քրեական գործով Նարեկ Հովհաննեսի Զաքարյանին մեղադրանք է առաջադրվել ՀՀ քրեական օրենսգրքի 244-րդ հոդվածով:
2012 թվականի փետրվարի 17-ին Նարեկ Հովհաննեսի Զաքարյանի վերաբերյալ թիվ 60139711 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0017/01/12 համարը:
Նարեկ Հովհաննեսի Զաքարյանին մեղադրանք է առաջադրվել ՀՀ քրեական օրենսգրքի 244-րդ հոդվածով` այն արարքի համար, որ նա 2011 թվականի դեկտեմբերի 8-ին` ժամը 21:10-ի սահմաններում, խախտելով «Ճանապարհային երթևեկության անվտանգության ապահովման մասին» ՀՀ օրենքի 24-րդ հոդվածի 5-րդ կետի պահանջը` չունենալով վարորդական իրավունքի վկայական, «Մերսեդես» մակնիշի 23ԼՏ294 պետհամարանիշի ավտոմեքենան վարել է Երևան քաղաքի Մյասնիկյան պողոտայի կողմից Հերացի փողոցով դեպի Խանջյան փողոցի ուղղությամբ: Հասնելով Հերացի փողոցում գտնվող ավտոմեքենաների համար նախատեսված գետնանցման աջ շրջադարձային ճանապարհահատվածին` թույլ է տվել ՃԵԿ-ի 65-րդ, 66-րդ կետերի և «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ կետի պահանջներին հակասող գործողություններ, այն է` ավտոմեքենան վարել է բնակավայրում սահմանված թույլատրելի 60 կմ/ժամ արագությունը գերազանցող` մոտ 70-80 կմ/ժամ արագությամբ, հաշվի չի առել ճանապարհային պայմանները` շրջադարձային հատվածով երթևեկելիս, ինքն իրեն զրկել է կանոնների պահանջներին համապատասխան լիարժեք կառավարումից, որի տեխնիկական հնարավորությունն ունեցել է, և ստեղծելով վթարային իրադրություն` դուրս է եկել հանդիպակաց ուղեմաս և իր ավտոմեքենայի առջևի ձախ մասով ընդհարվել հանդիպակաց ուղեմասով ընթացող, Տիգրան Սարգսի Գևորգյանի վարած «Օպել Վեկտրա» մակնիշի 06SO787 պետհամարանիշի ավտոմեքենային, որի պատճառով էլ վերջինն ընդհարվել է համընթաց ուղղությամբ ընթացող, Կարեն Իգորի Գմիրուկի վարած «ՎԱԶ-21134» մակնիշի 22ԼՕ152 պետհամարանիշի և Վարդան Սուրիկի Ղուկասյանի վարած «ՎԱԶ-2106» մակնիշի 62ՏԼ708 պետհամարանիշի ավտոմեքենաներին: Վթարի հետևանքով վարորդ Տիգրան Գևորգյանին անզգուշությամբ պատճառել է առողջության տևական քայքայումով միջին ծանրության մարմնական վնասվածքներ: Վթարից հետո Նարեկ Զաքարյանը, խախտելով «Ճանապարհային երթևեկության անվտանգության ապահովման մասին» ՀՀ օրենքի 24-րդ հոդվածի 2-րդ կետի «դ» ենթակետի պահանջը, թողել է ճանապարհատրանսպորտային պատահարի վայրը և հեռացել:
2. Արագացված դատական քննություն.
Մինչ դատաքննությունն սկսելն ամբաստանյալ Նարեկ Հովհաննեսի Զաքարյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Նարեկ Հովհաննեսի Զաքարյանը կատարել է արարք` նախատեսված ՀՀ քրեական օրենսգրքի 244-րդ հոդվածով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, ՀՀ ոստիկանության ինֆորմացիոն կենտրոնի պահանջագիրը և բնութագրերը, եկավ հետևյալ եզրահանգման.
Նարեկ Զաքարյանի անձը դրականորեն բնութագրող հանգամանքներ են ինքնախոստովանական ցուցմունքներ տալը և կատարածի համար զղջալը:
Դատարանը գտնում է, որ Նարեկ Զաքարյանի պատասխանատվությունն ու պատիժը մեղմացնող հանգամանքներ պետք է դիտել նախկինում արատավորված` դատապարտված չլինելը և դրականորեն բնութագրվելը:
Դատարանը միաժամանակ արձանագրում է, որ Նարեկ Զաքարյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Նարեկ Զաքարյանը ենթակա է քրեական պատասխանատվության և պատժի:
Դատարանը, հաշվի առնելով Նարեկ Զաքարյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Նարեկ Զաքարյանի կատարած արարքի համար ՀՀ քրեական օրենսգրքի 244-րդ հոդվածի սանկցիայով նախատեսված է պատիժ նաև տուգանքի ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար նրա նկատմամբ պատիժ պետք է նշանակել տուգանքի ձևով:
Դատարանը գտնում է, որ Նարեկ Զաքարյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ դատական ծախսերն ամբաստանյալ Նարեկ Զաքարյանից ենթակա չեն բռնագանձման, քանի որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախս սույն քրեական գործով չկա, իսկ 2-8-րդ կետերով նախատեսված դատական ծախսերն արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի, ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը

ՎՃՌԵՑ

Նարեկ Հովհաննեսի Զաքարյանին մեղավոր ճանաչել ՀՀ քրեական օրենսգրքի 244-րդ հոդվածով և պատիժ նշանակել տուգանք` նվազագույն աշխատավարձի հարյուրհիսնապատիկի չափով:
Նարեկ Հովհաննեսի Զաքարյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին մասի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ