Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

17 փետրվարի 2012թ. ք. Երևան

ԵԿԴ-0004/01/12

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Է. Մկրտչյան,

մասնակցությամբ`
մեղադրող,
Հայաստանի Հանրապետության /այսուհետ ՀՀ/
գլխավոր դատախազության
ՀՀ ազգային անվտանգության
մարմիններում քննվող գործերով
վարչության դատախազ Գ. Տիգրանյանի,


դատարանում, դռնբաց դատական նիստում, քննեց գործն ըստ մեղադրանքի
Գառնիկ Դանիելի Սահակյանի `
ծնված 1980թ. հոկտեմբերի 22-ին Երևան քաղաքում, հայ, ՀՀ քաղաքացի, ամուսնացած, խնամքին մինչև տասնչորս տարեկան մեկ երեխա, նախկինում չդատված, չի աշխատում, բնութագրվում է դրական, հաշվառված է և բնակվում է Երևանի Ա. Խաչատրյան փողոցի թիվ 26/2 շենքի թիվ 47 բնակարանում, կալանքի տակ չէ, մեղադրվում է ՀՀ քրեական օրենսգրքի 325-րդ հոդվածի 1-ին մասով։


Գործի դատավարական նախապատմությունը

Թիվ 58216111 քրեական գործը ՀՀ ԱԱԾ քննչական վարչությունում հարուցվել է 2011թ. դեկտեմբերի 30-ին, ՀՀ քրեական օրենսգրքի 325-րդ հոդվածի 1-ին մասով, Սուսաննա Հովհաննիսյանի անվամբ իրավունք վերապահող պաշտոնական փաստաթուղթ կեղծելու և օգտագործելու դեպքի առթիվ։
Քննիչի 2012թ. հունվարի 24-ի որոշմամբ, Գարեգին Սուրենի Մկրտչյանի, Արթուր Ալբերտի Սարգսյանի, Ռոզա Գառնիկի Սաֆարյանի և Սուսաննա Խաչիկի Հովհաննիսյանի վերաբերյալ քրեական գործի մասը կարճվել է և նրանց նկատմամբ քրեական հետապնդում չի իրականացվել` հանցակազմի բացակայության պատճառաբանությամբ։
Ամբաստանյալ Գառնիկ Դանիելի Սահակյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 325-րդ հոդվածի 1-ին մասով` հետևյալ արարքի համար. «որ նա հանդիսանալով «Կանգուն» ՍՊ ընկերության տնօրեն՝ Ռոզա Սաֆարյանի որդին և փաստացի ղեկավարելով ընկերության գործունեությունը, 2011 թվականի հունիս ամսին Սուսաննա Խաչիկի Հովհաննիսյանին է տրամադրել իր կողմից պատրաստված, տնօրեն՝ Ռ.Սաֆարյանի փոխարեն ստորագրված և նույն ընկերության կնիքով կնիքված 20.06.2011թ աշխատանքի մասին կեղծ տեղեկանք, ըստ որի Սուսաննա Խաչիկի Հովհաննիսյանը իբր աշխատել է նշված ընկերությունում որպես մատուցողուհի և նրա աշխատավարձը կազմել է 150.000 դրամ, ինչի հիման վրա էլ վերջինս ՀՀ-ում Իտալիայի դեսպանությունից ստանալով Շենգենյան երկրներ մուտք գործելու արտոնագիր 19.07.2011թ ՀՀ-ից մեկնել է Վարշավա և մինչ օրս չի վերադարձել։»։
2012թ. հունվարի 30-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։

Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ Գառնիկ Դանիելի Սահակյանը հանդիսանալով «Կանգուն» ՍՊ ընկերության տնօրեն Ռոզա Սաֆարյանի որդին և փաստացի ղեկավարելով ընկերության գործունեությունը, 2011 թվականի հունիսին Սուսաննա Խաչիկի Հովհաննիսյանին է տրամադրել իր կողմից պատրաստված, տնօրեն Ռ. Սաֆարյանի փոխարեն ստորագրված և նույն ընկերության կնիքով կնիքված. 20.06.2011թ. ամսաթվով, աշխատանքի մասին կեղծ տեղեկանք, որի համաձայն, իբրև թե Սուսաննա Խաչիկի Հովհաննիսյանն աշխատել է նշված ընկերությունում որպես մատուցողուհի և նրա աշխատավարձը կազմել է 150.000 ՀՀ դրամ գումար։ Սուսաննա Խաչիկի Հովհաննիսյանն իրականում, 150.000 ՀՀ դրամ աշխատավարձով, նշված ընկերությունում որպես մատուցողուհի չի աշխատել։ Անհրաժեշտ փաստաթղթերի հետ միասին ներկայացնելով այդ կեղծ տեղեկանքը` Սուսաննա Հովհաննիսյանը ՀՀ-ում Իտալիայի դեսպանությունից ստացել է Շենգենյան երկրներ մուտք գործելու արտոնագիր, 19.07.2011թ ՀՀ-ից մեկնել է Վարշավա և մինչ օրս չի վերադարձել։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Գառնիկ Սահակյանը նախկինում դատված չի եղել, բնութագրվում է դրական, իրեն լիովին մեղավոր է ճանաչել և տվել է ինքնախոստովանական ցուցմունքներ, խնամքին ունի մինչև տասնչորս տարեկան մեկ երեխա։



Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Գառնիկ Դանիելի Սահակյանի ինքնախոստովանական ցուցմունքներով այն մասին, որ հանդիսանում է «Կանգուն» ՍՊ ընկերության տնօրեն Ռոզա Սաֆարյանի որդին։ Ընկերությունը փաստացի ղեկավարվել է իր կողմից։ 2011 թվականի մայիսից հունիս ամիսների ընթացքում, ընդամենը մեկ ամիս, իրենց մոտ որպես մատուցողուհի փաստացի աշխատել է Սուսաննա Հովհաննիսյանը և առձեռն ստացել է 70.000 ՀՀ դրամ գումար աշխատավարձ։ Բացի այդ, Ս. Հովհաննիսյանն ունեցել է թեյավճարի գումարներ, որոնց ընդանուր չափը կազմել է շուրջ 150.000 ՀՀ դրամ։ 2011թ. հունիսին, Սուսաննա Հովհաննիսյանը դիմելով իրեն` խնդրել է տալ տեղեկանք այն մասին, որ աշխատում է ընկերությունում և ստանում է աշխատավարձ։ Ս. Հովհաննիսյանը հայտնել է, որ տեղեկանքն անհրաժեշտ է` դեսպանություն ներկայացնելու և արտերկիր մեկնելու համար մուտքի արտոնագիր ստանալու համար։ Ինքը Սուսաննա Հովհաննիսյանին չի հայտնել, որ նա որպես աշխատակից իրականում գրանցված չէ ընկերությունում և օրինական կարգով նման տեղեկանք նրան հատկացվել չի կարող, այլ համաձայնվել է կատարել նրա խնդրանքը։ 20.06.2011թ. ամսաթվով կազմել և Սուսաննա Հովհաննիսյանին է տրամադրել կեղծ տեղեկանք այն մասին, իբրև թե նա աշխատում է «Կանգուն» ՍՊ ընկերությունում որպես մատուցողուհի և նրա աշխատավարձը կազմում է 150.000 ՀՀ դրամ գումար։ Տեղեկանքը կազմելու և տալու մասին իր մայրը՝ Ռոզա Սաֆարյանը տեղյակ չի եղել։ Նրա փոխարեն ինքը ստորագրել է նշված տեղեկանքը։ Նման քայլի է գնացել Սուսաննա Հովհաննիսյանին օգնելու համար։ Ինչպես իր մայրը, այնպես էլ Սուսաննա Հովհաննիսյանը տեղեկանքի` կեղծ լինելու մասին տեղյակ չեն եղել։
(դատական նիստի արձանագրություն, գ.թ.126-127)
Վկա Ռոզա Գառնիկի Սաֆարյանի ցուցմունքներով այն մասին, որ 2009 թվականի մայիսից հանդիսանում է «Կանգուն» ՍՊԸ տնօրենը։ Ընկերությունը փաստացի ղեկավարում է որդին՝ Գառնիկ Սաֆարյանը, ում տրամադրության տակ էլ գտնվում է ընկերության կնիքը։ Սուսաննա Հովհաննիսյանն աշխատել է «Կանգուն» ՍՊ ընկերությունում որպես մատուցողուհի, սակայն փաստացի գրանցված չի եղել ընկերությունում և նրա վերաբերյալ հաշվետվություն չի ներկայացվել, քանի որ նա գտնվել է փորձաշրջանում, որպես վարձատրություն ստացել է ամսեկան 70.000 ՀՀ դրամ գումար և թեյավճար։ Ինքը Ս. Հովհաննիսյանին աշխատանքի վայրի մասին տեղեկանք չի տվել։ Վերջին ժամանակահատվածում որդուց տեղեկացել է, որ նա Ս.Հովհաննիսյանին աշխատանքի վայրի մասին տեղեկանք է տրամադրել, ըստ որի` վերջինս աշխատում է «Կանգուն» ՍՊ ընկերությունում որպես մատուցողուհի և նրա ամսեկան աշխատավարձը կազմում է 150.000 ՀՀ դրամ գումար։ Տեղեկանքն իր փոխարեն ստորագրել և կնիքել է որդին։ Ս.Հովհաննիսյանը տեղյակ չի եղել, որ ինքը ընկերությունում որպես մատուցողուհի գրանցված չի եղել։
(դատական նիստի արձանագրություն, գ.թ. 114-115)
Վկա Արամ Սերյոժայի Արամյանի ցուցմունքներով այն մասին, որ 2009 թվականի մայիսից մինչ օրս աշխատում է «Կանգուն» ՍՊԸ-ում որպես գանձապահ-բարապան։ Սուսաննա Հովհաննիսյանը 2011 թվականի հունիսին աշխատել է նշված ընկերությունում որպես մատուցողուհի, սակայն ինքը տեղյակ չի եղել, թե նա ընկերությունում փաստացի գրանցված եղել է, թե ոչ։ Աշխատավարձը նա կանխիկ ստացել է ընկերության դրամարկղից։ Ինքը չի տեսել, որ Սուսաննան աշխատավարձ ստանալիս` որևէ փաստաթուղթ ստորագրի։ Թե ով և ինչ հանգամանքներում է նրան աշխատավարձի մասին տեղեկանք տվել` իրեն հայտնի չէ։
(դատական նիստի արձանագրություն, գ.թ. 116-117)
Որպես այլ փաստաթուղթ` ապացույց ճանաչված, ՀՀ-ում Իտալիայի դեսպանատնից ստացված, «Կանգուն» ՍՊ ընկերության անվամբ Սուսաննա Խաչիկի Հովհաննիսյանի վերաբերյալ 20.06.2011թ տրված տեղեկանքի պատճենով, որի համաձայն` Ս. Հովհաննիսյանը 2010 թվականի մայիսից աշխատում է նշված ընկերությունում որպես մատուցողուհի և նրա աշխատավարձը կազմում է 150.000 /հարյուր հիսուն հազար/ ՀՀ դրամ գումար։
(գ.թ. 30,118)
Որպես այլ փաստաթուղթ` ապացույց ճանաչված, ՀՀ աշխատանքի և սոցիալական հարցերի նախարարության սոցիալական ապահովության պետական ծառայության 14.11.2011թ թիվ ՎԳ/ՆԱ-1/12774-11 գրությամբ, որի համաձայն` «Կանգուն» ՍՊ ընկերությունը, իրավաբանական անձանց պետական ռեգիստրի թիվ 264.110.06772 հաշվառման համարով պետական գրանցում է ստացել 2004թ. ապրիլի 22-ին, սակայն ՀՀ աշխատանքի և սոցիալական հարցերի նախարարության սոցիալական ապահովության պետական ծառայություն Սուսաննա Խաչիկի Հովհաննիսյանի (անձնագիր AM0226138) համար անհատական տվյալներ չի ներկայացրել։
(գ.թ. 52, 118)

Դատարանի իրավական վերլուծությունները.

Վերլուծելով ամբաստանյալ Գառնիկ Դանիելի Սահակյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Գառնիկ Դանիելի Սահակյանի կողմից, նրա մեղավորությամբ, իրավունք վերապահող պաշտոնական այլ փաստաթուղթ կեղծելը` այլ անձի կողմից այն օգտագործելու նպատակով և այդպիսի փաստաթուղթ իրացնելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 325-րդ հոդվածի 1-ին մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Գառնիկ Դանիելի Սահակյանի նկատմամբ պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա տալով ինքնախոստովանական ցուցմունքներ` անկեղծորեն զղջացել է կատարածի համար, նախկինում դատված չի եղել, բնութագրվում է դրական։ Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում խնամքին մինչև տասնչորս տարեկան մեկ երեխայի առկայությունը, իսկ նրա պատասխանատվությունը և պատիժը ծանրացնող հանգամանքներ դատարանը չի արձանագրում։
Ամբաստանյալ Գառնիկ Դանիելի Սահակյանն իր կատարած` Հայաստանի Հանրապետության քրեական օրենսգրքի 325-րդ հոդվածի 1-ին մասով նախատեսված հանցագործության համար ենթակա է պատժի տուգանքի ձևով, որը նա պետք է կրի։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով խափանման միջոցի հարցը` դատարանը գտնում է, որ ամբաստանյալ Գառնիկ Դանիելի Սահակյանի նկատմամբ որպես խափանման միջոց չհեռանալու մասին ստորագրությունն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360-րդ, 364-366-րդ, 369-373-րդ հոդվածներով, դատարանը`

Վ Ճ Ռ Ե Ց

Ամբաստանյալ Գառնիկ Դանիելի Սահակյանին մեղավոր ճանաչել Հայաստանի Հանրապետության քրեական օրենսգրքի 325-րդ հոդվածի 1-ին մասով նախատեսված հանցանքում և դատապարտել տուգանքի նվազագույն աշխատավարձի երկուհարյուրապատիկի` 200.000 /երկու հարյուր հազար/ ՀՀ դրամ գումարի չափով։
Խափանման միջոց չհեռանալու մասին ստորագրությունը թողնել անփոփոխ` մինչև դատավճռի օրինական ուժի մեջ մտնելը։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։

ԴԱՏԱՎՈՐ` Մ. ՄԱՐՏԻՐՈՍՅԱՆ