ԵԿԴ/0283/01/11





ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«12» ապրիլի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Վ.Պողոսյան
պաշտպան Է.Արամյան

դռնբաց դատական նիստում քննեց քրեական գործն ըստ մեղադրանքի`
Կարեն Վարոսի Խաչատրյանի` ծնված 1963 թվականի օգոստոսի 3-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, տեխնիկական գիտությունների թեկնածու, չամուսնացած, չի աշխատում, դատվածություն չունեցող, հաշվառված է Երևան քաղաքի Աբովյան փողոցի 22ա շենքի 50 բնակարանում, մեղադրանք է առաջադրվել ՀՀ քրեական օրենսգրքի 235-րդ հոդվածի 1-ին մասով, արգելանքի տակ է 2011 թվականի նոյեմբերի 21-ից:
1. Գործի դատավարական նախապատմությունը.
2011 թվականի նոյեմբերի 7-ին ՀՀ ոստիկանության Մալաթիայի քննչական բաժնի ՀԿԳ ավագ քննիչ Կ.Խաչատրյանի որոշմամբ թիվ 16200311 քրեական գործի նյութերով ՀՀ քրեական օրենսգրքի 235-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 16135711 քրեական գործը:
2011 թվականի նոյեմբերի 12-ին ՀՀ ոստիկանության Կենտրոնականի քննչական բաժնի քննիչ Գ.Սաղոյանի որոշմամբ թիվ 16135711 քրեական գործն ընդունվել է վարույթ:
2011 թվականի նոյեմբերի 22-ին ՀՀ ոստիկանության Կենտրոնականի քննչական բաժնի քննիչ Գ.Սաղոյանի որոշմամբ թիվ 16135711 քրեական գործով Կարեն Վարոսի Խաչատրյանին մեղադրանք է առաջադրվել ՀՀ քրեական օրենսգրքի 235-րդ հոդվածի 1-ին մասով:
2011 թվականի դեկտեմբերի 29-ին Կարեն Վարոսի Խաչատրյանի վերաբերյալ թիվ 16135711 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0283/01/11 համարը:
Կարեն Վարոսի Խաչատրյանին մեղադրանք է առաջադրվել ՀՀ քրեական օրենսգրքի 235-րդ հոդվածի 1-ին մասով` այն արարքի համար, որ նա ապօրինի ձեռք է բերել և Երևան քաղաքի Աբովյան փողոցի 22ա շենքի 50-րդ բնակարանում պահել է ռազմամթերք հանդիսացող` գործարանային արտադրության «ԷԴ-8Ա» տեսակի էլեկտրոդետոնատոր, որը հայտնաբերվել է 2011 թվականի հոկտեմբերի 27-ին նրա բնակարանում կատարված խուզարկությամբ:
2. Ապացույցների հետազոտում և գնահատում.
Դատական քննության ընթացքում ամբաստանյալ Կարեն Խաչատրյանն առաջադրված մեղադրանքում իրեն լիովին մեղավոր ճանաչեց և օգտվելով իր իրավունքից` հրաժարվեց ցուցմունք տալ:
Ամբաստանյալ Կարեն Խաչատրյանը նախնական քննության ընթացքում ցուցունք է տվել այն մասին, որ 2011 թվականի հոկտեմբեր 23-ին Մալաթիայի ոստիկանության բաժնի աշխատակիցները խուզարկություն են կատարել իր բնակարանում: Բնակարանի ճաշասենյակում գտնվող պահարանի մեջ դրված զարդատուփի միջից հայտնաբերել են էլեկտրոդետոնատոր, որն իրենից ներկայացրել է 60սմ երկարությամբ երկու լարեր: Ինքն այդ էլեկտրադետոնատրը տեսել է առաջին անգամ, նախկինում երբեք այդ սարքն իրենց տանն ինքը չի տեսել: Այն զարդատուփը, որի միջից հայտնաբերվել է այդ էլեկտրոդետոնատորը, պատկանում է իր մորը: Ինքը երբևէ այդ զարդատուփը չի բացել, իսկ մոր մահից հետո ինքը նրա իրերին ձեռք չի տվել:
Ամբաստանյալ Կարեն Խաչատրյանը նախնական քննության ընթացքում լրացուցիչ ցուցունք է տվել այն մասին, որ իրենց տնից հայտնաբերված սարքն իր մոտ գտնվել է շատ վաղուց, ինքն անձամբ է այն դրել պահարանի մեջ գտնվող զարդատուփի մեջ` առանց գիտենալու, որ դա դետոնատոր է: Այդ էլեկտրոդետոնատրն ինքը գտել է երեխա ժամանակ, թե որտեղից` չի հիշում: Ինքը կարծել է, որ դա ռադիոդետալ է և քանի որ ինքը մասնագիտությամբ էլեկտրիկ-մեխանիկ է և մանկուց սեր է ունեցել այդպիսի սարքերի նկատմամբ, այն պահել է: Եթե ինքն իմանար, որ այն էլեկտրոդետոնատոր է, ապա այն իր մոտ չէր պահի: Նախկինում ինքն այդ էլեկտրոդետոնատորի վերաբերյալ տարբեր ցուցմունքներ է տվել, իսկ այժմ նշում է այն, ինչ եղել է իրականում: Իր կողմից տարբեր բովանդակությամբ ցուցմունքներ տալու պատճառն այն է, որ մայրը նոր է մահացել, նրա մահն իր վրա մեծ ազդեցություն է թողել, և ինքը դրանից նեղված և շփոթված է եղել:
Վկա Գուրգեն Բարեղամյանը դատական քննության ընթացքում ցուցմունք տվեց այն մասին, որ աշխատում է Հայաստանի պետական ճարտարագիտական համալսարանում: Ինքն ունի գիտությունների դոկտորի գիտական աստիճան: Կարեն Խաչատրյանին ինքը չի ճանաչում: Ցանկացած անձ, եթե ցանկանա, ապա կարող է պարզել, թե դա ինչ սարք է: Այդ սարքին` դետոնատորին, նմանվող շատ ռադիոդետալներ կան:
Վկա Գուրգեն Բարեղամյանը նախնական քննության ընթացքում ցուցմունք է տվել այն մասին, որ 1973 թվականից աշխատում է Հայաստանի պետական ճարտարագիտական համալսարանում: Ներկայում աշխատում է նույն համալսարանի կիբեռնետիկայի ֆակուլտետում` որպես դեկան: Կարեն Վարոսի Խաչատրյանը սովորել է նշված ֆակուլտետում: Կիբեռնետիկան իր մեջ ներառում է երեք հիմանական ուղղություններ` էլեկտրոնային սարքեր, կառավարում և ճարտարագիտություն: Կիբեռնետիկայի ֆակուլտետի շրջանավարտներն ստանում են մի շարք մասնագիտություններ, այդ թվում` ավտոմատիկա և հեռուստամեխանիկա մասնագիտությունը, ինչպես Կարեն Խաչատրյանը: Տվյալ մասնագետի գործունեության ոլորտն իր մեջ ընդգրկում է տարբեր տեխնիկական և էլեկտրոնային համակարգերի կառավարումը: Այդ ոլորտի մասնագետն իր մասնագիտությունից կախված կարող է առնչվել մեխանիկական սարքերի, էլեկտրական և էլեկտրոնային սարքերի հետ: Ինքը Կարեն Խաչատրյանին չի դասախոսել, սակայն եթե հաշվի առնեն, որ նա երիտասարդ տարիքում դարձել է տեխնիկական գիտությունների թեկնածու, հետևապես ենթադրում է, որ նա սովորել է բարձր առաջադիմությամբ և լավ պատրաստված մասնագետ է: Եթե հաշվի առնեն Կարեն Խաչատրյանի մասնագիտությունն ու որակավորումը, ապա ամենայն հավանականությամբ նա կիմանա, թե դա ինչ սարք է, առավել ևս, եթե այդ սարքը էլեկտրական սարք է, աշխատում է էլեկտրականությամբ և իրենից առանձնապես բարդ մեխանիզմ չի ներկայացնում: Այսինքն` նման մասնագիտությամբ և թեկնածուկան որակավորման մասնագետը, ինչպիսին Կարեն Խաչատրյանն է, կիմանա այդ սարքի էությունը և գործածման կարգը:
Վկա Հովհաննես Պասիլյանը նախնական քննության ընթացքում ցուցմունք է տվել այն մասին, որ 2011 թվականի հոկտեմբերի վերջերին (կոնկրետ օրը չի հիշում) գտնվել է աշխատանքի վայրում, երբ իրեն մոտեցել են ոստիկանները և առաջարկել որպես ընթերակա ներկա գտնվել քննչական գործողությանը: Ինքը համաձայնվել է և նրանց հետ գնացել: Ոստիկանների հետ եղել է ևս մի անծանոթ երիտասարդ, ով նույնպես մասնակցել է որպես ընթերակա: Ինքը նշված անձանց հետ գնացել է մի բնակարան, որտեղ ոստիկաններն այդ բնակարանի բնակչին ասել են, որ անհրաժեշտ է խուզարկել նրա բնակարանը, որից հետո նրանք սկսել են խուզարկել բնակարանը: Ինքը և մյուս ընթերական շրջել են խուզարկություն կատարող ոստիկանների և տան տիրոջ հետ: Երբ իրենք գտնվել են ճաշասենյակում, ոստիկանները պահարանի միջից գտել են սկավառակներ և ձայնագրող սարքեր: Տան տերը ասել է, որ այդ իրերը պատկանում են նրան: Նույն պահարանում դրված է եղել մի զարդատուփ, որի միջից ոստիկանները գտել են ինչ-որ սարք, որն ունեցել է կարմիր գույնի երկու լար: Այդ լարերը իրար միացված են եղել մետաղյա դետալով: Տան տերը հայտարարել է, որ այդ սարքը նույնպես պատկանում է նրան, որը փոքր ժամանակ նրան տվել է ընկերը և ինքը չգիտի, թե դա ինչ է: Ոստիկաններն այդ սարքը և մյուս իրերը փաթեթավորել են, և վերջում ինքը, տան տերը, մյուս մասնակիցները և ընթերական ստորագրել են արձանգրությունը: Ինքը չի նկատել, որ ոստիկանները փորձեն ինչ-որ իր գցել տան տիրոջ գրպանը: Խուզարկության ողջ ընթացքում ինքը և մյուս ընթերական գտնվել են ոստիկանների և տան տիրոջ մոտ և եթե նման բան լիներ, ապա ինքը կնկատեր:
Խուզարկություն (առգրավում) կատարելու մասին 2011 թվականի հոկտեմբերի 25-ի արձանագրության համաձայն` խուզարկություն է կատարվել Երևան քաղաքի Աբովյան փողոցի 22ա շենքի 50-րդ բնակարանում: Խուզարկությամբ ճաշասենյակի պահարանի միջից հայտնաբերվել է «HOFNAR» գրառումով փայտյա զարդատուփ, որի միջից հայտնաբերվել է կարմիր գույնի, մոտ 60-70սմ երկարության երկու լարերով միացված արծաթագույն մետաղական հատված, որի դիմացի հատվածը եղել է փակ: Հայտնաբերված իրի վերաբերյալ Կարեն Վարոսի Խաչատրյանը հայտարարել է, որ այն պատկանում է իրեն, որն ինքն ունեցել է երեխա ժամանակվանից: Ինքը անձամբ է այն դրել տուփի մեջ, իսկ թե ինչ է այն, ինքը չգիտի և չի օգտագործել:
Փորձագետի 2011 թվականի նոյեմբերի 3-ի եզրակացության համաձայն` ներկայացված 60-70սմ երկարությամբ, կարմիր գույնի երկու լարեր` վերջնամասում միացված մետաղական հատվածը գործարանային արտադրության «ЭД-8А» տեսակի էլեկտրոդետոնատոր է, պիտանի է նպատակային օգտագործման համար և հանդիսանում է ռազմամթերք:
ЛВ003553 դիպլոմի պատճենի համաձայն` Կարեն Վարոսի Խաչատրյանը 1985 թվականին ավարտել է Երևանի Կ.Մարքսի անվան աշխատանքային կարմիր դրոշի շքանշանակիր պոլիտեխնիկական ինստիտուտը` «Ավտոմատիկա և հեռուստամեխանիկա» մասնագիտությամբ:
Ա01109 վկայագրի պատճենի համաձայն` Կարեն Վարոսի Խաչատրյանին շնորհվել է տեխնիկական գիտությունների թեկնածուի գիտական աստիճան:
«Կենտրոն» համատիրության կառավարչի կողմից հաստատված բնութագրի համաձայն` Կարեն Վարոսի Խաչատրյանը բնութագրվում է դրականորեն:
ՀՀ ոստիկանության ինֆորմացիոն կենտրոնի պահանջագրի համաձայն` Կարեն Վարոսի Խաչատրյանը`
-1996 թվականի օգոստոսի 20-ին Էրեբունու շրջանի ժողովրդական դատարանի դատավճռով մեղավոր է ճանաչվել Քրեական օրենսգրքի 106-րդ հոդվածի 1-ին մասով և դատապարտվել ազատազրկման` 1 տարի ժամկետով,
-2009 թվականի հոկտեմբերի 16-ին Երևան քաղաքի Կենտրոն և Նորք-Մարաշ համայնքների ընդհանուր իրավասության առաջին ատյանի դատարանի դատավճռով մեղավոր է ճանաչվել ՀՀ քրեական օրենսգրքի 144-րդ հոդվածով և դատապարտվել տուգանքի` 300.000 ՀՀ դրամի չափով:
Ձերբակալման 2011 թվականի նոյեմբերի 21-ի արձանագրության համաձայն` 2011 թվականի նոյեմբերի 21-ին` ժամը 11:05-ին, Կարեն Վարոսի Խաչատրյանը ձերբակալվել է:
Կալանավորումը որպես խափանման միջոց ընտրելու մասին միջնորդությունը քննության առնելու մասին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2011 թվականի նոյեմբերի 22-ի որոշման համաձայն` Կարեն Վարոսի Խաչատրյանի նկատմամբ որպես խափանման միջոց ընտրվել է կալանավորումը, կալանավորման սկիզբը հաշվվել է 2011 թվականի նոյեմբերի 21-ից:
3. Դատարանի իրավական վերլուծությունները.
Վերոգրյալ ապացույցների հիման վրա Դատարանը գալիս է այն եզրահանգման, որ Կարեն Վարոսի Խաչատրյանը ապօրինի ձեռք է բերել և Երևան քաղաքի Աբովյան փողոցի 22ա շենքի 50-րդ բնակարանում պահել ռազմամթերք հանդիսացող` գործարանային արտադրության «ЭД-8А» (ԷԴ-8Ա) տեսակի էլեկտրոդետոնատոր, որը հայտնաբերվել է 2011 թվականի հոկտեմբերի 27-ին նրա բնակարանում կատարված խուզարկությամբ: Այսինքն` Կարեն Վարոսի Խաչատրյանը կատարել է արարք, ինչը համապատասխանում է ՀՀ քրեական օրենսգրքի 235-րդ հոդվածի 1-ին մասի հատկանիշներին:
Ապացուցված է Կարեն Վարոսի Խաչատրյանի մեղավորությունը ՀՀ քրեական օրենսգրքի 235-րդ հոդվածի 1-ին մասով նախատեսված արարքը կատարելու մեջ:
Կարեն Խաչատրյանի անձը դրականորեն բնութագրող հանգամանքներ են բարձրագույն կրթություն ընենալը, գիտությունների թեկնածու լինելը և կատարածի համար զղջալը:
Դատարանը գտնում է, որ Կարեն Խաչատրյանի պատասխանատվությունն ու պատիժը մեղմացնող հանգամանք պետք է դիտել դրականորեն բնութագրվելը:
Դատարանն արձանագրում է, որ Կարեն Խաչատրյանի պատասխանատվությունն ու պատիժը ծանրացնող հանգամանքներ առկա չեն:
Կատարած արարքի համար ամբաստանյալ Կարեն Խաչատրյանը ենթակա է քրեական պատասխանատվության և պատժի:
Դատարանը, հաշվի առնելով Կարեն Խաչատրյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքը և պատասխանատվությունն ու պատիժը ծանրացնող հանգամանքի բացակայությունը, ինչպես նաև այն, որ Կարեն Խաչատրյանի կատարած արարքի համար ՀՀ քրեական օրենսգրքի 235-րդ հոդվածի 1-ին մասի սանկցիայով նախատեսված է պատիժ նաև ազատազրկման ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Կարեն Խաչատրյանի պատժի կրման սկիզբը պետք է հաշվել 2011 թվականի նոյեմբերի 21-ից, քանի որ նա ձերբակալվել է այդ օրը, իսկ 2011 թվականի նոյեմբերի 22-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Կարեն Խաչատրյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-6-րդ կետերով նախատեսված դատական ծախսերն ամբաստանյալ Կարեն Խաչատրյանից ենթակա չեն բռնագանձման, քանի որ 1-ին, 5-րդ, 6-րդ կետերով նախատեսված դատական ծախսեր ընդհանրապես չկան, իսկ 2-րդ, 3-րդ և 4-րդ կետերով նախատեսված ծախսերի վերաբերյալ տվյալները բացակայում են, ավելին` նման պահանջ Դատարան չի ներկայացվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Կարեն Վարոսի Խաչատրյանին մեղավոր ճանաչել ՀՀ քրեական օրենսգրքի 235-րդ հոդվածի 1-ին մասով, և պատիժ նշանակել ազատազրկում` 6 (վեց) ամիս ժամկետով` պատժի կրման սկիզբը հաշվելով 2011 թվականի նոյեմբերի 21-ից:
Կարեն Վարոսի Խաչատրյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:

ԴԱՏԱՎՈՐ Մ.ՊԱՊՈՅԱՆ