Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

10 փետրվարի 2012թ. ք. Երևան

ԵԿԴ-0281/01/11

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Է. Մկրտչյան,

մասնակցությամբ`
մեղադրող,
Հայաստանի Հանրապետության /այսուհետ ՀՀ/
գլխավոր դատախազության
թմրամիջոցների ապօրինի
շրջանառության հանցագործությունների
գործերով բաժնի դատախազ Վ. Միլիտոնյանի,

պաշտպաններ Վ. Գևորգյանի,
Ե. Սարգսյանի,
Հ. Անանյանի,


դատարանում, դռնբաց դատական նիստում քննեց գործն ըստ մեղադրանքի
1.Սիլվանա Գեորկիի Մուսիսյանի`
ծնված 1971թ. ապրիլի 02-ին Իրանի Իսլամական Հանրապետության /այսուհետ ԻԻՀ/ Թավրիզ քաղաքում, հայ, ԻԻՀ քաղաքացի, միջնակարգ կրթությամբ, ամուսնալուծված, խնամքին մեկ անչափահաս երեխա, չի աշխատում, նախկինում չդատված, հաշվառված է ԻԻՀ, ք. Թավրիզ, Շահնազ թաղամասի Մեհրանի պողոտայի թիվ 13 հասցեում, փաստացի բնակվել է Երևանի Ա. Տիգրանյան փողոցի թիվ 53 շենքի թիվ 1 բնակարանում, կալանքի տակ է 13.10.2011թ.-ից, մեղադրվում է ՀՀ քրեական օրենսգրքի 266-րդ հոդվածի 3-րդ մասի 2-րդ կետով, 266-րդ հոդվածի 2-րդ մասի 2-րդ կետով, 215-րդ հոդվածի 2-րդ մասով, 34-266-րդ հոդվածի 2-րդ մասի 2-րդ կետով և 34-215-րդ հոդվածի 2-րդ մասով,

2.Հակոբ Թորգոմի Ղուկասյանի`
ծնված 1978թ. հունիսի 11-ին Երևան քաղաքում, հայ, ՀՀ քաղաքացի, բարձրագույն կրթությամբ, ամուսնացած, խնամքին մինչև տասնչորս տարեկան երեք երեխա, նախկինում չդատված, չի աշխատում, բնութագրվում է դրական, հաշվառված է և բնակվել է ք. Երևան, Աբովյան փողոցի թիվ 46 շենքի թիվ 7 բնակարանում, կալանքի տակ է 13.10.2011թ.-ից, մեղադրվում է ՀՀ քրեական օրենսգրքի 268-րդ հոդվածի 1-ին մասով, 34-268-րդ հոդվածի 1-ին մասով և 268-րդ հոդվածի 3-րդ մասով։



Գործի դատավարական նախապատմությունը

Թիվ 69106611 քրեական գործը ՀՀ ոստիկանության ՔԳՎ ՀԿԳ քննության վարչությունում հարուցվել է 13.10.2011թ., ՀՀ քրեական օրենսգրքի 266-րդ հոդվածի 3-րդ մասի 2-րդ կետով և 266-րդ հոդվածի 2-րդ մասի 2-րդ կետով, Սիլվանա Մուսիսյանի կողմից իրացնելու նպատակով առանձնապես խոշոր չափերի «ափիոն» և խոշոր չափերի «մեթադոն» տեսակների թմրամիջոցներ ապօրինի ձեռք բերելու, պահելու և իրացնելու դեպքերի առթիվ։
Քննիչի 19.12.2011թ. որոշմամբ, թիվ 69106611 քրեական գործից Սիլվանա Մուսիսյանի և Հակոբ Ղուկասյանի վերաբերյալ մասն առանձնացվել և ընդունվել է վարույթ, որին շնորհվել է թիվ 69106611/1 համարը, իսկ ոմն Ֆարզադ Ֆարնիանի վերաբերյալ քննվող քրեական գործի նախաքննությունը շարունակվել է թիվ 69106611 համարով։
Ամբաստանյալ Սիլվանա Գեորկիի Մուսիսյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 266-րդ հոդվածի 3-րդ մասի 2-րդ կետով, 266-րդ հոդվածի 2-րդ մասի 2-րդ կետով, 215-րդ հոդվածի 2-րդ մասով, 34-266-րդ հոդվածի 2-րդ մասի 2-րդ կետով և 34-215-րդ հոդվածի 2-րդ մասով հետևյալ արարքների համար. «որ նա` Հայաստանի Հանրապետությունում իրացնելու նպատակով 2011թ. մայիս ամսին Իրանի Իսլամական Հանրապետությունում քննությամբ չպարզված անձից, 1 հաբը` 5 ԱՄՆ դոլարով գնելու եղանակով ապօրինի ձեռք է բերել թվով 20 դեղատուփերում 10-ական հաբերով փաթեթավորված, ընդհանուր` խոշոր չափերի` 2 գրամ «մեթադոն» տեսակի թմրամիջոց պարունակող թվով 200 դեղահաբեր, որոնք մաքսային հսկողությունից թաքցնելով ապօրինի Հայաստան տեղափոխելու նպատակով նույն ժամանակ դուրս է բերել դեղատուփերից և առանձին չափաբաժիններով լցնելով պոլիէթիլենային փաթեթների մեջ, տարբեր գրպաններում պահելով, մաքսանենգ ճանապարհով ԻԻՀ-ից ապօրինի փոխադրել է Հայաստան։ Այնուհետև, 2011թ. մայիս-օգոստոս ամիսներին, տարբեր օրերի, 7 օրը մեկ անգամ, իր կողմից վարձակալած` Երևան քաղաքի Ա. Տիգրանյան փողոցի 53 շենքի թիվ 1 բնակարանում և նշված շենքի բակում պարբերաբար հանդիպել է Հակոբ Թորգոմի Ղուկասյանին, որին 1 հաբը` 9-ից 10 ԱՄՆ դոլարով վաճառելու եղանակով, յուրաքանչյուր անգամ` 0.05-ից 0.15 գրամ «մեթադոն» տեսակի թմրամիջոց պարունակող 5-ից 15 հատ դեղահաբերի չափաբաժիններով, մաս-մաս, ապօրինի իրացրել է թմրամիջոցի ողջ քանակությունը։
Այսինքն, Սիլվանա Գեորկիի Մուսիսյանը կատարել է հանրորեն վտանգավոր արարքներ, որոնք նախատեսված են ՀՀ քրեական օրենսգրքի 266 հոդվածի 2-րդ մասի 2-րդ կետով, 215 հոդվածի 2-րդ մասով։
Բացի այդ, Սիլվանա Մուսիսյանը, Իրանի Իսլամական Հանրապետությունից Հայաստանի Հանրապետություն մաքսանենգ ճանապարհով խոշոր չափերի «մեթադոն» տեսակի թմրամիջոց ապօրինի փոխադրելու և ՀՀ-ում ապօրինի իրացնելու ուղղակի դիտավորությամբ, 2011թ. օգոստոս ամսին ԻԻՀ-ում քննությամբ չպարզված անձից, 1 հաբը` 5 ԱՄՆ դոլարով գնելու եղանակով ապօրինի ձեռք է բերել թվով 40 դեղատուփերում 10-ական հաբերով փաթեթավորված, «մեթադոն» տեսակի թմրամիջոցին նմանվող և «մեթադոն» տեսակի թմրամիջոց չպարունակող դեղահաբեր, սակայն համոզմած լինելով, որ հաբերն իրենց մեջ պարունակում են թմրամիջոց, մաքսային հսկողությունից թաքցնելով, Հայաստան ապօրինի տեղափոխելու նպատակով դուրս է բերել դեղատուփերից և առանձին չափաբաժիններով լցնելով պոլիէթիլենային փաթեթների մեջ, տարբեր գրպաններում պահելով, խոշոր չափերի «մեթադոն» տեսակի թմրամիջոցը մաքսանենգ ճանապարհով ԻԻՀ-ից ՀՀ ապօրինի փոխադրելու ուղղակի դիտավորությամբ, տեղափոխել է Հայաստան։ 2011թ. սեպտեմբեր ամսին, 2 դեպքով, տարբեր օրերի, նույն հանգամանքներում, Սիլվանա Մուսիսյանը «մեթադոն» տեսակի թմրամիջոց պարունակող դեղահաբեր ապօրինի իրացնելու ուղղակի դիտավորությամբ, 1 հաբը 9-ից 10 ԱՄՆ դոլարով, Հակոբ Ղուկասյանին յուրաքանչյուր անգամ ապօրինի իրացրել է քննությամբ չպարզված` «մեթադոն» տեսակի թմրամիջոց չպարունակող 6-ից 7 դեղահաբեր, որից հետո միայն պարզվել է, որ նշված հաբերն իրենց մեջ թմրամիջոց չեն պարունակում, ինչի մասին Սիլվանա Մուսիսյանը տեղյակ չի եղել ԻԻՀ-ում հաբերը ձեռք բերելու, ԻԻՀ-ից ՀՀ փոխադրելու և Հակոբ Ղուկասյանին իրացնելու ընթացքում։
Այսինքն, Սիլվանա Գեորկիի Մուսիսյանը կատարել է հանրորեն վտանգավոր արարքներ, որոնք նախատեսված են ՀՀ քրեական օրենսգրքի 34-266 հոդվածի 2-րդ մասի 2-րդ կետով, 34-215 հոդվածի 2-րդ մասով։
Բացի այդ, Սիլվանա Մուսիսյանը, 2011թ. սեպտեմբեր ամսին Երևան քաղաքում քննությամբ չպարզված հանգամքներում իրացնելու նպատակով, 1 հաբը` 5 ԱՄՆ դոլարով գնելու եղանակով ապօրինի ձեռք է բերել և պահել ընդհանուր` խոշոր չափերի` 2 գրամ «մեթադոն» տեսակի թմրամիջոց պարունակող թվով 200 դեղահաբեր, ապա 2011թ. սեպտեմբեր-հոկտեմբեր ամիսներին, տարբեր օրերի, իր կողմից վարձակալած` Երևան քաղաքի Ա. Տիգրանյան փողոցի 53 շենքի թիվ 1 բնակարանում և նշված շենքի բակում պարբերաբար հանդիպել է Հակոբ Թորգոմի Ղուկասյանին, որին 1 հաբը` 10 ԱՄՆ դոլարով վաճառելու եղանակով, յուրաքանչյուր անգամ` 0.06-ից 0.7 գրամ «մեթադոն» տեսակի թմրամիջոց պարունակող 6-ից 70 հատ դեղահաբերի չափաբաժիններով, մաս-մաս, ապօրինի իրացրել է, ընդհանուր` զգալի չափերի` 0.89 գրամ «մեթադոն» տեսակի թմրամիջոց պարունակող 89 դեղահաբեր։
2011թ. հոկտեմբերի 13-ին, հերթական անգամ, Հակոբ Ղուկասյանին զգալի չափերի` 0.9 գրամ «մեթադոն» տեսակի թմրամիջոց պարունակող 90 հատ դեղահաբեր ապօրինի իրացնելու վերաբերյալ նրա հետ պայմանավորվածություն ձեռք բերելուց հետո, Սիլվանա Մուսիսյանը Երևան քաղաքի «Շրջանային» կոչվող թաղամասում հանդիպել է վերջինիս, սակայն հանցավոր մտադրությունն իրականացնել չի կարողացել իր կամքից անկախ հանգամանքներով, քանի որ նույն վայրից կասկածանքի տակ բերման է ենթարկվել ՀՀ ոստիկանության ԿՀԴՊ գլխավոր վարչություն, որտեղ նրա անձնական խուզարկությամբ` ձեռքի պայուսակից հայտնաբերվել և առգրավվել է զգալի չափի` 0.9 գրամ «մեթադոն» տեսակի թմրամիջոց պարունակող թվով 90 դեղահաբերը։
Այսինքն, Սիլվանա Գեորկիի Մուսիսյանը կատարել է հանրորեն վտանգավոր արարք, որը նախատեսված է ՀՀ քրեական օրենսգրքի 266 հոդվածի 2-րդ մասի 2-րդ կետով։
Բացի այդ, Սիլվանա Մուսիսյանը, Հայաստանի Հանրապետությունում իրացնելու նպատակով 2011թ. հոկտեմբեր ամսվա սկզբներին Իրանի Իսլամական Հանրապետությունում քննությամբ չպարզված անձից ապօրինի ձեռք է բերել առանձնապես խոշոր չափերի` 23 գրամ «ափիոն» տեսակի թմրամիջոց, որը նույն ժամանակ թաքցնելով իր հագուստի գրպանում, մաքսանենգ ճանապարհով, մաքսային հսկողությունից թաքցնելով ԻԻՀ-ից ապօրինի փոխադրել է Հայաստան, որտեղ իր նշված բնակարանում, դրա 1 գրամը` 5.000 ՀՀ դրամով վաճառելու եղանակով` գումարը հետագայում ստանալու պայմանով, ապօրինի իրացրել է Հակոբ Թորգոմի Ղուկասյանին։
Այսինքն, Սիլվանա Գեորկիի Մուսիսյանը կատարել է հանրորեն վտանգավոր արարքներ, որոնք նախատեսված են ՀՀ քրեական օրենսգրքի 266 հոդվածի 3-րդ մասի 2-րդ կետով, 215 հոդվածի 2-րդ մասով։»։
Ամբաստանյալ Հակոբ Թորգոմի Ղուկասյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 268-րդ հոդվածի 1-ին մասով, 34-268-րդ հոդվածի 1-ին մասով և 268-րդ հոդվածի 3-րդ մասով հետևյալ արարքների համար. «որ նա` 2011թ. մայիս-սեպտեմբեր ամիսներն ընկած ժամանակահատվածում, տարբեր օրերի, Սիլվանա Գեորկիի Մուսիսյանի` Երևան քաղաքի Ա. Տիգրանյան փողոցի 53 շենքի թիվ 1 բնակարանում և նշված շենքի բակում պարբերաբար հանդիպել է վերջինիս և, առանց իրացնելու նպատակի, իր գործածման համար, յուրաքանչյուր անգամ զգալի չափերի` 0.05-ից 0.7 գրամ «մեթադոն» տեսակի թմրամիջոց պարունակող թվով 5-ից 70 դեղահաբերի չափաբաժիններով, 1 հաբը` 9-ից 10 ԱՄՆ դոլարով գնելու եղանակով, մաս-մաս, ապօրինի ձեռք է բերել և պահել, ընդհանուր` 2.88 գրամ «մեթադոն» տեսակի թմրամիջոց պարունակող թվով 288 դեղահաբեր։
Այսինքն, Հակոբ Թորգոմի Ղուկասյանը կատարել է հանրորեն վտանգավոր արարք, որը նախատեսված է ՀՀ քրեական օրենսգրքի 268 հոդվածի 1-ին մասով։
2011թ. հոկտեմբերի 13-ին, Հակոբ Ղուկասյանը հերթական անգամ, պայմանավորվածություն ունենալով Սիլվանա Մուսիսյանի հետ` նրանից առանց իրացնելու նպատակի, իր գործածման համար զգալի չափերի` 0.9 գրամ «մեթադոն» տեսակի թմրամիջոց պարունակող թվով 90 հատ հաբեր ապօրինի ձեռք բերելու վերաբերյալ, Երևան քաղաքի «Շրջանային» կոչվող թաղամասում հանդիպել է վերջինիս, սակայն հանցավոր մտադրությունն իրականացնել չի կարողացել իր կամքից անկախ հանգամանքներով, քանի որ նույն վայրից կասկածանքի տակ բերման է ենթարկվել ՀՀ ոստիկանության ԿՀԴՊ գլխավոր վարչություն, որտեղ նրա անձնական խուզարկությամբ` հայտնաբերվել և առգրավվել են «ափիոնի» դիմաց պարտք մնացած 100.000 ՀՀ դրամն ու ձեռք բերվելիք «մեթադոնի» արժեքի մի մասը կազմող 400 ԱՄՆ դոլարը, իսկ Սիլվանա Մուսիսյանի անձնական խուզարկությամբ` նրա ձեռքի պայուսակից` զգալի չափի` 0.9 գրամ «մեթադոն» տեսակի թմրամիջոց պարունակող թվով 90 դեղահաբերը։
Այսինքն, Հակոբ Թորգոմի Ղուկասյանը կատարել է հանրորեն վտանգավոր արարք, որը նախատեսված է ՀՀ քրեական օրենսգրքի 34-268 հոդվածի 1-ին մասով։
Բացի այդ, Հակոբ Ղուկասյանը, առանց իրացնելու նպատակի, իր գործածման համար զգալի չափերի «մեթադոն» տեսակի թմրամիջոց ապօրինի ձեռք բերելու ուղղակի դիտավորությամբ, 2011թ. սեպտեմբեր ամսին, 2 դեպքով, տարբեր օրերի, Սիլվանա Մուսիսյանի` Երևան քաղաքի Ա. Տիգրանյան փողոցի 53 շենքի թիվ 1 բնակարանում, հանդիպել է վերջինիս, ապա համոզված լինելով, որ հաբերն իրենց մեջ պարունակում են «մեթադոն» տեսակի թմրամիջոց, 1 հաբը 9-ից 10 ԱՄՆ դոլարով գնելու եղանակով, յուրաքանչյուր անգամ ապօրինի ձեռք է բերելու և պահել քննությամբ չպարզված` «մեթադոն» տեսակի թմրամիջոց չպարունակող 6-ից 7 դեղահաբեր, սակայն գործածելուց հետո միայն պարզվել է, որ հաբերն իրենց մեջ թմրամիջոցներ չեն պարունակում։
Այսինքն, Հակոբ Թորգոմի Ղուկասյանը կատարել է հանրորեն վտանգավոր արարք, որը նախատեսված է ՀՀ քրեական օրենսգրքի 34-268 հոդվածի 1-ին մասով։
Բացի այդ, Հակոբ Ղուկասյանը 2011թ. հոկտեմբերի սկզբներին, չպարզված օրը, Սիլվանա Մուսիսյանի նշված բնակարանում, նրանից 1 գրամը` 5.000 ՀՀ դրամով գնելու եղանակով` գումարը հետագայում վճարելու պայմանով, առանց իրացնելու նպատակի, իր գործածման համար, ապօրինի ձեռք է բերել և պահել առանձնապես խոշոր չափերի` մոտ 23 գրամ «ափիոն» տեսակի թմրամիջոց, որի մի մասը գործածել է, իսկ մնացած մասը խառնելով ջրի հետ պատրաստել և ստացել է խոշոր չափերի` 0.243 գրամ «ացետիլացված ափիոն» տեսակի թմրամիջոց, որն էլ 2011թ. հոկտեմբերի 13-ին հայտնաբերվել է ՀՀ ոստիկանության ԿՀԴՊ գլխավոր վարչության աշխատակիցների կողմից` նրա անձնական խուզարկությամբ։
Այսինքն, Հակոբ Թորգոմի Ղուկասյանը կատարել է հանրորեն վտանգավոր արարք, որը նախատեսված է ՀՀ քրեական օրենսգրքի 268 հոդվածի 3-րդ մասով։»։
2011թ. դեկտեմբերի 26-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Իրանի Իսլամական Հանրապետության քաղաքացի, 2007թ. մարտի 2-ից մինչև 2017թ. փետրվարի 22-ը Հայաստանում բնակվելու իրավունք ունեցող, սույն քրեական գործով ամբաստանյալ Սիլվանա Գեորկիի Մուսիսյանը, իր նախկին ամուսին Էդվին Խաչատրյանի միջոցով, 2009թ. ծանոթացել է ամբաստանյալ Հակոբ Թորգոմի Ղուկասյանի հետ։ Վերջինիս հետ շփման ընթացքում, 2011թ. սկզբում, ձմռանը, տեղեկանալով, որ Հակոբ Ղուկասյանը հակում ունի թմրամիջոցներ գործածելու նկատմամբ` առաջարկել է վերջինիս` օգտագործել «մեթադոն» տեսակի դեղահաբեր, ինչին Հակոբ Ղուկասյանը համաձայնվել է։
2011թ. մայիսին Սիլվանա Մուսիսյանը մեկնել է ԻԻՀ, որտեղ, քննությամբ չպարզված հանգամանքներում, ՀՀ-ում իրացնելու նպատակով, 1 հաբը` 5 ԱՄՆ դոլարով գնելու եղանակով, ապօրինի ձեռք է բերել և պահել խոշոր չափի` 2 գրամ ընդհանուր քաշով «մեթադոն» տեսակի թմրամիջոց պարունակող, երկու հարյուր հատ դեղահաբեր։ Այնուհետև, մաքսային հսկողությունից թաքցնելու եղանակով ապօրինաբար ՀՀ փոխադրելու նպատակով, Ս. Մուսիսյանը նշված դեղահաբերը դուրս է բերել դեղատուփերից, առանձին չափաբաժիններով լցրել պոլիէթիլենային փաթեթների մեջ, պահել գրպաններում և մաքսանենգ ճանապարհով ԻԻՀ-ից ապօրինի փոխադրել է Հայաստան։ Սիլվանա Մուսիսյանը «մեթադոն» տեսակի թմրամիջոցներ պարունակող դեղահաբերն իր կողմից ՀՀ փոխադրելու և դրանք իր մոտ գտնվելու մասին Երևանում հայտնել է Հակոբ Ղուկասյանին։ Այնուհետև, 2011թ. մայիս-օգոստոս ամիսներին, տարբեր օրերի, 7 օրը մեկ անգամ, Ս. Մուսիսյանի կողմից վարձակալած` Երևան քաղաքի Ա. Տիգրանյան փողոցի թիվ 53 շենքի թիվ 1 բնակարանում և նշված շենքի բակում, պարբերաբար Ս. Մուսիսյանը հանդիպել է Հ. Ղուկասյանին և 1 հաբը` 9-ից 10 ԱՄՆ դոլար գումարով վաճառելու եղանակով, յուրաքանչյուր անգամ` 0.05-ից 0.15 գրամ ընդհանուր քանակով «մեթադոն» տեսակի թմրամիջոց պարունակող 5-ից 15 հատ դեղահաբերի չափաբաժիններով, մաս-մաս, թմրամիջոցի ողջ քանակությունն ապօրինի իրացրել է Հակոբ Ղուկասյանին։
2011թ. օգոստոսի վերջերին ամբաստանյալ Սիլվանա Մուսիսյանը կրկին մեկնել է ԻԻՀ։ Այնտեղ, քննությամբ չպարզված հանգամանքներում, մաքսանենգ ճանապարհով ՀՀ ապօրինի փոխադրելու և ՀՀ-ում ապօրինի իրացնելու դիտավորությամբ, 1 հաբը` 5 ԱՄՆ դոլարով գնելու եղանակով, նա ապօրինի ձեռք է բերել քառասուն, դեղատուփերում` յուրաքանչյուրում տասական հաբերով փաթեթավորված, «մեթադոն» տեսակի թմրամիջոցին նմանվող, չորս հարյուր հատ դեղահաբեր։ Սիլվանա Մուսիսյանը համոզմած լինելով, որ հաբերն իրենց մեջ թմրամիջոց են պարունակում, մաքսային հսկողությունից թաքցնելու եղանակով ՀՀ ապօրինի տեղափոխելու նպատակով` հաբերը դուրս է բերել դեղատուփերից և առանձին չափաբաժիններով լցնելով պոլիէթիլենային փաթեթների մեջ` պահել է տարբեր գրպաններում, որից հետո, խոշոր չափերի «մեթադոն» տեսակի թմրամիջոց մաքսանենգ ճանապարհով ԻԻՀ-ից ՀՀ ապօրինի փոխադրելու դիտավորությամբ` այդ դեղահաբերը տեղափոխել է Հայաստան։
2011թ. սեպտեմբերին, երկու դեպքով, տարբեր օրերի, Սիլվանա Մուսիսյանն իր բնակության վայրում` Երևանի Ա. Տիգրանյան փողոցի թիվ 53 շենքի թիվ 1 բնակարանում, այդ դեղահաբերն ապօրինի իրացնելու դիտավորությամբ, 1 հաբը 9-ից 10 ԱՄՆ դոլարով, Հակոբ Ղուկասյանին յուրաքանչյուր անգամ ապօրինի իրացրել է «մեթադոն» տեսակի թմրամիջոց պարունակող 6-ից 7 դեղահաբ, որից հետո միայն պարզվել է, որ նշված հաբերն իրենց մեջ թմրամիջոց չեն պարունակում։ ԻԻՀ-ում հաբերը ձեռք բերելու, ԻԻՀ-ից ՀՀ փոխադրելու և Հակոբ Ղուկասյանին իրացնելու ընթացքում Սիլվանա Մուսիսյանն այդ մասին տեղյակ չի եղել, այդ մասին իմացել է Հակոբ Ղուկասյանից` վերոհիշյալ երկրորդ չափաբաժինը նրան իրացնելուց հետո։ Սիլվանա Մուսիսյանը համոզվելով իր կողմից ՀՀ ապօրինի փոխադրած և իրացրած դեղահաբերում թմրամիջոցների բացակայության մասին` այդ մասին հայտնել է ԻԻՀ-ում բնակվող, իրեն թմրամիջոցներ իրացրած, քննությամբ չպարզված անձին։ Վերջինս 2011թ. սեպտեմբերին ժամանել է Երևան` իր հետ բերելով խոշոր չափերի` 2 գրամ «մեթադոն» տեսակի թմրամիջոց պարունակող, երկու հարյուր հատ դեղահաբ, որոնք ապօրինի իրացրել է Սիլվանա Մուսիսյանին։ Նշված հաբերն ապօրինի իրացնելու նպատակով, 2011թ. սեպտեմբեր-հոկտեմբեր ամիսներին, տարբեր օրերի, Սիլվանա Մուսիսյանն իր բնակության վայրում պարբերաբար հանդիպել է Հակոբ Ղուկասյանին և 1 հաբը 10 ԱՄՆ դոլարով վաճառելու եղանակով, յուրաքանչյուր անգամ` 0.06-ից 0.7 գրամ ընդհանուր քանակի «մեթադոն» տեսակի թմրամիջոց պարունակող 6-ից 70 հատ դեղահաբերի չափաբաժիններով, մաս-մաս, ապօրինի իրացրել է զգալի չափերի` 0.89 գրամ ընդհանուր քաշով «մեթադոն» տեսակի թմրամիջոց պարունակող, ութսունինը հատ դեղահաբեր։
2011թ. հոկտեմբերին, քննությամբ չպարզված հանգամանքներում, Սիլվանա Մուսիսյանը ԻԻՀ-ում ապօրինի ձեռք է բերել առանձնապես խոշոր չափերի` 23 գրամ «ափիոն» տեսակի թմրամիջոց և թաքցնելով իր հագուստի գրպանում, մաքսանենգ ճանապարհով, մաքսային հսկողությունից թաքցնելով` նույն ամսում ԻԻՀ-ից ապօրինի փոխադրել է Հայաստան։ Երևանում գտնվող իր բնակարանում, այդ թմրամիջոցի 1 գրամը` 5.000 ՀՀ դրամ գումարով վաճառելու եղանակով, գումարը հետագայում ստանալու պայմանով, 2011թ. հոկտեմբերին, գործով չպարզված օրը, Ս. Մուսիսյանն այդ ամբողջ` 23 գրամ «ափիոն» տեսակի թմրամիջոցն ապօրինի իրացրել է Հակոբ Ղուկասյանին։
2011թ. հոկտեմբերի 13-ին, հերթական անգամ, Հակոբ Ղուկասյանին զգալի չափերի` 0.9 գրամ «մեթադոն» տեսակի թմրամիջոց պարունակող 90 հատ դեղահաբեր ապօրինի իրացնելու վերաբերյալ նրա հետ պայմանավորվածություն ձեռք բերելուց հետո, Երևան քաղաքի «Շրջանային» կոչվող վայրում ամբաստանյալ Սիլվանա Մուսիսյանը հանդիպել է նրան, սակայն իր մտադրությունն իրականացնել չի կարողացել` իր կամքից անկախ հանգամանքներով, քանի որ Սիլվանա Մուսիսյանը և Հակոբ Ղուկասյանը բերման են ենթարկվել ՀՀ ոստիկանության ԿՀԴՊ գլխավոր վարչություն։ Այնտեղ, Սիլվանա Մուսիսյանի անձնական խուզարկությամբ, նրա ձեռքի պայուսակում հայտնաբերվել և առգրավվել է զգալի չափերի` 0.9 գրամ ընդհանուր քանակով «մեթադոն» տեսակի թմրամիջոց պարունակող իննսուն հատ դեղահաբեր, իսկ Հակոբ Ղուկասյանի անձնական խուզարկությամբ, նրա աջ ոտքի գուլպայի միջից հայտնաբերվել և առգրավվել է խոշոր չափերի` 0.243 գրամ հաստատուն չոր քաշով «ացետիլացված ափիոն» տեսակի թմրամիջոց։
Ամբաստանյալ Սիլվանա Մուսիսյանը 2011թ. սեպտեմբերի վերջերին, իրացնելու նպատակով ապօրինի ձեռք բերած, «մեթադոն» տեսակի թմրամիջոց պարունակող երկու հարյուր դեղահաբերի մնացած մասը, նույն նպատակով, ապօրինի պահել է իր բնակության վայրում` Երևան քաղաքի Ա. Տիգրանյան փողոցի 53 շենքի թիվ 1 բնակարանում։
Քրեական գործի նախաքննության ընթացքում կատարվել են տոքսիկոքիմիական և նյութագիտական փորձաքննություններ ՀՀ ԳԱԱ «Փորձաքննությունների ազգային բյուրո» պետական ոչ առևտրային կազմակերպության կողմից, որոնց արժեքն ամբաստանյալ Սիլվանա Մուսիսյանի մասով կազմել է 82.440 /ութսուներկու հազար չորս հարյուր քառասուն/, իսկ Հակոբ Ղուկասյանի մասով` 27.480 /քսանյոթ հազար չորս հարյուր ուսուն/ ՀՀ դրամ գումար։
Ամբաստանյալների անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Սիլվանա Մուսիսյանը նախկինում դատված չի եղել, ամբաստանյալ Հակոբ Ղուկասյանը խնամքին ունի մինչև տասնչորս տարեկան երեք երեխա, նախկինում դատված չի եղել, նախաքննության ընթացքում իրեն լիովին մեղավոր ճանաչելով և ինքնախոստովանական ցուցմունքներ տալով` անկեղծորեն զղջացել է կատարածի համար, բնութագրվում է դրական։


Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Սիլվանա Գեորկիի Մուսիսյանի նախաքննական ցուցմունքներով այն մասին, որ առաջադրված մեղադրանքում իրեն մեղավոր է ճանաչում մասնակիորեն։ Իր նախկին ամուսին Էդվինի միջոցով 2009թ. ծանոթացել է Հակոբի հետ։ 2011թ. ձմռանը հանդիպելով Հակոբին` տեղեկացել է, որ վերջինս հակում ունի թմրամիջոցների նկատմամբ։ Զրույցի ժամանակ առաջարկել է Հակոբին գործածել «մեթադոն» տեսակի դեղահաբեր, ինչին վերջինս համաձայնվել է։ 2011թ. մայիսին մեկնել է Իրան, որտեղ անծանոթ անձի վճարելով 1.000 ԱՄՆ դոլար գումար` ձեռք է բերել 200 հաբ «մեթադոն» տեսակի թմրամիջոց։ Հայաստան բերելու համար հաբերը հանելով տուփերից` տեղավորել է առանձին փաթեթներում, դրել գրպանները, ապա տեղափոխել Հայաստան։ Իրանից բերած «մեթադոնի» ողջ քանակությունը, 1 հաբը 9-ից 10 ԱՄՆ դոլարով, մաս-մաս, յուրաքանչյուր անգամ 5-10 հաբի չափով վաճառել է Հակոբին։ 2011թ. օգոստոսին անձնական հարցերով մեկնել է Իրան, որտեղ Ֆարզադի միջոցով, իրեն անծանոթ անձից ձեռք է բերել 400 հաբ «մեթադոն», դրա համար վճարելով 2.000 ԱՄՆ դոլար գումար։ Նույն եղանակով հաբերը տեղավորել է գրպաններում, ապա տեղափոխել Հայաստան։ Նշված քանակությունից Հակոբին 2 դեպքով տվել է հաբեր` յուրաքանչյուր անգամ 6-7 հաբի չափով։ Որոշ ժամանակ անց Հակոբն իրեն հայտնել է, որ հաբերն իրենց մեջ թմրամիջոց չեն պարունակում։ Նշված հանգամանքի մասին հեռախոսակապով հայտնել է Ֆարզադին, որն էլ 2011թ. սեպտեմբերի վերջերին եկել է Երևան` իր հետ բերելով 200 հաբ «մեթադոն»։ «Մեթադոնի» ընդհանուր քանակությունից 89 հաբը մաս-մաս վաճառել է Հակոբին։ 2011թ. սեպտեմբերի վերջերին անձնական գործերով մեկնել է Իրան, որտեղ ֆարզադից ձեռք է բերել 23 գրամ «ափիոն» տեսակի թմրամիջոց, որն Իրանում անվանում են «թրեաք»։ Նշված թմրամիջոցը թաքցրել է իր գրպանում, ապա 2011թ. հոկտեմբերի սկզբներին այն տեղափոխելով Հայաստան` թմրամիջոցի ողջ քանակությունը, 1 գրամը 5.000 ՀՀ դրամ գումարով, վաճառել է Հակոբին` 100.000 ՀՀ դրամ գումարը հետագայում ստանալու պայմանով։
2011թ. հոկտեմբերի 13-ին, երբ գտնվել է Երևանում, Հակոբը պատվիրել է 90 հաբ «մեթադոն»։ Պայմանավորվածության համաձայն գնացել է «Շրջանային» կոչվող վայր, որտեղ իրեն են մոտեցել ոստիկանության աշխատակիցները և բերման ենթարկել ոստիկանություն։ Այնտեղ իր անձնական խուզարկությամբ, պայուսակի միջից հայտնաբերել են 90 հաբ «մեթադոն»։
Այնուհետև փոփոխելով իր ցուցմունքները` Ս. Մուսիսյանը հայտնել է, որ ինքն Իրանում «ափիոն» տեսակի թմրամիջոց երբեք ձեռք չի բերել, Հայաստան չի փոխադրել և Հակոբին չի իրացրել։ Նույնիսկ գաղափար անգամ չունի, թե ինչ բան է «ափիոնը»։ Հետագայում հայտնել է, որ 2011թ. մարտին, ոմն Ֆարզադի օգնել է բնակարան գտնելու հարցով` Հայաստանում ժամանակավորապես բնակվելու համար։ Ֆարզադը Հայաստանում բնակվել է շուրջ 20 օր, ապա վերադառնալուց առաջ` 2011թ. ապրիլին, իրեն տվել է 200 հաբ «մեթադոն»։ Ինքը նշված հաբերը մաս-մաս, 7 օրը մեկ անգամ տվել է Հակոբին, յուրաքանչյուր անգամ` 5-15 հաբի չափով։ Հակոբը 1 հաբի համար վճարել է 9-ից 10 ԱՄՆ դոլար գումար։ 2011թ. օգոստոսին անձնական գործերով գնացել է Իրան, որտեղ Ֆարզադի միջոցով գնել է 400 հաբ «մեթադոն», որի համար վճարել է 2.000 ԱՄՆ դոլար գումար։ Նշված հաբերը բերել է Հայաստան և երկու անգամ տվել Հակոբին, յուրաքանչյուր անգամ` 6-7 հաբի չափով։ Հակոբը դրանք գործածելուց հետո հայտնել է, որ հաբերի մեջ թմրամիջոց չկա։ Նշված հանգամանքի վերաբերյալ հեռախոսակապով հայտնել է Ֆարզադին, որն էլ 2011թ. սեպտեմբերի վերջերին եկել է Երևան` իր հետ բերելով 200 հաբ «մեթադոն»։ Ֆարզադը նախկինում տված 400 հաբից նմուշ վերցնելով` վերադարձել է Իրան։ Մի քանի օր անց զանգահարել և հայտնել է, որ իսկապես հաբերում «մեթադոն» տեսակի թմրամիջոց չկա։ Նրա առաջարկով այդ հաբերը դեն է նետել։ Ֆարզադի բերած հաբերի մի մասը վաճառել է Հակոբին, իսկ մնացած մասը պահել է իր տանը։ Ինքը ԻԻՀ-ից երբեք «մեթադոն» կամ «ափիոն» տեսակի թմրամիջոցներ Հայաստան չի բերել։ Ֆարզադը շուրջ 24-25 տարեկան է, նրա ազգանունը Փարնիան է։
Դատարանում ամբաստանյալ Սիլվանա Գեորկիի Մուսիսյանը հրաժարվեց ցուցմունքներ տալուց, սակայն առաջադրված հարցերին պատասխանեց, որ նախաքննության ընթացքում իր սկզբնական ցուցմունքները տվել է այդ բովանդակությամբ, քանի որ իրեն ասել են, որ Հակոբն ամեն ինչ պատմել է։ Ինքն ասել է, որ Իրանից շոկոլադ է բերել, բայց իրեն ասել են, որ այստեղ շոկոլադին «ափիոն» են ասում։ Հետո ասել են, որ եթե «ափիոն» է բերել, ապա «մեթադոն» նույնպես բերած կլինի։
/դատական նիստի արձանագրություն, գ. թ. 48-51, 90, 184-188, 234-235/
Ամբաստանյալ Սիլվանա Գեորկիի Մուսիսյանի պատճառաբանությունները, այդ թվում Ֆարզադ Փարնիյանի` 2011թ. մարտ-ապրիլ ամիսներին ՀՀ-ում գտնվելու հանգամանքը, հերքվել են 2011թ. դեկտեմբերի 19-ին ՀՀ ոստիկանության ԿՀԴՊ գլխավոր վարչության թիվ 5225 գրությամբ ստացված` ՀՀ սահմանը հատելու վերաբերյալ տեղեկություններով, որի համաձայն` Ֆարզադ Փարնիյունը /Farzad Parnyoun, ծնված 14.08.1988թ./ 2011թ. ընթացքում ՀՀ մուտք է գործել 2011թ. հուլիսի 28-ին և ՀՀ-ից մեկնել է 2011թ. օգոստոսի 4-ին, ապա ՀՀ մուտք է գործել 2011թ. սեպտեմբերի 13-ին և ՀՀ-ից մեկնել է 2011թ. սեպտեմբերի 18-ին, այսինքն, Ֆարզադ Փարնիյունը 2011թ. մարտ-ապրիլ ամիսներին ՀՀ-ում առհասարակ չի գտնվել։
/գ. թ. 237-238/
Ամբաստանյալ Հակոբ Թորգոմի Ղուկասյանի նախաքննական ինքնախոստովանական ցուցմունքներով այն մասին, որ Սիլվանայից ձեռք է բերել «ափիոն» տեսակի թմրամիջոց, որի մի մասը գործածել է, իսկ մնացած մասը խառնելով ջրի հետ` պատրաստել և ստացել է «ափիոնի» լուծույթ, ինչը հայտնաբերվել է իր մոտ` անձնական խուզարկությամբ։
Հակոբ Ղուկասյանը Սիլվանա Գեորկիի Մուսիսյանի հետ առերես հարցաքննության ժամանակ հայտնել է նաև, որ Սիլվանա Մուսիսյանից պարբերաբար ձեռք է բերել «մեթադոն» և «ափիոն» տեսակի թմրամիջոցներ, որոնք գործածել է, սակայն ձեռք բերած թմրամիջոցների քանակը չի կարող հիշել։
Դատարանում ամբաստանյալ Հակոբ Թորգոմի Ղուկասյանը հայտնեց, որ պնդում է իր նախաքննական ցուցմունքները, իրեն լիովին մեղավոր է ճանաչում և անկեղծորեն զղջում է կատարածի համար։
/դատական նիստի արձանագրություն, գ. թ. 56, 57-58, 96, 189-190/
Վկա Ժան Կարապետի Մելքոնի նախաքննական ցուցմունքով այն մասին, որ հանդիսանում է Սիլվանա Մուսիսյանի որդին։ 2011թ. հոկտեմբերի 13-ին գնացել է մայրիկի տուն, որպեսզի նրանից գումար վերցնի։ Այնտեղ է գտնվել նաև քույրը` Մարիամը, որն ասել է, որ մայրը տանը չէ։ Քրոջն ասել է, որ իրեն շտապ գումար է անհրաժեշտ։ Մարիամը ցույց է տվել այն պահարանը, որտեղ մայրը պահել է գումարը։ Բացելով պահարանը` այնտեղից վերցրել է մի տուփ։ Այդ ժամանակ տուփը ձեռքից ընկել է և դրա միջից դեղահաբեր են թափվել։ Մարիամն ասել է, որ դրանք մայրիկի հիվանդության դեղերն են։ Ինքը ցանկացել է հավաքել հաբերը, սակայն Մարիամի առաջարկով գցել է աղբարկղը, քանի որ դեղահաբերն արդեն կեղտոտված են եղել։ Դեղահաբերը եղել են միջին չափի, կլոր, սպիտակ գույնի, շուրջ 15-20 հատ։ Վերցնելով 30.000 ՀՀ դրամ գումար` հեռացել է։
Դատարանում վկա Ժան Կարապետի Մելքոնը հրաժարվեց իր մոր վերաբերյալ ցուցմունքներ տալուց։
/դատական նիստի արձանագրություն, գ. թ. 156-157/
Վկա Մարիամ Կարապետի Մելքոնի նախաքննական ցուցմունքով այն մասին, որ հանդիսանում է Սիլվանա Մուսիսյանի դուստրը։ 2011թ. հոկտեմբերի 13-ին, ժամը 17.00-ի սահմաններում, իր եղբայր Ժանը տեղեկանալով, որ ինքը տանն է` եկել է մայրիկի տուն։ Եղբայրն ասել է, որ իրեն շտապ գումար է անհրաժեշտ։ Քանի որ մայրը տանը չի եղել` զանգահարել են նրան, սակայն հեռախոսն անջատված է եղել։ Ինքը ցույց է տվել այն պահարանը, որտեղ մայրը պահել է գումարը։ Բացելով պահարանը` այնտեղից Ժանը վերցրել է մի տուփ։ Այդ ժամանակ տուփը Ժանի ձեռքից ընկել է և դրա միջից դեղահաբեր են թափվել։ Ինքն ասել է, որ դրանք մայրիկի հիվանդության դեղերն են։ Ժանը ցանկացել է հավաքել հաբերը, սակայն իր առաջարկով գցել են աղբարկղը, քանի որ դեղահաբերն արդեն կեղտոտված են եղել։ Դեղահաբերը եղել են միջին չափի, կլոր, սպիտակ գույնի, շուրջ 15-20 հատ։ Ժանը վերցնելով 30.000 ՀՀ դրամ գումար` հեռացել է։
Դատարանում վկա Մարիամ Կարապետի Մելքոնը հրաժարվեց իր մոր վերաբերյալ ցուցմունքներ տալուց։
/դատական նիստի արձանագրություն, գ. թ. 158-160/
Դատաքիմիական փորձաքննության 2011թ. հոկտեմբերի 13-ի թիվ 11-2919 եզրակացությամբ, որի համաձայն` «Փորձաքննությանը ներկայացված թվով 9 պոլիէթիլենային փաթեթներում առկա ընդհանուր թվով 90 ամբողջական միանման դեղահատերում առկա է «մեթադոն» թմրակտիվ բաղադրատարրը, որի ընդհանուր քանակական պարունակությունը կազմել է 0.9 գրամ (յուրաքանչյուր դեղահատում 0.01-ական գրամ)։
Մեթադոնը ներառված է «Հայաստանի Հանրապետության հսկման ենթակա թմրամիջոցների, հոգեմետ նյութերի և դրանց պրեկուրսորների» կազմում (Երևան 2003)»։
Փորձաքննության ընթացքում յուրաքանչյուր փաթեթում առկա 10-ական դեղահատերից ծախսվել են կեսական դեղահատ։
/գ. թ. 31-36/
Դատաքիմիական փորձաքննության 2011թ. հոկտեմբերի 14-ի թիվ 11-2920 եզրակացությամբ, որի համաձայն` «Փորձաքննությանը ներկայացված մեկ հատ «B/Braun Injekt» մակնիշի, կանաչ գույնի մխոցով, 6մլ ծավալի համար նախատեսված, ասեղով և ասեղնակալով, մեկանգամյա օգտագործման ներարկիչում առկա 3.1մլ ծավալով հեղուկում պարունակվող 0.243 գրամ հաստատուն չոր քաշով նյութը հանդիսանում է ացետիլացված ափիոն տեսակի թմրամիջոց, որն իր բաղադրության մեջ պարունակում է ափիոնային շարքին դասվող թմրալկալոիդներ մորֆին և կոդեին, ինչպես նաև ացետիլմորֆին և դիացետիլմորֆին տեսակի թմրակտիվ բաղադրատարրերը։ Մորֆինը, ացետիլմորֆինը, դիացետիլմորֆինը, կոդեինը և ացետիլացված ափիոնը ներառված են «Հայաստանի Հանրապետության հսկման ենթակա թմրամիջոցների, հոգեմետ նյութերի և դրանց պրեկուրսորների» կազմում (Երևան 2003)»։
Հետազոտությունների ընթացքում ծախսվել է 0,05 գրամ` հետազոտվող օբյեկտից։
/գ. թ. 73-77/
Դատաքիմիական փորձաքննության 2011թ. հոկտեմբերի 28-ի թիվ 0904 եզրակացությամբ, որի համաձայն` «13.10.2011թ. Հակոբ Թորգոմի Ղուկասյանի մեզի փորձանմուշում հայտնաբերվել են կանաբիսի, ափիոնի թմրամիջոցների թմրալկալոիդներ և ափիոիդային անալգետիկ մեթադոնի մետաբոլիտներ»։
/գ.թ. 161/
Դատանարկոլոգիական փորձաքննության 2011թ. նոյեմբերի 09-ի թիվ 0235-11 եզրակացությամբ, որի համաձայն` «Հակոբ Թորգոմի Ղուկասյանը տառապում է «ափիոնային թմրամոլություն դադարի շրջանում» ախտորոշմամբ, ուստի հարկադիր բուժման կարիք չունի։
/գ. թ. 170-171/
Սիլվանա Գեորկիի Մուսիսյանի և Հակոբ Թորգոմի Ղուկասյանի անձնական խուզարկությամբ հայտնաբերված և 2011թ. հոկտեմբերի 28-ին, 2011թ. նոյեմբերի 1-ին «Ղ Տելեկոմ» և «Արմենտել» ՓԲ ընկերություններից ստացված, 094-87-77-53, 098-70-02-85, 094-96-96-67, 096-76-63-23 հեռախոսահամարների մուտքային և ելքային հեռախոսազանգերի վերծանումները զննության ենթարկելու մասին 17.10.2011թ. և 07.12.2011թ. արձանագրություններով, որոնց համաձայն` Սիլվանա Գեորկիի Մուսիսյանին պատկանող «Նոկիա» մոդելի բջջային հեռախոսի մեջ տեղադրված է 098-70-02-85 համարի հեռախոսաքարտը, «Kenxida» մոդելի բջջային հեռախոսի մեջ` 094-96-96-67, 055-51-57-40 համարների հեռախոսաքարտերը, իսկ Հակոբ Թորգոմի Ղուկասյանին պատկանող «Նոկիա» մոդելի բջջային հեռախոսի մեջ` 096-76-63-23 համարի հեռախոսաքարտը։ Սիլվանա Գեորկիի Մուսիսյանն իր կողմից գործածված 098-70-02-85, 094-96-96-67 հեռախոսահամարներով հեռախոսազրույցներ է ունեցել Հակոբ Թորգոմի Ղուկասյանի հետ` նրա կողմից գործածված 096-00-05-50, 096-76-63-23 հեռախոսահամարներով։
/գ.թ. 119-120, 192-196/
Որպես այլ փաստաթուղթ` ապացույց ճանաչված`
2011թ. հոկտեմբերի 13-ի Սիլվանա Գեորկիի Մուսիսյանին և Հակոբ Թորգոմի Ղուկասյանին բերման ենթարկելու, նրանց անձնական խուզարկության ենթարկելու մասին արձանագրություններով, որոնց համաձայն` Սիլվանա Մուսիսյանի անձնական խուզարկությամբ հայտնաբերվել է զգալի չափերի` 0.9 գրամ ընդհանուր քաշով «մեթադոն» տեսակի թմրամիջոց պարունակող, իննսուն հատ դեղահաբեր։ Ս. Մուսիսյանը հայտարարել է, որ իր մոտ հայտնաբերված հաբերը պատկանում են իրեն, դրանք հանդիսանում են «մեթադոն» տեսակի թմրամիջոց, ձեռք է բերել Իրանի Իսլամական Հանրապետությունում և իր հետ բերել Հայաստան։ Հակոբ Ղուկասյանի անձնական խուզարկությամբ հայտնաբերվել է խոշոր չափերի` 0.243 գրամ հաստատուն չոր քաշով «ացետիլացված ափիոն» տեսակի թմրամիջոց։ Դրա վերաբերյալ Հակոբ Ղուկասյանը հայտնել է, որ հայտնաբերվածը հանդիսանում է «ափիոն» տեսակի թմրամիջոց և նախատեսված է իր գործածման համար։
ՀՀ ոստիկանության ԿՀԴՊ գլխավոր վարչությունից 2011թ. հոկտեմբերի 27-ին ստացված թիվ 29/4-4534 գրությամբ, որի համաձայն` Սիլվանա Մուսիսյանը 2011թ. փետրվարի 21-ից մինչև 2011թ. հոկտեմբերի 8-ն ընկած ժամանակահատվածում, պարբերաբար, Մեղրիի սահմանային անցակետով մեկնել է ՀՀ-ից և նույն ժամանակ, նույն անցակետով վերադարձել ՀՀ։
Սիլվանա Գեորկիի Մուսիսյանի կողմից գործածված 098-70-02-85, 094-96-96-67 և Հակոբ Թորգոմի Ղուկասյանի կողմից գործածված 096-00-05-50, 096-76-63-23 հեռախոսահամարների մուտքային և ելքային հեռախոսազանգերի վերծանումներից արտատպված նյութերով, որոնց համաձայն` Սիլվանա Մուսիսյանն իր 098-70-02-85, 094-96-96-67 հեռախոսահամարներով պարբերաբար հեռախոսակապի մեջ է գտնվել Հակոբ Ղուկասյանի հետ` նրա 096-00-05-50, 096-76-63-23 հեռախոսահամարներով։
/գ. թ. 9-10, 13-14, 153-154, 192-196, 212-214/
Իրեղեն ապացույց ճանաչված, Սիլվանա Գեորկիի Մուսիսյանի անձնական խուզարկությամբ հայտնաբերված /փաստացի առկա/ 0.855 գրամ ընդհանուր քաշով «մեթադոն» տեսակի թմրամիջոց պարունակող, 81 ամբողջական հաբերով և 9 հատ կեսական հաբերով, Հակոբ Թորգոմի Ղուկասյանի անձնական խուզարկությամբ հայտնաբերված /փաստացի առկա/ 0.193 գրամ «ացետիլացված ափիոն» տեսակի թմրամիջոցով։
/գ.թ. 215-216/


Դատարանի իրավական վերլուծությունները

Վերլուծելով ամբաստանյալներ Սիլվանա Գեորկիի Մուսիսյանի և Հակոբ Թորգոմի Ղուկասյանի ցուցմունքները, համադրելով դրանք քրեական գործի դատական քննությամբ ձեռք բերված և հետազոտված ապացույցների հետ, գնահատելով դրանք վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, դատարանը գտնում է, որ ամբաստանյալ Սիլվանա Մուսիսյանի ցուցմունքները` «ափիոն» տեսակի թմրամիջոց ձեռք չբերելու, այն Հայաստան չփոխադրելու և Հ. Ղուկասյանին ապօրինի չիրացնելու, ինչպես նաև Իրանի Իսլամական Հանրապետությունից «մեթադոն» տեսակի թմրամիջոցներ Հայաստանի Հանրապետություն մաքսանենգությամբ չփոխադրելու կամ այդ եղանակով փոխադրելու փորձ չկատարելու մասով, իրականությանը չեն համապատասխանում, քրեական պատասխանատվությունից և պատժից խուսափելու նպատակ են հետապնդում և հերքվում են վերոհիշյալ ապացույցներով։
Քննարկելով ամբաստանյալ Սիլվանա Մուսիսյանի 2011թ. հոկտեմբերի 13-ի բացատրության /գ.թ. 15/` որպես ապացույցի թույլատրելիության հարցը, դատարանը գտնում է, որ այն որպես ապացույց թույլատրելի չէ հետևյալ պատճառաբանությամբ.
ՀՀ կառավարության 14.06.2007թ. թիվ 818-Ն որոշման համաձայն` ՀՀ կառավարությունը որոշել է` «Համաձայն «Ոստիկանության մասին» Հայաստանի Հանրապետության օրենքի 5-րդ հոդվածի 5-րդ մասի հաստատել`
1. մարդու իրավունքների ու ազատությունների սահմանափակումից բխող` ծանուցման ենթակա իրավունքների ցանկը.
2. մարդու իրավունքների ու ազատությունների սահմանափակումից բխող` ծանուցման ենթակա իրավունքների կարգը։»
Մարդու իրավունքների ու ազատությունների սահմանափակումից բխող` ծանուցման ենթակա իրավունքների ցանկի 2-րդ կետի 2-րդ և 3-րդ ենթակետերի համաձայն` «Մարդու իրավունքերը սահմանափակելիս` մարդն իրավունք ունի ստանալու իրավաբանական օգնություն, բացատրություններ տալու փաստաբանի ներկայությամբ կամ հրաժարվելու բացատրություններ տալուց»։
Մարդու իրավունքների ու ազատությունների սահմանափակումից բխող իրավունքների ծանուցման կարգի 5-րդ կետի համաձայն` «Մարդուն ոստիկանություն բերելուց անմիջապես հետո կազմվում է իրավունքների բանավոր ծանուցման մասին արձանագրություն, որում նշվում են արձանագրությունը կազմող ոստիկանության ծառայողի պաշտոնը, կոչումը, ազգանունը, ծանուցման վայրը, ժամանակը, այն մարդու անունը, ազգանունը, ում ազատությունը սահմանափակվել է, սահմանափակման պատճառը, այն իրավական ակտը, որի հիման վրա ազատությունը սահմանափակվել է, նշում ազատության սահմանափակումից բխող իրավունքների ծանուցման փաստի, իրավունքների իրականացման կարգի պարզաբանման մասին։...»։
ՀՀ քրեական դատավարության օրենսգրքի 105-րդ հոդվածի 1-ին մասի 2-րդ և 5-րդ կետերի համաձայն` «Քրեական գործով վարույթում մեղադրանքի հիմքում չեն կարող դրվել և որպես ապացույց օգտագործվել այն նյութերը, որոնք ձեռք են բերվել` կասկածյալի և մեղադրյալի պաշտպանության իրավունքի, դատավարության լեզվին չտիրապետող անձանց իրավունքների` ՀՀ քրեական դատավարության օրենսգրքով նախատեսված լրացուցիչ երաշխիքների էական խախտմամբ, քննչական կամ այլ դատավարական գործողության կատարման կարգի էական խախտմամբ»։
Վերոհիշյալ բացատրությունը վերցնելիս` Սիլվանա Մուսիսյանին ՀՀ կառավարության 14.06.2007թ. թիվ 818-Ն որոշմամբ սահմանված` իրավունքների և ազատությունների սահմանափակումից բխող իրավունքները չեն պարզաբանվել և նա չի տեղեկացվել փաստաբան ունենալու, բացատրություն տալուց հրաժարվելու իրավունք ունենալու մասին, չի պահպանվել այդ գործողության` օրենքով սահմանված կատարման կարգը։ Հետևաբար այդ բացատրությունը մեղադրանքի հիմքում դրվել և որպես ապացույց օգտագործվել չեն կարող։
Վերլուծելով ամբաստանյալներ Սիլվանա Գեորկիի Մուսիսյանին և Հակոբ Թորգոմի Ղուկասյանին առաջադրված մեղադրանքները, նրանց ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Սիլվանա Գեորկիի Մուսիսյանի կողմից, նրա մեղավորությամբ, իրացնելու նպատակով, առանձնապես խոշոր չափերով թմրամիջոցներ ապօրինի ձեռք բերելը, պահելը, փոխադրելը և դրանք ապօրինի իրացնելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 266-րդ հոդվածի 3-րդ մասի 2-րդ կետով նախատեսված հանցագործության հատկանիշներին։
Ապացուցված է նաև ամբաստանյալ Սիլվանա Գեորկիի Մուսիսյանի կողմից, նրա մեղավորությամբ, իրացնելու նպատակով, խոշոր չափերով թմրամիջոցներ ապօրինի ձեռք բերելը, պահելը, փոխադրելը և դրանք ապօրինի իրացնելը, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 266-րդ հոդվածի 2-րդ մասի 2-րդ կետով նախատեսված հանցագործության հատկանիշներին։
Ապացուցված է նաև ամբաստանյալ Սիլվանա Գեորկիի Մուսիսյանի կողմից, նրա մեղավորությամբ, իրացնելու նպատակով, խոշոր չափերով թմրամիջոցներ ապօրինի ձեռք բերելու, պահելու, փոխադրելու և դրանք ապօրինի իրացնելու հանցափորձ կատարելը, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 34-266-րդ հոդվածի 2-րդ մասի 2-րդ կետով նախատեսված հանցագործության հատկանիշներին։
Ապացուցված է նաև ամբաստանյալ Սիլվանա Գեորկիի Մուսիսյանի կողմից, նրա մեղավորությամբ թմրամիջոցների մաքսանենգություն կատարելը, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 215-րդ հոդվածի 2-րդ մասով նախատեսված հանցագործության հատկանիշներին։
Ապացուցված է նաև ամբաստանյալ Սիլվանա Գեորկիի Մուսիսյանի կողմից, նրա մեղավորությամբ, թմրամիջոցների մաքսանենգության փորձ կատարելը, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 34-215-րդ հոդվածի 2-րդ մասով նախատեսված հանցագործության հատկանիշներին։
Ամբաստանյալ Հակոբ Թորգոմի Ղուկասյանի կողմից, նրա մեղավորությամբ, առանց իրացնելու նպատակի առանձնապես խոշոր չափերով թմրամիջոցներ ապօրինի ձեռք բերելը և պահելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 268-րդ հոդվածի 3-րդ մասով նախատեսված հանցագործության հատկանիշներին։
Ապացուցված է նաև ամբաստանյալ Հակոբ Թորգոմի Ղուկասյանի կողմից, նրա մեղավորությամբ, առանց իրացնելու նպատակի զգալի չափերով թմրամիջոցներ ապօրինի ձեռք բերելը և պահելը, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 268-րդ հոդվածի 1-ին մասով նախատեսված հանցագործության հատկանիշներին։
Ապացուցված է նաև ամբաստանյալ Հակոբ Թորգոմի Ղուկասյանի կողմից, նրա մեղավորությամբ, առանց իրացնելու նպատակի զգալի չափերով թմրամիջոցներ ապօրինի ձեռք բերելու և պահելու փորձ կատարելը, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 34-268-րդ հոդվածի 1-ին մասով նախատեսված հանցագործության հատկանիշներին։
Ուսումնասիրելով ամբաստանյալների անձը բնութագրող տվյալները, պատասխանատվությունն ու պատիժը մեղմացնող ու ծանրացնող հանգամանքները, ամբաստանյալ Սիլվանա Գեորկիի Մուսիսյանի նկատմամբ, նրա կատարած հանցագործություններից յուրաքանչյուրի համար պատիժ նշանակելիս դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նախկինում դատված չի եղել, խնամքին ունի մեկ անչափահաս զավակ։ Ամբաստանյալի պատասխանատվությունը և պատիժը մեղմացնող կամ ծանրացնող հանգամանքներ դատարանը չի արձանագրում։
Ամբաստանյալ Սիլվանա Գեորկիի Մուսիսյանն իր կատարած` Հայաստանի Հանրապետության քրեական օրենսգրքի 266-րդ հոդվածի 3-րդ մասի 2-րդ կետով, 266-րդ հոդվածի 2-րդ մասի 2-րդ կետով, 215-րդ հոդվածի 2-րդ մասով, 34-266-րդ հոդվածի 2-րդ մասի 2-րդ կետով և 34-215-րդ հոդվածի 2-րդ մասով նախատեսված յուրաքանչյուր հանցագործության համար ենթակա է պատժի ազատազրկման ձևով, որը նա պետք է կրի։
Ամբաստանյալ Հակոբ Թորգոմի Ղուկասյանի նկատմամբ, նրա կատարած հանցագործություններից յուրաքանչյուրի համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա տալով ինքնախոստովանական ցուցմունքներ` անկեղծորեն զղջացել է կատարածի համար, նախկինում դատված չի եղել, բնութագրվում է դրական։ Նշված հանցագործություններից յուրաքանչյուրով որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում նրա խնամքին մինչև տասնչորս տարեկան երեք երեխաների առկայությունը, իսկ ամբաստանյալի պատասխանատվությունը և պատիժը ծանրացնող հանգամանքներ դատարանը չի արձանագրում։
Ամբաստանյալ Հակոբ Թորգոմի Ղուկասյանն իր կատարած` Հայաստանի Հանրապետության քրեական օրենսգրքի 268-րդ հոդվածի 1-ին մասով, 34-268-րդ հոդվածի 1-ին մասով և 268-րդ հոդվածի 3-րդ մասով նախատեսված յուրաքանչյուր հանցագործության համար ենթակա է պատժի ազատազրկման ձևով, որը նա պետք է կրի։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով ամբաստանյալի գույքի վրա դրված կալանքի հարցը` դատարանը գտնում է, որ Սիլվանա Գեորկիի Մուսիսյանի գույքի վրա նախաքննության մարմնի 28.10.2011թ. որոշմամբ դրված կալանքը պետք է թողնել անփոփոխ` մինչև դատավճռի կատարումը։
Քննարկելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, 10.12.2011թ. որոշմամբ իրեղեն ապացույցներ ճանաչված, 0.855 գրամ «մեթադոն» տեսակի թմրամիջոց պարունակող 81 հատ ամբողջական և 9 հատ կես հաբերը, 0.193 գրամ «ացետիլացված ափիոն» տեսակի թմրամիջոցը պետք է վերադարձնել վարույթն իրականացնող մարմնին` քրեական գործից անջատված մասով տնօրինելու համար։
Քննարկելով խափանման միջոցի հարցը` դատարանը գտնում է, որ ամբաստանյալներ Սիլվանա Մուսիսյանի և Հակոբ Ղուկասյանի նկատմամբ որպես խափանման միջոց կալանավորումն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Քննարկելով դատական ծախսերի հարցը` դատարանը գտնում է, որ ամբաստանյալներից հօգուտ պետական բյուջեյի, որպես դատական ծախսեր բռնագանձման են ենթակա փորձաքննությունների կատարման արժեք հանդիսացող հետևյալ գումարները. ամբաստանյալ Սիլվանա Գեորկիի Մուսիսյանից` 82.440 /ութսուներկու հազար չորս հարյուր քառասուն/ ՀՀ դրամ, ամբաստանյալ Հակոբ Թորգոմի Ղուկասյանից` 27.480 /քսանյոթ հազար չորս հարյուր ութսուն/ ՀՀ դրամ։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 168-169-րդ, 357-360-րդ, 364-366-րդ, 369-373-րդ հոդվածներով, դատարանը`

Վ Ճ Ռ Ե Ց


1. Ամբաստանյալ Սիլվանա Գեորկիի Մուսիսյանին մեղավոր ճանաչել Հայաստանի Հանրապետության քրեական օրենսգրքի 266-րդ հոդվածի 3-րդ մասի 2-րդ կետով, 266-րդ հոդվածի 2-րդ մասի 2-րդ կետով, 215-րդ հոդվածի 2-րդ մասով, 34-266-րդ հոդվածի 2-րդ մասի 2-րդ կետով և 34-215-րդ հոդվածի 2-րդ մասով նախատեսված հանցանքներում և դատապարտել. ՀՀ քրեական օրենսգրքի 266-րդ հոդվածի 3-րդ մասի 2-րդ կետով` ազատազրկման 7 /յոթ/ տարի ժամկետով` առանց գույքի բռնագրավման, 266-րդ հոդվածի 2-րդ մասի 2-րդ կետով` ազատազրկման 5 /հինգ/ տարի ժամկետով` առանց գույքի բռնագրավման, 215-րդ հոդվածի 2-րդ մասով` ազատազրկման 4 /չորս/ տարի ժամկետով` ամբողջ գույքի բռնագրավմամբ, սակայն ոչ ավելի 1000 ԱՄՆ դոլարին համարժեք ՀՀ դրամ գումարից, 34-266-րդ հոդվածի 2-րդ մասի 2-րդ կետով` ազատազրկման 5 /հինգ/ տարի ժամկետով` առանց գույքի բռնագրավման, 34-215-րդ հոդվածի 2-րդ մասով` ազատազրկման 4 /չորս/ տարի ժամկետով` ամբողջ գույքի բռնագրավմամբ, սակայն ոչ ավելի 2000 ԱՄՆ դոլարին համարժեք ՀՀ դրամ գումարից։ ՀՀ քրեական օրենսգրքի 66-րդ հոդվածով սահմանված` պատիժների մասնակի և լրիվ գումարման սկզբունքների կիրառմամբ, ամբաստանյալ Սիլվանա Գեորկիի Մուսիսյանի նկատմամբ պատիժ նշանակել ազատազրկում 11 /տասնմեկ/ տարի ժամկետով` ամբողջ գույքի բռնագրավմամբ, սակայն ոչ ավելի 3000 ԱՄՆ դոլարին համարժեք ՀՀ դրամ գումարից, որը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 2011թ. հոկտեմբերի 13-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
2. Ամբաստանյալ Հակոբ Թորգոմի Ղուկասյանին մեղավոր ճանաչել Հայաստանի Հանրապետության քրեական օրենսգրքի 268-րդ հոդվածի 1-ին մասով, 34-268-րդ հոդվածի 1-ին մասով և 268-րդ հոդվածի 3-րդ մասով նախատեսված հանցանքներում և դատապարտել. ՀՀ քրեական օրենսգրքի 268-րդ հոդվածի 1-ին մասով` ազատազրկման 6 /վեց/ ամիս ժամկետով, 34-268-րդ հոդվածի 1-ին մասով` ազատազրկման 4 /չորս/ ամիս ժամկետով, 268-րդ հոդվածի 3-րդ մասով` ազատազրկման 2 /երկու/ տարի ժամկետով։ ՀՀ քրեական օրենսգրքի 66-րդ հոդվածով սահմանված` պատիժների մասնակի գումարման սկզբունքի կիրառմամբ, ամբաստանյալ Հակոբ Թորգոմի Ղուկասյանի նկատմամբ պատիժ նշանակել ազատազրկում 2 /երկու/ տարի 6 /վեց/ ամիս ժամկետով, որը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 2011թ. հոկտեմբերի 13-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Ամբաստանյալ Սիլվանա Գեորկիի Մուսիսյանի գույքի վրա նախաքննության մարմնի 28.10.2011թ. որոշմամբ դրված կալանքը թողնել անփոփոխ` մինչև դատավճռի կատարումը։
Դատավճռի օրինական ուժի մեջ մտնելուց հետո, 10.12.2011թ. որոշմամբ իրեղեն ապացույցներ ճանաչված, 0.855 գրամ «մեթադոն» տեսակի թմրամիջոց պարունակող 81 հատ ամբողջական և 9 հատ կես հաբերը, 0.193 գրամ «ացետիլացված ափիոն» տեսակի թմրամիջոցը` վերադարձնել վարույթն իրականացնող մարմնին` քրեական գործից անջատված մասով տնօրինելու համար։
Ամբաստանյալ Սիլվանա Գեորկիի Մուսիսյանից հօգուտ ՀՀ պետական բյուջեի բռնագանձել 82.440 /ութսուներկու հազար չորս հարյուր քառասուն/ ՀՀ դրամ գումար` որպես դատական ծախսեր։
Ամբաստանյալ Հակոբ Թորգոմի Ղուկասյանից հօգուտ ՀՀ պետական բյուջեի բռնագանձել 27.480 /քսանյոթ հազար չորս հարյուր ութսուն/ ՀՀ դրամ գումար` որպես դատական ծախսեր։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ