ԵԿԴ/0276/01/11





ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«22» փետրվարի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Վ.Պողոսյան
տուժող Մ.Կոսյան

դռնբաց դատական նիստում քննեց քրեական գործն ըստ մեղադրանքի`
Սևակ Հենդրիկի Սարգսյանի` ծնված 1989 թվականի օգոստոսի 21-ին Երևան քաղաքում, ազգությամբ հայ, ՀՀ քաղաքացի, ութամյա կրթությամբ, չամուսնացած, չի աշխատում, նախկինում դատապարտված, հաշվառված է Կոտայքի մարզի Ալափարս գյուղի 19-րդ փողոցի 15/1 տանը, մեղադրանք է առաջադրվել ՀՀ քրեական օրենսգրքի 176-րդ հոդվածի 2-րդ մասի 4-րդ կետով, արգելանքի տակ է 2011 թվականի դեկտեմբերի 2-ից:
1. Գործի դատավարական նախապատմությունը.
2011 թվականի դեկտեմբերի 2-ին ՀՀ ոստիկանության Կենտրոնականի քննչական բաժնի քննիչ Վ.Ասատրյանի որոշմամբ ՀՀ քրեական օրենսգրքի 34-176-րդ հոդվածի 2-րդ մասի 4-րդ կետով նախատեսված հանցագործության հատկանիշներով հարուցվել և վարույթ է ընդունվել թիվ 15137711 քրեական գործը:
2011 թվականի դեկտեմբերի 3-ին ՀՀ ոստիկանության Կենտրոնականի քննչական բաժնի քննիչ Վ.Ասատրյանի որոշմամբ թիվ 15137711 քրեական գործով Սևակ Հենդրիկի Սարգսյանին մեղադրանք է առաջադրվել ՀՀ քրեական օրենսգրքի 34-176-րդ հոդվածի 2-րդ մասի 4-րդ կետով:
2011 թվականի դեկտեմբերի 19-ին ՀՀ ոստիկանության Կենտրոնականի քննչական բաժնի քննիչ Վ.Ասատրյանի որոշմամբ թիվ 15137711 քրեական գործով Սևակ Հենդրիկի Սարգսյանին առաջադրված մեղադրանքը փոփոխվել է և նրան նոր մեղադրանք է առաջադրվել ՀՀ քրեական օրենսգրքի 176-րդ հոդվածի 2-րդ մասի 4-րդ կետով:

2011 թվականի դեկտեմբերի 27-ին Սևակ Հենդրիկի Սարգսյանի վերաբերյալ թիվ 15137711 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0276/01/11 համարը:
Սևակ Հենդրիկի Սարգսյանին մեղադրանք է առաջադրվել ՀՀ քրեական օրենսգրքի 176-րդ հոդվածի 2-րդ մասի 4-րդ կետով` այն արարքի համար, որ նա 2011 թվականի նոյեմբերի 23-ին` ժամը 00:10-ի սահմաններում, Երևան քաղաքի Աբովյան և Կորյուն փողոցների խաչմերուկի մոտակայքում Մարիամ Վլադիմիրի Կոսյանի առողջության համար ոչ վտանգավոր բռնություն գործադրելով` ձեռքով հարվածներ է հասցրել վերջինի գլխի շրջանին, ապա, բացահայտ հափշտակելով Մարիամ Կոսյանի` 1.300 ՀՀ դրամ արժողության ձեռքի պայուսակը, որի մեջ եղել են 20.000 ՀՀ դրամ արժողության «Նիկոն» տեսակի թվային ֆոտոխցիկը, 7.000 ՀՀ դրամ գումար, 30.000 ՀՀ դրամ ընդհանուր արժողության կոսմետիկ պարագաներ, դիմել է փախուստի:
2. Ապացույցների հետազոտում և գնահատում.
Դատական քննության ընթացքում ամբաստանյալ Սևակ Սարգսյանն առաջադրված մեղադրանքում իրեն մեղավոր ճանաչեց մասնակի և օգտվելով իր իրավունքից` հրաժարվեց ցուցմունք տալ:
Նախնական քննության ընթացքում ամբաստանյալ Սևակ Սարգսյանը, որպես կասկածյալ, ցուցմունք է տվել այն մասին, որ 2011 թվականի նոյեմբերի 22-ին ինքը Եղվարդից երթուղային տաքսիով գնացել է Երևան, որպեսզի այնտեղից երթուղային տաքսիով գնա իրենց գյուղ` Ալափարս: Այդ ժամանակ իր մոտ եղել է 500 ՀՀ դրամ: Երևանում` «Շրջանային» կոչվող վայրում, ինքը մոտ մեկ ժամ սպասել է, սակայն ոչ ավտոբուս և ոչ էլ երթուղային տաքսի չի եղել, որից հետո իր մոտ եղած 500 դրամով գնել է մեկ տուփ ծխախոտ և մեկ շիշ գարեջուր: Դրանից հետո ինքը որոշել է պատահական անցորդից ձեռքի պայուսակ հափշտակել և պայուսակում եղած գումարով տաքսի մեքենայով գնալ տուն: Այդ ժամանակ ինքը տեսել է մի անծանոթ աղջկա, ով խոսելիս է եղել բջջային հեռախոսով և ուսին գցած է եղել պայուսակ: Ինքը ետևից մոտեցել է այդ աղջկան և ուժեղ քաշել նրա պայուսակից, որի պատճառով նա ընկել է և ձեռքերով ամուր բռնել պայուսակը: Այդ պահին այդ աղջկա շունը հարձակվել է իր վրա, իսկ ինքը բռունցքներով հարվածել է շանը, որպեսզի շունը չվնասի իրեն: Ինքը չի բացառում, որ շանը հարվածելու ժամանակ իր հարվածները դիպած լինեն այդ աղջկան: Դրանից հետո այդ աղջիկը թողել է պայուսակը, և ինքը, վերցնելով այն, դիմել է փախուստի: Մի քանի քայլ հեռանալուց հետո լսել է, որ պայուսակի մեջ հիվանդի համար դեղեր կան, ինչի պատճառով հասկացել է, որ մեծ սխալ է թույլ տվել, և պայուսակը մի քանի մետր հեռու գցելով` փախել է: Այնուհետև նկատել է, որ գրպանից բացակայում է իր «Նոկիա» տեսակի բջջային հերախոսը, որի մեջ եղել է 077-94-34-80 հեռախոսահամարը:
Նախնական քննության ընթացքում ամբաստանյալ Սևակ Սարգսյանը, որպես մեղադրյալ, ցուցմունք է տվել այն մասին, որ իրեն պարզաբանվել է մեղադրանքի էությունը, այն պարզ է և հասկանալի, որ ինքը մեղադրվում է ՀՀ քրեական օրենսգրքի 34-176 հոդվածի 2-րդ մասի 4-րդ կետով` այն արարքի համար, որ 2011 թվականի նոյեմբերի 23-ին` ժամը 00:10-ի սահմաններում, Երևան քաղաքի Աբովյան և Կորյուն փողոցների հատման մասում, բռնություն գործադրելով, փորձել է բացահայտ հափշտակել Մարիամ Կոսյանի ձեռքի պայուսակը: Առաջադրված մեղադրանքում իրեն լիովին մեղավոր է ճանաչել, զղջացել կատարածի համար և խնդրել իրեն ներել: Ինքն այդ աղջան վնասվածք պատճառելու նպատակ չի ունեցել, հնարավոր է, որ այն ժամանակ, երբ նա բռնել է պայուսակը, ինքը թեթևակի հարվածել է նրան, բայց վնասվածք պատճառելու դիտավորություն չի ունեցել:
Նախնական քննության ընթացքում ամբաստանյալ Սևակ Սարգսյանը, որպես մեղադրյալ, լրացուցիչ ցուցմունք է տվել այն մասին, որ ինքը, դեն նետելով Մարիամ Կոսյանի պայուսակը, մտածել է, որ իր հարազատների նկատմամբ մեկ ուրիշը կարող էր նման բան կատարել, փոշմանել է և մտածել, որ նման բան անում են հանցագործները, իսկ ինքը հանցագործ չէ: Ինչ-որ չափով վախեցել է, որ հնարավոր է իրեն բռնեն և կրկին դատապարտեն: Այդ ամենի պատճառով ինքը դեն է նետել այդ աղջկա պայուսակը և դիմել փախուստի: Ինքը պայուսակի պարունակությունը չի տեսել: Ինքը դիտավորությամբ այդ աղջկան չի հարվածել, այլ հարվածել է շանը, սակայն չի բացառում, որ շանը հարվածելիս պատահաբար հարվածած լինի Մարիամի գլխին:
Նախնական քննության ընթացքում ամբաստանյալ Սևակ Սարգսյանը, որպես մեղադրյալ, լրացուցիչ ցուցմունք է տվել այն մասին, որ իրեն պարզաբանվել է մեղադրանքի էությունը, այն իր համար պարզ է և հասկանալի, որ մեղադրվում է ՀՀ քրեական օրենսգրքի 176-րդ հոդվածի 2-րդ մասի 4-րդ կետով` այն արարքի համար, որ 2011 թվականի նոյեմբերի 23-ին` ժամը 00:10-ի սահմաններում, Երևան քաղաքի Աբովյան և Կորյուն փողոցների խաչմերուկի մոտակայքում, բռնություն գործադրելով, բացահայտ հափշտակել է Մարիամ Կոսյանի ձեռքի պայուսակը: Առաջադրված մեղադրանքում իրեն լիովին մեղավոր է ճանաչել և զղջացել կատարածի համար: Ինքն այդ աղջկան վնասվածք պատճառելու նպատակ չի ունեցել: Երբ ինքը քաշել է այդ աղջկա պայուսակը, նրա շունը հարձակվել է իր վրա և ինքը հարվածել է շանը, սակայն չի բացառում, որ երբ ինքը հարվածել է շանը, հնարավոր է պատահաբար ձեռքը ետ բերելուց արմունկով դիպած լինի այդ աղջկա գլխին:
Տուժող Մարիամ Կոսյանը դատական քննության ընթացքում ցուցմունք տվեց այն մասին, որ 2011 թվականի նոյեմբերի 22-ին` ժամը 24:00-ի սահմաններում, Երևան քաղաքի Աբովյան փողոցում գտնվող դեղատնից գնել է դեղ և քայլելով ցանկացել գնալ տուն: Այդ պահին իր հեռախոսին հաղորդագրություն է եկել և ինքը փորձել է այն կարդալ, սակայն ինչ-որ մեկը հարվածել է իրեն, գցել գետնին և սկսել է իր ձեռքից քաշել պայուսակը: Այդ անձը քաշել է իր պայուսակը և հարվածել իր գլխին, իսկ ինքը սկզբում բաց չի թողել իր պայուսակը, քանի որ նրա մեջ եղել է գումար, ֆոտոխցիկ և այլ իրեր: Այնուհետև ինքը թուլացել է, երևի կորցրել գիտակցությունը և բաց թողել պայուսակը: Քիչ հետո ուշքի է եկել և տեսել, որ իր կողքին հավաքված են մոտ 15-20 անծանոթ մարդիկ: Այնուհետև այդ անծանոթ մարդկանցից մեկն իրեն տվել է իր բջջային հեռախոսն ու պայուսակը և մեկ այլ բջջային հեռախոս: Ինքը հասկացել է, որ այդ մյուս հեռախոսը եղել է այն անձինը, ով փորձել է գողանալ իր պայուսակը: Իր պայուսակում եղել է 7.000 ՀՀ դրամ, ֆոտոխցիկ և կոսմետիկ պարագաներ: Իր առողոջությանը վնաս չի պատճառվել:
Վկա Լիլիթ Սարգսյանը դատական քննության ընթացքում ցուցմունք տվեց այն մասին, որ ինքն ամբաստանյալ Սևակ Սարգսյանի քույրն է: 077-94-34-80 հեռախոսահամարը գրանցված է իր անվամբ, սակայն այն օգտագործել է Սևակը: Դեպքի օրը նշված հեռախոսահամարը եղել է Սևակի մոտ:
Վկա Նարեկ Թամարյանը դատական քննության ընթացքում ցուցմունք տվեց այն մասին, որ աշխատում է Երևան քաղաքի Աբովյան 37 հասցեում գործող «Տոտո» բուքմեյքերական գրասենյակում` որպես գանձապահ: Դեպքի օրը` ժամը 00:30-ի սահմաններում, լսել է աղջկա բարձր ձայն, որի պատճառով դուրս է եկել գրասենյակից և տեսել գետնին ընկած մի աղջկա: Ինքն անմիջապես ջուր է տվել այդ աղջկան: Քիչ անց պատահական մի անձ բերել է նրա պայուսակը: Հավաքված մարդկանց խոսակցությունից ինքը հասկացել է, որ այդ աղջկան հարվածել, վայր են գցել և ցանկացել գողանալ նրա պայուսակը: Նախնական քննության ընթացքում իր տված ցուցմունքները համապատասխանում են իրականությանը:
Վկա Նարեկ Թամարյանը նախնական քննության ընթացքում ցուցմունք է տվել այն մասին, որ աշխատում է Երևան քաղաքի Աբովյան 37 հասցեում գործող «Վիկտորիա» բուքմեյքերական գրասենյակում` որպես օպերատոր-գաձապահ: Իր աշխատանքային օրը սկսվում է ժամը 14:00-ին և ավարտվում է 02:00-ին: Դեպքի օրը` ժամը 00:10-ի սահմաններում, ինքը լսել է աղմուկ և օգնության կանչեր, ինչի պատճառով դուրս է եկել և տեսել, որ անծանոթ մի աղջիկ ընկած է գետնին և շուրջը հավաքվել են մարդիկ: Ինքն անմիջապես աթոռ է բերել և այդ աղջկան նստեցրել աթոռին: Նա եղել է շոկային վիճակում և պատմել է, որ ինչ-որ մեկը հարվածել է և հափշտակել նրա պայուսակը: Որոշ ժամանակ անց մի անծանոթ տղա այդ աղջկան տվել է նրա պայուսակը:
2011 թվականի դեկտեմբերի 2-ի առերես հարցաքննության արձանագրության համաձայն` տուժող Մարիամ Կոսյանը ցուցմունք է տվել այն մասին, որ 2011 թվականի նոյեմբերի 22-ի լույս 23-ի գիշերը, երբ ինքն Աբովյան փողոցում գործող թիվ 4 դեղատնից իր տատի համար դեղ է գնել և քայլել դեպքի «Շրջանային» կոչվող վայրի գետնացում, իր ետևից հարվածել են, որի պատճառով ինքը ընկել է: Մինչ հարված ստանալն ինքը աջ ձեռքով բռնած է եղել իր բջջային հեռախոսը, իսկ պայուսակը կախված է եղել իր ուսից: Ընկնելուց հետո իրեն մոտեցել է մի տղա և քաշելով փորձել վերցնել պայուսակը, սակայն ինքն ամուր բռնել է այն և գոռալով օգնություն կանչել: Քանի որ ընկած ժամանակ իր մազերը թափված են եղել իր դեմքին, ինքը չի կարողացել տեսնել հանցագործի դեմքը: Իր դիմադրության պատճառով նա բռուցքներով հարվածներ է հասցրել իր գլխի ձախ հատվածին: Ի վերջո ինքը բաց է թողել պայուսակը և հանցագործը դիմել է փախուստի: Այդ պահին ինքը կորցրել է գիտակցությունը և քիչ անց գիտակցության գալով, տեսել է, որ շուրջը հավաքված մարդիկ կան, ովքեր իրեն օգնություն են ցույց տվել: Դրանից հետո հավաքված մարդիկ իրեն փոխանցել են իր պայուսակը և «Նոկիա» տեսակի բջջային հեռախոս, որը գտնվել էր դեպքի վայրում: Իր տատի համար գնած դեղերը եղել են իր ձախ ձեռքում, և ինքը հանցագործին չի խնդրել իր պայուսակը թողնել, քանի որ այդ պահին ինքը կորցրել է իր գիտակցությունը: Իր շունը միջադեպի ընթացքում չի հարձակվել հանցագործի վրա, և նա չի հարվածել իր շանը, այլ հարվածել է իր գլխին: Իսկ Սևակ Սարգսյանը ցուցմունք է տվել այն մասին, որ 2011 թվականի նոյեմբերի 23-ին` ժամը 00:10-ի սահմաններում, Աբովյան փողոցում գտնվող գետնացումի մոտ փորձել է հափշտակություն կատարել: Այդ ժամանակ ինքը Մարիամ Կոսյանին ետևից չի հարվածել, այլ քաշել է նրա պայուսակը, որի հետևանքով նա ընկել է: Դրանից հետո ինքը քաշել է նրա պայուսակից, որի ընթացքում Մարիամի շունը հարձակվել է իր վրա, իսկ ինքը հարվածել է շանը, այլ ոչ թե Մարիամին: Այնուհետև ինքը վերցրել է նրա պայուսակը և հեռացել, սակայն լսելով Մարիամի աղերսանքը, որ պայուսակի մեջ դեղեր են, պայուսակը գցել է և հեռացել: Հնարավոր է, որ իր հարվածը դիպած լինի Մարիամին և չի բացառում, որ դեպքը եղել է այնպես, ինչպես նշում է Մարիամը:
Քննչական փորձարարություն կատարելու մասին 2011 թվականի դեկտեմբերի 2-ի արձանագրության համաձայն` ոստիկանության ծառայողական մեքենայով Սևակ Սարգսյանի մատնանշած երթուղով գնացել են Երևան քաղաքի Աբովյան և Կորյուն փողոցների խաչմերուկի հարակից տարածք: Դեպքի վայրում Սևակ Սարգսյանը մատնացույց է արել Երևան քաղաքի Աբովյան 37 հասցեում գործող «Կատրին» գեղեցկության սրահի դիմացի հատվածը և հայտարարել, որ 2011 թվականի նոյեմբերի 23-ին` ժամը 00:10-ի սահմաններում, Աբովյան փողոցով քայլելու ընթացքում նշված վայրում նկատել է անծանոթ մի աղջկա, ով եղել է շան հետ: Այդ պահին այդ աղջիկը զբաղված է եղել հեռախոսով: Ինքը դանդաղ ետևից մոտեցել է այդ աղջկան, բռնել նրա աջ ձեռքից կախված պայուսակը և քաշել այն: Այդ ընթացքում նրա շունը հարձակվել է իր վրա և ինքը հարվածել է շանը, խլել պայուսակը և դիմել փախուստի: Մի քանի մետր փախնելուց հետո այդ աղջիկը բղավել է, որ պայուսակում դեղեր կան, ինչի պատճառով ինքը դեն է նետել պայուսակը և փախել:
Փորձագետի 2011 թվականի դեկտեմբերի 14-ի եզրակացության համաձայն` Մարիամ Կոսյանի մոտ փորձաքննության պահին դեպքին համապատասխանող վաղեմությամբ մարմնական վնասվածքների օբյեկտիվ հատկանիշներ չեն հայտնաբերվել:
Փորձագետի 2011 թվականի դեկտեմբերի 15-ի եզրակացության համաձայն` փորձաքննությանը տրամադրված ապրանքատեսակների միջին շուկայական արժեքը 2011 թվականի նոյեմբերի 23-ի դրությամբ, առկա ապրանքային վիճակի հաշվառմամբ, գնահատվում են` պայուսակը` 1.300 ՀՀ դրամ, ֆոտոխցիկը` 20.000 ՀՀ դրամ: Տրամադրված կանացի կոսմետիկ հարդարման պարագաներն օգտագործված են, որպես անձնական հիգենիայի տարատեսակ` իրենցից սպառողական արժեք չեն ներկայացնում:
Իրեղեն ապացույց ճանաչելու մասին 2011 թվականի դեկտեմբերի 3-ի որոշման համաձայն` «Նոկիա» տեսակի բջջային հեռախոսը ճանաչվել է իրեղեն ապացույց և կցվել քրեական գործին:
Իրեղեն ապացույց ճանաչելու մասին 2011 թվականի դեկտեմբերի 10-ի որոշման համաձայն` պայուսակը, «Նիկոն» տեսակի ֆոտոխցիկը և կոսմետիկ պարագանները ճանաչվել են իրեղեն ապացույց և ի պահ հանձնվել տուժող Մարիամ Կոսյանին:
Կոտայքի մարզի Ալափարս համայնքի ղեկավարի կողմից հաստատված բնութագրի համաձայն` Սևակ Հենդրիկի Սարգսյանը բնութագրվում է դրականորեն:
ՀՀ ոստիկանության ինֆորմացիոն կենտրոնի պահանջագրի համաձայն` Սևակ Հենդրիկի Սարգսյանը 2007 թվականի դեկտեմբերի 14-ին Կոտայքի մարզի առաջին ատյանի դատարանի դատավճռով մեղավոր է ճանաչվել ՀՀ քրեական օրենսգրքի 266-րդ հոդվածի 1-ին մասով, 268-րդ հոդվածի 2-րդ մասով, 271-րդ հոդվածի 1-ին մասով և դատապարտվել ազատազրկման` 3 տարի 3 ամիս ժամկետով և տուգանքի` 30.000 ՀՀ դրամ չափով: 2008 հունիսի 6-ին վճարվել է տուգանքը: 2009 հուլիս 7-ին պայմանական վաղաժամկետ ազատվել է պատժի մնացած մասը` 1 տարի 5 ամիս 17 օր ժամկետով ազատազրկումը կրելուց:
Կոտայքի մարզի առաջին ատյանի դատարանի 2007 թվականի դեկտեմբերի 14-ի դատավճռի պատճենի համաձայն` Սևակ Հենդրիկի Սարգսյանը մեղավոր է ճանաչվել ՀՀ քրեական օրենսգրքի 266-րդ հոդվածի 1-ին մասով, 268-րդ հոդվածի 2-րդ մասով և 271-րդ հոդվածի 1-ին մասով: ՀՀ քրեական օրենսգրքի 66-րդ հոդվածի 4-րդ մասի կիրառմամբ Սևակ Հենդրիկի Սարգսյանի նկատմամբ վերջնական պատիժ է նշանակվել ազատազրկում` 3 տարի 3 ամիս ժամկետով և տուգանք` 50.000 ՀՀ դրամ չափով:
Ձերբակալման 2011 թվականի դեկտեմբերի 2-ի արձանագրության համաձայն` 2011 թվականի դեկտեմբերի 2-ին` ժամը 12:00-ին, Սևակ Հենդրիկի Սարգսյանը ձերբակալվել է:
Կալանավորումը որպես խափանման միջոց կիրառելու միջնորդությունը քննության առնելու մասին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2011 թվականի դեկտեմբերի 3-ի որոշման համաձայն` Սևակ Հենդրիկի Սարգսյանի նկատմամբ որպես խափանման միջոց կիրառվել է կալանավորումը, կալանավորման սկիզբը հաշվվել է 2011 թվականի դեկտեմբերի 2-ից:
Այսպիսով, Դատարանը գտնում է, որ մտացածին են և գործով ձեռք բերված օբյեկտիվ տվյալներով հերքվում են ամբաստանյալ Սևակ Սարգսյանի ցուցմունքներն այն մասին, որ ինքը Մարիամ Կոսյանին չի հարվածել և նրան հարվածելու դիտավորություն չի ունեցել:
Վերոգրյալ ապացույցների հիման վրա Դատարանը հաստատված է համարում գործի լուծման համար նշանակություն ունեցող հետևյալ փաստերը.
-2011 թվականի նոյեմբերի 23-ին` ժամը 00:10 սահմաններում, Սևակ Սարգսյանը և Մարիամ Կոսյանը գտնվել են Երևան քաղաքի Աբովյան փողոցի 37 հասցեի մոտակայքում,
-Մարիամ Կոսյանի ուսին գցած է եղել կանացի պայուսակ,
-Սևակ Սարգսյանը ցանկացել է տիրանալ Մարիամ Կոսյանի պայուսակին և դրանում եղած իրերին,
-Սևակ Սարգսյանը ետևից մոտեցել է Մարիամ Կոսյանին, հարվածել նրա գլխին և քաշել պայուսակը,
-Մարիամ Կոսյանը ընկած վիճակում ամուր բռնել է պայուսակը, որի պատճառով Սևակ Սարգսյանը կրկին հարվածել է Մարիամ Կոսյանին, խլել պայուսակը և հեռացել,
-Մարիամ Կոսյանի պայուսակը և դրանում եղած իրերն ու գումարները ընդհանուր առմամբ կազմել են 21.300 ՀՀ դրամ,
-Մարիամ Կոսյանի առողջությանը վնաս չի պատճառվել,
-Սևակ Սարգսյանը նախկինում դատապարտվել է դիտավորյալ հանցանք կատարելու համար, որի դատվածությունը մարված չէ և բնութագրվում է դրականորեն,
-Սևակ Սարգսյանն արգելանքի տակ է 2011 թվականի դեկտեմբերի 2-ից:
3. Դատարանի իրավական վերլուծությունները.
Վերը նշված փաստերի հիման վրա Դատարանը գալիս է այն եզրահանգման, որ 2011 թվականի նոյեմբերի 23-ին` ժամը 00:10 սահմաններում, Երևան քաղաքի Աբովյան փողոցի 37 հասցեի մոտակայքում, Սևակ Հենդրիկի Սարգսյանը, Մարիամ Կոսյանի առողջության համար ոչ վտանգավոր բռնություն գործադրելով, բացահայտ հափշտակել է վերջինի պայուսակը և դրանում եղած իրերն ու գումարները, որոնց ընդհանուր արժեքը կազմել է 21.300 ՀՀ դրամ: Այսինքն` Սևակ Հենդրիկի Սարգսյանը կատարել է ուրիշի գույքի բացահայտ հափշտակություն, որը զուգորդվել է Մարիամ Կոսյանի առողջության համար ոչ վտանգավոր բռնություն գործադրելով, ինչը համապատասխանում է ՀՀ քրեական օրենսգրքի 176-րդ հոդվածի 2-րդ մասի 4-րդ կետի հատկանիշներին:
Ապացուցված է Սևակ Հենդրիկի Սարգսյանի մեղավորությունը ՀՀ քրեական օրենսգրքի 176-րդ հոդվածի 2-րդ մասի 4-րդ կետով նախատեսված արարքը կատարելու մեջ:
Սևակ Սարգսյանի անձը դրականորեն բնութագրող հանգամանքներ են մասնակի խոստովանական ցուցմունքներ տալը և կատարածի համար զղջալը:
Դատարանը գտնում է, որ Սևակ Սարգսյանի պատասխանատվությունն ու պատիժը մեղմացնող հանգամանք պետք է դիտել դրականորեն բնութագրվելը:
Սևակ Սարգսյանի պատասխանատվությունն ու պատիժը ծանրացնող հանգամանք է հանցանքները կատարելու ռեցիդիվը, քանի որ նա դատապարտվել է դիտավորյալ հանցանք կատարելու համար, որի դատվածությունը մարված չէ:
Կատարած արարքի համար ամբաստանյալ Սևակ Սարգսյանը ենթակա է քրեական պատասխանատվության և պատժի:
Դատարանը, հաշվի առնելով Սևակ Սարգսյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ինչպես նաև այն, որ Սևակ Սարգսյանի կատարած արարքի համար ՀՀ քրեական օրենսգրքի 176-րդ հոդվածի 2-րդ մասի սանկցիայով նախատեսված է պատիժ նաև ազատազրկման ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Սևակ Սարգսյանի պատժի կրման սկիզբը պետք է հաշվել 2011 թվականի դեկտեմբերի 2-ից, քանի որ նա ձերբակալվել է այդ օրը, իսկ 2011 թվականի դեկտեմբերի 3-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Սևակ Սարգսյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո 2011 թվականի դեկտեմբերի 3-ի որոշմամբ իրեղեն ապացույց «Նոկիա» տեսակի բջջային հեռախոսը պետք է վերադարձնել Սևակ Սարգսյանին, իսկ 2011 թվականի դեկտեմբերի 10-ի որոշմամբ իրեղեն ապացույց ճանաչված ձեռքի պայուսակը, «Նիկոն» տեսակի թվային ֆոտոխցիկը և կոսմետիկ պարագաները` թողնել Մարիամ Կոսյանի տնօրինությանը:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերն ամբաստանյալ Սևակ Սարգսյանից ենթակա չեն բռնագանձման, քանի որ տուժող Մարիամ Կոսյանինն պատկանող` իրեղեն ապացույց ճանաչված պայուսակը, «Նիկոն» տեսակի թվային ֆոտոխցիկը և կոսմետիկ պարագաները վերոգրյալ հիմնավորմամբ պետք է վերադարձվեն նրան: Ավելին տուժողը հայտնել է, որ ամբաստանյալից որևէ պահանջ չունի: Բռնագանձման ենթակա չեն նաև ՀՀ քրեական դատավարության օրենսգրքի 168-րդ հոդվածի 1-ին մաuի 2-6-րդ կետերով նախատեսված դատական ծախսերը, քանի որ 4-րդ և 6-րդ կետերով նախատեսված դատական ծախսեր ընդհանրապես չկան, իսկ 2-րդ, 3-րդ և 5-րդ կետերով նախատեսված ծախսերի վերաբերյալ տվյալները բացակայում են, ավելին` նման պահանջ Դատարան չի ներկայացվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Սևակ Հենդրիկի Սարգսյանին մեղավոր ճանաչել ՀՀ քրեական օրենսգրքի 176-րդ հոդվածի 2-րդ մասի 4-րդ կետով և պատիժ նշանակել ազատազրկում` 3 (երեք) տարի ժամկետով` պատժի կրման սկիզբը հաշվելով 2011 թվականի դեկտեմբերի 2-ից:
Սևակ Հենդրիկի Սարգսյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո 2011 թվականի դեկտեմբերի 3-ի որոշմամբ իրեղեն ապացույց «Նոկիա» տեսակի բջջային հեռախոսը վերադարձնել Սևակ Սարգսյանին, իսկ 2011 թվականի դեկտեմբերի 10-ի որոշմամբ իրեղեն ապացույց ճանաչված ձեռքի պայուսակը, «Նիկոն» տեսակի թվային ֆոտոխցիկը և կոսմետիկ պարագաները թողնել Մարիամ Կոսյանի տնօրինությանը:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ