ԵԿԴ/0269/01/11





ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ


«24» հունվարի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)` նախագահող դատավոր Մ.Պապոյան, քարտուղարությամբ Ռ.Ավետյանի, մասնակցությամբ մեղադրող Ա.Քալաշյանի, տուժող Ն.Հայկազյանի, ամբաստանյալ Սարգիս Ռազմիկի Հակոբյանի, պաշտպան Վ.Քոսյանի, դռնբաց դատական նիստում քննելով քրեական գործն ըստ մեղադրանքի Սարգիս Ռազմիկի Հակոբյանի (ծնված 1973 թվականի հոկտեմբերի 18-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, նախկինում չդատապարտված, բնակվում է Երևան քաղաքի Մամիկոնյանց փողոցի 45-րդ շենքի 55-րդ բնակարանում, խափանման միջոց ընտրվել է ստորագրություն չհեռանալու մասին)` ՀՀ քրեական օրենսգրքի 118-րդ հոդվածով և 185-րդ հոդվածի 1-ին մասով

ՊԱՐԶԵՑ

2011 թվականի հոկտեմբերի 4-ին ՀՀ ոստիկանության Կենտրոնականի քննչական բաժնի քննիչ Վ.Ավագյանի որոշմամբ ՀՀ քրեական օրենսգրքի 118-րդ հոդվածով նախատեսված հանցագործության հատկանիշներով հարուցվել և վարույթ է ընդունվել թիվ 15131611 քրեական գործը:
2011 թվականի նոյեմբերի 29-ին ՀՀ ոստիկանության Կենտրոնականի քննչական բաժնի քննիչ Վ.Ավագյանի որոշմամբ թիվ 15131611 քրեական գործով Սարգիս Ռազմիկի Հակոբյանին մեղադրանք է առաջադրվել ՀՀ քրեական օրենսգրքի 118-րդ հոդվածով և 185-րդ հոդվածի 1-ին մասով:
2011 թվականի դեկտեմբերի 16-ին ՀՀ ոստիկանության Կենտրոնականի քննչական բաժնի ավագ քննիչ Հ.Սարգսյանի որոշմամբ թիվ 15131611 քրեական գործն ընդունվել է վարույթ:
2011 թվականի դեկտեմբերի 20-ին ՀՀ ոստիկանության Կենտրոնականի քննչական բաժնի ավագ քննիչ Հ.Սարգսյանի որոշմամբ թիվ 15131611 քրեական գործով Մարիամ Մինասյանցին պատկանող «Ագավա» տեսակի բույսը վնասելու, ինչպես նաև Նարինե Հայկազյանին սպանության սպառնալիք տալու դրվագներով Սարգիս Ռազմիկի Հակոբյանի նկատմամբ քրեական հետապնդում չի իրականացվել` նրա արարքում հանցակազմի բացակայության հիմքով:

2011 թվականի դեկտեմբերի 26-ին Սարգիս Ռազմիկի Հակոբյանի վերաբերյալ թիվ 15131611 քրեական գործը մեղադրական եզրակացությամբ ուղարկվել է Դատարան, որին շնորհվել է ԵԿԴ/0269/01/11 համարը:
Սարգիս Ռազմիկի Հակոբյանին մեղադրանք է առաջադրվել ՀՀ քրեական օրենսգրքի 118-րդ հոդվածով և 185-րդ հոդվածի 1-ին մասով` այն արարքների համար, որ նա 2011 թվականի օգոստոսի 26-ին` ժամը 21:00-ի սահմաններում, Երևան քաղաքի Ֆիրդուսի 17-րդ շենքի 6-րդ բնակարանում ոտքերով և ձեռքերով հարվածելով ծեծի է ենթարկել իր նախկին կնոջը` Նարինե Մխիթարի Հայկազյանին` վերջինի առոջությանը պատճառելով թեթև վնասի հատկանիշներ չպարունակող մարմնական վնասվածքներ` ձախ ազդրի վ/3-ի կողմնային մակերեսի, ճակատային միջային շրջանի, ձախ սրունքի վ/3-ի հետին մակերեսի, ձախ սրունքի վ/3-ի առաջնային մակերեսի արյունազեղումների, ինչպես նաև ձախ սրունքի վ/3-ի հետին, առաջնային մակերեսների, աջ սրունքի մ/3-ի առաջնային մակերեսի քերծվածքների ձևով:
Բացի այդ, նշված դեպքի ընթացքում Սարգիս Հակոբյանը ոտքերով հարվածելով դիտավորությամբ կոտրել է Նարինե Հայկազյանին պատկանող «Սամսունգ» ֆիրմայի համակարգիչը և 1 հատ ափսե` վերջինին պատճառելով ընդհանուր 110.200 ՀՀ դրամի զգալի չափի գույքային վնաս:
2012 թվականի հունվարի 23-ի դատական նիստի ժամանակ տուժող Նարինե Հայկազյանը հայտնեց, որ հաշտվել է ամբաստանյալ Սարգիս Հակոբյանի հետ, և նշեց, որ գիտակցում է հաշտվելու հետևանքները: Ամբաստանյալ Սարգիս Հակոբյանը նույնպես հայտնեց, որ հաշտվել է տուժող Նարինե Հայկազյանի հետ, և նշեց, որ գիտակցում է հաշտվելու հետևանքները:
ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական օրենսգրքի 183-րդ հոդվածի 1-ին մասի համաձայն` ՀՀ քրեական օրենսգրքի 118-րդ հոդվածով և 185-րդ հոդվածի 1-ին մասով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Դատարանը, նկատի ունենալով, որ տուժող Նարինե Հայկազյանը և ամբաստանյալ Սարգիս Հակոբյանը հաշտվել են միմյանց հետ, գտնում է, որ թիվ ԵԿԴ/0269/01/11 քրեական գործի վարույթը պետք է կարճել և Սարգիս Հակոբյանի նկատմամբ ՀՀ քրեական օրենսգրքի 118-րդ հոդվածով և 185-րդ հոդվածի 1-ին մասով քրեական հետապնդումը դադարեցնել:
Դատարանը գտնում է, որ Սարգիս Հակոբյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև սույն որոշման օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ սույն որոշումն օրինական ուժի մեջ մտնելուց հետո 2011 թվականի նոյեմբերի 25-ի որոշմամբ իրեղեն ապացույց ճանաչված` «Սամսունգ» ֆիրմայի համակարգիչը և մեկ հատ ափսեն պետք է վերադարձնել Նարինե Մխիթարի Հայկազյանին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ, 41-րդ, 116-րդ, 119-րդ, 183-րդ և 313-րդ հոդվածներով` Դատարանը

ՈՐՈՇԵՑ

Թիվ ԵԿԴ/0269/01/11 քրեական գործի վարույթը կարճել և Սարգիս Ռազմիկի Հակոբյանի նկատմամբ ՀՀ քրեական օրենսգրքի 118-րդ հոդվածով և 185-րդ հոդվածի 1-ին մասով քրեական հետապնդումը դադարեցնել` տուժող Նարինե Մխիթարի Հայկազյանի հաշտվելու հիմքով:
Սարգիս Ռազմիկի Հակոբյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև սույն որոշման օրինական ուժի մեջ մտնելը:
Սույն որոշումն օրինական ուժի մեջ մտնելուց հետո իրեղեն ապացույց ճանաչված` «Սամսունգ» ֆիրմայի համակարգիչը և մեկ հատ ափսեն վերադարձնել Նարինե Մխիթարի Հայկազյանին:
Սույն որոշումը կարող է բողոքարկվել Հայաստանի Հանրապետության վերաքննիչ քրեական դատարան` հրապարակման օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ