Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

13 փետրվարի 2012թ. ք. Երևան

ԵԿԴ-0267/01/11

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության առաջին ատյանի դատարանը հետևյալ կազմով.


նախագահող դատավոր` Մ. Մարտիրոսյան,
քարտուղար` Է. Մկրտչյան,

մեղադրող`
Երևանի Կենտրոն և Նորք-Մարաշ
վարչական շրջանների դատախազության
ավագ դատախազ Լ. Չարխիֆալակյանի,

պաշտպան` Ս. Մկրտչյանի,

ամբաստանյալի օրինական
ներկայացուցիչ` Թ. Լազարյանի

տուժող` Գ. Լազարովի,

տուժողի օրինական ներկայացուցիչ` Ա. Գասպարյանի



դատարանում, դռնբաց դատական նիստում քննեց գործն ըստ մեղադրանքի
Արման Վլադիմիրի Ադյանի`
ծնված 1995թ. փետրվարի 06-ին Երևանում, հայ, Հայաստանի Հանրապետության /այսուհետ ՀՀ/ քաղաքացի, սովորում է Երևանի թիվ 3 միջնակարգ դպրոցի 12-րդ դասարանում, ամուրի, խնամքին ոչ ոք, նախկինում չդատված, չի աշխատում, բնութագրվում է դրական, բնակվում է ք. Երևան, Նալբանդյան փողոցի թիվ 50 շենքի թիվ 5 բնակարանում, ձերբակալվել է 23.09.2011թ., 24.09.2011թ. որպես խափանման միջոց կիրառվել է կալանավորումը, 21.10.2011թ. խափանման միջոց կալանավորումը փոխարինվել է գրավով` 500.000 ՀՀ դրամ գումարի չափով և նույն օրն ազատ է արձակվել` անազատության մեջ մնալով 28 օր, մեղադրվում է ՀՀ քրեական օրենսգրքի 112-րդ հոդվածի 1-ին մասով։


Գործի դատավարական նախապատմությունը
Թիվ 13183011 քրեական գործը ՀՀ ոստիկանության ՔԳՎ Երևան քաղաքի վարչության Կենտրոնականի բաժնի Մարաշի բաժանմունքում հարուցվել է 2011թ. հունիսի 23-ին, ՀՀ քրեական օրենսգրքի 113-րդ հոդվածի 1-ին մասով, անհայտ անձի կողմից Գևորգ Ալենի Լազարովին մարմնական վնասվածք հասցնելու դեպքի առթիվ։
2011թ. հուլիսի 02-ին թիվ 13183011 քրեական գործն ուղարկվել է ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժին և 07.02.2011թ. որոշմամբ ընդունվել է քննիչի վարույթ։
Քննիչի 21.12.2011թ. որոշմամբ, Ռուբեն Ռուբինյանի, Արեգ Կարինյանի, Վահե Եսայանի, Գևորգ Լազարովի, Արման Ադյանի, Նարեկ Խաչատրյանի և Դավիթ Եպիսկոպոսյանի նկատմամբ խուլիգանություն կատարելու կապակցությամբ քրեական հետապնդում չի իրականացվել` հանցակազմի բացակայության պատճառաբանությամբ։
Քննիչի նույն օրվա մեկ այլ որոշմամբ, Արմեն Պետրոսյանի և Միքայել Մկրտչյանի մարմնական վնասվածք ստանալու մասով քրեական հետապնդում չի իրականացվել` հանցադեպի բացակայության պատճառաբանությամբ։
Անչափահաս ամբաստանյալ Արման Վլադիմիրի Ադյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով` հետևյալ արարքի համար, որ «նա` 2011թ. հունիսի 21-ին, ժամը 19։00-ի սահմաններում, Երևան քաղաքի Նալբանդյան 50 շենքի բակում Գևորգ Լազարովի և նրա ընկերների հետ ունեցած վիճաբանության ժամանակ վերջիններիս կողմից նրա հասցեին տված սեռական բնույթի հայհոյանքներից վիրավորված, նույն օրը ժամը 23։30-ի սահմաններում Երևան քաղաքի Երվանդ Քոչար փողոցի վրա հանդիպել է Գ. Լազարովին և մոտենալով նրան իր մոտ եղած մկրատով հետևից դիտավորությամբ հարվածել է Գ. Լազարովի ձախ գոտկային շրջանին` վերջինիս առողջությանը պատճառելով կյանքին վտանք սպառնացող ծանր մարմնական վնաս` մկանների և հետորովայնամզային բջջանքի վնասումով, հետորովայնամզային հեմատոմայի, արյունահոսության և հեմոռագիկ 2-3-րդ աստիճանի շոկի ձևով։»։
26.12.2011թ. քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Քրեական գործով անչափահաս ամբաստանյալ Արման Վլադիմիրի Ադյանը ծնվել է 06.02.1995թ.։ Նրա` ինը տարեկան հասակում ծնողներն ամուսնալուծվել են, որից հետո բնակվել է մոր հետ միասին։ Արման Ադյանի դաստիարակութ¬յամբ և խնամքով զբաղվել է մայրը` օրինական ներկայացուցիչ Թամարա Լազարյանը։ Նրանց ընտանիքը նյութապես անապահով է, Արման Ադյանի կյանքի և դաստիարակության պայմանները բարվոք չեն, հոգեկան զարգացման աստիճանը և ընդհանուր զարգացման վիճակը` անբավարար է։ 2011թ. նոյեմբերի 8-ին նրա հայրը մահացել է։
2011թ. հունիսի 21-ին, ժամը 19։00-ի սահմաններում, անչափահաս Արման Ադյանը Երևան քաղաքի Նալբանդյան փողոցի թիվ 50 շենքի բակում, իր ընկերներ Նարեկ Խաչատրյանի և Դավիթ Եպիսկոպոսյանի հետ հանդիպել են անչափահաս Գևորգ Լազարովի և վերջինիս ընկերների հետ` 2011թ. հունիսի 18-ին կամ 19-ին, կոնկրետ օրը պարզված չէ, Գ. Լազարովի ընկեր Վահե Եսայանի կողմից Քրիստինե Քլյանի հասցեին, համացանցի «համադասարանցիներ» կայքում սեռական բնույթի հայհոյանք գրելու շուրջ պարզաբանումներ կատարելու և Վ. Եսայանի կողմից Ք. Քլյանից ներողություն խնդրելու համար։ Հանդիպման ընթացքում Վ. Եսայանը Ք. Քլյանից ներողություն է խնդրել, որին վերջինս պատասխանել է, թե պետք է շնորհակալ լինի ընկերներից, որ դեռ նրանց հետ կանգնած է։ Այդ պահին Գ. Լազարովի ընկերներից Արեգ Կարինյանը բարկացել է Ք. Քլյանի վրա, որի պատճառով Ա. Ադյանի, նրա ընկերների և Գ. Լազարովի ու վերջինիս ընկերների միջև վիճաբանություն է սկսվել։ Վիճաբանության ընթացքում նրանք քաշքշել և հայհոյել են միմյանց։ Գ. Լազարովը և նրա ընկերները քանակով գերազանցել են Ա. Ադյանի ընկերներին։ Գ. Լազարովի ընկերներից երկուսը բռնել են Ա. Ադյանին, որի ընթացքում տուժող Գ. Լազարովը ցանկացել է հարվածել Արման Ադյանին, ձեռքը տարել է դեպի իր բաճկոնի գրպանը։ Ամբաստանյալ Արման Ադյանը Գ. Լազարովի ընկերների բռնվածքից ազատվել և վազել է դեպի Սախարովի անվան հրապարակին հարակից կամարամուտք։ Այնտեղ նկատելով, որ ծաղկի խանութի աշխատողը խանութում չէ, իսկ խանութի դուռը բաց է` ներս է մտել, սեղանի վրայից վերցրել մկրատը և այն դնելով գրպանը` դուրս եկել։ Նարեկ Խաչատրյանը դա տեսնելով` Արման Ադյանից պահանջել է, որ մկրատը դնի տեղը և հանդարտվի, սակայն Ա. Ադյանը Գ. Լազարովի և վերջինիս ընկերների վերաբերմունքից վիրավորված` պատասխանել է, թե նրանցից ում հանդիպի, պետք է վնաս տա, որից հետո վերադարձել է Երևանի Նալբանդյան փողոցի թիվ 50 շենքի բակ։ Տեսնելով, որ Գ. Լազարովն ու նրա ընկերները բակում չեն` Ա. Ադյանը Ն. Խաչատրյանի և Դ. Եպիսկոպոսյանի հետ դուրս են եկել բակից և քայլել դեպի Հանրապետության փողոցի ուղղությամբ։ Ճանապարհին, Վարդանանց փողոցում նկատելով դեպի Եր. Քոչար փողոցի ուղղությամբ քայլող Գ. Լազարովին` Ա. Ադյանը վազել է դեպի նա, հետևի կողմից աննկատ մոտեցել է նրան և մեկ սայրանի ծակող-կտրող շեղբ ունեցող գործիքով, մեկ անգամ, դիտավորությամբ հարվածել է Գ. Լազարովի ձախ գոտկային շրջանին` վերջինիս առողջությանը պատճառելով կյանքին վտանգ սպառնացող ծանր վնաս` մկանների և հետորովայնամզային բջջանքի վնասումով, հետորովայնամզային հեմատոմայի, արյունահոսության և հեմոռագիկ 2-3-րդ աստիճանի շոկի ձևով։ Այնուհետև Ա. Ադյանը դիմել է փախուստի։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Արման Ադյանը նախկինում դատված չի եղել, բնութագրվում է դրական, հանցանքը կատարել է անչափահաս տարիքում` տասնվեց տարեկան հասակում, նախաքննության ընթացքում իրեն լիովին մեղավոր է ճանաչել և տվել է ինքնախոստովանական ցուցմունքներ։



Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Արման Վլադիմիրի Ադյանի նախաքննական ինքնախոստովանական ցուցմունքներով այն մասին, որ իր ընկեր Սերոբից տեղեկացել է, որ 2011թ. հունիսի 20-ին Գևորգի ընկեր Վահեն ինտերնետով սեռական բնույթի հայհոյանք է գրել ընդհանուր ծանոթ, Երևանի Վարդանանց թիվ 5Ա շենքի 11-րդ մուտքի 1-ին հարկի բնակչուհի Քրիստինեին։ 2011թ. հունիսի 21-ին, ժամը 19։00-ի սահմաններում, իր ընկերներ Նարեկ Խաչատրյանի և Դավիթ Եպիսկոպոսյանի հետ, Երևանի Նալբանդյան փողոցի թիվ 50 շենքի բակում հանդիպել են Գևորգի, նրա ընկերներ Վահեի, Արեգի, «չաղ» Արթուրի, Ռուբենի և շուրջ 10-15 այլ անձանց հետ, որպեսզի Վահեն կատարածի համար ներողություն խնդրի Քրիստինեից։ Հանդիպման ժամանակ Վահեն Քրիստինեից ներողություն է խնդրել, իսկ Քրիստինեն պատասխանել է, թե «ուրախ եղիր, որ ստեղ կանգնած ես»։ Այդ ընթացքում Արեգը գոռացել է Քրիստինեի վրա` ասելով, թե «էս ինչ ես ասում»։ Իրենք հանգստացրել են Արեգին` բացատրելով, որ վերջինիս առջև աղջիկ է կանգնած։ Երբ խոսակցության ընթացում Սերոբն ասել է, որ Քրիստինեն ճիշտ է ասում, Գևորգը և նրա ընկերները սկսել են իրենց հետ վիճել, որի ընթացքում միմյանց հասցեին հնչեցրել են հայհոյանքներ և իրար քաշքշել են։ Այդ պահին գոռացել է, որպեսզի բոլորը հանգստանան, որից հետո Գևորգի ընկերներից երկուսը մտել են իր թևերը ու մի կողմ քաշել` ասելով, որ ինքը հանգստանա։ Գևորգը մոտեցել է, որպեսզի իրեն հարվածի, սակայն նրան պահել են։ Այդ ժամանակ նկատել է, որ Գևորգը ձեռքը տարել է տաբատի գրպանը։ Մտածելով, որ Գևորգը ինչ-որ բան է ուզում հանել գրպանից` ձեռքերը թափ տալով ազատվել է նրա ընկերներից և վազել դեպի Սախարովի հրապարակ։ Հասնելով կամարամուտքի ծաղկի խանութի մոտ` իրեն է մոտեցել Նարեկը և ասել, որ Գևորգը գրպանից դանակ է հանել և կրկին դրել գրպանը։ Դրանից բորբոքված, նկատելով, որ ծաղկի խանութի աշխատողը խանութում չէ` մտել է խանութ և սեղանի վրայից վերցնելով մկրատը` դուրս եկել խանութից, իսկ Նարեկին ասել է, թե գնում է հանրախանութ, որպեսզի վերջինս չմտածի, որ գնում է Գևորգի ու նրա ընկերների մոտ։ Միասին գնացել են դեպի Երևանի Հանրապետության փողոցի ուղղությամբ, որի ընթացքում ասել է, որ եթե Գևորգին կամ նրա ընկերներից որևէ մեկին հանդիպի` հարվածելու է, այսինքն վնաս է տալու։ Ճանապարհին նկատել է Գևորգին, ով Վարդանանց փողոցով քայլել է դեպի Եր. Քոչար փողոցի ուղղությամբ։ Գնացել է նրա հետևից, իսկ ընկերները` Նարեկն ու Դավիթն իր հետևից։ Հասնելով Եր. Քոչար-Վարդանանց փողոցների խաչմերուկի մոտ` վազել է Գևորգի ուղղությամբ, գրպանից հանել մկրատը և երբ Գևորգը գլուխը հետ է թեքել և տեսել իրեն` այդ պահին մկրատով հարվածել է Գևորգի գոտկատեղի հետևի մասին։ Գևորգը գոռացել է` ասելով «արա էս ինչ ես անում» և վազել է դեպի վերև` Եր. Քոչար փողոցի ուղղությամբ։ Ինքը մտնելով հարակից այգի` նետել է մկրատը և դիմել փախուստի։ Գևորգ Լազարովին սպանելու նպատակ չի ունեցել, այլ միայն ցանկացել է նրան վնաս տալ։ Կատարածի համար զղջում է։
Դատարանում ամբաստանյալ Արման Ադյանը հայտարարեց, որ պնդում է իր նախաքննական ցուցմունքները և հրաժարվեց ցուցմունքներ տալուց։
/դատական նիստի արձանագրություն, հատոր 2, գ.թ. 53-56, 70, 154/
Ամբաստանյալ Արման Ադյանն իր նախաքննական ցուցմունքը պնդել է նաև տուժող Գևորգ Լազարովի, վկաներ Ռուբեն Ռուբինյանի և Արեգ Կարինյանի հետ առերես հարցաքննությունների ժամանակ։
/հատոր 2, գ.թ. 59-60, 115-116, 123-124/
Տուժող Գևորգ Լազարովի ցուցմունքներով այն մասին, որ 2011թ. հունիսի 21-ին հանդիպել է իր ընկերներ Արթուր Կիրակոսյանի և Ռուբեն Ռուբինյանի հետ։ Միասին զբոսնել են Թումանյան փողոցով և Երևանի Հյուսիսային պողոտայով։ Մի քանի ժամ զբոսնելուց հետո հասել են Հանրապետության փողոց, որտեղ բաժանվել են միմյանցից և ինքը Վարդանանց փողոցով քայլելով` գնացել է դեպի Եր. Քոչար փողոցի ուղղությամբ։ Ճանապարհին հիշելով, որ Ռուբենի մոտ թողած հանրահաշվական խնդիրների ժողովածուի գիրքը պետք է վերցնի, այդ պատճառով վերադարձել է Ռուբենենց տուն։ Վերջինիս տանեցիներից իմացել է, որ Ռուբենը պայուսակը թողել է խանութում։ Դրանից հետո Ռուբենի հայր Արսենի հետ գնացել են խանութ, այնտեղից վերցրել է գիրքը և ոտքով, նույն ճանապարհով վերադարձել տան ուղղությամբ։ Եր. Քոչար փողոցում բջջային հեռախոսով խոսելու ընթացքում, հանկարծակի հետևից սուր գործիքի հարված է զգացել գոտկատեղի շրջանում։ Մի պահ կանգնել է և հասկացել, որ հետևից ինչ-որ մեկը հարվածել է իրեն։ Տեսել է, որ դրանից հետո ինչ-որ մեկը դեպի հարակից այգու կողմ է վազել և անհետացել։ Ինքը վազել է դեպի այգու հակառակ ուղղությամբ, որից հետո հասնելով Վարդանանց փողոց` նստել է պատահական տաքսի ավտոմեքենա և գնացել Ռուբենենց տուն։ Այնտեղ վերջինիս հայր Արսեն Ռուբինյանը իրեն մեքենայով տեղափոխել է հիվանդանոց։ Հարված ստանալիս` գլուխը չի թեքել, չգիտի, թե ով է իրեն հարվածել և մարմնական վնասվածք պատճառել։ Ինչ վերաբերվում է նրան, որ տղաներն ասել են, որ ինքը վեճին ներկա է եղել, ապա դա ճիշտ չէ, քանի որ ինքը վեճի ժամանակ ներկա չի եղել։
/դատական նիստի արձանագրություն, հատոր 1, գ.թ. 26-28, 79-80, 175, հատոր 2, գ.թ. 57-58/
Վկա Նարեկ Խաչատրյանի նախաքննական ցուցմունքներով այն մասին, որ հանդիսանում է «Գլուխ» մականվամբ Արման Ադյանի հարևանը և ընկերը։ 2011թ. հունիսի 21-ին, ժամը 18։00-ից 19։00-ն ընկած ժամանակահատվածում, Արման Ադյանի և Դավիթ Եպիսկոպոսյանի հետ գտնվել են Երևան քաղաքի Նալբանդյան թիվ 50 շենքի բակում, որտեղ հանդիպել են «Կիկի» մականվամբ Գևորգ Լազարովին, վերջինիս ընկերներ, Արթուրին` «Չաղ» մականվամբ, Վահեին, Արեգին և այլ տղաների, որոնց չի ճանաչել։ Հանդիպման պատճառը եղել է այն, որ Գևորգի ընկեր Վահեն ինտերնետով իրենց հարևան շենքի բնակչուհի Քրիստինեին հայհոյանք է գրել, որի համար պետք է նրանից ներողություն խնդրեր։ Հանդիպման ընթացքում Վահեն Քրիստինեից ներողություն է խնդրել, որին Քրիստինեն պատասխանել է, որ «ուրախ եղի, որ այստեղ կանգնած ես»։ Այդ պահին Արեգը գոռալով Քրիստինեի վրա` ասել է, թե այդ ինչ է ասում, որի պատճառով վիճաբանություն է սկսվել իրենց և Գ. Լազարովի ու նրա ընկերների միջև։ Վիճաբանության ընթացքում Գևորգի կողմնակիցներից 2 տղաներ Արմանի ձեռքերից բռնել և ասել են, որ նա հանգստանա, իսկ Գևորգը ձեռքը տանելով դեպի գրպանը` ինչ-որ բան է հանել և անմիջապես դրել գրպանը, բայց թե կոնկրետ ինչ` չի տեսել։ Գևորգի կողմնակիցները շատ են եղել` շուրջ 15-20 հոգի, գոռգոռացել և «վրա են տվել» իրենց, միաժամանակ հնչեցրել են սեռական բնույթի հայհոյանքներ։ Արման Ադյանը դա տեսնելով` վազել է դեպի բակի կողմը, ինքն էլ նրա հետևից։ Հասնելով կամարամուտքի մոտ` Արմանը մտել է ծաղկի խանութ, այնտեղից վերցրել մկրատն ու դրել գրպանը։ Դրանից հետո դուրս է եկել խանութից և միասին վերադարձել են վիճաբանության վայրը, սակայն Գևորգն ու նրա ընկերները այլևս այնտեղ չեն եղել։ Արմանն ասել է, որ նրանցից ում հանդիպի, պետք է վնաս տա։ Դրանից հետո ինքը, Արմանը և Դավիթը գնացել են Վարդանանց փողոցի ուղղությամբ, որի ընթացքում Արմանին ասել է, որ վիճաբանության ժամանակ Գևորգը գրպանից հավանաբար դանակ է հանել և կրկին դրել գրպանը։ Ճանապարհին նկատել են Գևորգին, ով քայլել է Հանրապետության փողոցի ուղղությամբ։ Հետևել են նրան, որի ընթացքում Դավիթի հետ հանգստացրել են բորբոքված Արմանին։ Վերջինս ասել է, թե նրանցից մեկին պետք է վնաս տա` իրենց հանդեպ նման ձևով վարվելու և անտեղի վիրավորելու համար։ Հասնելով Եր. Քոչար փողոցի մոտ` Արմանը վազել է դեպի Գևորգը, հասնելով նրան` հարվածել և փախել է դեպի այգու կողմը։ Գևորգն էլ գոռալով, թե «Գլուխ, էս ինչ արիր»` վազելով անցել է իրենց կողքով։ Նկատելով, որ Գևորգի` ձեռքը դրած հատվածում արյան հետքեր են` հասկացել է, որ Արմանն իր մոտ եղած մկրատով հարվածել է նրան։
/հատոր 2, գ.թ. 22-24/
Դատարանում վկա Նարեկ Խաչատրյանը ցուցմունք տվեց այն մասին, որ իր նախաքննական ցուցմունքի մեծ մասը թելադրել է քննիչն` Արմանի կողմից տրված ցուցմունքից։ Բացի այդ, ինքը շփոթված է եղել և չի հասկացել, թե ինչ է գրում։ Ցուցմունքը գրել է գիշերվա ժամը 1-ին և քանի որ իրեն վախեցրել էին, այդ պատճառով իր ցուցմունքը գրել է այդ բովանդակությամբ։ Իրականում Արմանի կողմից մկրատը վերցնելն ինքը չի տեսել։ Չի տեսել նաև Գևորգին հարվածելու պահը, քանի որ գտնվել է կրպակի հետևի հատվածում, իսկ իր նախաքննական ցուցմունքի մնացած մասը ճիշտ է։
/դատական նիստի արձանագրություն/
Վկա Դավիթ Եպիսկոպոսյանի ցուցմունքներով այն մասին, որ հանդիսանում է Արման Ադյանի և Նարեկ Խաչատրյանի ընկերը։ Ճանաչում է նաև «Կիկի» մականունով Գևորգ Լազարովին, նրա ընկերներ Ռուբենին, «բոյով» Արթուրին, «չաղ» Արթուրին, Վահեին, Արեգին, իսկ մյուս ընկերներին միայն դեմքով է ճանաչում։ 2011թ. հունիսի 20-ին Գևորգի ընկեր Վահեն «համադասարանցիներ» կայքով հայհոյանք է գրել իրենց ընդհանուր ծանոթ Քրիստինեի հասցեին, որի համար 2011թ. հունիսի 21-ին, ժամը 18։00-ից 19։00-ն ընկած ժամանակահատվածում, Երևան քաղաքի Նալբանդյան փողոցի թիվ 50 շենքի բակում Արմանի և Նարեկի հետ հանդիպել են Գևորգի, նրա վերոհիշյալ ընկերների և շուրջ 15-20 այլ անձանց հետ։ Վահեն Քրիստինեից ներողություն է խնդրել։ Քրիստինեն էլ նրան պատասխանել է, որ ուրախ լինի, որ այնտեղ կանգնած է։ Այդ պահին Արեգը գոռալով Քրիստինեի վրա` ասել է, թե այդ ինչ է ասում, որից հետո վիճաբանություն է սկսվել իրենց, Գ. Լազարովի և նրա ընկերների միջև։ Անձամբ բաժանողի դերում է եղել և քիչ անց նկատել է, որ Արմանն ու Նարեկը չկան, իսկ Գևորգը և նրա ընկերները հեռանում են։ Գնացել է Արմանի և Նարեկի հետևից, հանդիպել նրանց փողոցում ու միասին քայլել են դեպի Հանրապետության փողոցի ուղղությամբ։ Վարդանանց փողոցի վրա նկատել են Գևորգին, ով նույնպես քայլել է դեպի Հանրապետության փողոցի կողմը։ Այդ ժամանակ Արմանն առաջարկել է հետևել Գևորգին և քայլել են նրա հետևից։ ճանապարհին Նարեկի հետ հանդարտեցրել են Արմանին։ Հասնելով Ե. Քոչար փողոց` Արմանը հանկարծակի վազել է Գևորգի հետևից և «վախ» բացականչության ձայն է լսել։ Այնուհետև տեսել է Գևորգին, ով ձեռքով բռնած գոտկատեղի արյունոտ հատվածը` վազելով անցել է իր կողքով։ Հասկացել է, որ Արմանը նրան վնասվածք է պատճառել։
/դատական նիստի արձանագրություն, հատոր 2, գ.թ. 47-48/
Վկա Վարազդատ Փահլևանյանի ցուցմունքներով այն մասին, որ 2009թ.-ից աշխատում է Երևան քաղաքի Նալբանդյան փողոցի թիվ 50 շենքի կամարամուտքի մոտ գտնվող ծաղկի խանութում։ Ճանաչում է Արման Ադյանին` որպես նշված շենքի բնակիչ։ 2011թ. հունիսի 21-ին, ժամը 19։00-ի սահմաններում, Նալբանդյան փողոցի թիվ 50 շենքի բակին հարակից հատվածում Արմանը և իրեն անծանոթ ևս 6-7 հոգի միմյանց հետ վիճաբանել և լեզվակռիվ են արել, սակայն հայհոյանքներ չեն հնչել։ Խանութի աղբը թափելուց հետո, երբ վերադարձել է խանութ, մոտակայքում կանգնած տաքսու վարորդն ասել է, որ մի երիտասարդ մտել է խանութ և անմիջապես դուրս եկել։ Հաջորդ օրը նկատել է, որ ծաղիկների համար նախատեսված մկրատը բացակայում է։ Ենթադրել է, որ նշված երիտասարդն է նախորդ օրը վերցրել այն։
/դատական նիստի արձանագրություն, հատոր 2, գ.թ.79-80/
Վկա Քրիստինե Քլյանի նախաքննական ցուցմունքով այն մասին, որ 2011թ. հունիսի 18-ին կամ 19-ին, կոնկրետ օրը չի հիշում, Վահե Եսայանը «համադասարանցիներ» կայքով իրեն սեռական բնույթի հայհոյանք է գրել։ 2011թ. հունիսի 21-ին, ժամը 18։00-ից 19։00-ի սահմաններում, երբ պատահմամբ անցել է Երևան քաղաքի Սախարովի հրապարակի հարակից կամարամուտքի մոտով, իրեն են մոտեցել Արման Ադյանը և Վահե Եսայանը։ Արմանը խնդրել է մոտենալ իրենց, որից հետո ասել է, որ Վահեն բան ունի ասելու։ Վահեն ներողություն է խնդրել իրենից` ասելով, որ սխալմունք է տեղի ունեցել, իրեն չի ցանկացել գրել։ Վահեին պատասխանել է, որ իրենից կիլոմետրերով հեռու մնա և շնորհակալ լինի մեծ «ախպերներին», որից հետո շրջվել և հեռացել է։ Այդ ժամանակ Վահեի և Արմանի հետ կանգնած են եղել ևս երեքից ավել տղաներ։ Նույն օրը Արման Ադյանի կողմից Գևորգ Լազարովին դանակահարելու մասին տեղեկացել է ոստիկանության բաժնում, սակայն դեպքի մանրամասներից տեղյակ չէ։
/հատոր 2, գ.թ. 81-82/
Վկա Արթուր Կիրակոսյանի ցուցմունքներով այն մասին, որ հանդիսանում է Գևորգ Լազարովի ընկերը։ 2011թ. հունիսի 21-ին, ժամը 16։00-ի սահմաններում, իր ընկերներ Գևորգի և Ռուբեն Ռուբինյանի հետ հանդիպել և զբոսնել են։ Այնուհետև Ռուբենն ասել է, որ ցանկանում է գնալ տուն և հեռացել է, իսկ իրենք Գևորգի հետ քայլել են մինչև Հանրապետության փողոց, որտեղ Գևորգը հրաժեշտ տալով` գնացել է դեպի Վարդանանց փողոցի կողմը։ Ինքը նույնպես գնացել է տուն։ Ժամը 24։00-ի սահմաններում իրեն է զանգահարել ընկերներից Արթուրը և հայտնել, որ Գևորգին տեղափոխել են հիվանդանոց։ Գնացել է հիվանդանոց, տեսել է Գևորգին և նրանից տեղեկացել, որ ստացել է մարմնական վնասվածք։ Ընկերներով միմյանց հետ գտնվելու ժամանակահատվածում որևէ վիճաբանություն կամ խոսակցություն որևէ մեկի հետ տեղի չի ունեցել։ Հետո Գևորգն ասել է, որ իրեն դանակով հարվածել է Արմանը, երբ տուն է գնալիս եղել և հեռախոսով է խոսել։
/դատական նիստի արձանագրություն, հատոր 1, գ.թ. 34-35/
Վկա Ռուբեն Ռուբինյանի ցուցմունքներով այն մասին, որ հանդիսանում է Գևորգ Լազարովի ընկերը։ 2011թ. հունիսի 21-ին իրենց բակում հանդիպել է Արթուր Կիրակոսյանին։ Այնուհետև զանգահարել են Գևորգին։ Նա եկել է և միասին զբոսնել են Նալբանդյան և Թումանյան փողոցներով։ ժամը 19։00-ի սահմաններում միմյանցից բաժանվել են և յուրաքանչյուրը գնացել է իր տուն։ Նույն օրը, ժամը 22։00-ի սահմաններում, Գևորգը եկել է իրենց տուն, վերցրել մինչ այդ թողած գիրքը և հեռացել է։ Դրանից շուրջ 10-15 րոպե անց Գևորգը կրկին եկել է իրենց տուն` ամբողջությամբ արյունոտ վիճակում և խնդրել է օգնել իրեն։ Հայրը նրան տեղափոխել է հիվանդանոց։ Ինքը գնացել է հիվանդանոց, որտեղ իմացել է, որ Գևորգին գոտկատեղի շրջանում սուր կտրող-ծակող գործիքով հարվածել են։ Նշված օրը բակում որևէ մեկին չեն հանդիպել, որևէ մեկի հետ չեն վիճաբանել։
/դատական նիստի արձանագրություն, հատոր 1, գ.թ. 97-98, 121-122/
Վկա Արսեն Ռուբինյանի ցուցմունքներով այն մասին, որ Գևորգ Լազարովը հանդիսանում է իր որդի Ռուբեն Ռուբինյանի ընկերը։ 2011թ. հունիսի 21-ին, ժամը 22։00-ի սահմաններում Գևորգը եկել է իրենց տուն` գիրք վերցրել և ասել, որ գնում է տուն։ Դրանից շուրջ 10 րոպե անց Գևորգն արյունոտ վիճակում վերադարձել է իրենց տուն և խնդրել է օգնել։ Անմիջապես իր ավտոմեքենայով նրան տեղափոխել է 3-րդ հիվանդանոց։ Ճանապարհին, իր հարցին, թե ինչ է պատահել` Գևորգը պատասխանել է, որ տուն գնալու ճանապարհին, հեռախոսով խոսելու ընթացքում ինչ-որ մեկը հետևից սուր գործիքով հարվածել և վնասվածք է պատճառել։
/դատական նիստի արձանագրություն, հատոր1, գ.թ. 243-244/
Վկա Վահե Եսայանի ցուցմունքներով այն մասին, որ 2011թ. հունիսի 18-ին կամ 19-ին, կոնկրետ օրը չի հիշում, «համադասարանցիներ» կայքով իր ծանոթներին հաղորդագրություններ ուղարկելու ընթացքում նկատել է, որ Քրիստինե Քլյանը նույնպես կայքում է և հաղորդագրություն է ուղարկել նաև նրան։ Այդ ընթացքում նրա պատասխաներից զգացել է, որ Քրիստինեն իր ուղարկած հաղորդագրությունից նեղացել է, բայց թե ինչից` չի իմացել։ Որոշել է Քրիստինեին հանդիպելիս` նրանից ներողություն խնդրել։ Դրանից շուրջ 2-3 օր անց, նրանց շենքի մոտակայքում պատահմամբ հանդիպել է Քրիստինեին և ներողություն է խնդրել, իսկ Քրիստինեն ասել է, որ իրենից հեռու մնա, որից հետո բաժանվել են։ Դրանից շուրջ 1-2 օր անց, բակում եղած խոսակցություններից տեղեկացել է, որ Արման Ադյանը դանակահարել է իր ծանոթ Գևորգ Լազարովին, բայց թե ինչ պատճառով և որտեղ` տեղյակ չէ։
/դատական նիստի արձանագրություն, հատոր 2, գ.թ. 86-88/
Վկա Արեգ Կարինյանի ցուցմունքներով այն մասին, որ ճանաչում է «Կիկի» մականվամբ Գևորգ Լազարովին, Ռուբենին, Արթուրին, Հարութին, իսկ «Գլուխ» մականվամբ Արման Ադյանին ճանաչում է դեմքով։ Չի հիշում, թե 2011թ. հունիսի 21-ին որտեղ է գտնվել։ Գևորգ Լազարովին դանակահարելու մասին իմացել է վերը նշված անձանցից։ Նրան տեսակցության է գնացել հիվանդանոցում։ Իր հարցին, թե ով է դանակահարել նրան` Գևորգը պատասխանել է, որ տուն գնալու ճանապարհին հետևից են հարվածել, բայց թե ով է հարվածել, ինչ պատճառով` Գևորգը չի ասել։ 2011թ. հունիսի 21-ին Երևան քաղաքի Նալբանդյան փողոցի թիվ 50 շենքի բակում Գևորգ Լազարովի, նրա ընկերների և Արման Ադյանի ու վերջինիս ընկերների միջև տեղի ունեցած խոսակցությանը և վիճաբանությանը ներկա չի եղել։
/դատական նիստի արձանագրություն, հատոր 2, գ.թ. 113-114/
Դատաբժշկական փորձաքննության 08.07.2011թ. թիվ 295 եզրակացությամբ, որի համաձայն` «Գ. Լազարովի ստացած մարմնական վնասվածքը` ձախից գոտկային շրջանի ծակած կտրած ոչ թափանցող վերքի, մկանների և հետորովայնամզային բջջանքի վնասումով, հետորովայնամզային հեմատոմայի, արյունահոսության և հեմոռագիկ /արյունահոսական/ 2-3-րդ աստիճանի շոկի ձևով առաջացրել են առողջությանը ծանր վնաս` կյանքին վտանգ սպառնացող»։
/հատոր 1, գ.թ. 93-94/
Դատակենսաբանական փորձաքննության թիվ 02.08.2011թ. 295 եզրակացությամբ, որի համաձայն`
«1. Փորձաքննության ներկայացված տուժող Գ. Լազարովի արյան նմուշն ըստ արյան ABO իզոշճաբանական համակարգի պատկանում է 0 խմբին։
2. Փորձաքննության ներկայացված Գ. Լազարովի նախկին կիսաթև մայկայի, ջինսե անդրավարտիքի, զույգ կոշիկների վրա տեղակայված կասկածելի հետքերում հաստատվել է մարդկային ծագման արյան առկայություն, որն առաջացել է ըստ արյան ABO իզոշճաբանական համակարգի 0 խմբի արյուն ունեցող որևէ անձից կամ անձանցից, այդ թվում նաև կարող էր առաջանալ Գ. Լազարովից։
3. Փորձաքննության ներկայացված «դեպքի վայրի` Երևան քաղաքի Վարդանանց 2-րդ նրբանցք 4-րդ շենքի մուտքի 2-րդ հարկի հարթակից` ... և 6-7-րդ հարկերի աստիճանահարթակից ...» հայտնաբերված և բամբակե խծուծների վրա վերցված կասկածելի հետքերում հաստատվել է մարդկային ծագման արյան առկայություն, որն առաջացել է ըստ արյան ABO իզոշճաբանական համակարգի 0 խմբի արյուն ունեցող որևէ անձից կամ անձանցից, այդ թվում նաև կարող էր առաջանալ Գ. Լազարովից»։
/հատոր 1, գ.թ. 209-211/
Դատահետքաբանական փորձաքննության 16.08.2011թ. թիվ 1652 եզրակացությամբ, որի համաձայն`
«1. Հմ. 13183011 քր. գործով փորձաքննությանը ներկայացված` Գ. Լազարովի մայկայի վրա առկա վնասվածքը ծակած-կտրած է և կարող էր առաջանալ ինչպես մեկ սայրանի ծակող-կտրող շեղբ ունեցող առարկայի, այնպես էլ դանակի` նմանատիպ ծակող-կտրող շեղբի ներգործության արդյունքում։
2. Գ. Լազարովի մարմնական և մայկայի վրա առկա վնասվածքները իրենց բնույթով և մոտավոր տեղակայումներով համընկնում են վերջինիս մարմնական վնասվածքների վերաբերյալ դատաբժշկական փորձագետի հմ 825/հ եզրակացությունում նշված մարմնական վնասվածքի տեղակայման հետ։
3. Փորձաքննության ներկայացված Գ. Լազարովի ջինսե անդրավարտիքի վրա ծակած-կտրած, ինչպես նաև պատռվածքներին բնորոշ հատկանիշներով վնասվածքներ չհայտնաբերվեցին։
4. Գ. Լազարովը վնասվածք ստանալու պահին, տարածության մեջ կարող էր լինել` ցանկացած, տվյալ վնասվածքի առաջացումը չբացառող դիրքերում, վնասվածքի մակերեսով ուղղված լինելով դեպի սուր, ծակող-կտրող առարկայի /դանակի շեղբի/ ծայրը»։
/հատոր 2, գ.թ.18-20/
Դեպքի վայրի զննության մասին 22.06.2011թ. արձանագրությամբ և դրան կից լուսանկարչական հավելվածով, որոնց համաձայն` դեպքի վայրը Երևան քաղաքի Վարդանանց 2-րդ նրբանցքի 4-րդ շենքի մուտքն է։ Շենքը բարձրահարկ է` 10 հարկանի, ունի մեկ մուտք։ Շենքի մուտքի 10 հարկերում կատարվել է զննություն։ Պարզվել է, որ բոլոր հարկերում, աստիճանահարթակներում և հարկերի հարթակներում առկա են արնանման հետքեր։ Ըստ զննությանը մասնակից Արսեն Ռուբինյանի բանավոր հայտարարության` 2011թ. հունիսի 21-ին, ժամը 22.30-ի սահմաններում, նույն շենքի 38 բնակարան է այցելել իր որդու ընկեր Գևորգը Լազարովը` վնասված վիճակում, որին ինքը տեղափոխել է հիվանդանոց։ Զննությամբ մուտքի 2-րդ հարկի հարթակի հատակից և 6-7 հարկերի աստիճանահարթակից խծուծի վրա վերցվել են արնանման հետքեր։ Ըստ Ա. Ռուբինյանի բանավոր հայտարարության` նշված արնանման հետքերը Գ. Լազարովի արյան հետքերն են, նա է ոտքով բարձրացել իրենց բնակարան։
/հատոր 1, գ.թ. 12-15/
Քննչական փորձարարություն կատարելու մասին 24.09.2011թ. արձանագրությամբ և դրան կից լուսանկարչական հավելվածով, որոնց համաձայն` Արման Ադյանը մատնացույց է արել Երևանի Ե.Քոչարի փողոցին հարակից մայթի այն հատվածը, որտեղ կանգնած է եղել Գ. Լազարովը և ինքն էլ նրա հետևից մոտենալով` հարվածել է Գ. Լազարովի գոտկային ձախ շրջանին։ Ա. Ադյանը ցույց է տվել, թե ինչպես է մոտեցել Գ. Լազարովին և հետևից հարվածել նրան։ Այնուհետև, Ա. Ադյանը ցույց է տվել դիմացի այգին` Օղակաձև այգու 6-րդ հատվածը, որտեղ վազել է և նետել ձեռքին եղած մկրատը, սակայն չի կարողացել հիշել, թե կոնկրետ որ հատվածում է այն նետել։ Ա. Ադյանը ցույց է տվել նաև Ե. Քոչարի փողոցի այն ուղղությունը, որով վազել է Գ. Լազարովը։
/հատոր 2, գ.թ. 61-64/
Իրեղեն ապացույց ճանաչված Գ. Լազարովի հագուստներով և բամբակե խծուծներով։
/հատոր 2, գ.թ. 140/

Դատարանի իրավական վերլուծությունները


Վերլուծելով տուժող Գևորգ Լազարովի, վկաներ Նարեկ Խաչատրյանի, Արթուր Կիրակոսյանի, Ռուբեն Ռուբինյանի, Արեգ Կարինյանի և Վահե Եսայանի նախաքննական և դատաքննական ցուցմունքները, համադրելով դրանք քրեական գործի դատական քննությամբ ձեռք բերված և հետազոտված ապացույցների հետ, գնահատելով դրանք վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, դատարանը գտնում է, որ Գ. Լազարովի ցուցմունքները` Երևան քաղաքի Նալբանդյան փողոցի թիվ 50 շենքի բակում տեղի ունեցած վիճաբանությանը չմասնակցելու, իրեն մարմնական վնասվածք պատճառած անձին չտեսնելու մասով, վկաներ Արթուր Կիրակոսյանի, Ռուբեն Ռուբինյանի, Արեգ Կարինյանի և Վահե Եսայանի ցուցմունքները` Երևան քաղաքի Նալբանդյան փողոցի թիվ 50 շենքի բակում տեղի ունեցած վիճաբանությանը չմասնակցելու մասով, վկա Նարեկ Խաչատրյանի դատաքննական ցուցմունքը` Ա. Ադյանի կողմից տուժող Գ. Լազարովի հետևից վազելը և նրան հարվածելը չտեսնելու մասով, իրականությանը չեն համապատասխանում, քրեական պատասխանատվությունից և պատժից խուսափելու հարցում ամբաստանյալ Արման Ադյանին օգնելու, կատարված հանցագործությանը նախորդող ժամանակահատվածում տեղի ունեցած միջադեպի իրական հանգամանքները խեղաթյուրելու և հանցագործության իրական դրդապատճառները չներկայացնելու նպատակ են հետապնդում և հերքվում են քրեական գործով ձեռք բերված և դատարանում հետազոտված վերոհիշյալ ապացույցներով։ Միաժամանակ դատարանը գտնում է, որ տուժող Գևորգ Լազարովի, վկաներ Արթուր Կիրակոսյանի, Ռուբեն Ռուբինյանի, Արեգ Կարինյանի, Վահե Եսայանի և Նարեկ Խաչատրյանի կողմից դատարանում սուտ ցուցմունք տալը նշանակություն չի կարող ունենալ գործի լուծման համար, այսինքն առկա են ՀՀ քրեական օրենսգրքի 338-րդ հոդվածի 3-րդ մասով սահմանված հանգամանքները։
Վերլուծելով անչափահաս ամբաստանյալ Արման Վլադիմիրի Ադյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ անչափահաս ամբաստանյալ Արման Վլադիմիրի Ադյանի կողմից, նրա մեղավորությամբ, դիտավորությամբ մեկ ուրիշին մարմնական ծանր վնասվածք պատճառելը, որը վտանգավոր է կյանքի համար` ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 112-րդ հոդվածի 1-ին մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող ու ծանրացնող հանգամանքները, ամբաստանյալ Արման Վլադիմիրի Ադյանի նկատմամբ պատիժ նշանակելիս դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն որ նա նախկինում դատված չի եղել, բնութագրվում է դրական։ Որպես ամբաստանյալի պատասխանատվությունը և պատիժը մեղմացնող հանգամանքներ դատարանը հաշվի է առնում հանցանք կատարելու պահին հանցավորի անչափահաս` տասնվեց տարեկան լինելը, տուժողի վարքագծի հակաօրինականությունը, որով պայմանավորվել է հանցագործությունը, իսկ ամբաստանյալի պատասխանատվությունը և պատիժը ծանրացնող հանգամանքներ դատարանը չի արձանագրում։
Անչափահաս ամբաստանյալ Արման Վլադիմիրի Ադյանն իր կատարած` Հայաստանի Հանրապետության քրեական օրենսգրքի 112-րդ հոդվածի 1-ին մասով նախատեսված հանցագործության համար ենթակա է պատժի ազատազրկման ձևով, որը նա պետք է կրի։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, 22.11.2011թ. որոշմամբ իրեղեն ապացույց ճանաչված, տուժող Գ. Լազարովի հագուստները պետք է վերադարձնել նրան, իսկ բամբակե խծուծները` պետք է ոչնչացնել։
Քննարկելով խափանման միջոցի հարցը` դատարանը գտնում է, որ անչափահաս ամբաստանյալ Արման Վլադիմիրի Ադյանի նկատմամբ որպես կալանավորման այլընտրանքային խափանման միջոց գրավը պետք է թողնել անփոփոխ` մինչև դատավճռի օրինական ուժի մեջ մտնելը։ Ա. Ադյանին կալանավորելուց հետո, գրավի գումար հանդիսացող 500.000 /հինգ հարյուր հազար/ ՀՀ դրամը, մուծված 21.10.2011թ. Յուրա Կարոյի Ադյանի կողմից` ՀՀ վերաքննիչ քրեական դատարանի 900023292015 հաշվին, ենթակա է վերադարձման այդ գումարը վճարած Յուրա Ադյանին։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 357-360-րդ, 364-366-րդ, 369-373-րդ, 439-442-րդ հոդվածներով, դատարանը`


Վ Ճ Ռ Ե Ց

Անչափահաս ամբաստանյալ Արման Վլադիմիրի Ադյանին մեղավոր ճանաչել Հայաստանի Հանրապետության քրեական օրենսգրքի 112-րդ հոդվածի 1-ին մասով նախատեսված հանցանքում և դատապարտել ազատազրկման 3 /երեք/ տարի ժամկետով։ ՀՀ քրեական օրենսգրքի 69-րդ հոդվածի կիրառմամբ հաշվակցելով կալանքի տակ պահելու 28 /քսանութ/ օրը` անչափահաս ամբաստանյալ Արման Վլադիմիրի Ադյանի նկատմամբ պատիժ նշանակել ազատազրկում 2 /երկու/ տարի 11 /տասնմեկ/ ամիս 2 /երկու/ օր ժամկետով, որը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով կալանավորման պահից։
Կալանավորման այլընտրանքային խափանման միջոց գրավը թողնել անփոփոխ` մինչև դատավճռի օրինական ուժի մեջ մտնելը։ Ա. Ադյանին կալանավորելուց հետո գրավի գումար հանդիսացող 500.000 /հինգ հարյուր հազար/ ՀՀ դրամը, մուծված 21.10.2011թ. Յուրա Կարոյի Ադյանի կողմից` ՀՀ վերաքննիչ քրեական դատարանի 900023292015 հաշվին, հետ վերադարձնել նրան։
Դատավճռի օրինական ուժի մեջ մտնելուց հետո, 22.11.2011թ. որոշմամբ իրեղեն ապացույց ճանաչված, տուժող Գ. Լազարովի հագուստները վերադարձնել նրան, իսկ բամբակե խծուծները` ոչնչացնել։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։



ԴԱՏԱՎՈՐ` Մ. ՄԱՐՏԻՐՈՍՅԱՆ