ԵԿԴ/0260/01/11







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«8» փետրվարի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Հ.Սարգսյան
պաշտպան Ա.Ղարիբյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Կարինե Հովհաննեսի Ավետիսյանի` ծնված 1972 թվականի հուլիսի 24-ին Արմավիրի մարզի Գետաշեն գյուղում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, նախկինում չդատապարտված, աշխատում է Հայաստանի պետական ագրարային համալսարանի տնտեսագիտական ֆակուլտետի «Ֆինանսներ և վարկ» ամբիոնում` որպես ասիստենտ, հաշվառված է Երևան քաղաքի Դավիթ Մալյան փողոցի 7-րդ շենքի 17-րդ բնակարանում, մեղադրանք է առաջադրվել ՀՀ քրեական օրենսգրքի 311-րդ հոդվածի 1-ին մասով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2011 թվականի հոկտեմբերի 17-ին ՀՀ ազգային անվտանգության ծառայության քննչական վարչության ՀԿԳ ավագ քննիչ Գ.Վարդանյանի որոշմամբ ՀՀ քրեական օրենսգրքի 311-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 58212111 քրեական գործը:
2011 թվականի հոկտեմբերի 19-ին ՀՀ ազգային անվտանգության ծառայության քննչական վարչության ՀԿԳ ավագ քննիչ Գ.Վարդանյանի որոշմամբ թիվ 58212111 քրեական գործով Կարինե Հովհաննեսի Ավետիսյանին մեղադրանք է առաջադրվել ՀՀ քրեական օրենսգրքի 311-րդ հոդվածի 1-ին մասով:
2011 թվականի դեկտեմբերի 13-ին ՀՀ ազգային անվտանգության ծառայության քննչական վարչության ՀԿԳ ավագ քննիչ Գ.Վարդանյանի որոշմամբ թիվ 58212111 քրեական գործով Աիդա Գուրգենի Հովհաննիսյանի, Շմավոն Հովսեփի Գալստյանի, Գևորգ Հարությունի Քեշիշյանի, Ջուլիետա Վոլոդյայի Գևորգյանի և Դոնարա Վլադիմիրի Մանուչարյանի վերաբերյալ մասը կարճվել է և նրանց նկատմամբ քրեական հետապնդումը դադարեցվել է` նրանց արարքներում հանցակազմի բացակայության հիմքով:
2011 թվականի դեկտեմբերի 15-ին Կարինե Հովհաննեսի Ավետիսյանի վերաբերյալ թիվ 58212111 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0260/01/11 համարը:
Կարինե Հովհաննեսի Ավետիսյանին մեղադրանք է առաջադրվել ՀՀ քրեական օրենսգրքի 311-րդ հոդվածի 1-ին մասով` այն արարքի համար, որ նա, հանդիսանալով Հայաստանի պետական ագրարային համալսարանի տնտեսագիտական ֆակուլտետի «Ֆինանսներ և վարկ» ամբիոնի ասիստենտ, պաշտոնատար անձ, նույն համալսարանի հեռակա ուսուցման դեպարատամենտի «Հաշվապահական հաշվառում և աուդիտ» մասնագիտության 4-րդ կուրսի ուսանող, Երևան քաղաքի բնակիչ Հակոբ Սարգսի Հովհաննիսյանից դեռևս 3-րդ կուրսից պարտք մնացած «Հարկեր և հարկային քաղաքականություն» առարկայի քննությունը հանձնելու և դրական գնահատական ստանալու դիմաց անձամբ 2011 թվականի հոկտեմբերի 13-ին պահանջել և 2011 թվականի հոկտեմբերի 17-ին ստացել է 15.000 ՀՀ դրամ գումար: Այսինքն` Կարինե Ավետիսյանը Հակոբ Հովհաննիսյանից պահանջել և ստացել է 15.000 ՀՀ դրամ կաշառք գումար, որը 2011 թվականի հոկտեմբերի 17-ին` ժամը 12:20-ին, ՀՀ ազգային անվտանգության ծառայության աշխատակիցների կողմից կաշառք տալու նմանակում օպերատիվ-հետախուզական միջոցառում իրականացնելու ժամանակ ազգային անվտանգության ծառայության աշխատակիցները, մուտք գործելով Կարինե Ավետիսյանի աշխատասենյակ, վերջինն անմիջապես աշխատասեղանի աջ կողմից դարակից հանել և հատակին է նետել Հակոբ Հովհաննիսյանի ստուգման գրքույկը, որի մեջ տեղադրված են եղել 3 հատ 5.000 ՀՀ դրամ գումարը:
2. Արագացված դատական քննություն.
Մինչ դատաքննությունն սկսելն ամբաստանյալ Կարինե Հովհաննեսի Ավետիսյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Կարինե Հովհաննեսի Ավետիսյանը կատարել է արարք` նախատեսված ՀՀ քրեական օրենսգրքի 311-րդ հոդվածի 1-ին մասով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, ՀՀ ոստիկանության ինֆորմացիոն կենտրոնի պահանջագիրը, բնութագրերը, ծննդյան թիվ ԱԱ034796 և ԱԱ298613 վկայականների, դիպլոմի, ՀՀ բարձրագույն որակավորման հանձնաժողովի կողմից տրված թիվ 05029 վկայագրի պատճենները, եկավ հետևյալ եզրահանգման.
Կարինե Ավետիսյանի անձը դրականորեն բնութագրող հանգամանքներ են ամուսնացած լինելը, բարձրագույն կրթություն ունենալը, տնտեսագիտության թեկնածուի գիտական աստիճան ունենալը, ինքնախոստովանական ցուցմունքներ տալը և կատարածի համար զղջալը:
Կարինե Ավետիսյանի պատասխանատվությունն ու պատիժը մեղմացնող հանգամանք է խնամքին 14 տարին չլրացած երկու երեխաների (Կարեն Պարույրի Մուրադյան` ծնված 2001 թվականի հունիսի 23-ին և Գայանե Պարույրի Մուրադյան` ծնված 2005 թվականի փետրվարի 10-ին) առկայությունը:
Դատարանը գտնում է, որ Կարինե Ավետիսյանի պատասխանատվությունն ու պատիժը մեղմացնող հանգամանքներ պետք է դիտել նաև նախկինում արատավորված` դատապարտված չլինելը և դրականորեն բնութագրվելը:
Դատարանը միաժամանակ արձանագրում է, որ Կարինե Ավետիսյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Կարինե Ավետիսյանը ենթակա է քրեական պատասխանատվության և պատժի:
Դատարանը, հաշվի առնելով Կարինե Ավետիսյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Կարինե Ավետիսյանի կատարած արարքի համար ՀՀ քրեական օրենսգրքի 311-րդ հոդվածի 1-ին մասի սանկցիայով նախատեսված է պատիժ նաև տուգանքի ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար նրա նկատմամբ պատիժ պետք է նշանակել տուգանքի ձևով:
Դատարանը գտնում է, որ Կարինե Ավետիսյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո` իրեղեն ապացույց ճանաչված թվով չորս լազերային սկավառակները պետք է պահել քրեական գործի հետ միասին, ԲԱ00805556, ԲԱ10202134 և ԲԱ03722240 համարների 5.000 ՀՀ դրամ անվանական արժեքով թղթադրամները` վերադարձնել ՀՀ ազգային անվտանգության ծառայության ֆինանսական վարչությանը, իսկ բամբակե խծուծները, քիմիական նյութի և մատիտի պարունակությունները` ոչնչացնել:
Դատարանը գտնում է, որ դատական ծախսերն ամբաստանյալ Կարինե Ավետիսյանից ենթակա չեն բռնագանձման, քանի որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախս սույն քրեական գործով չկա, իսկ 2-8-րդ կետերով նախատեսված դատական ծախսերն արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի, ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը




ՎՃՌԵՑ

Կարինե Հովհաննեսի Ավետիսյանին մեղավոր ճանաչել ՀՀ քրեական օրենսգրքի 311-րդ հոդվածի 1-ին մասով և պատիժ նշանակել տուգանք` նվազագույն աշխատավարձի չորսհարյուրապատիկի չափով:
Կարինե Հովհաննեսի Ավետիսյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո` իրեղեն ապացույց ճանաչված թվով չորս լազերային սկավառակները պահել քրեական գործի հետ միասին, ԲԱ00805556, ԲԱ10202134 և ԲԱ03722240 համարների 5.000 ՀՀ դրամ անվանական արժեքով թղթադրամները վերադարձնել ՀՀ ազգային անվտանգության ծառայության ֆինանսական վարչությանը, իսկ բամբակե խծուծները, քիմիական նյութի և մատիտի պարունակությունները ոչնչացնել:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին մասի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ