ԵԿԴ/0251/01/11





ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«10» փետրվարի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Ս.Աբրահամյան
տուժող Ն.Գրիգորյան

դռնբաց դատական նիստում քննեց քրեական գործն ըստ մեղադրանքի`
Կարեն Էդուարդի Թաշչյանի` ծնված 1982 թվականի հոկտեմբերի 5-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, չամուսնացած, չի աշխատում, դատվածություն չունեցող, հաշվառված է Երևան քաղաքի Բաղրամյան 1-ին փակուղու 6-րդ տանը, մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2011 թվականի սեպտեմբերի 14-ին ՀՀ ոստիկանության Կենտրոնականի քննչական բաժնի քննիչ Ն.Մխիթարյանի որոշմամբ ՀՀ քրեական օրենսգրքի 258-րդ հոդվածի 2-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 15129611 քրեական գործը:
2011 թվականի սեպտեմբերի 20-ին ՀՀ ոստիկանության Կենտրոնականի քննչական բաժնի քննիչ Ն.Մխիթարյանի որոշմամբ թիվ 15129611 քրեական գործով Կարեն Էդուարդի Թաշչյանին մեղադրանք է առաջադրվել ՀՀ քրեական օրենսգրքի 258-րդ հոդվածի 2-ին մասով:
2011 թվականի դեկտեմբերի 8-ին ՀՀ ոստիկանության Կենտրոնականի քննչական բաժնի քննիչ Ն.Մխիթարյանի որոշմամբ թիվ 15129611 քրեական գործով Կարեն Էդուարդի Թաշչյանի նկատմամբ 2011 թվականի սեպտեմբերի 4-ին «Տոչկա» ակումբում, դրսում և ավտոմեքենայի մեջ տեղի ունեցած դեպքերի կապակցությամբ ՀՀ քրեական օրենսգրքի 258-րդ, 131-րդ և 133-րդ հոդվածներով քրեական հետապնդում չի իրականացվել` վերջինի արարքում հանցակազմի բացակայության հիմքով, իսկ Նոնա Գրիգորյանին ծեծի ենթարկելու կապակցությամբ քրեական հետապնդում չի իրականացվել` դիմող Նոնա Գրիգորյանի բողոքի բացակայության և մեղադրյալ Կարեն Թաշչյանի հետ հաշտվելու հիմքով:
2011 թվականի դեկտեմբերի 13-ին Կարեն Էդուարդի Թաշչյանի վերաբերյալ թիվ 15129611 քրեական գործը մեղադրական եզրակացությամբ ուղարկվել է Դատարան, որտեղ քրեական գործին շնորհվել է ԵԿԴ/0251/01/11 համարը:
Կարեն Էդուարդի Թաշչյանին մեղադրանք է առաջադրվել ՀՀ քրեական օրենսգրքի 258-րդ հոդվածի 2-ին մասով` այն արարքի համար, որ նա, գտնվելով ոգելից խմիչքի ազդեցության տակ, 2011 թվականի օգոստոսի 17-ին` ժամը 07:00-ի սահմաններում, գնացել է Երևան քաղաքի Սայաթ-Նովա փողոցի 18-րդ շենքի 32-րդ բնակարանում բնակվող իր նախկին ընկերուհի Նոնա Գրիգորյանի բնակարան, թակել դուռը, սակայն երբ վերջինը հրաժարվել է բացել այն, չնչին առիթից դրդված, դիտավորությամբ, կոպիտ կերպով խախտելով հասարակական կարգը, շուրջ 15-20 րոպե տևողությամբ շենքի մուտքում, այնուհետև նաև բակում բարձրաձայն սեռական բնույթի հայհոյանքներ է տվել Նոնա Գրիգորյանի և նրա ընտանիքի անդամների հասցեին` բացահայտ անհարգալից ու արհամարական վերաբերմունք դրսևորելով հասարակության` Երևան քաղաքի Սայաթ-Նովա փողոցի 18-րդ շենքի բնակիչների նկատմամբ, միաժամանակ խանգարելով վերջինների հանգիստն ու անդորրը: Միևնույն ընթացքում Կարեն Թաշչյանն իր խուլիգանական գործողությունները զուգորդել է գույքի վնասմամբ` հարվածելով և կոտրելով Երևան քաղաքի Սայաթ-Նովա փողոցի 18-րդ շենքի 32-րդ բնակարանի մուտքի դռան փականի բռնակը և դիտանցքը:
2. Ապացույցների հետազոտում և գնահատում.
Դատական քննության ընթացքում ամբաստանյալ Կարեն Թաշչյանն առաջադրված մեղադրանքում իրեն մեղավոր ճանաչեց և օգտվելով իր իրավունքից` հրաժարվեց ցուցմունք տալ:
Նախնական քննության ընթացքում ամբաստանյալ Կարեն Թաշչյանը, որպես կասկածյալ, ցուցմունք է տվել այն մասին, որ շուրջ 4-5 տարի ճանաչում է Նոնա Գրիգորյանին, ում հետ եղել են ընկերներ: 2011 թվականի օգոստոսի 17-ի գիշերն ինքը մեկ այլ աղջկա հետ եղել է «Տոչկա» ակումբում: Այդ ժամանակ նշված ակումբ է եկել Նոնան, սակայն ինքը նրան ասել է, որ այդ աղջիկն իր հետ կապ չունի և հանգստացնելով նրան` տարել է տուն` Երևան քաղաքի Սայաթ-Նովա փողոցի 18-րդ շենքի 32-րդ բնակարան: Նոնային տուն տանելուց հետո վերջինը զանգահարել և իրեն կրկին մեղադրել է, որ այդ աղջկն իր հետ է եղել, ինչի պատճառով իրենք վիճել են, ու ինքը որոշել է գնալ նրա տուն և պարզել ամեն ինչ: Ինքը գնացել է Նոնայի տուն, սակայն նա դուռը չի բացել, որի պատճառով բարկացել է և մեքենայի բանալիով հարվածել դռանը: Հարվածի հետևանքով կոտրվել է դռան դիտանցքը և բռնակը: Այդ ընթացքում շենքի մուտքում, այնուհետև նաև փողոցում ինքը հայհոյանքներ է տվել, որը տևել մի քանի րոպե:
Նախնական քննության ընթացքում ամբաստանյալ Կարեն Թաշչյանը, որպես մեղադրյալ, ցուցմունք է տվել այն մասին, որ 2011 թվականի օգոստոսի 17-ին` ժամը 07:00-ի սահմաններում, գնացել է Երևան քաղաքի Սայաթ-Նովա փողոցի 18-րդ շենքի 32-րդ բնակարանի մոտ, որտեղ բնակվել է իր ընկերուհի Նոնան: Ինքը ծեծել է նշված բնակարանի դուռը, սակայն Նոնան, տեսնելով, որ ինքն է, դուռը չի բացել և ինքը, դրանից բարկացած, սկսել է հայհոյանքներ տալ նրա հասցեին և հարվածել դռանը: Հարվածների հետևանքով կոտրվել է դռան դիտանցքը և բռնակը, որից հետո ինքն իջել է բակ և այտեղից կրկին հայհոյանքներ տվել նրա հասցեին:
Տուժող Նոնա Գրիգորյանը դատական քննության ընթացքում ցուցմունք տվեց այն մասին, որ ինքն ու Կարեն Թաշչյանը եղել են ընկերներ: 2011 թվականի օգոստոսի 17-ին ինքը Կարենին տեսել է մեկ այլ աղջկա հետ, ինչի պատճառով ինքը բարկացել է և վիճաբանել նրա հետ: Նույն օրը` առավոտյան, Կարենը եկել է իր տան մոտ, սակայն ինքը դուռը չի բացել, որի ժամանակ նա հարվածել է դռանը և սկսել բարձրաձայն հայհոյել: Կարենի հարվածների հետևանքով կոտրվել է իր տան դռան բռնակն ու դիտանցքը:
Վկա Գոհար Մանուկյանը դատական քննության ընթացքում ցուցմունք տվեց այն մասին, որ բնակվում է Երևան քաղաքի Սայաթ-Նովա փողոցի 18-րդ շենքի 27-րդ բնակարանում: Դեպքի օրը` առավոտյան, լսել է, որ մի երիտասարդ անպարկեշտ` սեռական բնույթի հայհոյանքներ է տվել մի աղջկա հասցեին:
Վկա Գոհար Մանուկյանը նախնական քննության ընթացքում ցուցմունք է տվել այն մասին, որ բնակվում է Երևան քաղաքի Սայաթ-Նովա փողոցի 18-րդ շենքի 27-րդ բնակարանում: 2011 թվականի օգոստոսի 17-ին` ժամը 07:30-ի սահմաններում, երբ ինքը տանը քնած է եղել, մուտքից լսել է տղամարդու բարձր ձայն, ով շատ բարձր ձայնով հայհոյանքներ է տվել: Այնուհետև այդ տղան իջել է բակ և բակից շարունակել հայհոյանքներ տալ: Նշված միջադեպը տևել է մոտ 10-15 րոպե, որի ընթացքում այդ տղան անդադար տվել է լկտի սեռական բնույթի հայհոյանքներ, ինչի պատճառով խախտվել է իր անդորրը:
Վկա Կարեն Վարդանյանը նախնական քննության ընթացքում ցուցմունք է տվել այն մասին, որ բնակվում է Երևան քաղաքի Սայաթ-Նովա փողոցի 18-րդ շենքի 33-րդ բնակարանում: Երևան քաղաքի Սայաթ-Նովա փողոցի 18-րդ շենքի 32-րդ բնակարանում բնակվող հարևանուհուն չի ճանաչում, քանի որ նա վարձով է բնակվում: 2011 թվականի օգոստոսի 17-ին` ժամը 07:30-ի սահմաններում, մուտքի իրենց հարթակի կողմից լսել է տղամարդու բարձր ձայներ: Այդ պատճառով մոտեցել է իր տան դռանը և նկատել, որ ինչ-որ տղամարդ ուժեղ թակում է իրենց կողքի հարևանի դուռը: Այնուհետև այդ տղամարդը, տեսնելով, որ դուռը չեն բացում, սկսել է ավելի ուժեղ հարվածել դռանը և ձայներից հասկացել է, որ ինչ-որ բան է կոտրվել: Դրանից հետո այդ տղամարդը սկսել է բարձր սեռական բնույթի հայհոյանքներ տալ, որը տևել է մոտ 10 րոպե: Դրանից հետո այդ տղամարդն իջել է բակ և այնտեղից կրկին շարունակել նույն բարձր ձայնով հայհոյանքներ տալը: Այդ տղամարդու գործողությունների` աղմուկի ու հայհոյանքների պատճառով խանգարվել է իր հանգիստը և անդորրը:
Դեպքի վայրի զննություն կատարելու մասին 2011 թվականի օգոստոսի 17-ի արձանագրության համաձայն` դեպքի վայրը հանդիսացել է Երևան քաղաքի Սայաթ-Նովա փողոցի 18-րդ շենքի 32-րդ բնակարանի շքամուտքը: Նշված բանակարանի դռան զննությամբ պարզվել է, որ դրա վրայից բացակայում է դիտանքը, որը կոտրված վիճակում դրված է եղել դռան մոտ: Կոտրված է եղել նաև դռան բռնակը:
Փորձագետի 2011 թվականի օգոստոսի 23-ի թիվ 568-ԱՊ եզրակացության համաձայն` փորձաքննությանը տրամադրված փականի բռնակի և երեսպատվածքի միջվնասվածքային միջին շուկայական ընդհանուր արժեքը, հաշվի առնելով դրա օգտագործված լինելու հանգամանքը, գնահատվում է 1.500 ՀՀ դրամ, իսկ դիտանցքի միջվնասվածքային միջին շուկայական արժեքը, հաշվի առնելով դրա գործածված լինելու հանգամանքը, նույն օրվա դրությամբ գնահատվում է 300 ՀՀ դրամ:
Իրեղեն ապացույց ճանաչելու մասին 2010 թվականի հոկտեմբերի 3-ի որոշմամբ Երևան քաղաքի Սայաթ-Նովա փողոցի 18-րդ շենքի 32-րդ բնակարանի դռան փականն ու դիտանցքը ճանաչվել են իրեղեն ապացույց, որոնք հետազոտվել են դատական քննության ընթացքում:
ՀՀ ոստիկանության ինֆորմացիոն կենտրոնի պահանջագրի համաձայն`
-2005 թվականի հուլիսի 26-ին Երևան քաղաքի Կենտրոն և Նորք-Մարաշ համայնքների առաջին ատյանի դատարանի դատավճռով Կարեն Էդուարդի Թաշչյանը մեղավոր է ճանաչվել ՀՀ քրեական օրենսգրքի 112-րդ հոդվածի 1-ին մասով և դատապարտվել ազատազրկման` 3 տարի ժամկետով: ՀՀ քրեական օրենսգրքի 70-րդ հոդվածի կիրառմամբ նշանակված պատիժը պայմանականորեն չի կիրառվել և սահմանվել է փորձաշրջան` 2 տարի ժամկետով: 2006 թվականի հուլիսի 7-ին ընդունված համաներման ակտի կիրառմամբ ազատվել է պատժից,
-2010 թվականի հոկտեմբերի 21-ին Կարեն Էդուարդի Թաշչյանի նկատմամբ ՀՀ քրեական օրենսգրքի 117-րդ հոդվածով քրեական հետապնդումը դադարեցվել է ՀՀ քրեական դատավարության օրենսգրքի 35-րդ հոդվածի 1-ին մասի 4-րդ կետով նախատեսված հիմքով:
3. Դատարանի իրավական վերլուծությունները.
Վերոգրյալ ապացույցների հիման հիման վրա Դատարանը գալիս է այն եզրահանգման, որ Կարեն Էդուարդի Թաշչյանը 2011 թվականի օգոստոսի 17-ին` ժամը 07:00-ի սահմաններում, Երևան քաղաքի Սայաթ-Նովա փողոցի 18-րդ շենքի 32-րդ բնակարանի շքամուտքում և նույն շենքի բակում, նշված բնակարանի դուռը չբացելու կապակցությամբ, բարձաձայն հայհոյանքներ է տվել Նոնա Գրիգորյանի հասցեին, որի ընթացքում հարվածել և կոտրել է նույն բնակարանի դռան բռնակն ու դիտանցքը: Այսինքն` Կարեն Էդուարդի Թաշչյանը, հասարակության նկատմամբ բացահայտ անհարգալից վերաբերմունք դրսևորելով, դիտավորությամբ կոպիտ կերպով խախտել է հասարակական կարգը, որը զուգորդվել է ուրիշի գույքը ոչնչացնելով, ինչը համապատասխանում է ՀՀ քրեական օրենսգրքի 258-րդ հոդվածի 2-րդ մասի հատկանիշներին:
Ապացուցված է Կարեն Էդուարդի Թաշչյանի մեղավորությունը ՀՀ քրեական օրենսգրքի 258-րդ հոդվածի 2-րդ մասով նախատեսված արարքը կատարելու մեջ:
Կարեն Թաշչյանի անձը դրականորեն բնութագրող հանգամանքներ են բարձրագույն կրթություն ունենալը, ինքնախոստովանական ցուցմունքներ տալը և կատարածի համար զղջալը:
Դատարանն արձանագրում է, որ Կարեն Թաշչյանի պատասխանատվությունն ու պատիժը մեղմացնող և ծանրացնող հանգամանքներ առկա չեն:
Ինչ վերաբերում է Կարեն Թաշչյանի կողմից հանցանքն ալկոհոլի ազդեցության տակ կատարելուն, ապա այդ կապակցությամբ սույն քրեական գործով ձեռք բերված միակ ապացույցը տուժող Նոնա Գրիգորյանի նախնական քննության ընթացում տված ցուցմունքն է այն մասին, որ դռան դիտանցքից տեսնելով Կարեն Թաշչյանին` հասկացել է, որ նա գտնվում է ալկոհոլի ազդեցության տակ, ինչը տվյալ դեպքում ինքնին բավարար չէ այդ հանգամանքը հաստատված համարելու համար:
Դատարանը, հաշվի առնելով Կարեն Թաշչյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքների բացակայությունը, ինչպես նաև այն, որ Կարեն Թաշչյանի կատարած արարքի համար ՀՀ քրեական օրենսգրքի 258-րդ հոդվածի 2-րդ մասի սանկցիայով նախատեսված է պատիժ նաև տուգանքի ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել տուգանքի ձևով:
Դատարանը գտնում է, որ Կարեն Թաշչյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո 2011 թվականի հոկտեմբերի 3-ի որոշմամբ իրեղեն ապացույց ճանաչված` դռան փականն ու դիտանցքը պետք է վերադարձնել Նոնա Գրիգորյանին:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերը դատարանի նախաձեռնությամբ ամբաստանյալից ենթակա չեն բռնագանձման, քանի որ տուժողը, հնարավորություն ունենալով իր շահերը դատարանում ներկայացնել, ամբաստանյալին որևէ պահանջ չի ներկայացրել: Բռնագանձման ենթակա չեն նաև ՀՀ քրեական դատավարության օրենսգրքի 168-րդ հոդվածի 1-ին մաuի 2-6-րդ կետերով նախատեսված դատական ծախսերը, քանի որ 4-րդ և 6-րդ կետերով նախատեսված դատական ծախսեր ընդհանրապես չկան, իսկ 2-րդ, 3-րդ և 5-րդ կետերով նախատեսված ծախսերի վերաբերյալ տվյալները բացակայում են, ավելին` նման պահանջ Դատարան չի ներկայացվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Կարեն Էդուարդի Թաշչյանին մեղավոր ճանաչել ՀՀ քրեական օրենսգրքի 258-րդ հոդվածի 2-րդ մասով և պատիժ նշանակել տուգանք` նվազագույն աշխատավաձի երեքհարյուրապատիկի չափով:
Կարեն Էդուարդի Թաշչյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո` 2011 թվականի հոկտեմբերի 3-ի որոշմամբ իրեղեն ապացույց ճանաչված` դռան փականն ու դիտանցքը վերադարձնել Նոնա Գրիգորյանին:
Դատական ծախսերի հարցը համարել լուծված։
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ