ԵԿԴ/0247/01/11




ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«30» մայիսի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ նաև` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Հ.Հարությունյան
տուժողի ներկայացուցիչ Ժ.Կարապետյան
պաշտպաններ Մ.Վասակյան
Լ.Գրիգորյան

դռնբաց դատական նիստում քննեց քրեական գործն ըստ մեղադրանքի`
Մարգար Մնացականի Օհանյանի` ծնված 1958 թվականի հոկտեմբերի 21-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, աշխատել է ՀՀ ոստիկանության ճանապարհային ոստիկանության պետ, նախկինում չդատապարտված, հաշվառված է Երևան քաղաքի Նորքի 2-րդ փողոցի 25/1 տանը, մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով և 308-րդ հոդվածի 2-րդ մասով, արգելանքի տակ է 2011 թվականի օգոստոսի 30-ից,
Ստեփան Արամի Կարախանյանի` ծնված 1957 թվականի հունիսի 1-ին Վրաստանի Ախալքալակի շրջանի Դիլիսկա գյուղում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, աշխատել է ՀՀ ոստիկանության ճանապարհային ոստիկանության 2-րդ սպայական գումարտակի հրամանատար, նախկինում չդատապարտված, հաշվառված է Երևան քաղաքի Սևաստոպոլյան փողոցի 30-րդ տանը, բնակվում է Երևան քաղաքի Դավթաշենի 3-րդ թաղամասի 9-րդ շենքի 22-րդ բնակարանում, մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով և 38-179-րդ հոդվածի 3-րդ մասի 1-ին կետով, խափանման միջոց է ընտրվել ստորագրություն չհեռանալու մասին,
Արա Ֆերդինանտի Լևոնյանի` ծնված 1970 թվականի հունվարի 27-ին Վայոց ձորի մարզի Գնիշիկ գյուղում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, աշխատում է ՀՀ ոստիկանության ճանապարհային ոստիկանության տնտեսական բաժանմունքի պետ, նախկինում չդատապարտված, բնակվում է Երևան քաղաքի Շիրակի փողոցի 56-րդ շենքի 11-րդ բնակարանում, մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով, խափանման միջոց է ընտրվել ստորագրություն չհեռանալու մասին,
Սամվել Աբգարի Մախմուրյանի` ծնված 1957 թվականի մարտի 11-ին Արարատի մարզի Զովաշեն գյուղում, ազգությամբ հայ, ՀՀ քաղաքացի, միջին մասնագիտական կրթությամբ, աշխատում է ՀՀ ոստիկանության ճանապարհային ոստիկանության տնտեսական բաժանմունքի տեխնիկ, նախկինում չդատապարտված, բնակվում է Երևան քաղաքի Նուբարաշենի 8-րդ փողոցի 12-րդ տանը, մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2011 թվականի օգոստոսի 25-ին ՀՀ հատուկ քննչական ծառայության ՀԿԳ քննիչ Տ.Թամամյանի որոշմամբ ՀՀ քրեական օրենսգրքի 179-րդ հոդվածի 3-րդ մասի 1-ին կետով և 308-րդ հոդվածի 2-րդ մասով նախատեսված հանցագործությունների հատկանիշներով հարուցվել և վարույթ է ընդունվել թիվ 62206611 քրեական գործը:
2011 թվականի օգոստոսի 31-ին ՀՀ հատուկ քննչական ծառայության պետ Ա.Միրզոյանի որոշմամբ թիվ 62206611 քրեական գործի նախաքննության կատարումը հանձնարարվել է քննչական խմբին, որի կազմում ընդգրկվել են ՀՀ հատուկ քննչական ծառայության ՀԿԳ քննիչ Տ.Թամամյանը, ՀՀ ոստիկանության Մաշտոցի քննչական բաժնի ավագ քննիչ Մ.Ծատինյանը, Նոր Նորքի քննչական բաժնի պետի տեղակալ Կ.Հովհաննիսյանը և Էրեբունու քննչական բաժնի քննիչ Ս.Գրիգորյանը, քրեական գործը թողնվել է ՀՀ հատուկ քննչական ծառայության ՀԿԳ քննիչ Տ.Թամամյանի վարույթում` որպես քննչական խմբի ղեկավար:
2011 թվականի սեպտեմբերի 2-ին ՀՀ հատուկ քննչական ծառայության ՀԿԳ քննիչ Տ.Թամամյանի որոշմամբ թիվ 62206611 քրեական գործով Մարգար Մնացականի Օհանյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով և 308-րդ հոդվածի 2-րդ մասով:
2011 թվականի նոյեմբերի 11-ին ՀՀ հատուկ քննչական ծառայության ՀԿԳ քննիչ Տ.Թամամյանի որոշմամբ թիվ 62206611 քրեական գործով Ստեփան Արամի Կարախանյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով և 38-179-րդ հոդվածի 3-րդ մասի 1-ին կետով:
2011 թվականի նոյեմբերի 12-ին ՀՀ հատուկ քննչական ծառայության ՀԿԳ քննիչ Տ.Թամամյանի որոշմամբ թիվ 62206611 քրեական գործով Սամվել Աբգարի Մախմուրյանին մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով:
2011 թվականի նոյեմբերի 14-ին ՀՀ հատուկ քննչական ծառայության ՀԿԳ քննիչ Տ.Թամամյանի որոշմամբ թիվ 62206611 քրեական գործով Արա Ֆերդինանտի Լևոնյանին մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով:
2011 թվականի նոյեմբերի 15-ին ՀՀ հատուկ քննչական ծառայության ՀԿԳ քննիչ Տ.Թամամյանի որոշմամբ թիվ 62206611 քրեական գործով Մարգար Մնացականի Օհանյանին առաջադրված մեղադրանքը փոփոխվել, լրացվել է և նրան նոր մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով և 308-րդ հոդվածի 2-րդ մասով:
2011 թվականի նոյեմբերի 29-ին ՀՀ հատուկ քննչական ծառայության ՀԿԳ քննիչ Տ.Թամամյանի որոշմամբ թիվ 62206611 քրեական գործից անջատվել է Մարգար Մնացականի Օհանյանի, Ստեփան Արամի Կարախանյանի, Արա Ֆերդինանտի Լևոնյանի և Սամվել Աբգարի Մախմուրյանի վերաբերյալ մասը, իսկ ՀՀ ոստիկանության ճանապարհային ոստիկանության առանձին պաշտոնատար անձանց կողմից բենզինի, այլ նյութական արժեքների, ինչպես նաև ծառայությունների գնման ու հաշվառման գործընթացներում կատարված չարաշահումների վերաբերյալ մասով նախաքննությունը շարունակվել է 62209711 համարով:
2011 թվականի դեկտեմբերի 9-ին Մարգար Մնացականի Օհանյանի, Ստեփան Արամի Կարախանյանի, Արա Ֆերդինանտի Լևոնյանի և Սամվել Աբգարի Մախմուրյանի վերաբերյալ թիվ 62206611 քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան, որտեղ քրեական գործին շնորհվել է ԵԿԴ/0247/01/11 համարը:
Մարգար Մնացականի Օհանյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով և 308-րդ հոդվածի 2-րդ մասով` այն արարքների համար, որ նա, աշխատելով որպես ՀՀ ոստիկանության ճանապարհային ոստիկանության պետ, մշտապես իրականացնելով իշխանության ներկայացուցչի լիազորություններ, հանդիսանալով պաշտոնատար անձ, շահադիտական շահագրգռվածությունից ելնելով` իր պաշտոնեական դիրքն օգտագործել է ծառայության շահերին հակառակ, որն էական վնաս է պատճառել պետության օրինական շահերին և ազգուշությամբ առաջացրել է ծանր հետևանքներ, ինչպես նաև կատարել է իրեն վստահված, ճանապարհային ոստիկանությանը պատկանող առանձնապես խոշոր չափերով գույքի յուրացում, որպիսի գործողություններն արտահայտվել են հետևյալում.
2009 թվականի հունվարից 2011 թվականի հուլիսն ընկած ժամանակահատվածում ՀՀ ոստիկանության ՃՈ-ի տրանսպորտային միջոցների շահագործման համար ՀՀ պետական բյուջեի և ՃՈ արտաբյուջետային միջոցների հաշվին ձեռք է բերվել, ապա ՃՈ 1-ին և 2-րդ սպայական գումարտակներին բաշխելու համար ՀՀ ոստիկանության ՃՈ պետ Մարգար Օհանյանին է հատկացվել 2.480.720 լիտր «ռեգուլյար» տեսակի բենզին:
Մարգար Օհանյանը նույն ժամանակահատվածում հիշյալ բեզինից առանձնապես խոշոր չափերով` 197.003.060 ՀՀ դրամ ընդհանուր արժողությամբ 574.420 լիտր բենզինը յուրացնելու նպատակով` ՀՀ ոստիկանության ճանապարհային ոստիկանության կանոնադրության 15-րդ կետով սահմանված` ճանապարհային ոստիկանության գույքը տնօրինելու իր պաշտոնեական լիազորությունները չարաշահել է և ՀՀ ոստիկանության ՃՈ պետի պաշտոնեական դիրքը ծառայության շահերին հակառակ օգտագործելով` բենզինի բաշխման, հաշվառման և ծախսագրման պատասխանատուներ, ՃՈ տնտեսական բաժանմունքի պետ Արա Լևոնյանին, վերջինի միջոցով նաև նույն բաժանմունքի տեխնիկ Սամվել Մախմուրյանին և 2-րդ սպայական գումարտակի հրամանատար Ստեփան Կարախանյանին հանձնարարել է ՃՈ 1-ին և 2-րդ սպայական գումարտակների համար նախատեսված 2.480.720 լիտր բենզինից ծառայության նպատակով բաշխել ընդամենը 1.906.300 լիտրը, իսկ տարբերություն կազմող 574.420 լիտր բենզինը կտրոնների տեսքով հանձնել իրեն: Այնուհետև Արա Լևոնյանը, Սամվել Մախմուրյանն ու Ստեփան Կարախանյանը, օժանդակելով Մարգար Օհանյանի` գույքի առանձնապես խոշոր չափերով յուրացմանը, վերջինի հանձնարարությամբ, 2009 թվականի հունվարից 2011 թվականի հուլիսն ընկած ժամանակահատվածում բենզինի ելքի կարգադրություններով, բաշխման քարտերով և ծախսի վերաբերյալ ամսական հաշվետվություններով ցույց են տվել և ձևակերպել, թե ՃՈ հիշյալ սպայական գումարտակներին հատկացվել ու ծախսվել է 2.480.720 լիտր բենզին, սակայն փաստացի բաշխել են ընդամենը 1.906.300 լիտր բենզին, իսկ տարբերություն կազմող, 197.003.060 ՀՀ դրամ արժողությամբ 574.420 լիտր բենզինը կտրոնների տեսքով հանձնել են Մարգար Օհանյանին, ով յուրացրել է ճանապարհային ոստիկանությանը պատկանող առանձնապես խոշոր չափերով հիշյալ գույքը:
Մարգար Օհանյանի վերը նկարագրված գործողությունների հետևանքով պետության օրինական շահերին պատճառվել է էական վնաս, որն անզգուշությամբ առաջացրել է ծանր հետևանքներ, այն է` պետությանը պատճառվել է առանձնապես խոշոր չափերով` 197.003.060 ՀՀ դրամի գույքային վնաս, ինչպես նաև հեղինակազրկվել է ՀՀ ոստիկանությունը, և խաթարվել ճանապարհային ոստիկանության բնականոն գործունեությունը:
Ստեփան Արամի Կարախանյանին մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով և 179-րդ հոդվածի 3-րդ մասի 1-ին կետով` այն արարքների համար, որ նա, աշխատելով ՀՀ ոստիկանության ճանապարհային ոստիկանության 2-րդ սպայական գումարտակի հրամանատար, միջոցներ տրամադրելով և խոչընդոտներ վերացնելով, օժանդակել է ՀՀ ոստիկանության ՃՈ պետ Մարգար Օհանյանին` պաշտոնեական դիրքի օգտագործմամբ` վերջինին վստահված ՀՀ ոստիկանության ՃՈ-ին պատկանող առանձնապես խոշոր չափերով գույքի յուրացմանը, բացի այդ, պաշտոնեական դիրքն օգտագործելով, յուրացրել է իրեն վստահված` ՀՀ ոստիկանության ճանապարհային ոստիկանության առանձնապես խոշոր չափերով գույքը, որպիսի գործողություններն արտահայտվել են հետևյալում.
2009 թվականի հունվարից 2011 թվականի հուլիսն ընկած ժամանակահատվածում ճանապարհային ոստիկանության տրանսպորտային միջոցների շահագործման համար ՀՀ պետական բյուջեի և ՃՈ արտաբյուջետային միջոցների հաշվին ձեռք է բերվել, ապա ՃՈ 2-րդ սպայական գումարտակին բաշխելու համար ՀՀ ոստիկանության ՃՈ պետ Մարգար Օհանյանին է հատկացվել 1.521.520 լիտր «ռեգուլյար» տեսակի բենզին: Դրանից առանձնապես խոշոր չափերով` 159.399.960 ՀՀ դրամ ընդհանուր արժողությամբ 460.220 լիտր բենզինը յուրացնելու նպատակով Մարգար Օհանյանը, շահադիտական շահագրգռվածությունից ելնելով, իր պաշտոնեական դիրքը ծառայության շահերին հակառակ օգտագրծելով, 2-րդ սպայական գումարտակի հրամանատար Ստեփան Կարախանյանին, ինչպես նաև բենզինի բաշխման, հաշվառման և ծախսագրման պատասխանատու, ՃՈ տնտեսական բաժանմունքի պետ Արա Լևոնյանին հանձնարարել է գումարտակի համար նախատեսված 1.521.520 լիտր բենզինից ծառայության նպատակով բաշխել ընդամենը 1.061.300 լիտրը, իսկ տարբերություն կազմող 460.220 լիտր բենզինը կտրոնների տեսքով հանձնել իրեն:
Ստեփան Կարախանյանը և Արա Լևոնյանը, օժանդակելով իրենց ամիջական ղեկավար Մարգար Օհանյանի կողմից գույքի առանձնապես խոշոր չափերով յուրացմանը, վերջինի հանձնարարությամբ, 2009 թվականի հունվարից 2011 թվականի հուլիսն ընկած ժամանակահատվածում բենզինի ելքի կարգադրություններով, բաշխման քարտերով և ծախսի վերաբերյալ ամսական հաշվետվություններով ցույց են տվել և ձևակերպել, թե 2-րդ սպայական գումարտակին հատկացվել, ծախսվել է 1.521.520 լիտր բենզին, սակայն փաստացի հատկացրել են ընդամենը 1.061.300 լիտր բենզին, իսկ տարբերություն կազմող, 159.399.960 ՀՀ դրամ արժողությամբ 460.220 լիտր բենզինը կտրոնների տեսքով հանձնել են Մարգար Օհանյանին, ով յուրացրել է ճանապարհային ոստիկանությանը պատկանող առանձնապես խոշոր չափերով հիշյալ գույքը:
Բացի այդ, Ստեփան Կարախանյանը, պաշտոնեական դիրքն օգտագործելով, 2009 թվականի հունվարից 2011 թվականի հուլիսն ընկած ժամանակահատվածում 2-րդ սպայական գումարտակի ծառայողական ավտոմեքենաների շահագործման համար հատկացված և իրեն վստահված 1.061.300 լիտր բենզինից իր ենթակա 6 վաշտերի հրամանատարներին փաստացի բաշխել է ընդամենը 996.120 լիտրը, սակայն բենզինի բաշխման քարտերով և ծախսի վերաբերյալ ամսական հաշվետվություններով ձևակերպել է 1.061.300 լիտր բենզինի ծախս, իսկ տարբերություն կազմող, առանձնապես խոշոր չափերով` 20.620.940 ՀՀ դրամ ընդհանուր արժողությամբ 65.180 լիտր բենզինը յուրացրել է:
Արա Ֆերդինանտի Լևոնյանին մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով` այն արարքի համար, որ նա, աշխատելով ՀՀ ոստիկանության ճանապարհային ոստիկանության տնտեսական բաժանմունքի պետ, միջոցներ տրամադրելով և խոչընդոտներ վերացնելով օժանդակել է ՀՀ ոստիկանության ՃՈ պետ Մարգար Օհանյանին` պաշտոնեական դիրքի օգտագործմամբ, նրան վստահված` ՀՀ ոստիկանության ՃՈ-ին պատկանող առանձնապես խոշոր չափերով գույքի յուրացմանը, որպիսի գործողություններն արտահայտվել են հետևյալում.
2009 թվականի հունվարից 2011 թվականի հուլիսն ընկած ժամանակահատվածում ՀՀ ոստիկանության ՃՈ-ի տրանսպորտային միջոցների շահագործման համար ՀՀ պետական բյուջեի և ՃՈ արտաբյուջետային միջոցների հաշվին ձեռք է բերվել, ապա ՃՈ 1-ին և 2-րդ սպայական գումարտակներին բաշխելու համար ՀՀ ոստիկանության ՃՈ պետ Մարգար Օհանյանին է հատկացվել 2.480.720 լիտր «ռեգուլյար» տեսակի բենզին:
Հիշյալ ստորաբաժանումների համար նախատեսված բենզինից առանձնապես խոշոր չափերով` 197.003.060 ՀՀ դրամ ընդհանուր արժողությամբ 574.420 լիտր բենզինը յուրացնելու նպատակով Մարգար Օհանյանը, շահադիտական շահագրգռվածությունից ելնելով, իր պաշտոնեական դիրքը ծառայության շահերին հակառակ օգտագործելով, բենզինի բաշխման, հաշվառման և ծախսագրման պատասխանատուներ, ՃՈ տնտեսական բաժանմունքի պետ Արա Լևոնյանին, վերջինի միջոցով` նույն բաժանմունքի տեխնիկ Սամվել Մախմուրյանին և 2-րդ սպայական գումարտակի հրամանատար Ստեփան Կարախանյանին հանձնարարել է հիշյալ գումարտակների համար նախատեսված 2.480.720 լիտր բենզինից ծառայության նպատակով բաշխել ընդամենը 1.906.300 լիտրը, իսկ տարբերություն կազմող 574.420 լիտրը` կտրոնների տեսքով հանձնել իրեն:
Արա Լևոնյանը, Սամվել Մախմուրյանը և Ստեփան Կարախանյանը, օժանդակելով Մարգար Օհանյանի կողմից գույքի առանձնապես խոշոր չափերով յուրացմանը, վերջինի հանձնարարությամբ 2009 թվականի հունվարից 2011 թվականի հուլիսն ընկած ժամանակահատվածում բենզինի ելքի կարգադրություններով, բաշխման քարտերով և ծախսի վերաբերյալ ամսական հաշվետվություններով ցույց են տվել և ձևակերպել, թե ՃՈ 1-ին և 2-րդ սպայական գումարտակներին հատկացվել և ծախսվել է 2.480.720 լիտր բենզին, սակայն փաստացի բաշխել են ընդամենը 1.906.300 լիտր բենզին, իսկ տարբերություն կազմող, 197.003.060 ՀՀ դրամ արժողությամբ 574.420 լիտր բենզինը կտրոնների տեսքով հանձնել են Մարգար Օհանյանին, ով յուրացրել է ճանապարհային ոստիկանությանը պատկանող առանձնապես խոշոր չափերով հիշյալ գույքը:
Սամվել Աբգարի Մախմուրյանին մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով` այն արարքի համար, որ նա, աշխատելով ՀՀ ոստիկանության ճանապարհային ոստիկանության տնտեսական բաժանմունքում որպես տեխնիկ, միջոցներ տրամադրելով և խոչընդոտներ վերացնելով օժանդակել է ՀՀ ոստիկանության ՃՈ պետ Մարգար Օհանյանին` պաշտոնեական դիրքի օգտագործմամբ, վերջինին վստահված` ՀՀ ոստիկանության ՃՈ-ին պատկանող առանձնապես խոշոր չափերով գույքի յուրացմանը, որպիսի գործողություններն արտահայտվել են հետևյալում.
2009 թվականի հունվարից 2011 թվականի հուլիսն ընկած ժամանակահատվածում ՀՀ ոստիկանության ՃՈ-ի տրանսպորտային միջոցների շահագործման համար ՀՀ պետական բյուջեի և ՃՈ արտաբյուջետային միջոցների հաշվին ձեռք է բերվել, ապա ՃՈ 1-ին սպայական գումարտակին բաշխելու համար ՀՀ ոստիկանության ՃՈ պետ Մարգար Օհանյանին է հատկացվել 959.200 լիտր «ռեգուլյար» տեսակի բենզին:
Դրանից առանձնապես խոշոր չափերով` 37.603.100 ՀՀ դրամ ընդհանուր արժողությամբ 114.200 լիտր բենզինը յուրացնելու նպատակով Մարգար Օհանյանը, շահադիտական շահագրգռվածությունից ելնելով, իր պաշտոնեական դիրքը ծառայության շահերին հակառակ օգտագործելով, բենզինի բաշխման, հաշվառման և ծախսագրման պատասխանատուներ, ՃՈ տնտեսական բաժանմունքի պետ Արա Լևոնյանին, վերջինի միջոցով` նաև Սամվել Մախմուրյանին հանձնարարել է 1-ին գումարտակի համար նախատեսված բենզինից ծառայության նպատակով բաշխել ընդամենը 845.000 լիտրը, իսկ տարբերություն կազմող 114.200 լիտրը կտրոնների տեսքով հանձնել իրեն:
Սամվել Մախմուրյանը և Արա Լևոնյանը, օժանդակելով Մարգար Օհանյանի կողմից գույքի առանձնապես խոշոր չափերով յուրացմանը, վերջինի հանձնարարությամբ, 2009 թվականի հունվարից 2011 թվականի հուլիսն ընկած ժամանակահատվածում, բենզինի ելքի կարգադրություններով, բաշխման քարտերով և ծախսի վերաբերյալ ամսական հաշվետվություններով ցույց են տվել և ձևակերպել, թե 1-ին սպայական գումարտակին հատկացվել և ծախսվել է 959.200 լիտր բենզին, սակայն փաստացի հատկացրել են ընդամենը 845.000 լիտր, իսկ տարբերությունը կազմող, 37.603.100 ՀՀ դրամ արժողությամբ 114.200 լիտր բենզինը կտրոնների տեսքով հանձնել են Մարգար Օհանյանին, ով յուրացրել է ճանապարհային ոստիկանությանը պատկանող` առանձնապես խոշոր չափերով հիշյալ գույքը:
2. Ապացույցների հետազոտում և գնահատում.
Դատական քննության ընթացքում ամբաստանյալ Մարգար Օհանյանն առաջադրված մեղադրանքում իրեն մեղավոր չճանաչեց և ցուցմունք տվեց այն մասին, որ 2008 թվականին նշանակվել է ՀՀ ոստիկանության «Ճանապարհային ոստիկանություն» ծառայության (այսուհետ` նաև ՃՈ) պետի պաշտոնում: 2008 թվականին ՃՈ արտաբյուջեն եղել է 1.700.000.000 ՀՀ դրամ, իսկ իր ղեկավարած ժամանակահատվածում, աշխատանքները ճիշտ և բարեխիղճ կատարելու արդյունքում, այն հասել է մինչև 4.850.000.000 ՀՀ դրամի: Ինքը ՃՈ-ին հատկացված բենզինի յուրացում չի կատարել, հետևաբար որևէ ղեկավարի դրանից բաժին չէր կարող տալ: Ինքը, որպես ՃՈ պետ, նյութական պատասխանատվություն չի կրել և բենզինի կտրոնների հետ կապված որևէ փաստաթուղթ չի ստորագրել, քանի որ դա չի մտել իր ծառայողական պարտականությունների մեջ: Իր պաշտոնավարման ժամանակահատվածում ՃՈ որևէ աշխատակից իրեն երբևէ չի դժգոհել բենզինի պակաս լինելու կապակցությամբ: Իրեն վերագրվող ծանր հանցագործությանն իր առնչությունը հիմնավորող որևէ իրեղեն ապացույց, այդ թվում` բենզինի կտրոն, չի հայտնաբերվել: 2011 թվականի ապրիլից իր և ՀՀ ոստիկանության պետ Ալիկ Սարգսյանի միջև տարաձայնություններ են սկսվել` ՃՈ-ում պաշտոնների նշանակման և այլ ծառայողական հարցերի պատճառով: Դրանից հետո 2011 թվականի օգոստոսի սկզբին, երբ ինքը գտնվել է հերթական արձակուրդում, ՀՀ ոստիկանության շտաբի, ներքին անվտանգության, 6-րդ և 7-րդ վարչությունների կողմից ՃՈ-ում իրականացվել են լայնամասշտաբ ստուգումներ: Այդ ժամանակ նշված ստորաբաժանումների ղեկավարներն իրեն ասել են, որպեսզի ինքը գնա ՀՀ ոստիկանության պետի մոտ և նրանից ներում խնդրի, որն ինքը չի արել: Իր և Ալիկ Սարգսյանի անձնական վատ հարաբերությունների պատճառով իր նկատմամբ տեղի ունեցավ հաշվեհարդար և իրեն առաջադրվեց մտացածին մեղադրանք: Իր կողմից գումարների վճարումը պայմանավորված է նրանով, որ իր համար դա եղել է պատվի հարց, քանի որ նախնական քննության մարմինը գտել է, որ իր ղեկավարած ժամանակահատվածում ՃՈ-ին պատճառվել է նյութական վնաս:
Դատական քննության ընթացքում ամբաստանյալ Ստեփան Կարախանյանն առաջադրված մեղադրանքում իրեն մեղավոր ճանաչեց և օգտվելով իր իրավունքից` հրաժարվեց ցուցմունք տալ:
Նախնական քննության ընթացքում` 2011 թվականի օգոստոսի 26-ին, ամբաստանյալ Ստեփան Կարախանյանը, որպես կասկածյալ, ցուցմունք է տվել այն մասին, որ 2008 թվականի սեպտեմբերի 18-ից մինչև 2011 թվականի օգոստոսի 10-ը զբաղեցրել է ՃՈ 2-րդ սպայական գումարտակի (այսուհետ` նաև 2-րդ գումարտակ) հրամանատարի պաշտոնը: Որպես 2-րդ գումարտակի հրամանատար` իր ֆունկցիոնալ պարտականությունների մեջ է մտել կազմակերպել ՀՀ մարզերում անխափան երթևեկությունը և դրանից բխող բոլոր գործառույթները: 2-րդ գումարտակի կազմում գործել են 6 սպայական վաշտեր: Բոլոր վաշտերը բաղկացած են եղել 2 դասակներից: Իր աշխատած ժամանակահատվածում, վերջին տվյալներով 2-րդ գումարտակի հաշվեկշռում գտնվել են 235 տրանսպորտային միջոցներ, որոնք աշխատել են բենզինով: Հիշյալ տրանսպորտային միջոցների շահագործումն ապահովելու նպատակով յուրաքանչյուր ամիս ինքն անձամբ ՃՈ տնտեսական բաժանմունքի պետ Արա Լևոնյանից ստացել է «ռեգուլյար» տեսակի բենզինի կտրոններ, որը տարբեր ամիսների տարբեր քանակություն է կազմել: Հիշյալ կտրոններն Արա Լևոնյանից ստացել է վառելիքի տրամադրման քարտերով: Արա Լևոնյանը բենզինի կտրոներն ստացել է ՀՀ ոստիկանության տնտեսական վարչությունից: Ստացած կտրոններից շուրջ 4.000 լիտր բենզինը մնացել է 2-րդ գումարտակի հաշվեկշռում գտնվող 7 ավտոմեքենաների շահագործման համար, իսկ մնացած կտրոնները բաշխվել են 6 վաշտերի հրամանատարների միջև: 2011 թվականի հունվար-ապրիլ ամիսներին ինքը ստացել է մոտ 53.000-ական լիտր բենզինի կտրոն, մայիս-հունիս ամիսներին` 85.000-ական լիտր բենզինի կտրոն, հուլիսին` 74.000 լիտր բենզինի կտրոն, օգոստոսին` մոտ 25.000 լիտր բենզինի կտրոն: Քանի որ ինքը 2011 թվականին օգոստոսի 10-ից գտնվում է կադրերի ռեզերվում, ապա օգոստոսին տրամադրված ողջ վառելիքի քանակն իրեն հայտնի չէ: Տարբեր ամիսների տարբեր քանակությամբ բենզինի կտրոնների տրամադրման հանգամանքը պայմանավորված է եղել զորակոչի ընթացքում գումարտակի կողմից կատարվող ուղեկցումներով: Քանի որ բենզինի կտրոններն իրեն տրամադրվել են ոչ կանոնավոր գրաֆիկով, այսիքն` ֆիքսված օր չի եղել, իսկ դա կապված է եղել մատակարարող կազմակերպությունների կողմից մրցույթները շահելու հետ, ապա ինքն Արա Լևոնանից բենզինի կտրոններն ստանալուն պես այդ մասին տեղեկացրել է 2-րդ գումարտակի վաշտերի հրամանատարներին: Վերջիններն անձամբ կամ իրենց աշխատակիցների միջոցով իրենից ստացել են հասանելիք բենզինի կտրոնները: Ըստ սահմանված կարգի` վաշտերին տրամադրվող բենզինի քանակության վերաբերյալ ստացողները ստորագրել են համապատասխան քարտերում, որոնք պահպանվել են 2-րդ գումարտակում: Երբեմն եղել են դեպքեր, երբ վաշտերի հրամանատարները կամ նրանց կողմից ուղարկված աշխատակիցները բենզինի տրամադրման քարտերում ստորագրել են ոչ թե անմիջապես ստացման պահին, այլ ամսվա վերջում, երբ ներկայացրել են բենզինի ծախսի վերաբերյալ հաշվետվությունները: Յուրաքանչյուր ամսվա վերջին բոլոր 6 վաշտերի հրամանատարները կամ նրանց ներկայացուցիչներն իրեն ներկայացրել են տրամադրված բենզինի ծախսի վերաբերյալ հաշվերվություններ, որտեղ նշվել է վաշտի հաշվեկշռում գտնվող տրանսպորտային միջոցների և դրանց կողմից ծախսված բենզինի քանակը: Վաշտի ներկայացուցիչներն ստացել են այնքան բենզինի կտրոններ, որքան նշված է եղել բենզինի տրամադրման քարտերում:
Նախնական քննության ընթացքում` 2011 թվականի օգոստոսի 29-ին, ամբաստանյալ Ստեփան Կարախանյանը, որպես կասկածյալ, ցուցմունք է տվել այն մասին, որ ինքը 2-րդ գումարտակի հաշվեկշռում գտնվող տրանսպորտային միջոցների համար նախատեսված բենզինը կտրոնների տեսքով ստացել է ՃՈ տնտեսական բաժանմունքի պետ Արա Լևոնյանից, սակայն ոչ այն քանակությամբ, ինչ նշված է եղել փաստաթղթերում, այլ դրանից անհամեմատ քիչ: 2-րդ գումարտակի հրամանատարի պաշտոնում իր աշխատած ժամանակահատվածի սկզբում` 2008 թվականների ընթացքում, Արա Լևոնյանն իրեն տվել է այն քանակությամբ բենզինի կտրոններ, ինչ որ նշված է եղել բենզինի տրամադրման վերաբերյալ համապատասխան քարտերում: 2010 թվականի կեսերից Արա Լևոնյանը սկսել է իրեն պակաս քանակությամբ բենզինի կտրոններ տրամադրել: Ինքը հետաքրքրվել է, թե ինչն է դրա պատճառը, ինչին Արա Լևոնյանը պատասխանել է, թե այդպես է պետք, և այլ մեկնաբանություններ չի արել: 2011 թվականի սկզբից 2-րդ գումարտակին հատկացվող բենզինի քանակությունն ավելի է կրճատվել: Յուրաքանչյուր ամսվա համար նախատեսված բենզինի կտրոններն Արա Լևոնյանն իրեն տրամադրել է մաս-մաս` ամիսը 2-3 փուլով: Յուրաքանչյուր անգամ բենզինի կտրոններն ստանալիս ինքն անմիջապես դրանք բաշխել է իր ենթակայության տակ գտնվող 6 վաշտերի հրամանատարներին: Վերջինները բազմիցս պահանջներ և դժգոհություններ են ներկայացրել բենզինի պակաս լինելու մասին, իսկ ինքը նրանց պատասխանել է, որ ինչ ստացել է, այն էլ բաժանել է: Արա Լևոնյանից բենզինի կտրոններն ստանալիս ինքը քարտերում չի ստորագրել, այլ դրանք ստորագրել է միայն ամսվա վերջում` ստացած բենզինի ծախսի վերաբերյալ ամսական հաշվետվությունները հանձնելիս: Յուրաքանչյուր ամսվա վերջում` նախքան հաշվետվությունները կազմելը, Արա Լևոնյանը, հիմնականում հեռախոսով, իրեն կամ 2-րդ գումարտակի ավագ տեսուչ Հովիկ Ծառուկյանին հայտնել է, թե ինչ քանակությամբ բենզինի ծախս պետք է ցույց տրվի փաստաթղթերում, ինքն էլ իր հերթին այդ քանակությունը բաշխել է 6 վաշտերի միջև և վաշտերի հրամանատարներին հայտնել, թե նրանք ամսական հաշվետվություններում ինչ քանակությամբ բենզինի ծախս պետք է ձևակերպեն: Վաշտերի միջև բենզինի քանակության փաստաթղթային ձևակերպման ընթացքում ինքը հաշվի է առել յուրաքանչյուր վաշտի հաշվեկշռում գտնվող տրանսպորտային միջոցների քանակը, սպասարկվող տարածքի մեծությունը, բնակչության և տրանսպորտային միջոցների քանակը: 2011 թվականի հունվար-ապրիլ ամիսներին ինքն Արա Լևոնյանից յուրաքանչյուր ամսվա կտրվածքով ստացել է 31.000 լիտր բենզին, մայիս-հունիս ամիսներին, կապված գարնանային զորակոչի հետ, ստացել է ամսական 39.000 լիտր բենզին, իսկ հուլիսին` 36.000 լիտր բենզին: Բենզինի կտրոններն ինքն անձամբ ստացել է միայն Արա Լևոնյանից` նրա աշխատասենյակում: Եղել են նաև դեպքեր, որ իր փոխարեն կտրոններն ստացած լինեն նաև Հովիկ Ծառուկյանը և 2-րդ գումարտակի տեսուչ Սերգեյ Մարտիրոսյանը: ՀՀ ոստիկանության պահեստից ինքն անձամբ բենզինի կտրոններ չի ստացել: Հնարավոր է, որ բենզինի կտրոնների մի մասը Հովիկ Ծառուկյանը պահեստից ստացած լինի, բայց ամեն դեպքում Հովիկ Ծառուկյանը և Սերգեյ Մարտիրոսյանը բենզինի կտրոններն ամբողջությամբ հանձնել են իրեն: Արա Լևոնյանն իրեն ասել է նաև, որ ավել քանակությամբ բենզինի դուրսգրումը ու ձևակերպումը կապված է նաև այն բանի հետ, որ միևնույն է ծառայողական ավտոմեքենաները շահագործվել են` մեքենաների վազքն ավելացել է, և դա պետք է ինչ-որ ձևով ցույց տրվեր և փաստաթղթային ձևակերպում ստանար: Բացի այդ, ծառայողական ավտոմեքենաների վրա բենզինի ավել քանակություն դուրս գրելով` ժամանակին նոր անվադողեր են տրամադրվել: Երբ վաշտերի հրամանատարները բենզինի պակասության վերաբերյալ իրենից պարզաբանումներ են պահանջել, ինքն Արա Լևոնյանի բերած պատճառաբանությունները նույնությամբ ներկայացրել է նրանց: Ինքը երբևէ Արա Լևոնյանից կամ ղեկավարությունից չի հետաքրքրվել, թե ում նախաձեռնությամբ կամ ինչ նպատակով է կատարվում բենզինի հավելագրումը` մտածելով, որ եթե Արա Լևոնյանն իրեն ամեն ամիս ակնհայտ քիչ բենզինի քանակություն է տրամադրել, քան ձևակերպված է եղել փաստաթղթերում, ապա նա այդ հարցը համաձայնեցրած պետք է լիներ: Արա Լևոնյանից ստացած բենզինի կտրոններն ինքն ամբողջությամբ բաշխել է 6 վաշտերի հրամանատարների միջև, իսկ մի մասն էլ պահել է գումարտակի ավտոմեքենաների համար, սակայն բենզինի դուրսգրման փաստաթղթերում Արա Լևոնյանի ասելով ձևակերպվել է փաստացի տրամադրված բենզինից մի քանի անգամ ավել քանակություն:
Նախնական քննության ընթացքում` 2011 թվականի օգոստոսի 29-ին, ամբաստանյալ Ստեփան Կարախանյանը, որպես կասկածյալ, ցուցմունք է տվել այն մասին, որ ՃՈ պետ Մարգար Օհանյանն իր և Արա Լևոնյանի ներկայությամբ ասել է, որպեսզի Արա Լևոնյան իրեն 2-րդ գումարտակի համար սահմանված քանակությունից 5.000-6.000 լիտրով պակաս բենզինի կտրոն հատկացնի, որն էլ կատարվել է: Սակայն դրանից հետո Արա Լևոնյանն ավելի է կրճատել 2-րդ գումարտակին հատկացվող բենզինի կտրոնների քանակը, իսկ երբ ինքը հարցրել է դրա պատճառների մասին, նա պատասխանել է, որ այդ հարցն էլ է համաձայնեցրել ՃՈ պետ Մարգար Օհանյանի հետ: Ինքը նույնպես այդ մասին հետաքրքրվել է Մարգար Օհանյանից, ով ուղղակի ասել է, որ դրանից տեղյակ է և այդպես է հարկավոր: Ինքն իրեն թույլ չի տվել ավելորդ հարցեր տալ և ուղղակի ենթարկվել է: Ինքն ստացված բենզինի քանակությունից ոչ մի լիտր չի յուրացրել, որքան որ ստացել է, այնքան էլ բաշխել է 6 վաշտերի հրամանատարների միջև: Իսկ երբ վաշտերի հրամանատարներն իրենից հետաքրքրվել են, թե ինչու է նրանց քիչ քանակությամբ բենզին հատկացնում, ինքը ստիպված տարբեր պատճառաբանություններ է բերել, սակայն բոլորին միանշանակ ասել է, որ ինչ քանակությամբ բենզին իրեն տալիս են, դա էլ ինքը բաժանում է:
Նախնական քննության ընթացքում` 2011 թվականի սեպտեմբերի 1-ին, ամբաստանյալ Ստեփան Կարախանյանը, որպես կասկածյալ, ցուցմունք է տվել այն մասին, որ 2009 թվականի հունվարից ՃՈ-ն սկսել է կանոնավոր կարգով բենզին ստանալ: 2009 թվականի հունվարից մինչև 2010 թվականի դեկտեմբերն ինքն Արա Լևոնյանից ամսական ստացել է 34.000 լիտր բենզինի կտրոն, թեև 2-րդ գումարտակին տրամադրված բենզինի ծախսման վերաբերյալ հաշվետվություններում նշվել է 41.800 լիտր բենզինի ծախս: 2009 թվականի հունվարին, երբ Արա Լևոնյանն իրեն փաստացի պակաս քանակությամբ բենզինի կտրոն է տրամադրել, ինքը հետաքրքրվել է, թե ինչն է պատճառը, որ 7.800 լիտրով քիչ բենզինի կտրոն է տվել, իսկ նա պատասխանել է, որ պակաս է տրամադրել ՃՈ պետ Մարգար Օհանյանի ցուցումով: Ինքն այդ հարցով անմիջապես դիմել է Մարգար Օհանյանին, ով հաստատել է, որ, իրոք, նրա կարգադրությամբ է բենզինի քանակությունը նվազեցվել: Մարգար Օհանյանն իրեն չի պատճառաբանել այդ կարգադրությունը, պարզապես ասել է, որ այդպես է պետք: Քանի որ Մարգար Օհանյանն ունեցել է բավականին չոր բնավորություն, ինքը չի համարձակվել ավելորդ հարցեր տալ և ուղղակի կատարել է իր անմիջական ղեկավարի ցուցումը: Մարգար Օհանյանը նաև ասել է, որպեսզի ինքը բենզինի ծախսի վերաբերյալ ամսական հաշվետվությունները կազմելիս բենզինի քանակության թիվը համաձայնեցնի Արա Լևոնյանի հետ, այլ ոչ թե նշի փաստացի ստացված բենզինի քանակը: Դրանից հետո Արա Լևոնյանն իրեն ամսական տրամադրել է 34.000 լիտր բենզինի կտրոն, որից 4.000 լիտրն ինքը պահել է 2-րդ գումարտակի ավտոմեքենաների համար, իսկ 30.000 լիտրը բաշխել է 6 վաշտերի միջև: Հիմնականում վաշտերի հրամանատարներն իրենից ստացել են ամսական 5.000-ական լիտր բենզինի կտրոն, սակայն երբեմն վաշտերից մեկին մի քանի հարյուր լիտրով ավել կամ պակաս բենզին է տրվել` մյուսների հաշվին: Ինքն Արա Լևոնյանից բենզինի կտրոններն ստացել է ամսական 2 փուլով` ամսվա սկզբին և կեսին` յուրաքանչյուր դեպքում 17.000 լիտր: Ինքը վաշտերի հրամանատարներին բենզինի կտրոնները նույնպես բաշխել 2 փուլով: 2010 թվականի նոյեմբեր-դեկտեմբեր ամիսներին ինքն Արա Լևոնյանից ստացել է ևս 10.000 լիտր բենզինի կտրոն, որը համաչափ, այսինքն` 5.000-ական լիտրով յուրաքանչյուր ամիս բաշխել է վաշտերի միջև: Դա պայմանավորված է եղել 2010 թվականի աշնանային զորակոչով: 2011 թվականի հունվար-ապրիլ ամիսներին ինքն Արա Լևոնյանից ստացել է ամսական 31.900 լիտր բենզինի կտրոն: Այդ ամիսներին կտրոնները տրամադրվել են ամսվա կտրվածքով երեք փուլով` 16.900, 7.000 և 8.000 լիտր: Բենզինի քանակությունը նվազեցնելուց հետո ինքը դարձյալ Արա Լևոնյանից հետաքրքրվել է, թե ինչն է պատճառը, իսկ նա պատասխանել է, որ ՀՀ ոստիկանությունից ստացվող բենզինի քանակությունը պակասել է: 2011 թվականի մայիս-հունիս ամիսներին ինքը ստացել է 38.900-ական լիտր բենզին` կապված գարնանային զորակոչի ուղեկցումների հետ: Նշած ամիսներին բենզինն ստացել է արդեն 4 փուլով`16.900, 4.000, 8.000 և 8.000 լիտր: Այդպիսով` 2009 թվականի հունվար-դեկտեմբեր ամիսներին ինքը փաստացի ստացել է 408.000 լիտր բենզինի կտրոն, 2010 թվականի հունվար-դեկտեմբեր ամիսներին` 418.000 լիտր բենզինի կտրոն, 2011 թվականի հունվար-հուլիս ամիսներին` 127.600 լիտր բենզինի կտրոն, 2011 թվականի մայիս-հունիս ամիսներին` 77.800 լիտր բենզինի կտրոն, իսկ 2011 թվականի հուլիսին` 32.900 լիտր բենզինի կտրոն: Այսինքն 2011 թվականի հունվար-հուլիս ամիսներին ինքը Արա Լևոնյանից ստացել է 238.900 լիտր բենզինի կտրոն: Ինքը չի կարող ասել, թե հիշյալ ամիսներին կոնկրետ որքան բենզին է դուրս գրվել 2-րդ գումարտակի կարիքների համար, սակայն այդ թվերը հստակ արտացոլվել են բենզինի ծախսի վերաբերյալ կազմված ամսական հաշվետվություններում:
Նախնական քննության ընթացքում` 2011 թվականի սեպտեմբերի 13-ին, ամբաստանյալ Ստեփան Կարախանյանը, որպես վկա, ցուցմունք է տվել այն մասին, որ 2011 թվականի հունվարից մինչև հուլիս ընկած ժամանակահատվածում, որպես 2-րդ գումարտակի հրամանատար, Արա Լևոնյանից փաստացի ստացել է 31.900 լիտր բենզին` յուրաքանչյուր ամիս 3 փուլով` 16.900 լիտր, 7.000 լիտր, 8.000 լիտր: Միայն 2011 թվականի մայիսին և հունիս ամիսներին, այսինքն` զորակոչերի ժամանակահատվածում, նշած յուրաքանչյուր ամսին հավելյալ ստացել է 6.000 լիտր բենզին` զինակոչիկների ուղեկցման համար: Արա Լևոնյանի կողմից ամսվա կտրվածքով ներկայացված բենզինների քանակը չի համապատասխանում իրականությանը: Ինքը պնդում, որ 2011 թվականի հունվարից մինչև հուլիսն ընկած ժամանակահատվածում յուրաքանչյուր ամիս 2-րդ գումարտակին Արա Լևոնյանի կողմից փաստացի հատկացվել է 31.900 լիտր բենզին:
Նախնական քննության ընթացքում` 2011 թվականի հոկտեմբերի 20-ին, ամբաստանյալ Ստեփան Կարախանյանը, որպես վկա, ցուցմունք է տվել այն մասին, որ իր անվամբ տրանսպորտային միջոց գրանցված չէ: Իր որդին` Արմեն Կարախանյանն ունի «Մերսեդես-180» մակնիշի 50ԼԼ050 պետհամարանիշի և «ՎԱԶ-2121» մակնիշի 50PP050 պետհամարանիշի ավտոմեքենաներ, իսկ դուստրը` Հայկանուշ Կարախանյանը` «Մերսեդես» մակնիշի 50DD050 պետհամարանիշի ավտոմեքենա: Իր ընտանիքի անդամներն այլ տրանսպորտային միջոցներ չունեն: Յուրաքանչյուր ամիս Արա Լևոնյանից 2-րդ գումարտակի համար հատկացված բենզինի կտրոնների մի մասն ինքը բաժանել է գումարտակի հրամանատարական կազմի միջև, որն ամսվա կտրվածքով կազմել է 2.000-4.000-ական լիտր, իսկ մնացած բենզինն ամբողջությամբ բաժանել է 2-րդ գումարտակի 6 վաշտերի հրամանատարներին: Զորակոչային ամիսներին ինքը 6 վաշտերի հրամանատարներին հավելյալ բենզին է հատկացրել: Ուսումնասիրելով 2-րդ գումարտկի 6 վաշտերի հրամանատարների ցուցմունքների հիման վրա կազմված` 2009-2011 թվականներին վերջինների ղեկավարած ստորաբաժնումներին իր կողմից փաստացի հատկացված բենզինի քանակության վերաբերյալ աղյուսակը, հայտնել է հետևյալը. 1-ին վաշտի նախկին հրամանատար Ստեփան Սեդրակյանի հայտնած տեղեկությունները, թե իբրև ամսական նրան փաստացի տվել է 3.100-ական, իսկ զորակոչային ամիսներին` 4.100-ական լիտր բենզին, միանշանակ չեն համապատասխանում իրականությանը: Ամենաշատ ծառայողական ավտոմեքենաները հաշվառված են եղել 1-ին և 2-րդ վաշտերում և ամսական 3.100 լիտր բենզինով հնարավոր չէր կազմակերպել ծառայությունը: Եթե ինքը Ստեփան Սեդրակյանին ամսական տվել է 3.000-ական լիտր, ապա ինչու նրան փոխարինող Յուրա Հովհաննիսյանին պետք է ամսական 6.000 լիտր բենզին հատկացներ: Ինքը հստակ կարող է ասել, որ 2-րդ գումարտակի 1-ին և 2-րդ վաշտերի հրամանատարներին ամսական հատկացրել է 6.000-ական լիտր բենզին: Միանշանակ համաձայն չէ միայն Ստեփան Սեդրակյանի և Արմեն Կարապետյանի հայտնած տեղեկությունների հետ: Դեռ ավելին, 1-ին և 2-րդ վաշտերում հաշվառված են գրեթե նույն քանակությամբ ծառայողական ավտոմեքենաներ և նույն 6.000 լիտրը, որն ինքը հատկացրել է 1-ին վաշտի հրամանատարին, հատկացրել է նաև 2-րդ վաշտի հրամանատար Արմեն Կարապետյանին: 2011 թվականի օգոստոսին ինքն Արա Լևոնյանից 2 փուլով ստացել է 16.000 լիտր բենզին, որից 400 լիտրն ինքը պարտք է մնացած եղել նախորդ ամսվանից և ստանալու պահին այն վերադարձրել է նրան: Ինքը 2.000-ական լիտր բաժանել է 6 վաշտերի հրամանատարներին, բենզինի մի մասը լիցքավորել է իր ծառայողական ավտոմեքենան, իսկ 2011 թվականի օգոստոսի 10-ին` աշխատանքից ազատվելու օրը, մնացած 950 լիտրը հանձնել է իր տեղակալ Դավիթ Ավագյանին: Հրամանատարական կազմի միջև բենզինը բաժանել է 250-ական լիտրով: Ինքը որոշակի քանակությամբ բենզինի կտրոններ տվել է իր որդուն` Արմենին և դստերը` Հայկանուշին` նրանց անձնական ավտոմեքենաների շահագործման համար, սակայն չի հիշում դրանց քանակը: Հնարավոր է, որ իր ծանոթներին, աշխատակիցներին, ծառայողներին նույնպես բենզինի կտրոններ տված լինի, սակայն չի հիշում, թե կոնկրետ ում և ինչ քանակությամբ: Իր ծառայությունը կրել է կանոնակարգված բնույթ, այսինքն` ՀՀ տարբեր մարզերում 2-րդ գումարտակի աշխատակիցների ծառայություններն ստուգելու, ՀՀ ղեկավար մարնինների, ինչպես նաև արտերկրներից ժամանած պատվիրակությունների ուղեկցումները կազմակերպելու համար ինքը հաճախ մեկնել է ՀՀ տարբեր մարզեր, ինչպես նաև բենզինի պակասության պայմաններում Արա Լևոնյանից ստացած բենզինի մի մասը պահել է իր մոտ և չի բաժանել ենթականների միջև` չնախատեսված դեպքերի և ծանոթներին լավություն անելու, ընտանիքի անդամների ավտոմեքենաները լիցքավորելու համար:
Նախնական քննության ընթացքում` 2011 թվականի նոյեմբերի 1-ին, ամբաստանյալ Ստեփան Կարախանյանը, որպես վկա, ցուցմունք է տվել այն մասին, որ 2-րդ գումարտակի հրամանատարի պաշտոնում աշխատելու ընթացքում հստակ հաշվարկներ չկատարելու պայմաններում չի կարողացել միանգամից վերհիշել, թե որ վաշտի հրամանատարին փաստացի ինչ քանակությամբ բենզին է հատկացրել: Ինչ վերաբերում է Ստեփան Սեդրակյանի և Արմեն Կարապետյանի հայտնած տեղեկություններին, որ 2009-2011 թվականների զորակոչային` մայիս, հունիս, նոյեմբեր և դեկտեմբեր ամիսներին վերջիններին տրամադրել է ամսական 6.000-ական լիտր բենզինի կտրոններ, իսկ մնացած ամիսներին` 5.000-ական լիտր, ապա դրա դեմ չի առարկում, և ըստ էության համաձայն է Ստեփան Սեդրակյանի և Արմեն Կարապետյանի հայտնած տեղեկությունների հետ:
Նախնական քննության ընթացքում` 2011 թվականի նոյեմբերի 11-ին, ամբաստանյալ Ստեփան Կարախանյանը, որպես մեղադրյալ, ցուցմունք է տվել այն մասին, որ 2009 թվականի հունվարին իրեն աշխատասենյակ է կանչել ՃՈ պետ Մարգար Օհանյանը և հանձնարարել ու տեղյակ պահել, որ դրանից հետո 2-րդ գումարտակի համար նախատեսված բենզինն ամբողջությամբ չեն ստանալու, այլ ՃՈ տնտեսական բաժանմունքի պետ Արա Լևոնյանն ամեն ամիս կատարելու է պահումներ: Մարգար Օհանյանը հանձնարարել է, որպեսզի բենզինի բաշխման, հատկացման և ծախսի վերաբերյալ փաստաթղթերում այնպես ձևակերպվի, որ բենզինի պակասորդը չերևա: Ենթարկվելով նրա հանձնարարությանը` դրանից հետո` 2009 թվականի հունվարից մինչև 2011 թվականի հուլիսը, ամեն ամիս, Արա Լևոնյանից բենզինի կտրոն ստանալիս փաստացի ստացել է մի քանի տոննայով պակաս, քան ձևակերպված է եղել բաշխման քարտերով, սակայն ստորագրել է բենզինի ավել քանակության դիմաց: Մասնավորապես` 2009 թվականի հունվարից մինչև 2010 թվականի հոկտեմբերն Արա Լևոնյանն ամեն ամիս փաստացի իրեն տվել է 34.000 լիտր բենզինի կտրոն, 2010 թվականի նոյեմեբեր-դեկտեմբեր ամիսներին` 39.000 լիտր, 2011 թվականի հունվար, փետրվար, մարտ, ապրիլ և հուլիս ամիսներին` 31.900 լիտր, իսկ 2011 թվականի մայիս, հունիս ամիսներին` 37.900-ական լիտր: Վերոհիշյալ մի քանի ամիսներին սովորականից ավել քանակության բենզին ստանալը պայմանավորված է եղել զորակոչային ուղեկցումներով: Մարգար Օհանյանից բացի, Արա Լևոնանն իրեն ասել է, որ փաստաթղթերում ձևակերպված քանակությունից 2-րդ գումարտակին պակաս բենզին է տրամադրում Մարգար Օհանյանի հանձնարարությամբ: Յուրաքանչյուր ամիս բենզինի քիչ քանակություն ստանալով` ինքը, բնականաբար, իր ենթակա 6 վաշտերի հրամանատարներին հատկացրել է քիչ քանակությամբ բենզին, քան ձևակերպված է եղել բենզինի բաշխման քարտերով: Երբ 2-րդ գումարտակի վաշտերի հրամանատարներն իրենից հետաքրքրվել են, թե ինչն է քարտերում ձևակերպվածից պակաս քանակությամբ բենզին ստանալու պատճառը, ինքը պատասխանել է, որ այդքան են հատկացրել, քանի որ ՃՈ-ն ունի բազմաթիվ խնդիրներ, չնախատեսված ծախսեր, ծառայություններ, ուղեկցումներ, իսկ փաստաթղթերում ավել քանակությամբ բենզին է նշվում, որպեսզի կարողանան ծառայողական ավտոմեքենաների իրական վազք ձևակերպել ու ժամանակին անվադողեր, մարտկոցներ ստանալ: Ինքը որևէ մեկին, այդ թվում` նաև իր վաշտերի հրամանատարերին, գումարտակի աշխատակիցներին չի ասել պակաս բենզին տալու իրական պատճառը: Քանի որ բենզինը փաստացի պակաս է տրամադրվել վաշտերի հրամանատարներին, սակայն դուրսգրման քարտերում ավել քանակությամբ բենզին է ձևակերպվել, ինքը բոլոր 6 վաշտերի հրամանատարներին հանձնարարել է, որպեսզի բենզինի ծախսերի վերաբերյալ ամսական հաշվետվություններում ձևակերպեն և որպես ելակետային տվյալ ընդունեն ոչ թե փաստացի ստացած բենզինի քանակությունը, այլ քարտերում նշված ավել քանակությունը, և ավել թվով կազմեն իրենց ենթականերին բաշխված և ծախսած բենզինի վերաբերյալ ամսական հաշվետվությունները: Իր աշխատած ժամանակահատվածում 2-րդ գումարտակում բենզինի բաշխման քարտերը լրացրել և ամսական հաշվետվությունները հավաքագրել է ավագ տեսուչ Հովիկ Ծառուկյանը, սակայն բենզինի կտրոնները վաշտերի հրամանատարներին, ինչպես նաև 2-րդ գումարտակի վարչական անձնակազմին բաժանել է անձամբ ինքը: Հովիկ Ծառուկյանը կամ 2-րդ գումարտակի որևէ աշխատակից տեղյակ չեն եղել, թե իրականում վաշտերի հրամանատարներն ինչ քանակությամբ բենզին են ստացել: Ինքն ամեն ամիս Արա Լևոնյանից փաստացի ստացած բենզինից պահել է իր անձնական կարիքների և չնախատեսված դեպքերի համար, այսինքն` Արա Լևոնյանից ամսական ստացած բենզինի կտրոններն ամբողջյությամբ չի բաժանել իր ենթակա ստորաբաժանումների միջև: Ինչ վերաբերվում է իր կողմից բենզինի յուրացումներին, որի վերաբերյալ ինքը բազմիցս մանրամասն ցուցմունքներ է տվել, ապա այդ մասով նույնպես իրեն լիովին մեղավոր է ճանաչում և զղջում իր արարքի համար:
Դատական քննության ընթացքում ամբաստանյալ Արա Լևոնյանն առաջադրված մեղադրանքում իրեն մեղավոր ճանաչեց և օգտվելով իր իրավունքից` հրաժարվեց ցուցմունք տալ:
Նախնական քննության ընթացքում` 2011 թվականի օգոստոսի 28-ին, ամբաստանյալ Արա Լևոնյանը, որպես վկա, ցուցմունք է տվել այն մասին, որ 2006 թվականից զբաղեցնում է ՃՈ տնտեսական բաժանմունքի պետի պաշտոնը: ՃՈ պետ Մարգար Օհանյանի կողմից յուրաքանչյուր ամսվա սկզբին հաստատվել է տվյալ ամսվա համար նախատեսված վառելիքի բաշխման ցուցակը և սահմանված չափաքանակն ըստ ՃՈ 1-ին և 2-րդ սպայական գումարտակների, ուղեկցող վաշտի և վարչական ապարատի: Հիմք ընդունելով յուրաքանչյուր հաստատված չափաքանակ` ինքը բենզինը բախշել է կտրոններով: Վարչական ապարատի և ուղեկցող վաշտի կտրոնները կնքվել են տնտեսական բաժանմունքի կնիքով: ՃՈ 1-ին և 2-րդ սպայական գումարտակներին հատկացված բենզինի կտրոններն իր կողմից հատկացնելիս չեն կնքվել, այլ դրանք կնքել են գումարտակի և վաշտի հրամանատարները: Արտաբյուջետային միջոցներով ձեռք բերված բենզինը պահեստներից կամ իր մոտից ստացել են գումարտակի կամ ուղեկցող վաշտի հրամանատարները: Բենզինը ստացել են միայն իր կողմից ստորագրված ելքի կարգադրությամբ, որը ստորագրել է նաև ստացող հրամանատարը կամ գումարտակի ծառայության տեսուչը: Քարտում նշված և փաստացի ստացված բենզինի կտրոնների չափաքանակները մշտապես համապատասխանել են: Գումարտակների և ուղեկցող վաշտի հրամանատարները յուրաքանչյուր ամսվա վերջում ներկայացրել են հաշվետվություններ, որտեղ արտացոլված է եղել յուրաքանչյուր տրանսպորտային միջոցի վազքի և ծախսած բենզինի քանակը: Նրանց կողմից ամսական հաշվետվություններում նշված բենզինի ծավալի ընդհանուր քանակն իր մեջ ներառել է արդեն իսկ բյուջետային և արտաբյուջետային մասով ստացված բենզինը: Բյուջետային միջոցներով ձեռք բերված բենզինն իր կողմից տրամադրվել է բենզինի բաշխման քարտով, իսկ արտաբյուջետային միջոցներով ձեռք բերված բենզինը գումարտակի հրամանատարներն ստացել են պահեստից` ելքի կարգադրությամբ: 2011 թվականի ընթացքում 2-րդ գումարտակին հատկացվել է 457.770 լիտր «ռեգուլյար» տեսակի բենզինի կտրոն: 2011 թվականի հունվար-հուլիս ամիսների ընթացքում տարբեր չափաբաժիններով նշված քանակությունը կտրոնների տեսքով անձամբ տրամադրվել է 2-րդ գումարտակի հրամանատար Ստեփան Կարախանյանին, իսկ ստացման ժամանակ Ստեփան Կարախանյանը ստորագրել է բենզինի բաշխման քարտում, իսկ արտաբյուջետային միջոցներով ձեռք բերված բենզինը պահեստից ստացել է անձամբ ելքի կարգադրությունը ստորագրելով: Իր աշխատած ժամանակահատվածում չի եղել մի դեպք, որ Ստեփան Կարախանյանը փաստաթղթերում ձևակերպված քանակից պակաս բենզինի կտրոն ստանա: Ձեռք բերված բենզինը եղել է «ռեգուլյար» տեսակի, որի 1 լիտրը «Ֆլեշ» կազմակերպությունից ձեռք է բերվել 404 ՀՀ դրամով:
Նախնական քննության ընթացքում` 2011 թվականի օգոստոսի 29-ին, ամբաստանյալ Արա Լևոնյանը, որպես վկա, ցուցմունք է տվել այն մասին, որ 2010 թվականի հունվարին իրեն աշխատասենյակ է կանչել ՃՈ պետ Մարգար Օհանյանը և հանձնարարել, որ ինքն այդուհետ ՃՈ 1-ին և 2-րդ սպայական գումարտակների համար նախատեսված բենզինի կտրոններից յուրաքնչյուր ամիս նրան պետք է տա` ՃՈ 1-ին սպայական գումարտակի (այսուհետ` նաև 1-ին գումարտակ) համար նախատեսված բենզինից` 1.800 լիտր, իսկ 2-րդ գումարտակի բենզինից` 2.500 լիտր: Ինքը հարցրել է, թե պակաս տալու դեպքում ինչ պատասխան պետք է տա գումարտակի հրամանատարներին, իսկ Մարգար Օհանյանն ասել է, որ նրանք տեղյակ են և ավելորդ հարցեր չեն տա: Մարգար Օհանյանը նաև ասել է, որ բենզինի կտրոնները, որն ինքը պետք է տար նրան, նա նաև պետք է տա «վերևներին», բայց չի ասել թե կոնկրետ ում, իսկ ինքը չի համարձակվել հարցնել: Այդ խոսակցությունից հետո, Մարգար Օհանյանի ցուցումի համաձայն, 2010 թվականի հունվար-հունիս ամիսների ընթացքում յուրաքանչյուր ամիս ինքը Մարգար Օհանյանին տվել է 4.300 լիտր բենզինի կտրոն: 2010 թվականի հուլիսից սկսած մինչև 2011 թվականի հուլիսը ներառյալ յուրաքանչյուր ամիս ինքը Մարգար Օհանյանին տվել է 8.000 լիտր բենզինի կտրոն: Ավել տալու պատճառը եղել է այն, որ 2010 թվականի հուլիսից սկսած ՃՈ-ի համար նախատեսված բենզինի չափաքանակը ավելացել է: Այդ ժամանակ Մարգար Օհանյանը կանչել է իրեն և ասել, որ դրանից հետո յուրաքանչյուր ամիս ինքը նրան պետք է տա ոչ թե 4.300 լիտր, այլ 7.800 լիտր: Մասնավորապես` Մարգար Օհանյանն իրեն հանձնարարել է 1-ին գումարտակի բենզինի քանակը կրճատել 2.800 լիտրով իսկ 2-րդ գումարտակի բենզինը` 5.000 լիտրով: Ինքը կրկին Մարգար Օհանյանից հետաքրքրվել է, թե գումարտակի հրամանատարները տեղյակ են այդ մասին, իսկ նա պատասխանել է, որ տեղյակ են: Դրանից հետո` 2010 թվականի հուլիսից մինչև 2011 թվականի հուլիսը, յուրաքանչյուր ամիս ինքն անձամբ Մարգար Օհանյանի աշխատասենյակում նրան է տվել 7.800 լիտր բենզինի կտրոն, որի վրա դրված է եղել ՃՈ տնտեսկան բաժանմունքի կնիքը: Մարգար Օհանյանին բենզինի կտրոններ տալուց որևէ փաստաթուղթ չի լրացվել, քանի որ դրանք փաստաթղթերով արդեն իսկ ձևակերպված են եղել 1-ին և 2-րդ գումարտակների վրա, և ըստ էության` ինքն այդ կտրոնները Մարգար Օհանյանին տվել է առանց որևէ հիմքի, ուղղակի նրա ցուցումի համաձայն, որն ինքը պարտադիր է համարել կատարման համար, քանի որ չէր կարող հակադրվել կամ հակաճառել իր անմիջական ղեկավարին: Յուրաքանչյուր անգամ երբ ինքը Մարգար Օհանյանին տվել է բենզինի կտրոնները, առանձին թղթի վրա նշել է, թե որ գումարտակից որքան բենզին է պահել, ինչպես նաև նշել է այդ թվերի գումարը, այսինքն` բենզինի կտրոնների ընդհանուր քանակը: Գումարտակի հրամանատարներն իրենից չեն հետաքրքրվել, թե ինչու է ինքը նրանց պակաս քանակության բենզին տրամադրում, ինչից ինքը համոզվել է, որ Մարգար Օհանյանը, իրոք, այդ մասին տեղյակ է պահել նաև նրանց: 2010 թվականի հունվարից մինչև 2011 թվականի հուլիսն ինքը ՃՈ պետ Մարգար Օհանյանի բանավոր պահանջով նրան տվել է ընդհանուր 119.400 լիտր բենզինի կտրոն, որը որպես ծախս ձևակերպել է 1-ին և 2-րդ գումարտակների վրա:
Նախնական քննության ընթացքում` 2011 թվականի սեպտեմբերի 1-ին, ամբաստանյալ Արա Լևոնյանը, որպես վկա, ցուցմունք է տվել այն մասին, որ ՃՈ պետ Մարգար Օհանյանն իրեն կանչել է ոչ թե 2010 թվականի հունվարին, այլ 2009 թվականի հունվարին և հանձնարարել, որպեսզի 1-ին և 2-րդ գումարտակների համար նախատեսված բենզինի կտրոններից 1-ին գումարտակի համար նախատեսված բենզինի կտրոններից ինքը նրան դեռևս բենզինի կտրոններ չհատկացնի, իսկ 2-դ գումարտակի բենզինի կտրոններից յուրաքանչյուր ամիս նրան տա 8.000 լիտր բենզինի կտրոն: Ինքը Մարգար Օհանյանին հարցրել է, թե նման պակասորդի պայմաններում ինչ պատասխան պետք է տա 2-րդ գումարտակի հրամանատար Ստեփան Կարախանյանին, իսկ Մարգար Օհանյանը պատասխանել է, որ Ստեփան Կարախանյանը տեղյակ է այդ մասին և ավելորդ հարցեր չի տա: Մարգար Օհանյանը նաև ասել է, որ բենզինի կտրոնները, որն ինքը պետք է տար նրան, նա պետք է տա «վերևներին», սակայն չի ասել կոնկրետ ում և ինչ նպատակով, իսկ ինքը չի համարձակվել ավելորդ հարցեր տալ: Այդ խոսակցությունը տեղի է ունեցել Մարգար Օհանյանի աշխատասենյակում, որին որևէ այլ անձ ներկա չի եղել: Այդ խոսակցություններից հետո, Մարգար Օհանյանի ցուցումի համաձայն, ինքը 2-րդ գումարտակի համար նախատեսված 41.800 լիտր բենզինի ամսական չափաքանակից հատկացրել է 33.800 լիտր բենզինի կտրոն, իսկ տարբերություն կազմող 8.000 լիտր «ռեգուլյար» տեսակի բենզինի կտրոնները 2009 թվականի հունվարից սկսած Մարգար Օհանյանին աշխատասենյակում անձամբ տվել է նրան: 2009 թվականի հունվարից մինչև 2010 թվականի դեկտեմբերն ընկած ժամանակահատվածում ինքը 2-րդ գումարտակի հրամանատար Ստեփան Կարախանյանին յուրաքանչյուր ամիս տվել է 34.000-ական լիտր բենզին, իսկ փաստաթղթերում 34.000 լիտրից ավել ձևակերպված բենզինի կտրոններն ամբողջությամբ տվել է ՃՈ պետ Մարգար Օհանյանին: 2010 թվականի աշնանային զորակոչի հետ կապված` նոյեմբեր-դեկտեմբեր ամիսներին ինքը Ստեփան Կարախանյանին յուրաքանչյուր ամիս տվել է 5.000 լիտր հավելյալ բենզին: 2011 թվականի հունվարից միչև ապրիլն ընկած ժամանակահատվծում ինքը Ստեփան Կարախանյանին յուրաքանչյուր ամիս տվել է 40.800 լիտր բենզին, որոնք բաղկացած են եղել 3 մասերից` 16.900 լիտր, 16.900 լիտր և 7.000 լիտր: 2011 թվականի մայիս-հունիս ամիսներին ինքը Ստեփան Կարախանյանին ամսական տվել է 53.900 լիտր բենզինի կտրոն, որը յուրաքանչյուր ամիս բաղկացացած է եղել 6 փուլերից` 16.900 լիտր, 8.000 լիտր, 8.000 լիտր, 8.000 լիտր, 7.000 լիտր և 6.000 լիտր: Վերջին 6.000 լիտրը մայիս-հունիս ամիսներին հատկացվել է գարնանային զորակոչի համար: 2011 թվականի հուլիսին ինքը Ստեփան Կարախանյանին փաստացի տվել է 44.900 լիտր բենզինի կտրոն, որը բաղկացած է եղել հետևյալ մասերից` 16.900 լիտր, 8.000 լիտր, 8.000 լիտր, 7.000 լիտր և 5.000 լիտր: Վերջին 5.000 լիտրը տրամադրվել է զեկուցագրով` ամառային ճամբարներ մեկնող երեխաների համար: Այդպիսով 2009 թվականին ինքը Ստեփան Կարախանյանին փաստացի տվել է 408.000 լիտր բենզինի կտրոն, 2010 թվականին` 418.000 լիտր բենզինի կտրոն, 2011 թվականի հունվար-ապրիլ ամիսներին` 163.200 լիտր բենզինի կտրոն, 2011 թվականի մայիս-հունիս ամիսներին` 107.800 լիտր բենզինի կտրոն, իսկ 2011 թվականի հուլիսին` 44.900 լիտր բենզինի կտրոն: 2009 թվականի հունվարից մինչև 2011 թվականի հուլիսն ընկած ժամանակահատվածում ինքը Ստեփան Կարախանյանին փաստացի տվել է 1.141.900 լիտր բենզինի կտրոն, իսկ նշված ժամանակահատվածում 2-րդ գումարտակի համար նախատեսված է եղել 1.521.520 լիտր բենզին: Այդպիսով 2009 թվականից մինչև 2011 թվականի հուլիսը 2-րդ գումարտակի համար նախատեսված բենզինի քանակությունից ինքը Մարգար Օհանյանին տվել է 379.620 լիտր բենզինի կտրոն: 2009 թվականի մարտից մինչև 2010 թվականի դեկտեմբերը ինքը 1-ին գումարտակին ամսական փաստացի տվել է 27.500 լիտր բենզին, այսիքն` ընդհանուր 605.000 լիտր բենզինի կտրոն: 2011 թվականի հունվար-ապրիլ ամիսներին 1-ին գումարտակին ամսական տրամադրվել է 23.000 լիտր բենզին, իսկ 2011 թվականի մայիս-հուլիս ամիսներին փաստացի ամսական տրամադրվել է 28.000 լիտր բենզին: 2009 թվականի հունվարից մինչև 2011 թվականի հուլիսը 1-ին գումարտակին ընդհանուր առմամբ փաստացի տրամադրվել է 845.000 լիտր բենզինի կտրոն` նախատեսված 959.200 լիտրի փոխարեն, իսկ տարբերությունը կազմող 114.200 լիտր բենզինի կտրոնն ինքը դարձյալ անձամբ հանձնել է ՃՈ պետ Մարգար Օհանյանին: Այդպիսով 2009 թվականի հունվարից մինչև 2011 թվականի հուլիսն ընկած ժամանակահատվածում 1-ին և 2-րդ գումարտակների համար նախատեսված և բյուջեից գնված բենզինից ինքը Մարգար Օհանյանին տվել է 493.820 լիտր բենզինի կտրոն:
Նախնական քննության ընթացքում` 2011 թվականի սեպտեմբերի 17-ին, ամբաստանյալ Արա Լևոնյանը, որպես վկա, ցուցմունք է տվել այն մասին, որ մինչև 2011 թվականի օգոստոսի 10-ը 2-րդ գումարտակին հասանելք ընդհանուր 16.000 լիտր բենզինը երկու փուլով ստացել է Ստեփան Կարախանյանը, սակայն փաստացի տրված 16.000 լիտր բենզինի փոխարեն հաշվառման քարտում ստորագրվել է 25.350 լիտրի դիմաց: Ստեփան Կարախանյանի պաշտոնանկությունից հետո 2-րդ գումարտակի հարամանատարի տեղակալ Դավիթ Ավագյանի հետ կատարած հաշվարկների արդյունքում պարզվել է, որ մինչև օգոստոսի 10-ը փաստացի ստացած 16.000 լիտր բենզինից Ստեփան Կարախանյանը 6 վաշտերի հրամանատարներին բաժանել է 2.000-ական լիտր, իսկ Դավիթ Ավագյանին հատկացրել է 950 լիտր բենզինի կտրոն: Ինքը Դավիթ Ավագյանին վստահեցրել է, որ 16.000 լիտր բենզինի կտրոնները տվել է Ստեփան Կարախանյանին, ով պետք է ներկայացներ դրա պակասորդը` 3.050 լիտր բենզինի կտրոնները: Դավիթ Ավագյանը հայտնել է, որ նրան չի հետաքրքրում Ստեփան Կարախանյանի և իր հարաբերությունները, պետք է լրացվի ամսվա հաշվետվություններով նախատեսված 2-րդ գումարտակին հատկացվելիք 66.750 լիտր բենզինի քանակը, քանի որ պակաս բենզինի պայմաններում նրանք հաշվետվություն չեն ստորագրի: Որպեսզի 2-րդ գումարտակի բենզինի հաշվետվությունները պակաս չերևան, վախենալով դրա հետևանքներից` ինքը դիմել է Մարգար Օհանյանին և ասել, որ 2-րդ գումարտակն ամբողջությամբ պահանջում է գումարտակին հասանելիք բենզինը: Մարգար Օհանյանը կարգադրել է, որպեսզի 25.350 լիտր բենզինից պահված 9.350 լիտր բենզինին ավելացվի 3.050 լիտր և տրվի 2-րդ գումարտակին, որպեսզի Ստեփան Կարախանյանի անունը չշոշափվի, և այդ կապակցությամբ աղմուկ չբարձրանա: Այդ ժամանակ ինքը դիմել է «Ֆլեշ» ՍՊ ընկերության գործադիր տնօրեն Յաշա Խաչատրյանին և խնդրել իրեն պարտքով հատկացնել 3.050 լիտր բենզինի կտրոն` հետագայում այն մարելու պայմանով: Ինքն այդ կտրոնները 9.350 լիտր բենզինի կտրոնների հետ միասին (այսինքն` ընդհանուր 12.400 լիտր) տվել է 2-րդ գումարտակին: Հետևապես օգոստոս ամսվա դրությամբ 2-րդ գումարտակին հատկացված բենզինի փաստացի քանակը եղել 3.050 լիտրով ավել, քան նախատեսված է եղել հաշվետվությամբ: Ինքը «Ֆլեշ» ՍՊ ընկերությունից 3.050 լիտր բենզինը պարտք է վերցրել Մարգար Օհանյանի կարգադրությամբ` այն ակնկալիքով, որ Ստեփան Կարախանյանը նույն քանակի բենզինի կտրոններ կներկայացնի կամ այդ հարցը նա կլուծի:
Նախնական քննության ընթացքում` 2011 թվականի հոկտեմբերի 3-ին, ամբաստանյալ Արա Լևոնյանը, որպես վկա, ցուցմունք է տվել այն մասին, որ 2011 թվականի հունվար-հուլիս ամիսներին 2-րդ գումարտակի հրամանատար Ստեփան Կարախանյանին ամսական փաստացի տվել է 31.900 լիտր բենզին, իսկ 2011 թվականի մայիս-հունիս ամիսներին, զորակոչային ուղեկցումները կազմակերպելու համար, տվել է հավելյալ 6.000 լիտր բենզին: Այսինքն` 2011 թվականի մայիս-հունիս ամիսներին ինքը Ստեփան Կարախանյանին տվել է 37.900 լիտր բենզին: Այդպիսով 2011 թվականի հունվար-հուլիս ամիսներին ինքը Ստեփան Կարախանյանին փաստացի տվել է 235.300 լիտր բենզին: Ինքը բենզինը 1-ին և 2-րդ գումարտակներին փաստացի պակաս է տվել ոչ թե ինքնագլուխ, այլ ՃՈ պետ Մարգար Օհանյանի բանավոր հանձնարարությամբ, ով իրեն կոնկրետ ցուցումներ է տվել, որպեսզի գումարտակներին փաստացի քիչ քանակությամբ բենզին տա: Ինքը մնացորդը յուրաքանչյուր ամիս կտրոնների տեսքով տվել է Մարգար Օհանյանին: 2009 թվականի հունվարից մինչև 2011 թվականի հուլիսն ընկած ժամանակահատվածում 1-ին և 2-րդ գումարտակների համար նախատեսված բենզինից ինքը Մարգար Օհանյանի հանձնարարությամբ հիշյալ ստորաբաժանումներին չի հատկացրել 574.420 լիտր բենզին, որն ամբողջությամբ տվել է Մարգար Օհանյանին:
Նախնական քննության ընթացքում` 2011 թվականի նոյեմբերի 7-ին, ամբաստանյալ Արա Լևոնյանը, որպես վկա, ցուցմունք է տվել այն մասին, որ 2009 թվականի հունվարից մինչև 2010 թվականի մայիսը ՃՈ-ն բենզին է ստացել ամսական 2 անգամ` ամսվա սկզբին և կեսին: Յուրաքանչյուր անգամ ՃՈ պետ Մարգար Օհանյանը լիազորագիր է տվել ՃՈ տնտեսական բաժանմունքի ավագ տեսուչ Եփրեմ Ստեփանյանին, ով հիշյալ լիազորագրի հիման վրա ՀՀ ոստիկանության ավտոտնտեսությունից ելքի կարգադրություններով ստացել է բենզինի կտրոնները և դրանք ներկայացրել իրեն: ՃՈ հաշվապահությունում բենզինի կտրոնները ձևակերպվել են մուտքի կարգադրություններով: ՀՀ ոստիկանության ավտոտնտեսությունից բենզինի կտրոնները դուրս են գրվել ավտոտնտեսության պետ Հովսեփ Մակարյանի կողմից, ով հաշվապահի և պահեստապետի հետ ստորագրել է ելքի կարգադրություններում: Այնուհետև, համաձայն ՃՈ պետի կողմից յուրաքանչյուր ամիս կազմված և հաստատված բենզինի բաշխման չափաքանակի, բենզինի բաշխման քարտերով ինքն անձամբ բենզինի կտրոնները բաժանել է 1-ին և 2-րդ գումարտակների, ուղեկցող վաշտի և ՃՈ վարչական ապարատի միջև: 1-ին գումարտակի համար հատկացված բենզինի կտրոններն ստացել է Սամվել Մախմուրյանը, սակայն բենզինի բաշխման քարտերում ստորագրել են 1-ին գումարտակի հրամանատարներ Արսեն Արշակյանն ու Արսեն Մարդոյանը: Դա արվել է Մարգար Օհանյանի հանձնարարությամբ: 2-րդ գումարտակի համար նախատեսված բենզինի կտրոններն ստացել է գումարտակի հրամանատար Ստեփան Կարախանյանը, երբեմն նաև 2-րդ գումարտակի տեսուչներ Հովհաննես Ծառուկյանն ու Սերգեյ Մարտիրոսյանը: Ուղեկցող վաշտի բենզինը մշտապես ստացել է վաշտի հրամանատար Արտակ Կարապետյանը, իսկ վարչական ապարատի համար նախատեսված բենզինն ինքը քարտով բաց է թողել Եփրեմ Ստեփանյանին, ով դարձյալ քարտերով այն բաշխել է համապատասխան աշխատակիցներին: Ուղեկցող վաշտը և վարչական ապարատը նախատեսված բենզինը ստացել են ամբողջությամբ` առանց պահումների, իսկ 1-ին և 2-րդ գումարտակներին ինքը, Մարգար Օհանյանի հանձնարարությամբ, փաստացի տվել է քիչ քանակությամբ բենզին, քան նախատեսված է եղել բենզինի ամսական չափաքանակով: Յուրաքանչյուր ամսվա վերջում 1-ին գումարտակը ներկայացրել է բենզինի ծախսի և ավտոմեքենաների վազքի վերաբերյալ հաշվետվություն, որը փաստացի կազմել է Սամվել Մախմուրյանը, սակայն այն ստորագրել է 1-ին գումարտակի հրամանատարը: Ընդ որում` ամսվա ծախսի հաշվետվություններում նշվել է, թե իբր ծախսվել է քարտերով դուրս գրված բենզինի ողջ քանակությունը, այլ ոչ թե փաստացի հատկացված քիչ քանակությամբ բենզինը: Դա արվել է, որպեսզի փաստաթղթերով որպես ծախս ձևակերպվեր բենզինի այն քանակությունը, որն ինքը փաստացի տվել է Մարգար Օհանյանին: 2-րդ գումարտակը յուրաքանչյուր ամսվա վերջում առանձին-առանձին ներկայացրել է 6 վաշտերի և սպայական կազմի բենզինի ծախսի և ավտոմեքենաների վազքի վերաբերյալ հաշվետվություններ, ինչպես նաև դրանց հիման վրա կազմված` գումարտակի հաշվեկշռում գտնվող տրանսպորտային միջոցների բենզինի ծախսի և վազքի վերաբերյալ ամփոփ հաշվետվություն: Ամփոփ հաշվետվությունը ստորագրվել է գումարտակի հրամանատարի կողմից: Յուրաքանչյուր ամսվա վերջում համապատասխան հաշվետվություններ են ներկայացվել նաև ուղեկցող վաշտի ու ՃՈ վարչական ապարատի կողմից: Ամսական հաշվետվությունները հանձնվել են ՃՈ տնտեսական բաժանմունք, որոնցով զբաղվել է ինժեներ-մեխանիկ Մարատ Ավետիսյանը: Հաշվետվություններն ստանալուց հետո Մարատ Ավետիսյանը կազմել է ՃՈ ավտոմեքենաների բենզինի ընդհանուր ծախսի վերաբերյալ տեղեկանք, որը ՃՈ ստորաբաժանումների կողմից ներկայացված բենզինի ծախսի վերաբերյալ հաշվետվությունների պատճենների հետ միասին ուղարկվել է ՀՀ ոստիկանության ավտոտնտեսություն: Նշված հաշվետվությունների մեկական օրինակները բենզինի մուտքի, ծախսի և մնացորդի վերաբերյալ ամփոփ տեղեկանքի հետ միասին ուղղարկվել է նաև ՃՈ ֆինանսական բաժանմունք: 2010 թվականի մայիսից հետո ՃՈ-ն սկսել է բենզին ձեռք բերել նաև ՃՈ արտբյուջետային միջոցների հաշվին: Սկզբնական շրջանում` 2010 թվականին, մատակարարող կազմակերպությունների հետ բենզինի գնման վերաբերյալ պայմանագիրը` ՃՈ-ի կողմից ներկայացված հայտերի և տեխնիկական բնութագրերի հիման վրա կնքել է «Պետական գնումների գործակալություն» ՊՈԱԿ-ը, իսկ 2011 թվականից բենզինի գնման պայմանագրերը կնքել է ՃՈ-ն է: Տվյալ դեպքում ՃՈ պետ Մարգար Օհանյանի կողմից տրված լիազորագրի հիման վրա Եփրեմ Ստեփանյանը մատակարարող կազմակերպությունից ստացել է բենզինի կտրոնները և դրանք մուտքի անդորրագրերով հանձնել պահեստ` Մարատ Ավետիսյանին: Բացի Մարգար Օհանյանի կողմից տրված լիազորագրից, կազմվել են նաև երկկողմանի հաշիվ-ապրանքագրեր և ընդունման-հանձման արձանագրություներ, որոնք կազմել են պայմանագրի անբաժանելի մասը: Հաշիվ-ապրանքագրերն ու ընդունման-հանձման արձանագրություններն ստորագրվել ու կնքվել են մատակարար կազմակերպության տնօրենի և ՃՈ պետ Մարգար Օհանյանի կողմից: Պահեստ մուտքագրվելուց հետո բենզինի կտրոնները պետք է բաշխվեին պահեստից` Մարատ Ավետիսյանի կողմից` ելքի անդորրագրերով: Սակայն ամսական 2 անգամ Մարատ Ավետիսյանը արտբյուջետային միջոցներով ձեռք բերված` տվյալ ամիս բաշխման ենթակա բենզինի կտրոններն ամբողջությամբ ներկայացրել է իրեն, որտեղից ինքը 1-ին, 2-րդ գումարտակների և ուղեկցող վաշտի միջև կատարել է համապատասխան բաշխումներ, իսկ կտրոնների մի մասը, Մարգար Օհանյանի հանձնարարությամբ, անձամբ հանձնել նրան: Պահեստից ստացած բենզինի կտրոնների վերաբերյալ յուրաքանչյուր անգամ կազմվել են ելքի կարգադրություններ, որոնցում 1-ին և 2-րդ գումարտակների հրամանատարները ստորագրել են բենզինի այն քանակության դիմաց, որն ըստ փաստաթղթերի նախատեսված է եղել բաշխել նրանց ենթակա գումարտակների միջև, սակայն իրականում ստացել են փաստաթղթերով արտացոլված քանակությունից քիչ բենզին: Նրանց փաստացի չտրամադրված բենզինի կտրոններն ինքն ամբողջությամբ հանձնել է Մարգար Օհանյանին: Դրանից հետո ինքն իր հերթին ստորագրել է ելքի կարգադրություններում և դրանք տվել Մարատ Ավետիսյանին: Ընդհանրապես ելքի կարգադրություններում ստորագրել են Մարատ Ավետիսյանը, բենզին ստացող ստորաբաժանման ղեկավարը և ինքը` որպես ՃՈ տնտեսական բաժանմունքի պետ: Բենզինի ծախսի վերաբերյալ ամսական հաշվետվությունները կազմվել են վերը նկարագրված եղանակով և դրանցում չի տարանջատվել, թե որ միջոցներով ձեռք բերված բենզինից են ստացել կամ ծախսել, այլ ուղղակի նշվել է ամսվա կտրվածքով տվյալ ստորաբաժանման ընդհանուր բենզինի ծախսն ու ավտոմեքենաների վազքը: Ընդհանրապես պահեստից դուրս գրվող բենզինը պետք է բաժաներ Մարատ Ավետիսյանը, բայց քանի որ ՃՈ պետ Մարգար Օհանյանին պետք չի եղել, որպեսզի նրա կողմից կատարվող յուրացումների մասին կողմնակի մարդիկ իմանան, նա իրեն հանձնարարել է, որպեսզի պահեստից դուրս գրվող բենզինի կտրոնների բաշխմամբ զբաղվի ինքը: Ինքն անձամբ Մարատ Ավետիսյանին երբեք չի ասել, որ Մարգար Օհանյանին բենզինի կտրոններ է տվել: Եղել են մի քանի դեպքեր, երբ Մարգար Օհանյանն իրեն հանձնարարել է բենզինի կտրոններ տալ նրան, և ինքն իր հերթին, առանց որևէ փաստաթղթի, դրանք վերցրել է Մարատ Ավետիսյանից: Երբ Մարատ Ավետիսյանը հարցրել է, թե ինչպես պետք է դա փաստաթղթավորվի և դուրս գրվի, ինքը պատասխանել է, որ դա արվում է Մարգար Օհանյանի հանձնարարությամբ: Հետագայում այդ բենզինի քանակությունը ներառվել է 1-ին և 2-րդ գումարտակներին հատկացված բենզինի քանակության մեջ, և նրանք այդ քանակով պակաս բենզին են ստացել, որպիսի եղանակով լրացվել և ձևակերպվել է Մարգար Օհանյանի վերցրած բենզինի կտրոնները: Փաստաթղթերով որևէ կերպ չի երևում, որ Մարգար Օհանյանը ՃՈ-ի համար նախատեսված բենզինից յուրացումներ է կատարել, քանի որ յուրաքանչյուր ամիս Մարգար Օհանյանի վերցրած բենզինի քանակությունը ձևակերպվել է 1-ին և 2-րդ գումարտակների վրա: Իրեն ամրակցված ավտոմեքենայի բենզինի չափաքանակն ամսական կազմել է 200 լիտր: Յուրաքանչյուր ամիս բենզին բաշխելիս 1-ին և 2-րդ գումարտակների հրամանատարները, լավության կարգով, իրեն թողել են 80-ական լիտր բենզին: Մարգար Օհանյանն իրեն ամսական տվել է 300-400 լիտր բենզինի կտրոն, երբ ինքը նրան է հանձնել է 1-ին և 2-րդ գումարտակների համար նախատեսված բենզինի կտրոնները: Այդպիսով, ամսական իր մոտ հավաքվել է մոտ 600-700 լիտր բենզինի կտրոն: Արայիկ Սարգսյանը մինչև 2011 թականի սեպտեմբերն աշխատել է ՃՈ տնտեսական բաժանմունքում` որպես պարետ: Թեև նրան ամրակցված ավտոմեքենա չի եղել, սակայն իր չափաքանակից ինքը բենզինի կտրոններ է տվել Արայիկ Սարգսյանին, քանի որ ինքը նրան անընդհատ տարբեր հանձնարարություններ է տվել: Արման Առաքելյանն աշխատել է Վանաձորի հաշվառման-քննական բաժանմունքում, այնուհետև` ՃՈ թիվ 3 հաշվառման-քննական բաժանմունքում: Եղել են առիթներ, որ ՃՈ-ի համար նախատեսված բենզինի կտրոններից ինքը տրամադրել է Արման Առաքելյանին, ով դրանցով լիցքավորել է «Մերսեդերս» մակնիշի ավտոմեքենան: Եղել է նաև, որ ինքը անձամբ վարել է Արման Առաքելյանի մեքենան, որի ընդացքում այն կրկին լիցքավորել է ՃՈ-ի համար նախատեսված բենզինի կտրոններով:
Նախնական քննության ընթացքում` 2011 թվականի նոյեմբերի 14-ին, ամբաստանյալ Արա Լևոնյանը, որպես մեղադրյալ, առաջադրված մեղադրանքում իրեն լիովին մեղավոր է ճանաչել և ցուցմունք տվել այն մասին, որ պնդում է իր կողմից տրված բոլոր այն ցուցմունքները, որոնցում ինքը մանրամասն նշել է, թե 2009-2011 թվականների ընթացքում ինչ պայմաններում և ինչ քանակությամբ բենզին է ստացվել և բաշխվել 1-ին և 2-րդ գումարտակներին: Ինքն ընդունում և հասկանում է, որ ՃՈ տնտեսական բաժանմունքի պետի պաշտոնում աշխատանելով, իր գործողություններով օժանդակել է ՃՈ պետ Մարգար Օհանյանի կողմից 1-ին և 2-րդ գումարտակների համար նախատեսված բենզինից առանձնապես խոշոր չափերով յուրացումներ կատարելուն: 2009 թվականի հունվարից ՀՀ ոստիկանությունից ՃՈ-ին կտրոնների տեսքով կանոնավոր կերպով հատկացվել է բենզին: Այդ ժամանակ Մարգար Օհանյանն իրեն կանչել է աշխատասենյակ և հանձնարարել, որպեսզի ինքը 2-րդ գումարտակին յուրաքանչյուր ամիս հատկացնի 34.000 լիտր բենզին, սակայն փաստաթղթային ձևակերպումներն այնպես կազմակերպի, որպեսզի բենզինի ծախսը ձևակերպվի ՃՈ-ին հատկացված բենզինի ողջ քանակությամբ, այսինքն` պակաս տրամադրած բենզինի պակասորդը հաշվապահական փաստաթղթում չձևակերպվի: Մարգար Օհանյանի հանձնարարությամբ ինքը 2-րդ գումարտակին չտրամադրված բենզինի կտրոնները պետք է հանձներ նրան: Մարգար Օհանյանի կողմից հաստատված բենզինի բաշխման չափաքանակների համաձայն` 2009 թվականին 2-րդ գումարտակի համար ամսական նախատեսված է եղել 41.800 լիտր բենզին, սակայն 2-րդ գումարտակի հրամանատար Ստեփան Կարախանյանին ինքը յուրաքանչյուր ամիս փաստացի տվել է 34.000 լիտր բենզին, իսկ տարբերությունը կազմող 7.800 լիտր բենզինի կտրոնները յուրաքանչյուր ամիս տվել է Մարգար Օհանյանին: 2010 թվականի հունվարից հոկտեմբերն ընկած ժամանակահատվածում ինքը 2-րդ գումարտակին դարձյալ յուրաքանչյուր ամիս բաշխել է 34.000 լիտր բենզին, 2010 թվականի նոյեմբեր-դեկտեմբեր ամիսներին, աշնանային զորակոչի ուղեկցումների հետ կապված, յուրաքանչյուր ամիս բաշխել է 39.000 լիտր բենզին, իսկ 2011 թվականի մայիս-հունիս ամիսներին` 37.900 լիտր բենզին: Փաստաթղթերով 2-րդ գումարտակի համար նախատեսված բենզինի քանակությունից փաստացի չտրամադրված կտրոններն ինքն անմիջապես տվել է Մարգար Օհանյանին: 2009 թվականի հունվարից մինչև 2011 թվականի հուլիսն ընկած ժամանակահատվածում ինքը 2-րդ գումարտակի համար նախատեսված 1.521.520 լիտր բենզինից Ստեփան Կարախանյանին փաստացի տվել է 1.061.300 լիտրը, իսկ 460.220 լիտր բենզինը կտրոնների տեսքով յուրաքանչյուր ամիս տվել է Մարգար Օհանյանին: Բենզինը քիչ քանակությամբ բաշխելու վերաբերյալ Մարգար Օհանյանի հանձնարարության մասին տեղյակ է եղել նաև Ստեփան Կարախանյանը, քանի որ նախատեսվածից պակաս բենզինի կտրոններ ստանալիս նա երբևէ չի հետաքրքրվել, թե ինչու է այդպես, իսկ ամսվա վերջում ներկայացրել է իրականում իրեն չհատկացված քանակությամբ բենզինի ծախսի վերաբերյալ հաշվետվություն: 2009 հունվար-փետրվար ամիսներին 1-ին գումարտակն ամբողջությամբ ստացել է չափաքանակով հաստատված 32.000-ական լիտր բենզինը: 2009 թվականի մարտի սկզբին Մարգար Օհանյանն իրեն հանձնարարել է 1-ին գումարտակին ամսական հատկացնել 27.500 լիտր բենզին, որը շարունակվել է մինչև 2010 թվականի վերջը: 2011 թվականի հունվարից ապրիլն ընկած ժամանակահատվածում, դարձյալ Մարգար Օհանյանի հանձնարարությամբ, ինքը 1-ին գումարտակին ամսական փաստացի բաշխել է 23.000 լիտր բենզին, իսկ 2011 թվականի մայիս, հունիս և հուլիս ամիսներին` 28.000 լիտր բենզին: Փաստացի չտրամադրված բենզինը յուրաքանչյուր ամիս ինքն ամբողջությամբ տվել է Մարգար Օհանյանին: 2009 թվականից մինչև 2011 թվականի հուլիսն ընկած ժամանակահատվածում ինքը 1-ին գումարտակի համար նախատեսված և փաստաթղթերով ձևակերպված 959.200 լիտր բենզինից 1-ին գումարտակին փաստացի հատկացրել է 845.000 լիտրը, իսկ տարբերությունը կազմող 114.200 լիտր բենզինի կտրոնները դարձյալ հանձնել է Մարգար Օհանյանին: Ի տարբերություն 2-րդ գումարտակի` 1-ին գումարտակի համար նախատեսված բենզինի կտրոնները Մարգար Օհանյանի հանձնարարությամբ իրենից ստացել և բաշխել է ՃՈ տնտեսական բաժանմունքի տեխնիկ Սամվել Մախմուրյանը: Սամվել Մախմուրյանին պակաս քանակությամբ բենզինի կտրոններ տրամադրելիս ինքը նրան փոխանցել է Մարգար Օհանյանի հանձնարարությունը և ասել, որ դրանից հետո 1-ին գումարտակը նախատեսվածից պակաս քանակությամբ բենզին է ստանալու: Ինքը Սամվել Մախմուրյանին նաև փոխանցել է, որ ստացած բենզինի ելքի կարգադրություններով, բաշխման քարտերով և ծախսի վերաբերյալ ամսական հաշվետվություններով նա պետք է այնպես ձևակերպի, որ պակասորդը քողարկվի և փաստաթղթերով չերևա: Ինքը չգիտի` Մարգար Օհանյանը Սամվել Մախմուրյանին անձամբ այդ մասին հանձնարարել է, թե ոչ: Սամվել Մախմուրյանը չի առարկել և նշված ժամանակահատվածում փաստացի ստացել է նախատեսվածից պակաս բենզինի կտրոններ, սակայն այդ մասին որևէ տեղ չի հայտնել և բենզինի բաշխման ու ծախսագրման վերաբերյալ փաստաթղթերում ձևակերպել է, թե իբր չափաքանակով նախատեսված բենզինն ամբողջությամբ ստացվել և ծախսվել է: Սամվել Մախմուրյանը բենզինի բաշխման քարտերում, ինչպես նաև բենզինի ծախսի վերաբերյալ ամսական հաշվետվություններում, իր միջոցով նրան փախանցված Մարգար Օհանյանի հանձնարարությամբ, մտցրել է իրականությանը չհամապատասխանող տեղեկություններ, որով քողարկվել է փաստացի պակաս տրված բենզինի քանակությունը: Ինքը զղջում է կատարածի համար, Մարգար Օհանյանի կողմից բենզինի յուրացումներ կատարելուն օժանդակել է, քանի որ չի ցանակցել հակադրվել իր անմիջական ղեկավարին:
Դատական քննության ընթացքում ամբաստանյալ Սամվել Մախմուրյանն առաջադրված մեղադրանքում իրեն մեղավոր ճանաչեց և օգտվելով իր իրավունքից` հրաժարվեց ցուցմունք տալ:
Նախնական քննության ընթացքում` 2011 թվականի օգոստոսի 29-ին, ամբաստանյալ Սամվել Մախմուրյանը, որպես վկա, ցուցմունք է տվել այն մասին, որ 2008 թվականի սեպտեմբերից աշխատել է ՃՈ տնտեսական բաժանմունքում` որպես տեխնիկ: Իր աշխատանքային պարտականությունների մեջ մտել է 1-ին գումարտակի տնտեսական ոլորտի աշխատանքների կազմակերպումը: Մասնավորապես` ինքը հետևել է շենքերին և շինություններին, տարածքի սանիտարական վիճակին, ինչպես նաև իր վրա դրված է եղել գումարտակին հատկացված բենզինի կտրոնների ստացումը տնտեսական բաժնից և դրանց բաշխումը տեսուչներին: Ինքն ամսական 2 անգամ ՃՈ տնտեսական բաժնի պետ Արա Լևոնյանից ստացել է 1-ին գումարտակին հատկացվելիք կտրոնները, սակայն ստորագրել է միայն արտաբյուջետային միջոցներով ձեռք բերված բենզինի չափաքանակի ելքի կարգադրություններում, իսկ բյուջետային միջոցներով ձեռք բերված բենզինի ստացման քարտերում չի ստորագրել: 2011 թվականի հունվար-ապրիլ ամիսներին ինքն Արա Լևոնյանից ստացել է 23.000-ական լիտր «ռեգուլյար» տեսակի բենզինի կտրոններ, սակայն ամսական հաշվետվություններում, Արա Լևոնյանի ցուցումով, որպես վառելիքի ծախս ներկայացրել է` հունվարին` 25.800 լիտր, փետրվարի, մարտ և ապրիլ ամիսներին` 25.350-ական լիտր: 2011 թվականի մայիս, հունիս և հուլիս ամիսներին ինքն Արա Լևոնյանից գումարտակի համար ստացել է 28.000-ական լիտր բենզինի կտրոն, սակայն այդ ամիսների հաշվետվություններում Արա Լևոնյանի ցուցումով մայիս ամսվա համար ցույց է տվել 30.350 լիտր բենզինի ծախս, իսկ հունիս և հուլիս ամիսների համար` 29.950-ական լիտր: 2011 թվականի հունվար-հուլիս ամիսներն 1-ին գումարտակի համար ինքն Արա Լևոնյանից փաստացի ստացել է 176.000 լիտր «ռեգուլյար» տեսակի բենզինի կտրոն, սակայն Արա Լևոնյանի ցուցումով նույն ժամանակահատվածում որպես ծախս հաշվետվություններում ցույց է տվել 192.100 լիտր: Այսինքն` 1-ին գումարտակի հաշվետվություններում ինքը ցույց է տվել 16.100 լիտրով ավել բենզինի ծախս, քան փաստացի ստացել է: Արա Լևոնյանն յուրաքանչյուր ամիս հեռախոսով իրեն ցուցում է տվել, թե հաշվետվություններում ինքը որքան բենզինի ծախս ցույց տա: Հաշվետվությունները կազմելուց հետո ինքը դրանք ստորագրելու համար տարել է գումարտակի հրամանատարի մոտ: Գումարտակի հրամանատարներ Արսեն Արշակյանը և Արսեն Մարդոյանն իրեն ասել են, որ ինքը հաշվետվություններում լրացնի այն քանակը, որը ցուցում է տվել Արա Լևոնյանը: Ինքը, առանց ավելորդ հարցերի, հաշվետվությունները գումարտակի հրամանատարի հաստատումից հետո ներկայացրել է Արա Լևոնյանին:
Նախնական քննության ընթացքում` 2011 թվականի օգոստոսի 30-ին, ամբաստանյալ Սամվել Մախմուրյանը, որպես վկա, ցուցմունք է տվել այն մասին, որ մինչև 2009 թվականը ՃՈ-ում բենզինի բաշխումը կանոնակարգված չի եղել, մասնավորապես` չի իրականացվել բենզինի ստացման և բաշխման վեևաբերյալ կոնկրետ հաշվառումներ: 2009 թվականի հունվարից բենզինի բաշխումը կանոնակարգվել է, քարտերի առանձին հաշվառումների միջոցով իրականացվել է բենզինի կտրոնների ստացումը և բաշխումը, իսկ յուրաքանչյուր ամսվա վերջում ՃՈ տնտեսական բաժնմունք ներկայացվել է հաշվետվություն` մեքենաների վազքի և ծախսած բենզինի վերաբերյալ: 2009 թվականի հունվար-փետրվար ամիսներին ինքն Արա Լևոնյանից ստացել է 32.000-ական լիտր «ռեգուլյար» տեսակի բենզինի կտրոն, և իր կողմից կազմված հաշվետվություններում որպես բենզինի ծախս նշել է բենզինի քանակին համարժեք 32.000-ական լիտր: 2009 թվականի մարտին ինքն Արա Լևոնյանից փաստացի ստացել է 27.500 լիտր բենզինի կտրոն, սակայն վերջինի ցուցումով ամսական հաշվետվությունում որպես ծախս նշել է 32.000 լիտր: 2009 թվականի ապրիլ-դեկտեմբեր, ինչպես նաև 2010 թվականի հունվար-փետրվար ամիսները ինքն 1-ին գումարտակի համար Արա Լևոնյանից ստացել է 27.500-ական լիտր բենզինի կտրոն, սակայն Արա Լևոնյանի ցուցումով հաշվետվություններում նշել է 31.800-ական լիտր բենզինի ծախս: 2010 թվակաի մարտ և ապրիլ ամիսներին, կապված ինչ-որ խնդիրների հետ, որոնցից ինքը տեղյակ չի եղել, Արա Լևոնյանի ցուցումով ամսական փաստացի ստացած 27.500-ական լիտր բենզինի փոխարեն ինքը մարտ ամսվա հաշվետվությունում նշել է 16.000 լիտր, իսկ ապրիլ ամսվա հաշվետվությունում` 23.450 լիտր: Ինքն Արա Լևոնյանին հարցրել է, թե ինչու պետք է հաշվետվությունում ներկայացնի քիչ քանակություն, քան իրականում եղել է, իսկ նա պատասխանել է, որ կապված բյուջեի հետ, մյուս ամիսների հաշվետվություններում ծախսային մասը կհավելագրվի: Այդպես եղել է նաև մայիս-դեկտեմբեր ամիսներին. չնայած ինքն ամսական ստացել է 27.500 լիտր բենզին, սակայն հաշվետվություններում նշել է ավելի շատ բենզինի ծախս: Մասնավորապես` մայիսին ինքը նշել է 38.350 լիտր, հունիսին` 39.750 լիտր, հուլիսին` 35.750 լիտր, օգոստոսին` 32.800 լիտր, սեպտեմբերին` 34.800 լիտր, իսկ հոկտեմբեր-դեկտեմբեր ամիսներին` 31.800-ական լիտր: 2009-2010 թվականների ընթացքում ինքը հաշվետվություններում ընդհանուր ներկայացրել է 767.100 լիտր բենզինի ծախս, սակայն փաստացի ստացել է 669.000 լիտր «ռեգուլյար» տեսակի բենզինի կտրոն: Այդպիսով, 2009-2010 թվականների ընթացքում ինքը որպես բենզինի ծախս Արա Լևոնյանի ցուցումով հավելագրել է 98.100 լիտր: 2011 թվականի հունվար-հուլիս ամիսներին 1-ին գումարտակի համար ինքն Արա Լևոնյանից փաստացի ստացել է 176.000 լիտր բենզինի կտրոն, սակայն Արա Լևոնյանի ցուցումով նույն ժամանակահատվածում որպես ծախս հաշվետվություններում ցույց է տվել 192.100 լիտր` հավելագրելով 16.100 լիտր բենզինի ծախս: 2009 թվականից մինչև 2011 թվականի հուլիսն 1-ին գումարտակի բենզինի ծախսային մասով ինքն Արա Լևոնյանի ցուցումով հավելագրել է 114.200 լիտր «ռեգուլյար» տեսակի բենզին:
Նախնական քննության ընթացքում` 2011 թվականի սեպտեմբերի 5-ին, ամբաստանյալ Սամվել Մախմուրյանը, որպես վկա, ցուցմունք է տվել այն մասին, որ 2009 թվականի հունվարից ՃՈ բենզինի մատակարարման և բաշխման գործընթացը կատարվել է կտրոնների միջոցով: 2009 թվականի հունվարից ինքը ՃՈ տնտեսական բաժնամունքի պետ Արա Լևոնյանից ստացել է 1-ին գումարտակին հասանելիք բենզինի կտրոնները և այն անձամբ բաժանել գումարտակի անձնակազմին: 2009 թվականի հունվարից մինչև 2010 թվականի ապրիլի 1-ը գումարտակին հատկացվել է միայն բյուջետային միջոցներով ձեռք բերված բենզին, որը հաշվառվել է վառելիքի բացթողման համար նախատեսված քարտերով: Դրանց հետ ինքը որևէ առնչություն չի ունեցել, սակայն տեղյակ է, որ քարտերը լրացվել են Արա Լևոնյանի կողմից, որոնք ստորագրել է 1-ին գումարտակի հրամանատարը: 2010 թվականի մայիսից արտաբյուջետային միջոցներով ձեռք բերված բենզինը 1-ին գումարտակին տրամադրվել է համապատասխան ելքի հանձնարարագրերով: Ելքի անդորրագրերը լրացվել են ստացող` 1-ին գումարտակի հրամանատարի տեղակալ Հայկազ Մաթևոսյանի անվամբ, սակայն բենզինի կտրոնները յուրաքանչյուր ամսվա ելքի կարգադրությամբ նշված քանակությամբ անձամբ ստացել է ինքը և ստորագրել դրա համար: Տվյալ ելքի կարգադրությունում ստորագրել են նաև Արա Լևոնյանը, տնտեսական բաժանմունքի ավագ տեսուչ Մարատ Ավետիսյանը և մեկ այլ անձ, իսկ Հայկազ Մաթևոսյանն այդ կարգադրությունում չի ստորագրել: 2010 թվականի մայիսին ինքը գնացել է Հայկազ Մաթևոսյանի մոտ և նրան ասել, որ Արա Լևոնյանը բենզինի ստացման ելքի կարգադրությունները ձևակերպում է նրա (Հայկազ Մաթևոսյանի) անվամբ, սակայն Արա Լևոնյանի կարգադրությամբ նրա (Հայկազ Մաթևոսյանի) փոխարեն ստորագրել է ինքը և ստացել բենզինի կտրոնները: 2008 թվականի հոկտեմբերին, երբ ՃՈ բենզինի բաշխման գործընթացը դեռևս կանոնակարգված չի եղել, բենզինի հետ կապված հարցերով մեկ-երկու ամիս զբաղվել է 1-ին գումարտակի հրամանատարի տեղակալ Հայկազ Մաթևոսյանը, սակայն 2008 թվականի վերջերին 1-ին գումարտակի հրամանատար Արսեն Արշակյանը վերջինի աշխատասենյակում իրեն ասել է, որ այդուհետ 1-ին գումարտակի բենզինի ստացման և բաշխման հարցերով պետք է զբաղվի ինքը, քանի որ ըստ Արսեն Արշակյանի` այդ որոշումը կայացվել է վերադասի ցուցումով, սակայն ինքը նրանից չի հարցրել է, թե ով եղել վերադասը: Դրանից հետո 1-ին գումարտակի բենզինի ստացման և բաշխման հարցերով զբաղվել է ինքը:
Նախնական քննության ընթացքում` 2011 թվականի սեպտեմբերի 7-ին, ամբաստանյալ Սամվել Մախմուրյանը, որպես վկա, ցուցմունք է տվել այն մասին, որ իր աշխատասենյակից առգրավված` վառելիքի բացթողման քարտերը, հրավիրված ընթերակաների ներկայությամբ, հաշվվել են, և կազմվել է համապատասխան արձանագրություն, որի տակ բոլորը ստորագրել են: Առգրավման ժամանակ ինքը ներկայացրել է նաև իր ձեռագրով լրացված վառելիքի բաշխման 97 նույնատիպ քարտեր և հայտնել է, որ դրանք հանդիսանում են իր սևագիր գրառումները, որոնցից յուրաքանչյուրում տարեթվերով և ամսաթվերով նշված են իր կողմից փաստացի տրամադրված բենզինի քանակները: Իրականում եղել են բենզինի բաշխման երկու քարտեր: Բենզինի բաշխման գործընթացն իրականացվել է նմանատիպ, զուգահեռ լրացվող քարտերով, որոնցից առաջինում ինքը լրացրել է փաստացի ստացված բենզինի քանակը, իսկ երկրորդում` այն անհրաժեշտ քանակը, որը պետք է համընկներ իր կողմից լրացված հաշվետվություններում նշված խմբաքանակին: Երկու քարտ լրացնելու նպատակը կայացել է նրանում, որ անձնակազմը չտեղեկանա, որ հաշվետվություններում նշվում է նրանց փաստացի ստացած բենզինի քանակությունից ավել քանակություն: Ինքը զուգահեռ քարտերի վարումը կատարել է ՃՈ տնտեսական բաժանմունքի պետ Արա Լևոնյանի ցուցումով: Ստորագրման ներկայացված քարտերը մեծամասամբ իր կողմից կնքվել են 1-ին գումարտակի հրամանատարի կարմիր կլոր կնիքով, որն ինքը պարբերաբար վերցրել է գումարտակի հրամանատարից, և բենզինի կտրոնները կնքելու հետ մեկտեղ կնքել է նաև նշված քարտերը: Իր մոտից առգրավված` նշված 97 քարտերից բացի, այլ նմանատիպ քարտեր ինքը չի ունեցել, քանի որ մեծամասամբ դրանք դեն է նետել:
Նախնական քննության ընթացքում` 2011 թվականի սեպտեմբերի 15-ին, ամբաստանյալ Սամվել Մախմուրյանը, որպես վկա, ցուցմունք է տվել այն մասին, որ նույն ժամանակահատվածի վերաբերյալ բենզինի բացթողման վերաբերյալ յուրաքանչյուր ամսվա կտրվածքով ինքը կազմել է երկու քարտեր: 1-ին գումարտակի հրամանատարին, գումարտակի հրամանատարի 2 տեղակալներին, վաշտի 3 հրամանատարներին, վաշտի հրամանատարներների 3 տեղակալներին, ծառայության ավագ տեսուչին, հերթապահ մասի պետին, հերթապահի և հետաքննիչների ավտոմեքենաների համար ինքը յուրաքանչյուր ամիս նրանց փաստացի տվել է նրանց հասանելիք բենզինի կտրոնները, որոնց վերաբերյալ նրանցից յուրաքանչյուրը ստորագրել է իր կողմից կազմված` փաստացի ստացած բենզինի բաց թողնման քարտում: Ինքը նշված անձանց նույն ժամանակահատվածի վերաբերյալ կազմել է նաև նույնպիսի բենզինի բաց թողնման քարտեր, որտեղ վերևում նշել է յուրաքանչյուրին ամրակցված ավտոմեքենայի համարանիշը: Քարտում յուրաքանչյուր ամսվա կտրվածքով գումարտակի հրամանատարի և նրա 2 տեղակալներից յուրաքանչյուրի վերաբերյալ ցույց է տվել փաստացի ստացածից կիսով չափ պակաս բենզին, իսկ մնացածի դեպքում` 50-70 լիտրով պակաս: Դասակի հրամանատարներին և տեսչական կազմին յուրաքանչյուր օրվա համար, ըստ տեղաբաշխման ցուցակի, փաստացի տրամադրվել է` շարժական կարգախմբերին` 10-15 լիտր, իսկ անշարժ պահակակետերին` 5 լիտր: Ինքը յուրաքանչյուր ամսվա հաշվետվությունում ցույց է տվել տեսչական անձնակազմին փաստացի տրամադրված բենզինի քանակից ավել քանակ: Տեսչական կազմին ամսվա կտրվածքով պակաս տրված բենզինի պակասորդը հաշվետվություններով լրացվել է հետևյալ մեխանիզմով. ամսվա սկզբին 1-ին գումարտակին հատկացված հաշվետվություններով նախատեսված ավելի քիչ բենզինից, սահմանված կարգի համաձայն, գումարտակի հրամանատարին և նրա 2 տեղակալներին տվել է 600-ական լիտր բենզին, սակայն հաշվետվություններում լրացվել են ավելի պակաս չափաբաժիններ: Դրա փոխարեն տեսչական անձնակազմին տրվել են ավելի պակաս չափաբաժնի բենզիններ, սակայն հաշվետվություններում ներկայացվել են ավելի մեծ թվեր: ՃՈ-ում բենզինի բաշխումը երբևէ կանոնակարգված չի եղել, հետևապես դա կատարվել է ըստ ծառայությունների իրականացման համար ծախսվելիք բենզինի մոտավոր չափաբաժնի: Իր ներկայացրած տարբերակով բենզինի բաշխման եղանակը սահմանել է գումարտակի հրամանատար Արսեն Արշակյանը: Բենզինի բաշխման ամսական հաշվետվություններն ինքը կազմել է Արա Լևոնյանի կարգադրությամբ:
Նախնական քննության ընթացքում` 2011 թվականի նոյեմբերի 12-ին, ամբաստանյալ Սամվել Մախմուրյանը, որպես մեղադրյալ, առաջադրված մեղադրանքում իրեն լիովին մեղավոր է ճանաչել և ցուցմունք տվել այն մասին, որ պնդում է նախկինում տված բոլոր ցուցմունքները, որոնցում ինքը մանրամասն հայտնել է, որ 2009-2011 թվականների ընթացքում բենզինի ելքի կարգադրություններում և ծախսի վերաբերյալ ամսական հաշվետվություններում իր կողմից նշվել է Արա Լևոնյանից փաստացի ստացած բենզինի քանակից մի քանի տոննա ավել քանակություն: 2009 թվականից մարտի սկզբին Արա Լևոնյանն 1-ին գումարտակի համար նախատեսված 32.000 լիտր բենզինի փոխարեն իրեն տվել է 27.500 լիտր բենզինի կտրոն: Ինքն Արա Լևոնյանին հարցրել է, թե ինչու է բենզինը պակաս տալիս, իսկ նա պատասխանել է, որ այդպես է հարկավոր, դա անում է ղեկավարության հանձնարարությամբ` ասելով, որպեսզի ինքն ավելորդ հարցեր չտա: Արա Լևոնյանը նաև տեղյակ է պահել, որ դրանից հետո 1-ին գումարտակին հատկացնելու է ամսական 27.500 լիտր բենզին` անկախ նրանից, թե փաստաթղթերում ինչ քանակություն է նշված լինելու: Արա Լևոնյանն իրեն ասել է նաև, որ 1-ին գումարտակին փաստացի չտրամադրված բենզինի պակասորդը քողարկելու նպատակով բենզինի վերաբերյալ ամսական հաշվետվությունները կազմելիս ինքը պետք է նշի ոչ թե ստացած բենզինի իրական քանակությունը, այլ այն քանակությունը, որը ձևակերպված է եղել բենզինի դուրսգրման փաստաթղթերով: Մինչև 2010 թվականի մայիսը ՃՈ-ն բենզին է ստացել միայն ՀՀ ոստիկանության ավտոտնտեսությունից: Այդ ժամանակահատվածում ՃՈ տնտեսական բաժանմունքից բենզինի կտրոնները դուրս են գրվել բենզինի բաշխման քարտերով, որոնցում ինքը չի ստորագրել: Այդ քարտերում, որպես ստացող, ստորագրել է 1-ին գումարտակի հրամանատար Արսեն Արշակյանը, սակայն բենզինի կտրոններն Արա Լևոնյանից ստացել է ինքը: 2010 թվականին մայիսից սկսած ՃՈ-ն սկսել է բենզին ձեռք բերել նաև արտաբյուջետային միջոցներով, որից հետո արտաբյուջետային միջոցով ձեռք բերված բենզինի կտրոններն ու ելքի կարգադրություններն ինքն անձամբ ստացել է Արա Լևոնյանից և ստորագրել այդ կարգադրություններում: Արա Լևոնյանի հանձնարարությամբ ինքն 1-ին գումարտակի բենզինի ծախսի վերաբերյալ ամսական հաշվետվություններում լրացրել է այն քանակության բեզինի ծախս, որը փաստացի չի ստացել: Յուրաքանչյուր ամսվա վերջում` հաշվետվությունները կազմելիս, Արա Լևոնյանն իրեն ասել է, թե ինչ քանակության բենզինի ծախս ինքը պետք է ձևակերպի: Դեռևս 2009 թվականի մարտին, երբ ինքն Արա Լևոնյանից պակաս բենզին է ստացել, այդ մասին զեկուցել է Արսեն Արշակյանին: Վերջինը զարմացել է և ասել, որ դա կճշտի ՃՈ պետ Մարգար Օհանյանի հետ: Ճշտելուց հետո Արսեն Արշակյանն իրեն ասել է, որպեսզի ինքն անի այնպես, ինչպես կասի Արա Լևոնյանը: Քանի որ ինքը եղել ենթակա աշխատող, իսկ իր անմիջական ղեկավարը եղել է Արա Լևոնյանը, ինքը ենթարկվել է նրա հանձնարարությանը և պակաս բենզին ստանալու մասին չի զեկուցել Մարգար Օհանյանին, քանի որ Արա Լևոնյանն ասել է, որ բենզինը պակաս է տրամադրում հենց Մարգար Օհանյանի հանձնարարությամբ: Ինքն Արա Լևոնյանի հանձնարարությամբ 1-ին գումարտակի տեսչական անձնակազմին բենզին բաշխելիս ձևակերպել է բենզին բաշխման քարտեր, որոնցում նշել է յուրաքանչյուրին փաստացի տրամադրած բենզինի քանակը, իսկ այդ քարտերում ստորագրել են բենզին ստացողները: Բենզինի պակասորդը թաքցնելու և քողարկելու նպատակով ինքը կազմել է նաև նույն անձանց անուններով կրկնօրինակ քարտեր, որոնցում նշել է փաստացի տվածից ավել քանակության բենզին, և այդ քարտերում ստորագրել բենզին ստացողների դիմաց: Այդ քարտերի մեծ մասն ինքը ոչնչացրել է, իսկ իր մոտ պահպանված քարտերն առգրավվել են իր աշխատասենյակից: Այդպիսով, 2009-2011 թվականների ընթացքում, ղեկավարության հանձնարարությամբ, ինքը յուրաքանչյուր ամիս ստացել է նախատեսածից պակաս քանակության բենզին, սակայն համապատասխան փաստաթղթերում իրականությունը չհամապատասխանող տեղեկություններ մտցնելով` ձևակերպել է, թե իբր 1-ին գումարտակին ավել քանակության բենզին է հատկացրել, և իր արարքներով օժանդակել է Մարգար Օհանյանի կողմից ՃՈ-ին պատկանող բենզինը յուրացնելուն:
Տուժողի ներկայացուցիչ Ժիրայր Կարապետյանը դատական քննության ընթացքում ցուցմունք տվեց այն մասին, որ մոտ 4 տարի աշխատում է ՃՈ-ում: Իրենց բաժինը բենզինի ստացման, մուտքագրման և բաշխման գործընթացների հետ կապված որևէ գործառույթ չի իրականացրել: Քրեական գործի մանրամասներին ինքը ծանոթացել է քրեական գործի նյութերից և իրեն գործի հանգամանքների հետ կապված որևէ մանրամասնություն հայտնի չէ: Իր աշխատած տարիներին ինքը որևէ մեկից բենզինի հետ կապված որևէ բողոք չի լսել, և այդ կապակցությամբ զեկուցագիր չի ստացվել:
Վկա Արմեն Մնացականյանը դատական քննության ընթացքում ցուցմունք տվեց այն մասին, որ 2009 թվականի հունվարից զբաղեցնում է ՃՈ ֆինանսական բաժանմունքի պետի պաշտոնը և կատարում է նաև ՃՈ գլխավոր հաշվապահի պարտականությունները: 2009 թվականի հունվարից ՃՈ-ն բենզին է ձեռք բերել բյուջետային և արտաբյուջետային միջոցների հաշվին: ՀՀ պետական բյուջեի միջոցների հաշվին բենզին ձեռք բերելու համար ՀՀ ոստիկանությունը հայտարարել է մրցույթ, հաղթողի հետ կնքել պայմանագիր, որի հիման վրա հաղթողը ներկայացված պահանջի հիման վրա հատկացրել է բենզին: Բենզինի պահանջարկի հաշվարկը ՀՀ կառավարության որոշմամբ սահմանված նորմերի հիման վրա կատարվել է ՃՈ տնտեսական բաժանմունքի կողմից, ներկայացվել ՃՈ պետի հաստատմանը, որից հետո բյուջետային և արտաբյուջետային միջոցների հաշվին ձեռք է բերվել բենզին: Բենզինը ձեռք է բերվել «Միկա» և «Ֆլեշ» ընկերություններից: Բեզինի գնման պայմանագիրը կազմել է տնտեսական բաժանմունքի ինժեներ-մեխանիկ Մարատ Ավետիսյանը, ով եղել է գնումների համակարգողը: Պայմանագիրը կնքել են ՃՈ պետը և հաղթող ճանաչված կազմակերպության ղեկավարը: ՀՀ պետական բյուջեի միջոցների հաշվին հայտարարված մրցույթին ՃՈ-ն առնչություն չի ունեցել: ՃՈ-ի կողմից ներկայացվել է լիազորագիր, որտեղ նշված է եղել բենզինի քանակը և որակը, այն ստորագրվել է ՃՈ պետի, գլխավոր հաշվապահի և ստացող` տնտեսական բաժանմունքի ավագ տեսուչ Եփրեմ Ստեփանյանի կողմից: Արտաբյուջետային միջոցների հաշվին ձեռք բերված բենզինը սկզբում մուտքագրվել է ՃՈ պահեստ, իսկ բյուջետային միջոցների հաշվին ստացված բենզինը` ուղղակիորեն բերվել և բաժանվել է, քանի որ այն նախատեսված է եղել 15 օրվա համար: 2009 թվականին իրենք բենզին ստացել են ամսական 2 անգամ` առաջին 15 օրվա համար` բյուջեի հաշվին, իսկ երկրորդ 15 օրվա համար` արտաբյուջետային միջոցների հաշվին: Իրենք բենզինն ստացել են կտրոնների տեսքով, իսկ բենզինը լիքցավորվել է շահող կազմակերպության բենզալցակայաններից: Բենզինի բաշխումը կատարվել է ըստ ստորաբաժանումների` վարչական ապարատ, 1-ին գումարտակ, 2-րդ գումարտակ և ուղեկցող վաշտ: Հատկացվող բենզինի քանակի տարբերություններ եղել են չնախատեսված ուղեկցումների դեպքում կամ զորահավաքներրի ժամանակ: Յուրաքանչյուր ամսվա վերջում տնտեսական բաժանմունքը ֆինանսական բաժանմունքին ներկայացրել է ստացված բենզինի բաշխման վերաբերյալ հաշվետվություն, որտեղ նշված է եղել, թե որ ստորաբաժանմանը որքան բենզին է հատկացվել: Իրենց կողմից հաշվետվությունները ստանալուն պես ստուգվել է լիազորագրում նշված և հաշվետվությունում նշված թվերը: Եթե այդ թվերը համապատասխանել են միմյանց, ապա իրենք ոչինչ չեն արել: Պակաս լինելու դեպքում պահեստում պետք է մնացորդ լիներ, բայց քանի որ իրենք ստացել են 15 օրվա համար նախատեսված բենզին, այն միանգամից բախշվել է, որպեսզի ծառայությունն անխափան իրականացվի: Այդ ընթացքում ինքը տեղեկություն չի ունեցել այն մասին, որ փաստացի ստացված բենզինն ամբողջությամբ չի ծախսվել ծառայության նպատակով, սակայն ցույց է տրվել ամբողջությամբ ծախսված: ՃՈ ֆինանսական բաժանմունքի կողմից ոստիկանության ֆինանսատնտեսական վարչություն ներկայացվել է հաշվապահական հաշվեկշիռ, որը ստորագրել են ՃՈ պետը և գլխավոր հաշվապահը: Հաշվապահական տեսակետից բյուջետային և արտաբյուջետային միջոցներով ձեռք բերված բենզինի համար կազմվել են նույն փաստաթղթերը, որոնք ստորագրվել են նույն անձանց կողմից: Ինքը բենզինի պակասի կապակցությամբ տեսուչներից որևէ դժգոհություն չի լսել:
Վկա Եփրեմ Ստեփանյանը դատական քննության ընթացքում ցուցմունք տվեց այն մասին, որ 2007 թվականից աշխատում է ՃՈ տնտեսական բաժանմունքում` որպես ավագ տեսուչ: Բյուջետային և արտաբյուջետային միջոցներով ձեռք բերված բենզինն ստանալու համար ինքը ստացել է համապատասխան լիազորագիր: Լիազորագրերը տրվել են իր անունով, դրանք ստորագրել է ֆինանսական բաժանմունքի պետ Արմեն Մնացականյանը, որից հետո տնտեսական բաժանմունքի պետ Արա Լևոնյանն այն ներկայացրել է ՃՈ պետ Մարգար Օհանյանի հաստատմանը, և վերջինի կողմից լիազորագրերը կնքվելուց հետո այն ստորագրել է նաև ինքը: Բյուջետային միջոցներով ձեռք բերված բենզինի կտրոններն ինքը համապատասխան քանակներով ստացել է ՀՀ ոստիկանության ավտոտնտեսության պահեստից և համապատասխան փաստաթղթերով դրանք հանձնել ՃՈ տնտեսական բաժանմունքի պետ Արա Լևոնյանին: 2010 թվականից ՃՈ-ն սկսել է բենզին ձեռք բերել արտաբյուջետային միջոցների հաշվին` «Ֆլեշ» ՍՊ ընկերությունից: Ինքը համապատասխան լիազորագրերով, ելքի կարգադրություն դուրս գրելուց հետո «Ֆլեշ» ՍՊ ընկերությունից համապատասխան փաստաթղթերի մեջ նշված չափաքանակով բենզինի կտրոնները բերել և հանձնել է ՃՈ պահեստ: Երբևէ չի եղել, որ ինքը լիազորագրում նշված քանակությունից քիչ բենզին ստանա կամ ստացածն ամբողջությամբ չհանձնի Արա Լևոնյանին: Միաժամանակ ինքը, որպես տնտեսական բաժանմունքի ավագ տեսուչ, ամսական 2 անգամ ստացել է յուրաքանչյուր դեպքում 3.200-ական լիտր բենզին` ՃՈ ղեկավարության (ՃՈ պետ և տեղակալներ, բաժնի պետեր և տեղակալներ) թվով 30-31 ծառայողական ավտոմեքենաների վարորդներին քարտային կարգով բաժանելու համար:
Վկա Արսեն Արշակյանը դատական քննության ընթացքում ցուցմունք տվեց այն մասին, որ 2007 թվականի հունիսից մինչև 2011 թվականի մարտի 30-ը զբաղեցրել է 1-ին գումարտակի հրամանատարի պաշտոնը, իսկ 2011 թվականի սեպտեմբերի 6-ին նշանակվել է 2-րդ գումարտակի հարմանատարի պաշտոնում: 1-ին գումարտակում գործել է 3 վաշտ` յուրաքանչյուրում 2 դասակ: Մինչև 2008 թվականի դեկտեմբեր ամիսը 1-ին գումարտակին հատկացվելիք բենզինը կանոնակարգված չի եղել, այսինքն` բենզինը հատկացվել է կտրոնների տեսքով կամ լիցքավորվել է ավտոտնտեսությունից: 2009 թվականի հունվարից իրենք բենզինը ստացել են կտրոնների տեսքով: 2009 թվականի հունվար և փետրվար ամիսներին 1-ին գումարտակին լիարժեք հատկացվել է 32.000 լիտր բենզին, որը ստացել և բաշխել է Սամվել Մախմուրյանը: 2009 թվականի մարտ ամսին Սամվել Մախմուրյանն իրեն տեղեկացրել է, որ մարտ ամսվա համար բենզինը ստացել է պակաս` 32.000 լիտրի փոխարեն ստացել է 27.500 լիտր: Ինքը նրան հարցրել է, թե ինչն է պակաս ստանալու պատճառը, իսկ նա ասել է, որ տնտեսական բաժանմունքի պետ Արա Լևոնյանը բենզինը պակաս է տվել: Ինքն Արա Լևոնյանին հարցրել է, թե ինչու է Սամվել Մախմուրյանին բենզինը պակաս տվել, իսկ նա պատասխանել է, որ ՃՈ պետ Մարգար Օհանյանը տեղյակ է դրա մասին: Չբավարարվելով Արա Լևոնյանի պատասխանով` ինքը դիմել է ՃՈ պետ Մարգար Օհանյանին, ասել, որ Արա Լևոնյանը բենզինը պակաս է հատկացրել իրենց` չնայած որ փաստաթղթերում գրված են եղել այն թվերը, որոնք ստացել են նախորդ ամիսներին: Մարգար Օհանյանն իրեն ասել է, որ տեղյակ է պակաս բենզին հատկացնելու և փաստաթղթերում ավել գրելու մասին: Ինքն այլևս հարց չի տվել Մարգար Օհանյանին, չի հարցրել ինչն է դրա պատճառը և ինչ նպատակով է բենզինը պակաս տրվել: Վերջնահաշվարկի ժամանակ Սամվել Մախմուրյանը լրացրել է հաշվետվությունը, իսկ ինքը հաստատել է այն: Ինքը բացառիկ` 1-2 դեպքում, բենզինի քանակն ավելացնելու խնդրանքով դիմել է Մարգար Օհանյանին, սակայն նա պատասխանել է, որ դա առայժմ հնարավոր չէ: Երբ ինքը նշանակվել է 1-ին գումարտակի հրամանատար, գումարտակի բենզինի բաշխմամբ զբաղվել է Սամվել Մախմուրյանը, ով իր նշանակվելուց հետո որոշ ժամանակ նույնպես շարունակել է բաշխել գումարտակի բենզինը: Դրանից որոշ ժամանակ անց ինքը գումարտակի բենզինի բաշխումը Սամվել Մախմուրյանի փոխարեն հանձնարարել է այդ ժամանակվա իր տեղակալ Հայկազ Մաթևոսյանին: Դրանից մի քանի օր հետո ինքը Մարգար Օհանյանից ցուցում է ստացել, որպեսզի գումարտակի բենզինը կրկին բաժանի Սամվել Մախմուրյանը: Այդ նույն ցուցումն իրեն փոխանցել է նաև Արա Լևոնյանը, որից հետո ինքը գումարտակի բենզինի բաշխումը կրկին հանձնարարել է Սամվել Մախմուրյանին: Բենզինի պակասեցման ժամանակ` 2010 թվականի կեսերին, եղել են դեպքեր, երբ ինքն իր անձնական չափաբաժինը կրճատել է 200 լիտրով, իսկ իր տեղակալ Հայկազ Մաթևոսյանի չափաբաժինը` 100 լիտրով, որպեսզի այդ բենզինը հատկացվի անձնակազմին: Իր չափաբաժինը պակասեցնելու պայմաններում, ինքը կարողացել է այնպես անել, որպեսզի բենզինը իրեն բավականացնի ծառայություն իրականացնելու համար: Գումարտակի ծառայությունը բենզինի պակասի պատճառով երբևէ չի խաթարվել: Ինքը տեսուչների կողմից որևէ բողոք չի ունեցել: Եղել են բացառիկ դեպքեր, երբ դասակի հրամանատարները դիմել են իրեն և հարցրել` հնարավոր է բենզինի քանակությունն ավելացնել, թե ոչ, սակայն ինքը չի կարող հիշել, թե որ դասակների հրամանատարներն են եղել նրանք:
Վկա Արսեն Մարդոյանը դատական քննության ընթացքում ցուցմունք տվեց այն մասին, որ 2011 թվականի ապրիլից մինչև նույն տարվա նոյեմբերը զբաղեցրել է 1-ին գումարտակի հրամանատարի պաշտոնը, իսկ ներկայում հանդիսանում է 2-րդ գումարտակի 1-ին վաշտի հրամանատարը: 1-ին գումարտակն ունեցել է 3 վաշտ` յուրաքանչյուրում 2-ական դասակ, իսկ գումարտակն ընդհանուր առմամբ ունեցել է 228 ծառայող և 95-97 տրանսպորտային միջոց: 1-ին վաշտի հրամանատարը եղել է Եղիշ Ենգիբարյանը, 2-րդ վաշտինը` Կարեն Օհանյան, իսկ 3-րդ վաշտինը` Արմեն Սարգսյանը: 1-ին գումարտակի բենզինի բաշխումը կատարել է տնտեսական բաժանմունքի աշխատակից Սամվել Մախմուրյանը: Ինքը, իր տեղակալները և վաշտի հրամանատարները Սամվել Մախմուրյանից բենզին ստացել են ամսական երկու անգամ, իսկ տեսուչները յուրաքանչյուր օր` ծառայության դուրս գալուց առաջ: Գումարտակի հրամանատարը և տեղակալները ամսական ստացել են 600 լիտր, գումարտակի ավագ տեսուչը և տեսուչը` 400 լիտր, վաշտի հրամանատարները և նրանց տեղակալները` 350 լիտր, շրջիկ կարգախմբերը` օրական 10 լիտր, իսկ պահակակետերի կարգախմբերը` օրական 5 լիտր: Սամվել Մախմուրյանից բենզին ստանալիս իրենք ստորագրել են համապատասխան քարտերում: Սամվել Մախմուրյանը բենզինն ստացել է Արա Լևոնյանից: Բաշխման վերաբերյալ Սամվել Մախմուրյանի կողմից կազմվել է հաշվետվություն, որը ներկայացվել է իր հաստատմանը: Հաշվետվության մեջ նշվել է, որ ամսական գումարտակին հատկացվել է 30.350 լիտր, իսկ մեկ ամիս 29.950 լիտր, սակայն Սամվել Մախմուրյանը ասել է, որ փաստացի ստացել է 28.000 լիտր բենզին, որն էլ բաժանել է: Երբ առաջին անգամ հաշվետվությունում ներկայացված և փաստացի ստացված բենզինի քանակների միջև եղել է տարբերություն, ինքն այդ մասին հարցրել է Սամվել Մախմուրյանին, ով իր հերթին այն պարզել է Արա Լևոնյանի հետ և ասել է, որ պակասը կհատկացվի հետագայում, սակայն իր աշխատած ժամանակահատվածում այդ պակասը չի հատկացվել: Քանի որ ամառային ամիսներին անձնակազմի արձակուրդները եղել են շատ, 28.000 լիտր բենզինը լիարժեք բավարարել է 1-ին գումարտակի ծառայության համար: Գումարտակի դասակների հետ յուրաքանչյուր ամիս առնվազն 2-3 անգամ տեղի ունեցող հանդիպումների ժամանակ ինքը մշտապես հարցրել է բեզնինի վերաբերյալ, սակայն տեսուչների կողմից որևէ բողոք կամ գանգատ չի լսել, բոլորն էլ ստորագրել են այն քանակության բենզինի համար, որքան ստացել են: Պակաս ստացած բենզինի հետևանքով իրենց գումարտակի աշխատանքները երբևէ չեն խաթարվել: 2011 թվականի աշնանային ամիսներին 1-ին գումարտակին հատկացվող բենզինի չափաբաժինը դարձել է մոտ 31.000 լիտր, որն իրենք փաստացի ստացել են:
Վկա Եղիշ Ենգիբարյանը դատական քննության ընթացքում ցուցմունք տվեց այն մասին, որ 2007 թվականից մինչև 2011 թվականների նոյեմբերն աշխատել է 1-ին գումարտակի 1-ին վաշտի հրամանատարի պաշտոնում: Իր անմիջական ղեկավարը եղել է Արսեն Արշակյանը: 1-ին վաշտն ունեցել է 26 տրանսպորտային միջոց և 76 ծառայող: Վաշտը ծառայությունն իրականացրել է շրջիկ և անշարժ պահակակետերում, որոնց հատկացվող բենզինի քանակները տարբերվել են միմյանցից: 1-ին վաշտի ծառայողներին, այդ թվում` իրեն և իր տեղակալին, բենզինը հատկացրել է Սամվել Մախմուրյանը: Ինքը վաշտին հատկացվող բենզինի հետ որևէ առնչություն չի ունեցել և տեղյակ չէ, թե Սամվել Մախմուրյանն ինչ կարգով է բենզին հատկացրել վաշտի ծառայողներին: Վաշտի հրամանատարի պաշտոնում աշխատած ժամանակ վաշտում ամեն ինչ նորմալ է եղել, վաշտի որևէ ծառայող իրեն չի բողոքել, որ բենզինի հետ կապված խնդիր ունի, իսկ վաշտի աշխատանքները երբևէ չեն խափանվել: Ինքն անձամբ Սամվել Մախմուրյանից 15 օրը մեկ ստացել է 175-ական լիտր բենզին, այսինքն` ամսական 350 լիտր, որի համար յուրաքանչյուր անգամ ստորագրել է համապատասխան քարտում: Երբևէ չի եղել դեպք, որ ինքը նշված քանակությամբ բեզնին չստանա: Այժմ ինքն աշախտում է 1-ին գումարտակի հրամանատարի պաշտոնում և ամսական ստանում է 600 լիտր բենզին: Այժմ բենզինը ստանում են ՃՈ պահեստից, որտեղ էլ լիցքավորվում է բենզինը, իսկ կտրոններ այլևս չեն տրվում: Նախնական քննության ընթացքում ինքը հայտնել է նույնը, ինչ հայտնել է դատարանում: Նախնական քննության ընթացքում ինքն ասել է, որ հատկացվող բենզինը չի բավականացրել լիարժեք ծառայության համար, սակայն դա իրականությանը չի համապատասխանում: Ինքը միայն թռուցիկ լսել է, որ բենզինը քիչ է հատկացվել, սակայն բենզինի չափաքանակի մասին Արսեն Արշակյանի կամ Մարգար Օհանյանի հետ որևէ խոսակցություն չի ունեցել: 1-ին գումարտակի մյուս վաշտերի հրամանատարների հետ երբևէ խոսակցություն չի եղել այն մասին` հատկացված բենզինը բավարարում է նրանց, թե ոչ:
Վկա Եղիշ Ենգիբարյանը նախնական քննության ընթացքում ցուցմունք է տվել այն մասին, որ 2007 թվականից զբաղեցնում է 1-ին գումարտակի 1-ին վաշտի հրամանատարի պաշտոնը: 1-ին վաշտում ընդգրկված են 2 դասակներ: Յուրաքանչյուր դասակ իր հերթին բաղկացած է 36-ական տեսչական կազմերից: Վաշտին հաշվեկռով հատկացված են ծառայողական 25 «Տոյոտա» մակնիշի ավտոմեքենաներ, ինչպես նաև նույն մակնիշի մեկական ավտոմեքենաներ ամրակցված են իրեն և տեղակալին: Յուրաքանչյուր օր ծառայության դուրս են գալիս 12-13 կարգախմբեր, որից 6 կարգախմբերը ծառայություն են իրականացնում պահակակետերում, իսկ մնացածն իրականացնում են շրջիկ ծառայություն: Մինչև 2011 թվականի ապրիլ-մայիս ամիսները վերակարգի հրահանգավորելուց հետո, որպեսզի կարգախմբի տեսուչները անհատապես չգնային բենզին ստանալու, տվյալ վերակարգի ողջ բենզինը ստացել են 2 դասակների հրամանատարները` Աշոտ Խաչատրյանը և Կարեն Ներսեսյանը, ովքեր բենզինի կտրոնները բաժանել են իրենց կարգախմբերին: Շարժական կարգախմբերին տրվել է 10-ական լիտր բենզինի կտրոն, իսկ պահակակետերի կարգախմբերին` 5-ական լիտր: Այդ կարգը գործում է 2011 թվականի ապրիլ-մայիս ամիսներից: Մինչ նշված ժամանակաշրջանը, գործել է բենզինի բաշխման հետևյալ կարգը. անկախ նրանից կարգախումբը շրջիկ է եղել, թե ոչ` շաբաթվա 2 օրը հատկացվել է 10 լիտր բենզին, իսկ մյուս 2 օրերին` 5 լիտր բենզին: 2 օր էլ տեսուչներին բենզին չի հատկացվել, ինչը մեծ դժգոհությունների առիթ է հանդիսացել տեսչական անձնակազմի կողմից, և նման պայմաններում տեսուչներն աշխատել են իր հրամանատարության ողջ ժամանակաշրջանում` մինչև 2011 թվականի ապրիլ-մայիս ամիսները: Միայն 1-ին գումարտակի նորանշանակ հրամանատար Արսեն Մարդոյանի պաշտոնավարության ժամանակ որոշակիորեն կարգավորվել է այդ հարցը: Նախորդող ժամանակաշրջանում հատկացվող բենզինի նման կարգի և չափաբաժնի վերաբերյալ, չնայած իրենց բողոքներին, ղեկավարությունը երբևիցե պատասխան չի տվել: Ինքը և իր տեղակալը պաշտոնավարության ողջ ժամանակաշրջանում ամսվա կտրվածքով ստացել են 350 լիտր բենզին: Յուրաքանչյուր անգամ ինքը Սամվել Մախմուրյանից ստացել է իր հասանելիք բենզինը և քարտի վրա ստորագրել է այն քանակի բենզինի դիմաց, որքան փաստացի ստացել է: Ծառայության ընթացքում շատ անգամներ տեսուչները գանգատվել են, որ հատկացվող բենզինի քանակը չի բավարարում ծառայությունն իրականացնելու համար: 2011 թվականի ապրիլ-մայիս ամիսներին նախորդող ժամանակաշրջաններում շաբաթվա 2 օր` 10 լիտր բենզին, 2 օր` 5 լիտր բենզին ստանալու, իսկ 2 օր բենզին չստանալու պայմաններում ծառայությունն իրականցվել է որոշակի բարդություններով և ծառայության իրականացումը եղել է իրենց պարտականությունը:
Վկա Կարեն Օհանյանը դատական քննության ընթացքում ցուցմունք տվեց այն մասին, որ 2007 թվականի հունիսի 4-ից զբաղեցնում է 1-ին գումարտակի 2-րդ վաշտի հրամանատարի պաշտոնը: 1-ին սպայական գումարտակի հրամանատարը եղել է Արսեն Արշակյանը, այնուհետև` Արսեն Մարդոյանը: 2-րդ վաշտն ունի 72 աշխատակից, իսկ վաշտին հատկացված է 23 կամ 24 մեքենա: Երևան քաղաքը սպասարկող ՃՈ ստորաբաժանումներում վաշտին հասանելիք բենզինը ստացել են այդ ստորաբաժանման տեսուչները, իսկ հրամանատարները ստացել են միայն իրենց հասանելիք բենզինը: Ինքն անձամբ ամսական մաս-մաս` 10 կամ 15 օրը մեկ, ստացել է իր ծառայողական մեքենային հասանելիք 350 լիտր բենզինը, իսկ վաշտի տեսուչներին հասանելիք բենզինի բաշխմանն ինքը որևէ առնչություն չի ունեցել: 2-րդ վաշտին հասնելիք բենզինը, մինչ Մարգար Օհանանի` ՃՈ պետ նշանակվելը, ինչպես նաև դրանից հետո, բաշխել է Սամվել Մախմուրյանը: Սամվել Մախմուրյանի մոտ եղել են բենզինի բաշխման քարտեր, որոնցում իր ծառայողական մեքենային հատակացվող բենզինն ստանալիս ինքը ստորագրել է: Ինքն այդ քարտերում միշտ ստորագրել է այնպիսի քանակության դիմաց, որքան բենզին իրականում ստացել է: Բաշխման քարտերը լրացրել է Սամվել Մախմուրյանը: Այդ քարտերը հաշվառում կատարելու համար իրենց վաշտին չեն հանձնվել: Ինքը բաշխման քարտերում գրառումների փոփոխություններ կամ ջնջումներ չի կատարել: Ինքը բենզինի ծախսի վերաբերյալ որևէ փաստաթուղթ չի կազմել: Իրեն հայտնի չէ, թե ըստ հաշվապահական փաստաթղթերի` իրեն հատկացված բենզինի քանակության դիմաց ամսական կտրվածքով ինչ քանակություն է ելքագրվել: Իր ստացած բենզինը ծառայություն կատարելու համար իրեն բավարարել է: Ինքը հիշում է, որ մեկ անգամ իր վաշտի տեսուչներն իրեն ասել են, որ նախատեսված բենզինը (ոչ թե նախատեսվածից քիչ քանակով հատկացնելը) չի բավարարում, իսկ ինքն ասել է, որ բենզինի հետ որևէ առնչություն չունի: Ինքն այդ մասին ասել է Արսեն Արշակյանին, ով ասել է, որ չափաբաժինը կավելացնեն: Ինքը Մարգար Օհանյանի հետ երբևէ չի խոսել վաշտին հատկացվող բենզինի չափաքանակն ավելացնելու մասին:
Վկա Արմեն Սարգսյանը դատական քննության ընթացքում ցուցմունք տվեց այն մասին, որ 2011 թվականի ապրիլից աշխատում է 1-ին գումարտակի 3-րդ վաշտի հրամանատարի պաշտոնում, իսկ մինչ այդ` 2008 թվականից աշխատել է 2-րդ վաշտի 2-րդ դասակի հրամանատարի պաշտոնում: 1-ին գումարտակի 3-րդ վաշտի անձնակազմը բաղկացած է վաշտի հրամանատարից, վաշտի հրամանատարի տեղակալից, դասակի երկու հրամանատարներից և 71 տեսուչներից: Վաշտին հատկացված է 33 տրանսպորտային միջոց, որից 29-ը` պարեկային մեքենաներ: 2009-2011 թականներին 1-ին գումարտակի հրամանատարը եղել է Արսեն Արշակյանը, ում 2011 թվականի գարնանը փոխարինել է Արսեն Մարդոյանը: Ինքը յուրաքնչյուր ամիս Սամվել Մախմուրյանից մաս-մաս ստացել է իր` «Տոյոտա-Կորոլա» մակնիշի ծառայողական մեքենայի համար նախատեսված 350 լիտր բենզինը, որի համար ստորագրել է համապատասխան ձևաթղթում: Այդ ձևաթղթում ստորագրել է միայն ինքը, իսկ ձևաթղթի հետագա ճակատագրից տեղյակ չէ: Երբևէ չի եղել, որ ինքն ստորագրի ինչ-որ քանակության բենզինի համար, սակայն ստանա դրանից քիչ: Վաշտի հրամանատարի տեղակալը բենզին ստացել է այնպես, ինչպես ինքը, իսկ տեսուչները բենզինը ստացել են յուրաքանչյուր օր` ծառայության դուրս գալուց առաջ: Դասակի հրամանատարը Սամվել Մախմուրյանից ստացել է այն քանակությամբ բենզին, որքան մեքենաներ դուրս են եկել ծառայության, և այն բաշխել տեսուչներին: Որքան հիշում է պահակակետում ծառայող տեսուչները ստացել են 5 լիտր, իսկ կարգախմբերը` 10 լիտր: Լրացուցիչ ծառայության և ուղեկցումների համար իրենց հատկացվել է հավելյալ բենզին: Ինքը բենզինի քանակի հետ կապված հարցրել է Սամվել Մախմուրյանին և գումարտակի ղեկավարությանը: Բենզինի պատճառով ստորաբաժանման աշխատանքները երբեք չեն խաթարվել: Իր ենթակա որևէ ծառայող իրեն երբևէ գրավոր կամ բանավոր չի ասել, որ բենզինի չափաբաժինը քիչ է կամ որ ստանում են նախատեսված չափաբաժնից քիչ բենզին:
Վկա Ստեփան Սեդրակյանը դատական քննության ընթացքում ցուցմունք տվեց այն մասին, որ 2007 թվականի հուլիսից մինչև 2011 թվականի մայիսն աշխատել է 2-րդ գումարտակի 1-ին վաշտի հրամանատարի պաշտոնում: Վաշտը սպասարկել է Արարատի և Արմավիրի մարզերը և ունեցել է 72 ծառայող ու 32 տրանսպորտային միջոց: 2009 թվականի հունվարից մինչև 2011 թվականի մայիսն ընկած ժամանակահատվածում ինքը բենզինն ստացել է 2-րդ գումարտակի հրամանատար Ստեփան Կարախանյանից: Ինքը բենզինն ստացել է կտրոններով` յուրաքանչյուր ամսի 1-ին կամ 2-ին և 15-ին կամ 16-ին: Բենզին ստանալու պահին Ստեփան Կարախանյանի հետ ընդունման-հանձնման ակտ չի կազմվել: Ստացված բենզինից ինքը 500-600 լիտրը վերցրել է իր ծառայողական մեքենայի համար, իսկ մնացածն ամբողջությամբ բաժանել է իր վաշտի երկու դասակի հրամանատարներին, ովքեր էլ իրենց հերթին այն բաժանել են անձնակազմերին: Դրանից հետո կազմվել է ընդհանուր հաշվետվություն, որը հանձնվել է գումարտակին: Հաշվետվությունը ստորագրել է ինքը, որտեղ նշվել է մեքենաների ընդհանուր քանակը, ստացված և ծախսված բենզինի քանակը: Ինքը հաշվետվություններում Ստեփան Կարախանյանի կարգադրությամբ ցույց է տվել իր ստացած բենզինի քանակությունից ավելի մեծ քանակության բենզին. իր հիշելով ինքը տարբեր ամիսների ստացել է 4.500, 5.000 կամ 5.500 լիտր բենզինի կտրոններ, սակայն հաշվետվություններում ցույց է տվել 10.000 կամ 12.000 լիտր: Զորակոչային ամիսներին ուղեկցումների համար բենզինն ավելի շատ է հատկացվել, որի ժամանակ հաշվետվությունում արտացոլվող թիվը նույնպես փոփոխվել է: Հաշվետվությունում նշվածից քիչ քանակությամբ բենզին ստանալու կապակցությամբ ինքը Մարգար Օհանյանի հետ զրույց չի ունեցել, որևէ մեկի հետ իր մտահոգությունները չի կիսել: Իր ղեկավարած վաշտի աշխատանքներն ընթացել են նորմալ, ծառայությունը երբևէ չի խաթարվել, իսկ ծառայողներն իրեն չեն դժգոհել բենզինի քանակից: Ինքն ու Մարգար Օհանյանը հաճախակի հանդիպել են, սակայն ինքը երբևէ նրան չի ասել, որ Ստեփան Կարախանյանը պակաս բենզին է հատկացնում: Դատական քննության և նախնական քննության ընթացքում իր տված ցուցմունքների միջև առկա հակասությունները պայմանավորված են վատ հիշողությամբ: Նախնական քննության ընթացքում իր տված ցուցմունքները համապատասխանում են իրականությանը:
Վկա Ստեփան Սեդրակյանը նախնական քննության ընթացքում` 2011 թվականի օգոստոսի 27-ին, ցուցմունք է տվել այն մասին, որ ՀՀ ոստիկանության համակարգում աշխատել է 1978 թվականից մինչև 2011 թվականի մայիսը: Վերջին զբաղեցրած պաշտոնը 2007 թվականի հուլիսի 1-ից սկսած եղել է 2-րդ գումարտակի 1-ին վաշտի հրամանատարի պաշտոնը: 1-ին վաշտն ունի 2 դասակ, 74 հաստիք և 41 ծառայողական ավտոմեքենա: Վաշտը սպասարկում է Արմավիրի և Արարատի մարզերի վարչական տարածքները: Վաշտի հրամանատարի տեղակալը հիշյալ ժամանակահատվածում եղել է Յուրա Հովհաննիսյանը, ով ներկայում նույն վաշտի հրամանատարն է: Գործունեության ողջ ընթացքում կարգախմբերին հատկացվող բենզինի պակաս քանակությանը եղել է մշտական խնդիր և դժգոհության առիթ իրենց կողմից: Սահմանված է եղել բենզինի ստացման հետևյալ ձևը. ամսվա կտրվածքով ծառայությանը հատկացվող բենզինը կտրոնների տեսքով ստացել են գումարտակի հրամանատար Ստեփան Կարախանյանից: Մասնավորապես` 2009 թվականի հունվարից մինչև իր պաշտոնավարության վերջին օրը, յուրաքանչյուր ամսվա կտրվածքով, 2 փուլով վաշտը ստացել է ընդհանուր 3.100 լիտր բենզին: Ինքը նշված բենզինց 400 լիտրը տվել է իր տեղակալին, 600 լիտրը պահել է իր օգտագործման համար, իսկ մնացած 2.100 լիտրը հավասար բաժանվել է երկու դասակների միջև: Չնայած այդ ամենին` գումարտակի հրամանատար Ստեփան Կարախանյանի կարգադրությամբ բենզինի ամսական հաշվետվությունները կազմվել են միանգամայն մեծ ցուցանիշներով, այսինքն` փաստացի 3.100 լիտր բենզինի փոխարեն հաշվետվությունները կազմվել են 8.000-10.000 լիտր բենզինի հաշվարկով: Թեև բանզինի հաշվետվությունը ստորագրել է անձամբ ինքը, սակայն դրանք կազմել է իր տեղակալ Յուրա Հովհաննիսյանը: Որոշակի տարբերությամբ քիչ ավել բենզին ստացել են զորակոչի ժամանակ` յուրաքանչյուր տարվա մայիս, հունիս, նոյեմբեր, դեկտեմբեր ամիսներին, որը կազմել է 4.100 լիտր, այսինքն` բենզինի օրինաչափ չափաբաժնից 1.000 լիտրով ավելի: Այդ նույն ամիսներին բենզինի հաշվետվությունները կազմվել են 10.000-15.000 լիտրի հաշվարկով: Բենզինը պակաս տրամադրելու հարցը բազմիցս բարձրացվել է գումարտակի հրամանատարի մոտ, իսկ պատասխանը եղել է մեկը` պակասն ընթացքում կլրացվի, սակայն իր աշխատած ժամանակահատվածում այդպես էլ բենզինը չի ավելացվել: Դասակի հրամանատարներին տրվող բենզինի վերաբերյալ որևէ փաստաթուղթ չի լրացվել, հաշվառում չի իրականացվել, քանի որ բենզինի քանակը չի համապատասխանել իրական թվերին, հետևապես նման հաշվառումը կլիներ ձևական: Բենզինը ստացել են «Միկա» կամ «Ֆլեշ» ընկերությունների բենզալցակայաններից:
Վկա Ստեփան Սեդրակյանը նախնական քննության ընթացքում` 2011 թվականի հոկտեմբերի 28-ին ցուցմունք է տվել այն մասին, որ ինքը չի հիշում, որ Ստեփան Կարախանյանն իրեն պարբերաբար, ամեն ամիս ստույգ 6.000 լիտր բենզին տված լինի: Քանի որ ինքը փաստացի ստացած բենզինի քանակության հաշվառում չի կատարել, դժվարացել է միանշանակ ասել, թե 2009 թվականի հունվարից մինչև 2011 թվականի մայիսը նեռարյալ ստույգ ինչ քանակությամբ բենզին է ստացել: Իր նախորդ ցուցմունքում, երբ նշել է, որ ամսական Ստեփան Կարախանյանից ստացել է 3.100 լիտր բենզին, իսկ զորակոչային ամիսներին` 4.100 լիտր, դա նշել է տոկոսային հարաբերությամբ, բայց իրականում չի կարող պնդել, որ դրանք ստույգ թվեր են: Իր աշխատած ժամանակահատվածում Ստեփան Կարախանյանը յուրաքանչյուր ամիս իրեն բենզին է հատկացրել երկու կամ երեք փուլերով և ամեն անգամ տարբեր քանակության բենզինի կտրոններ է տվել, որոնք նույն օրն ինքը բաժանել է անձնակազմին, ինչի պատճառով չի կարող կոնկրետ վերհիշել, թե ամսական Ստեփան Կարախանյանն ինչքան բենզին է հատկացրել 1-ին վաշտի համար: Ինքն իր նախկին ցուցմունքում բենզինի քանակությունը քիչ է նշել, որովհետև չէր հաշվարկել, թե ամսական որքան բենզին է հատկացրել իր աշխատակիցներին: Եթե մոտավոր հաշվարկ կատարի, ապա ամեն ամիս 700 լիտր բենզին պահել է իր ծառայողական ավտոմեքենայի համար, 400-ական լիտր բենզին տվել է իր տեղակալ Յուրա Հովաննիսյանին և երկու դասակների հրամանատարներին, ինչն արդեն ամսական կազմում է մոտ 1.800-1.900 լիտր բենզին: Սակայն իր վաշտի հաշվեկշռում մոտ 35-40 ավտոմեքենաների նույնպես հատկացվել է բենզին, ոչ ամբողջ քանակությամբ, համենայն դեպս իր մոտավոր հաշվարկներով ամսական յուրաքանչյուր ավտոմեքենային դասակի հրամանատարները հատկացրել են 70-90 լիտր բենզին: Այդ հաշվարկը կատարելով` կարող է ասել, որ 2009 թվականի հունվարից մինչև 2011 թվականի մայիսն ընկած ժամանակահատվածում յուրաքանչյուր ոչ զորակոչային ամիս Ստեփան Կարախանյանն իրեն հատակցրել է 4.500-5.000 լիտր բենզին: Հստակ հիշում է, որ ոչ զորակոչային ամիսներին 5.000 լիտրից ավել բենզին չի ստացել: Ինչ վերաբերում է զորակոչային մայիս, հունիս և նոյեմբեր, դեկտեմբեր ամիսներին, ապա հաստատ հիշում է, որ այդ ամիսներին Ստեփան Կարախանյանն արտահերթ հատկացրել է 1.000-ական լիտր ավել բենզին: Այդ հաշվարկով կարող է ասել, որ չի բացառվում, որ զորակոչային ամիսներին Ստեփան Կարախանյանը տրամադրած լինի մինչև 6.000 լիտր բենզին: Սակայն իր աշխատած ժամանակահատվածում Ստեփան Կարախանյանը 2-րդ գումարտակի 1-ին վաշտին պարբերաբար 6.000 լիտր բենզին չի տվել, դա չի համապատասխանում իրականությանը: Ոչ զորակոչային ամիսներին ինքը Ստեփան Կարախանյանից ստացել է ամսական առավելագույնը 5.000 լիտր բենզին, սակայն եղել են ամիսներ, որ դրանից քիչ քանակության բենզին է ստացել, սակայն չի կարող ստույգ հայտնել, թե յուրաքանչյուր կոնկրետ ամիս որքան բենզին է ստացել: Փաստաթղթային ձևակերպումները միանշանակ չեն համապատասխանում իրականությանը, քանի որ բենզինի ծախսի վերաբերյալ բոլոր փաստաթղթերը Ստեփան Կարախանյանի բանավոր հանձնարարությամբ խեղաթյուրվել են, և դրանց մեջ նշվել են իրականությանը չհամապատասխանող տվյալներ: Իր կողմից բենզինի քանակության վերաբերյալ իրարից տարբերվող տեղեկություններ հայտնելը ոչ մի այլ բանով պայմանանվորված չէ: Թե առաջին, թե ներկա ցուցմունքում ինքը բենզինի ստույգ քանակություն չի նշել, քանի որ ինքը Ստեփան Կարախանյանից փաստացի ստացած բենզինի քանակն ըստ ամիսների որևէ փաստաթղթում կամ սևագրում չի նշել: Թեև ինքը համաձայն չէ Ստեփան Կարախանյանի հետ (այն իմաստով, որ իր աշխատած ժամանակահատվածում ամեն ամիս իրեն տվել է 6.000 լիտր բենզին), սակայն նրա ցուցմունքում նույպես տրամաբանություն կա, քանի որ յուրաքանչյուր ամիս մոտ 2.000 լիտր բենզին փաստացի հատկացվել է միայն 1-ին վաշտի հրամանատարական կազմին, իսկ 2.500-3.000 լիտր բենզին բաժանվել է 1-ին վաշտի տեսչական անձնակազմին: 1-ին վաշտի վարչական անձնակազմը նույնպես բենզին ստացել է, սակայն քիչ քանակությամբ: Զուտ այդ հաշվարկների վրա հիմնվելով` հայտնել է, որ 2009 թվականի հունվարից, երբ սկսել են կտրոնների տեսքով կանոնավոր կարգով բենզին ստանալ, մինչև 2011 թվականի մայիսը Ստեփան Կարախանյանը ոչ զորակոչային ամիսներին 1-ին վաշտին հատկացրել է մոտ 4.500-5.000 լիտր բենզին` դրանից ոչ ավելի, իսկ զորակոչային ամիսներին` տվել է հավելյալ 1.000 լիտր բենզին, այսինքն` 2009-2011 թվականների մայիս հունիս, նոյեմբեր, դեկտեմբեր ամիսներին ստացել է 5.500-6.000 լիտր բենզին: Տեսչական անձնակազմին ամսական հատկացվող 70-90 լիտր բենզինով հնարավոր չէր նրանց կողմից լիարժեք ծառայություն իրականացնելը: Այդ պակասորդի հարցով տեսուչները դիմել են իրեն, իսկ ինքն էլ իր հերթին դիմել է Ստեփան Կարախանյանին, ով միայն ասել է, որ ընթացքում բենզինը կավելացվի: Ինքն այդ նույնը պատասխանել է իրեն ենթակա դասակի հրամանատարներին:
Վկա Յուրիկ Հովհաննիսյանը դատական քննության ընթացքում ցուցմունք տվեց այն մասին, որ ինքը լսել է, որ 2009-2011 թվականներին յուրացվել է բենզին, սակայն դրա քանակն ինքը չգիտի: 2011 թվականի հունիսի 3-ից ինքը նշանակվել է 2-րդ գումարտակի 1-ին վաշտի հրամանատարի պաշտոնում: Մինչ իր նշանակվելը 2-րդ գումարտակի 1-ին վաշտի հրամանատարը եղել է Ստեփան Սեդրակյանը: Այդ ընթացքում ինքն աշխատել է նրա տեղակալի պաշտոնում: Տեղակալ աշխատած ժամանակ ինքն ստացել է 300-400 լիտր բենզին: Վաշտն ունեցել է 76 ծառայող: 2-րդ գումարտակի 1-ին վաշտի հրամանատարի պաշտոնում նշանակվելուց հետո` 2011 թվականի հունիսին, 2 փուլով ինքը 2-րդ գումարտակի հրամանատար Ստեփան Կարախանյանից ստացել է 6.000 լիտր բենզին, սակայն հաշվետվության մեջ Ստեփան Կարախանյանի ասելով ցույց է տվել 15.000 լիտր: 15.000 լիտր ցույց տալու համար իրեն ասել է գումարտակի ավագ տեսուչ Հովիկ Ծառուկյանը: Վերջինը հեռախոսով ասել է վերջնական թիվը, իրենք էլ այն ներկայացրել են գումարտակի հրամանատարին: Իր կարծիքով եթե Հովիկ Ծառուկյանը Ստեփան Կարախանյանի հետ այդ թիվը համաձայնեցրած չլիներ, ապա իրենց հաշվետվությունը չէր ընդունվի: Ստեփան Կատախանյանն ասել է, որ բենզինը պակաս է հատկացվում պահեստամասերի և անվադողերի համար, իսկ պակասը հետագայում կլրացվի: Ինքը Ստեփան Կարախանյանին չի հարցրել, թե բենզինի, պահեստամասերի և անվադողերի կապն ինչում է կայանում: Ինքը վաշտի նախկին հրամանատար Ստեփան Սեդրակյանին չի հարցրել, թե այդ տարբերությունն ինչով է պայմանավորված եղել: 2011 թվականի հուլիս ամսին ինքը ստացել է 5.000 լիտր, իսկ հաշվետվությունում ցույց է տվել 12.000 կամ 13.000 լիտր: 6.000 լիտրից հետո 5.000 լիտր ստանալու պայմաններում ինքը ոչ ոքի չի հարցրել, թե հատկացվող բենզինի քանակն ինչու է նվազել, քանի որ ասել են, որ պակասը կլրացվի: Դրանից հետո վաշտն ստացել է 11.000 լիտր բենզին, իսկ մոտ 3 ամիս հետո ստացել են անվադողեր, սակայն չի կարող ասել` դա կապ ուներ այն բենզինի կտրոնների հետ, թե ոչ: Իր ստացած 6.000 և 5.000 լիտր բենզինն ինքը դասակի հրամանատարների միջոցով ամբողջությամբ բաժանել է տեսուչներին: Ստացած բենզինի չափի վերաբերյալ ինքն իր մոտ նշումներ է կատարել: Բենզինի սակավության կապակցությամբ վաշտի աշխատողները դժգոհել են իր տեղակալին կամ դասակի հրամանատարներին, սակայն այդ հարցով իրեն ոչ ոք չի դիմել: Ինքը ՃՈ պետ Մարգար Օհանյանի հետ ունեցել է ծառայողական հանդիպումներ, սակայն բենզինի քանակի ավելացման կամ քիչ հատկացնելու մասին չի հասցրել տեղեկացնել նրան, քանի որ աշխատել է կարճ ժամանակ: Գումարտակից վաշտին բենզին հատկացնելու ժամանակ բաշխման քարտ չի կազմվել: Բենզինի շարժի վերաբերյալ ամսվա վերջում կազմվել է միայն հաշվետվություն: Իր աշխատած ժամանակահատվածում ՃՈ աշխատանքները չեն խաթարվել:
Վկա Արմեն Կարապետյանը նախնական քննության ընթացքում` 2011 թվականի օգոստոսի 27-ին, ցուցմունք է տվել այն մասին, որ 2006 թվականից զբաղեցրել է 2-րդ գումարտակի 2-րդ վաշտի հրամանատարի պաշտոնը: 2-րդ վաշտի անձնակազմը բաղկացած է եղել 87 անձից, իսկ վաշտին ամրացված է եղել 46 տրանսպորտային միջոց: Վաշտի համար նախատեսված բենզինի կտրոններն ինքը յուրաքանչյուր ամիս մաս-մաս (հիմնականում երկու անգամ) ստացել է 2-րդ գումարտակի հրամանատար Ստեփան Կարախանյանից: 2011 թվականի հունվարից մինչև հունիս-հուլիս ամիսները յուրաքանչյուր ամսվա համար ինքը Ստեփան Կարախանյանից ստացել է 3.500-ական լիտր «ռեգուլյար» տեսակի բենզինի կտրոններ, սակայն ամսական հաշվետվությունները հանձնելիս Ստեփան Կարախանյանի բանավոր ցուցումով դրանցում բենզինի ծախսը նշվել է անհամեմատ շատ: Մասնավորապես` 2011 թվականի հունվարին հաշվետվությունում բենզինի ծախսը նշվել է 10.500 լիտր, փետրվար, մարտ և ապրիլ ամիսներին` 10.250-ական լիտր, մայիսին և հունիսին` 15.000-ական լիտր, իսկ հուլիսին` 13.000 լիտր: Նախքան բենզինի ծախսի վերաբերյալ ամսական հաշվետվություններ կազմելը, իր հետ անձամբ հեռախոսով խոսել է Ստեփան Կարախանյանը կամ 2-րդ գումարտակի աշխատակից Հովիկ Ծառուկյանը և իրեն բանավոր ասել, թե ինքը նախորդ ամսվա հաշվետվությունում ինչ քանակությամբ բենզինի ծախս պետք է ցույց տա: Ստեփան Կարախանյանից բենզինի կտրոնները փաստացի ստանալիս ինքը քարտում չի ստորագրել, և այդ պահին հայտնի չի եղել, թե ինչ քանակությամբ բենզին պետք է հատկացվեր 2-րդ վաշտին: Ինքը վաշտի հաշվետվությունները հանձնել է Ստեփան Կարախանյանին կամ Հովիկ Ծառուկյանին, և միայն այդ ժամանակ է ստորագրել նախորդ ամսվա բենզինի հատկացման քարտում, որտեղ նշված է եղել բենզինի այն քանակությունը, որն արտացոլված է եղել իրենց ամսական հաշվետվություններում: 2011 թվականի հունվար-հուլիս ամիսներին ինքը երբևէ Ստեփան Կարախանյանից չի ստացել փաստաթղթերում նշված բենզինի քանակությունը, այլ ամսական ստացել է ընդամենը 3.500 լիտր բենզինի կտրոն: Ինքը մի քանի անգամ բենզինի քիչ քանակություն տրամադրելու հարցը բարձրացրել է Ստեփան Կարախանյանի մոտ, ասել է, որ հատկացված 3.500 լիտրը չի բավարարում ծառայությունը կազմակերպելու համար, խնդրել է ավելացնել վաշտին հատկացվող բենզինի քանակությունը: Ստեփան Կարախանյանը յուրաքանչյուր անգամ իրեն հավաստիացրել է, որ ընթացքում բենզինի քանակությունը կավելացնի, բայց այն 2011 թվականի ընթացքում մնացել է անփոփոխ: Բենզինի քիչ քանակություն տրամադրելու հարցով ինքը երբևէ չի դիմել ՃՈ ղեկավարությանը կամ իրավապահ մարմիներին: Վաշտի հաշվեկշռում 2 «ՎԱԶ-2106» մակնիշի ավտոմեքնենաները խափանված լինելու պատճառով 2010 թվականի հոկտեմբերից չեն շահագործվել: Ինքը բազմիցս Ստեփան Կարախանյանին հարցրել է, թե մինչև երբ պետք է չշահագործվող 2 ավտքոմեքնենաների համար հաշվետվություներում բենզինի ծախս լրացնի, իսկ նա ասել է, որ բենզինի ծախս պետք է լրացվի մինչև նոր մեքենաներ ստանալը, որպեսզի բենզինի քանակը չկրճատվի: Բացի այդ, Ստեփան Կարախանյանն իրեն ուղղակի ցուցում է տվել վաշտի հաշվեկշռից դուրս չգրել փաստացի չշահագործվող տրանսպորտային միջոցները, որպեսզի ամսական վաշտին տրամադրվող բենզինի քանակությունը չկրճատվի, իսկ ինքը կատարել է իր ղեկավարի ցուցումը:
Վկա Արմեն Կարապետյանը նախնական քննության ընթացքում` 2011 թվականի սեպտեմբերի 16-ին, ցուցմունք է տվել այն մասին, որ 2009-2010 թվականների ընթացքում ինքը գումարտակի հրամանատար Ստեփան Կարախանյանից ամսական ստացել է 3.500-ական լիտր բենզինի կտրոն` բացառությամբ 2009-2011 թվականների ընթացքում մայիս-հունիս և նոյեմբեր-դեկտեմբեր ամիսների, քանի որ նշված ամիսներին, կապված զորակոչային ուղեկցումների հետ, ինքը ստացել է 700-ական լիտրով ավել, այսինքն` նշված ամիսներին ստացել է 4.200-ական լիտր: Ինքը կտրոններն ստանալիս որևէ փաստաթուղթ չի ստորագրել: Իր կողմից ստացված կտրոնները դասակի հրամանատարների միջոցով ամբողջությամբ բաշխվել է տեսչական անձնակազմին: Բախշման քարտերում լրացված` հավելագրումներով ծախսի քանակի դիմաց, կոնկրետ ծառայողական ավտոմեքենայի հաշվարկով, ստորագրել է այն տեսուչը, ում ամրակցված է եղել տվյալ ավտոմեքենան:
Վկա Արմեն Կարապետյանը նախնական քննության ընթացքում` 2011 թվականի հոկտեմբերի 31-ին, ցուցմունք է տվել այն մասին, որ իրականությանը չեն համապատասխանում Ստեփան Կարախանյանի այն ասածները, թե իբր յուրաքանչյուր ամիս 2-րդ վաշտին տվել է 6.000 լիտր բենզինի կտրոն: Յուրաքանչյուր ամիս 2-րդ վաշտին տրամադրվող բենզինի քանակությունն իրեն տրվել է հիմնականում 2 կամ 3 փուլերով` խառը քանակությամբ: Իր նախորդ ցուցմունքներում ինքը նշել է, որ ոչ զորակոչային ամիսներին Ստեփան Կարախանյանից ստացել է մոտ 3.500 լիտր բենզին, իսկ զորակոչային ամիսներին` 4.200 լիտր: Սակայն այդ ցուցմունքը տալուց հետո ինքը խոսել է 2-րդ վաշտի դասակների հրամանատարներ Մանուկ Կիրակոսյանի և Գևորգ Դավթյանի հետ, հնարավորին չափ հաշվարկներ են կատարել, թե փաստացի յուրաքանչյուր ամիս ինչ քանակությամբ բենզին են ստացել և բաշխել դասակների, ինչպես նաև վաշտի հրամանատարական կազմի և վարչական պրակտիկայի տեսուչների միջև: Պարզվել է, որ յուրաքանչյուր ամիս 2-րդ վաշտի 1-ին և 2-րդ դասակների հրամանատարներից յուրաքանչյուրին ինքը տվել է 1.500-1.700 լիտր բենզին, սակայն դրանից բացի, ամեն ամիս մոտ 600-700 լիտր բենզին ծախսել է իր ծառայողական մեքնենան: Ինքն իր տեղակալ Սուքիաս Գրիգորյանին ամսական տվել է 400 լիտր բենզին: Բացի այդ, ինչ-որ քանակության բենզինի կտրոն հատկացրել են նաև 2-րդ վաշտի վարչական տեսուչներին, սակայն չի կարող ասել, թե ինչ քանակության: Այսինքն` իր մոտավոր հաշվարկներով յուրաքանչյուր ամիս Ստեփան Կարախանյանը 2-րդ վաշտին տրամադրել է մոտ 4.500-5.000 լիտր բենզին, (ինքը 5.000 լիտրը նշում է առավելագույն քանակով): Իր նախորդ ցուցմունքներում նշած 3.500 լիտրը հավանաբար եղել է միայն 2-րդ վաշտի 1-ին և 2-րդ դասակներին փաստացի հատկացված բենզինի քանակությունը, իսկ հրամանատարական կազմին և վարչական կազմին հատկացված բենզինի քանակությունը չի հաշվարկել: Ինքը Ստեփան Կարախանյանից փաստացի ստացված բենզինի քանակությունը որևէ փաստաթղթում չի նշել: Փաստաթղթերում միայն արտացոլվել է իրականությանը չհամապատասխանող այն բենզին քանակությունը, որն ինքը ձևակերպել է բենզինի ծախսի վերաբերյալ ամսական հաշվետվություններում: Այդ իսկ պատճառով դժվարացել է կոնկրետ հայտնել, թե 2009 թվականի հունվարից մինչև 2011 թվականի հուլիսն ինքը Ստեփան Կարախանյանից կոնկրետ ինչ քանակության բենզին է ստացել` ըստ ամիսների, սակայն հստակ կարող է ասել, որ յուրաքանչյուր ամիս իրեն հատկացվող բենզինի քանակությունը չի գերզանացել 5.000 լիտրը: Իսկ զորակոչային` մայիս, հունիս, նոյեմբեր և դեկտեմբեր ամիսներին Ստեփան Կարախանյանը 2-րդ վաշտին ամսական հավելյալ տրամադրել է 700-1.000 լիտր բենզին: Այդպիսով, հնարավոր է, որ 2009-2011 թվականների ընթացքում Ստեփան Կարախանյանը զորակոչային` մայիս, հունիս, նոյեմբեր և դեկտեմբեր ամիսներին 5.500-6.000 լիտր բենզին հատկացրած լինի իր վաշտին, իսկ մնացած` ոչ զորակոչային ամիսներին ինքը Ստեփան Կարախանյանից ամսական ստացել է առավելագույնը 5.000 լիտր բենզին: Քրեական գործի քննության ընթացքում ինքը զրուցել է իր վաշտի տեսչական անձնակազմի հետ և ճշտել, որ 2009-2011 թվականների ընթացքում 2-րդ վաշտի հաշվեկշռում գտնվող 33 «Տոյոտա Կորոլա» մակնիշի ծառայողական ավտոմեքենաներից յուրաքանչյուրին դասակի հրամանատարների կողմից ամսական փաստացի տրամադրվել է 80-120 լիտր բենզին:
Վկա Նիկողայոս Եղիազարյանը դատական քննության ընթացքում ցուցմունք տվեց այն մասին, որ իր ղեկավարած 2-րդ գումարտակի 3-րդ վաշտը սպասարկում է Կոտայքի մարզը: Վաշտն ունի 61 աշխատակից և 34 տրանսպորտային միջոց, որոնցից շահագործվել են 32-ը: Վաշտի հրամանատարի պաշտոնում նշանակվելու հենց սկզբից ինքը վաշտին հասանելիք բենզինն ստացել է 2-րդ գումարտակի հրամանատար Ստեփան Կարախանյանից, ինչպես նաև յուրաքանչյուր ամսվա սկզբում նրան է ներկայացրել բենզինի վերաբերյալ նախորդ ամսվա հաշվետվությունները: Բենզին ստանալիս իր և Ստեփան Կարախանյանի միջև որևէ փաստաթուղթ չի կազմվել: 2009 թվականի հունիս, հուլիս և օգոստոս ամիսների հաշվետվություններում Ստեփան Կարախանյանի հանձնարարությամբ գրվել են փաստացի ստացած բենզինի քանակից կրկնակի անգամ ավել թվեր: Ստեփան Կարախանյանն ասել է, որ այդպես գրելու դեպքում կհատկացվեն նոր անվադողեր: Ինքն անձնական կապեր ունի ՃՈ պետ Մարգար Օհանյանի հետ, սակայն աշխատանքային հարցերով երբևէ նրան չի դիմել: Բենզինի պակասի հետևանքով իրենց վաշտի աշխատանքները չեն խափանվել:
Վկա Սերյոժա Հակոբյանը դատական քննության ընթացքում ցուցմունք տվեց այն մասին, որ աշխատել է 2-րդ գումարտակի 4-րդ վաշտի հրամանատարի պաշտոնում: Վաշտն ունեցել է 60 ծառայող և 26 ավտոմեքենաներ, սակայն, դրանցից ոչ բոլորն են ամսվա ընթացքում շահագործվել: Վաշտին տրամադրվող բենզինն ստացել է ինքը, և դրա բաշխումը կատարվել է իր հսկողությամբ: Ինքն անձամբ գումարտակի հրամանատար Ստեփան Կարախանյանից բենզինն ստացել է կտրոնների տեսքով` յուրաքանչյուր ամիս երկու փուլով: Բենզինն ստանալիս Ստեփան Կարախանյանի մոտ ոչինչ չի ստորագրվել, իսկ ամսվա վերջում կազմվել և ստորագրվել է հաշվետվություն, որտեղ նշվել է, մեքենայի մակնիշը, պետհամարանիշը, հատկացված բենզինը, կատարած վազքը և այն տեսուչի անուն, ազգանունը, ում ամրակցված է եղել մեքենան: Հաշվետվությունը կազմել է իր տեղակալ Արթուր Ղալումյանը, իսկ ինքը ստորագրել է այն, որից հետո այն ներկայացվել է գումարտակի հրամանատարին: Իրենք հաշվետվություններում նշել են այնպիսի թվային տվյալներ, որոնք իրենց հանձնարարվել է: 2009 թվականի հունվարից մինչև 2011 թվականի հունվարը վաշտին յուրաքանրյուր ամիս հատկացվել է 3.500-5.000 լիտր բենզին, սակայն այդ ժամանակահատվածում հաշվետվություններում բենզինի քանակությունը շուրջ 500-600 լիտրով ավել է ցույց տրվել: 2011 թվականի հունվարից սկսած 7 ամիսների ընթացքում առաջին 4 ամիսներին վաշտին հատկացված բենզինի քանակը կազմել է համապատասխանաբար 4.000, 4.200, 4.300 և 4.200 լիտր, իսկ հաջորդ 3 ամիսներին` 4.500-ական լիտր, սակայն հաշվետվություններում առաջին 4 ամիսների ընթացում ցույց է տրվել 8.000-ական լիտր, իսկ հաջորդ 3 ամիսներին` համապատասխանաբար 14.000, 14.000 և 12.000 լիտր: Գումարտակի հրամանատար Ստեփան Կարախանյանն իրեն ասել է, որ դա արվում է, որպեսզի մեքենաներին հատկացվեն անվադողեր: Ստացված բենզինն ինքն ամբողջությամբ բաշխել է վաշտի ծառայողներին: Տեսչական անձնակազմը հաճախակի բողոքներ է ներկայացրել, որպեսզի բենզինն ավելացվի, իսկ ինքն ասել է, որ կդիմի ղեկավարությանը: Ինքը դիմել է գումարտակի հրամանատարին, ով ասել է, որպեսզի եղածով բավարարվեն: Ինքը ՃՈ պետին չի դիմել, քանի որ իր անմիջական ղեկավարը եղել է գումարտակի հրամանատարը, ում ինքը վստահել է: Փաստացի ստացված բենզինի քանակությունը որևէ տեղ չի ֆիքսվել, ինքն ուղղակի հիշում է դրանք:
Վկա Մերուժան Կարապետյանը նախնական քննության ընթացքում ցուցմունք է տվել այն մասին, որ 2007 թվականի հուլիսից միչև 2011 թվականի ապրիլը զբաղեցրել է 2-րդ գումարտակի 5-րդ վաշտի հրամանատարի պաշտոնը: 5-րդ վաշտը սպասարկել է Լոռու մարզը և իր հաշվեկշռում ունեցել է ընդհանուր 36 ավտոմեքենաներ` 1 «Պրադո», 29 «Տոյոտա Կորոլա» և 6 «ՎԱԶ-2106» մակնիշների մեքենաներ: Վաշտը բաղկացած է եղել 2 դասակներից: 1-ին դասակի հրամանատարը եղել է Մարտին Կամենդարյանը, 2-րդ դասակինը` Սմբատ Նորեկյանը: Իր անմիջական ղեկավարը հանդիսացել է 2-րդ գումարտակի հրամանատար Ստեփան Կարախանյանը: Յուրաքանչյուր ամսվա 1-5-ն ընկած ժամանակահատվածում 2-րդ գումարտակի հրամանատար Ստեփան Կարախանյանին ներկայացվել է հաշվետվություն կատարած աշխատանքների, այդ թվում` վաշտում ծախսված վառելիքի վերաբերյալ: 2011 թվականի մայիսին իր փոխարեն պաշտոնի է նշանակվել Վարդան Նարգիզյանը: 2009 թվականի հունվարից ինքը Ստեփան Կարախանյանից ստացել է 4.400 լիտր բենզինի կտրոն և անձամբ, նրա բանավոր ցուցումով, վառելիքի ծախսի վերաբերյալ հաշվետվությունները հաստատել է 8.000 լիտր ամսական վերջնահաշվարկով: 3.500 լիտր պակաս բենզին ստանալու հարցը շոշափվել է Ստեփան Կարախանյանի աշխատասենյակում մնացած 5 վաշտերի հրամանատարների կողմից, քանի որ փաստացի ստացված բենզինը չի բավականացրել ծառայողներին: Ստեփան Կարախանյանը պատճառաբանել է, որ ընթացքում բենզինը կավելացնեն: Փաստացի ստացված 4.400 լիտր բենզինի կտրոնները եղել են «Միկա», «Ֆլեշ» կամ «Սի Փի Էս» ընկերությունների: Ինքը 200 լիտր բենզին տրամադրել է իր տեղակալին, 300-500 լիտր վերցրել է իր ծառայողական ավտոմեքենայի համար, իսկ մնացած 3.600 լիտր բենզինի կտրոնները տվել է իր 2 դասակների հրամանատարներին` Մարտին Կամենդարյանի, Սմբատ Նորեկյանին, ովքեր էլ իրենց հերթին այն հավասարաչափ բաժանել են իրենց անձնակազմերին: Նշված 4.400 լիտր բենզինն ինքը ստացել է մինչև 2010 թվականի վերջը, իսկ 2010 թվականի նոյեմբեր-դեկտեմբեր ամիսներին, աշնանային զորակոչի հետ, կապված Ստեփան Կարախանյանից ստացել է 900 լիտր բենզին: 2009 թվականի հունվարից մինչև 2010 թվականի փետրվարն ինքը Ստեփան Կարախանյանի ցուցումով հաշվետվություններում որպես բենզինի ծախս նշել է 6.600 լիտր, սակայն փաստացի ստացել է 4.400 լիտր բենզինի կտրոն: 2010 թվականի հետագա ամիսների ընթացքում` մարտ-ապրիլ ամիսներին, Ստեփան Կարախանյանի ցուցումով բենզինի ծախսի վերաբերյալ ավելի քիչ հաշվետվություն է ներկայացրել, սակայն մայիս ամսից սկսած հաշվետվություն է ներկայացրել 9.000, 8.000 կամ 8.500 լիտր` կախված նրանից, թե իրեն ինչ ցուցում է տվել Ստեփան Կարախանյանը, իսկ փաստացի ստացել է նույն 4.400-ական լիտր բենզինը: 2011 թվականի հունվար-ապրիլ ամիսներին ինքը Ստեփան Կարախանյանից ամսական ստացել է 5.000 լիտր բենզին, սակայն չի կարող ասել, թե ինչով է պայմանավորված եղել բենզինի քանակության ավելացումը: Այսպիսով` 2009 թվականի հունվարից մինչև 2010 թվականի դեկտեմբերն ինքը Ստեփան Կարախանյանից ամսական ստացել է 4.400-ական լիտր բենզինի կտրոն, 2010 թվականի նոյեմբեր-դեկտեմբեր ամիսներին` ամսական 450 լիտրով ավել, իսկ 2011 թվականի հունվար-ապրիլ ամիսներին` 5.000-ական լիտր բենզինի կտրոն: Ինքը չի հիշում, թե այդ ժամանակահատվածում յուրաքանչյուր ամսվա հաշվետվություններում ինչ քանակությամբ բենզինի ծախս է ձևակերպվել: Ստեփան Կարախանյանը հաշվետվություններում բենզինի հավելագրումները պատճառաբանել է նրանով, որ ավտոմեքենաների վազքն ավելացնելով կկարողանան վաշտի մեքենաների համար անվադողեր և այլ պահեստամասեր ձեռք բերել: Ստեփան Կարախանյանից փաստացի 4.400 լիտր բենզինի կտրոն ստանալուց և վերջինի ցուցումով հաշվետվությունում բավականին բարձր թվերով վառելիքի ծախս ցույց տալուց հետո, մտնելով 2-րդ գումարտակի ավագ տեսուչ Հովիկ Ծառուկյանի աշխատասենյակ, ինքը ստորագրել է նաև հավելագրված թվերով բենզինի բացթողման քարտը:
Վկա Կամո Կարապետյանը դատական քննության ընթացքում ցուցմունք տվեց այն մասին, որ աշխատել է 2-րդ գումարտակի 5-րդ վաշտի հրամանատարի տեղակալի պաշտոնում: Վաշտը սպասարկում է Լոռու մարզը և Նոյեմբերյանի վարչական տարածքը: 2011 թվականի մայիս ամսին վաշտը հրամանատար չի ունեցել և ինքը ժամանակավոր զբաղեցրել է հրամանատարի պաշտոնը: 2011 թվականի մայիս ամսին ինքը մի քանի փուլով գումարտակի հրամանատար Ստեփան Կարախանյանից ստացել է 6.000 լիտր բենզին, սակայն հաշվետվությունում Ստեփան Կարախանյանի ցուցումով ներկայացրել է 14.000 լիտր: Ստացված բենզինը ինքը բաժանել է վաշտի դասակների հրամանատարներին: Ստեփան Կարախանյանից բենզին ստանալիս ինքը որևէ փաստաթուղթ չի ստորագրել: Ինքը ոչ մեկին չի հարցրել, թե այդ պակաս հատկացված բենզինն ում է բաժին հասել: Ստացած 6.500 լիտր բենզինի վերաբերյալ ինքը որևէ տեղ գրառում չի կատարել: 2011 թվականի օգոստոսից հետո իր հասանելիք բենզինն ավելացել է, և ինքը որպես հրամանատարի տեղակալ նախկին 250-350 լիտրի փոխարեն ամսական ստացել է 500-600 լիտր բենզին: Մինչ այդ ծառայությունը նույն ծավալով կատարելու համար ստացված բենզինը չի բավարարել, ծառայությունը կազմակերպվել է նույն ձևով, սակայն մեքենաները քիչ են շահագործվել: Քիչ բենզին ստանալու պայմաններում տեսուչներն իրենց երթուղիներում քիչ են շրջել, և ծառայությունը խափանվել է: Բենզինի քանակությունն ավալացնելուց հետո ծառայությունն ավելի արդյունավետ ծավալով է իրականացվել: Բենզինի պակասի պայմաններում չի եղել դեպք, որ տեսուչները չգնան դեպքի վայր կամ շուկայի վերակարգը չգնա շուկայի մոտ: Մինչ իր պաշտոնակատար աշխատելը, վաշտի հրամանատարը եղել է Մերուժան Կարապետյանը, իսկ 2011 թվականի մայիսի 26-ին վաշտի հրամանատար է նշանակվել Վարդան Նարգիզյանը: 2011 թվականի դեկտեմբերին ինքն ազատվել է աշխատանքից:
Վկա Վարդան Նարգիզյանը դատական քննության ընթացքում ցուցմունք տվեց այն մասին, որ 2011 թվականի մայիսի 24-ին նշանակվել է 2-րդ գումարտակի 5-րդ վաշտի հրամանատարի պաշտոնում: Մինչ իր նշանակումը վաշտի հրամանատարի պարտականությունները կատարել է վաշտի հրամանատարի տեղակալ Կամո Կարապետյանը: 5-րդ վաշտը սպասարկում է Սպիտակի, Գուգարքի, Վանաձորի, Ստեփանավանի, Տաշիրի, Ալավերդու և Նոյեմբերյանի վարչական տարածքները, ունի 68 ծառայող, 31 «Տոյոտա-Կորոլա» և 1 «Տոյոտա-Պրադո» մակնիշների մեքենաներ: Նշանակումից հետո ինքն առաջին անգամ բենզին ստացել է հունիս ամսին: Ինքը բենզինն ստացել է Ստեփան Կարախանյանից նրա աշխատասենյակում` ամսական երկու անգամ: Բենզինն ստանալիս որևէ փաստաթուղթ չի կազմվել: Հունիս և հուլիս ամիսների վերջին կազմվել են հաշվետվություններ, որնցում նշվել է, որ այդ ամիսներին ստացվել է համապատասխանաբար 14.000 և 12.000 լիտր բենզին, սակայն ինքը փաստացի հունիսին ստացել է 5.000 լիտր, իսկ հուլիսին` 4.100 լիտր բենզին: Հաշվետվությունները կազմել է իր տեղակալ Կամո Կարապետյանը, իսկ ինքը ստորագրել է այն: Կամո Կարապետյանն իրեն ասել է, որ Ստեփան Կարախանյանն է ասել, որպեսզի հաշվետվությունում նշվի 14.000 լիտր: Ինքն այդ հարցով դիմել է Ստեփան Կարախանյանին, ով ասել է, որ ստացել են պակաս բենզին, հետագայում կստանան և կտան պակասը: Ինքն աշխատակիցների կողմից բենզինի քանակի վերաբերյալ դժգոհություններ չի լսել, իսկ ստացված բենզինը հավասարաչափ բաժանել է անձնակազմին: Քրեական գործի հարուցումից հետո բենզինի չափաքանակը ավելացել է և այժմ ստանում են 10.000 լիտրից ավել քանակության բենզին` 10.200, 11.000 կամ 11.270 լիտր: Ստեփան Կարախանյանի հետ ունեցած խոսակցություններին ՃՈ պետ Մարգար Օհանյանը որևէ առնչություն չի ունեցել: Ինքը երբևէ Մարգար Օհանյանին չի դիմել, քանի որ վստահել է Ստեփան Կարախանյանին: Իր վաշտի աշխատանքները բենզինի պատճառով չեն խաթարվել:
Վկա Արամ Գալստյանը դատական քննության ընթացքում ցուցմունք տվեց այն մասին, որ 2007 թվականից աշխատում է 2-րդ գումարտակի 6-րդ վաշտի հրամանատարի պաշտոնում: 6-րդ վաշտը սպասարկում է Սյունիքի և Վայոց ձորի մարզերը և ունի 52 ծառայող ու 21 տրանսպորտային միջոց: Վաշտի հրամանատարի տեղակալը Գեղամ Մարգարյանն է: 6-րդ վաշտին հասանելք բենզինն ինքն անձամբ կտրոնների տեսքով ստացել է 2-րդ գումարտակի հրամանատար Ստեփան Կարախանյանից` յուրաքանչյուր ամսվա սկզբին և երկրորդ կեսին: Ստացվող բենզինը լիցքավորվել է «Միկա» և «Ֆլեշ» ընկերություններին պատկանող բենզալցակայաններից: Զորակոչային ամիսներին վաշտը ստացել է մոտ 5.000 լիտր բենզին, իսկ մնացած ամիսներին` մոտ 4.500 լիտր: Յուրաքանչյուր ամսվա վերջում իր կողմից կազմվել և ստորագրվել է հաշվետվություն, որը ներկայացվել է Ստեփան Կարախանյանին: 2009 թվականի հունվարից մինչև 2011 թվականի հունիս ամիսն ինքը Ստեփան Կարախանյանի գիտությամբ և հանձնարարությամբ հաշվետվություններում բենզինի ծախսը ցույց է տվել ավելի շատ, քան ստացել է: Յուրաքանչյուր կոնկրետ դեպքում Ստեփան Կարախանյանն է ասել, թե որքան բենզինի ծախս ցույց տան: Ստեփան Կարախանյանը նաև ասել է, որ բենզինի շատ ծախս ցույց տալն անհրաժեշտ է, որպեսզի շուտ փոխարինեն մեքենաների անվադողերը: Ստեփան Կարախանյանն ասել է, որ հաջորդ ամիսներին բենզինի պակաս քանակությունը կլրացվի, սակայն պակասն այդպես էլ չի լրացվել: Ստացած բենզինի քանակությունը վաշտին բավարարել է ծառայությունը նորմալ իրականացնելու համար: Ինքը պակաս բենզին ստանալու և ավել քանակություն ցույց տալու մասին որևէ մեկին, այդ թվում` ՃՈ պետին չի հայտնել: 2011 թվականի օգոստոսից հետո փաստացի ստացված բենզինի քանակությունն ավելացել է, և վաշտը ստացել է 7.000-8.000 լիտր բենզին: Բենզինի ավելացման պայմաններում ավելի շատ են ծառայություն իրականացնում, քանի որ մայրուղիներում երթուղիները ավելացել են, իսկ նախկինում մայրուղիներում ծառայությունը քիչ են իրականացրել: Նախնական քննության ընթացքում ցուցմունք տալու ժամանակ իր մոտ առկա են եղել գրառումներ, որոնց նայելով քննիչին հստակ հայտնել է ստացած բենզինի քանակությունը: Նախանական քննության ընթացքում իր կողմից նշված թվերը համապատասխանում են իրականությանը:
Վկա Արամ Գալստյանը նախնական քննության ընթացքում ցուցմունք է տվել այն մասին, որ 2009 թվականից սկսած, յուրաքանչյուր ամիս` 2 փուլով, մինչև 2011 թվականի հունիս ամիսը Ստեփան Կարախանյանից ինքն ստացել է 4.100-ական լիտր «Ֆլեշ» և «Միկա» ընկերությունների «ռեգուլյար» տեսակի բենզինի կտրոններ: Բացի յուրաքանչյուր ամսվա 4.100-ական լիտրից, մայիս-հունիս և նոյեմբեր-դեկտեմբեր ամիսներին, կապված զորակոչային աշխատանքների հետ իրենց վաշտը ստացել է 5.000 լիտր բենզին: Գումարտակի հրամանատարի ցուցումով վաշտի հաշվետվություններում վառելիքի ծախսը յուրաքանչյուր ամսվա կտրվածքով ինքը նշել է 6.000-12.000 լիտր:
Ստեփան Կարախանյանի և Արա Լևոնյանի 2011 թվականի օգոստոսի 29-ի առերես հարցաքննության արձանագրության համաձայն` Ստեփան Կարախանյանը ցուցմունք է տվել այն մասին, որ 2011 թվականի հունվար-հուլիս ամիսներին ինքն Արա Լևոնյանից ստացել է անհամեմատ քիչ քանակությամբ բենզինի կտրոններ, քան ձևակերպված է եղել փաստաթղթում: Մասնավորապես` 2011 թվականի հունվար-ապրիլ ամիսներին ինքն Արա Լևոնյանից ամսական ստացել է 31.000 լիտր բենզինի կտրոն, մայիս-հունիս ամիսներին` 39.000-ական լիտր, իսկ հուլիսին` 36.000 լիտր: Բենզինի տրամադրման քարտերում, ինչպես նաև այլ փաստաթղթերում նշված և ձևակերպված է եղել անհամեմատ ավելի շատ քանակությամբ բենզին: Մարգար Օհանյանի մոտ երբևէ խոսակցություն չի եղել գումարտակին քիչ բենզին հատկացնելու վերաբերյալ: Սակայն յուրաքանչյուր ամիս քիչ քանակությամբ բենզինի կտրոն տրամադրելիս Արա Լևոնյանն իրեն ասել է, որ պակաս տրվող բենզինի մի մասը նա հատկացնում է 1-ին գումարտակին: Բայց ամսական իրեն տրամադրվել է ոչ թե 5.000-6.000 լիտրով պակաս բենզինի կտրոն, այլ անհամեմատ ավելի պակաս քանակությամբ: Կտրոնները գումարտակին տրամադրել է անձամբ Արա Լևոնյանը: Ինքը քիչ քանակությամբ բենզին հատկացնելու վերաբերյալ ՃՈ ղեկավարությանը չի զեկուցել, քանի որ մտածել է, որ Արա Լևոնյանն այդ ամենից տեղյակ է և պետք է, որ համաձայնեցրած լիներ դա, սական չգիտի, թե ում հետ: Իսկ Արա Լևոնյանը ցուցմունք է տվել այն մասին, որ Ստեփան Կարախանյանի հայտնած` փաստացի ստացած բենզինի քանակությունը չի համապատասխանում իրականությանը: 2010 թվականից (կոնկրետ ամիսը չի հիշել) ՃՈ պետ Մարգար Օհանյանի բանավոր ցուցումով ինքը 2-րդ գումարտակին ամսական հասանելիք բենզինի քանակությունից 5.000-6.000 լիտր բենզին տրամադրել է 1-ին գումարտակի հրամանատար Արսեն Արշակյանին կամ Արսեն Մարդոյանին կամ 1-ին գումարտակին կցված` ՃՈ տնտեսական բաժանմունքի աշխատակից Սամվել Մախմուրյանին: Նման պայմաններում 2-րդ գումարտակի համար նախատեսված և ՃՈ պետի կողմից հաստատված ամենամսյա վառելիքի բաշխման չափաքանակով նշված բենզինի փաստացի քանակությունը 5.000-6.000 լիտրով պակասել է: Այսինքն` ինքը Ստեփան Կարախանյանին յուրաքանչյուր ամիս տրամադրել է սահմանված բենզինի չափաքանակից 5.000-6.000 լիտր պակաս բենզինի կտրոն, սակայն դա արել է ՃՈ պետ Մարգար Օհանյանի բանավոր ցուցումով: Ընդ որում` այդ խոսակցությանը ներկա է եղել նաև Ստեփան Կարախանյանը: Դրանից բացի, որևէ այլ հավելագրում չի կատարվել: Ստեփան Կարախանյանը տեղյակ է եղել Մարգար Օհանյանի ցուցումի մասին, քանի որ այդ բնույթի խոսակցություններ Մարգար Օհանյանի մոտ եղել է ոչ թե մեկ անգամ, այլ բազմիցս, և խոսքը վերաբերել է միայն 5.000-6.000 լիտրին, որն ինքը 2-րդ գումարտակի համար նախատեսված և փաստաթղթերով ձևակերպված չափաքանակից պահել և տրամադրել է 1-ին գումարտակին:
Արա Լևոնյանի և Մարգար Օհանյանի 2011 թվականի օգոստոսի 30-ի առերես հարցաքննության արձանագրության համաձայն` Արա Լևոնյանը ցուցմունք է տվել այն մասին, որ իր աշխատած ժամանակահատվածում` մինչև 2009 թվականի վերջը, ՃՈ տարբեր ստորաբաժանումների համար նախատեսված բենզինի կտրոններն իր կողմից ամբողջությամբ բաշխվել են ՃՈ վարչական ապարատի, ուղեկցող վաշտի, 1-ին և 2-րդ գումարտակների միջև: 2010 թվականի հունվար ամսին ՃՈ պետ Մարգար Օհանյանը կանչել է իրեն և բանավոր ասել, որպեսզի ինքը 1-ին և 2-րդ գումարտակների համար նախատեսված և ամենամսյա բենզինի բաշխման չափաքանակից 1-ին գումարտակին ամսական չտրամադրի 1.800 լիտր բենզին, իսկ 2-րդ գումարտակին` 2.500 լիտր բենզին, այսինքն` ամսական ընդհանուր 4.300 լիտր բենզին: Դրանից հետո` 2010 թվականի հունվարից մինչև նույն թվականի հունիսը Մարգար Օհանյանի բանավոր ցուցումի համաձայն ինքը 1-ին և 2-րդ գումարտակների համար ամսական չափաբաժնով սահմանված բենզինի քանակությունից գումարտակների հրամանատարներին չի տրամադրել նրանց հասանելիք` ամսական ընդհանուր 4.300 լիտր բենզին, որը յուրաքնչյուր ամիս առձեռն Մարգար Օհանյանի աշխատասենյակում տվել է վերջինին: Բենզինի կտրոնները հիմնականում եղել են «Միկա», «Ֆլեշ» և «Սի Փի Էս» կազմակերպությունների, որոնց վրա, նախքան դրանք Մարգար Օհանյանին տալը, ինքը դրել է ՃՈ տնտեսական բաժանմունքի կլոր կնիքը: Եղել են դեպքեր, երբ ինքը բենզինի կտրոնները Մարգար Օհանյանին տվել է առանց կնքելու, սակայն հետո, Մարգար Օհանյանի բանավոր ցուցումով, դրանք կնքել է: 2010 թվականի հուլիսից մինչև 2011 թվականի հուլիսը, Մարգար Օհանյանի ցուցումով, ինքը նրան ամսական տվել է 7.800 լիտր բենզինի կտրոն: Դա պայմանավորված է եղել նրանով, որ 2010 թվականի հուլիսից ՃՈ-ին հատկացող բենզինի քանակությունն ավելացել է: Դրանից հետո Մարգար Օհանյանն իրեն դարձյալ կանչել է և կարգադրել, որպեսզի ինքը յուրաքանչյուր ամիս 1-ին գումարտակի չափաբաժնից փաստացի պակասեցնի 2.800 լիտր բենզին, իսկ 2-րդ գումարտակի չափաբաժնից` 5.000 լիտր, ինչն ամսվա կտրվածքով կազմել է 7.800 լիտր բենզինի կտրոն: 1-ին և 2-րդ գումարտակների հրամանատարներն իրենից չեն հետաքրքրվել, թե ինչու է ինքն ամսական բենզինի հատկացման չափաբաժնում նշված քանակությունից պակաս բենզինի կտրոն տրամադրում, քանի որ նրանք նույնպես տեղյակ են եղել: 2010 թվականի սկզբներին Մարգար Օհանյանը վերջինի աշխատասենյակում, 2-րդ գումարտակի հրամանատար Ստեփան Կարախանյանի ներկայությամբ, իրեն բանավոր կարգադրել է, որ 2-րդ գումարտակի համար հատկացված բենզինի կտրոններից փաստացի պակասեցնի, ինչին ինքը և Ստեփան Կարախանյանը, բնականաբար, չեն առարկել: Իսկ Մարգար Օհանյանը ցուցմունք է տվել այն մասին, որ Արա Լևոնյանը ստել է, նման որևէ բան չի եղել:
Ստեփան Կարախանյանի և Մարգար Օհանյանի 2011 թվականի սեպտեմբերի 1-ի առերես հարցաքննության արձանագրության համաձայն` Ստեփան Կարախանյանը ցուցմունք է տվել այն մասին, որ 2009 թվականի հունվարից մինչև 2010 թվականի դեկտեմբերի ընկած ժամանակահատվածում ՃՈ տնտեսական բաժանմունքի պետ Արա Լևոնյանից յուրաքանչյուր ամիս կանոնավոր կարգով ստացել է 34.000 լիտր բենզինի կտրոն: 2010 թվականի աշնանային զորակոչի հետ կապված ուղեկցումների համար նոյեմբեր-դեկտեմբեր ամիսներին ինքն Արա Լևոնյանից ամսական ստացել է հավելյալ 500 լիտր բենզինի կտրոն: 2011 թվականի հունվարից մինչև ապրիլն ընկած ժամանակահատվածում 2-րդ գումարտակին ամսական փաստացի տրամադրվել է 31.900 լիտր բենզինի կտրոն, 2011 թվականի մայիս-հունիս ամիսներին` 38.900 լիտր` կապված գարնանային զորակոչի ուղեկցումների հետ, իսկ 2011 թվականի հուլիսին` 32.900 լիտր: Սակայն 2009 թվականի դեկտեմբերից մինչև 2011 թվականի հուլիսն ընկած ժամանակահատվածում բենզինի տրամադրման քարտերում, ինչպես նաև բենզինի ծախսի հաշվետվություններում ձևակերպված է եղել մի քանի հազար լիտրով ավել քանակության բենզին, քան փաստացի տրամադրվել է 2-րդ գումարտակին: 2009 թվականի սկզբին ինքն Արա Լևոնյանից հետաքրքրվել է, թե ինչն է բենզինը պակաս տրամադրելու պատճառը, իսկ նա պատասխանել է, որ դա արվում է ՃՈ պետ Մարգար Օհանյանի ցուցումով: 2009 թվականի հունվարին ինքը պակաս բենզին ստանալու հարցով դիմել է նաև Մարգար Օհանյանին` ասելով, որ Արա Լևոնյանը 2-րդ գումարտակին փաստացի հատկացնում է փաստաթղթերում ձևակերպվածից քիչ քանակության բենզին: Մարգար Օհանյանն ասել է, որ տեղյակ է և որ այդպես է պետք: Դրանից հետո ինքը ավելորդ հարցեր չի տվել և պարզաբանումներ չի պահանջել, այլ պարզապես բավարարել է 2-րդ գումարտակին ամսական հատկացվող բենզինով, որը բաշխել է գումարտակի և 6 վաշտերի միջև: Իր և Մարգար Օհանյանի խոսակցությունը տեղի է ունեցել վերջինի աշխատասենյակում, որին կողմնակի անձինք ներկա չեն եղել: Արա Լևոնյանից յուրաքանչյուր ամիս ստացած բենզինի կտրոնների մի մասն ինքը պահել է 2-րդ գումարտակի հրամանատարական կազմի ավտոմեքենաների համար, իսկ մնացածն ամբողջությամբ բաժանել է 2-րդ գումարտակի 6 վաշտերի հրամանատարներին: Քանի որ հետագայում տեսչական անձնակազմից բողոքներ և դժգոհություններ չեն ստացվել, ինքը չի վերահսկել կամ ստուգել, թե վաշտերի հրամանատարները ենթականերին ինչպես են բաշխել իրենից ստացած բենզինի կտրոնները: Իսկ Մարգար Օհանյանը ցուցմունք է տվել այն մասին, որ ստույգ չգիտի, թե որ ստորաբաժանմանն ինչ քանակությամբ բենզին է տրամադրվել, քանի որ այդ հարցերով զբաղվել է ՃՈ տնտեսական բաժանմունքի պետ Արա Լևոնյանը: Ինքը տեղյակ չի եղել կամ ցուցում չի տվել, որպեսզի 2-րդ գումարտակին փաստաթղթերում ձևակերպված քանակից պակաս բենզին հատկացվի: Ստեփան Կարախանյանը և մյուս ստորաբաժանումների ղեկավարները իրեն երբևէ չեն զեկուցել, չեն դիմել կամ տեղեկացրել, որ իրականում պակաս քանակությամբ բենզին են ստացել: Բենզինի հավելագրումների մասին առաջին անգամ իմացել է քրեական գործի նախաքննության ընթացքում:
Արսեն Արշակյանի և Մարգար Օհանյանի 2011 թվականի սեպտեմբերի 1-ի առերես հարցաքննության արձանագրության համաձայն` Արսեն Արշակյանը ցուցմունք է տվել այն մասին, որ 2007 թվականի հուլիսի 3-ից մինչև 2011 թվականի մարտի 30-ը զբաղեցրել է ՃՈ 1-ին սպայական գումարտակի հրամանատարի պաշտոնը: Մինչև 2009 թվականը բենզինի հատկացումը կանոնակարգված չի եղել` մի մասը ստացել են կտրոնների տեսքով, իսկ մյուս մասը` ՀՀ ոստիկանության ավտոտնտեսությունից: 2009 թվականի հունվար-փետրվար ամիսներին 1-ին գումարտակին հատկացվել է բենզինի ամսական չափաբաժնով սահմանված ողջ քանակությունը` 32.000-ական լիտր: 2009 թվականի մարտին ՃՈ տնտեսական բաժանմունքից 1-ին գումարտակին փաստացի տրամադրվել է ոչ թե 32.000 լիտր, այլ 27.500 լիտր, թեև փաստաթղթերում նշված է եղել նույն 32.000 լիտր քանակությունը: Ինքը Սամվել Մախմուրյանից (ով զբաղվել է բենզինի կտրոնների ստացմամբ և բաշխմամբ) հետաքրքրվել է, թե ինչու են 1-ին գումարտակին սահմանված քանակությունից պակաս բենզին հատկացրել, իսկ նա պատասխանել է, որ ՃՈ տնտեսական բաժանմունքի պետ Արա Լևոնյանն է պակաս բենզինի կտրոններ տրամադրել: Ինքն անմիջապես Արա Լևոնյանից հետաքրքրվել է, թե որն է պակաս քանակությամբ բենզինի կտրոններ տրամադրելու պատճառը, իսկ նա պատասխանել է, որ ՃՈ պետ Մարգար Օհանյանը տեղյակ է: Դրանից հետո ճշտելու նպատակով ինքը դիմել է նաև Մարգար Օհանյանին` ասելով, որ գումարտակին փաստացի տրամադրվել է շուրջ 4.000-5.000 լիտրով պակաս բենզինի կտրոններ, քան ձևակերպված է եղել փաստաթղթերում: Սակայն Մարգար Օհանյանը պատասխանել է, որ տեղյակ է և այդպես է պետք: Ինքն այլևս ավելորդ հարցեր չի տվել: 2009 թվականի մարտից մինչև 2010 թվականի դեկտեմբերը 1-ին գումարտակին ամսական տրամադրվել է 27.500 լիտր բենզին, թեև փաստաթղթերում ձևակերպվել է ամսական մի քանի հազար լիտրով ավել: 2011 թվականի հունվար-մարտ ամիսներին, ՀՀ ոստիկանությունից հատկացվող բենզինի քանակության նվազեցման հետ կապված, 1-ին գումարտակին ՃՈ տնտեսական բաժանմունքից ամսական հատկացվել է 23.000 լիտր բենզին, թեև փաստաթղթերում ձևակերպված է եղել մոտ 26.000 լիտր: Ինքը դարձյալ դիմել է Արա Լևոնյանին, ով ասել է որ Մարգար Օհանյանը տեղյակ է, ինչից հետո ինքն այլևս չի հետաքրքրվել: Այդ ժամանակահատվածում եղել են դեպքեր, երբ իր ենթակաները դժգոհել են բենզինի պակասությունից, իսկ ինքն էլ իր հերթին դիմել է Մարգար Օհանյանին` խնդրելով ավելացնել 1-ին գումարտակին հատկացվող բենզինի քանակությունը, սակայն Մարգար Օհանյանն ասել է, որպեսզի իրենք բավարարվեն եղածով: Ինքը երբևէ Մարգար Օհանյանից չի հետաքրքրվել, թե ինչն է պատճառը, որ 1-ին գումարտակին փաստացի տրամադրվել է պակաս քանակությամբ բենզին, քան ձևակերպվել է բենզենի հատկացման և ծախսի վերաբերյալ փաստաթղթերում, քանի որ իրեն թույլ չի տվել և ղեկավարի ցուցումն ընդունել է պարտադիր կատարման համար: Բենզինի ծախսի վերաբերյալ ամսական հաշվետվությունները կազմել է Սամվել Մախմուրյանը, իսկ դրանցում ինքը ստորագրել է Մարգար Օհանյանի ասելով: Իսկ Մարգար Օհանյանը ցուցմունք է տվել այն մասին, որ 2009-2011 թվականների ընթացքում 1-ին գումարտակին փաստաթղթերում ձևակերպված բենզինի քանակությունից ամսական մի քանի հազար լիտրով պակաս բենզին տրամադրվելու մասին ինքն իմացել է քրեական գործի քննության ընթացքում: Ինքը որևէ մեկին չի կարգադրել, որպեսզի ՃՈ տարբեր ստորաբաժանումներին տրամադրվի սահմանված չափաբաժնից պակաս բենզին, այդ մասին որևէ մեկը, այդ թվում` նաև Արսեն Արշակյանը, իրեն չեն տեղեկացրել: Արսեն Արշակյանը դիմել է իրեն և խնդրել 1-ին գումարտակին սահմանված չափից ավել բենզին հատկացնելու վերաբերյալ, սակայն ինքն ասել է, որ փաստաթղթերում ձևակերպված չափաբաժնից ավել բենզին չի կարող հատկացնել:
Ստեփան Կարախանյանի և Արա Լևոնյանի 2011 թվականի սեպտեմբերի 15-ի առերես հարցաքննության արձանագրության համաձայն` Ստեփան Կարախանյանը ցուցմունք է տվել այն մասին, որ 2011 թվականի հունվար-հուլիս ամիսների ընթացքում Արա Լևոնյանը 2-րդ գումարտակին փաստացի տվել է 31.900 լիտր բենզինի կտրոն: Ընդ որում` յուրաքանչյուր ամիս բենզինի կտրոնները ստացել են երեք փուլով` 16.900 լիտր, 8.000 լիտր, 7.000 լիտր: 2011 թվականի մայիս-հունիս ամիսներին, գարննային զորակոչի ուղեկցումների հետ կապված, Արա Լևոնյանը 2-րդ գումարտակին հատկացրել է ևս 6.000-ական լիտր բենզին: Այսինքն` 2011 թվականի մայիս-հունիս ամիսներին փաստացի ստացել են 37.900-ական լիտր բենզին: Արա Լևոնյանի նշած 8.000 լիտր լրացուցիչ բենզինն ինքը չի ստացել: Այսինքն` 2011 թվականի հունվար-հուլիս ամիսներին Արա Լևոնյանից ամսական փաստացի ստացել է 31.900 լիտր բենզին` բացառությամբ 2011 թվականի մայիս-հունիս ամիսների: Իսկ Արա Լևոնյանը ցուցմունք է տվել այն մասին, որ 2011 թվականի հունվար-ապրիլ ամիսների ընթացքում ինքը Ստեփան Կարախանյանին ամսական փաստացի տվել է 31.900 լիտր բենզին, սակայն 2011 թվականի մայիս-հունիս ամիսներին, 31.900 լիտրից բացի, Ստեփան Կարախանյանին փաստացի տվել է նաև 6.000-ական լիտր` զորակոչի համար և 8.000-ական լիտր: Այսինքն` 2011 թվականի մայիսից սկսած, ՃՈ պետ Մարգար Օհանյանի բանավոր կարգադրության համաձայն, 1-ին և 2-րդ գումարտակների համար նախատեսված բենզինի քանակությունն ավելացել է, որից հետո 2011 թվականի մայիս-հուլիս ամիսներին 2-րդ գումարտակի հրամանատար Ստեփան Կարախանյանին նախկինում փաստացի հատկացվող 31.900-ական լիտր բենզինին ավելացվել է 8.000-ական լիտր բենզին: Բացի այդ, 2011 թվականի մայիս-հունիս ամիսներին, կապված գարնանային զորակոչի հետ, ամսական հավելյալ տրամադրվել է նաև 6.000 լիտր բենզին: Այդպիսով, 2011 թվականի հունվար-ապրիլ ամիսներին ինքը Ստեփան Կարախանյանին փաստացի տվել է 31.900-ական լիտր բենզին, 2011 թվականի մայիս-հունիս ամիսներին` 45.900-ական լիտր բենզին, իսկ 2011 թվականի հուլիսին` 39.900 լիտր բենզին:
Փորձագետի 2011 թվականի նոյեմբերի 11-ի թիվ 11-3231 եզրակացության համաձայն`
-2009 թվականի հունվարից մինչև 2011 թվա¬կանի հուլիսն ընկած ժամանակահատ¬¬վա¬¬¬ծում ՀՀ ոստի¬կանության ճանապարհային ոստի¬կա¬նության ծառայողական ավտոմեքե¬նա¬նե¬¬րի համար ձեռք է բերվել ընդամենը 3.308.400 լիտր բենզին` 1.104.653.600 ՀՀ դրամ արժեքով,
-2009 թվականի հունվարից 2011 թվականի հուլիսն ընկած ժամանակահատվածում Մարգար Օհանյանի կողմից ՃՈ 1-ին և 2-րդ գումարտակներին փաս¬տացի 574.420 լիտր բենզինի չհատկացման հետևանքով պետությանը պատճառվել է 197.003.060 ՀՀ դրամի վնաս,
-ըստ փաստաթղթերի 2009 թվականի հունվարից 2011 թվականի հուլիսն ընկած ժամանակահատվածում ՃՈ 2-րդ գումարտակի ծառայողական ավտոմեքենաների համար հատկացվել է ընդամենը 1.521.520 լիտր բենզին` 516.064.600 ՀՀ դրամ արժեքով,
-2009 թվականի հունվարից 2011 թվականի հուլիսն ընկած ժամանակահատվածում ՃՈ 2-րդ գումարտակի ծառայողական ավտոմեքենաների համար ըստ փաստաթղթերի հատկացած 1.521.520 լիտր բենզինից գումարտակի հրամանատար Ստեփան Կարախանյանի կողմից ստացվել է 1.061.300 լիտր բենզին,
-2009 թվականի հունվարից 2011 թվականի հուլիսն ընկած ժամանակահատվածում Ստեփան Կարախանյանի կողմից ՃՈ 2-րդ գումարտակին փաս¬տացի 65.180 լիտր բենզինի չհատկացման հետևանքով պետությանը պատճառվել է 20.620.940 ՀՀ դրամի վնաս:
Փորձագետի 2011 թվականի նոյեմբերի 11-ի թիվ 11-3231 եզրակացությանը կից հաշիվ-ապրանքագիր հանդիսացող հանձնման-ընդունման արձանագրության համաձայն` փորձաքննության համար վճարման ենթակա գումարը կազմում է 82.440 ՀՀ դրամ:
Զննում կատարելու վերաբերյալ 2011 նոյեմբերի 22-ի արձանագրության համաձայն`
-2011 թվականի հոկտեմբերի 26-ին «Միկա-Քորփորեյշն» ՍՊ ընկերութ¬յու¬նից առգրավ¬ված բեն¬զինի կտրոնների զննությամբ պարզվել է, որ 2011 թվականի մարտ-հուլիս ամիս¬¬ներին ՃՈ 1-ին և 2-րդ սպա¬¬¬¬յա¬կան գումարտակների և ՃՈ տնտեսական բաժանմունքի կնիքների դրոշմով կնք¬ված` «Մի¬կա-Քորփորեյշն» ՍՊ ընկերութ¬յան «5», «10» և «20» լիտրանոց բեն¬զի¬նի կտրոններով հիշ¬յալ ընկերությանը պատկանող` ՀՀ տարածքում տեղակայ¬ված թվով 22 բենզալցակա¬յան¬նե¬րում լիցքավորվել է 356.395 լիտր բենզին: Կտրոնների վրա առկա են եղել լիցքավորված ավտոմեքենաների պետհամարանիշները, լիցքավորման ամսաթիվն ու լիցքակետի համարը: Մասնավորապես.
1) 2011 թվականի մարտին` 75.430 լիտր, որից 64%-ը կազմող 48.345 լիտրը` ոստիկա¬նա¬կան, իսկ 36%-ը կազմող 27.085 լիտրը` այլ համարանիշերով ավտոմեքենաներ,
2) 2011 թվականի ապրիլին 75.645 լիտր, որից 62,5%-ը կազմող 47.315 լիտրը` ոստի¬կա¬նա¬կան, իսկ 37,5%-ը կազմող 28.330 լիտրը` այլ համարանիշերով ավտոմեքենաներ,
3) 2011 թվականի մայիսին 69.925 լիտր, որից 62,6%-ը կազմող 43.780 լիտրը` ոստի¬կա¬նա¬կան, իսկ 37,4%-ը կազմող 26.145 լիտրը` այլ համարանիշերով ավտոմեքենաներ,
4) 2011 թվականի հունիսին 67.100 լիտր, որից 65,9%-ը կազմող 44.240 լիտրը` ոստի¬կա¬նա¬կան, իսկ 34,1%-ը կազմող 22.860 լիտրը` այլ համարանիշերով ավտոմեքենաներ,
5) 2011 թվականի հուլիսին 68.295 լիտր, որից 61,4%-ը կազմող 41.915 լիտրը ոստիկա¬նա¬կան, իսկ 38,6%-ը կազմող 26.380 լիտրը` այլ համարանիշներով ավտոմեքենաներ:
-«Միկա-Քորփորեյշն» ՍՊ ընկերութ¬յու¬նից առ¬գրավ¬ված բեն¬զինի կտրոնների զննությամբ պարզվել է նաև, որ 2011 թվականի մարտ-հուլիս ամիսների ընթացքում 1.555 լիտր բենզին լիցքավորվել է ՃՈ 2-րդ սպայական գու¬մար¬տա¬կի նախկին հրամանատար Ստե¬¬փան Կարախանյանի ազգականներին պատկանող` 50PP050, 50ԼԼ050 և 50DD050 պետ¬համարանիշի ավտոմեքենաները:
ՀՀ ոստիկանության պետի 2008 թվականի հունիսի 3-ի թիվ 985-Ա հրամանի համաձայն` Մարգար Օհանյանը նշանակվել է ՃՈ պետի պաշտոնում:
ՀՀ ոստիկանության պետի 2011 թվականի օգոստոսի 30-ի թիվ 2292-Ա հրամանի համաձայն` Մարգար Օհանյանն ազատվել է ՃՈ պետի պաշտոնից:
ՀՀ ոստիկանության պետի 2008 թվականի սեպտեմբերի 18-ի թիվ 2254-Ա հրամանի համաձայն` Ստեփան Կարախանյանը նշանակվել է ՃՈ 2-րդ սպայական գումարտակի հրամանատարի պաշտոնում:
ՀՀ ոստիկանության պետի 2011 թվականի օգոստոսի 10-ի թիվ 2078-Ա հրամանի համաձայն` Ստեփան Կարախանյանն ազատվել է ՃՈ 2-րդ սպայական գումարտակի հրամանատարի պաշտոնից:
ՀՀ ոստիկանության պետի 2007 թվականի հուլիսի 1-ի թիվ 1262-Ա հրամանի համաձայն` Արա Լևոնյանը նշանակվել է ՃՈ տնտեսական բաժանմունքի պետի պաշտոնում:
ՀՀ ոստիկանության կադրերի վարչության պետի 2007 թվականի նոյեմբերի 15-ի թիվ 2318-Ա հրամանի քաղվածքի համաձայն` Սամվել Մախմուրյանը նշանակվել է ՃՈ տնտեսական բաժանմունքի տեխնիկի պաշտոնում:
«Հայբիզնեսբանկ» ՓԲ ընկերության 2011 թվականի հոկտեմբերի 17-ի թիվ 003344 վճարման հանձնարարագրի անդորրագրի համաձայն` Աննա Իսոյանը, որպես Մարգար Օհանյանի հետ կապված վնասի վերականգնում, գանձապետական բաժանմունք է վճարել 77.000.000 ՀՀ դրամ:
«Հայբիզնեսբանկ» ՓԲ ընկերության 2011 թվականի հոկտեմբերի 17-ի թիվ 000601 վճարման հանձնարարագրի անդորրագրի համաձայն` Աննա Իսոյանը, որպես Մարգար Օհանյանի հետ կապված վնասի վերականգնում, գանձապետական բաժանմունք է վճարել 50.000.000 ՀՀ դրամ:
«Հայբիզնեսբանկ» ՓԲ ընկերության 2011 թվականի հոկտեմբերի 17-ի թիվ 000603 վճարման հանձնարարագրի անդորրագրի համաձայն` Աննա Իսոյանը, որպես Մարգար Օհանյանի հետ կապված վնասի վերականգնում, գանձապետական բաժանմունք է վճարել 50.282.000 ՀՀ դրամ:
«Հայբիզնեսբանկ» ՓԲ ընկերության 2012 թվականի ապրիլի 6-ի թիվ 000014 վճարման հանձնարարագրի անդորրագրի համաձայն` Հայկ Օհանյանը, որպես Մարգար Օհանյանի հետ կապված վնասի վերականգնում, Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի դեպոզիտային հաշվին վճարել 19.721.060 ՀՀ դրամը:
«ՎՏԲ-Հայաստան Բանկ»-ի Մաշտոց մասնաճյուղի 2011 թվականի նոյեմբերի 8-ի թիվ 111108017548043 անդորրագրի համաձայն` Ստեփան Կարախանյանը, Կենտրոնական գանձապետարան` ՀՀ հատուկ քննչական ծառայության դեպոզիտային հաշվին վճարել է 20.620.940 ՀՀ դրամ:
ՀՀ ոստիկանության ինֆորմացիոն կենտրոնի պահանջագրի համաձայն` Մարգար Օհանյանը նախկինում դատապարտված չի եղել:
ՀՀ ոստիկանության ինֆորմացիոն կենտրոնի պահանջագրի համաձայն` Ստեփան Կարախանյանը նախկինում դատապարտված չի եղել:
ՀՀ ոստիկանության ինֆորմացիոն կենտրոնի պահանջագրի համաձայն` Արա Լևոնյանը նախկինում դատապարտված չի եղել:
ՀՀ ոստիկանության ինֆորմացիոն կենտրոնի պահանջագրի համաձայն` Սամվել Մախմուրյանը նախկինում դատապարտված չի եղել:
ՀՀ ոստիկանության կադրերի վարչության պետի և Նորք-Մարաշ վարչական շրջանի ղեկավարի կողմից տրված բնութագրերի համաձայն` Մարգար Օհանյանը բնութագրվում է դրականորեն:
ՃՈ պետի տեղակալի կողմից տրված ծառայողական բնութագրի, միլիցիայի հատուկ նշանակության ջոկատների վետարանների միության նախագահի, թիվ 11 տեղամասի լիազոր ներկայացուցչի կողմից տրված բնութագրերի համաձայն` Ստեփան Կարախանյանը բնութագրվում է դրականորեն:
ՃՈ պետի տեղակալի կողմից տրված ծառայողական բնութագրի համաձայն` Արա Լևոնյանը բնութագրվում է դրականորեն:
ՃՈ տնտեսական բաժանմունքի պետի կողմից տրված ծառայողական բնութագրի համաձայն` Սամվել Մախմուրյանը բնութագրվում է դրականորեն:
Մարտական ուղու համաձայն` Ստեփան Կարախանյանը 1993-1994 թվականներին ակտիվ մասնակցություն է ունեցել ՀՀ սահմանների պաշտպանության և Լեռնային Ղարաբաղի տարածքների ազատագրման գործում:
Թվով 11 մեդալների և հուշամեդալի վկայականների, 1 պատվոգրի, 1 շնորհակալագրի համաձայն` դրանցով պարգևատրվել է Ստեփան Կարախանյանը:
«Էրեբունի» բժշկական կենտրոնի կողմից 2011 թվականի օգոստոսի 19-ին տրված թիվ 03/06-667 տեղեկանքի համաձայն` Ստեփան Կարախանյանի ախտորշումն է` «DS-ՍԻՀ, ոչ ստաբիլ ստենոկարդիա, զարկերակային հիպերտենզիա II, հիպերտոնիկ կրիզ, Շ/Դ, տիպ 2, դեկոմպենսացիայի շրջանում»:
«Էրեբունի» բժշկական կենտրոնի կողմից տրված էպիկրիզի պատճենի համաձայն` Ստեփան Կարախանյանի հետազոտության արդյունքն է` «Սինուսային ռիթմ 100զ11: Սրտի էլ. առանցքի նորմալ դիրք: Ձախ փորոքի հիպերտրոֆիա: Կորոնար արյան շրջանառության խանգարում ստորին պատում»:
Գույքի վրա կալանք դնելու մասին 2011 թվականի սեպտեմբերի 26-ի որոշման համաձայն` որոշվել է կալանք է դրվել Մարգար Օհանյանին պատկանող շարժական և անշարժ գույքի, նրան պատկանող կամ նրա մասնակցությամբ ընկերություններում ունեցած բաժնետոմսերի և բաժնեմասերի, ինչպես նաև այլ գույքի վրա, որտեղ և ինչ տեսքով էլ որ այն գտնվելիս լինի:
ՀՀ ոստիկանության «Ճանապարհային ոստիկանություն» ծառայության պետի 2011 թվականի սեպտեմբերի 28-ի թիվ 17/7-6946 գրության համաձայն` Մարգար Օհանյանի անվամբ հաշվառված տրանսպորտային միջոցներ չկան:
ՀՀ անշարժ գույքի կադաստրի պետական կոմիտեի աշխատակազմի տեղեկատվական կենտրոն ստորաբաժանման ղեկավարի 2011 թվականի սեպտեմբերի 30-ի թիվ ՎՄ-1/3048 գրության համաձայն` Երևան քաղաքի Մաշտոցի պողոտայի 40-րդ շենքի 14-րդ բնակարանի նկատմամբ Մարգար Օհանյանի անվամբ գրանցված է սեփականության իրավունք, Երևան քաղաքի Նորքի 2-րդ փողոցի 25-րդ բնակելի տան նկատմամբ Մարգար Օհանյանի անվամբ գրանցված է համատեղ սեփականության իրավունք, Ծաղկաձոր քաղաքի Չարենցի փողոցի թիվ 4 հասցեում գտնվող բնակելի կառուցապատման հողմասով բնակելի տան նկատմամբ Մարգար Օհանյանի անվամբ գրանցված է համատեղ սեփականության իրավունք: Վերոհիշյալ գույքերի նկատմամբ կիրառվել է արգելանք:
Ձերբակալման 2011 թվականի օգոստոսի 26-ի արձանագրության համաձայն` 2011 թվականի օգոստոսի 26-ին Ստեփան Կարախանյանը ձերբակալվել է:
Խափանման միջոց ընտրելու մասին 2011 թվականի օգոստոսի 29-ի որոշման համաձայն` կասկածյալ Ստեփան Կարախանյանի նկատմամբ որպես խափանման միջոց ընտրվել է ստորագրություն չհեռանալու մասին:
Ձերբակալման 2011 թվականի օգոստոսի 30-ի արձանագրության համաձայն` 2011 թվականի օգոստոսի 30-ին Մարգար Օհանյանը ձերբակալվել է:
Կալանավորումը որպես խափանման միջոց ընտրելու և կալանքը գրավով փոխարինելու մասին միջնորդությունները քննության առնելու մասին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2011 թվականի սեպտեմբերի 2-ի որոշման համաձայն` Մարգար Օհանյանի նկատմամբ որպես խափանման միջոց կիրառվել է կալանավորումը, կալանավորման սկիզբը հաշվվել է 2011 թվականի օգոստոսի 30-ից:
Այսպիսով, Դատարանը գտնում է, որ մտացածին են և գործով ձեռք բերված օբյեկտիվ տվյալներով հերքվում են ամբաստանյալ Մարգար Օհանյանի ցուցմունքներն այն մասին, որ ինքը ՃՈ-ին հատկացված բենզինի յուրացում չի կատարել և որպես ՃՈ պետ նյութական պատասխանատվություն չի կրել:
Վերը նշված ապացույցները վերլուծելու և համադրելու արդյունքում Դատարանը հաստատված է համարում սույն քրեական գործի լուծման համար նշանակություն ունեցող հետևյալ փաստական հանգամանքները.
-2009 թվականի հունվարից մինչև 2011 թվականի հուլիսն ընկած ժամանակահատվածում Մարգար Օհանյանն աշխատել է ՃՈ պետի պաշտոնում,
-ՃՈ պետը տնօրինում է ՃՈ գույքը, այդ թվում` ֆինասական միջոցները,
-2009 թվականի հունվարից մինչև 2011 թվականի հուլիսն ընկած ժամանակահատվածում Ստեփան Կարախանյանն աշխատել է ՃՈ 2-րդ սպայական գումարտակի հրամանատարի պաշտոնում,
-2009 թվականի հունվարից մինչև 2011 թվականի հուլիսն ընկած ժամանակահատվածում Արա Լևոնյանն աշխատել է ՃՈ տնտեսական բաժանմունքի պետի պաշտոնում,
-2009 թվականի հունվարից մինչև 2011 թվականի հուլիսն ընկած ժամանակահատվածում Սամվել Մախմուրյանն աշխատել է ՃՈ տնտեսական բաժանմունքի տեխնիկի պաշտոնում,
-ՃՈ 1-ին սպայական գումարտակի բենզինի բաշխման, հաշվառման և ծախսագրման պատասխանատուները եղել են Արա Լևոնյանը և Սամվել Մախմուրյանը, իսկ ՃՈ 2-րդ սպայական գումարտակինը` Արա Լևոնյանը և Ստեփան Կարախանյանը,
-2009 թվականի հունվարից մինչև 2011 թվականի հուլիսն ընկած ժամանակահատվածում ՃՈ 1-ին և 2-րդ սպայական գումարտակների տրանսպորտային միջոցների շահագործման համար ՀՀ պետական բյուջեի և ՃՈ արտաբյուջետային միջոցների հաշվին ձեռք է բերվել 2.480.720 լիտր բենզին,
-2.480.720 լիտր բենզինից 959.200 լիտրը նախատեսված է եղել ՃՈ 1-ին սպայական գումարտակին բաշխելու համար, իսկ 1.521.520 լիտրը` ՃՈ 2-րդ սպայական գումարտակին բաշխելու համար,
-2009 թվականի հունվարից մինչև 2011 թվականի հուլիսն ընկած ժամանակահատվածում Մարգար Օհանյանը Ստեփան Կարախանյանին, Արա Լևոնյանին, վերջինի միջոցով նաև Սամվել Մախմուրյանին հանձնարարել է ՃՈ 1-ին և 2-րդ սպայական գումարտակների համար նախատեսված 2.480.720 լիտր բենզինից ծառայության նպատակով բաշխել 1.906.300 լիտրը, իսկ տարբերություն կազմող 574.420 լիտր բենզինը կտրոնների տեսքով հանձնել իրեն,
-2009 թվականի հունվարից մինչև 2011 թվականի հուլիսն ընկած ժամանակահատվածում Սամվել Մախմուրյանը և Արա Լևոնյանը բենզինի բաշխման և ծախսի վերաբերյալ փաստաթղթերով ցույց են տվել և ձևակերպել, թե ՃՈ 1-ին սպայական գումարտակին հատկացվել և ծախսվել է 959.200 լիտր բենզին,
-2009 թվականի հունվարից մինչև 2011 թվականի հուլիսն ընկած ժամանակահատվածում ՃՈ 1-ին սպայական գումարտակին փաստացի հատկացվել է 845.000 լիտր բենզին,
-2009 թվականի հունվարից մինչև 2011 թվականի հուլիսն ընկած ժամանակահատվածում Արա Լևոնյանը ՃՈ 1-ին սպայական գումարտակին բաշխելու համար նախատեսված` 37.603.100 ՀՀ դրամ արժողությամբ 114.200 լիտր բենզինը կտրոնների տեսքով հանձնել է Մարգար Օհանյանին,
-2009 թվականի հունվարից մինչև 2011 թվականի հուլիսն ընկած ժամանակահատվածում Ստեփան Կարախանյանը և Արա Լևոնյանը բենզինի բաշխման և ծախսի վերաբերյալ փաստաթղթերով ցույց են տվել և ձևակերպել, թե ՃՈ 2-րդ սպայական գումարտակին հատկացվել և ծախսվել է 1.521.520 լիտր բենզին,
-2009 թվականի հունվարից մինչև 2011 թվականի հուլիսն ընկած ժամանակահատվածում ՃՈ 2-րդ սպայական գումարտակին փաստացի հատկացվել է 1.061.300 լիտր բենզին,
-2009 թվականի հունվարից մինչև 2011 թվականի հուլիսն ընկած ժամանակահատվածում Արա Լևոնյանը ՃՈ 2-րդ սպայական գումարտակին բաշխելու համար նախատեսված` 159.399.960 ՀՀ դրամ արժողությամբ 460.220 լիտր բենզինը կտրոնների տեսքով հանձնել է Մարգար Օհանյանին,
-2009 թվականի հունվարից մինչև 2011 թվականի հուլիսն ընկած ժամանակահատվածում ՃՈ 2-րդ սպայական գումարտակին փաստացի հատկացված 1.061.300 լիտր բենզինից Ստեփան Կարախանյանը ՃՈ 2-րդ սպայական գումարտակի 6 վաշտերին փաստացի բաշխել է ընդամենը 996.120 լիտրը,
-2009 թվականի հունվարից մինչև 2011 թվականի հուլիսն ընկած ժամանակահատվածում Ստեփան Կարախանյանը ՃՈ 2-րդ սպայական գումարտակին բաշխելու համար նախատեսված` 20.620.940 ՀՀ դրամ արժողությամբ 65.180 լիտր բենզինը կտրոնների տեսքով պահել է իրեն,
-Աննա Իսոյանը, որպես Մարգար Օհանյանի կողմից պատճառված վնասի վերականգնում գանձապետական բաժանմունք վճարել է 177.282.000 ՀՀ դրամ,
-Հայկ Օհանյանը, որպես Մարգար Օհանյանի կողմից պատճառված վնասի վերականգնում Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի դեպոզիտային հաշվին վճարել 19.721.060 ՀՀ դրամը,
-Ստեփան Կարախանյանը ՀՀ հատուկ քննչական ծա¬ռա¬յության դեպոզիտ հաշվին վճարել է 20.620.940 ՀՀ դրամ,
-Մարգար Օհանյանը, Ստեփան Կարախանյանը, Արա Լևոնյանը և Սամվել Մախմուրյանը նախկինում դատապարտված չեն եղել և բնութագրվում են դրականորեն,
-Ստեփան Կարախանյանը վատառողջ է, մասնակցել է արցախյան ազատամարտին, պարգևատրվել է թվով 11 մեդալներով և հուշամեդալով, 1 պատվոգրով, 1 շնորհակալագրով,
-սույն քրեական գործով Մարգար Օհանյանն արգելանքի տակ է 2011 թվականի օգոստոսի 30-ից,
-սույն քրեական գործով Ստեփան Կարախանյանը 2011 թվականի օգոստոսի 26-ից 29-ը եղել է արգելանքի տակ:
3. Դատարանի իրավական վերլուծությունները.
Վերը նշված փաստերի հիման վրա Դատարանը գալիս է այն եզրահանգման, որ Մարգար Մնացականի Օհանյանը, աշխատելով ՃՈ պետի պաշտոնում և հանդիսանալով պաշտոնատար անձ, 2009 թվականի հունվարից մինչև 2011 թվականի հուլիսն ընկած ժամանակահատվածում, պաշտոնեական դիրքն օգտագործելով, ՃՈ 2-րդ սպայական գումարտակի հրամանատար Ստեփան Կարախանյանի, ՃՈ տնտեսական բաժանմունքի պետ Արա Լևոնյանի և ՃՈ տնտեսական բաժանմունքի տեխնիկ Սամվել Մախմուրյանի օժանդակությամբ յուրացրել է իրեն վստահված` ՃՈ 1-ին և 2-րդ սպայական գումարտակներին բաշխելու համար նախատեսված` առանձնապես խոշոր չափերի` 197.003.060 ՀՀ դրամ ընդհանուր արժողությամբ 574.420 լիտր բենզինը:
Դատարանը, նկատի ունենալով, որ Մարգար Մնացականի Օհանյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով և 308-րդ հոդվածի 2-րդ մասով, հարկ է համարում մանրամասն անդրադառնալ նրա կատարած արարքի քրեաիրավական որակմանը:
ՀՀ քրեական օրենսգրքի 179-րդ հոդվածի 1-ին մասը քրեական պատասխանատվություն է նախատեսում յուրացնելու կամ վատնելու` հանցավորին վստահված ուրիշի գույքի զգալի չափերով հափշտակության համար, 179-րդ հոդվածի 2-րդ մասի 1-ին կետը` նույն գործողության համար, որը կատարվել է պաշտոնեական դիրքն օգտագործելով, իսկ 179-րդ հոդվածի 3-րդ մասի 1-ին կետը` 179-րդ հոդվածի 1-ին կամ 2-րդ մասերով նախատեսված գործողության համար, որը կատարվել է առանձնապես խոշոր չափերով:
ՀՀ քրեական օրենսգրքի 308-րդ հոդվածի 1-ին մասը քրեական պատասխանատվություն է նախատեսում պաշտոնատար անձի կողմից իր պաշտոնեական դիրքը ծառայության շահերին հակառակ օգտագործելու կամ ծառայողական պարտականությունները չկատարելու համար` շահադիտական, անձնական այլ շահագրգռվածությունից կամ խմբային շահերից ելնելով, որն էական վնաս է պատճառել անձանց, կազմակերպությունների իրավունքներին ու օրինական շահերին, հասարակության կամ պետության օրինական շահերին (գույքային վնասի դեպքում` հանցագործության պահին սահմանված նվազագույն աշխատավարձի հինգհարյուրապատիկի չափը գերազանցող գումարը կամ դրա արժեքը), իսկ 308-րդ հոդվածի 2-րդ մասը` նույն արարքի համար, որն անզգուշությամբ առաջացրել է ծանր հետևանքներ:
Դատարանը գտնում է, որ ՀՀ քրեական օրենսգրքի 179-րդ հոդվածի 2-րդ մասի 1-ին կետով նախատեսված հանցակազմը (այն է` յուրացնելը կամ վատնելը, որը կատարվել է պաշտոնեական դիրքն օգտագործելով) առկա է այն դեպքերում, երբ յուրացումը կամ վատնումը կատարվում է պաշտոնատար անձի կողմից` իր պաշտոնեական լիազորությունների կամ զբաղեցրած պաշտոնի հեղինակության օգտագործմամբ, իսկ այն դեպքում երբ պաշտոնատար անձի կողմից կատարվում է առանձնապես խոշոր չափերով յուրացում կամ վատնում, ապա առկա է ՀՀ քրեական օրենսգրքի 179-րդ հոդվածի 3-րդ մասի 1-ին կետով նախատեսված հանցակազմը, որն իր մեջ ընդգրկում է ՀՀ քրեական օրենսգրքի 179-րդ հոդվածի 2-րդ մասի 1-ին կետով նախատեսված հանցակազմը:
Միաժամանակ Դատարանը գտնում է, որ ՀՀ քրեական օրենսգրքի 179-րդ հոդվածի 2-րդ մասի 1-ին կետով և ՀՀ քրեական օրենսգրքի 308-րդ հոդվածով նախատեսված հանցակազմերի իդեալական համակցությունը (այնպիսի մեկ գործողությունը (անգործությունը), որը պարունակում է ՀՀ քրեական օրենսգրքի երկու կամ ավելի հոդվածներով նախատեսված հանցագործությունների հատկանիշներ) բացառվում է, և պաշտոնատար անձի կողմից յուրացում կամ վատնում կատարելը ենթակա է որակման միայն ՀՀ քրեական օրենսգրքի 179-րդ հոդվածի 2-րդ մասի 1-ին կետով, քանի որ պաշտոնատար անձի կողմից յուրացում կամ վատնում կատարելը ամբողջությամբ ընդգրկվում է ՀՀ քրեական օրենսգրքի 179-րդ հոդվածի 2-րդ մասի 1-ին կետով նախատեսված հանցակազմում: Դատարանը գտնում է նաև, որ ՀՀ քրեական օրենսգրքի 179-րդ հոդվածի 2-րդ մասի 1-ին կետով և ՀՀ քրեական օրենսգրքի 308-րդ հոդվածով նախատեսված հանցակազմերի մեջ հնարավոր է միայն իրական համակցություն (ՀՀ քրեական օրենսգրքով նախատեսված երկու կամ ավելի հանցանք կատարելը, որոնցից ոչ մեկի համար անձը դատապարտված չի եղել), այսինքն` ՀՀ քրեական օրենսգրքի 179-րդ հոդվածի 2-րդ մասի 1-ին կետով և ՀՀ քրեական օրենսգրքի 308-րդ հոդվածով նախատեսված հանցակազմերի համակցություն հնարավոր է միայն այն դեպքում, երբ պաշտոնատար անձը յուրացում կամ վատնում կատարելուց բացի, կատարում է նաև յուրացում կամ վատնում չհանդիսացող պաշտոնեական լիազորությունների չարաշահում:
Դատարանը, նկատի ունենալով, որ սույն քրեական գործով Մարգար Մնացականի Օհանյանը, հանդիսանալով պաշտոնատար անձ, միայն յուրացրել է իրեն վստահված առանձնապես խոշոր չափերի գույքը, գտնում է, որ նրա արարքում բացակայում է ՀՀ քրեական օրենսգրքի 308-րդ հոդվածի 2-րդ մասով նախատեսված արարքի հանցակազմը, իսկ նրա կատարած արարքը համապատասխանում է միայն ՀՀ քրեական օրենսգրքի 179-րդ հոդվածի 3-րդ մասի 1-ին կետի հատկանիշներին:
Դատարանը, միաժամանակ հարկ է համարում նկատել նաև, որ նույնանման հանգամանքներում մեղադրանքի կողմը Ստեփան Կարախանյանին մեղադրանք չի առաջադրել ՀՀ քրեական օրենսգրքի 308-րդ հոդվածով:
Ապացուցված է Մարգար Մնացականի Օհանյանի մեղավորությունը ՀՀ քրեական օրենսգրքի 179-րդ հոդվածի 3-րդ մասի 1-ին կետով նախատեսված արարքը կատարելու մեջ:
ՀՀ քրեական դատավարության օրենսգրքի 366-րդ հոդվածի 2-րդ մասի համաձայն` դատարանը պարտավոր է ՀՀ քրեական դատավարության օրենսգրքի 35-րդ հոդվածի 1-ին մասի 1-3-րդ կետերով և երկրորդ մասով նախատեսված հիմքերից որևէ մեկի առկայության դեպքում տվյալ դատական նիստում կայացնել արդարացման դատավճիռ, իսկ ՀՀ քրեական դատավարության օրենսգրքի 35-րդ հոդվածի 1-ին մասի 2-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե արարքի մեջ հանցակազմ չկա:
Դատարանը, նկատի ունենալով, որ վերոգրյալ հիմնավորմամբ Մարգար Մնացականի Օհանյանի արարքում բացակայում է ՀՀ քրեական օրենսգրքի 308-րդ հոդվածի 2-րդ մասով նախատեսված արարքի հանցակազմը, գտնում է, որ պետք է ճանաչել և հռչակել Մարգար Մնացականի Օհանյանի անմեղությունը ՀՀ քրեական օրենսգրքի 308-րդ հոդվածի 2-րդ մասով առաջադրված մեղադրանքում:
Մարգար Օհանյանի անձը դրականորեն բնութագրող հանգամանքներ են ամուսնացած լինելը և բարձրագույն կրթություն ունենալը:
Մարգար Օհանյանի պատասխանատվությունն ու պատիժը մեղմացնող հանգամանք է հանցագործությամբ պատճառված վնասն ամբողջությամբ կամովին վերականգնելը:
Դատարանը գտնում է, որ Մարգար Օհանյանի պատասխանատվությունն ու պատիժը մեղմացնող հանգամանքներ պետք է դիտել նաև նախկինում արատավորված` դատապարտված չլինելը և դրականորեն բնութագրվելը:
Դատարանը միաժամանակ արձանագրում է, որ Մարգար Օհանյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Մարգար Օհանյանը ենթակա է քրեական պատասխանատվության և պատժի:
Դատարանը, հաշվի առնելով Մարգար Օհանյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ նրա կատարած արարքի համար ՀՀ քրեական օրենսգրքի 179-րդ հոդվածի 3-րդ մասի սանկցիայով, որպես հիմնական պատիժ, նախատեսված է միայն ազատազրկում, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի: Դատարանը միաժամանակ գտնում է, որ Մարգար Օհանյանի նկատմամբ չպետք է նշանակել ՀՀ քրեական օրենսգրքի 179-րդ հոդվածի 3-րդ մասի սանկցիայով նախատեսված լրացուցիչ պատիժը` գույքի բռնագրավումը:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ oրը հաշվելով մեկ oրվա դիմաց:
Դատարանը գտնում է, որ Մարգար Օհանյանի պատժի կրման սկիզբը պետք է հաշվել 2011 թվականի օգոստոսի 30-ից, քանի որ նա այդ օրը ձերբակալվել է, իսկ 2011 թվականի սեպտեմբերի 2-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Մարգար Օհանյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Վերը նշված փաստերի հիման վրա Դատարանը գալիս է այն եզրահանգման, որ Ստեփան Արամի Կարախանյանը, աշխատելով ՃՈ 2-րդ սպայական գումարտակի հրամանատարի պաշտոնում, 2009 թվականի հունվարից մինչև 2011 թվականի հուլիսն ընկած ժամանակահատվածում, օժանդակել է ՃՈ պետ Մարգար Օհանյանին` վերջինին վստահված` ՃՈ 2-րդ սպայական գումարտակին բաշխելու համար նախատեսված` առանձնապես խոշոր չափերի` 159.399.960 ՀՀ դրամ արժողությամբ 460.220 լիտր բենզինի յուրացմանը, ինչը համապատասխանում է ՀՀ քրեական օրենսգրքի 38-179-րդ հոդվածի 3-րդ մասի 1-ին կետի հատկանիշներին:
Բացի այդ, Ստեփան Արամի Կարախանյանը, աշխատելով ՃՈ 2-րդ սպայական գումարտակի հրամանատարի պաշտոնում և հանդիսանալով պաշտոնատար անձ, 2009 թվականի հունվարից մինչև 2011 թվականի հուլիսն ընկած ժամանակահատվածում, պաշտոնեական դիրքն օգտագործելով, յուրացրել է իրեն վստահված` ՃՈ 2-րդ սպայական գումարտակին բաշխելու համար նախատեսված` առանձնապես խոշոր չափերի` 20.620.940 ՀՀ դրամ արժողությամբ 65.180 լիտր բենզինը, ինչը համապատասխանում է ՀՀ քրեական օրենսգրքի 179-րդ հոդվածի 3-րդ մասի 1-ին կետի հատկանիշներին:
Ապացուցված է Ստեփան Արամի Կարախանյանի մեղավորությունը ՀՀ քրեական օրենսգրքի 179-րդ հոդվածի 3-րդ մասի 1-ին կետով և 38-179-րդ հոդվածի 3-րդ մասի 1-ին կետով նախատեսված արարքները կատարելու մեջ:
Ստեփան Կարախանյանի անձը դրականորեն բնութագրող հանգամանքներ են ամուսնացած լինելը, բարձրագույն կրթություն ունենալը, մեդալներով, հուշամեդալով, պատվոգրով և շնորհակալագրով պարգևատրված լինելը, ինքնախոստովանական ցուցմունքներ տալը և կատարածի համար զղջալը:
Ստեփան Կարախանյանի պատասխանատվությունն ու պատիժը մեղմացնող հանգամանք է հանցագործությամբ պատճառված վնասն ամբողջությամբ կամովին վերականգնելը:
Դատարանը գտնում է, որ Ստեփան Կարախանյանի պատասխանատվությունն ու պատիժը մեղմացնող հանգամանքներ պետք է դիտել նաև արցախյան ազատամարտին մասնակցելը, վատառողջ լինելը, նախկինում արատավորված` դատապարտված չլինելը և դրականորեն բնութագրվելը:
Վերը նշված պատասխանատվությունն ու պատիժը մեղմացնող հանգամանքները Ստեփան Կարախանայանի կատարած բոլոր արարքներով էլ առկա են:
Դատարանը միաժամանակ արձանագրում է, որ Ստեփան Կարախանյանի կատարած բոլոր արարքներով էլ պատասխանատվությունն ու պատիժը ծանրացնող հանգամանքներ չկան:
Կատարած արարքների համար ամբաստանյալ Ստեփան Կարախանյանը ենթակա է քրեական պատասխանատվության և պատժի:
Դատարանը, հաշվի առնելով Ստեփան Կարախանյանի կատարած արարքների` հանրության համար վտանգավորության աստիճանը և բնույթը, նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ նրա կատարած արարքներից յուրաքանչյուրի համար ՀՀ քրեական օրենսգրքի 179-րդ հոդվածի 3-րդ մասի սանկցիայով, որպես հիմնական պատիժ, նախատեսված է միայն ազատազրկում, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար կատարած արարքներից յուրաքանչյուրի համար նրա նկատմամբ պատիժ պետք է նշանակել ազատազրկման ձևով: Դատարանը միաժամանակ գտնում է, որ Ստեփան Կարախանյանի կատարած արարքներից յուրաքանչյուրի համար նրա նկատմամբ չպետք է նշանակել ՀՀ քրեական օրենսգրքի 179-րդ հոդվածի 3-րդ մասի սանկցիայով նախատեսված լրացուցիչ պատիժը` գույքի բռնագրավումը:
Դատարանը գտնում է, որ Ստեփան Կարախանյանի նկատմամբ վերջնական պատիժ պետք է նշանակել ՀՀ քրեական օրենսգրքի 66-րդ հոդվածով սահմանված` պատիժները մասնակիորեն գումարելու կանոնի կիրառմամբ:
Դատարանը գտնում է, որ Ստեփան Կարախանյանի նկատմամբ նշանակվելիք վերջնական պատժի ժամկետին պետք է հաշվակցել սույն քրեական գործով 2011 թվականի օգոստոսի 26-ից մինչև 29-ը արգելանքի տակ գտնվելու ժամկետը` 3 (երեք) օրը:
Համաձայն ՀՀ քրեական դատավարության օրենսգրքի 360-րդ հոդվածի` դատավճիռ կայացնելիս դատարանը մի շարք այլ հարցերի հետ միասին պետք է լուծի նաև այն հարցը, թե ամբաստանյալն արդյոք պետք է կրի իր նկատմամբ նշանակված պատիժը, թե` ոչ:
ՀՀ քրեական օրենսգրքի 70-րդ հոդվածի համաձայն` եթե դատարանը, ազատազրկման ձևով պատիժ նշանակելով, հանգում է հետևության, որ դատապարտյալի ուղղվելը հնարավոր է առանց պատիժը կրելու, ապա կարող է որոշում կայացնել այդ պատիժը պայմանականորեն չկիրառելու մաuին:
ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ-124/07 որոշմամբ ՀՀ քրեական օրենսգրքի 70-րդ հոդվածի կիրառման կապակցությամբ արտահայտել է այն իրավական դիրքորոշումը, որ վկայակոչված հոդվածի կիրառումը հանցագործության տեսակի հետ կապված որևէ սահմանափակման չի ենթարկվում և դրա կիրառումը սահմանափակված չէ նաև հանցավոր արարքի վտանգավորության աստիճանով ու բնույթով, ինչպես նաև անձանց շրջանակով, որոնց նկատմամբ այն չի կարող կիրառվել: ՀՀ վճռաբեկ դատարանը միաժամանակ նշել է. «ՀՀ քրեական օրենսգրքի 70-րդ հոդվածի կիրառման հիմնական պայմանը պատճառաբանված լինելն է: Նշանակված պատիժը պայմանականորեն չկիրառելիս դատարանը պետք է հանգամանորեն քննության առնի ինչպես հանցագործության կատարման, այնպես էլ հանցավորի անձին վերաբերող բոլոր հանգամանքները: Կարևորն այն է, որ հանգի հիմնավոր եզրակացության, որ դատապարտյալի ուղղումը հնարավոր է առանց նշանակված պատիժը կրելու»:
ՀՀ վճռաբեկ դատարանը մեկ այլ` 2008 թվականի փետրվարի 1-ի թիվ ՎԲ-01/08 որոշմամբ նշել է, որ պատիժը պայմանականորեն չկիրառելու իրավական հիմքերը բացահայտելու համար ՀՀ քրեական օրենսգրքի 70-րդ հոդվածում սահմանված իրավադրույթներն անհրաժեշտ է մեկնաբանել նաև ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում, այսինքն` պատիժը պայմանականորեն չկիրառելու մասին որոշում կայացնելիս իրավասու դատարանը յուրաքանչյուր դեպքում պետք է քննարկի նաև պատժի` սոցիալական արդարության վերականգնման և պատժի ենթարկված անձի ուղղվելու նպատակների իրացման հարցը: ՀՀ վճռաբեկ դատարանը միաժամանակ նշել է, որ սոցիալական արդարությունը վերականգնելու և պատժի ենթարկված անձի ուղղվելու մասին կարող է վկայել հանցագործությունից հետո հանցավորի դրսևորած վարքագիծը, մասնավորապես` տուժողին պատճառած վնասը հարթելը կամ այն հարթելուն ուղղված ողջամիտ միջոցներ ձեռնարկելը:
Սույն գործով Դատարանը, հաշվի առնելով ամբաստանյալ Ստեփան Կարախանյանի կատարած արարքների հանրության համար վտանգավորության աստիճանը և բնույթը, այդ թվում` դրանց կատարման հանգամանքներն ու գործողությունների վտանգավորության աստիճանը, նրա անձը, նրան դրականորեն բնութագրող և պատասխանատվությունն ու պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, հանցագործությամբ պատճառված վնասն ամբողջությամբ կամովին վերականգնելու հանգամանքը, ինչպես նաև այն, որ չլինելով կալանավորված` չի խուսափել քննությունից և դատից, հանգում է այն հետևության, որ պատժի նպատակներին կարելի է հասնել առանց ամբաստանյալ Ստեփան Կարախանյանի կողմից ազատազրկման ձևով նշանակված պատիժը կրելու, այսինքն` կիրառելի է ՀՀ քրեական օրենսգրքի 70-րդ հոդվածը:
Դատարանը գտնում է, որ Ստեփան Կարախանյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Վերը նշված փաստերի հիման վրա Դատարանը գալիս է այն եզրահանգման, որ Արա Ֆերդինանտի Լևոնյանը, աշխատելով ՃՈ տնտեսական բաժանմունքի պետի պաշտոնում, 2009 թվականի հունվարից մինչև 2011 թվականի հուլիսն ընկած ժամանակահատվածում, օժանդակել է ՃՈ պետ Մարգար Օհանյանին` վերջինին վստահված` ՃՈ 1-ին և 2-րդ սպայական գումարտակներին բաշխելու համար նախատեսված` առանձնապես խոշոր չափերի` 197.003.060 ՀՀ դրամ արժողությամբ 574.420 լիտր բենզինի յուրացմանը, ինչը համապատասխանում է ՀՀ քրեական օրենսգրքի 38-179-րդ հոդվածի 3-րդ մասի 1-ին կետի հատկանիշներին:
Ապացուցված է Արա Ֆերդինանտի Լևոնյանի մեղավորությունը ՀՀ քրեական օրենսգրքի 38-179-րդ հոդվածի 3-րդ մասի 1-ին կետով նախատեսված արարքը կատարելու մեջ:
Արա Լևոնյանի անձը դրականորեն բնութագրող հանգամանքներ են ամուսնացած լինելը, բարձրագույն կրթություն ունենալը, ինքնախոստովանական ցուցմունքներ տալը և կատարածի համար զղջալը:
Դատարանը գտնում է, որ Արա Լևոնյանի պատասխանատվությունն ու պատիժը մեղմացնող հանգամանքներ պետք է դիտել նաև նախկինում արատավորված` դատապարտված չլինելը և դրականորեն բնութագրվելը:
Դատարանը միաժամանակ արձանագրում է, որ Արա Լևոնյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Արա Լևոնյանը ենթակա է քրեական պատասխանատվության և պատժի:
Դատարանը, հաշվի առնելով Արա Լևոնյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ նրա կատարած արարքի համար ՀՀ քրեական օրենսգրքի 179-րդ հոդվածի 3-րդ մասի սանկցիայով, որպես հիմնական պատիժ, նախատեսված է միայն ազատազրկում, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար նրա նկատմամբ պատիժ պետք է նշանակել ազատազրկման ձևով: Դատարանը միաժամանակ գտնում է, որ Արա Լևոնյանի նկատմամբ չպետք է նշանակել ՀՀ քրեական օրենսգրքի 179-րդ հոդվածի 3-րդ մասի սանկցիայով նախատեսված լրացուցիչ պատիժը` գույքի բռնագրավումը:
Դատարանը, հիմք ընդունելով ՀՀ քրեական օրենսգրքի 70-րդ հոդվածի կիրառման կապակցությամբ ՀՀ վճռաբեկ դատարանի վերոգրյալ իրավական դիրքորոշումները և անդրադառնալով տուժողին պատճառած վնասը վերականգնելու մասով արտահայտված իրավական դիրքորոշմանը, հարկ է համարում նշել, որ սույն գործն Արա Լևոնյանի մասով ունի իր առանձնահատկությունը, այն է` ամբաստանյալ Մարգար Օհանյանի կողմից պատճառված վնասն ամբողջությամբ կամովին վերականգնելու հանգամանքն օբյեկտիվորեն անհնար է դարձնում Արա Լևոնյանի կողմից տուժողին պատճառված վնասի հարթումը կամ դրան ուղղված միջոցների ձեռնարկումը: Ինչ վերաբերում է հանցագործությունից հետո ամբաստանյալ Արա Լևոնյանի դրսևորած վարքագծին, ապա նա տվել է խոստովանական ցուցմունքներ, զերծ է մնացել այլ հանացավոր արարքներ կատարելուց և չլինելով կալանավորված` չի խուսափել քննությունից ու դատից:
Հանցագործությունից հետո ամբաստանյալ Արա Լևոնյանի դրսևորած վարքագիծը, նրան դրականորեն բնութագրող և պատասխանատվությունն ու պատիժը մեղմացնող վերը նշված հանգամանքները Դատարանին հիմք են տալիս գալ հետևության, որ պատժի նպատակներին կարելի է հասնել առանց ամբաստանյալ Արա Լևոնյանի կողմից ազատազրկման ձևով նշանակված պատիժը կրելու, այսինքն` կիրառելի է ՀՀ քրեական օրենսգրքի 70-րդ հոդվածը:
Դատարանը գտնում է, որ Արա Լևոնյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Վերը նշված փաստերի հիման վրա Դատարանը գալիս է այն եզրահանգման, որ Սամվել Աբգարի Մախմուրյանը, աշխատելով ՃՈ տնտեսական բաժանմունքի տեխնիկի պաշտոնում, 2009 թվականի հունվարից մինչև 2011 թվականի հուլիսն ընկած ժամանակահատվածում, օժանդակել է ՃՈ պետ Մարգար Օհանյանին` վերջինին վստահված` ՃՈ 1-ին սպայական գումարտակին բաշխելու համար նախատեսված` առանձնապես խոշոր չափերի` 37.603.100 ՀՀ դրամ արժողությամբ 114.200 լիտր բենզինի յուրացմանը, ինչը համապատասխանում է ՀՀ քրեական օրենսգրքի 38-179-րդ հոդվածի 3-րդ մասի 1-ին կետի հատկանիշներին:
Ապացուցված է Սամվել Աբգարի Մախմուրյանի մեղավորությունը ՀՀ քրեական օրենսգրքի 38-179-րդ հոդվածի 3-րդ մասի 1-ին կետով նախատեսված արարքը կատարելու մեջ:
Սամվել Մախմուրյանի անձը դրականորեն բնութագրող հանգամանքներ են ամուսնացած լինելը, ինքնախոստովանական ցուցմունքներ տալը և կատարածի համար զղջալը:
Դատարանը գտնում է, որ Սամվել Մախմուրյանի պատասխանատվությունն ու պատիժը մեղմացնող հանգամանքներ պետք է դիտել նաև նախկինում արատավորված` դատապարտված չլինելը և դրականորեն բնութագրվելը:
Դատարանը միաժամանակ արձանագրում է, որ Սամվել Մախմուրյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Սամվել Մախմուրյանը ենթակա է քրեական պատասխանատվության և պատժի:
Դատարանը, հաշվի առնելով Սամվել Մախմուրյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ նրա կատարած արարքի համար ՀՀ քրեական օրենսգրքի 179-րդ հոդվածի 3-րդ մասի սանկցիայով, որպես հիմնական պատիժ, նախատեսված է միայն ազատազրկում, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար նրա նկատմամբ պատիժ պետք է նշանակել ազատազրկման ձևով: Դատարանը միաժամանակ գտնում է, որ Սամվել Մախմուրյանի նկատմամբ չպետք է նշանակել ՀՀ քրեական օրենսգրքի 179-րդ հոդվածի 3-րդ մասի սանկցիայով նախատեսված լրացուցիչ պատիժը` գույքի բռնագրավումը:
Դատարանը, հիմք ընդունելով ՀՀ քրեական օրենսգրքի 70-րդ հոդվածի կիրառման կապակցությամբ ՀՀ վճռաբեկ դատարանի վերոգրյալ իրավական դիրքորոշումները և անդրադառնալով տուժողին պատճառած վնասը վերականգնելու մասով արտահայտված իրավական դիրքորոշմանը, հարկ է համարում նշել, որ սույն գործը Սամվել Մախմուրյանի մասով ունի իր առանձնահատկությունը, այն է` ամբաստանյալ Մարգար Օհանյանի կողմից պատճառված վնասն ամբողջությամբ կամովին վերականգնելու հանգամանքն օբյեկտիվորեն անհնար է դարձնում Սամվել Մախմուրյանի կողմից տուժողին պատճառված վնասի հարթումը կամ դրան ուղղված միջոցների ձեռնարկումը: Ինչ վերաբերում է հանցագործությունից հետո ամբաստանյալ Սամվել Մախմուրյանի դրսևորած վարքագծին, ապա նա տվել է խոստովանական ցուցմունքներ, զերծ է մնացել այլ հանացավոր արարքներ կատարելուց և չլինելով կալանավորված` չի խուսափել քննությունից ու դատից:
Հանցագործությունից հետո ամբաստանյալ Սամվել Մախմուրյանի դրսևորած վարքագիծը, նրան դրականորեն բնութագրող և պատասխանատվությունն ու պատիժը մեղմացնող վերը նշված հանգամանքները Դատարանին հիմք են տալիս գալ հետևության, որ պատժի նպատակներին կարելի է հասնել առանց ամբաստանյալ Սամվել Մախմուրյանի կողմից ազատազրկման ձևով նշանակված պատիժը կրելու, այսինքն` կիրառելի է ՀՀ քրեական օրենսգրքի 70-րդ հոդվածը:
Դատարանը գտնում է, որ Սամվել Մախմուրյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 238-րդ հոդվածով, գտնում է, որ դատավճիռն օրինական ուժի մեջ մտնելուց հետո 2011 թվականի սեպտեմբերի 26-ի որոշմամբ Մարգար Մնացականի Օհանյանի գույքի վրա դրված կալանքը պետք է վերացնել:
Ինչ վերաբերում է Աննա Իսոյանի, Հայկ Օհանյանի և Ստեփան Կարախանյանի կողմից համապատասխանաբար գանձապետական բաժանմունք, Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի և ՀՀ հատուկ քննչական ծառայության դեպոզիտային հաշիվներն վճարված 77.000.000 ՀՀ դրամին, 50.000.000 ՀՀ դրամին, 50.282.000 ՀՀ դրամին, 19.721.060 ՀՀ դրամին և 20.620.940 ՀՀ դրամին, ապա դրանք, վճարման նպատակներին համապատասխան, պետք է հանձնվեն ՀՀ ոստիկանության «Ճանապարհային ոստիկանություն» ծառայությանը:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերը ամբաստանյալներ Մարգար Մնացականի Օհանյանից, Ստեփան Արամի Կարախանյանից, Արա Ֆերդինանտի Լևոնյանից և Սամվել Աբգարի Մախմուրյանից ենթակա չեն բռնագանձման, քանի որ տուժողին պատճառված վնասներն ամբողջությամբ վերականգնված են: Բռնագանձման ենթակա չեն նաև ՀՀ քրեական դատավարության օրենսգրքի 168-րդ հոդվածի 1-ին մասի 2-րդ և 4-6-րդ կետերով նախատեսված դատական ծախսերը, քանի որ 4-6-րդ կետերով նախատեսված դատական ծախսեր ընդհանրապես չկան, իսկ 2-րդ կետով նախատեսված ծախսերի վերաբերյալ տվյալները բացակայում են: Ավելին` նման պահանջ դատարանին չի ներկայացվել: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մասի 3-րդ կետով նախատեսված դատական ծախսին, ապա Դատարանը գտնում է, որ Մարգար Մնացականի Օհանյանից, Ստեփան Արամի Կարախանյանից, Արա Ֆերդինանտի Լևոնյանից և Սամվել Աբգարի Մախմուրյանից, համապարտության կարգով, պետք է բռնագանձել դատահաշվապահական փորձաքննության համար վճարվելիք գումարը` 82.440 (ութսուներկու հազար չորս հարյուր քառասուն) ՀՀ դրամը (հիմք`փորձագետի 2011 թվականի նոյեմբերի 11-ի թիվ 11-3231 եզրակացությանը կից հաշիվ-ապրանքագիր հանդիսացող հանձնման-ընդունման արձանագրություն):
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 169-րդ, 238-րդ, 309-րդ, 357-360-րդ, 365-րդ, 366-րդ և 369-372-րդ հոդվածներով` Դատարանը
ՎՃՌԵՑ

Մարգար Մնացականի Օհանյանին ՀՀ քրեական օրենսգրքի 308-րդ հոդվածի 2-րդ մասով առաջադրված մեղադրանքով ճանաչել անմեղ և արդարացնել` արարքի մեջ հանցակազմի բացակայության հիմքով:
Մարգար Մնացականի Օհանյանին մեղավոր ճանաչել ՀՀ քրեական օրենսգրքի 179-րդ հոդվածի 3-րդ մասի 1-ին կետով և պատիժ նշանակել ազատազրկում` 6 (վեց) տարի ժամկետով` առանց գույքի բռնագրավման` պատժի կրման սկիզբը հաշվելով 2011 թվականի օգոստոսի 30-ից:
Մարգար Մնացականի Օհանյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Ստեփան Արամի Կարախանյանին մեղավոր ճանաչել ՀՀ քրեական օրենսգրքի 179-րդ հոդվածի 3-րդ մասի 1-ին կետով և 38-179-րդ հոդվածի 3-րդ մասի 1-ին կետով:
ՀՀ քրեական օրենսգրքի 179-րդ հոդվածի 3-րդ մասի 1-ին կետով Ստեփան Արամի Կարախանյանի նկատմամբ պատիժ նշանակել ազատազրկում` 5 (հինգ) տարի 6 (վեց) ամիս ժամկետով` առանց գույքի բռնագրավման:
ՀՀ քրեական օրենսգրքի 38-179-րդ հոդվածի 3-րդ մասի 1-ին կետով Ստեփան Արամի Կարախանյանի նկատմամբ պատիժ նշանակել ազատազրկում` 5 (հինգ) տարի 6 (վեց) ամիս ժամկետով` առանց գույքի բռնագրավման:
ՀՀ քրեական օրենսգրքի 66-րդ հոդվածով սահմանված կարգով` նշանակված պատիժները մասնակիորեն գումարելու միջոցով, Ստեփան Արամի Կարախանյանի նկատմամբ վերջնական պատիժ նշանակել ազատազրկում` 6 (վեց) տարի ժամկետով` առանց գույքի բռնագրավման:
Ստեփան Արամի Կարախանյանի նկատմամբ նշանակված պատժի ժամկետին հաշվակցել սույն քրեական գործով 2011 թվականի օգոստոսի 26-ից մինչև 2011 թվականի օգոստոսի 29-ը արգելանքի տակ գտնվելու ժամկետը` 3 (երեք) օրը, և վերջնական պատիժ սահմանել` ազատազրկում` 5 (հինգ) տարի 11 (տասնմեկ) ամիս 27 (քսանյոթ) օր ժամկետով:
ՀՀ քրեական օրենսգրքի 70-րդ հոդվածի կիրառմամբ Ստեփան Արամի Կարախանյանի նկատմամբ նշանակված պատիժը պայմանականորեն չկիրառել և սահմանել փորձաշրջան` 5 (հինգ) տարի ժամկետով:
Ստեփան Արամի Կարախանյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Արա Ֆերդինանտի Լևոնյանին մեղավոր ճանաչել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով և պատիժ նշանակել ազատազրկում` 5 (հինգ) տարի 6 (վեց) ամիս ժամկետով` առանց գույքի բռնագրավման:
ՀՀ քրեական օրենսգրքի 70-րդ հոդվածի կիրառմամբ Արա Ֆերդինանտի Լևոնյանի նկատմամբ նշանակված պատիժը պայմանականորեն չկիրառել և սահմանել փորձաշրջան` 4 (չորս) տարի ժամկետով:
Արա Ֆերդինանտի Լևոնյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Սամվել Աբգարի Մախմուրյանին մեղավոր ճանաչել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով և պատիժ նշանակել ազատազրկում` 5 (հինգ) տարի 6 (վեց) ամիս ժամկետով` առանց գույքի բռնագրավման:
ՀՀ քրեական օրենսգրքի 70-րդ հոդվածի կիրառմամբ Սամվել Աբգարի Մախմուրյանի նկատմամբ նշանակված պատիժը պայմանականորեն չկիրառել և սահմանել փորձաշրջան` 4 (չորս) տարի ժամկետով:
Սամվել Աբգարի Մախմուրյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո 2011 թվականի սեպտեմբերի 26-ի որոշմամբ Մարգար Մնացականի Օհանյանի գույքի վրա դրված կալանքը վերացնել:
Մարգար Մնացականի Օհանյանից, Ստեփան Արամի Կարախանյանից, Արա Ֆերդինանտի Լևոնյանից և Սամվել Աբգարի Մախմուրյանից, համապարտության կարգով, հօգուտ Հայաստանի Հանրապետության, որպես դատական ծախս, բռնագանձել 82.440 (ութսուներկու հազար չորս հարյուր քառասուն) ՀՀ դրամ:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ