Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

14 դեկտեմբերի 2011թ. ք. Երևան

ԵԿԴ-0240/01/11

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Է. Մկրտչյան,

մասնակցությամբ`
մեղադրող`
Երևանի Կենտրոն և Նորք-Մարաշ
վարչական շրջանների դատախազության
ավագ դատախազ Ս. Հարությունյանի,

պաշտպան Հ. Արսենյանի,

տուժող Ս. Ասատրյան


դատարանում, դռնբաց դատական նիստում, դատական քննության արագացված կարգի կիրառմամբ քննեց գործն ըստ մեղադրանքի
Արտյոմ Սայադի Կիրակոսյանի`
ծնված 1986թ. հոկտեմբերի 12-ին Վրաստանի Հանրապետությունում, հայ, Վրաստանի Հանրապետության քաղաքացի, միջնակարգ-մասնագիտական կրթությամբ, գտնվում է փաստական ամուսնական հարաբերությունների մեջ և խնամքին ունի մինչև տասնչորս տարեկան մեկ երեխա` (Նարե Արտյոմ Կիրակոսյան, ծնված 2011թ. հունվարի 22-ին Երևանում, ծննդյան վկայական ԱԲ N105955), նախկինում չդատված, չի աշխատում, բնութագրվում է դրական, բնակվել է Վրաստանի Հանրապետության Նինոցմինդայի շրջանի Դիլիպի գյուղում, կալանքի տակ է 19.11.2011թ.-ից, մեղադրվում է ՀՀ քրեական օրենսգրքի 131-րդ հոդվածի 2-րդ մասի 1-ին կետով,


Գործի դատավարական նախապատմությունը
Թիվ 13145810 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2010թ. սեպտեմբերի 11-ին, ՀՀ քրեական օրենսգրքի 131-րդ հոդվածի 2-րդ մասի 1-ին կետով և 138-րդ հոդվածի 1-ին մասով։
Քննիչի 2010թ. դեկտեմբերի 15-ի որոշմամբ, Գագիկ Արամի Թումասյանի կողմից Սեդա Ռուբենի Ասատրյանին բռնաբարելու վերաբերյալ քրեական գործի մասը կարճվել է և նրա նկատմամբ քրեական հետապնդումը դադարեցվել է` հանցակազմի բացակայության պատճառաբանությամբ։
Սեդա Ռուբենի Ասատրյանի կողմից սուտ մատնություն կատարելու վերաբերյալ քրեական գործի մասը կարճվել է և նրա նկատմամբ քրեական հետապնդում չի իրականացվել` հանցակազմի բացակայության պատճառաբանությամբ։
Քննիչի 2010թ. դեկտեմբերի 15-ի մեկ այլ որոշմամբ, թիվ 13145810 քրեական գործից անջատվել է Հուսիկ Հովսեփյանի և Արտյոմ Կիրակոսյանի վերաբերյալ մասը, նախաքննությունը շարունակվել է առանձին վարույթում 13145810/1 համարի տակ։
Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 24.01.2011թ. դատավճռով, Գագիկ Արամի Թումասյանը Հայաստանի Հանրապետության քրեական օրենսգրքի 131-րդ հոդվածի 2-րդ մասի 1-ին կետով դատապարտվել է ազատազրկման 4 /չորս/ տարի ժամկետով։ ՀՀ քրեական օրենսգրքի 70-րդ հոդվածի կիրառմամբ, Գագիկ Արամի Թումասյանի նկատմամբ պատիժը պայմանականորեն չի կիրառվել և սահմանվել է փորձաշրջան 2 /երկու/ տարի ժամկետով։ Խափանման միջոց կալանավորումը փոփոխվել է, խափանման միջոց է ընտրվել չհեռանալու մասին ստորագրությունը` մինչև դատավճռի օրինական ուժի մեջ մտնելը և Գագիկ Արամի Թումասյանն ազատ է արձակվել դատական նիստերի դահլիճում։
Նույն դատավճռով Արշալույս Կամոյի Հակոբյանը Հայաստանի Հանրապետության քրեական օրենսգրքի 131-րդ հոդվածի 2-րդ մասի 1-ին կետով դատապարտվել է ազատազրկման 4 /չորս/ տարի ժամկետով։ ՀՀ քրեական օրենսգրքի 70-րդ հոդվածի կիրառմամբ, Արշալույս Կամոյի Հակոբյանի նկատմամբ պատիժը պայմանականորեն չի կիրառվել և սահմանվել է փորձաշրջան 1 /մեկ/ տարի ժամկետով։ Խափանման միջոց կալանավորումը փոփոխվել է, խափանման միջոց է ընտրվել չհեռանալու մասին ստորագրությունը` մինչև դատավճռի օրինական ուժի մեջ մտնելը և Արշալույս Կամոյի Հակոբյանն ազատ է արձակվել դատական նիստերի դահլիճում։
17.08.2011թ. որոշմամբ հայտարարվել է մեղադրյալ Արտյոմ Սայադի Կիրակոսյանի հետախուզումը։
Քննիչի 01.09.2011թ. որոշմամբ, թիվ 13145810/1 քրեական գործի վարույթը կասեցվել է` մինչև մեղադրյալ Արտյոմ Կիրակոսյանին հայտնաբերելը և որպես մեղադրյալ ներգրավման ենթակա ոմն Հուսիկ Հովսեփյանի անձը պարզելը։
19.11.2011թ. Արտյոմ Սայադի Կիրակոսյանը հայտնաբերվել է և քննիչի` նույն օրվա որոշմամբ քրեական գործի վարույթը վերսկսվել է։
Քննիչի 22.11.2011թ. որոշմամբ, թիվ 13145810/1 քրեական գործից անջատվել է Հուսիկ Հովսեփյանի վերաբերյալ մասը, նախաքննությունը շարունակվել է առանձին վարույթում 13145810/2 համարի տակ։
Ամբաստանյալ Արտյոմ Սայադի Կիրակոսյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 131-րդ հոդվածի 2-րդ մասի 1-ին կետով հետևյալ արարքի համար, որ «նա` 2010թ. սեպտեմբերի 9-ին, ժամը 1300-ի սահմաններում, նախնական համաձայնության գալով իր ընկերներ` Գագիկ Արամի Թումասյանի, Արշալույս Կամոյի Հակոբյանի և ոմն Հուսիկ Հովսեփյանի հետ, Գագիկ Թումասյանի քաղ-ուհի Սեդա Ռուբենի Ասատրյանի հետ ամուսնության նպատակով, Երևանի Հանրապետության հրապարակի Տիգրան Մեծի պողոտայի սկզբնամասի ՀՀ կառավարության շենքի հարակից հատվածից, բռնություն գործադրելով առևանգել է նրան, որի ժամանակ Հուսիկ Հովսեփյանը և Արտյոմ Կիրակոսյանը` վերջինիս քաշքշելով և հրելով տարել են դեպի «ՎԱԶ-2107» մակնիշի տաքսի ավտոմեքենա, Արշալույս Հակոբյանը բացել է ետևի դուռը, իսկ ներսում գտնվող Գագիկ Թումասյանը` Սեդա Ասատրյանին քաշքշելով նստեցրել է ավտոմեքենա, որից հետո տարել Կոտայքի մարզի Քանաքեռավան գյուղ` իր ընկերոջ տուն։»։
2011թ. նոյեմբերի 30-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։



Արագացված դատական քննություն

Ամբաստանյալ Արտյոմ Սայադի Կիրակոսյանը միջնորդեց դատական քննությունն անցկացնել արագացված կարգով։ Նա հայտարարեց, որ միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, ինքն համաձայն է մեղադրանքի հետ։ Մեղադրողը դատական քննության արագացված կարգ կիրառելու դեմ չառարկեց։
09.12.2011թ. դատարան է ստացվել տուժողի դիմումն այն մասին, որ գործով որևէ մեկից պարտք ու պահանջ չունի, չի առարկում դատական քննության արագացված կարգ կիրառելու դեմ։
Դատարանը համոզվելով, որ առկա են ՀՀ քրեական դատավարության օրենսգրքի 375.1 և 375.2 հոդվածներով նախատեսված պայմաններն` որոշում է կայացրել արագացված կարգով դատական քննություն անցկացնելու մասին։
Դատարանը հիմք ընդունելով մեղադրանքի հիմքում դրված ապացույցները` գտնում է, որ ամբաստանյալ Արտյոմ Սայադի Կիրակոսյանը կատարել է ՀՀ քրեական օրենսգրքի 131-րդ հոդվածի 2-րդ մասի 1-ին կետով նախատեսված արարք։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Արտյոմ Սայադի Կիրակոսյանն ունի միջնակարգ-մասնագիտական կրթություն, նախկինում դատված չի եղել, խնամքին ունի մինչև տասնչորս տարեկան մեկ երեխա, բնութագրվում է դրական, նախաքննության ընթացքում իրեն լիովին մեղավոր է ճանաչել և տվել է ինքնախոստովանական ցուցմունքներ, տուժողի հետ հաշտվել է, տուժողը և դատապարտյալ Գագիկ Թումասյանն ամուսնացել են, նրանց ամուսնությունը գրանցվել է 2011թ. հունվարի 13-ին, Երևանի Էրեբունի և Նուբարաշեն ՔԿԱԳ-ում, որի վերաբերյալ նույն օրը տրվել է ԱԲ N 035602 ամուսնության վկայականը։


Դատարանի իրավական վերլուծությունները

Առաջադրված մեղադրանքն ամբաստանյալ Արտյոմ Սայադի Կիրակոսյանի կողմից ընդունելու և դատական քննության արագացված կարգ կիրառելու պայմաններում` դատարանը գտնում է, որ ամբաստանյալ Արտյոմ Սայադի Կիրակոսյանի կողմից, նրա մեղավորությամբ, մի խումբ անձանց կողմից նախնական համաձայնությամբ մարդուն բացահայտ առևանգելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 131-րդ հոդվածի 2-րդ մասի 1-ին կետով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող ու ծանրացնող հանգամանքները` ամբաստանյալ Արտյոմ Սայադի Կիրակոսյանի նկատմամբ պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա ունի միջնակարգ-մասնագիտական կրթություն, նախկինում դատված չի եղել, բնութագրվում է դրական, նախաքննության ընթացքում իրեն լիովին մեղավոր է ճանաչել և տվել է ինքնախոստովանական ցուցմունքներ։
Որպես ամբաստանյալի պատասխանատվությունը և պատիժը մեղմացնող հանգամանքներ դատարանը հաշվի է առնում խնամքին մինչև տասնչորս տարեկան երեխայի առկայությունը, ինչպես նաև հետևյալը` ամբաստանյալ Ա. Կիրակոսյանը դրական բնութագրվող, նախկինում չդատապարտված երիտասարդ է, տուժողի հետ հաշտվել է, դատապարտյալ Գագիկ Թումասյանն ու տուժող Սեդա Ասատրյանը դեպքից հետո հաշտվել և ամուսնացել են։
Ամբաստանյալ Ա. Կիրակոսյանի պատասխանատվությունը և պատիժը ծանրացնող հանգամանքներ դատարանը չի արձանագրում։
Հաշվի առնելով գործի հանգամանքները` դատարանը գտնում է, որ իր կատարած` ՀՀ քրեական օրենսգրքի 131-րդ հոդվածի 2-րդ մասի 1-ին կետով նախատեսված հանցանքի համար ամբաստանյալ Արտյոմ Սայադի Կիրակոսյանը ենթակա է պատժի ազատազրկման ձևով։
Քննարկելով այն հարցը, թե արդյոք ամբաստանյալ Արտյոմ Կիրակոսյանը պետք է կրի իր նկատմամբ նշանակված պատիժը, հաշվի առնելով ամբաստանյալին բնութագրող, նրա պատասխանատվությունը և պատիժը մեղմացնող հանգամանքները, նրա պատասխանատվությունը և պատիժը ծանրացնող հանգամանքների բացակայությունը` դատարանը գտնում է, որ Արտյոմ Սայադի Կիրակոսյանի կողմից կատարված հանցագործության հանրորեն վտանգավորության աստիճանը նվազել է և հնարավոր է հանգել հետևության, որ նրա ուղղվելը հնարավոր է առանց նրա նկատմամբ նշանակվող ազատազրկման ձևով պատիժը կրելու` հետևյալ հիմնավորմամբ. ՀՀ քրեական օրենսգրքի 70-րդ հոդվածի համաձայն` եթե դատարանը ազատազրկման ձևով պատիժ նշանակելով հանգում է հետևության, որ դատապարտյալի ուղղվելը հնարավոր է առանց պատիժը կրելու, ապա կարող է որոշում կայացնել այդ պատիժը պայմանականորեն չկիրառելու մասին։ ՀՀ վճռաբեկ դատարանն իր` 2007թ. հունիսի 12-ի թիվ ՎԲ-12407 որոշմամբ ՀՀ քրեական օրենսգրքի 70-րդ հոդվածի կիրառման կապակցությամբ արտահայտել է այն իրավական դիրքորոշումը, որ վկայակոչված հոդվածի կիրառումը հանցագործության տեսակի հետ կապված որևէ սահմանափակման չի ենթարկվում և դրա կիրառումը սահմանափակված չէ նաև հանցավոր արարքի վտանգավորության աստիճանով ու բնույթով, ինչպես նաև անձանց շրջանակով, որոնց նկատմամբ այն չի կարող կիրառվել։ ՀՀ վճռաբեկ դատարանը միաժամանակ նշել է. «ՀՀ քրեական օրենսգրքի 70-րդ հոդվածի կիրառման հիմնական պայմանը պատճառաբանված լինելն է։ Նշանակված պատիժը պայմանականորեն չկիրառելիս դատարանը պետք է հանգամանորեն քննության առնի ինչպես հանցագործության կատարման, այնպես էլ հանցավորի անձին վերաբերող բոլոր հանգամանքները։ Կարևորն այն է, որ հանգի հիմնավոր եզրակացության, որ դատապարտյալի ուղղումը հնարավոր է առանց նշանակված պատիժը կրելու»։ ՀՀ վճռաբեկ դատարանը մեկ այլ` 2008թ. փետրվարի 1-ի թիվ ՎԲ-01/08 որոշմամբ նշել է, որ պատիժը պայմանականորեն չկիրառելու իրավական հիմքերը բացահայտելու համար ՀՀ քրեական օրենսգրքի 70-րդ հոդվածում սահմանված իրավադրույթներն անհրաժեշտ է մեկնաբանել նաև ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում, այսինքն` պատիժը պայմանականորեն չկիրառելու մասին որոշում կայացնելիս իրավասու դատարանը յուրաքանչյուր դեպքում պետք է քննարկի նաև պատժի` սոցիալական արդարության վերականգնման և պատժի ենթարկված անձի ուղղվելու նպատակների իրացման հարցը։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով խափանման միջոցի հարցը` դատարանը գտնում է, որ ամբաստանյալ Արտյոմ Սայադի Կիրակոսյանի նկատմամբ ընտրված խափանման միջոց կալանավորումը պետք է փոփոխել, խափանման միջոց պետք է ընտրել չհեռանալու մասին ստորագրությունը և նրան ազատ արձակել դատական նիստերի դահլիճում։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 134-136-րդ, 357-360-րդ, 364-366-րդ, 369-373-րդ, 3751-3754-րդ հոդվածներով, դատարանը`

Վ Ճ Ռ Ե Ց

Ամբաստանյալ Արտյոմ Սայադի Կիրակոսյանին մեղավոր ճանաչել Հայաստանի Հանրապետության քրեական օրենսգրքի 131-րդ հոդվածի 2-րդ մասի 1-ին կետով նախատեսված հանցանքում և դատապարտել ազատազրկման 4 /չորս/ տարի ժամկետով։ ՀՀ քրեական օրենսգրքի 70-րդ հոդվածի կիրառմամբ, ամբաստանյալ Արտյոմ Սայադի Կիրակոսյանի նկատմամբ պատիժը պայմանականորեն չկիրառել` սահմանելով փորձաշրջան 2 /երկու/ տարի ժամկետով։
Խափանման միջոց կալանավորումը փոփոխել, խափանման միջոց ընտրել չհեռանալու մասին ստորագրությունը` մինչև դատավճռի օրինական ուժի մեջ մտնելը և Արտյոմ Սայադի Կիրակոսյանին ազատ արձակել դատական նիստերի դահլիճում։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։ Դատավճիռը ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով չի կարող բողոքարկվել։



ԴԱՏԱՎՈՐ` Մ. ՄԱՐՏԻՐՈՍՅԱՆ