Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

13 փետրվարի 2012թ. ք. Երևան

ԵԿԴ-0239/01/11

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղարներ` Է. Մկրտչյան, Տ. Գրիգորյան

մասնակցությամբ`
մեղադրող`
Երևանի Կենտրոն և Նորք-Մարաշ վարչական
շրջանների դատախազության
ավագ դատախազ Ա. Գալստյանի,

պաշտպան Կ. Քամալյանի,

տուժողներ Գ. Վասիլյանի,
Մ. Ալաբերքյանի,
Հ. Գրիգորյանի,
Ա. Գալստյանի,
Թ. Դաշյանի,
Օ. Վարդանյանի,
Օ. Ուսյուկինա,

տուժող Մ. Ալաբերքյանի ներկայացուցիչ` Գ. Ազարյանի


դատարանում, դռնբաց դատական նիստում, քննեց գործն ըստ մեղադրանքի
Գագիկ Լևոնի Ավետիսյանի`
ծնված 1988թ. նոյեմբերի 22-ին Երևանում, հայ, ՀՀ քաղաքացի, միջնակարգ-մասնագիտական կրթությամբ, ամուրի, նախկինում չդատված, հաշվառված է և բնակվել է Երևանի Նոր Արեշ թիվ 26 փողոցի թիվ 69 տանը, կալանքի տակ է 12.07.2011թ.-ից, մեղադրվում է ՀՀ քրեական օրենսգրքի 176-րդ հոդվածի 1-ին մասով և 176-րդ հոդվածի 2-րդ մասի 4-րդ կետով։




Գործի դատավարական նախապատմությունը

Թիվ 13143011 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2011թ. հուլիսի 12-ին, ՀՀ քրեական օրենսգրքի 176-րդ հոդվածի 1-ին մասով, Գագիկ Լևոնի Ավետիսյանի կողմից Օլգա Վլադիմիրի Ուսյուկինայի պարանոցի ոսկյա շղթան` խաչով, բացահայտ հափշտակելու դեպքի առթիվ։
Ամբաստանյալ Գագիկ Լևոնի Ավետիսյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 176-րդ հոդվածի 1-ին մասով և 176-րդ հոդվածի 2-րդ մասի 4-րդ կետով հետևյալ արարքների համար. «որ նա` 2011թ. մարտի 19-ին` ժամը 15։00-ի սահմաններում, Երևան քաղաքի Մաշտոցի 5 շենքի մոտ քաշել պոկելու միջոցով բացահայտ հափշտակել է Աննա Սարգսի Գալստյանի 100.000 ՀՀ դրամ արժողության ոսկյա շղթան` խաչով և կախազարդով ու դիմել փախուստի։
Բացի այդ Գագիկ Լևոնի Ավետիսյանը 2011թ. մայիսի 10-ին` ժամը 18։00-ից 19։00-ի սահմաններում, Երևան քաղաքի Մաշտոցի 9 շենքի մոտ քաշել պոկելու միջոցով բացահայտ հափշտակել է Մարո Վալերիկի Ալաբերքյանի պարանոցի 385.000 ՀՀ դրամ արժողության ոսկյա շղթան` կախազարդով ու դիմել փախուստի։
Բացի այդ Գագիկ Լևոնի Ավետիսյանը 2011թ. մայիսի 23-ին` ժամը 18։00-ի սահմաններում, Երևան քաղաքի Մաշտոցի 45 շենքի մոտ քաշել պոկելու միջոցով բացահայտ հափշտակել է Գայանե Արտաշի Վասիլյանի պարանոցի 450.000 ՀՀ դրամ արժողության ոսկյա շղթան` կախազարդով ու դիմել փախուստի։
Բացի այդ Գագիկ Լևոնի Ավետիսյանը 2011թ. հունիսի 1-ին` ժամը 15։00-ի սահմաններում, Երևան քաղաքի Բաբաջանյան 53 շենքի մոտ Թամարա Սարգսի Դաշյանի կյանքի և առողջության համար ոչ վտանգավոր բռնություն գործադրելով` նրա գլխին հարվածներ հասցնելով, քաշել պոկելու միջոցով բացահայտ հափշտակել է վերջինիս պարանոցի 200.000 ՀՀ դրամ արժողության ոսկյա շղթան և դիմել փախուստի։
Բացի այդ Գագիկ Լևոնի Ավետիսյանը 2011թ. հունիսի 22-ին` ժամը 19։00-ի սահմաններում, Երևան քաղաքի Թումանյան և Խանջյան փողոցների հատման մասում քաշել պոկելու միջոցով բացահայտ հափշտակել է Օլգա Գարուշի Վարդանյանի պարանոցի 170.000 ՀՀ դրամ արժողության ոսկյա շղթան` կախազարգով և դիմել փախուստի։
Բացի այդ Գագիկ Լևոնի Ավետիսյանը 2011թ. հուլիսի 9-ին` ժամը 16։30-ի սահմաններում, Երևան քաղաքի Թումանյան փողոցի վրա գտնվող «Պեկին» ռեստորանի դիմաց քաշելու միջոցով բացահայտ հափշտակել է Հրաչուհի Հրաչի Գրիգորյանի պարանոցի 70.000 ՀՀ դրամ արժողության ոսկյա շղթան` կախազարդով ու դիմել փախուստի։
Բացի այդ Գագիկ Լևոնի Ավետիսյանը 2011թ. հուլիսի 11-ին` ժամը 01։10-ի սահմաններում, Երևան քաղաքի Մաշտոցի պողոտա և Սայաթ Նովա փողոցի հատման մասում «Շկոդա» մակնիշի S8809 պ/հ տաքսի ավտոմեքենայի մեջ նստած ՌԴ քաղաքացի Օլգա Վլադիմիրի Ուսուկինայի պարանոցից քաշել պոկելու միջոցով բացահայտ հափշտակել է 66.500 ՀՀ դրամ արժողության ոսկյա շղթան` խաչով և դիմել փախուստի։»։
2011թ. նոյեմբերի 30-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Երևան քաղաքի Նոր Արեշ թիվ 26 փողոցի թիվ 69 տան բնակիչ, ամբաստանյալ Գագիկ Լևոնի Ավետիսյանը 2011թ. մարտի 19-ից մինչև 2011թ. հուլիսի 11-ն ընկած ժամանակահատվածում, Երևան քաղաքի Կենտրոն վարչական շրջանի տարածքում, վեց անգամ, տարբեր օրերի կատարել է ուրիշի գույքի բացահայտ հափշտակություններ հետևյալ հանգամանքներում.
2011թ. մարտի 19-ին, ժամը 15։00-ի սահմաններում, ամբաստանյալ Գագիկ Լևոնի Ավետիսյանը, Երևան քաղաքի Մաշտոցի պողոտայի թիվ 5 շենքի մոտ, քաշել-պոկելու եղանակով բացահայտ հափշտակել է տուժող Աննա Սարգսի Գալստյանի պարանոցի ոսկյա շղթան խաչով և կախազարդով, որից հետո դիմել է փախուստի` տուժող Ա. Գալստյանին պատճառելով 100.000 ՀՀ դրամ գումարի չափով նյութական վնաս։
Բացի այդ, ամբաստանյալ Գագիկ Ավետիսյանը, 2011թ. մայիսի 10-ին, ժամը 18։00-ից 19։00-ի սահմաններում, Երևան քաղաքի Մաշտոցի պողոտայի թիվ 9 շենքի մոտ, քաշել-պոկելու եղանակով բացահայտ հափշտակել է տուժող Մարո Վալերիկի Ալաբերքյանի պարանոցի ոսկյա շղթան կախազարդով, որից հետո դիմել է փախուստի` տուժող Մ. Ալաբերքյանին պատճառելով 385.000 ՀՀ դրամ գումարի չափով նյութական վնաս։
Բացի այդ, ամբաստանյալ Գագիկ Ավետիսյանը, 2011թ. մայիսի 23-ին, ժամը 18։00-ի սահմաններում, Երևան քաղաքի Մաշտոցի պողոտայի թիվ 45 շենքի մոտ, քաշել-պոկելու եղանակով բացահայտ հափշտակել է տուժող Գայանե Արտաշի Վասիլյանի պարանոցի ոսկյա շղթան կախազարդով, որից հետո դիմել է փախուստի` տուժող Գ. Վասիլյանին պատճառելով 450.000 ՀՀ դրամ գումարի չափով նյութական վնաս։
Բացի այդ, ամբաստանյալ Գագիկ Ավետիսյանը, 2011թ. հունիսի 22-ին, ժամը 19։00-ի սահմաններում, Երևան քաղաքի Թումանյան և Խանջյան փողոցների հատման մասում, քաշել-պոկելու եղանակով բացահայտ հափշտակել է տուժող Օլգա Գարուշի Վարդանյանի պարանոցի ոսկյա շղթան կախազարդով, որից հետո դիմել է փախուստի` տուժող Օ. Վարդանյանին պատճառելով 170.000 ՀՀ դրամ գումարի չափով նյութական վնաս։
Բացի այդ, ամբաստանյալ Գագիկ Ավետիսյանը, 2011թ. հուլիսի 9-ին, ժամը 16։30-ի սահմաններում, Երևան քաղաքի Թումանյան փողոցում գտնվող «Պեկին» ռեստորանի դիմացի հատվածում, քաշել-պոկելու եղանակով բացահայտ հափշտակել է տուժող Հրաչուհի Հրաչի Գրիգորյանի պարանոցի ոսկյա շղթան` կախազարդով և դիմել է փախուստի` տուժող Հ. Գրիգորյանին պատճառելով 70.000 ՀՀ դրամ գումարի չափով նյութական վնաս։
Բացի այդ, ամբաստանյալ Գագիկ Ավետիսյանը, 2011թ. հուլիսի 11-ին, ժամը 01։10-ի սահմաններում, Երևան քաղաքի Մաշտոցի պողոտայի և Սայաթ-Նովա փողոցի հատման մասում, քաշել-պոկելու եղանակով բացահայտ հափշտակել է «Շկոդա» մակնիշի, S8809 պետհամարանիշի տաքսի ավտոմեքենայի մեջ նստած, ՌԴ քաղաքացի, տուժող Օլգա Վլադիմիրի Ուսյուկինայի պարանոցի ոսկյա շղթան` խաչով, որից հետո դիմել է փախուստի` տուժող Օ. Ուսյուկինային պատճառելով 66.500 ՀՀ դրամ գումարի չափով նյութական վնաս։ Հաջորդ օրը, 2011թ. հուլիսի 12-ին, երբ այդ հանցագործությունը բացահայտվել է, Գագիկ Ավետիսյանը մանրամասն բացատրություններ տալով` հայտնել է, որ իր կողմից հափշտակված ոսկյա շղթան ու խաչը գրավադրել է, իսկ ստացած գումարը` ծախսել։ Քրեական գործի նախաքննության ընթացքում, 2011թ. հուլիսի 13-ին Գագիկ Ավետիսյանը քննչական փորձարարության ընթացքում ներկայացրել է այդ դրվագի մանրամասները, մատնացույց է արել նաև այն գրավատունը, որտեղ գրավադրել է տուժող Օ. Ուսյուկինայի ոսկեղենը։ 2011թ. հուլիսի 16-ին այդ ոսկեղենը հայտնաբերվել է «Ֆաստ Կրեդիտ» ՍՊԸ-ի գրավատանը և առգրավվել։
Քրեական գործի նախաքննության ընթացքում, «Հայաստանի Հանրապետության փորձագիտական կենտրոն» ՊՈԱԿ-ում կատարվել է մետաղագիտական, հետքաբանական և ապրանքագիտական համալիր փորձաքննություն, որի արժեքը կազմել է 62.100 /վաթսուներկու հազար հարյուր/ ՀՀ դրամ գումար։
Քրեական գործի դատական քննության ընթացքում, դատական վիճաբանությունների փուլում, ճառով հանդես գալու ժամանակ` մեղադրանքը պաշտպանող դատախազը հայտարարեց, որ հրաժարվում է ամբաստանյալ Գագիկ Լևոնի Ավետիսյանին ՀՀ քրեական օրենսգրքի 176-րդ հոդվածի 2-րդ մասի 4-րդ կետով առաջադրված մեղադրանքից, մեղադրանքը պաշտպանում է ՀՀ քրեական օրենսգրքի 176-րդ հոդվածի 1-ին մասով նախատեսված հանցագործություններ կատարելու համար Գագիկ Ավետիսյանին առաջադրված մեղադրանքի մասով, քանի որ դատական քննությամբ հերքվեց այդ մեղադրանքը` տուժող Թամարա Դաշյանը դատարանում հայտնեց, որ ամբաստանյալ Գագիկ Ավետիսյանն իրեն կողոպտողը չէ, հաստատապես պնդում է, որ իրեն կողոպտել է ոչ թե նա, այլ մեկ ուրիշը։ Բացի այդ ամբաստանյալ Գագիկ Ավետիսյանի հեռախոսազանգերի վերծանումների արդյունքում պարզվել է, որ այդ հանցագործության կատարման ժամանակահատվածում, Այնթափ գյուղի տարածքից հեռախոսազանգ կատարելուց 23 րոպե անց Գագիկ Ավետիսյանը գտնվել է Երևանի Թումանյան փողոցում և հեռախոսազանգ կատարել այդտեղից, որով նույնպես հերքվում է նույն ժամանակահատվածում, Երևանի մեկ այլ վարչական շրջանում, Բաբաջանյան 53 շենքի մոտ նրա գտնվելու և այդ ընթացքում տուժող Թ. Դաշյանին կողոպտելու հանգամանքը։
Տուժող Աննա Սարգսի Գալստյանի կողմից 29.12.2011թ. քաղաքացիական հայց է ներկայացվել ամբաստանյալի դեմ, որի համաձայն` վերջինս պահանջել է ամբաստանյալ Գագիկ Ավետիսյանից հօգուտ իրեն բռնագանձել 100.000 /հարյուր հազար/ ՀՀ դրամ գումար` որպես հանցագործության հետևանքով պատճառված վնասի հատուցում։
Տուժող Մարո Ալաբերքյանի կողմից 18.01.2012թ. քաղաքացիական հայց է ներկայացվել ամբաստանյալի դեմ, որի համաձայն` վերջինս պահանջել է ամբաստանյալ Գագիկ Ավետիսյանից հօգուտ իրեն բռնագանձել 385.000 /երեք հարյուր ութսունհինգ հազար/ ՀՀ դրամ գումար` որպես հանցագործության հետևանքով պատճառված վնասի հատուցում։
Տուժող Գայանե Վասիլյանի կողմից 18.01.2012թ. քաղաքացիական հայց է ներկայացվել ամբաստանյալի դեմ, որի համաձայն` վերջինս պահանջել է ամբաստանյալ Գագիկ Ավետիսյանից հօգուտ իրեն բռնագանձել 450.000 /չորս հարյուր հազար/ ՀՀ դրամ գումար` որպես հանցագործության հետևանքով պատճառված վնասի հատուցում։
2012թ. հունվարի 20-ին, 29-ին, 31-ին և փետրվարի 2-ին դատարան են ստացվել տուժողներ Մ. Ալաբերքյանի, Օ. Վարդանյանի, Ա. Գալստյանի և Գ. Վասիլյանի դիմումները, որոնցով նրանք հայտնել են, որ հանցագործությամբ իրենց պատճառված վնասն ամբողջությամբ հատուցվել է, ամբաստանյալի դեմ պահանջ չունեն և խնդրում են նրա նկատմամբ մեղմ պատիժ սահմանել։
13.02.2012թ. ամբաստանյալի պաշտպան Կ. Քամալյանի կողմից դատարան է ներկայացվել թիվ 41 վճարման անդորրագիրը, որի համաձայն Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի դեպոզիտային թիվ 90001 3298014 հաշվին փոխանցվել է 70.000 ՀՀ դրամ գումար` որպես տուժող Հրաչուհի Գրիգորյանին պատճառված վնասի հատուցում։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ Գագիկ Ավետիսյանը նախկինում դատված չի եղել, տուժողներ Մ. Ալաբերքյանին, Օ. Վարդանյանին, Ա. Գալստյանին, Գ. Վասիլյանին, Հ. Գրիգորյանին, Օ. Ուսյուկինային պատճառված վնասն ամբողջությամբ հատուցվել է։


Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Գագիկ Լևոնի Ավետիսյանի ցուցմունքներով այն մասին, որ առաջադրված մեղադրանքում` բացառությամբ տուժող Թամարա Դաշյանի դրվագի, իրեն լիովին մեղավոր է ճանաչում։ Թամարա Դաշյանի նկատմամբ կողոպուտ կատարելու օրն ինքը գտնվել է հիվանդանոցում։ Ինչ վերաբերվում է Օլգա Ոսյուկինայի դրվագին, ապա ինքը միայնակ է նրան կողոպտել, իր հետ այլ անձ չի եղել։ Հնարավոր է, որ իր կողքով պատահական մարդ է անցել, սակայն տուժողը կամ նրա մտերիմները ենթադրել են, թե նա իր ընկերն է և մասնակցում է կողոպուտին։
/դատական նիստի արձանագրություն, հատոր 1, գ.թ. 42-43, 102, 115, 152, հատոր 2, գ.թ. 1-2, 315-317, 349/
Տուժող Գայանե Աշոտի Վասիլյանի ցուցմունքներով այն մասին, որ 2011թ. մայիսի 23-ին, ժամը 18։00-ի սահմաններում, տուն վերադառնալու ճանապարհին, հեռախոսով զրուցելու ժամանակ, Երևան քաղաքի Մաշտոցի պողոտայի թիվ 45 շենքի մուտքից արագ իրեն է մոտեցել նախկինում իրեն ածանոթ Գ.Ավետիսյանը և քաշել-պոկելու եղանակով բացահայտ հափշտակել է իր պարանոցի` 450.000 ՀՀ դրամ արժողության ոսկյա շղթան` կախազարդով և նույն մուտքով դիմել է փախուստի։ Ինքը չի վազել Գ.Ավետիսյանի հետևից և ոստիկանություն չի դիմել։
2011թ. հուլիսի 12-ին, «Արմենիա» հեռուստաընկերությամբ դիտելով «Հերթապահ մաս» հաղորդումը` ճանաչել է Գ.Ավետիսյանին, որից հետո ոստիկանությունում հաղորդում է տվել դեպքի մասին։ Իրեն պատճառված վնասն այժմ վերականգնված է։
/դատական նիստի արձանագրություն, հատոր 1, գ.թ. 66-67, 146/
Տուժող Մարո Վալերիկի Ալաբերքյանի ցուցմունքներով այն մասին, որ 2011թ. մայիսի 10-ին, ժամը 18։00-ից 19։00-ի սահմաններում, Երևան քաղաքի Մաշտոցի պողոտայի թիվ 9 շենքի մոտ, նախկինում իրեն անծանոթ Գ. Ավետիսյանը հետևից քաշել և պոկելու միջոցով բացահայտ հափշտակել է իր պարանոցի` 385.000 ՀՀ դրամ արժողության ոսկյա շղթան` կախազարդով և դիմել է փախուստի։ Այդ ժամանակ ինքը եղել է հուզված վիճակում, չի վազել Գ.Ավետիսյանի հետևից, իսկ դեպքի հետ կապված ոստիկանություն չի դիմել։
2011թ. հուլիսի 12-ին, «Արմենիա» հեռուստաընկերությամբ դիտելով «Հերթապահ մաս» հաղորդումը` ճանաչել է Գ.Ավետիսյանին, որից հետո ոստիկանությունում հաղորդում է տվել դեպքի մասին։ Իրեն պատճառված վնասն այժմ վերականգնված է։
/դատական նիստի արձանագրություն, հատոր 1, գ.թ. 78-79, 82, 143, հատոր 2, գ.թ. 230/
Տուժող Աննա Սարգսի Գալստյանի ցուցմունքներով այն մասին, որ 2011թ. մարտի 19-ին, ժամը 15։00-ի սահմաններում, Երևան քաղաքի Մաշտոցի պողոտայի թիվ 5 շենքի մոտ, նախկինում իրեն անծանոթ Գագիկ Ավետիսյանը մոտեցել է իրեն, պոկել իր պարանոցի ոսկյա շղթան` կախազարդով և դիմել է փախուստի։
2011թ. հուլիսի 12-ին, «Արմենիա» հեռուստաընկերությամբ դիտելով «Հերթապահ մաս» հաղորդումը` ճանաչել է Գ.Ավետիսյանին, որից հետո ոստիկանությունում հաղորդում է տվել դեպքի մասին։ Իրեն պատճառված վնասն այժմ վերականգնված է։
/դատական նիստի արձանագրություն, հատոր 1, գ.թ. 107-108, 113, 116, հատոր 2, գ.թ. 161/
Տուժող Օլգա Գարուշի Վարդանյանի ցուցմունքներով այն մասին, որ 2011թ. հունիսի 22-ին, ժամը 19։00-ի սահմաններում, Երևան քաղաքի Թումանյան և Խանջյան փողոցների հատման մասում, նախկինում իրեն անծանոթ Գագիկ Ավետիսյանը վազելով մոտեցել է իրեն, պոկել է պարանոցի ոսկյա շղթան և դիմել է փախուստի։ Դեպքից հետո ոստիկանություն չի դիմել։
2011թ. հուլիսի 12-ին, «Արմենիա» հեռուստաընկերությամբ դիտելով «Հերթապահ մաս» հաղորդումը` ճանաչել է մեղադրյալ Գ.Ավետիսյանին, որից հետո ոստիկանությունում հաղորդում է տվել դեպքի մասին։ Իրեն պատճառված վնասն այժմ վերականգնված է։
/դատական նիստի արձանագրություն, հատոր 1, գ.թ. 134-135, 138-139, հատոր 2, գ.թ. 228/
Տուժող Օլգա Վլադիմիրի Ուսյուկինայի նախաքննական ցուցմունքով այն մասին, որ 2011թ. հուլիսի 11-ին, ժամը 01։10-ի սահմաններում, Երևան քաղաքի Մաշտոցի պողոտա և Սայաթ-Նովա փողոցի հատման մասում, իր ընկերուհիներ Սեդա և Սոնա Թովմասյանների հետ զբոսնելու ժամանակ իրենց է մոտեցել նախկինում իրեն անծանոթ Գ.Ավետիսյանը և սկսել է զրուցել։ Չցանկանալով որևէ խոսակցություն ունենալ նրա հետ` նստել են մոտակա կանգառում կայանված «Շկոդա» մակնիշի, S8809 պետհամարանիշի, վկա Արթուր Արամյանին պատկանող տաքսի ավտոմեքենան։ Այդ ժամանակ Գ.Ավետիսյանը մինչև գոտկատեղը մտնելով ավտոմեքենայի աջակողմյան դիմացի պատուհանից ներս` իրեն ասել է, որ ցանկանում է համբուրել։ Գ. Ավետիսյանը մոտեցել է իրեն և հանկարծակի պոկել է իր պարանոցի` 120.000 ՀՀ դրամ արժողության ոսկյա շղթան` խաչով և դիմել է փախուստի։
/հատոր 1, գ.թ. 32-33/

Տուժող Հրաչուհի Հրաչի Գրիգորյանի նախաքննական ցուցմունքներով այն մասին, որ 2011թ. հուլիսի 9-ին, ժամը 16։30-ի սահմաններում, Երևան քաղաքի Թումանյան փողոցում գտնվող «Պեկին» ռեստորանի դիմացի հատվածում, նախկինում իրեն անծանոթ Գագիկ Ավետիսյանն արագ մոտեցել է իրեն, պոկել է պարանոցի ոսկյա շղթան և դիմել է փախուստի։
2011թ. հուլիսի 12-ին, «Արմենիա» հեռուստաընկերությամբ դիտելով «Հերթապահ մաս» հաղորդումը` ճանաչել է Գ.Ավետիսյանին, որից հետո ոստիկանությունում հաղորդում է տվել դեպքի մասին։
/հատոր 1, գ.թ. 88-89, 92-94, հատոր 2, գ.թ. 306/
Վկա Սեդա Մնացականի Թովմասյանի ցուցմունքներով այն մասին, որ 2011թ. հուլիսի 11-ին, ժամը 01։10-ի սահմաններում, Երևան քաղաքի Մաշտոցի պողոտայի և Սայաթ-Նովա փողոցի հատման մասում, իր ընկերուհի Օ.Ուսյուկինայի և իր քույր Սոնա Թովմասյանի հետ զբոսնելու ժամանակ, իրենց է մոտեցել նախկինում իրեն անծանոթ Գ.Ավետիսյանը և սկսել է իրենց հետ խոսել։ Չցանկանալով որևէ խոսակցություն ունենալ նրա հետ` նստել են մոտակա կանգառում կայանված «Շկոդա» մակնիշի, S8809 պետհամարանիշի տաքսի ավտոմեքենան։ Գ.Ավետիսյանը մինչև գոտկատեղը մտնելով ավտոմեքենայի դիմացի աջակողմյան պատուհանից ներս` Օ.Ուսյուկինային ասել է, որ ցանկանում է համբուրել և հանկարծակի պոկելով վերջինիս պարանոցի ոսկյա շղթան` խաչով, դիմել է փախուստի։
2011թ. հուլիսի 11-ին, ժամը 22։00-ի սահմաններում, Երևանի Պուշկին փողոցի մոտ գտնվող «7 Դե» կինոակումբի մոտ պատահական նկատել է Օ. Ուսյուկինային կողոպտած Գ. Ավետիսյանին։ Այդ մասին հայտնել է մոտակայքում ծառայություն իրականացնող ոստիկանության աշխատակիցներին, որոնք նրան բերման են ենթարկել ՀՀ ոստիկանության Կենտրոնականի բաժին։
/դատական նիստի արձանագրություն, հատոր 1, գ.թ. 34-35/
Վկա Սոնա Մնացականի Թովմասյանի ցուցմունքներով այն մասին, որ 2011թ. հուլիսի 11-ին, ժամը 01։10-ի սահմաններում, Երևան քաղաքի Մաշտոցի պողոտայի և Սայաթ-Նովա փողոցի հատման մասում, իր ընկերուհի Օ. Ուսյուկինայի և քույր Սեդա Թովմասյանի հետ զբոսնելու ժամանակ, իրենց է մոտեցել նախկինում իրեն անծանոթ Գ. Ավետիսյանը և սկսել է իրենց հետ խոսել։ Չցանկանալով որևէ խոսակցություն ունենալ նրա հետ` նստել են մոտակա կանգառում կայանված «Շկոդա» մակնիշի, S8809 պետհամարանիշի տաքսի ավտոմեքենան։ Գ.Ավետիսյանը մինչև գոտկատեղը մտնելով ավտոմեքենայի աջակողմյան դիմացի պատուհանից ներս` Օ. Ուսյուկինային ասել է, որ ցանկանում է համբուրել և հանկարծակի պոկելով վերջինիս պարանոցի ոսկյա շղթան` խաչով, դիմել է փախուստի։
/դատական նիստի արձանագրություն, հատոր 1, գ.թ. 36-37/
Վկա, ՀՀ ոստիկանության ՊՊԾ գնդի 3-րդ հատուկ գումարտակի 2-րդ վաշտի 2-րդ դասակի ոստիկան, դասակի հրամանատարի օգնական Ստյոպա Սևադայի Բաբայանի ցուցմունքներով այն մասին, որ 2011թ. հուլիսի 11-ին, ժամը 22։00-ի սահմաններում, Երևան քաղաքի վարչական տարածքում ծառայություն իրականացնելիս` Մաշտոցի պողոտա-Պուշկին փողոցի հատման մասում իրեն է մոտեցել նախկինում անծանոթ Սեդա Թովմասյանը և մատնացույց անելով փողոցով քայլող, նախկինում անծանոթ Գագիկ Ավետիսյանին` հայտնել է, որ նա է նախորդ օրը, երեկոյան իր ընկերուհու պարանոցից բացահայտ հափշտակել ոսկյա շղթան` խաչով և դիմել փախուստի։ Միանգամից մոտեցել է Գ.Ավետիսյանին և բերման է ենթարկել ՀՀ ոստիկանության Կենտրոնականի բաժին։
/դատական նիստի արձանագրություն, հատոր 1, գ.թ. 144-145/
Վկա Արթուր Վիլիկի Արամյանի նախաքննական ցուցմունքով այն մասին, որ 2011թ. հուլիսի 11-ին, ժամը 02։00-ի սահմաններում, Օպերային հարող տարածքում իր` «Շկոդա» մակնիշի, S8809 պետհամարանիշի տաքսի ավտոմեքենան են նստել նախկինում անծանոթ Օլգա Ուսյուկինան, Սեդա և Սոնա Թովմասյանները։ Այդ ժամանակ, նախկինում իրեն անծանոթ Գ. Ավետիսյանը մինչև գոտկատեղը մտնելով ավտոմեքենայի աջակողմյան դիմացի պատուհանից ներս` Օ. Ուսյուկինային ասել է, որ ցանկանում է համբուրել և հանկարծակի պոկելով վերջինիս պարանոցի ոսկյա շղթան` իր խաչով, դիմել է փախուստի։
/հատոր 1, գ.թ. 141-142/
Մետաղագիտական, հետքաբանական և ապրանքագիտական համալիր փորձաքննության 07.10.2011թ. թիվ 32861104 եզրակացությամբ, որի համաձայն` «Փորձաքննությանը ներկայացված օբյեկտ N 1 հանդիսացող շղթան ամբողջական չէ (բացակայում է փականը շղթային կցող օղակներից մեկը)։ Շղթայի վրա ինտենսիվ արտահայտված հետքեր և վնասվածներ, որոնք բնորոշ են մեխանիկական ազդեցությանը` չեն հայտնաբերվել։ Պարզել, թե փորձաքննությանը ներկայացված շղթան վնասվել է մեխանիկական ձգվածության հետևանքով, թե ոչ, հնարավոր չէ, փորձագիտական բավարար չափանիշների բացակայության պատճառով։
Ներկայացված օբյեկտ N 2 հանդիսացող շղթայի չափերով կարճ հատվածի մի ազատ եզրի վերջին օղակը վնասված է մեխանիկական ձգվածության հետևանքով, իսկ խաչի վրա ինտենսիվ արտահայտված հետքեր, կամ վնասվածքներ չեն հայտնաբերվել։
Ներկայացված օբյեկտ N 3 հանդիսացող շղթայի վրա առկա է վերանորոգման` զոդման ենթարկված տեղամաս, այլ ինտենսիվ արտահայտված հետքեր, կամ վնասվածներ չեն հայտնաբերվել։
Փորձաքննությանը ներկայացված զարդերի ընդհանուր շուկայական արժեքը, 2011թ. հուլիսի 16-ից մինչև 2011թ. օգոստոսի 23-ն ընկած ժամանակահատվածի դրությամբ, առկա ապրանքային վիճակի հաշվառմամբ, կարող էր կազմել 198.000 (մեկ հարյուր իննսունութ հազար) դրամ։
Վնասված երկու շղթաներից մեկի վնասվելու հետևանքով պատճառված նյութական վնասի (գույքային վնասի չափը), 2011թ. հուլիսի 16-ից մինչև 2011թ. օգոստոսի 23-ն ընկած ժամանակահատվածի դրությամբ, կարող էր կազմել 1000 (մեկ հազար) դրամ, իսկ մյուս շղթայի վնասվելու հետևանքով պատճառված նյութական վնասի չափը որոշել հնարավոր չէ։
Վնասված երկու շղթաների վերականգնումը հնարավոր է, որոնցից մեկը վերականգնման համար անհրաժեշտ աշխատանքային ծախսումների հանրագումարը, 2011թ. հուլիսի 16-ից մինչև 2011թ. օգոստոսի 23-ն ընկած ժամանակահատվածի դրությամբ, կարող էր կազմել 1000 (մեկ հազար) դրամ, մյուսի վերականգնման համար անհրաժեշտ ծախսումների հանրագումարի չափը որոշել հնարավոր չէ»։
/հատոր 2, գ.թ. 334-340/
Անձին ճանաչման ներկայացնելու վերաբերյալ 13.07.2011թ. արձանագրությամբ, որի համաձայն` տուժող Աննա Գալստյանն իրեն ճանաչման ներկայացված չորս անձանցից ճանաչել է Գագիկ Ավետիսյանին և հայտարարել, որ նա հանդիսանում է այն անձը, ով 2011թ. մարտի 19-ին, ժամը 15.00-ի սահմաններում, Երևանի Մաշտոցի պողոտայի թիվ 5 հասցեի մոտ բացահայտ հափշտակել է իր պարանոցի ոսկյա շղթան` խաչով և դիմել է փախուստի։
/հատոր 1, գ.թ.111/
Անձին ճանաչման ներկայացնելու վերաբերյալ 13.07.2011թ. արձանագրությամբ, որի համաձայն` տուժող Մարո Ալաբերքյանն իրեն ճանաչման ներկայացված չորս անձանցից ճանաչել է Գագիկ Ավետիսյանին և հայտարարել, որ նա հանդիսանում է այն անձը, ով 2011թ. մայիսի 10-ին, ժամը 18.00-ից 19.00-ն ընկած ժամանակահատվածում, Երևանի Մաշտոցի պողոտայի թիվ 9 հասցեի մոտ բացահայտ հափշտակել է իր պարանոցի ոսկյա շղթան` կախազարդով և դիմել է փախուստի։
/հատոր 1, գ.թ. 80/
Անձին ճանաչման ներկայացնելու վերաբերյալ 13.07.2011թ. արձանագրությամբ, որի համաձայն` տուժող Գայանե Վասիլյանն իրեն ճանաչման ներկայացված չորս անձանցից ճանաչել է Գագիկ Ավետիսյանին և հայտարարել, որ նա հանդիսանում է այն անձը, ով 2011թ. մայիսի 23-ին, ժամը 18.00-ի սահմաններում, Երևանի Մաշտոցի պողոտայի թիվ 45 շենքի մոտ բացահայտ հափշտակել է իր պարանոցի ոսկյա շղթան` կախազարդով և դիմել է փախուստի։
/հատոր 1, գ.թ. 70/
Անձին ճանաչման ներկայացնելու վերաբերյալ 13.07.2011թ. արձանագրությամբ, որի համաձայն` տուժող Հրաչուհի Գրիգորյանն իրեն ճանաչման ներկայացված չորս անձանցից ճանաչել է Գագիկ Ավետիսյանին և հայտարարել, որ նա հանդիսանում է այն անձը, ով 2011թ. հուլիսի 9-ին, ժամը 16.30-ի սահմաններում, Երևանի Թումանյան փողոցում գտնվող «Պեկին» ռեստորանի դիմացի հատվածում բացահայտ հափշտակել է իր պարանոցի ոսկյա շղթան` կախազարդով և դիմել է փախուստի։
/հատոր 1, գ.թ. 90/
Անձին ճանաչման ներկայացնելու վերաբերյալ 14.07.2011թ. արձանագրությամբ, որի համաձայն` տուժող Օլգա Վարդանյանն իրեն ճանաչման ներկայացված չորս անձանցից ճանաչել է Գագիկ Ավետիսյանին և հայտարարել, որ նա հանդիսանում է այն անձը, ով 2011թ. հունիսի 22-ին, ժամը 19.00-ի սահմաններում, Երևանի Թումանյան փողոցում բացահայտ հափշտակել է իր պարանոցի ոսկյա շղթան` կախազարդով և դիմել է փախուստի։
/հատոր 1, գ.թ. 136/
Անձին ճանաչման ներկայացնելու վերաբերյալ 13.07.2011թ. արձանագրությամբ, որի համաձայն` տուժող Օլգա Ուսյուկինան իրեն ճանաչման ներկայացված չորս անձանցից ճանաչել է Գագիկ Ավետիսյանին և հայտարարել, որ նա հանդիսանում է այն անձը, ով 2011թ. հուլիսի 11-ին, ժամը 01.00-ի սահմաններում, Երևանի Օպերայի շրջակայքում, տաքսի ավտոմեքենայի միջից բացահայտ հափշտակել է իր պարանոցի ոսկյա շղթան` խաչով և դիմել է փախուստի։
/հատոր 1, գ.թ. 72/
Անձին ճանաչման ներկայացնելու վերաբերյալ 13.07.2011թ. արձանագրությամբ, որի համաձայն` վկա Սոնա Թովմասյանը իրեն ճանաչման ներկայացված չորս անձանցից ճանաչել է Գագիկ Ավետիսյանին և հայտարարել, որ նա հանդիսանում է այն անձը, ով 2011թ. հուլիսի 11-ին, ժամը 01.00-ի սահմաններում, Երևանի Օպերայի շրջակայքում, տաքսի ավտոմեքենայի միջից բացահայտ հափշտակել է իր ընկերուհի Օլգա Ուսյուկինայի պարանոցի ոսկյա շղթան` խաչով և դիմել է փախուստի։
/հատոր 1, գ.թ. 74/
Առարկաները ճանաչման ներկայացնելու մասին 04.08.2011թ. արձանագրություններով, որոնց համաձայն` տուժող Օ.Ուսյուկինան իրեն ճանաչման ներկայացված իրերից ճանաչել է Գ.Ավետիսյանի անվամբ, «Ֆաստ Կրեդիտ» գրավատան Էրեբունու մասնաճյուղում գրավադրված և առգրավված շղթան, խաչը և հայտարարել, որ դրանք հանդիսանում են Գ.Ավետիսյանի կողմից իր պարանոցից բացահայտ հափշտակված ոսկյա շղթան և խաչը։
/հատոր 1, գ.թ. 226, 228/
Քննչական փորձարարություն կատարելու մասին 13.07.2011թ. արձանագրությամբ, որի համաձայն` Գագիկ Ավետիսյանը մատնացույց է արել Մաշտոցի պողոտայի կանգառին հարող հատվածը և հայտարարել, որ այդ վայրում կայանված «Շկոդա» մակնիշի, S8809 պետհամարանիշի տաքսի ավտոմեքենայի մեջ մինչև գոտկատեղը մտնելով` բացահայտ հափշտակել է տուժող Օ.Ուսյուկինայի պարանոցի ոսկյա շղթան` խաչով և դիմել է փախուստի։
/հատոր 1, գ.թ. 95-101/
Որպես այլ փաստաթուղթ` ապացույց ճանաչված, Գագիկ Լևոնի Ավետիսյանի կողմից շահագործված 098-77-44-80 և 096-44-15-91 հեռախոսահամարների մուտքային և ելքային հեռախոսանգերի վերծանումներով և տեղանշման վերաբերյալ տվյալներով, որոնց համաձայն` Գագիկ Ավետիսյանը 2011թ. մայիսի 10-ին, ժամը 18.00-ից 19.00-ի սահմաններում գտնվել է Երևանի Մաշտոցի պողոտայում, 2011թ. հուլիսի 9-ին, ժամը 15.00-ից 17.00-ի սահմաններում` Երևանի Խանջյան փողոցի և Հյուսիսային պողոտայի հատման մասում, իսկ 2011թ. հունիսի 22-ին, ժամը 17.00-ից 19.00-ի սահմաններում` գտնվել է Երևանի Խանջյան և Թումանյան փողոցների հատման մասում։
/հատոր 2, գ.թ. 414-415/
Իրեղեն ապացույց ճանաչված, տուժող Օլգա Ուսյուկինային պատկանող ոսկյա շղթայով, խաչով և դրանք վկա Սեդա Թովմասյանի պատասխանատու պահպանությանը հանձնելու մասին 26.10.2011թ. արձանագրությամբ։
/հատոր 1, գ.թ. 160-161, հատոր 2, գ.թ. 353-354/
Տուժող Թամարա Սարգսի Դաշյանը դատարանում հայտնեց, որ 2011թ. հունիսի 1-ին, ժամը 15։00-ի սահմաններում, Երևան քաղաքի Բաբաջանյան փողոցի թիվ 53 շենքի մոտ, մի անծանոթ երիտասարդ, հետևից հանկարծակի հարվածել է իր գլխին։ Երբ շրջվել է, նա ձեռքի ափով հարվածել է իր գլխի աջակողմյան հատվածին, իսկ մյուս ձեռքով պարանոցի շրջանում որոնել է ոսկյա շղթան, որն էլ պոկելով` դիմել է փախուստի։
2011թ. հուլիսի 12-ին, «Արմենիա» հեռուստաընկերությամբ դիտելով «Հերթապահ մաս» հաղորդումը` Գ.Ավետիսյանին նմանեցրել է իրեն կողոպտող անձի հետ։ Դատարանում տեսնելով Գագիկ Ավետիսյանին` հաստատապես պնդում է, որ իրականում իր շղթան Գագիկ Ավետիսյանը չի հափշտակել։ Նախաքննության ժամանակ ինքը շփոթել և ասել է, որ Գագիկն է իրեն կողոպտել, քանի որ մեծ կին է, հուզված է եղել։
/դատական նիստի արձանագրություն/




Դատարանի իրավական վերլուծությունները.

Վերլուծելով ամբաստանյալ Գագիկ Լևոնի Ավետիսյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Գագիկ Լևոնի Ավետիսյանի կողմից, նրա մեղավորությամբ, նրան ՀՀ քրեական օրենսգրքի 176-րդ հոդվածի 1-ին մասով առաջադրված մեղադրանքի վեց դրվագներից յուրաքանչյուրով, կողոպուտ կատարելն ապացուցված է, նրա արարքները ճիշտ են որակված և համապատասխանում են ՀՀ քրեական օրենսգրքի 176-րդ հոդվածի 1-ին մասով նախատեսված հանցագործության հատկանիշներին։
Նկատի ունենալով, որ քրեական գործի դատական քննության ընթացքում, դատական վիճաբանությունների փուլում, մեղադրանքը պաշտպանող դատախազը հրաժարվել է Գագիկ Լևոնի Ավետիսյանին ՀՀ քրեական օրենսգրքի 176-րդ հոդվածի 2-րդ մասի 4-րդ կետով առաջադրված մեղադրանքից, իսկ ՀՀ քրեական դատավարության օրենսգրքի 366-րդ հոդվածի 4-րդ մասի համաձայն` դատարանում մեղադրանքը պաշտպանող դատախազի` մեղադրանքից հրաժարվելու դեպքում դատարանը մեղադրանքի այդ մասով կայացնում է արդարացնող դատավճիռ, դատարանը գտնում է, որ պետք է ճանաչել և հռչակել Գագիկ Լևոնի Ավետիսյանի անմեղությունը ՀՀ քրեական օրենսգրքի 176-րդ հոդվածի 2-րդ մասի 4-րդ կետով մեղսագրված հանցանքի կատարման մեջ և այդ հոդվածով նա ենթակա է արդարացման։
Քննարկելով հանցագործությունների համակցության հարցը` դատարանը գտնում է հետևյալը.
2011թ. մայիսի 24-ից ուժի մեջ է մտել «ՀՀ քրեական օրենսգրքում փոփոխություններ և լրացումներ կատարելու մասին» ՀՀ օրենքը, որի արդյունքում փոփոխվել է նաև ՀՀ քրեական օրենսգրքի 20-րդ հոդվածը։ Այդ հոդվածի նոր խմբագրության համաձայն`
«1. Հանցագործությունների համակցություն է համարվում՝
1) սույն օրենսգրքով (տարբեր հոդվածներով կամ միևնույն հոդվածով կամ հոդվածի միևնույն կամ տարբեր մասերով կամ կետերով) նախատեսված երկու կամ ավելի հանցանք կատարելը, որոնցից ոչ մեկի համար անձը դատապարտված չի եղել.
2) այնպիսի մեկ գործողությունը (անգործությունը), որը պարունակում է սույն օրենսգրքի երկու կամ ավելի հոդվածներով նախատեսված հանցագործությունների հատկանիշներ։
2. Հանցագործությունների համակցության դեպքում անձը պատասխանատվություն է կրում յուրաքանչյուր հանցագործության համար՝ սույն օրենսգրքի համապատասխան հոդվածով կամ հոդվածի մասով։»։
Հաշվի առնելով, որ 2011թ. մարտի 19-ին, մայիսի 10-ին և 23-ին, մինչև 2011թ. մայիսի 24-ն ամբաստանյալ Գագիկ Ավետիսյանը կատարել է ՀՀ քրեական օրենսգրքի 176-րդ հոդվածի 1-ին մասով նախատեսված երեք հանցագործություններ, դրանք են` նրան առաջադրված մեղադրանքում առկա, 1-ին, 2-րդ և 3-րդ դրվագներում նշված հանցագործությունները, դատարանը գտնում է, որ այդ երեք հանցագործությունների համար, ամբաստանյալ Գագիկ Ավետիսյանի նկատմամբ պետք է նշանակվի մեկ պատիժ, իսկ այդ դրվագներին հաջորդող, ՀՀ քրեական օրենսգրքի 176-րդ հոդվածի 1-ին մասով առաջադրված մեղադրանքի մյուս երեք դրվագներում նշված յուրաքանչյուր հանցագործության համար պետք է նշանակվի առանձին պատիժ։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Գագիկ Լևոնի Ավետիսյանի նկատմամբ, նրա կատարած յուրաքանչյուր հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա նախկինում դատված չի եղել։ Որպես ամբաստանյալի պատասխանատվությունը և պատիժը մեղմացնող հանգամանք դատարանը յուրաքանչյուր դրվագով հաշվի է առնում տուժողներին պատճառված վնասն ամբողջությամբ հատուցելը, իսկ ամբաստանյալի պատասխանատվությունը և պատիժը ծանրացնող հանգամանքներ դատարանը չի արձանագրում։
Ամբաստանյալ Գագիկ Լևոնի Ավետիսյանն իր կատարած` Հայաստանի Հանրապետության քրեական օրենսգրքի 176-րդ հոդվածի 1-ին մասով նախատեսված հանցագործություններից յուրաքանչյուրի համար ենթակա է պատժի ազատազրկման ձևով, որը նա պետք է կրի։
Քննարկելով գույքի վրա դրված կալանքի հարցը` դատարանը գտնում է, որ 26.10.2011թ. որոշմամբ, Գագիկ Լևոնի Ավետիսյանի անվամբ գրավադրված և «Ֆաստ Կրեդիտ» գրավատան Էրեբունու մասնաճյուղից առգրավված երկու ոսկյա շղթաների վրա դրված կալանքը պետք է վերացնել։
Քննարկելով իրեղեն ապացույցի հարցը` դատարանը գտնում է, որ դատավճռի օրինական ուժի մեջ մտնելուց հետո, 26.10.2011թ. որոշմամբ իրեղեն ապացույց ճանաչված ոսկյա շղթան և խաչը պետք է վերադարձնել տուժող Օ. Ուսյուկինային։
Քննարկելով խափանման միջոցի հարցը` դատարանը գտնում է, որ ամբաստանյալ Գագիկ Ավետիսյանի նկատմամբ որպես խափանման միջոց կալանավորումն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Քննարկելով տուժողներ և քաղաքացիական հայցվորներ Մարո Ալաբերքյանի, Աննա Գալստյանի և Գայանե Վասիլյանի քաղաքացիական հայցերը, դատարանը գտնում է հետևյալը.
ՀՀ քրեական դատավարության օրենսգրքի 154-րդ հոդվածի համաձայն`
«1. Քրեական դատավարությունում քաղաքացիական հայցը հարուցվում, ապացուցվում և լուծվում է սույն օրենսգրքի դրույթներով սահմանված կանոններով։
2. Քաղաքացիական դատավարական օրենսդրության նորմերի կիրառումը թույլատրվում է, եթե դրանք չեն հակասում քրեական դատավարության օրենսգրքին, և քաղաքացիական հայցով վարույթի համար անհրաժեշտ են կանոններ, որոնք նախատեսված չեն սույն օրենսգրքով։
3. Քաղաքացիական հայցով որոշումն ընդունվում է քաղաքացիական օրենսդրության նորմերին համապատասխան։
4. Քրեական դատավարությունում քաղաքացիական հայցի վրա չեն տարածվում քաղաքացիական օրենսդրությամբ սահմանված հայցային վաղեմության ժամկետները։»։
Նույն օրենսգրքի 161-րդ հոդվածի համաձայն`
1. Քաղաքացիական հայց ներկայացրած անձն իրավունք ունի հրաժարվել հայցից քրեական գործով վարույթի ցանկացած պահի, եթե դրանով չեն խախտվում այլ անձանց իրավունքները և օրինական շահերը։ Նման իրավունքներից օգտվում է նաև այն անձը, որի շահերի պաշտպանության համար դատախազը քաղաքացիական հայց է հարուցել։
2. Քաղաքացիական հայցից հրաժարվելն ընդունելը հանգեցնում է քրեական դատավարությունում քաղաքացիական հայցով վարույթի կարճման և համապատասխան անձին զրկում է տվյալ քաղաքացիական հայցը քրեական դատավարության կարգով կրկին հարուցելուց։»։
Հաշվի առնելով, որ տուժողներ և քաղաքացիական հայցվորներ Մարո Ալաբերքյանի, Աննա Գալստյանի և Գայանե Վասիլյանի կողմից 29.01.2012թ., 31.01.2012թ. և 02.02.2012թ. ներկայացվել են դիմումներ` հանցագործությամբ իրենց պատճառված վնասն ամբողջությամբ հատուցած լինելու, ամբաստանյալից պահանջ չունենալու մասին, դատարանը գտնում է, որ տուժողներ և քաղաքացիական հայցվորներ Մարո Ալաբերքյանի, Աննա Գալստյանի և Գայանե Վասիլյանի քաղաքացիական հայցերը ենթակա են մերժման։
Քննարկելով դատական ծախսերի հարցը` դատարանը գտնում է, որ ամբաստանյալ Գագիկ Լևոնի Ավետիսյանից հօգուտ ՀՀ պետական բյուջեի բռնագանձման է ենթակա մետաղագիտական, հետքաբանական և ապրանքագիտական համալիր փորձաքննության կատարման արժեք հանդիսացող 62.100 /վաթսուներկու հազար հարյուր/ ՀՀ դրամ գումար` որպես դատական ծախսեր։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 154-րդ, 161-րդ, 168-169-րդ, 357-360-րդ, 364-366-րդ, 369-373-րդ հոդվածներով, դատարանը`

Վ Ճ Ռ Ե Ց

Ճանաչել և հռչակել ամբաստանյալ Գագիկ Լևոնի Ավետիսյանի անմեղությունը` ՀՀ քրեական օրենսգրքի 176-րդ հոդվածի 2-րդ մասի 4-րդ կետով նախատեսված հանցանքի կատարման մեջ և նրան այդ մեղադրանքով արդարացնել` մեղադրողի կողմից մեղադրանքից հրաժարվելու պատճառաբանությամբ։
Ամբաստանյալ Գագիկ Լևոնի Ավետիսյանին մեղավոր ճանաչել Հայաստանի Հանրապետության քրեական օրենսգրքի 176-րդ հոդվածի 1-ին մասով նախատեսված հանցանքներում և ըստ այդ հոդվածով որակված հանցագործությունների դրվագների դատապարտել ազատազրկման հետևյալ ժամկետներով.
- առաջին, երկրորդ և երրորդ դրվագներով` 1 /մեկ/ տարի 6 /վեց/ ամիս ժամկետով,
- չորրորդ դրվագով` 1 /մեկ/ տարի ժամկետով,
- հինգերորդ դրվագով` 6 /վեց/ ամիս ժամկետով,
- վեցերորդ դրվագով` 6 /վեց/ ամիս ժամկետով,
ՀՀ քրեական օրենսգրքի 66-րդ հոդվածով սահմանված` պատիժների մասնակի գումարման սկզբունքի կիրառմամբ, ամբաստանյալ Գագիկ Լևոնի Ավետիսյանի նկատմամբ պատիժ նշանակել ազատազրկում 2 /երկու/ տարի 6 /վեց/ ամիս ժամկետով, որը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 2011թ. հուլիսի 12-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Ամբաստանյալ Գագիկ Լևոնի Ավետիսյանի անվամբ գրավադրված և «Ֆաստ Կրեդիտ» գրավատան Էրեբունու մասնաճյուղից առգրավված երկու ոսկյա շղթաների վրա նախաքննության մարմնի 26.10.2011թ. որոշմամբ դրված կալանքը վերացնել։
Դատավճռի օրինական ուժի մեջ մտնելուց հետո, 26.10.2011թ. որոշմամբ իրեղեն ապացույց ճանաչված ոսկյա շղթան և խաչը վերադարձնել տուժող Օ. Ուսյուկինային։
Տուժողներ և քաղաքացիական հայցվորներ Մարո Ալաբերքյանի, Աննա Գալստյանի և Գայանե Վասիլյանի քաղաքացիական հայցերը մերժել։
Ամբաստանյալ Գագիկ Լևոնի Ավետիսյանից հօգուտ ՀՀ պետական բյուջեի բռնագանձել 62.100 /վաթսուներկու հազար հարյուր/ ՀՀ դրամ գումար` որպես դատական ծախսեր։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ