Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

30 հունվարի 2012թ. ք. Երևան

ԵԿԴ-0232/01/11

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղարներ` Տ. Գրիգորյան,
Է. Մկրտչյան,

մասնակցությամբ`
մեղադրող,
Երևան քաղաքի Կենտրոն և Նորք-Մարաշ
վարչական շրջանների
դատախազի տեղակալ Ա. Աֆանդյանի

պաշտպան Վ. Էլբակյանի,

տուժող Մ. Գրիգորյանի,



դատարանում, դռնբաց դատական նիստում քննեց գործն ըստ մեղադրանքի
Արթուր Սերգեյի Աթարբեկյանի`
ծնված 1970թ. հուլիսի 17-ին Երևանում, հայ, Հայաստանի Հանրապետության քաղաքացի, բարձրագույն կրթությամբ, ՀՀ փաստաբանների պալատի անդամ, փաստաբան, խնամքին մինչև տասնչորս տարեկան մեկ երեխա, նախկինում դատված`
1/ ՀՀ Գերագույն դատարանի 07.02.1995թ. որոշմամբ, ՀՀ նախորդ քրեական օրենսգրքի 183-րդ հոդվածի 2-րդ մասով դատապարտվել է ազատազրկման երեք տարի վեց ամիս ժամկետով։ 04.05.1995թ. ազատվել է պատժի կրումից,
2/ ՀՀ Գերագույն դատարանի 29.02.1996թ. որոշմամբ, ՀՀ նախորդ քրեական օրենսգրքի 183-րդ հոդվածի 2-րդ մասով, նույն օրենսգրքի 37-րդ հոդվածի կիրառմամբ դատապարտվել է ազատազրկման վեց տարի ժամկետով։ «Համաներում հայտարարելու մասին» 26.09.1995թ. որոշմամբ պատժի ժամկետը կրճատվել է և վերջնական պատիժ է նշանակվել ազատազրկում չորս տարի վեց ամիս ժամկետով,
3/ Երևանի Շենգավիթ համայնքի առաջին ատյանի դատարանի 06.01.2004թ. դատավճռով, ՀՀ քրեական օրենսգրքի 258-րդ հոդվածի 3-րդ մասի 1-ին կետով, 112-րդ հոդվածի 1-ին մասով, 69-րդ հոդվածի 3-րդ մասի կիրառմամբ դատապարտվել է ազատազրկման երկու տարի տասնմեկ ամիս ժամկետով։ Նույն օրենսգրքի 70-րդ հոդվածի կիրառմամբ նշանակված պատիժը պայմանականորեն չի կիրառվել և սահմանվել է փորձաշրջան մեկ տարի ժամկետով, դատվածությունները մարված, բնակվել է Երևանի Մամիկոնյանց փողոցի թիվ 23/1 շենքի թիվ 53 բնակարանում, կալանքի տակ է 09.10.2011թ.-ից, մեղադրվում է ՀՀ քրեական օրենսգրքի 178-րդ հոդվածի 3-րդ մասի 1-ին կետով։


Գործի դատավարական նախապատմությունը
Թիվ 15132111 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2011թ. հոկտեմբերի 06-ին, ՀՀ քրեական օրենսգրքի 178-րդ հոդվածի 3-րդ մասի 1-ին կետով, խարդախությամբ ուրիշի գույքի առանձնապես խոշոր չափերի հափշտակություն կատարելու դեպքի առթիվ։
Քննիչի 16.11.2011թ. որոշմամբ, Մուշեղ Վահագնի Գրիգորյանի նկատմամբ, ՀՀ քրեական օրենսգրքի 34-312-րդ հոդվածով քրեական հետապնդում չի իրականացվել` կաշառք տալու մասին իրավապահ մարմիններին կամավոր հայտնելու պատճառաբանությամբ։
Ամբաստանյալ Արթուր Սերգեյի Աթարբեկյանին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով` հետևյալ արարքի համար. «որ նա` խարդախությամբ ուրիշի գույքի առանձնապես խոշոր չափերի հափշտակություն կատարելու դիտավորությամբ, չարաշահելով իր ընկեր Մուշեղ Վահագնի Գրիգորյանի վստահությունը, նրա որդի Վահագն Գրիգորյանի նկատմամբ, ՀՀ ոստիկանության ՔԳՎ-ում ՀՀ քր. օր.-ի 258 հոդ. 4-րդ մասով և 235 հոդ. 1-ին մասով հարուցված թիվ 15112010 քրեական գործով, մասը կարճելու համար պաշտոնատար անձանց կաշառք տալու պատրվակով, խաբեությամբ Մ. Գրիգորյանից ստացել է 13321730 ՀՀ դրամին համարժեք 37000 ԱՄՆ դոլար գումար և որևէ գործողություն չկատարելով, խաբեությամբ հափշտակել է նշված գումարը։
Այսպես.
փաստաբան Արթուր Աթարբեկյանը, ներգրավված լինելով որպես թիվ 15112010/1 քրեական գործով ՀՀ քր. օր.-ի 258 հոդ. 3-րդ մասի 1-ին կետով մեղադրյալ Վահագն Գրիգորյանի պաշտպան, չարաշահելով իր ընկեր, միևնույն ժամանակ իր պաշտպանյալի հայր, Մուշեղ Գրիգորյանի վստահությունը, նրա որդու` Վահագն Գրիգորյանի նկատմամբ քրեական գործով մասը կարճելու համար պաշտոնատար անձանց կաշառք տալու պատրվակով, 2010թ. դեկտեմբեր ամսին Մուշեղ Գրիգորյանից պահանջել և ՀՀ ոստիկանության ՔԳՎ շենքի դիմաց ` Մոսկովյան 1 հասցեում, ստացել է 35000 ԱՄՆ դոլար գումար, այնուհետև 2011թ.-ի հունվար ամսին Մաշտոցի պողոտայում` «Կակտուս» ռեստորանի դիմաց, մեկ այլ պատրվակով` վերոհիշյալ քր. գործը քննող քննչական խմբի անդամների համար հյուրասիրություն կազմակերպելու համար, Մ. Գրիգորյանից ստացել է 2000 ԱՄՆ դոլար գումար, սակայն սկզբնական մտադրվածության համաձայն խոստացվածից որևէ գործողություն չի կատարել, խաբեությամբ հափշտակել է վերը նշված գումարները, իսկ թիվ 15112010/1 քրեական գործն ըստ մեղադրանքի Վահագն Գրիգորյանի` ՀՀ քր. օր.-ի 258 հոդ. 3-րդ մասի 1-ին կետով, 15.09.2011թ.-ին մեղադրական եզրակացությամբ ուղարկվել է Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։»։
21.11.2011թ. քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։



Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
ՀՀ ոստիկանության ՔԳՎ ՀԿԳ քննության վարչության` մարդու դեմ ուղղված հանցագործությունների քննության բաժնում, 2010թ. դեկտեմբերի 8-ին, Երևանի Չարենց փողոցում մի խումբ անձանց կողմից, զենքի գործադրմամբ խուլիգանություն կատարելու դեպքի առթիվ քննվել է թիվ 15112010 քրեական գործը։ Նախաքննության մարմինը պարզված է համարել, որ նշված միջադեպին մասնակցել են Գուժ Աղաբեկյանը, Վահագն Գրիգորյանը, Էդգար Շախիկյանը, Գեորգի, Էռնեստ և Ալեքսանդր Թառոյանները։
2010թ. դեկտեմբերի 13-ին Վահագն Մուշեղի Գրիգորյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով։ Նախաքննության ընթացքում, որպես Վահագն Գրիգորյանի պաշտպան ներգրավվել է ՀՀ փաստաբանների պալատի անդամ, փաստաբան, սույն քրեական գործով ամբաստանյալ Արթուր Սերգեյի Աթարբեկյանը։ Վերջինս, խարդախությամբ ուրիշի գույքի առանձնապես խոշոր չափերի հափշտակություն կատարելու դիտավորությամբ, չարաշահելով իր ընկեր Մուշեղ Վահագնի Գրիգորյանի վստահությունը, ՀՀ ոստիկանության ՔԳՎ ՀԿԳ քննության վարչությունում, ՀՀ քրեական օրենսգրքի 258-րդ հոդվածի 4-րդ մասով և 235-րդ հոդվածի 1-ին մասով հարուցված թիվ 15112010 քրեական գործով, Մուշեղ Գրիգորյանի որդի Վահագն Գրիգորյանի մասը կարճելու համար պաշտոնատար անձանց կաշառք տալու պատրվակով, խաբեությամբ Մ. Գրիգորյանից ստացել է 13.321.730 ՀՀ դրամին համարժեք 37.000 ԱՄՆ դոլար գումար և որևէ գործողություն չկատարելով` խաբեությամբ հափշտակել է նշված գումարը հետևյալ հանգամանքներում.
Փաստաբան Արթուր Աթարբեկյանը, ներգրավված լինելով թիվ 15112010/1 քրեական գործով, որպես ՀՀ քրեական օրենսգրքի 258-րդ հոդվածի 3-րդ մասի 1-ին կետով մեղադրյալ Վահագն Գրիգորյանի պաշտպան, չարաշահելով իր ընկեր, իր պաշտպանյալի հայր Մուշեղ Գրիգորյանի վստահությունը, նրա որդի Վահագն Գրիգորյանի նկատմամբ քրեական գործի մասը կարճելու համար պաշտոնատար անձանց կաշառք տալու պատրվակով, 2010թ. դեկտեմբերին Մուշեղ Գրիգորյանից պահանջել և Երևանի Մոսկովյան թիվ 1 հասցեում գտնվող, ՀՀ ոստիկանության քննչական գլխավոր վարչության շենքի դիմաց ստացել է 35.000 ԱՄՆ դոլար գումար։
Այնուհետև, 2011թ. հունվարին, Երևանի Մաշտոցի պողոտայում գտնվող «Կակտուս» ռեստորանի դիմաց, մեկ այլ պատրվակով` իբրև թե վերոհիշյալ քրեական գործը քննող քննչական խմբի անդամների համար հյուրասիրություն կազմակերպելու նպատակով, տուժող Մ. Գրիգորյանից ստացել է 2000 ԱՄՆ դոլար գումար, որը նույնպես խաբեությամբ հափշտակել է։
15.09.2011թ.-ին թիվ 15112010/1 քրեական գործն ըստ մեղադրանքի Վահագն Գրիգորյանի` ՀՀ քրեական օրենսգրքի 258-րդ հոդվածի 3-րդ մասի 1-ին կետով և մյուսների` տարբեր հոդվածներով, մեղադրական եզրակացությամբ ուղարկվել է Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։ Այդ մասին իմանալով` Մ. Գրիգորյանը զանգահարել և հայտնել է ամբաստանյալ Արթուր Աթարբեկյանին։ Վերջինս խաբել է` ասելով, որ նրա որդու մասով գործը կարճելու որոշումն իր մոտ է գտնվում։ Չհավատալով նրա խոսքերին` տուժող Մ. Գրիգորյանը հետաքրքրվել, պարզել է Ա. Աթարբեկյանի կողմից իրականում իր գումարը որևէ մեկին չտալու և խաբեությամբ հափշտակելու հանգամանքը, որից հետո, 2011թ. սեպտեմբերի 30-ին, այդ մասին համապատասխան հաղորդում է տվել ՀՀ ոստիկանությունում։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Ա. Աթարբեկյանը խնամքին ունի մինչև տասնչորս տարեկան մեկ երեխա։


Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Տուժող Մուշեղ Վահագնի Գրիգորյանի ցուցմունքներով այն մասին, որ 2010թ. դեկտեմեբերի 8-ին իր որդի Վահագն Գրիգորյանը մասնակցել է Երևանի Չարենց փողոցում տեղի ունեցած մի կռվի, որի արդյունքում վնասվածքներ է ստացել և տեղափոխվել հիվանդանոց։ Այդ կռվի կապակցությամբ հարուցվել է քրեական գործ` ՀՀ քրեական օրենսգրքի 258-րդ հոդվածով։ Այդ գործի նախաքննությունն իրականացրել է ՀՀ ոստիկանության քննչական գլխավոր վարչությունը։ Քանի որ որդին ստացել է հրազենային վնասվածք, գտնվել է շատ ծանր վիճակում, ուստի մշտապես գտնվել է նրա կողքին։ Իր ընկերներն իմանալով այդ մասին` բոլորն էլ այդ ժամանակ եղել են իր կողքին և իրենց աջակցությունն են հայտնել։ Ընկերների թվում է եղել նաև Արթուր Աթարբեկյանը, որն իր համակուրսեցին է, նրան ճանաչում է շատ վաղուց։ Ա. Աթարբեկյանը տեղեկանալով, որ դեպքի կապակցությամբ քրեական գործ է քննվում, իր պատրաստակամությունն է հայտնել` այդ գործով զբաղվելու և որդու շահերը պաշտպանելու հարցում։ Ինքն էլ համաձայնվել է։ Խոսակցությունը եղել է ընկերական և որևէ պայմանագիր կնքելու, ցուցաբերվող իրավաբանական օգնության դիմաց վճարելու կամ դրա չափի մասին պայմանավորվածություն չի եղել։ Քանի որ որդին ստացած է եղել հրազենային վնասվածք` կարծել է, որ նա քրեական գործով որպես տուժող կներգրավվի, չի ենթադրել, որ հնարավոր է որդուն մեղադրանք առաջադրեն։ Դրանից հետո որդու մոտ է եկել քննիչը և Արթուր Աթարբեկյանի մասնակցությամբ կատարվել են քննչական գործողություններ։ Թե ինչ գործողություն է կատարվել և ինչ կարգավիճակ է որդին ստացել` չի իմացել, քանի որ այդ ժամանակ իրենք դուրս են եկել հիվանդասենյակից։ Երբ Արթուրից հարցրել է, թե ինչ է կատարվում, նա պատասխանել է, որ տղայի մասով գործ են հարուցել, սակայն գործը կկարճվի։
Մի քանի օր անց, Արթուրի հետ խոսակցության ժամանակ նա ասել է, որ գործի հետ կապված խնդիրներ չլինելու համար անհրաժեշտ կլինի գումար։ Ինքն այդ ժամանակ զարմացել է, քանի որ կարծել է, որ տղան տուժող է և Արթուրին հարցրել է, թե ինչ խնդիրներ պետք է լինեն։ Նա պատասխանել է` «դե որ ուզենան` կսարքեն, ավելի ճիշտ է էս գլխից հարցերը լուծենք»։
Դրանից մի քանի օր անց հանդիպել են և Ա. Աթարբեկյանն ասել է, որ խոսել է գործի համար, 50.000 ԱՄՆ դոլարի չափով գումար են ուզել, սակայն սակարկել է և 35.000 ԱՄՆ դոլարով պայմանավորվել է, որ որդու մասով քրեական գործը կարճվի։ Ինքը հարցրել է, թե ում հետ է նա ձեռք բերել նման պայմանավորվածություն, որին Ա. Աթարբեկյանը պատասխանել է, որ քննչական գլխավոր վարչությունում որպես բաժնի պետ աշխատող Արսեն Այվազյանի հետ է պայմանավորվել։ Վախենալով որդու ճակատագրի համար, նկատի ունենալով, որ նա սովորել է ԵՊՀ իրավաբանական ֆակուլտետում և եթե դատապարտվի, ապա հետագայում խնդիրներ կունենա` աշխատանքի հետ կապված, համաձայնվել է Արթուրի տարբերակի հետ։
Դեպքից շուրջ 15 օր անց պայմանավորվել և հանդիպել են ՀՀ ոստիկանության քննչական գլխավոր վարչության շենքի դիմացի այգում, որտեղ Ա. Աթարբեկյանին է փոխանցել տոպրակի մեջ փաթեթավորված, 100 ԱՄՆ դոլարանոց թղթադրամներով, 35.000 ԱՄՆ դոլար գումար։ Հանդիպումից հետո, երբ արդեն բաժանվել են, նկատել է, որ Ա. Աթարբեկյանը մտել է քննչական վարչության շենք, որից հետո ինքը հեռացել է։ Այդ ընթացքում որդին շուրջ 2 ամիս գտնվել է հիվանդանոցում և ինքն ավելի շատ զբաղված է եղել նրա առողջության հարցերով` քրեական գործի ընթացքի հետ կապված հարցերը վստահելով Արթուրին։ Վերջինս ասել է, որ ամեն ինչ նորմալ է, որդու մասով քրեական գործը կարճվելու է։ Այդ ընթացքում և դրանից հետո էլ եղել են դեպքեր, երբ քննիչ է եկել որդու մոտ, ինչպես նաև հիվանդանոցից դուրս գրվելուց հետո որդուն են հրավիրել քննչական վարչություն և ինքը կարծել է, որ այդ գործողությունները գործի լուծման համար են կատարվում։ Այդ մասին հարցրել է նաև Արթուր Աթարբեկյանին։ Վերջինս դա պատճառաբանել է նրանով, որ քրեական գործով անցնում են նաև այլ անձինք։ 35.000 ԱՄՆ դոլար գումարը տալուց շուրջ մեկ ամիս անց, հերթական խոսակցություններից մեկի ժամանակ Արթուր Աթարբեկյանն ասել է, որ ամեն ինչ նորմալ է և ինքն ուզում է քննիչներին «պատիվ տալ»։ Ինքը համաձայնվել է և Մաշտոցի պողոտայում` «Կակտուս» ռեստորանի մոտ Ա. Աթարբեկյանին է տվել 2000 ԱՄՆ դոլար գումար` նրա ասած «պատիվ տալը» կազմակերպելու համար։ Դրանից հետո անցել է մի քանի ամիս և կարծելով, որ բոլոր հարցերը կարգավորված են և ամեն ինչ նորմալ է` զբաղվել է իր անձնական գործերով։ Այդ ընթացքում Արթուր Աթարբեկյանն ասել է, որ ամեն ինչ նորմալ է, իր տղայի մասով գործը կարճվել է և այդ մասին որոշումը նա անձամբ տեսել է։
2011թ. սեպտեմբերի 28-ին դատարանից ծանուցում է ստացել` որդու վերաբերյալ քրեական գործը դատարանի կողմից վարույթ ընդունելու մասին և շատ է զարմացել։ Անմիջապես զանգահարել է Արթուր Աթարբեկյանին և ասել, որ դատարանից նման ծանուցում է ստացել, մինչդեռ նա ասել էր, որ գործը կարճվել է։ Արթուր Աթարբեկյանը պատասխանել է, որ դա թյուրիմացություն է և իրեն 2 օր ժամանակ է հարկավոր` այդ գործը դատարանից հետ բերելու համար։ Այդ պահից սկսած, արդեն կասկածելով նրա խոսքերի ճշմարտացիության վրա` որոշել է պարզել, թե ինչ է իրականում եղել գործի հետ։ Հասկանալով, որ խաբվել է Արթուր Աթարբեկյանի կողմից և որդու հարցերը լուծելու համար նրան այդ գումարը տալով` սխալ բան է արել, որոշել է տեղի ունեցածի մասին հայտնել իրավապահ մարմիններին։ Քանի որ Արթուրն իրեն ասել էր, որ պայմանավորվածությունը եղել է Արսեն Այվազյանի հետ և իր իմանալով նա է հանդիսացել այն քննչական բաժնի պետը, որտեղ քննվել է գործը, կարծել է, որ ճիշտը հենց նրա մոտ գնալն է։ Հանդիպել է նրան և հայտնել տեղի ունեցածի մասին։ Վերջինս իրեն ասել է, որ ոչ ոք իրեն ոչ մի գումար չի տվել, այդպիսի խոսակցություն նույնիսկ չի եղել, ընդհանրապես որդու համար ոչ ոք չի միջնորդել, նման բան լինել չէր էլ կարող, որդու վերաբերյալ քրեական գործով նախաքննությունն իրենց մոտ ավարտվել է և այն ուղարկվել է դատարան։ Արսեն Այվազյանն ասել է նաև, որ գրավոր հայտարարություն տա տեղի ունեցածի մասին, սակայն արդեն ուշ ժամ է եղել, իրեն լավ չի զգացել, խոստացել է, որ հաջորդ օրը կտա հայտարարությունը։
Հաջորդ օրն Արսեն Այվազյանն իրեն կանչել է իր մոտ։ Այնտեղ է եղել նաև Արթուր Աթարբեկյանը, որին Արսեն Այվազյանը հարցրել է, թե նա իրեն գումար տվել է, թե ոչ։ Արթուրը պատասխանել է, որ չի տվել։ Ա. Այվազյանը հարցրել է նաև, թե այդ շենքում ընդհանրապես որևէ մեկին գումար տվել է, թե ոչ, իսկ Ա. Աթարբեկյանը պատասխանել է, որ ոչ, չի տվել։ Հարցրել է, թե միասին հաց կերել են, թե ոչ, իսկ Ա. Աթարբեկյանը պատասխանել է, որ ոչ, նման բան չի եղել։ Այդ ժամանակ ինքն արդեն հարցրել է, թե ինչ է արել այդ գումարը, որին Ա. Աթարբեկյանը պատասխանել է, որ ուրիշ տեղ է տվել, հետո կասի։ Այդ ամենից հետո Արսեն Այվազյանն իրեն ասել է, որ զեկուցագիր է ներկայացրել իր պատմածի մասին և իրեն կկանչեն ու հայտարարություն կընդունեն։ Այդ պատճառով էլ ինքն անձամբ, մինչև 6-րդ վարչություն հրավիրվելը չի գնացել և գրավոր հայտարարություն չի տվել։ Արսեն Այվազյանի աշխատասենյակից դուրս գալուց հետո ինքը ևս մեկ անգամ հարցրել է Ա. Աթարբեկյանին, թե ինչ է արել նա գումարը։ Վերջինս պատասխանել է, որ դատախազությունում ինչ-որ պաշտոնյայի է տվել և երկու օրից կարճման որոշումը նա իրեն ցույց կտա։ Չհավատալով նրան և չցանկանալով նրա հետ որևէ խոսակցություն ունենալ` որոշել է, որ այդ հարցով պետք է զբաղվեն իրավապահ մարմինները։
/դատական նիստի արձանագրություն, գ.թ. 41-46/
Տուժող Մուշեղ Գրիգորյանն իր ցուցմունքները պնդել է նաև ամբաստանյալ Արթուր Աթարբեկյանի հետ առերես հարցաքննության ժամանակ։
/գ.թ 65-66/
Վկաներ, ՀՀ ոստիկանության ՔԳՎ ՀԳԿ քննության վարչության մարդու դեմ ուղղված հանցագործությունների բաժնի պետ Արսեն Վոլոդիայի Այվազյանի և նույն բաժնում որպես ավագ քննիչ աշխատած Երեմ Գերասիմի Սարգսյանի նախաքննական նույնաբովանդակ ցուցմունքներով այն մասին, որ ՀՀ ոստիկանության ՔԳՎ ՀԿԳ քննության վարչության` մարդու դեմ ուղղված հանցագործությունների քննության բաժնում, քննվել է 2010թ. դեկտեմբերի 8-ին, Երևանի Չարենց փողոցում, մի խումբ անձանց կողմից, զենքի գործադրմամբ խուլիգանություն կատարելու դեպքի առթիվ հարուցված թիվ 15112010 քրեական գործը։ Նախաքննության ընթացքում պարզվել է, որ վերը նշված խուլիգանությանը մասնակցել են Գուժ Աղաբեկյանը, Վահագն Գրիգորյանը, Էդգար Շախիկյանը, Գեորգի, Էռնեստ և Ալեքսանդր Թառոյանները։
Էդգար Շախիկյանը և Գուժ Աղաբեկյանը ձերբակալվել են 2010 թվականի դեկտեմբերի 10-ին, ՀՀ քրեական օրենսգրքի 258-րդ հոդվածի 4-րդ մասով նախատեսված հանցագործություն կատարելու կասկածանքով։ Նույն օրը, ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցագործություն կատարելու կասկածանքով ձերբակալվել են Գեորգի Թառոյանը և Վահագն Գրիգորյանը, իսկ անչափահասներ Էռնեստ և Ալեքսանդր Թառոյանների նկատմամբ որպես խափանման միջոց է ընտրվել հսկողության հանձնելը։
Գուժ Աղաբեկյանին ՀՀ քրեական օրենսգրքի 258-րդ հոդվածի 4-րդ մասով, իսկ Վահագն Գրիգորյանին և Գեորգի Թառոյանին` ՀՀ քրեական օրենսգրքի 258-րդ հոդվածի 3-րդ մասի 1-ին կետով մեղադրանք է առաջադրվել 2010 թվականի դեկտեմբերի 13-ին։ Գեորգի Թառոյանի նկատմամբ որպես խափանման միջոց է ընտրվել կալանավորումը, որը փոխարինվել է գրավով, իսկ մեղադրյալներ Գուժ Աղաբեկյանի և Վահագն Գրիգորյանի նկատմամբ որպես խափանման միջոց կալանավորումը կիրառելու մասին միջնորդությունները Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի կողմից մերժվել են։ Մեղադրյալներ Գուժ Աղաբեկյանը և Վահագն Գրիգորյանը ազատվել են արգելանքից և նրանց նկատմամբ որպես խափանման միջոց է ընտրվել չհեռանալու մասին ստորագրությունը։ Դատարանի որոշումները ՀՀ գլխավոր դատախազության կողմից բողոքարկվել են ՀՀ վերաքննիչ քրեական դատարան, իսկ ՀՀ վերաքննիչ քրեական դատարանի որոշումը` ՀՀ վճռաբեկ դատարան, սակայն առաջին ատյանի դատարանի որոշումները թողնվել են անփոփոխ։
2010 թվականի դեկտեմբերի 17-ին անչափահաս մեղադրյալներ Էռնեստ և Ալեքսանդր Թառոյաններին նույնպես մեղադրանք է առաջադրվել ՀՀ քրեական օրոնսգրքի 258-րդ հոդվածի 3-րդ մասի 1-ին կետով։
2011 թվականի օգոստոսի 5-ին որոշում է կայացվել մեղադրյալ Էդգար Շախիկյանի նկատմամբ ՀՀ քրեական օրենսգրքի 235-րդ հոդվածի 1-ին մասով քրեական հետապնդումը` համաներման ակտ ընդունվելու հիմքով դադարեցնելու մասին։
Որոշում է կայացվել նաև Է.Շախիկյանին առաջադրված մեղադրանքը փոփոխելու մասին և 2011 թվականի օգոստոսի 9-ին նրան մեղադրանք է առաջադրվել ՀՀ քրեական օրենսգրքի 34-104 հոդվածի 2-րդ մասի 1-ին կետով, 185-րդ հոդվածի 2-րդ մասի 2-րդ կետով և 258-րդ հոդվածի 4-րդ մասով։
2011 թվականի օգոստոսի 8-ին որոշում է կայացվել մեղադրյալ Վահագն Գրիգորյանին առաջադրված մեղադրանքը լրացնելու մասին և նրան կրկին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով։
2011 թվականի օգոստոսի 16-ին որոշում է կայացվել մեղադրյալ Գուժ Աղաբեկյանին առաջադրված մեղադրանքը լրացնելու մասին և նրան կրկին մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ մասով։
2011 թվականի օգոստոսի 20-ին որոշումներ են կայացվել անչափահաս մեղադրյալներ Էռնեստ և Ալեքսանդր Թառոյանների նկատմամբ ՀՀ քրեական օրենսգրքի 258-րդ հոդվածի 3-րդ մասի 1-ին կետով քրեական հետապնդումը համաներման ակտ ընդունվելու հիմքով դադարեցնելու մասին։
2011 թվականի օգոստոսի 20-ին որոշում է կայացվել թիվ 15112010 քրեական գործից մաս անջատելու մասին, որին շնորհվել է թիվ 15112010/1 համարը։
Թիվ 15112010/1 քրեական գործը 2011 թվականի սեպտեմբերի 15-ին, մեղադրական եզրակացությամբ ուղարկվել է ՀՀ գլխավոր դատախազություն` մեղադրական եզրակացությունը հաստատելու և քրեական գործը դատարան ուղարկելու միջնորդությամբ, իսկ 2011 թվականի սեպտեմբերի 19-ին քրեական գործն ուղարկվել է դատարան։
Թիվ 15112010 քրեական գործի նախաքննությունը` հանցագործությունների մյուս մասնակիցներին հայտնաբերելու ուղղությամբ, շարունակվում է։
Ա. Այվազյանը հայտնել է, որ 28.09.2011թ., ժամը 21-ի սահմաններում իրեն է դիմել անծանոթ մի տղամարդ, ներկայացել Մուշեղ անունով և հայտնել, որ հանդիսանում է նրա կողմից ղեկավարվող բաժնում քննվող քրեական գործով մեղադրյալ Վահագն Գրիգորյանի հայրը։ Նա պատմել է, որ ամիսներ առաջ, իր որդու պաշտպան Արթուր Աթարբեկյանն իրենից պահանջել և ստացել է 50.000 ԱՄՆ դոլար գումար՝ իր որդու վերաբերյալ քրեական գործը կարճելու նպատակով այն իրավապահ մարմիններին փոխանցելու համար։ Մուշեղ Գրիգորյանը հայտնել է նաև, որ գումարն իրենից ստանալուց որոշ ժամանակ անց Արթուր Աթարբեկյանն իրեն հայտնել է, որ նշված գումարն ամբողջությամբ փոխանցել է իրավապահ մարմիններին, որի դիմաց շուտով կարճվելու է քրեական գործը։ Մուշեղ Գրիգորյանը հայտնել է նաև, որ 2.000 ԱՄՆ դոլար գումար էլ տվել է Արթուր Աթարբեկյանին՝ քրեական գործը քննող քննչական խմբի անդամներին ճաշկերույթի հրավիրելու նպատակով։ Երբ իր որդու վերաբերյալ քրեական գործն ուղարկվել է դատարան` հասկացել է, որ Արթուր Աթարբեկյանը խաբել է, ուստի որոշել է կատարվածի մասին հայտնել իրեն։
Շարունակելով իր ցուցմունքը` Ա. Այվազյանը նշել է, որ ըստ Մուշեղ Գրիգորյանի խոսքերի՝ Արթուր Աթարբեկյանն ասել է, որ իբրև թե նշված գումարը տվել է իրեն։ Մուշեղ Գրիգորյանից տեղեկանալով վերոգրյալի մասին` նույն պահին նրան առաջարկել է կատարվածի մասին տալ գրավոր հաղորդում, սակայն վերջինս պատճառաբանելով, որ անհետաձգելի գործեր ունի` խոստացել է լրացուցիչ ներկայանալ և այդ ամենի մասին հայտնել գրավոր կարգով։ Հաջորդ օրը, առավոտյան, կատարվածի մասին հայտնել է իր ղեկավարությանը` ներկայացնելով համապատասխան զեկուցագիր։ Մինչ զեկուցագիր ներկայացնելը, որպեսզի համոզվի, թե ինչ է իրականում տեղի ունեցել և որ Մուշեղ ներկայացած անձնավորությունը իրականում հանդիսանում է Վահագն Գրիգորյանի հայրը, իսկ Արթուր Աթարբեկյանն իրականում հանդիսանում է հենց այն անձը, ում Մուշեղը տվել է գումարը, իր մոտ միաժամանակ հրավիրել է Արթուր Աթարբեկյանին և Մուշեղ Գրիգորյանին։ Նրանց հետ ունեցած զրույցի արդյունքում համոզվել է, որ իրականում Արթուր Աթարբեկյանը խաբեությամբ` կաշառք տալու պատրվակով, Մուշեղ Գրիգորյանից պահանջել և ստացել է նշված գումարը և խաբեությամբ տիրացել այդ գումարին։ Այդ ամենը ճշտելուց հետո, համոզվելով, որ զեկուցագրի բովանդակությունը համապատասխանում է իրականությանը` այն ներկայացրել է ՀՀ ոստիկանության ղեկավարությանը։
Ա. Այվազյանն ու Ե. Սարգսյանը հայտնել են նաև, որ ոչ Արթուր Աթարբեկյանը, ոչ էլ որևէ այլ անձ Վահագն Գրիգորյանին կամ որևէ այլ անձի օգնելու խնդրանքով երբեք իրենց չեն դիմել, քրեական գործի նախաքննությունը կատարվել է լրիվ, օբյեկտիվ և բազմակողմանի, որի արդյունքում վերը նշված անձանց, այդ թվում Վահագն Գրիգորյանի մասով քրեական գործն ուղարկվել է դատարան, իսկ քրեական գործից անջատված մասով, հանցագործության մյուս մասնակիցներին հայտնաբերելու ուղղությամբ նախաքննությունը շարունակվում է։
/գ.թ. 47-51, 128-131/
Վկա Վահագն Մուշեղի Գրիգորյանի ցուցմունքներով այն մասին, որ 2010թ. դեկտեմբերի 8-ին մասնակցել է Երևանի Չարենց փողոցում տեղի ունեցած մի կռվի, որի ժամանակ իր վրա կրակել են և ստացել է մարմնական վնասվածք։ Այդ պատճառով շուրջ երկու ամիս պառկել է հիվանդանոցում և գտնվել է շատ ծանր վիճակում։ Այդ ժամանակ իր մոտ եկել են ոստիկանության աշխատողներ, նաև քննիչ։ Իր հարցաքննություններին մասնակցել է իր հայրիկի ընկեր Արթուր Աթարբեկյանը։ Նա միշտ մասնակցել է իր հետ իրականացվող գործողություններին։ Հիվանդանոցից դուրս գրվելուց հետո նույնպես եղել են դեպքեր, երբ քննիչը կանչել է հարցաքննության և իր պաշտպան Ա. Աթարբեկյանն իր հետ է եղել։ Ենթադրել է, որ ինքը տուժող է։ Չի իմացել, որ իրեն մեղադրանք է առաջադրվել կամ իր նկատմամբ խափանման միջոց է ընտրվել, իսկ հարցաքննությունների ժամանակ իմացել է, թե հարցաքննվում է որպես տուժող։ Փաստաթղթերը, որոնք ստորագրել է, չի կարդացել, քանի որ փաստաբանն է միայն նայել, ասել է, որ ամեն ինչ նորմալ է և ինքն էլ ստորագրել է։ Նախաքննության ավարտ հայտնելու համար քննիչն իրեն կանչել է և պարզաբանել, որ գործը դատարան է ուղարկվում։ Այդ ժամանակ շատ է զարմացել, քանի որ հայրն ասել էր, որ գործն իր մասով կարճվելու է։ Այդ մասին ասել է հորը, որն էլ ասել է, որ ամեն ինչ նորմալ է, իր գործը կարճելու են։ Դրանից հետո իմացել է, որ գործը դատարան է ուղարկվել։
Տեղյակ չէ, թե ինչ է իր հայրը պայմանավորվել փաստաբանի հետ։ Այդ մասին հայրն իրեն որևէ բան չի ասել, այլ ասել է միայն, որ հանգիստ լինի, գործը կարճելու են, քանի որ տուժող է։ Ինքն էլ է այդպես մտածել, քանի որ այդ կռվի ճամանակ հրազենային վնասվածք է ստացել։
/դատական նիստի արձանագրություն, գ.թ. 98/
Վկա Լևոն Գարուշի Թորոսյանի ցուցմունքներով այն մասին, որ շուրջ 20 տարի է, ինչ ճանաչում է Մուշեղ Գրիգորյանին և վերջինիս հետ գտնվում է մտերիմ, ընկերական հարաբերությունների մեջ։ 2010թ. նոյեմբեր-դեկտեմբեր ամիսներին Մուշեղ Գրիգորյանից տեղեկացել է նրա որդու հետ պատահած դեպքի մասին և իմացել, որ տղայի վրա կրակել են։ Նա դրանից հետո, բավականին երկար ժամանակ պառկած է եղել հիվանդանոցում։ Ինքն այդ ընթացքում եղել է Մուշեղի կողքին։ Տեղյակ է եղել, որ այդ դեպքի հետ կապված քրեական գործ է հարուցվել, քննություն է կատարվել և անընդհատ ոստիկաններ են այցելել հիվանդանոց։ Մուշեղից հետաքրքրվել է, թե ինչպես են իր որդու գործերը, ինչ կապ ունի նա այդ քրեական գործի հետ։ Մուշեղն ասել է, որ ամեն ինչ նորմալ է, իր որդու հետ կապված որևէ հարց չկա։ Որպես Մուշեղի ընկեր` նրա կողքին է եղել նաև Արթուր Աթարբեկյանը։ Վերջինիս ինքը ճանաչել է և քանի որ նա փաստաբան է եղել` ներկայացրել է Մ. Գրիգորյանի որդու շահերը։ Որոշ ժամանակ անց, Մուշեղի հետ խոսելու ժամանակ, նրանից տեղեկացել է, որ Արթուր Աթարբեկյանին 37.000 ԱՄՆ դոլար գումար է տվել, որ տղայի մասով գործը կարճվի։ Շուրջ մեկուկես ամիս առաջ Մուշեղն իրեն ասել է, որ Արթուրը խաբել է և նրա տղայի գործը դատարան են ուղարկել։ Արթուրը հրաժարվել է գումարը վերադարձնել և ասել է, որ այդ հարցը կկարգավորի, քանի որ ինչ-որ թյուրիմացություն է տեղի ունեցել։
/դատական նիստի արձանագրություն, գ.թ 127/
Որպես այլ փաստաթուղթ` ապացույց ճանաչված, Մուշեղ Գրիգորյանի 093-40-03-09 և Արթուր Աթարբեկյանի 094-17-30-03 և 091-17-30-03 հեռախոսահամարների վերծանումներով, որոնց համաձայն` 09.12.2010թ-ից մինչև 26.01.2011թ.-ն ընկած ժամանակահատվածում Ա. Աթարբեկյանը և Մ. Գրիգորյանը գտնվել են հեռախոսային կապի մեջ։
/գ.թ 110-112, 118-120, 134-135/
Նախաքննության և դատաքննության ընթացքում ամբաստանյալ Արթուր Աթարբեկյանը հրաժարվել է ցուցմունքներ տալուց և հարցերին պատասխանելուց։
/դատական նիստի արձանագրություն, գ.թ. 74/։


Դատարանի իրավական վերլուծությունները

Վերլուծելով ամբաստանյալ Արթուր Սերգեյի Աթարբեկյանին առաջադրված մեղադրանքը, գործով ձեռք բերված ապացույցները` դատարանը գտնում է, որ ամբաստանյալ Արթուր Սերգեյի Աթարբեկյանի կողմից, նրա մեղավորությամբ, առանձնապես խոշոր չափերով խարդախություն կատարելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող ու ծանրացնող հանգամանքները, ամբաստանյալ Արթուր Սերգեյի Աթարբեկյանի նկատմամբ պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը։ Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում խնամքին մինչև տասնչորս տարեկան մեկ երեխայի առկայությունը, իսկ ամբաստանյալի պատասխանատվությունը և պատիժը ծանրացնող հանգամանքներ դատարանը չի արձանագրում։
Ամբաստանյալ Արթուր Սերգեյի Աթարբեկյանն իր կատարած` Հայաստանի Հանրապետության քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցագործության համար ենթակա է պատժի ազատազրկման ձևով, գույքի մեկ քառորդ մասի բռնագրավմամբ, որոնք նա պետք է կրի։
Քննարկելով ամբաստանյալի գույքի վրա դրված կալանքի հարցը` դատարանը գտնում է, որ Արթուր Սերգեյի Աթարբեկյանի գույքի վրա նախաքննության մարմնի 13.10.2011թ. որոշմամբ դրված կալանքը պետք է թողնել անփոփոխ` մինչև դատավճռի կատարումը։
Քննարկելով խափանման միջոցի հարցը` դատարանը գտնում է, որ ամբաստանյալ Արթուր Աթարբեկյանի նկատմամբ որպես խափանման միջոց կալանավորումն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360-րդ, 364-366-րդ, 369-373-րդ հոդվածներով, դատարանը`


Վ Ճ Ռ Ե Ց

Ամբաստանյալ Արթուր Սերգեյի Աթարբեկյանին մեղավոր ճանաչել Հայաստանի Հանրապետության քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցանքում և դատապարտել ազատազրկման 5 /հինգ/ տարի ժամկետով` գույքի մեկ քառորդ մասի բռնագրավմամբ, սակայն ոչ ավելի 37.000 /երեսունյոթ հազար/ ԱՄՆ դոլարին համարժեք ՀՀ դրամ գումարից, որը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 2011թ. հոկտեմբերի 09-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Ամբաստանյալ Արթուր Աթարբեկյանի գույքի վրա նախաքննության մարմնի 13.10.2011թ. որոշմամբ դրված կալանքը թողնել անփոփոխ` մինչև դատավճռի կատարումը։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ