ԵԿԴ/0193/01/11







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«15» նոյեմբերի 2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Ա.Գալստյան
պաշտպան Ն.Մեհրաբյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Գարիկ Ռազմիկի Հովհաննիսյանի` ծնված 1970 թվականի հոկտեմբերի 22-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, նախկինում չդատապարտված, աշխատում է Երևանի ոսկերչական գործարանում` որպես արտադրության գծով տնօրեն, հաշվառված է Երևան քաղաքի Կիևյան փողոցի 4/2 շենքի 14-րդ բնակարանում, մեղադրանք է առաջադրվել ՀՀ քրեական օրենսգրքի 258-րդ հոդվածի 1-ին մասով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2011 թվականի սեպտեմբերի 22-ին ՀՀ ոստիկանության Կենտրոնականի քննչական բաժնի ավագ քննիչ Է.Աղայանի որոշմամբ ՀՀ քրեական օրենսգրքի 258-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 15130411 քրեական գործը:
2011 թվականի սեպտեմբերի 23-ին ՀՀ ոստիկանության Կենտրոնականի քննչական բաժնի քննիչ Ս.Պետրոսյանի որոշմամբ թիվ 15130411 քրեական գործն ընդունվել է վարույթ:
2011 թվականի հոկտեմբերի 6-ին ՀՀ ոստիկանության Կենտրոնականի քննչական բաժնի քննիչ Ս.Պետրոսյանի որոշմամբ թիվ 15130411 քրեական գործով Գարիկ Ռազմիկի Հովհաննիսյանին մեղադրանք է առաջադրվել ՀՀ քրեական օրենսգրքի 258-րդ հոդվածի 1-ին մասով:
2011 թվականի հոկտեմբերի 19-ին ՀՀ ոստիկանության Կենտրոնականի քննչական բաժնի քննիչ Ս.Պետրոսյանի որոշմամբ թիվ 15130411 քրեական գործով Մանուկ Մարկոսյանի կողմից խուլիգանություն կատարելու կապակցությամբ քրեական հետապնդում չի իրականացվել` նրա արարքում հանցակազմի բացակայության հիմքով:
2011 թվականի հոկտեմբերի 24-ին Գարիկ Ռազմիկի Հովհաննիսյանի վերաբերյալ թիվ 15130411 քրեական գործը մեղադրական եզրակացությամբ ուղարկվել է Դատարան, որին շնորհվել է ԵԿԴ/0193/01/11 համարը:
Գարիկ Ռազմիկի Հովհաննիսյանին մեղադրանք է առաջադրվել ՀՀ քրեական օրենսգրքի 258-րդ հոդվածի 1-ին մասով` այն արարքի համար, որ նա 2011 թվականի հուլիսի 19-ին` ժամը 21:30-ի սահմաններում, Երևան քաղաքի Սայաթ-Նովա և Տերյան փողոցների հատման մասում կատարել է խուլիգանություն: Այսպես.
2011 թվականի հուլիսի 19-ին` ժամը 21:30-ին, Լևոն Անդրանիկի Քալոյանն իրեն պատկանող «Ֆոլկսվագեն» մակնիշի 22ՕՍ338 պետհամարանիշի ավտոմեքենայով Երևան քաղաքի Սայաթ-Նովա և Տերյան փողոցների հատման մասով երթևեկելիս դիտողություն է արել լուսացույցի կարմիր լույսի տակ փողոցը քայլելով հատող Ռազմիկ Գարիկի Հովհաննիսյանին և խորհուրդ է տվել զգուշավորություն ցուցաբերել: Փողոցի հակառակ կողմում սպասող Ռազմիկ Հովհաննիսյանի հայր Գարիկ Հովհաննիսյանը, նշված հանգամանքը նկատելով, իր հերթին դիտողություն է արել Լևոն Քալոյանին և պահանջել է ավտոմեքենան զգույշ վարել: Վերջինը պարզաբանումներ ստանալու նպատակով ավտոմեքենան կանգնեցրել է Տերյան փողոցում, ապա դուրս եկել ավտոմեքենայից: Գարիկ Հովհաննիսյանը քայլելով մոտեցել է Լևոն Քալոյանին և սկսել է վիճաբանել նրա հետ, որի ընթացքում կոպիտ կերպով խախտելով հասարակական կարգը, որն արտահայտվել հասարակության նկատմամբ բացահայտ անհարգալից վերաբերմունք դրսևորելով, աղմկել է և հայհոյել` իր այդ դիտավորյալ գործողություններով շուրջ 3-4 րոպե տևողությամբ խանգարել է ներկաների և անցորդների հանգիստը:
2. Արագացված դատական քննություն.
Մինչ դատաքննությունն սկսելն ամբաստանյալ Գարիկ Ռազմիկի Հովհաննիսյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Գարիկ Ռազմիկի Հովհաննիսյանը կատարել է արարք` նախատեսված ՀՀ քրեական օրենսգրքի 258-րդ հոդվածի 1-ին մասով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` սթափության վիճակի զննության թիվ 102682 արձանագրությունը, ՀՀ ոստիկանության ինֆորմացիոն կենտրոնի պահանջագիրը, դիպլոմի, ամուսնության վկայականի և ծննդյան վկայականների պատճենները, եկավ հետևյալ եզրահանգման.
Գարիկ Հովհաննիսյանի անձը դրականորեն բնութագրող հանգամանքներ են ամուսնացած լինելը, բարձրագույն կրթություն ունենալը, աշխատելը, առաջադրված մեղադրանքում իրեն մեղավոր ճանաչելը և կատարածի համար զղջալը:
Գարիկ Հովհաննիսյանի պատասխանատվությունն ու պատիժը մեղմացնող հանգամանք է խնամքին 14 տարին չլրացած (Ստեփան Գարիկի Հովհաննիսյան` ծնված 2005 թվականի հունվարի 22-ին) և անչափահաս (Ռազմիկ Գարիկի Հովհաննիսյան` ծնված 1995 թվականի մարտի 3-ին) երեխաների առկայությունը:
Դատարանը գտնում է, որ Գարիկ Հովհաննիսյանի պատասխանատվությունն ու պատիժը մեղմացնող հանգամանք պետք է դիտել նաև նախկինում արատավորված` դատապարտված չլինելը:
ՀՀ քրեական օրենսգրքի 63-րդ հոդվածի 1-ին մասի 14-րդ կետի համաձայն` պատասխանատվությունը և պատիժը ծանրացնող հանգամանք է հանցանքն ալկոհոլի ազդեցության տակ կատարելը:
Դատարանը, նկատի ունենալով, որ Գարիկ Հովհաննիսյանը քրեական օրենսգրքով նախատեսված արարքը կատարել է ալկոհոլի ազդեցության տակ, գտնում է, որ նրա պատասխանատվությունն ու պատիժը ծանրացնող հանգամանք է հանցանքն ալկոհոլի ազդեցության տակ կատարելը:
Կատարած արարքի համար ամբաստանյալ Գարիկ Հովհաննիսյանը ենթակա է քրեական պատասխանատվության և պատժի:
Դատարանը, հաշվի առնելով Գարիկ Հովհաննիսյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ինչպես նաև այն, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պատիժ պետք է նշանակել տուգանքի ձևով:
Դատարանը գտնում է, որ Գարիկ Հովհաննիսյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ դատական ծախսերն ամբաստանյալ Գարիկ Հովհաննիսյանից ենթակա չեն բռնագանձման, քանի որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախս սույն քրեական գործով չկա, իսկ 2-8-րդ կետերով նախատեսված դատական ծախսերն արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի, ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը

ՎՃՌԵՑ

Գարիկ Ռազմիկի Հովհաննիսյանին մեղավոր ճանաչել ՀՀ քրեական օրենսգրքի 258-րդ հոդվածի 1-ին մասով և պատիժ նշանակել տուգանք` նվազագույն աշխատավարձի քառասնապատիկի չափով:
Գարիկ Ռազմիկի Հովհաննիսյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին մասի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ