ԵԿԴ/0192/01/11





ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ


«21» դեկտեմբերի 2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)` նախագահող դատավոր Մ.Պապոյան, քարտուղարությամբ Ռ.Ավետյանի, մասնակցությամբ մեղադրող Ա.Գալստյանի, տուժող Տ.Ավետիսյանի, ամբաստանյալ Գարեն Հայկի Չախոյանի, պաշտպան Ա.Սարդարյանի դռնբաց դատական նիստում քննելով քրեական գործն ըստ մեղադրանքի Գարեն Հայկի Չախոյանի (ծնված 1993 թվականի մարտի 5-ին Երևան քաղաքում, ազգությամբ հայ, ՀՀ քաղաքացի, սովորում է Հայաստանում ֆրանսիական համալսարանի իրավաբանական ֆակուլտետի 2-րդ կուրսում, չամուսնացած, նախկինում չդատապարտված, չի աշխատում, հաշվառված է Երևան քաղաքի Էստոնական փողոցի 7-րդ շենքի 61-րդ բնակարանում, խափանման միջոց ընտրվել է ստորագրություն չհեռանալու մասին)` ՀՀ քրեական օրենսգրքի 118-րդ հոդվածով
ՊԱՐԶԵՑ

2011 թվականի հուլիսի 15-ին ՀՀ ոստիկանության Կենտրոնականի քննչական բաժնի քննիչ Է.Պետրոսյանի որոշմամբ ՀՀ քրեական օրենսգրքի 316-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 13147411 քրեական գործը:
2011 թվականի հոկտեմբերի 5-ին ՀՀ ոստիկանության Կենտրոնականի քննչական բաժնի քննիչ Է.Պետրոսյանի որոշմամբ թիվ 13147411 քրեական գործով Գարեն Հայկի Չախոյանին մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով:
2011 թվականի հոկտեմբերի 20-ին Գարեն Հայկի Չախոյանի վերաբերյալ թիվ 13147411 քրեական գործը մեղադրական եզրակացությամբ ուղարկվել է Դատարան, որին շնորհվել է ԵԿԴ/0192/01/11 համարը:
2011 թվականի դեկտեմբերի 16-ին` դատական քննության ընթացքում, մեղադրող` Երևան քաղաքի Կենտրոն և Նորք-Մարաշ վարչական շրջանների դատախազության ավագ դատախազ Ա.Գալստյանի որոշմամբ Գարեն Հայկի Չախոյանին առաջադրված մեղադրանքը փոփոխվել է և նրան նոր մեղադրանք է առաջադրվել ՀՀ քրեական օրենսգրքի 118-րդ հոդվածով` այն արարքի համար, որ նա 2011 թվականի հուլիսի 14-ին` ժամը 23:30-ի սահմաններում, Երևան քաղաքի Մաշտոցի պողոտայի և Թումանյան փողոցի խաչմերուկի մոտ վիճաբանության է բռնվել Տիգրան Ալեքսանի Ավետիսյանի հետ, որի ընթացքում բռնի գործողություններ կատարելով վերջինի նկատմամբ` դիտավորությամբ բռնուցքով հարվածել է նրա դեմքի և բազկի շրջանում` պատճառելով մարմնական վնասվածքներ, որոնք առողջության թեթև վնասի հատկանիշներ չեն պարունակում:
2011 թվականի դեկտեմբերի 21-ի դատական նիստի ժամանակ տուժող Տիգրան Ավետիսյանը հայտնեց, որ հաշտվել է ամբաստանյալ Գարեն Չախոյանի հետ, և նշեց, որ գիտակցում է հաշտվելու հետևանքները: Ամբաստանյալ Գարեն Չախոյանը նույնպես հայտնեց, որ հաշտվել է Տիգրան Ավետիսյանի հետ, և նշեց, որ գիտակցում է հաշտվելու հետևանքները:
ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական օրենսգրքի 183-րդ հոդվածի 1-ին մասի համաձայն` ՀՀ քրեական օրենսգրքի 118-րդ հոդվածով նախատեսված հանցագործության վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Դատարանը, նկատի ունենալով, որ տուժող Տիգրան Ավետիսյանը և ամբաստանյալ Գարեն Չախոյանը հաշտվել են միմյանց հետ, գտնում է, որ թիվ ԵԿԴ/0192/01/11 քրեական գործի վարույթը պետք է կարճել և Գարեն Չախոյանի նկատմամբ քրեական հետապնդումը դադարեցնել:
Դատարանը գտնում է, որ Գարեն Չախոյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև սույն որոշման օրինական ուժի մեջ մտնելը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ, 41-րդ, 183-րդ և 313-րդ հոդվածներով` Դատարանը

ՈՐՈՇԵՑ

Թիվ ԵԿԴ/0192/01/11 քրեական գործի վարույթը կարճել և Գարեն Հայկի Չախոյանի նկատմամբ քրեական հետապնդումը դադարեցնել` տուժող Տիգրան Ալեքսանի Ավետիսյանի հաշտվելու հիմքով:
Գարեն Չախոյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև սույն որոշման օրինական ուժի մեջ մտնելը:
Սույն որոշումը կարող է բողոքարկվել Հայաստանի Հանրապետության վերաքննիչ քրեական դատարան` հրապարակման օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ