Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

31 հոկտեմբերի 2011թ. ք. Երևան

ԵԿԴ-0189/01/11

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Տ. Գրիգորյան,

մասնակցությամբ`
մեղադրող,
Երևանի Կենտրոն և Նորք-Մարաշ
վարչական շրջանների դատախազության
ավագ դատախազ Ս. Հարությունյանի,

պաշտպան Ա. Կարապետյանի,

տուժող Լ. Բաքոյան,



դատարանում, դռնբաց դատական նիստում, դատական քննության արագացված կարգի կիրառմամբ քննեց գործն ըստ մեղադրանքի
Ռուբեն Արթուրի Սեդրակյանի`
ծնված 1988թ. հոկտեմբերի 22-ին Երևանում, հայ, Հայաստանի Հանրապետության /այսուհետ ՀՀ/ քաղաքացի, միջնակարգ կրթությամբ, ամուրի, խնամքին ոչ ոք, նախկինում չդատված, աշխատում է «Յուքոմ» ՍՊԸ-ում որպես տեխնիկ, բնութագրվում է դրական, հաշվառված է և բնակվել է Երևանի Գլինկայի 1-ին նրբանցքի թիվ 2 տանը, կալանքի տակ է 29.08.2011թ., մեղադրվում է ՀՀ քրեական օրենսգրքի 258-րդ հոդվածի 1-ին մասով և 316-րդ հոդվածի 1-ին մասով։



Գործի դատավարական նախապատմությունը
Թիվ 15121411 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2011թ. օգոստոսի 29-ին, ՀՀ քրեական օրենսգրքի 316-րդ հոդվածի 1-ին մասով, իշխանության ներկայացուցչի` ՀՀ ոստիկանության 1-ին գումարտակի 2-րդ վաշտի 1-ին դասակի ոստիկան, ոստիկանության ենթասպա Լեռնիկ Ալիկի Բաքոյանի նկատմամբ իր ծառայողական պարտականությունները կատարելու հետ կապված բռնություն գործադրելու դեպքի առթիվ։
Քննիչի 2011թ. հոկտեմբերի 12-ի որոշմամբ, Հաբեթ Հակոբի Իվանյանի նկատմամբ, ՀՀ քրեական օրենսգրքի 258-րդ հոդվածով նախատեսված հանցագործություն կատարելու համար քրեական հետապնդում չի իրականացվել` նրա արաքում հանցակազմի բացակայության պատճառաբանությամբ։ Նույն որոշմամբ, ոստիկան Աշոտ Շամիրի Չիլինգարյանի նկատմամբ, ՀՀ քրեական օրենսգրքի 117-րդ հոդվածով նախատեսված հանցագործություն կատարելու` ամբաստանյալ Ռ. Սեդրակյանին բերման ենթարկելու ժամանակ, նրա կողմից դիմադրության ցույց տալու հետևանքով, նրան մարմնական թեթև, առողջության կարճատև քայքայումով վնասվածք պատճառելու համար քրեական հետապնդում չի իրականացվել` վնաս պատճառած արարքը օրենքով իրավաչափ համարվելու պատճառաբանությամբ։
Ամբաստանյալ Ռուբեն Արթուրի Սեդրակյանին նախաքննության մարմնի կողմից մեղադրանքներ են առաջադրվել ՀՀ քրեական օրենսգրքի 258-րդ հոդվածի 1-ին մասով և 316-րդ հոդվածի 1-ին մասով հետևյալ արարքների համար. «որ նա` 2011թ. օգոստոսի 28-ին 23։00-ի սահմաններում, գտնվելով 1-ին աստիճանի ալկոհոլային հարբածության վիճակում, Երևանի «Լունապարկ» սրճարանի մոտ մոտ քսան րոպե տևողությամբ, դիտավորությամբ հասարակական կարգը կոպիտ կերպով խախտելով և բացահայտ անհարգալից վերաբերմունք դրսևորելով հասարակության` անցորդների նկատմամբ, բարձրաձայն տվել է սեռական բնույթի հայհոյանքներ, չենթարկվելով իր ծառայողական պարտականությունները կատարող իշխանության ներկայացուցիչ` ՀՀ ոստիկանության ՊՊԾ գնդի 1-ին գումարտակի 2-րդ վաշտի 1-ին դասակի ոստիկան, գործով տուժող Լեռնիկ Ալիկի Բաքոյանի օրինական պահանջներին, իր ծառայողական պարտականությունները կատարելու հետ կապված` հասարակական կարգի խախտումը դադարեցնելու համար վիճաբանել է նրա հետ, տվել սեռական բնույթի հայհոյանքներ և առողջության համար ոչ վտանգավոր բռնություն գործադրելով ձեռքով մեկ անգամ հարվածել է վերջինիս դեմքին` պատճառելով ֆիզիկական ցավ։»։
2011թ. հոկտեմբերի 14-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։ Մեղադրողը մեղադրական եզրակացությունում չի առարկել դատական քննության արագացված կարգ կիրառելու դեմ։

Արագացված դատական քննություն

Ամբաստանյալ Ռուբեն Արթուրի Սեդրակյանը միջնորդեց դատական քննությունն անցկացնել արագացված կարգով։ Նա հայտարարեց, որ միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, ինքն համաձայն է մեղադրանքի հետ։
Տուժողը ամբաստանյալի դեմ որևէ պահանջ չի ներկայացրել։
Դատարանը համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմաններն` որոշում է կայացրել արագացված կարգով դատական քննություն անցկացնելու մասին։
Դատարանը հիմք ընդունելով մեղադրանքի հիմքում դրված ապացույցները` գտնում է, որ ամբաստանյալ Ռուբեն Արթուրի Սեդրակյանը կատարել է ՀՀ քրեական օրենսգրքի 258-րդ հոդվածի 1-ին մասով և 316-րդ հոդվածի 1-ին մասով նախատեսված արարքներ։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Ռուբեն Արթուրի Սեդրակյանը նախկինում դատված չի եղել, նախաքննության ընթացքում իրեն լիովին մեղավոր է ճանաչել և տվել է ինքնախոստովանական ցուցմունքներ, տուժողը հաշտվել է և հայտնել է, որ բողոք չունի ամբաստանյալի դեմ, իրեն վերագրվող արարքը Ռ. Սեդրակյանը կատարել է ալկոհոլային հարբածության վիճակում։



Դատարանի իրավական վերլուծությունները

Առաջադրված մեղադրանքներն ամբաստանյալ Ռուբեն Արթուրի Սեդրակյանի կողմից ընդունելու և դատական քննության արագացված կարգ կիրառելու պայմաններում` դատարանը գտնում է, որ ամբաստանյալ Ռուբեն Արթուրի Սեդրակյանի կողմից, նրա մեղավորությամբ խուլիգանություն կատարելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 258-րդ հոդվածի 1-ին մասով նախատեսված հանցագործության հատկանիշներին։
Ապացուցված է նաև ամբաստանյալ Ռուբեն Արթուրի Սեդրակյանի կողմից, նրա մեղավորությամբ, իշխանության ներկայացուցչի նկատմամբ առողջության համար ոչ վտանգավոր բռություն գործադրելը` կապված նրա կողմից իր ծառայողական պարտականությունները կատարելու հետ, ամբաստանյալի այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 316-րդ հոդվածի 1-ին մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող ու ծանրացնող հանգամանքները` ամբաստանյալ Ռուբեն Արթուրի Սեդրակյանի նկատմամբ, նրա կատարած հանցագործություններից յուրաքանչյուրի համար պատիժ նշանակելիս դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա նախկինում դատված չի եղել, բնութագրվում է դրական, տալով ինքնախոստովանական ցուցմունքներ` անկեղծորեն զղջացել է կատարածի համար։
ՀՀ քրեական օրենսգրքի 258-րդ հոդվածի 1-ին մասով նախատեսված հանցանք կատարելու համար պատիժ նշանակելիս, ամբաստանյալի պատասխանատվությունը և պատիժը մեղմացնող հանգամանքներ դատարանը չի արձանագրում, իսկ որպես նրա պատասխանատվությունը և պատիժը ծանրացնող հանգամանք դատարանը հաշվի է առնում հանցանքն ալկոհոլի ազդեցության տակ կատարելը։
ՀՀ քրեական օրենսգրքի 316-րդ հոդվածի 1-ին մասով նախատեսված հանցագործության համար պատիժ նշանակելիս, որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում տուժողի հետ հաշտվելու և նրա կողմից ամբաստանյալի նկատմամբ բողոք չունենալու հանգամանքը, իսկ որպես նրա պատասխանատվությունը և պատիժը ծանրացնող հանգամանք դատարանը հաշվի է առնում հանցանքն ալկոհոլի ազդեցության տակ կատարելը։
Ամբաստանյալ Ռուբեն Արթուրի Սեդրակյանն իր կատարած` Հայաստանի Հանրապետության քրեական օրենսգրքի 316-րդ հոդվածի 1-ին մասով նախատեսված հանցագործության համար ենթակա է պատժի ազատազրկման ձևով, որը նա պետք է կրի, իսկ ՀՀ քրեական օրենսգրքի 258-րդ հոդվածի 1-ին մասով նախատեսված հանցագործության համար ենթակա է պատժի տուգանքի ձևով, որը նույնպես նա պետք է կրի։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցների հարցը` դատարանը գտնում է, որ իրեղեն ապացույց ճանաչված վերնաշապիկը ենթակա է վերադարձման տուժող Լեռնիկ Բաքոյանին։
Քննարկելով խափանման միջոցի հարցը` դատարանը գտնում է, որ ամբաստանյալ Ռուբեն Արթուրի Սեդրակյանի նկատմամբ որպես խափանման միջոց կալանավորումն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 357-360-րդ, 364-366-րդ, 369-373-րդ, 3751-3754-րդ հոդվածներով, դատարանը`

Վ Ճ Ռ Ե Ց

Ամբաստանյալ Ռուբեն Արթուրի Սեդրակյանին մեղավոր ճանաչել Հայաստանի Հանրապետության քրեական օրենսգրքի 258-րդ հոդվածի 1-ին մասով և 316-րդ հոդվածի 1-ին մասով նախատեսված հանցանքներում և դատապարտել. ՀՀ քրեական օրենսգրքի 258-րդ հոդվածի 1-ին մասով` տուգանքի, նվազագույն աշխատավարձի հիսնապատիկի` 50.000 /հիսուն հազար/ ՀՀ դրամ գումարի չափով, ՀՀ քրեական օրենսգրքի 316-րդ հոդվածի 1-ին մասով` ազատազրկման 1 /մեկ/ տարի ժամկետով։ ՀՀ քրեական օրենսգրքի 66-րդ հոդվածով սահմանված` պատիժների լրիվ գումարման սկզբունքի կիրառմամբ ամբաստանյալ Ռուբեն Արթուրի Սեդրակյանի նկատմամբ պատիժ նշանակել ազատազրկում 1 /մեկ/ տարի ժամկետով և տուգանք 50.000 /հիսուն հազար/ ՀՀ դրամ գումարի չափով։ Պատիժը պետք է կրի ՀՀ արդարադատության նախարարության համապատասխան քրեակատարողական հիմնարկում, ազատազրկման ձևով պատժի սկիզբը հաշվելով 2011թ. օգոստոսի 29-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Դատավճռի օրինական ուժի մեջ մտնելուց հետո, իրեղեն ապացույց ճանաչված, տուժող Լ. Բաքոյանի վերնաշապիկը վերադարձնել նրան։
Դատավճիռը` հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։ Դատավճիռը ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով չի կարող բողոքարկվել։


ԴԱՏԱՎՈՐ` Մ. ՄԱՐՏԻՐՈՍՅԱՆ