ԵԿԴ/0184/01/11







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«4» նոյեմբերի 2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Կ.Փիլոյան
տուժող Հ.Մինասյան
պաշտպան Ա.Քոչարյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Գվիդոն Ռաֆիկի Սարգսյանի` ծնված 1964 թվականի մարտի 26-ին Գեղարքունիքի մարզի Վարդենիկ գյուղում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, նախկինում չդատապարտված, աշխատել է ՀՀ ոստիկանության Երևան քաղաքի վարչության Կենտրոնականի բաժնի Մարաշի բաժանմունքի պրոֆիլակտիկայի խմբի ավագ տեսուչ, հաշվառված է Երևան քաղաքի Սարի Թաղի 27-րդ փողոցի 37-րդ տանը, մեղադրանք է առաջադրվել ՀՀ քրեական օրենսգրքի 311-րդ հոդվածի 1-ին մասով, խափանման միջոց է ընտրվել գրավը:
1. Գործի դատավարական նախապատմությունը.
2011 թվականի օգոստոսի 8-ին ՀՀ հատուկ քննչական ծառայության ՀԿԳ ավագ քննիչ Լ.Մելքոնյանի որոշմամբ ՀՀ քրեական օրենսգրքի 311-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 62206111 քրեական գործը:
2011 թվականի օգոստոսի 11-ին ՀՀ հատուկ քննչական ծառայության ՀԿԳ ավագ քննիչ Լ.Մելքոնյանի որոշմամբ թիվ 62206111 քրեական գործով Գվիդոն Ռաֆիկի Սարգսյանին մեղադրանք է առաջադրվել ՀՀ քրեական օրենսգրքի 311-րդ հոդվածի 1-ին մասով:
2011 թվականի սեպտեմբերի 19-ին ՀՀ հատուկ քննչական ծառայության ՀԿԳ ավագ քննիչ Լ.Մելքոնյանի որոշմամբ թիվ 62206111 քրեական գործով Հայկ Ֆրունզիկի Պողոսյանի և Հայկազ Գուրգենի Հակոբյանի վերաբերյալ մասը կարճվել է` նրանց արարքներում հանցակազմի բացակայության հիմքով, իսկ Հարություն Ղազարոսի Մինասյանի նկատմամբ քրեական հետապնդում չի իրականացվել և նրա վերաբերյալ մասը կարճվել է` քրեական օրենսգրքի դրույթների ուժով:
2011 թվականի սեպտեմբերի 28-ին Գվիդոն Ռաֆիկի Սարգսյանի վերաբերյալ թիվ 62206111 քրեական գործը մեղադրական եզրակացությամբ ուղարկվել է Դատարան, որին շնորհվել է ԵԿԴ/0184/01/11 համարը:
Գվիդոն Ռաֆիկի Սարգսյանին մեղադրանք է առաջադրվել ՀՀ քրեական օրենսգրքի 311-րդ հոդվածի 1-ին մասով` այն արարքի համար, որ նա, աշխատելով ՀՀ ոստիկանության Երևան քաղաքի վարչության Կենտրոնականի բաժնի Մարաշի բաժանմունքի պրոֆիլակտիկայի խմբում` որպես ավագ տեսուչ, հանդիսանալով պաշտոնատար անձ, կաշառք տվողի օգտին իր լիազորությունների շրջանակում գործողություններ չկատարելու համար անձամբ ստացել է կաշառք: Այսպես.
2011 թվականի հունիսի 24-ին Գվիդոն Սարգսյանը, այցելելով Երևան քաղաքի Նորքի 38 հասցեում գտնվող` Ամալյա Հակոբյանին պատկանող առանձնատուն, վերջինի ամուսին` Լիբանանի քաղաքացի Հարություն Մինասյանից պահանջել է ներկայացնել կառուցվող պատշգամբի շինարարական աշխատանքների իրականացման թույլտվության փաստաթղթերը: Տեղեկանալով, որ շինթույլտվության փաստաթղթերը բացակայում են` Գվիդոն Սարգսյանը վարչական իրավախախտման վերաբերյալ համապատասխան արձանագրություն չկազմելու դիմաց Հարություն Մինասյանից պահանջել և ստացել է 26.718 ՀՀ դրամին համարժեք 50 եվրո կաշառք:
2. Արագացված դատական քննություն.
Մինչ դատաքննությունն սկսելն ամբաստանյալ Գվիդոն Ռաֆիկի Սարգսյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Գվիդոն Ռաֆիկի Սարգսյանը կատարել է արարք` նախատեսված ՀՀ քրեական օրենսգրքի 311-րդ հոդվածի 1-ին մասով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, ՀՀ ոստիկանության ինֆորմացիոն կենտրոնի պահանջագիրը, թվով 16 մեդալներով և կրծքանշաններով պարգևատրվելու վկայականների, ՀՀ ՊՆ սոցիալական պաշտպանության վարչության թիվ 3321 վկայականի պատճենները և թիվ 2 բուժմիավորման կողմից տրված տեղեկանքը, եկավ հետևյալ եզրահանգման.
Գվիդոն Սարգսյանի անձը դրականորեն բնութագրող հանգամանքներ են ամուսնացած լինելը, բարձրագույն կրթություն ունենալը, թվով 16 մեդալներով և կրծքանշաններով պարգևատրված լինելը, ինքնախոստովանական ցուցմունքներ տալը և կատարածի համար զղջալը:
Դատարանը գտնում է, որ Գվիդոն Սարգսյանի պատասխանատվությունն ու պատիժը մեղմացնող հանգամանքներ պետք է դիտել նախկինում արատավորված` դատապարտված չլինելը, մարտական գործողություններին մասնակցելը և վատառողջ լինելը:
Դատարանը միաժամանակ արձանագրում է, որ Գվիդոն Սարգսյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Գվիդոն Սարգսյանը ենթակա է քրեական պատասխանատվության և պատժի:
Դատարանը, հաշվի առնելով Գվիդոն Սարգսյանի կատարած արարքի հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Գվիդոն Սարգսյանի կողմից կատարված արարքի համար ՀՀ քրեական օրենսգրքի 311-րդ հոդվածի 1-ին մասի սանկցիայով, որպես հիմնական պատիժ, նախատեսված է նաև տուգանք, իսկ որպես պարտադիր լրացուցիչ պատիժ` որոշակի պաշտոններ զբաղեցնելու և որոշակի գործունեությամբ զբաղվելու իրավունքից զրկել, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար նրա նկատմամբ հիմնական պատիժ պետք է նշանակել տուգանքի ձևով, իսկ լրացուցիչ պատիժ` պետական և տեղական ինքնակառավարման մարմիններում պաշտոններ զբաղեցնելու իրավունքից զրկելու ձևով:
ՀՀ քրեական օրենսգրքի 69-րդ հոդվածի 5-րդ մասի համաձայն` մինչև դատական քննությունը կալանքի տակ գտնվող անձի նկատմամբ տուգանքի, որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու ձևով պատիժ նշանակելիս դատարանը, հաշվի առնելով կալանքի տակ պահելու ժամկետը, մեղմացնում է նշանակված պատիժը կամ լրիվ ազատում պատիժը կրելուց, իսկ ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից: Դատարանը, նկատի ունենալով, որ սույն գործով ամբաստանյալ Գվիդոն Սարգսյանը 2011 թվականի օգոստոսի 10-ից մինչև օգոստոսի 11-ը գտնվել է կալանքի տակ, գտնում է, որ նրա նկատմամբ տուգանքի ձևով նշանակվող պատժի չափը պետք է մեղմացնել:
Դատարանը գտնում է, որ Գվիդոն Սարգսյանի նկատմամբ ընտրված խափանման միջոցը` գրավը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ դատավճռի օրինական ուժի մեջ մտնելուց հետո Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի հաշվեհամարին Գրիգոր Սարգսյանի կողմից որպես գրավ վճարված 500.000 (հինգ հարյուր հազար) ՀՀ դրամը պետք է վերադարձնել նրան:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերը դատարանի նախաձեռնությամբ ամբաստանյալ Գվիդոն Սարգսյանից ենթակա չեն բռնագանձման, քանի որ տուժողը, հնարավորություն ունենալով իր շահերը դատարանում ներկայացնել, ամբաստանյալին որևէ պահանջ չի ներկայացրել: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մաuի 2-8-րդ կետերով նախատեսված դատական ծախսերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի` ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը

ՎՃՌԵՑ

Գվիդոն Ռաֆիկի Սարգսյանին մեղավոր ճանաչել ՀՀ քրեական օրենսգրքի 311-րդ հոդվածի 1-ին մասով և պատիժ նշանակել տուգանք` նվազագույն աշխատավարձի չորսհարյուրապատիկի չափով` զրկելով պետական և տեղական ինքնակառավարման մարմիններում պաշտոններ զբաղեցնելու իրավունքից` 2 (երկու) տարի ժամկետով:
ՀՀ քրեական օրենսգրքի 69-րդ հոդվածի 5-րդ մասի կիրառմամբ Գվիդոն Ռաֆիկի Սարգսյանի նկատմամբ նշանակված պատիժը մեղմացնել և վերջնական պատիժ նշանակել տուգանք` նվազագույն աշխատավարձի երեքհարյուրիննսնապատիկի չափով` զրկելով պետական և տեղական ինքնակառավարման մարմիններում պաշտոններ զբաղեցնելու իրավունքից` 2 (երկու) տարի ժամկետով:
Գվիդոն Ռաֆիկի Սարգսյանի նկատմամբ ընտրված խափանման միջոցը` գրավը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի հաշվեհամարին Գրիգոր Սարգսյանի կողմից որպես գրավ վճարված 500.000 (հինգ հարյուր հազար) ՀՀ դրամը վերադարձնել Գրիգոր Սարգսյանին:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին մասի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ