Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

18 մայիսի 2012թ. ք. Երևան

ԵԿԴ-0179/01/11

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Տ. Գրիգորյան,

մասնակցությամբ`
մեղադրողներ,
Հայաստանի Հանրապետության /այսուհետ ՀՀ/
գլխավոր դատախազի տեղակալ Մ. Սարգսյանի,

ՀՀ գլխավոր դատախազության մարդու դեմ
ուղղված հանցագործությունների գործերով
վարչության պետի տեղակալ Ա. Դավթյանի,

պաշտպաններ Լ. Սիմոնյանի,
Վ. Գևորգյանի,

տուժող Ա. Հովակիմյանի,

տուժողի ներկայացուցիչ Ա. Մարտիրոսյանի,


դատարանում, դռնբաց դատական նիստում քննեց գործն ըստ մեղադրանքի
1. Էդգար Մովսեսի Շախիկյանի `
ծնված 1992թ. փետրվարի 15-ին Երևան քաղաքում, հայ, ՀՀ քաղաքացի, սովորել է Երևանի պետական համալսարանի իրավագիտության ֆակուլտետում, ամուրի, խնամքին ոչ ոք, նախկինում չդատված, բնութագրվում է դրական, հաշվառված է Երևանի Վ. Շենգավիթ 10-րդ փողոցի թիվ 2 շենքի թիվ 5 բնակարանում, փաստացի բնակվել է Երևանի Բագրատունյաց փողոցի թիվ 33/1 տանը, կալանքի տակ է 10.12.2010թ.-ից, մեղադրվում է ՀՀ քրեական օրենսգրքի 185-րդ հոդվածի 2-րդ մասի 2-րդ կետով և 258-րդ հոդվածի 4-րդ մասով,

2. Գեորգի Գուրգենի Թառոյանի`
ծնված 1989թ. հունվարի 14-ին Երևանում, հայ, ՀՀ քաղաքացի, սովորում է Երևանի պետական համալսարանի իրավագիտության ֆակուլտետի երրորդ կուրսում, ամուրի, խնամքին ոչ ոք, նախկինում չդատված, չի աշխատում, բնութագրվում է դրական, վատառողջ է, հաշվառված է Երևանի Աթոյան անցուղու թիվ 7 շենքի թիվ 25 բնակարանում, փաստացի բնակվում է Երևանի Վարդանանց փողոցի թիվ 28 շենքի թիվ 139 բնակարանում, ձերբակալվել է 10.12.2010թ., 13.12.2010թ. որպես խափանման միջոց կիրառվել է կալանավորումը և այն փոխարինվել է գրավով, 14.12.2010թ. ազատ է արձակվել` անազատության մեջ մնալով 4 /չորս/ օր, մեղադրվում է ՀՀ քրեական օրենսգրքի 258-րդ հոդվածի 3-րդ մասի 1-ին կետով։



Գործի դատավարական նախապատմությունը

Թիվ 15112010 քրեական գործը ՀՀ ոստիկանության քննչական գլխավոր վարչության /այսուհետ ՔԳՎ/ Երևան քաղաքի քննչական վարչության Կենտրոնականի քննչական բաժնում հարուցվել է 2010թ. դեկտեմբերի 09-ին, ՀՀ քրեական օրենսգրքի 258-րդ հոդվածի 4-րդ մասով և 235-րդ հոդվածի 1-ին մասով, անհայտ անձանց կողմից զենքի օգտագործմամբ խուլիգանություն կատարելու և ապօրինի կերպով հրազեն պահելու դեպքի առթիվ։
2010թ. դեկտեմբերի 09-ին քրեական գործն ուղարկվել է ՀՀ ոստիկանության ՔԳՎ հատկապես կարևոր գործերի /այսուհետ ՀԿԳ/ քննության վարչություն և նույն օրն ընդունվել է քննիչի վարույթ։
2011թ. օգոստոսի 05-ին որոշում է կայացվել թիվ 15112010 քրեական գործով մեղադրյալ Էդգար Մովսեսի Շախիկյանի նկատմամբ ՀՀ քրեական օրենսգրքի 235-րդ հոդվածի 1-ին մասով քրեական հետապնդումը դադարեցնելու մասին` համաներման ակտ ընդունվելու պատճառաբանությամբ։
Քննիչի 20.08.2011թ. որոշումներով, թիվ 15112010 քրեական գործով մեղադրյալներ Ալեքսանդր Գուրգենի Թառոյանի և Էռնեստ Գուրգենի Թառոյանի նկատմամբ ՀՀ քրեական օրենսգրքի 258-րդ հոդվածի 3-րդ մասի 1-ին կետով քրեական հետապնդումը դադարեցվել է` համաներման ակտ ընդունվելու պատճառաբանությամբ։
Քննիչի 20.08.2011թ. որոշմամբ, թիվ 15112010 քրեական գործից անջատվել է Էդգար Շախիկյանի կողմից ՀՀ քրեական օրենսգրքի 34-104-րդ հոդվածի 2-րդ մասի 1-ին կետով, 185-րդ հոդվածի 2-րդ մասի 2-րդ կետով և 258-րդ հոդվածի 4-րդ մասով, Գուժ Աղաբեկյանի կողմից ՀՀ քրեական օրենսգրքի օրենսգրքի 258-րդ հոդվածի 4-րդ մասով, Վահագն Գրիգորյանի և Գեորգի Թառոյանի կողմից ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված արարքներ կատարելու վերաբերյալ մասը, այն առանձնացվել է առանձին վարույթում, ընդունվել է վարույթ և շնորհվել է թիվ 1512010/1 Ա/Մ համարը։
19.09.2011թ. քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։
Քրեական գործի դատական քննության ընթացքում, 2012թ. մայիսի 08-ի դատական նիստում, մեղադրողների կողմից ներկայացվել են որոշումներ` ամբաստանյալներ Էդգար Շախիկյանին, Գուժ Աղաբեկյանին և Վահագն Գրիգորյանին առաջադրված մեղադրանքները փոփոխելու վերաբերյալ, որոնց համաձայն, Գուժ Աղաբեկյանին առաջադրված մեղադրանքը ՀՀ քրեական օրենսգրքի 258-րդ հոդվածի 4-րդ մասից փոխվել է ՀՀ քրեական օրենսգրքի 117-րդ հոդվածի, Վահագն Գրիգորյանին առաջադրված մեղադրանքը ՀՀ քրեական օրենսգրքի 258-րդ հոդվածի 3-րդ մասի 1-ին կետից փոխվել է ՀՀ քրեական օրենսգրքի 118-րդ հոդվածի։ Ամբաստանյալ Էդգար Շախիկյանին առաջադրված մեղադրանքը փոփոխելու և նոր մեղադրանք առաջադրելու մասին ներկայացվել է որոշում հետևյալ բովանդակությամբ`

«Ո Ր Ո Շ ՈՒ Մ

Մեղադրանքը փոփոխելու և նոր մեղադրանք առաջադրելու մասին


08.05.2012թ. ք. Երևան


ՀՀ գլխավոր դատախազի տեղակալ Մ. Սարգսյանս, ՀՀ գլխավոր դատախազության մարդու դեմ ուղղված հանցագործությունների գործերով վարչության պետի տեղակալ Ա. Դավթյանս, ուսումնասիրելով Էդգար Մովսեսի Շախիկյանի, Գուժ Գևորգի Աղաբեկյանի, Վահագն Մուշեղի Գրիգորյանի և Գեորգի Գուրգենի Թառոյանի վերաբերյալ թիվ 15112010/1 Ա/Մ քրեական գործի նյութերը,

ՊԱՐԶԵՑԻՆՔ


Թիվ 15112010 քրեական գործը հարուցվել է 2010 թվականի դեկտեմբերի 9-ին ՀՀ ոստիկանության ՔԳՎ Կենտրոնականի քննչական բաժնում` ՀՀ քրեական օրենսգրքի 258-րդ հոդվածի 4-րդ մասի և 235-րդ հոդվածի 1-ին մասի հատկանիշներով։ Նույն օրվանից էլ քրեական գործի նախաքննությունը շարունակվել է ՀՀ ոստիկանության ՔԳՎ ՀԿԳ քննության վարչությունում։
2011 թվականի օգոստոսի 20-ին որոշում է կայացվել մեղադրյալներ Էդգար Մովսեսի Շախիկյանի, Գուժ Գևորգի Աղաբեկյանի, Վահագն Մուշեղի Գրիգորյանի և Գեորգի Գուրեգնի Թառոյանի վերաբերյալ մասը թիվ 15112010 քրեական գործից անջատելու և այն առանձին վարույթում` թիվ 15112010/1 Ա/Մ համարով առանձնացնելու մասին, իսկ 19.09.11թ. նշված անձանց վերաբերյալ քրեական գործը հաստատված մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան։
Քրեական գործով Էդգար Մովսեսի Շախիկյանին մեղադրանք է առաջադրվել ՀՀ քրեական օրենսգրքի 34-104-րդ հոդվածի 2-րդ մասի 1-ին կետով, 185-րդ հոդվածի 2-րդ մասի 2-րդ կետով և 258-րդ հոդվածի 4-րդ մասով այն բանի համար, որ նա, ժամեր առաջ Վահագն Գրիգորյանի, Գուժ Աղաբեկյանի և գործով դեռևս չպարզված այլ անձանց կողմից Էռնեստ Թառոյանին ծեծի ենթարկելու հանգամանքները պարզաբանելու նպատակով, 2010 թվականի դեկտեմբերի 8-ին` ժամը 19.30-ի սահմաններում, Երևանի Չարենցի փողոցում գտնվող Երևանի պետական համալսարանի կենսաբանական ֆակուլտետի մասնաշենքի դիմացի հատվածում` ճանապարհի մոտ, իր ընկեր Գեորգի Թառոյանի, նրա եղբայրներ Ալեքսանդր և Էռնեստ Թառոյանների և գործով դեռևս չպարզված այլ անձանց հետ միասին հանդիպելով Վահագն Գրիգորյանին և Գուժ Աղաբեկյանին, վիճաբանել են վերջիններիս և գործով դեռևս չպարզված այլ անձանց հետ, որի ընթացքում շուրջ 7-10 րոպե հայհոյել և բռնություն են գործադրել միմյանց նկատմամբ` դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք արտահայտելով հասարակության` հարակից շենքերի բնակիչների և ճանապարհով անցնող և երթևեկող մարդկանց նկատմամբ։ Նշված խուլիգանության ընթացքում Էդգար Շախիկյանը Վահագն Գրիգորյանին և Գուժ Աղաբեկյանին սպանելու դիտավորությամբ, իր մոտ ապօրինի կերպով կրած հրազեն հանդիսացող «Մակարով» տեսակի ատրճանակով կրակոցներ է արձակել նրանց ուղղությամբ, սակայն հանցագործությունն ավարտին չի հասցրել իր կամքից անկախ հանգամանքներով` Գուժ Աղաբեկյանը ստացել է ձախ նախաբազկի շրջանի հրազենային գնդակային, միջանցիկ վիրավորման ձևով/ծղիկային զարկերակի վնասումով/, իսկ Վահագն Գրիգորյանը` աջ ազդրի շրջանի հրազենային գնդակային, միջանցիկ վիրավորման ձևով առողջությանը միջին ծանրության վնաս պատճառած մարմնական վնասվածքներ։
Էդգար Շախիկյանն իր արձակած կրակոցներով դիտավորությամբ վնասել է նաև դեպքի վայրում կայանված` Արմինե Հովակիմյանին պատկանող «Պորշե-Կայեն-Տուրբո» մակնիշի 05 ՕԼ 500 պետհամարանիշի ավտոմեքենայի առջևի և հետևի աջ կողային դռները, դրանց շարժական ապակիները, ավտոմեքենայի հետևի աջ նստարանի թիկնակը և նստատեղի աջակողմյան տեղամասերը, ամրագոտին և հետևի աջ կողային դռան ներսային պաստառը` Ա.Հովակիմյանին պատճառելով խոշոր չափերի` 2.967.000 ՀՀ դրամի նյութական վնաս։
Գուժ Աղաբեկյանի և Վահագն Գրիգորյանի նկատմամբ սպանության փորձ կատարելու վերաբերյալ իրեն առաջադրված մեղադրանքի առնչությամբ Էդգար Շախիկյանը դատարանում ցուցմունքներ է տվել այն մասին, որ դեպքի պահին ինքը վերցրել է գետնին ընկած ատրճանակը, ոտքի է կանգնել, պահել է կենսաբանական ֆակուլտետի մասնաշենքի կողմից դեպի իրեն եկող տղայի, որի դեմքը չի տեսել, ոտքերի տակ` ասֆալտի ուղղությամբ և մեկ կրակոց է արձակել, որից հետո անմիջապես զենքն ուղղել է իր աջ կողմում, մոտ 1.5-2 մետր հեռավորության վրա կայանված «Պորշե» մակնիշի ավտոմեքենան և կրակել է դրա աջ կողմի դռների ուղղությամբ։ Նշել է, որ ինքը որևէ մեկին սպանելու դիտավություն չի ունեցել, հակառակ դեպքում ատրճանակից կկրակեր այդ անձանց կենսական կարևոր օրգանների ուղղությամբ և իր մտադրությունը կհասցներ ավարտին, որում իրեն ոչինչ չէր խոչընդոտում։
Նշված դրվագի կապակցությամբ Գուժ Աղաբեկյանը դատարանում, ի տարբերություն նախաքննության սկզբնական փուլում տված ցուցմունքների, հայտնել է, որ իրականում ինքը դաստակի հատվածում սուր ցավ է զգացել ոչ թե մեքենայի մեջ մտնելուց հետո, այլ մինչ մեքենան մտնելը, իսկ մեքենան նստելու պահին կրակոցները դադարած են եղել։
Վահագն Գրիգորյանը նույն դրվագի առնչությամբ ցուցմունք է տվել, որ երբ վիճաբանության ընթացքում ինքը ընկել է գետնին, այդ տղաները շարունակել են ընկած դիրքում ձեռքերով, ոտքերով և փայտով խառը հարվածներ հասցնել իրեն։ Այդ ընթացքում վնասվածքներ է ստացել աչքի և ձեռքի շրջաններում։ Այնուհետև մի քանի կրակոցների ձայներ է լսել և իրեն հարվածող տղաները դադարել են հարվածելը։ Այդ ժամանակ տեսել է, որ Գուժ Աղաբեկյանն է իր մոտ գտնվող ատրճանակով օդ կրակում։ Այնուհետև ավելի ուժեղ կրակոցների ձայներ է լսել և այդ ժամանակ էլ ոտքի շրջանում վնասվածք է ստացել, սակայն չի տեսել, թե ով է եղել կրակողը։
Հիշատակված, ինչպես նաև դեպքին մասնակից Գեորգի, Էռնեստ, Ալեքսանդր Թառոյանների ցուցմունքները, դատաքննությամբ հետազոտված Գուժ Աղաբեկյանի և Վահագն Գրիգորյանի դատաբժշկական փորձաքննության թիվ 1840հ և 1834հ եզրակացությունները, Դատաձգաբանական, դատահետքաբանական և դատաքիմիական համալիր փորձաքննության թիվ 135 եզրակացությունը, «Պորշե-Կայեն-Տուրբո» մակնիշի 05 ՕԼ 500 պետհամարանիշի ավտոմեքենայի զննման արձանագրությունը, Դատաձգաբանական, դատաքիմիական և դատաապրանքագիտական համալիր փորձաքննության թիվ 2889 եզրակացությունը գնահատելով իրենց համակցության մեջ, առաջադրված մեղադրանքն ապացուցված լինելու վերաբերյալ կասկածները, որոնք չեն փարատվել պատշաճ իրավական ընթացակարգի շրջանակներում, մեկնաբանելով հօգուտ մեղադրյալի, գտնում ենք, որ չի հիմնավորվել ինչպես այն փաստական հանգամանքը, որ Էդգար Շախիկյանը ցանկացել է Գուժ Աղաբեկյանին ու Վահագն Գրիգորյանին մահ պատճառել, այնպես էլ այն, որ դրան անմիջականորեն ուղղված գործողություններ է կատարել։ Միաժամանակ, փաստական տվյալներ ձեռք չեն բերվել այն մասին, որ ցանկության դեպքում, իր կամքից անկախ որևէ խոչըդոտ է եղել Շախիկյանի համար` սպանությանն ուղղված դիտավորությունը մինչև վերջ հասցնելու հարցում։
Սակայն քրեական գործով ձեռք բերված ապացույցներով հիմնավորվել է, որ ամբաստանյալ Էդգար Շախիկյանը Վահագն Գրիգորյանի, Գուժ Աղաբեկյանի և գործով դեռևս չպարզված այլ անձանց կողմից Էռնեստ Թառոյանին ծեծի ենթարկելու հանգամանքները պարզաբանելու նպատակով, 2010 թվականի դեկտեմբերի 8-ին` ժամը 19.30-ի սահմաններում, Երևանի Չարենցի փողոցում գտնվող Երևանի պետական համալսարանի կենսաբանական ֆակուլտետի մասնաշենքի դիմացի հատվածում` ճանապարհի մոտ, իր ընկեր Գեորգի Թառոյանի, նրա եղբայրներ Ալեքսանդր և Էռնեստ Թառոյանների և գործով դեռևս չպարզված այլ անձանց հետ միասին հանդիպելով Վահագն Գրիգորյանին և Գուժ Աղաբեկյանին, նախահարձակ լինելով վիճաբանել, ծեծի են ենթարկել Վահագն Գրիգորյանին, որի ընթացքում շուրջ 7-10 րոպե հայհոյել և բռնություն են գործադրել` դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք արտահայտելով հասարակության` հարակից շենքերի բնակիչների և ճանապարհով անցնող և երթևեկող մարդկանց նկատմամբ։ Նշված խուլիգանության ընթացքում Էդգար Շախիկյանը իր մոտ ապօրինի կերպով կրած հրազեն հանդիսացող «Մակարով» տեսակի ատրճանակով կրակոցներ է արձակել Վահագն Գրիգորյանի և Գուժ Աղաբեկյանի ուղղությամբ, որի հետևանքով Գուժ Աղաբեկյանը ստացել է ձախ նախաբազկի շրջանի հրազենային գնդակային, միջանցիկ վիրավորման ձևով/ծղիկային զարկերակի վնասումով/, իսկ Վահագն Գրիգորյանը` աջ ազդրի շրջանի հրազենային գնդակային, միջանցիկ վիրավորման ձևով առողջությանը միջին ծանրության վնաս պատճառած մարմնական վնասվածքներ։
Էդգար Շախիկյանն իր արձակած կրակոցներով դիտավորությամբ վնասել է նաև դեպքի վայրում կայանված` Արմինե Հովակիմյանին պատկանող «Պորշե-Կայեն-Տուրբո» մակնիշի 05 ՕԼ 500 պետհամարանիշի ավտոմեքենայի առջևի և հետևի աջ կողային դռները, դրանց շարժական ապակիները, ավտոմեքենայի հետևի աջ նստարանի թիկնակը և նստատեղի աջակողմյան տեղամասերը, ամրագոտին և հետևի աջ կողային դռան ներսային պաստառը` Ա.Հովակիմյանին պատճառելով խոշոր չափերի` 2.967.000 ՀՀ դրամի նյութական վնաս։
Այսինքն` Էդգար Մովսեսի Շախիկյանը կատարել է հանցանքներ, որոնք նախատեսված են ՀՀ քրեական օրենսգրքի 185-րդ հոդվածի 2-րդ մասի 2-րդ կետով և 258-րդ հոդվածի 4-րդ մասով։
Նշված մեղադրանքը հիմնավորվել է քրեական գործով ձեռք բերված, դատաքննությամբ հետազոտված ներքոհիշյալ ապացույցներով` ամբաստանյալներ Էդգար Շախիկյանի, Գուժ Աղաբեկյանի, Վահագն Գրիգորյանի, Գեորգի Թառոյանի, տուժող Արմինե Հովակիմյանի, վկաներ Էռնեստ, Ալեքսանդր Թառոյանների, Աշոտ Մանուկյանի, Նելսոն Ղահրամանյանի, Խաչիկ Սարգսյանի, Անուշավան Կարապետյանի ցուցմունքներով, դեպքի վայրի զննության արձանագրություններով, «Պորշե-Կայեն-Տուրբո» մակնիշի 05 ՕԼ 500 պետհամարանիշի ավտոմեքենայի զննման արձանագրությամբ, Մովսես Շախիկյանի կողմից ատրճանակ ներկայացնելու և զննելու արձանագրությամբ, Գուժ Աղաբեկյանի և Վահագն Գրիգորյանի հագուստներն առգրավելու և զննելու արձանագրությամբ, Դատաձգաբանական փորձաքննության թիվ 2887, Դատաձգաբանական և դատաքիմիական համալիր փորձաքննության թիվ 2903, Դատաձգաբանական, դատաքիմիական և դատաապրանքագիտական համալիր փորձաքննության թիվ 2889, Դատակեսաբանական փորձաքննության թիվ 600, Դատակենսաբանական փորձաքննությանն թիվ 31, Դատաբժշկական փորձաքննության թիվ 1840հ և թիվ 1834հ, Դատաձգաբանական, դատահետքաբանական և դատաքիմիական համալիր փորձաքննության թիվ 135 եզրակացություններով, որպես իրեղեն ապացույց ճանաչված`
«Պորշե-Կայեն-Տուրբո» մակնիշի 05 ՕԼ 500 պետհամարանիշի ավտոմեքենայով,
դեպքի վայրից հայտնաբերված յոթ կրակված պարկուճներով, մեկ գնդակով,10 մետաղական գնդաձև կոտորակներով,
«Պորշե-Կայեն-Տուրբո» մակնիշի 05 ՕԼ 500 պետհամարանիշի ավտոմեքենայի սրահի հետևի նստատեղի պաստառի մեջից հայտնաբերված երեք գնդակներով,
«ՊՄ» տեսակի առանց համարի ատրճանակով,
Գուժ Աղաբեկյանի կաշվե բաճկոնով և երկարաթև սվիտերով,
Վահագն Գրիգորյանի անդրավարտիքով։

Վերոգրյալների հիման վրա և ղեկավարվելով ՀՀ քրեական դատավարության օրենսգրքի 309.1 հոդվածով,


Ո Ր Ո Շ Ե Ց Ի Ն Ք


Թիվ 15112010/1 Ա/Մ քրեական գործով ամբաստանյալ Էդգար Շախիկյանին առաջադրված մեղադրանքը փոփոխել և նրան նոր մեղադրանք առաջադրել ՀՀ քրեական օրենսգրքի 185-րդ հոդվածի 2-րդ մասի 2-րդ կետով և 258-րդ հոդվածի 4-րդ մասով։
Որոշման օրինակը հանձնել Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանին։



Մեղադրողներ`


ՀՀ գլխավոր դատախազի տեղակալ,
Արդարադատության երկրորդ դասի
պետական խորհրդական Մ. Սարգսյան



ՀՀ գլխավոր դատախազության
Մարդու դեմ ուղղված հանցագործությունների
գործերով վարչության պետի տեղակալ,
արդարադատության երրորդ դասի խորհրդական Ա. Դավթյան»։

Դատարանի 2012թ. մայիսի 10-ի որոշումներով ամբաստանյալ Գուժ Աղաբեկյանի նկատմամբ ՀՀ քրեական օրենսգրքի 117-րդ հոդվածով և ամբաստանյալ Վահագն Գրիգորյանի նկատմամբ ՀՀ քրեական օրենսգրքի 118-րդ հոդվածով քրեական հետապնդումը դադարեցվել է` ամբաստանյալների հետ տուժող Է. Թառոյանի հաշտվելու պատճառաբանությամբ։
Ամբաստանյալ Գեորգի Գուրգենի Թառոյանին առաջադրված մեղադրանքը թողնվել է անփոփոխ։
Նախաքննության մարմինը Գեորգի Գուրգենի Թառոյանին մեղադրանք է առաջադրել ՀՀ քրեական օրենսգրքի 258-րդ հոդվածի 3-րդ մասի 1-ին կետով հետևյալ արարքի համար. «որ նա 2010 թվականի դեկտեմբերի 8-ին` ժամը 19.30-ի սահմաններում, Երևանի Չարենցի փողոցում գտնվող Երևանի պետական համալսարանի մասնաշենքի դիմացի հատվածում` ճանապարհի մոտ, իր եղբայրներ Ալեքսանդր և Էռնեստ Թառոյանների, իր ընկեր Էդգար Շախիկյանի և այլ` գործով դեռևս չպարզված անձանց հետ միասին, ժամեր առաջ Էռնեստ Թառոյանին Վահագն Գրիգորյանի և Գուժ Աղաբեկյանի կողմից ծեծի ենթարկելու պատճառով, վիճաբանել են վերջիններիս և գործով դեռևս չպարզված այլ անձանց հետ, որի ընթացքում շուրջ 7-10 րոպե հայհոյել և բռնություն են գործադրել միմյանց նկատմամբ` դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք արտահայտելով հասարակության` հարակից շենքերի և ճանապարհով անցնող և երթևեկող մարդկանց նկատմամբ։»։




Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Երևանի պետական համալսարանի իրավագիտության ֆակուլտետի 4-րդ կուրսի ուսանողներ Գուժ Գևորգի Աղաբեկյանը և Վահագն Մուշեղի Գրիգորյանը, գործով դեռևս չպարզված այլ անձանց հետ միասին, 2010 թվականի դեկտեմբերի 8-ին, ժամը 16.00-ի սահմաններում, Երևանի Սայաթ-Նովա 4-րդ, 6-րդ, Աբովյան 5-րդ և 13-րդ շենքերի բակում, Վահագն Գրիգորյանի համակրած աղջիկ Անի Ստեփանյանին ծաղիկ նվիրելու պատճառով վիճաբանել են Էռնեստ Թառոյանի հետ, որի ընթացքում Գուժ Աղաբեկյանն ու Վահագն Գրիգորյանը ծեծի են ենթարկել նրան։ Վ. Գրիգորյանը ոտքերով ու ձեռքերով, իսկ Գուժ Աղաբեկյանը` նաև իր մոտ գտնվող մետաղական առարկայով, հարվածներ են հասցրել Է. Թառոյանին` նրան պատճառելով գլխի աջ կողմնային շրջանի սալջարդ վերքի ձևով առողջության թեթև վնաս։
Նույն օրը, ժամը 19.30-ի սահմաններում, Երևանի Չարենց փողոցում` Երևանի պետական համալսարանի կենսաբանական ֆակուլտետի մասնաշենքի դիմացի հատվածում, ճանապարհի մոտ, ժամեր առաջ Է. Թառոյանին ծեծի ենթարկելու հանգամանքները պարզաբանելու նպատակով, Էռնեստ Թառոյանը, նրա եղբայրներ Ալեքսանդր և Գեորգի Թառոյանները, վերջինիս ընկեր Էդգար Շախիկյանը և գործով չպարզված այլ անձինք, նախահարձակ լինելով` վիճաբանել են Վահագն Գրիգորյանի հետ, որի ընթացքում, շուրջ տաս րոպե հայհոյանքներ տալով և Վ. Գրիգորյանի նկատմամբ բռնություն գործադրելով` դիտավորությամբ կոպիտ կերպով խախտել են հասարակական կարգը` բացահայտ անհարգալից վերաբերմունք արտահայտելով հասարակության` հարակից շենքերի, ճանապարհով անցնող և երթևեկող մարդկանց նկատմամբ։ Այդ հարձակումը և Վահագն Գրիգորյանի նկատմամբ գործադրվող բռնությունը դադարեցնելու նպատակով, Գուժ Աղաբեկյանը «Վալտեր ՍՊ99 քոմպակտ» տեսակի օդաճնշիչ ատրճանակից կրակոցներ է արձակել և Գեորգի Թառոյանին պատճառել է ձախից ճակատային շրջանի վերքի ձևով, առողջությանը թեթև վնասի հատկանիշներ չպարունակող մարմնական վնասվածք։
Այդ գործողությունների ընթացքում ամբաստանյալ Էդգար Շախիկյանը իր մոտ ապօրինի կերպով կրած, հրազեն հանդիսացող «Մակարով» տեսակի ատրճանակով կրակոցներ է արձակել Վահագն Գրիգորյանի և Գուժ Աղաբեկյանի ուղղությամբ, որի հետևանքով Գուժ Աղաբեկյանը ստացել է ձախ նախաբազկի շրջանի հրազենային գնդակային, միջանցիկ վիրավորման ձևով /ծղիկային զարկերակի վնասումով/, իսկ Վահագն Գրիգորյանը` աջ ազդրի շրջանի հրազենային գնդակային, միջանցիկ վիրավորման ձևով, առողջությանը միջին ծանրության վնաս պատճառած մարմնական վնասվածքներ։
Ամբաստանյալ Էդգար Շախիկյանն իր արձակած կրակոցներով դիտավորությամբ վնասել է նաև դեպքի վայրում կայանված` Արմինե Հովակիմյանին պատկանող, «Պորշե-Կայեն-Տուրբո» մակնիշի 05 ՕԼ 500 պետհամարանիշի ավտոմեքենայի առջևի և հետևի աջ կողային դռները, դրանց շարժական ապակիները, ավտոմեքենայի հետևի աջ նստարանի թիկնակը և նստատեղի աջակողմյան տեղամասերը, ամրագոտին և հետևի աջ կողային դռան ներսային պաստառը` Ա.Հովակիմյանին պատճառելով խոշոր չափերի` 2.967.000 ՀՀ դրամի նյութական վնաս։
Ամբաստանյալների անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է նաև, որ ամբաստանյալ Է. Շախիկյանը նախկինում դատված չի եղել, բնութագրվում է դրական, դպրոցում ցուցաբերած գերազանց առաջադիմության համար պարգևատրվել է Գարեգին Նժդեհի անվան հուշամեդալով, սովորել է ԵՊՀ իրավագիտության ֆակուլտետում, ինքնակամ ներկայացել է նախաքննության մարմնին, ներկայացրել է հրազեն հանդիսացող ատրճանակը, իրեն լիովին մեղավոր է ճանաչել և զղջացել է կատարածի համար։
Ամբաստանյալ Գեորգի Թառոյանը նախկինում դատված չի եղել, սովորում է Երևանի պետական համալսարանի իրավագիտության ֆակուլտետի երրորդ կուրսում, բնութագրվում է դրական, վատառողջ է` տառապում է «Հեպատիտ Ց վիրուս, խրոնիկ հեպատիտ» հիվանդությամբ։



Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Էդգար Մովսեսի Շախիկյանի ցուցմունքներով այն մասին, որ 2011 թվականի դեկտեմբերի 8-ին, ժամը 16։00-ից 17։00-ի սահմաններում, իր ընկեր Գեորգի Թառոյանին, որին «Ժոկո» են կոչում, պատահական տեսել է Երևանի Ալեք Մանուկյան փողոցում, որտեղ շուրջ երկու րոպե զրուցել են և բաժանվել։ Նույն օրը երեկոյան, իր «Տոյոտա Քեմրի» մակնիշի, 97 ՏՏ 555 պետհամարանիշի, սև գույնի ավտոմեքենայով Երևան քաղաքի Չարենց փողոցով պատահական անցնելիս, Երևանի պետական համալսարանի կենսաբանական ֆակուլտետի մասնաշենքից քիչ ներքև, նույն մայթի մոտ կայանված տեսել է Գեորգի Թառոյանի «Ֆոլկսվագեն Տուարեգ» մակնիշի մոխրագույն ավտոմեքենան, իսկ դրա մոտ` երեքից հինգ տղաների։ Նրանցից երեքից չորս մետր հեռու, դեպի կենսաբանական ֆակուլտետի մասնաշենքի ուղղությամբ տեսել է ևս չորսից հինգ տղաների։ Ավտոմեքենայի մոտ կանգնած տղաների մեջ տեսել է նաև Գեորգի Թառոյանին։ Իր ավտոմեքենան կայանել է վերջինիս ավտոմեքենայի հետևի մասում և իջնելով ավտոմեքենայից` մոտեցել է նրան։ Գ. Թառոյանի հետ խոսակցության ժամանակ վերջինս ասել է, որ եղբորը` Էրիկին ծեծել են։ Այնուհետև Գեորգի Թառոյանը քայլել է դեպի կենսաբանական ֆակուլտետի մասնաշենքի մուտքի մոտ կանգնած երեքից չորս տղաների ուղղությամբ։ Նրա հետևից գնացել են նաև վերը նշված մյուս տղաները։ Ինքը նույնպես գնացել է նրանց հետևից։ Երբ Գեորգին և նրա հետևից գնացող տղաները մոտեցել են կենսաբանական ֆակուլտետի մասնաշենքի մուտքի մոտ կանգնած տղաներին` նրանց միջև խառնաշփոթ, իրարանցում է սկսվել և իրեն թվացել է, թե վիճաբանություն է։ Ինքը նույնպես ցանկացել է մոտենալ նրանց, սակայն դեռևս նրանց մոտ չհասած` կրակոցների ձայներ է լսել, որոնք հնչել են կենսաբանական ֆակուլտետի մասնաշենքի դիմացի մասում` մայթեզրի մոտ կայանված, սև գույնի «Պորշե» ավտոմեքենայի հետևի կողմից, սակայն հաստատ չգիտի, թե կրակոցները դրա միջից են եղել, թե դրսից։ Այդ պահին տեսել է, որ Գեորգին ձեռքերով բռնել է գլուխը, ասել է «վախ» և ընկել է գետնին։ Իրարանցումն ավելի է ուժեղացել, որից հետո մի տղա վազելով եկել է իր ուղղությամբ, պատահական դիպչել է իրեն և երկուսով վայր են ընկել։ Այդ ժամանակ էլ սև գույնի ատրճանակ է տեսել գետնին ընկած, որն իր կարծիքով այդ տղայի մոտից է ընկել։ Քանի որ կրակոցները դեռևս շարունակվել են` ինքը վերցրել է գետնին ընկած ատրճանակը, ոտքի է կանգնել, պահել է կենսաբանական ֆակուլտետի մասնաշենքի կողմից դեպի իրեն եկող տղայի ոտքերի տակ, որի դեմքը չի տեսել, ասֆալտի ուղղությամբ մեկ կրակոց է արձակել, որպեսզի այդ տղան չմոտենա և հանկարծ իրեն չվնասի, սակայն չի տեսել, թե նա կրակոցից հետո ինչ է արել, քանի որ անմիջապես զենքն ուղղել է դեպի իր աջ կողմում, շուրջ 1.5-ից 2 մետր հեռավորության վրա կայանված, վերը նշված «Պորշե» մակնիշի ավտոմեքենան և կրակել է դրա աջ կողմի դռների ուղղությամբ։ Կարծել է, որ դրա մեջ մարդ չկա, ուստի կրակել է դրա ուղղությամբ։ Կրակել է այնքան ժամանակ` մինչև ատրճանակի փամփուշտները վերջացել են։ Չի տեսել, որ իր կողմից կրակոցներ արձակելու ժամանակ որևէ մեկը նստի այդ ավտոմեքենայի մեջ, սակայն դրա կողքին` հետևի դռան ուղղությամբ կանգնած մարդ է եղել, որի դեմքը նույնպես չի տեսել։ Դեպքից հետո տեղեկացել է, որ դրա ժամանակ իր համակուրսեցի Գուժ Աղաբեկյանը` ձեռքի, իսկ իր համակուրսեցի Վահագն Գրիգորյանը` ոտքի շրջանում հրազենային վնասվածքներ են ստացել։ Կարծում է, որ դեպի իրեն եկող տղան, որի ոտքերի տակ ինքը կրակել է, Վահագն Գրիգորյանն է եղել և հենց այդ ժամանակ էլ վնասվածք է ստացել, իսկ «Պորշե» ավտոմեքենայի հետևի դռան մոտ կանգնած տղան Գուժ Աղաբեկյանն է եղել, որը նույնպես իր արձակած կրակոցների հետևանքով է վնասվել։ Չի բացառում, որ իր արձակած կրակոցների ժամանակ կամ դրանից հետո Գուժ Աղաբեկյանը բացել է այդ ավտոմեքենայի հետևի դուռը և մտել է ավտոմեքենայի մեջ, սակայն ինքը դա չի տեսել։ Իր կրակոցներից հետո բոլորը հեռացել են։ Դրանից հետո մոտեցել է Գեորգիին, ով գլուխը բռնած կռացած է եղել, իսկ ճակատն արյունոտ է եղել։ Նա նստել է իր ավտոմեքենան և հեռացել է։ Ինքը նույնպես հեռացել է` իր հետ տանելով ատրճանակը, որը պահել է իրենց` Երևանի Բագրատունյաց փողոցի թիվ 33/1 տան դիմաց։ Ատրճանակի գտնվելու վայրի մասին հաջորդ օրը ոստիկանության բաժին ներկայանալիս հայտնել է իր հայր Մովսես Շախիկյանին և խնդրել է այն հանձնել ոստիկաններին։
Ինքը սպանության փորձ չի կատարել, դիտմամբ է կրակել մեքենայի ուղղությամբ` համոզված լինելով, որ այնտեղ մարդ չկա, իսկ մոտեցող տղայի վրա կարող էր նաև ավելի մոտիկից կրակել` եթե նրան սպանելու նպատակ ունենար։ Գուժ Աղաբեկյանին դեպքի վայրում չի տեսել։ Եթե տեսներ` անպայման կճանաչեր, քանի որ համակուրսեցիներ են։ ՀՀ քրեական օրենսգրքի 258-րդ հոդվածի 4-րդ մասով և 185-րդ հոդվածի 2-րդ մասի 2-րդ կետով առաջադրված մեղադրանքում իրեն լիովին մեղավոր է ճանաչում և զղջում է կատարածի համար։
/դատական նիստի արձանագրություն, հատոր 1, գ.թ. 115-119, հատոր 3, գ.թ. 47, 170-181, հատոր 4, գ.թ. 14-15, 135-145, հատոր 5, գ.թ. 23-26/
Ամբաստանյալ Գեորգի Գուրգենի Թառոյանի ցուցմունքներով այն մասին, որ 2010 թվականի դեկտեմբերի 8-ին, ժամը 17-ի սահմաններում, իր 093-44-41-44 հեռախոսահամարից հեռախոսազրույց է ունեցել իր եղբայր Էռնեստ Թառոյանի հետ, որին նաև Էրիկ են կոչում, նրա հեռախոսահամարն է 098-00-01-50։ Էրիկն իրեն ասել է, որ շուրջ մեկ ժամ առաջ, Վահագն անունով մի տղա իր երեք ընկերների հետ, Երևանի Սայաթ-Նովա փողոցում ծեծի են ենթարկել իրեն և գլխի շրջանում վնասվածք պատճառել։ Այնուհետև Ալեք Մանուկյան փողոցում հանդիպել է Էրիկին և մյուս եղբայր Ալեքսանդր Թառոյանին, որին նաև Ալիկ են կոչում։ Այդ ժամանակ էլ Էրիկն ասել է, որ Վահագն իր ընկերների հետ իրեն ծեծել է` Անի անունով մի աղջկա ծաղիկ նվիրելու համար։ Տեսել է նաև, որ Էրիկի գլխի շրջանում վնասվածք կա, որից արյուն է հոսել։ Այնուհետև եղբայրների հետ իր «Տուարեգ» մակնիշի ավտոմեքենայով գնացել են Երևանի Չարենց փողոց, որտեղ Երևանի պետական համալսարանի կենսաբանական ֆակուլտետի մասնաշենքի մոտ կայանված տեսել են սև գույնի «Պորշե» մակնիշի, 05 500 պետհամարանիշի ավտոմեքենա, որի կողքին էլ տեսել է երկու տղաների։ Նրանցից քիչ հեռու տեսել է ևս մի քանի տղաների։ Մոտենալով «Պորշե» մակնիշի ավտոմեքենայի մոտ կանգնած երկու տղաներին` հարցրել է, թե ով է հարվածել իր եղբորը։ Նրանցից մեկն ընդառաջ գալով ասել է` «մենք ենք խփել»։ Ներկայումս արդեն գիտի, որ այդ տղան Վահագնն է եղել։ Վահագնի պատասխանից հետո Ալիկը ձեռքով հարվածել է նրան և միանգամից վիճաբանություն է սկսվել։ Այնուհետև շուրջ հինգից վեց մետր հեռավորության վրա կանգնած մի տղա, որի հագին եղել է սև բաճկոն, ատրճանակով չորսից հինգ կրակոց է արձակել իր ուղղությամբ։ Արձակված գնդակներից մեկը դիպչել է իր ճակատին, որից վնասվածք է ստացել և ընկել է գետնին։ Ընկած դիրքում տեսել է, որ իր հետ եկած և իրենց մոտեցող տղաները քաշքշոցի և կռվի մեջ են մտել մյուս տղաների հետ, միմյանց հարվածել և հայհոյանքներ են տվել։ Ճանապարհով ընթացող ավտոմեքենաների վարորդները տեսնելով իրենց կռիվը` կանգնեցրել են իրենց ավտոմեքենաները, իսկ մայթով անցնողները` հեռու կանգնած հետևել են կռվին։ Այդ ընթացքում ևս մի քանի կրակոցների ձայներ է լսել, բայց կրակողին չի տեսել։ Նշված կրակոցներից հետո այդտեղ գտնվող տղաներն իրենց ավտոմեքենաներով հեռացել են։ Այդ ժամանակ էլ այդտեղ տեսել է նաև իր ընկեր Էդգարին, ով եկել էր իր սև գույնի, «Քեմրի» մակնիշի ավտոմեքենայով, սակայն չգիտի, թե որ պահին։ Դրանից հետո իրենք նույնպես հեռացել են այդտեղից։ Իրենք կենսաբանական ֆակուլտետի մոտ գնացել են հաշտվելու նպատակով և ոչ թե վիճաբանելու։
/դատական նիստի արձանագրություն, հատոր 1, գ.թ. 106-109, հատոր 2, գ.թ. 57, հատոր 3, գ.թ. 207-209, հատոր 5, գ.թ. 61-62, 63-69/
Ամբաստանյալ Գուժ Գևորգի Աղաբեկյանի ցուցմունքներով այն մասին, որ 2010 թվականի դեկտեմբերի 8-ին, ժամը 14-ի սահմաններում, իր ընկեր Վահագն Գրիգորյանը հայտնել է, որ իր ընկերուհի Անիին ինչ-որ մեկը ծաղիկներ է ուղարկել։ Հետագայում պարզվել է, որ նա Էռնեստ Թառոյանն է։ Վերջինիս հետ հանդիպելու նպատակով ինքը կամ Վահագն Գրիգորյանն իր 098-04-11-66 և իրենց ընկեր Աշոտ Մանուկյանի 099-555-000 հեռախոսահամարներով հեռախոսազրույցներ են ունեցել իրենց և Էռնեստ Թառոյանի ընդհանուր ծանոթ Ռաֆոյի հետ` 093-28-58-43 հեռախոսահամարով և պայմանավորվածություն են ձեռք բերել նրա և Էռնեստ Թառոյանի հետ հանդիպել Երևանի Սայաթ-Նովա փողոցում` Տիկնիկային թատրոնի մոտ։ Այդ նպատակով, ժամը 16-ի սահմաններում, Վահագն Գրիգորյանի և Աշոտ Մանուկյանի հետ, վերջինիս սև գույնի «Պորշե» մակնիշի ավտոմեքենայով գնացել են նշված վայր, որտեղ ինքը և Վահագն Գրիգորյանն իջել են ավտոմեքենայից և Էռնեստ Թառոյանի հետ գնացել են այդտեղ գտնվող շենքերի բակ, իսկ Աշոտ Մանուկյանն ավտոմեքենայով գնացել և իրենց սպասել է նշված բակից դեպի Աբովյան փողոց դուրս եկող կամարի մոտ։ Բակում տեղի ունեցած զրույցի ընթացքում ինքը և Վահագն Գրիգորյանը քաշքշել, հրել և մի քանի անգամ հարվածել են Էռնեստ Թառոյանին։ Իր ձեռքում եղած նիկելապատ «բրիլոկի» հարվածի հետևանքով Էռնեստ Թառոյանի գլխից սկսել է արյուն հոսել, որը տեսնելով` ինքն ու Վահագնը շենքերի մոտով գնացել են դեպի վերը նշված կամարը, նստել են այդտեղ կայանված, Աշոտ Մանուկյանի «Պորշե» մակնիշի ավտոմեքենան և հեռացել են։ Վիճաբանության ժամանակ շրջապատում մարդիկ են եղել, բակի բնակիչներն են եկել և անցել իրենց կողքով, սակայն նրանցից ոչ մեկին չի ճանաչում։ Այդտեղից հեռանալուց հետո իր 099-11-11-98 և Աշոտ Մանուկյանի 099-55-50-00 հեռախոսահամարներով կրկին հեռախոսազրույցներ են ունեցել Ռաֆոյի հետ` 091-61-61-16 հեռախոսահամարով և խոսել են այդ դեպքի մասին։ Նույն օրը, ժամը 19.00-ի սահմաններում, Աշոտ Մանուկյանի և Վահագն Գրիգորյանի հետ կանգնած են եղել Երևանի Չարենց փողոցում` Երևանի պետական համալսարանի կենսաբանական ֆակուլտետի մասնաշենքի մոտ, երբ իրենց են մոտեցել երեքից չորս ավտոմեքենաներ, որոնցից իջել են շուրջ 15-ից 20 տղաներ և արագ քայլելով մոտեցել են իրենց։ Նրանցից մի քանիսի ձեռքերին «բիտաներ» է տեսել, իսկ մեկի ձեռքին էլ` «Մակարով» տեսակի ատրճանակ։ Իրենց մոտեցող տղաների մեջ տեսել է նաև Էռնեստ Թառոյանին և նրա եղբայրներ Ալիկին և Գեորգիին։ Էռնեստ Թառոյանին տեսնելով` հասկացել է, որ այդտեղ կարող է կռիվ լինել։ Դրա համար նստել է այդտեղ կայանված, Աշոտ Մանուկյանի «Պորշե» մակնիշի ավտոմեքենայի առջևի աջ նստատեղին, սակայն ընկերները չեն եկել։ Ավտոմեքենայի պատուհանից տեսել է, որ Վահագն Գրիգորյանն ընկած է գետնին և շուրջ յոթ հոգի խառը հարվածում են նրան, այդ թվում` փայտով։ Հարվածողների մեջ եղել է նաև Էռնեստ Թառոյանը։ Անմիջապես հիշել է, որ օրինական կարգով իրեն պատկանող գազային ատրճանակն այդ օրն առավոտյան դրել է Աշոտ Մանուկյանի ավտոմեքենայի սրահի բեռնախցիկի մեջ, որտեղից այն վերցնելով` դուրս է եկել ավտոմեքենայից և շուրջ հինգից վեց անգամ օդ է կրակել, որպեսզի Վահագն Գրիգորյանին հարվածող տղաները հետ քաշվեն։ Կրակելուց անմիջապես հետո այդ տղաները հետ են քաշվել։ Տեսել է, որ իր արձակած կրակոցների ժամանակ Էրիկի եղբայր Գեորգին ընկել է գետնին։ Ինքը կրակելու ընթացքում է ձեռքը վերև բարձրացրել և շարունակել օդ կրակել, ինչից ելնելով էլ կարծում է, որ այդ ընթացքում է Գեորգի Թառոյանը գլխի շրջանում վնասվածք ստացել։ Այնուհետև Վահագնին հարվածող տղաները քայլել են իր ուղղությամբ։ Նրանցից մեկի մոտ զենք է եղել, որը պահել է իր ուղղությամբ և մյուսների հետ առաջ է եկել։ Դա տեսնելով` անմիջապես բացել է «Պորշե» մակնիշի ավտոմեքենայի հետևի աջ դուռը, որպեսզի պառկի հետևի նստատեղին և իր ուղղությամբ կրակելու դեպքում գնդակներն իրեն չդիպչեն, սակայն երբ մտել է ավտոմեքենայի սրահի հետևի հատվածը, դուռն իր հետևից դեռևս չփակված` կրակոցի ձայներ է լսել և ձախ ձեռքի դաստակի վերևի հատվածում սուր ցավ է զգացել։ Այնուհետև տեսել է, որ ձեռքը վնասված է, ինչից աչքերի առջև սևացել է և չի հիշում, թե ինչպես է հեռացել այդտեղից։ Հաջորդ օրն ատրճանակը տվել է իր եղբայր Գագիկ Աղաբեկյանին։ Չի հիշում, թե ժամանակ հայհոյանքներ եղել են, թե ոչ, սակայն գոռգոռոցներ եղել են։
/դատական նիստի արձանագրություն, հատոր 2, գ.թ. 16-19, 39, հատոր 4, գ.թ. 38-42, 124-133, 135-145, 175-179, 186-190, հատոր 5, գ.թ. 58-60, 77-78/
Ամբաստանյալ Վահագն Մուշեղի Գրիգորյանի ցուցմունքներով այն մասին, որ 2010 թվականի դեկտեմբերի 8-ին տեղեկանալով, որ Էռնեստ Թառոյանն իր համակրած աղջիկ Անի Ստեփանյանին ծաղիկ է նվիրել, իրենց ընդհանուր ծանոթ Ռաֆոյի հետ հեռախոսով պայմանավորվածություն են ձեռք բերել վերջինիս միջոցով Էռնեստ Թառոյանին հանդիպելու վերաբերյալ։ Նույն օրը, ժամը 16-ի սահմաններում, իր ընկերներ Գուժ Աղաբեկյանի և Աշոտ Մանուկյանի հետ, վերջինիս «Պորշե» մակնիշի ավտոմեքենայով, գնացել են Երևանի Սայաթ-Նովա փողոց` Տիկնիկային թատրոնի մոտ։ Ինքը և Գուժ Աղաբեկյանը Էռնեստ Թառոյանի և Ռաֆոյի հետ մտել են Տիկնիկային թատրոնի հետևի շենքերի բակ, իսկ Աշոտ Մանուկյանն ավտոմեքենայով գնացել և իրենց սպասել է նշված բակից դեպի Աբովյան փողոց դուրս եկող կամարի մոտ։ Բակում տեղի ունեցած զրույցի ընթացքում ինքը և Գուժը քաշքշել են Էռնեստին, հարվածել են նրան, որպեսզի իր համակրած աղջկանից հեռու մնա։ Դրանից հետո Գուժի հետ գնացել են դեպի վերը նշված կամարը, նստել են այդտեղ կայանված, Աշոտի «Պորշե» մակնիշի ավտոմեքենան և հեռացել են։ Նույն օրը, ժամը 19.00-ից 21.00-ի սահմաններում, Աշոտ Մանուկյանի և Գուժ Աղաբեկյանի հետ կանգնած են եղել Երևանի Չարենց փողոցում` Երևանի պետական համալսարանի կենսաբանական ֆակուլտետի մասնաշենքի մոտ, երբ իրենց են մոտեցել երեքից չորս ավտոմեքենաներ, որոնց մեջ եղել է նաև սև գույնի, «սեդան» տիպի ավտոմեքենա։ Չի հիշում, որ այդ ավտոմեքենան «Տոյոտա Քեմրի» մակնիշի եղած լինի, սակայն քանի որ հանցագործության մասին հաղորդում տալիս հայտնել է, որ դրանց մեջ նաև սև գույնի «Տոյոտա Քեմրի» մակնիշի ավտոմեքենա է եղել, ուրեմն այդ ժամանակ նման բան է հիշել։ Այդ ավտոմեքենաներից իջել են տասնհինգից քսան տղաներ և քայլելով մոտեցել են իրենց։ Նրանցից մի քանիսի ձեռքերում «բիտաներ» է տեսել։ Իրենց մոտեցող տղաների մեջ տեսել է Ժոկոյին և նրա եղբայրներին։ Ժոկոն անմիջապես հարցրել է, թե ով է հարվածել իր եղբորը։ Իր պատասխանից հետո, որ ինքն է հարվածել, երկվորյակ եղբայրներից մեկը ձեռքով հարվածել է իր դեմքին, որից հետո նաև մյուս տղաներն են սկսել հարվածել իրեն և կռիվ է սկսվել։ Ինքը նույնպես հարվածել է նրանց, ապա ընկել է գետնին։ Այդ տղաները շարունակել են ընկած դիրքում ձեռքերով, ոտքերով և փայտով խառը հարվածներ հասցնել իրեն։ Այդ ընթացքում վնասվածքներ է ստացել աչքի և ձեռքի շրջաններում։ Այնուհետև մի քանի կրակոցների ձայներ է լսել և իրեն հարվածող տղաները դադարել են հարվածելը։ Այդ ժամանակ տեսել է, որ Գուժ Աղաբեկյանն է իր մոտ գտնվող ատրճանակով օդ կրակում։ Այնուհետև ավելի ուժեղ կրակոցների ձայներ է լսել և այդ ժամանակ էլ ոտքի շրջանում վնասվածք է ստացել, սակայն չի տեսել, թե ով է եղել կրակողը։ Չի հիշում, թե դրանից հետո այդտեղ ինչ է տեղի ունեցել և ինչպես է հեռացել դեպքի վայրից։ Երևանի Չարենց փողոցում տեղի ունեցած դեպքը տևել է չորսից հինգ րոպե։
/դատական նիստի արձանագրություն, հատոր 1, գ.թ. 29-30, 259-262, հատոր 2, գ.թ. 48, հատոր 4, գ.թ. 32-34, 147-154, հատոր 5, գ.թ. 1-2, 11-19, 81-82/
Տուժող Արմինե Ստանիսլավի Հովակիմյանի նախաքննական ցուցմունքով այն մասին, որ «Պորշե-Կայեն-Տուրբո» մակնիշի, 05 ՕԼ 500 պետհամարանիշի ավտոմեքենան պատկանում է իրեն, սակայն այն վարում է իր որդի Աշոտ Մանուկյանը։ Վերջինս իրեն հայտնել է, որ 2010 թվականի դեկտեմբերի 8-ին ավտոմեքենան կայանված է եղել Երևանի Չարենց փողոցում, որտեղ ինչ-որ վիճաբանություն է տեղի ունեցել, որի ժամանակ նաև կրակոցներ են հնչել և այդ կրակոցների հետևանքով իր ավտոմեքենան վնասվել է։
/հատոր 5, գ.թ. 179-180/
Տուժող Էռնեստ Գուրգենի Թառոյանի նախաքննական ցուցմունքներով այն մասին, որ ինքը համակրում է Անի Ստեփանյանին։ Իր ծանոթ Ռաֆոն իրեն ասել էր, որ Անիին համակրում է նաև «Ֆաֆոն», որի անունը Վահագն է։ Վերջինս Ռաֆոյի միջոցով իրեն փոխանցել էր, որ Անին իր ընկերուհին է։ Քանի որ ինքը չի հավատացել Վահագնի ասածին, ուստի 2010 թվականի դեկտեմբերի 8-ին ծաղիկ է նվիրել Անիին, ինչի մասին իմացել է Վահագնը։ Նույն օրը, ժամը 16.00-ի սահմաններում, ընկերների, այդ թվում` Ռաֆոյի հետ միասին գտնվել է Երևանի Սայաթ-Նովա փողոցում` Տիկնիկային թատրոնի հարևանությամբ գտնվող «N1» բիլիարդանոցում, երբ Ռաֆոյի 093-28-58-43 հեռախոսահամարին զանգահարել է Վահագնի ընկեր Գուժը և ասել է, որ իր հետ միասին դուրս գան Տիկնիկային թատրոնի մոտ։ Երբ դուրս են եկել բիլիարդանոցից` այդտեղ սև գույնի, «Պորշե» մակնիշի, 05 500 պետհամարանիշի ավտոմեքենա է կանգնել, որից իջել են Վահագնը, Գուժը, ավտոմեքենայի սեփականատեր Աշոտը և ևս երկու անծանոթ տղաներ։ Այնուհետև Աշոտն ավտոմեքենայով շենքի կամարով ներս է մտել, որից հետո իրենք են նույն կամարով ներս մտել դեպի շենքի բակ։ Այնտեղ Վահագնը Ռաֆոյին հարցրել է, թե փոխանցել է արդյոք իրեն, որ Անին իր ընկերուհին է։ Ռաֆոյի դրական պատասխանից հետո Վահագն ապտակել է իրեն, իսկ Գուժը` ձեռքում եղած նիկելապատ առարկայով` «կաստետով» հարվածել է իր գլխին, ինչից վնասվածք է ստացել և վերքից արյուն է հոսել։ Վահագն ու Գուժը շարունակել են հարվածել իրեն։ Ինքը բռնել է գլուխը և չի տեսել, որ ուրիշ որևէ մեկը հարվածի իրեն։ Դրանից հետո Վահագնը, Գուժը և մյուս տղաները նստել են «Պորշե» մակնիշի ավտոմեքենան և հեռացել են։ Այդ պահին այդտեղ տեսել է նաև Վիտյային։ Դրանից հետո մտել է այդտեղ գտնվող գեղեցկության սրահ, որտեղ լվացվելուց և դուրս գալուց հետո կատարվածի մասին հայտնել է իր եղբայր Գեորգի Թառոյանին, որին «Ժոկո» են կոչում։ Երևանի Սայաթ-Նովա փողոցից իր երկվորյակ եղբայր Ալեքսանդրի և Ռաֆոյի հետ միասին գնացել են Ալեք Մանուկյան փողոց, որտեղ հանդիպել են Գեորգիին։ Վերջինիս հետ են եղել նրա շուրջ տաս ընկերները, այդ թվում` Էդգարը, ով այդտեղ է եկել իր «Քեմրի» մակնիշի ավտոմեքենայով։ Ժոկոյին պատմել է Սայաթ-Նովա փողոցում տեղի ունեցած դեպքի մասին։ Որոշել են հանդիպել Վահագնենց հետ և պարզել վիճաբանության պատճառները։ Բոլորով ավտոմեքենաներով շրջել են քաղաքում և ժամը 19։30-ից 20։00-ի սահմաններում, Երևանի Չարենց փողոցում` Երևանի պետական համալսարանի կենսաբանական ֆակուլտետի մասնաշենքի մոտ կայանված տեսել են Աշոտի «Պորշե» մակնիշի ավտոմեքենան, որի մոտ կանգնած է եղել Գուժի «Բի Էմ Դաբլյու» մակնիշի ավտոմեքենան և ևս մեկ ավտոմեքենա, որոնց մեջ մարդիկ են եղել։ Տեսել է, որ Վահագնը և Գուժը «Պորշե» մակնիշի ավտոմեքենայի մոտ կանգնած զրուցում են։ Իրենք ավտոմեքենաներից իջնելով` մոտեցել են նրանց։ Առջևից գնացել են իր եղբայրներ Ալեքսանդրը և Գեորգին, իսկ նրանց հետևից` ինքը, Էդգարը և այլոք։ Մոտենալու ընթացքում տեսել է, որ Գուժը «Պորշե» մակնիշի ավտոմեքենայի սրահի պահախցից սև գույնի ատրճանակ է վերցրել և մոտեցել է իրենց։ Գեորգին Վահագնին հարցրել է` «դու ե՞ս եղբորս խփել»։ Վահագնը պատասխանել է` «հա, մենք ենք խփել», որից հետո Ալիկը հայհոյել և բռունցքով հարվածել է Վահագնի դեմքին։ Այդ ժամանակ Գուժը «Պորշե» մակնիշի ավտոմեքենայի մոտից իր մոտ գտնվող ատրճանակով կրակոցներ է արձակել իրենց ուղղությամբ։ Գնդակներից մեկը դիպչել է Ժոկոյին գլխին և նա ընկել է։ Այնուհետև խառը քաշքշոց, կռիվ է սկսվել, որին Վահագնենց կողմից միացել են նաև «Պորշե» և «Բի Էմ Դաբլյու» մակնիշի ավտոմեքենաներից իջած երեք անծանոթ տղաները։ Իրենց կողմից չի հիշում, թե ովքեր են մասնակցել դրան, սակայն ինքը և Էդգարը նույնպես միջամտել են, հայհոյանքներով հարձակվել են Վահագնի և նրա ընկերների վրա։ Վահագնը, Գուժը և նրանց երեք ընկերները նույնպես հարվածել և հայհոյել են իրենց։ Հետո տեսել է, որ Էդգարն իր մոտ գտնվող ատրճանակով մի քանի անգամ կրակել է այդտեղ կայանված «Պորշե» մակնիշի ավտոմեքենայի ուղղությամբ, որի մոտ կռվելիս է եղել Գուժը։ Էդգարի արձակած կրակոցներից հետո վիճաբանությունը դադարել է և բոլորը հեռացել են։
Վիճաբանությունը տևել է յոթից տաս րոպե, որի ժամանակ փողոցով անցնող մարդիկ և երթևեկող ավտոմեքենաների վարորդները կանգնել և զարմացած իրենց են նայել, սակայն չեն միջամտել։
/հատոր 1, գ.թ. 120-131, 202-208, հատոր 4, գ.թ. 124-133, 213-215, 221-223, հատոր 5, գ.թ. 27-39, 83-84/
Դատարանում Էռնեստ Գուրգենի Թառոյանը հրաժարվեց իր եղբայրների վերաբերյալ ցուցմունքներ տալուց, հայտարարեց, որ ամբաստանյալներ Գուժ Աղաբեկյանի և Վահագն Գրիգորյանի հետ հաշտվել է և նրանց նկատմամբ որևէ պարտք ու պահանջ չունի։
/դատական նիստի արձանագրություն/
Վկա Ալեքսանդր Գուրգենի Թառոյանի նախաքննական ցուցմունքներով այն մասին, որ ճանաչում է Երևանի պետական համալսարանի ուսանողներ Գուժին և «Ֆաֆոյին», որի անունը Վահագն է։ Իր երկվորյակ եղբայր Էռնեստ Թառոյանն իրեն պատմել է, որ համակրում է Անի անունով մի աղջկա, որին համակրում է նաև Վահագնը, ինչի մասին էլ իմացել են իրենց և Վահագնի ընդհանուր ծանոթ Ռաֆոյից։ 2010 թվականի դեկտեմբերի 8-ի առավոտյան Էռնեստը ծաղիկ է նվիրել Անիին, ինչի մասին իմացել է Վահագնը։
Նույն օրը, ժամը 16-ի սահմաններում, Էռնեստի, Ռաֆոյի և իրենց ընկեր Վիտյայի հետ գտնվել են Երևանի Սայաթ-Նովա փողոցում` Տիկնիկային թատրոնի հարևանությամբ գտնվող բիլիարդանոցում, երբ Վահագն ու Գուժը զանգահարել են Ռաֆոյին և հայտնել են, որ ցանկանում են տեսնել Էռնեստին։ Այնուհետև Ռաֆոն և Էռնեստը դուրս են եկել Տիկնիկային թատրոնի մոտ, ուր սև գույնի «Պորշե» մակնիշի ավտոմեքենայով եկել են Գուժը, Վահագնը և ևս երկու կամ երեք տղաներ, որոնք շենքի բակում ծեծել են Էռնեստին։ Գուժ Աղաբեկյանը նաև «ռուկայատկայով» հարվածել և վնասել է Էռնեստի գլուխը, որից հետո հեռացել են այդտեղից։ Էռնեստը գլխի վերքից հոսող արյունը լվանալու համար մտել է շենքի բակում գտնվող գեղեցկության սրահ։ Երբ ինքը գնացել է այդտեղ` Էռնեստն արդեն գեղեցկության սրահում է եղել, իսկ վերը նշվածի մասին հենց Էռնեստն է իրեն պատմել։ Կատարվածի մասին հեռախոսով հայտնել են իրենց ավագ եղբայր Գեորգի Թառոյանին, ապա Էռնեստի և Ռաֆոյի հետ միասին գնացել են Ալեք Մանուկյան փողոց, ուր եկել է նաև Գեորգին։ Վերջինիս հետ են եղել նաև նրա ընկերները, այդ թվում` Էդոն, ով վարել է իր սև գույնի «Տոյոտա Քեմրի» մակնիշի ավտոմեքենան։ Տասից տասնհինգ հոգով, ավտոմեքենաներով շրջել են քաղաքում և մի քանի ժամ անց, Երևանի պետական համալսարանի կենսաբանական ֆակուլտետի մասնաշենքի դիմացի հատվածում կայանված տեսել են վերը նշված «Պորշե» մակնիշի ավտոմեքենան, որի մոտ կանգնած են եղել Վահագնը, Գուժը, նրանց ընկեր Աշոտը և ևս մի անծանոթ տղա։ Սկզբում ինքը և Գեորգին, իսկ իրենց հետևից նաև մյուսներն իջել են ավտոմեքենաներից և մոտեցել են Վահագնենց։ Գեորգին Վահագնին հարցրել է, թե ինքն է հարվածել Էրիկին, թե ոչ։ Վահագնի դրական պատասխանից հետո ինքը ձեռքով հարվածել է նրա դեմքին, ինչից հետո ծեծկռտուք է առաջացել։ Այդ ընթացքում Գուժը վազելով գնացել և «Պորշե» ավտոմեքենայի միջից ատրճանակ է հանել, որով կրակել է իրենց վրա։ Կրակոցներից մեկը դիպչել է իր եղբայր Գեորգիի գլխին և նա վայր է ընկել։ Ծեծկռտուքը տևել է hինգից վեց րոպե, որի ընթացքում դրան մասնակից երկու կողմերն էլ, այդ թվում` ինքը, Էռնեստը, Էդգարը, Վահագնը և Գուժը հայհոյանքներ են տվել և քաշքշել են միմյանց։ Այդ ընթացքում նաև կրակոցներ է լսել և տեսել է, որ Էդգարն է ատրճանակով կրակում «Պորշե» մակնիշի ավտոմեքենայի ուղղությամբ, որը վնասվել է։ Դրանից հետո վիճաբանությունը դադարել է և բոլորը հեռացել են։
Վիճաբանությանն ականատես են եղել բազմաթիվ մարդիկ, նույնիսկ ճանապարհով երթևեկող ավտոմեքենաների վարորդներն են իջել ավտոմեքենաներից։
/հատոր 1, գ.թ. 89-93, 218-222, հատոր 4, գ.թ. 147-154, 224-226, հատոր 5, գ.թ. 40-52, 85-86/
Դատարանում վկա Ալեքսանդր Գուրգենի Թառոյանը հայտարարեց, որ հրաժարվում է իր հարազատ եզբայրների և իր վերաբերյալ ցուցմունքներ տալուց։
/դատական նիստի արձանագրություն/
Վկա Վիկտոր Արմենի Կարապետյանի ցուցմունքներով այն մասին, որ բնակվում է Երևանի Սայաթ-Նովա փողոցի թիվ 6 շենքի թիվ 41 բնակարանում։ 2010 թվականի դեկտեմբերի 8-ին, ժամը 15-ի սահմաններում գնացել է իրենց շենքի մոտ` Տիկնիկային թատրոնի հարևանությամբ գտնվող «N1» բիլիարդանոց, որտեղ տեսել է իր ծանոթներ Էռնեստ և Ալեքսանդր Թառոյաններին, որոնց հետ եղել են նաև իրեն անծանոթ երկու տղաներ։ Շուրջ մեկ ժամ հետո սնվելու նպատակով մի պահ տուն է մտել և երբ տանից դուրս է եկել` բարձր ձայներ, գոռգոռոցներ է լսել։ Առաջանալով բիլիարդանոցից դեպի շենքերի բակ մտնող կամարի մոտ` տեսել է, որ կամարի դիմացի ճանապարհի վերջնամասից երեք տղա վազելով փախչում են դեպի Աբովյան փողոց դուրս եկող կամարի ուղղությամբ, իսկ նույն ճանապարհի մեջտեղի հատվածում գլուխը բռնած կանգնած է Էռնեստը` բիլիարդանոցում նրա հետ եղած անծանոթ տղաներից մեկի հետ։ Երբ մոտեցել է նրանց` տեսել է, որ Էռնեստի գլուխը վնասված է և վերքից արյուն է հոսում։ Մտել է տուն, որպեսզի արյունը մաքրելու համար կտոր բերի, սակայն երբ դուրս է եկել` Էռնեստն իրեն ասել է, որ մտել է շենքի բակում գտնվող գեղեցկության սրահ, որտեղ իրեն օգնություն են ցույց տվել։ Դրանից հետո Էռնեստը, նրա հետի տղան և Ալեքսանդրը միասին հեռացել են այդտեղից։
/դատական նիստի արձանագրություն, հատոր 1, գ.թ. 85-87, հատոր 3, գ.թ. 228-233, հատոր 4, գ.թ. 213-215, հատոր 5, գ.թ. 20-22/
Վկա Կարեն Սամվելի Ասատրյանի ցուցմունքներով այն մասին, որ հանդիսանում է Էռնեստ և Ալեքսանդր Թառոյանների ընկերը։ 2010 թվականի դեկտեմբերի 8-ին, ժամը 22։00-ի սահմաններում, իրեն զանգահարել է Ալեքսանդրը և ասել է, որ գտնվում են Նոր-Նորքի 7-րդ զանգվածում` մորաքրոջ բնակարանում և իրեն կանչել է այդտեղ։ Երբ գնացել է նշված բնակարան` այդտեղ տեսել է նաև Էռնեստին, որի գլխի շրջանում վնասվածք է տեսել։ Հարցրել է, թե ինչ է պատահել, իսկ Էռնեստը պատասխանել է, որ կռիվ է արել։
/դատական նիստի արձանագրություն, հատոր 1, գ.թ. 102-104, հատոր 4, գ.թ. 6-10/
Վկա Ժասմինա Ժորայի Սահակյանի ցուցմունքներով այն մասին, որ 2010 թվականի դեկտեմբերի 8-ին գտնվել է Երևանի Աբովյան թիվ 5 հասցեում գործող «Ժասմին» գեղեցկության սրահում, որը պատկանում է քրոջը։ Ժամը 16։00-ից 18։00-ի սահմաններում գեղեցկության սրահի մոտ տեսել է գեր կազմվածքով տղայի, որի գլխից արյուն է հոսել, իսկ վերնաշապիկն արյունոտված է եղել։ Նրան ներս է տարել, մշակել է վերքը, որից հետո նա հեռացել է։
/դատական նիստի արձանագրություն, հատոր 2, գ.թ. 238-239/
Վկա Գաբրիել Էրիկի Մալխասյանի ցուցմունքներով այն մասին, որ 2010 թվականի դեկտեմբերի 8-ին, ժամը 18։00-ից 20։00-ի սահմաններում, իր «ՎԱԶ 2121» մակնիշի, 09 ՕՏ 799 պետհամարանիշի ավտոմեքենայով, Երևանի Չարենց փողոցով պատահաբար անցնելիս` Երևանի պետական համալսարանի կենսաբանական ֆակուլտետի մասնաշենքի մոտ կանգնած տեսել է տասից տասնհինգ տղաների, որոնց մեջ է եղել նաև իր ընկեր «Ֆաֆոն»` Վահագն Գրիգորյանը։ Իր ավտոմեքենան կայանել է նրանցից շուրջ երեսուն մետր ներքև, իջել է և քայլել է այդ տղաների ուղղությամբ, որպեսզի տեսնի Վահագնին։ Նրանց մոտենալիս` բարձր ձայներ և գոռգոռոցներ է լսել, իսկ դեռ նրանց մոտ չհասած` շուրջ տասնհինգ մետր հեռավորության վրա կրակոցների ձայներ է լսել և վախից հետ է քաշվել։ Կրակոցների ձայները տարբեր են եղել, ինչից իրեն թվացել է, որ երկու զենքից են կրակում։ Երբ կրակոցները դադարել են` տեսել է, որ Վահագնն ընկած է գետնին և նրան մի քանի հոգով խառը հարվածում են։ Մոտեցել և մի կողմ է քաշել Վահագնին, նստացրել է այդտեղ կայանված ավտոմեքենաներից մեկի մեջ, որի մակնիշը չի հիշում, ապա ինքն էլ նստել է իր ավտոմեքենան և հեռացել է այդտեղից։ Վահագնին ավտոմեքենայի մեջ նստացնելիս` տեսել է, որ նրա աչքը վնասված է և նա դժվարությամբ է քայլել։
/դատական նիստի արձանագրություն, հատոր 2, գ.թ. 163-168, հատոր 5, գ.թ. 3-4, 5-10/
Վկա Նելսոն Արսենի Ղահրամանյանի ցուցմունքներով այն մասին, որ աշխատում է Երևանի պետական համալսարանում որպես կենսաբանական ֆակուլտետի մասնաշենքի հսկիչ։ 2010 թվականի դեկտեմբերի 8-ին, ժամը 16։00-ին ընդունել է հերթապահությունը և հաջորդ օրը, ժամը 08։00-ին հանձնել է այն։ 2010 թվականի դեկտեմբերի 8-ին, ժամը 19։00-ից հետո շրջել է մասնաշենքի տարածքում, երբ Երևանի Չարենց փողոցի կողմից «ղալմաղալ», գոռգոռոցներ և հայհոյանքներ է լսել։ Սկզբից դրան ուշադրություն չի դարձրել, բայց քանի որ հետո ձայներն ուժեղ են եղել, մասնաշենքի մուտքից դուրս է եկել։ Տեսել է, որ այդտեղ գտնվող տղաների մի մասը վազելով, իսկ մի մասն էլ` ավտոմեքենաներով, փախչում են այդտեղից։ Այդ մասին մի քանի օր անց պատմել է ԵՊՀ պահպանության ծառայության հերթափոխի պետ Խաչիկ Սարգսյանին։
/դատական նիստի արձանագրություն, հատոր 2, գ.թ. 225-227/
Վկա Անուշավան Գագիկի Կարապետյանի ցուցմունքներով այն մասին, որ 2010 թվականի դեկտեմբերի 8-ին, ժամը 18-ի սահմաններում իր ընկեր Գեորգի Թառոյանը հեռախոսով իրեն ասել է, որ իր եղբայր Էրիկը կռիվ է արել և գնում է նրան տեսնելու։ Ժամը 20-ի սահմաններում նորից հեռախոսազրույց է ունեցել Գեորգիի հետ և տեղեկանալով, որ նա տանն է` գնացել է նրան տեսնելու։ Տանն են եղել նաև Գեորգիի եղբայրներ Ալիկն ու Էրիկը։ Վերջինիս գլխին վնասվածք է տեսել, իսկ Գեորգիի ճակատին` փոքր անցք է եղել և մաշկը վնասված է եղել։ Էրիկն իրեն պատմել է, որ մի աղջկա ծաղիկ է նվիրել, որի պատճառով ինչ-որ տղաներ ծեծել են իրեն։ Դրանից հետո եղբայրների հետ Չարենց փողոցում հանդիպել են այդ տղաներին, իրենց միջև կռիվ է առաջացել, որի ընթացքում նաև կրակոցներ են հնչել։ Ինչ-որ մեկն էլ շարիկով ատրճանակով է կրակել և շարիկը դիպչել է Գեորգիի ճակատին։
/դատական նիստի արձանագրություն, հատոր 3, գ.թ. 108-114/
Վկա Ռոբերտ Գուրգենի Սիմիտյանի ցուցմունքներով այն մասին, որ հանդիսանում է Գեորգի, Էռնեստ և Ալեքսանդր Թառոյանների եղբայրը։ 2010 թվականի դեկտեմբերի 8-ի երեկոյան գնացել են իրենց` Երևանի Վարդանանց փողոցում գտնվող տուն, որտեղ տեսել է, որ Էռնեստի գլուխը և Գեորգիի ճակատը վնասված են։ Եղբայրներից տեղեկացել է, որ Էռեստը մի աղջկա ծաղիկ է նվիրել, որի պատճառով ինչ-որ տղաներ Երևանի Սայաթ-Նովա փողոցում ծեծել են նրան և գլխի շրջանում վնասվածք է ստացել։ Նույն օրը, երեկոյան Երևանի Չարենց փողոցում կրկին վիճաբանություն է եղել այդ տղաների հետ, որին ներկա են եղել նաև Գեորգին և Ալեքսանդրը։ Այդ վիճաբանության ժամանակ էլ Գեորգին վնասվածք է ստացել ճակատի շրջանում։
/դատական նիստի արձանագրություն, հատոր 3, գ.թ. 115-118, հատոր 5, գ.թ. 70-74/
Վկա Սևակ Վաչագանի Նիկողոսյանի ցուցմունքներով այն մասին, որ 2010 թվականի դեկտեմբերի 8-ին Երևանի Ալեք Մանուկյան փողոցում տեսել է իր ընկեր Գեորգի Թառոյանին և նրա երկու եղբայրներին։ Գեորգին իրեն ասել է, որ իր եղբայր Էրիկին ծեծել են։ Դրանից հետո ինքը գնացել է Երևանի պետական համալսարան, որի կենսաբանական ֆակուլտետի մասնաշենքի կողքի աստիճաններով իջել է, որ գնա իրավագիտության ֆակուլտետ, սակայն այդ ժամանակ կրակոցների ձայներ է լսել։ Նույն աստիճաններով վերև է բարձրացել և կենսաբանական ֆակուլտետի մանաշենքի դիմացի հատվածում տեսել է սև գույնի, «Պորշե» մակնիշի ավտոմեքենա, որի աջ կողմի երկու դռների և պատուհանների վրա անցքեր են եղել։ Այնուհետև տեսել է, որ իրավագիտության ֆակուլտետի ուսանող Գուժը նստել է այդ ավտոմեքենայի առջևի աջ նստատեղին, իսկ նրա ընկեր «Ֆաֆոն»` հետևի նստատեղին։ Վերջինս դժվարությամբ է քայլել։ Այդտեղ տեսել է նաև իր ընկեր Գեորգիին, որի ճակատից արյուն է հոսել։ Շրջակայքում նաև այլ մարդիկ, այդ թվում` երիտասարդ տղաներ են եղել, որոնց չի ճանաչում։
/դատական նիստի արձանագրություն, հատոր 3, գ.թ. 213-219, հատոր 4, գ.թ. 211-212/
Վկա Աշոտ Արթուրի Մանուկյանի նախաքննական ցուցմունքներով այն մասին, որ 2010 թվականի դեկտեմբերի 8-ի ցերեկը, իր ընկերներ Վահագն Գրիգորյանի և Գուժ Աղաբեկյանի հետ միասին իր «Պորշե-Կայեն-Տուրբո» մակնիշի, 05 ՕԼ 500 պետհամարանիշի ավտոմեքենայով գնացել են Երևանի Սայաթ-Նովա փողոց, որտեղ Տիկնիկային թատրոնի մոտ, Վահագնը և Գուժն իջել են ավտոմեքենայից, իսկ ինքն ավտոմեքենայով Տիկնիկային թատրոնի կողքի կամարով մտել է շենքերի բակ և ավտոմեքենան կայանել է շենքերի բակից դեպի Աբովյան փողոց դուրս եկող կամարի մոտ։ Քիչ անց Գուժն ու Վահագնը եկել, նստել են իր ավտոմեքենան և իրենք հեռացել են այդտեղից։ Վահագն իրեն ասել է, որ ինչ-որ տղա իր համակրած աղջկան ծաղիկ է նվիրել, այդտեղ նրան են հանդիպել և նախազգուշացրել են, որ այդ աղջկանից հեռու մնա։
Դրանից հետո, ժամը 19-ի սահմաններում, Գուժ Աղաբեկյանի և Վահագն Գրիգորյանի հետ միասին գնացել են Երևանի Չարենց փողոց` Երևանի պետական համալսարանի կենսաբանական ֆակուլտետի մասնաշենքի մոտ, որի դիմաց կանգնած զրուցել են։ Հինգից տաս րոպե անց, երբ այդտեղ կայանված իր ավտոմեքենայի դիմացի հատվածում կանգնած փորձել է հեռախոսով զանգահարել, իսկ Վահագնը և Գուժն իրար հետ կանգնած զրուցելիս են եղել, տեսել է, որ մի քանի տղաներ են մոտեցել իր ընկերներին, որից հետո կրակոցներ է լսել և վախից թաքնվել է իր ավտոմեքենայի դիմացի մասում։ Կրակոցները դադարելուց անմիջապես հետո նստել է իր ավտոմեքենան և միայնակ հեռացել է այդտեղից։ Ճանապարհին տեսել է, որ ավտոմեքենայի աջ կողմի դռների ապակիների վրա անցքեր կան, իսկ երբ տուն է հասել` տեսել է, որ անցքեր կան նաև ավտոմեքենայի աջ կողմի երկու դռների վրա։ Հասկացել է, որ դրանք առաջացել են կրակոցների հետևանքով։ Իր բջջային հեռախոսահամարն է 099-555-000, որը գրեթե միշտ գտնվում է իր ավտոմեքենայի մեջ և ընկերներն առանց հարցնելու հաճախ են դրանից օգտվում։
/հատոր 1, գ.թ. 76-79, հատոր 3, գ.թ. 234-239, հատոր 4, գ.թ. 248-250, հատոր 5, գ.թ. 1-2/
Վկա Րաֆֆի Համլետի Հարությունյանի նախաքննական ցուցմունքով այն մասին, որ շրջապատում իրեն Ռաֆո են կոչում։ Ճանաչում է ինչպես Էռնեստ Թառոյանին, այնպես էլ Վահագն Գրիգորյանին, որոնք իրեն ասել են, որ համակրում են Անի անունով նույն աղջկան։ Նույնիսկ Վահագն Գրիգորյանն իրեն ասել է, որ Անին իր ընկերուհին է, ինչի մասին ինքը հայտնել է Էռնեստին։ 2010 թվականի դեկտեմբերի 8-ին, ժամը 16.00-ի սահմաններում, Էռնեստի, նրա եղբայր Ալեքսանդրի, նրանց ընկեր Վիտյայի և ևս մեկ անծանոթ տղայի հետ մասին գտնվել են Երևանի Սայաթ-Նովա փողոցի «N1» բիլիարդանոցում, որտեղ Էռնեստն իրեն ասել է, որ առավոտյան Անիին ծաղիկ է նվիրել։ Բիլիարդանոցում գտնվելու ընթացքում իր 093-28-58-43 հեռախոսահամարին զանգահարել է Վահագնի ընկեր Գուժ Աղաբեկյանը` իր հիշելով 099-555-000 հեռախոսահամարից և հայտնել է, որ ցանկանում են հանդիպել Էռնեստի հետ։ Քիչ անց ինքն Էռնեստի հետ դուրս է եկել բիլիարդանոցից և այդտեղ տեսել է Գուժի և Վահագնի ընկեր Աշոտի սև գույնի, «Պորշե» մակնիշի, 05 500 պետհամարանիշի ավտոմեքենան, որից իջել են Գուժը, Վահագնը և ևս մի անծանոթ տղա։ Գուժն իրեն հարցրել է, թե Էռնեստին ասել է արդյոք, որ Անին Վահագնի ընկերուհին է։ Իր դրական պատասխանից հետո Գուժն Էռնեստին առաջարկել է առանձնանալ և խոսել։ Այդ տղաները, այդ թվում` Էռնեստը, այդտեղ գտնվող կամարով մտել են շենքերի բակ, ուր մտել է նաև «Պորշե» մակնիշի ավտոմեքենան։ Ինքը ներս չի մտել, քանի որ հեռախոսով խոսելիս է եղել, սակայն երկուսից երեք րոպե անց շենքերի բակից բարձր ձայներ, գոռգոռոցներ է լսել և քայլել է դեպի Էռնեստենց կողմ։ Երբ նրանք հայտնվել են իր տեսադաշտում` տեսել է, որ հինգից վեց տղաներ, որոնց մեջ են եղել նաև Գուժն ու Վահագնը, խառը հարվածում են Էռնեստին։ Այնուհետև այդ տղաները շենքերի բակով շատ արագ փախել են դեպի Աբովյան փողոցի կողմ։ Երբ մոտեցել է Էռնեստին` տեսել է, որ նրա գլխից արյուն է հոսում, վերնաշապիկը նույնպես արյունոտված է եղել։ Այդտեղ տեսել է նաև Վիտյային։ Էռնեստի հետ մտել են այդտեղ գտնվող գեղեցկության սրահ, որտեղ նրան օգնություն են ցույց տվել, որից հետո նա եղբոր հետ միասին հեռացել է։
/հատոր 3, գ.թ. 188-194/
Վկա Խաչիկ Գուրգենի Սարգսյանի նախաքննական ցուցմունքներով այն մասին, որ աշխատում է Երևանի պետական համալսարանում որպես պահպանության ծառայության հերթափոխի պետ։ 2010 թվականի դեկտեմբերի 8-ին, ժամը 16։00-ին ընդունել է հերթապահությունը և հաջորդ օրը, ժամը 08։00-ին հանձնել է այն։ Այդ օրը ԵՊՀ կենսաբանական ֆակուլտետի մասնաշենքի հսկիչն է եղել Նելսոն Ղահրամանյանը։ Հերթապահությունից մի քանի օր անց համալսարանում խոսակցություններ են տարածվել, որ 2010 թվականի դեկտեմբերի 8-ին Չարենց փողոցում ԵՊՀ ուսանողների միջև ինչ-որ միջադեպ է եղել։ Այդ մասին խոսել է Նելսոն Ղահրամանյանի հետ, ով ասել է, որ դեկտեմբերի 8-ին փողոցից գոռգոռոցներ և աղմուկ է լսել և երբ դուրս է եկել մասնաշենքից` այդտեղ հավաքված տղաներն արդեն փախչելիս են եղել։
/հատոր 2, գ.թ. 218-219/
Դատաձգաբանական փորձաքննության 23.12.2010թ. թիվ 2887 եզրակացությամբ, որի համաձայն`
1. Ներկայացված յոթ պարկուճները և մեկ գնդակը «ՊՄ» և «ԱՊՍ» տեսակի ատրճանակների համար նախատեսված գործարանային արտադրության 9մմ տրամաչափի (9x18, ՊՄ) մարտական փամփուշտների բաղկացուցիչ մասեր են` կրակված պարկուճներ և գնդակ։
2. Ներկայացված յոթ պարկուճները և մեկ գնդակը կրակված են թիվ 15112010 քրեական գործով ՀՀ ոստիկանության ՔԳՎ ՀԿԳ քննության վարչությունից ՓՔՎ փորձաքննության ներկայացված և փորձագետի թիվ 2903 եզրակացությամբ հետազոտված առանց համարի «ՊՄ» ատրճանակից։
3. Ներկայացված գնդակը դեպքի վայրից հայտնաբերված պարկուճներից մեկի հետ կազմել է մեկ ամբողջականություն, թե ոչ, հարցին պատասխանել հնարավոր չէ, դրանց վրա բավարար քանակի նույնացման հատկանիշների բացակայության պատճառով։
4. Ներկայացված յոթ պարկուճները և մեկ գնդակը ներկայացված վիճակով ռազմամթերք չեն հանդիսանում, սակայն փամփուշտի կազմում մինչ կրակվելը հանդիսացել են ռազմամթերք։
5. Ներկայացված յոթ պարկուճները և մեկ գնդակը իրենց վրայի կրակման հետքերով համեմատվեցին ՀՀ տարածքում հրազենով կատարված և չբացահայտված հանցագործություններով դեպքի վայրերից առգրավված ու մինչ օրս Հանրապետական գնդակապարկուճադարանում հաշվառված պարկուճների ու գնդակների հետ։ Համեմատության արդյունքում համընկնումներ չհաստատվեցին։
6. Ներկայացված 10 գնդակները հանդիսանում են 4,5մմ տրամաչափի գործարանային արտադրության գնդակներ նախատեսված 4,5մմ տրամաչափի օդաճնշիչ զենքերի համար։ Ներկայացված գնդակները ռազմամթերք չեն հանդիսանում»։
/հատոր 2, գ.թ. 185-187/
Դատաձգաբանական և դատաքիմիական համալիր փորձաքննության 23.12.2010թ. թիվ 2903 եզրակացությամբ, որի համաձայն`
«1. Ներկայացված «ՊՄ» ատրճանակը գործարանային արտադրության 9մմ տրամաչափի «ՊՄ» տեսակի ատրճանակ է, որի ապահովիչը և հարվածիչը բացակայում են։ Հարվածիչի բացակայության պատճառով ատրճանակից կրակոցներ կատարել հնարավոր չէ, այսինքն ատրճանակը ներկայացված վիճակում հրազեն չի հանդիսանում։ Ատրճանակի այն հատվածներում, որտեղ պետք է լինեն գործարանային համարը և արտադրության տարեթիվը, որևէ թվի կամ տառի ուրվագիծ չի հայտնաբերվել։
Ներկայացված ատրճանակի փողում հայտնաբերվեցին կրակոցի հետքեր, կրակոցի վաղեմությանը վերաբերող հարցին հնարավոր չէ պատասխանել` համապատասխան գիտականորեն հիմնավորված մեթոդիկայի բացակայության պատճառով։
2. Ներկայացված առանց համարի «ՊՄ» տեսակի ատրճանակից են կրակված թիվ 15112010 քրեական գործով ՀՀ ոստիկանության Կենտրոնականի քննչական բաժնից 09.12.2010թ. թիվ 7/4-9321 գրությամբ նշանակված դատաձգաբանական փորձաքննությամբ, ՓՔՎ փորձաքննության ներկայացված և փորձագետի թիվ 2887 եզրակացությամբ հետազոտված 9մմ տրամաչափի յոթ պարկուճները և մեկ գնդակը։
3. Ներկայացված «WALTHER CP99 compact» տեսակի ատրճանակը գործարանային արտադրության 4,5մմ տրամաչափի օդաճնշիչ ատրճանակ է, այն պիտանի է նպատակային օգտագործման համար /4.5մմ տրամաչափի գնդակներով կրակելու համար/ և հրազեն չի հանդիսանում։
Կրակոցի վաղեմությանը վերաբերող հարցին հնարավոր չէ պատասխանել` համապատասխան գիտականորեն հիմնավորված մեթոդիկայի բացակայության պատճառով։
4. Թիվ 15112010 քրեական գործով ՀՀ ոստիկանության Կենտրոնականի քննչական բաժնից 09.12.2010թ. թիվ 7/4-9321 գրությամբ նշանակված դատաձգաբանական փորձաքննությամբ ՓՔՎ փորձաքննության ներկայացված և փորձագետի թիվ 2887 եզրակացությամբ հետազոտված 10 հատ 4.5մմ տրամաչափի գնդակները կրակված են ներկայացված «WALTHER CP99 compact» տեսակի ատրճանակից, թե ոչ, հնարավոր չէ պարզել, դրանց վրա անհատականացման համար պիտանի հետքերի բացակայության պատճառով»։
/հատոր 2, գ.թ. 244-246/
Դատաձգաբանական, դատաքիմիական և դատաապրանքագիտական համալիր փորձաքննության 02.02.2011թ. թիվ 2889 եզրակացությամբ, որի համաձայն`
«1. թիվ 15112010 քր. գործով փորձաքննությանը տրամադրված «Պոռշե-Կայեն» մակնիշի 05 ՕԼ 500 պ/հ-ի ավտոմեքենայի հետևի աջ նստատեղից` N33 և N53 վնասվածքներից, փորձագիտական հետազոտության ժամանակ հայտնաբերված երկու հատ պղնձագույն պատյաններով գնդակները, ինչպես նաև ավտոմեքենայի հետևի աջ նստատեղից` N42 վնասվածքից, հայտնաբերված և ՀՀ ոստիկանության ՔԳՎ ՀԿԳ քննության վարչությունից` 26.01.2011թ.-ին թիվ «N7/1-117կգ» գրությամբ ի լրումն ներկայացված մեկ հատ պղնձագույն պատյանով գնդակը հանդիսանում են գործարանային արտադրության 9մմ տրամաչափի (9x18 ՊՄ) ատրճանակային փամփուշտների բաղկացուցիչ մասեր` կրակված գնդակներ, և կրակված են թիվ 15112010 քրեական գործով ՀՀ ոստիկանության ՓՔՎ փորձագետի «N 2903»-10թ. եզրակացությանը ներկայացված առանց համարի «Մակարով» տեսակի ատրճանակի փողից։
2. Փորձաքննությանը տրամադրված «Պոռշե-Կայեն» մակնիշի «05 ՕԼ 500» պ/հ-ի ավտոմեքենայի վրա հայտնաբերված վնասվածքները հանդիսանում են հրազենային-գնդակային բնույթի վնասվածքներ` պատճառված պղինձ պարունակող 9մմ տրամաչափի գնդակների ներգործության հետևանքով` լիցքի լրացուցիչ գործոնների ազդեցության սահմաններից դուրս տարածությունից, որոնցից`
• N1 վնասվածքը` ավտոմեքենայի հետևի աջ կողային դռան դրսային մակերեսի վրա և վերջինիս շարունակությունը կազմող N11 վնավածքը` դռան հակառակ կողմի եզրային հատվածի մետաղական մակերեսի վրա (ուռուցիկ տեղամասով արտահայտված) հանդիսանում են մուտքի կույր հրազենային-գնդակային բնույթի վնասվածքներ` պատճառված աջից ձախ ուղղությամբ` մեկ կրակոցի հետևանքով։
• N2 վնասվածքը` ավտոմեքենայի հետևի աջ կողային դռան դրսային մակերեսի վրա, հանդիսանում է մուտքի միջանցիկ հրազենային-գնդակային բնույթի վնասվածք, իսկ վերջինիս շարունակությունը կազմող N21 վնասվածքը` ավտոմեքենայի հետևի աջ կողային դռան ներսային մետաղական մակերեսի վրա` ելքի միջանցիկ, հրազենային-գնդակային բնույթի վնասվածք` պատճառված աջից ձախ, գրեթե հորիզոնական ուղղությամբ` մեկ կրակոցի հետևանքով։ Նշված վնասվածքի ելքային շարունակությունը ավտոմեքենայի թափքի վրա (դռան հետ փակվող մակերեսի վրա) բացակայում է, ինչը և թույլ է տալիս ենթադրելու, որ ավտոմեքենայի վրայի վերը նշված N21 վնասվածքը առաջանալու պահին, ավտոմեքենայի հետևի աջ կողային դուռը, հավանաբար, եղել է բաց վիճակում, ինչի հետևանքով N21 վնասվածքից դուրս եկած գնդակը ավտոմեքենայի թափքի վրա վնասվածք կամ որևէ հետք չի առաջացրել։
• N3 վնասվածքը` ավտոմեքենայի հետևի աջ կողային դռան դրսային մակերեսի վրա` հանդիսանում է մուտքի միջանցիկ հրազենային-գնդակային բնույթի վնասվածք, որի հնարավոր շարունակություններն են կազմում. N31 վնասվածքը` ավտոմեքենայի հետևի աջ կողային դռան ներսային պաստառի վրա (ելքի միջանցիկ հրազենային վնասվածք), N32 վնասվածքը` հետևի աջ նստարանի աջակողմյան ամրագոտու ժապավենի վրա (մուտքի միջանցիկ հրազենային վնասվածք) և N33 վնասվածքը` հետևի աջ նստարանի թիկնակի աջակողմյան հատվածի վրա (մուտքի կույր հրազենային վնասվածք)` պատճառված աջից ձախ, առջևից հետ, վերևից ներքև ուղղությամբ` մեկ կրակոցի հետևանքով։ Հետազոտության ժամանակ N33 վնասվածքի միջից, փորձագետների կողմից, շոշափումով, պաստառի ներսային մասից հայտնաբերվել և հանվել է մեկ հատ պղնձագույն պատյանով գնդակ։
• N4 վնասվածքը` ավտոմեքենայի հետևի աջ կողային դռան դրսային մակերեսի վրա, հանդիսանում է մուտքի միջանցիկ հրազենային-գնդակային բնույթի վնասվածք, որի հնարավոր շարունակություններն են կազմում. N41 վնասվածքը` դռան ներսային շագանակավուն պաստառի վրա (ելքի միջանցիկ հրազենային վնասվածք), N42 վնասվածքը` հետևի աջ նստարանի թիկնակի ստորին աջակողմյան հատվածում (մուտքի կույր հրազենային վնասվածք)` պատճառված աջից ձախ, առջևից հետ, վերևից ներքև ուղղությամբ` մեկ կրակոցի հետևանքով։ Հետագայում ի լրումն ներկայացվել է նաև նշված տեղամասից հայտնաբերված մեկ հատ պղնձագույն պատյանով գնդակը։
• N5 վնասվածքը` ավտոմեքենայի հետևի աջ կողային դռան դրսային մակերեսի վրա, հանդիսանում է մուտքի միջանցիկ հրազենային-գնդակային բնույթի վնասվածք, որի հնարավոր շարունակություններն են կազմում. N51 վնասվածքը` ավտոմեքենայի հետևի աջ կողային դռան ներսային պաստառի վրա (ելքի միջանցիկ հրազենային վնասվածք), N52 վնասվածքը` հետևի աջ նստարանի նստատեղի աջակողմյան հատվածի (մուտքի միջանցիկ հրազենային վնասվածք) և N53 պատռվածքատիպ վնասվածքը` հետևի աջ նստարանի նստատեղի աջակողմյան հատվածի վրա (հրազենային քսվածքատիպ-շոշափող վնասվածք, որը նույն տեղամասում, պաստառի տակ ավարտվում է մուտքային վնասվածքով)` պատճառված աջից ձախ, առջևից հետ, վերևից ներքև ուղղությամբ` մեկ կրակոցի հետևանքով։ Հետազոտության ժամանակ N53 վնասվածքի միջից, փորձագետների կողմից, շոշափումով, պաստառի ներսային մասից հայտնաբերվել և հանվել է մեկ հատ պղնձագույն պատյանով գնդակ։
• N6 վնասվածքը` հետևի աջ կողային դռան ապակու վրա, և N8 վնասվածքը` առջևի աջ կողային դռան ապակու վրա, հանդիսանում են մուտքի միջանցիկ հրազենային-գնդակային բնույթի վնասվածքներ` պատճառված աջից ձախ ուղղությամբ` մեկ կամ երկու առանձին կրակոցների հետևանքով, որոնք ավտոմեքենայի սրահում շարունակություններ չունեն։
Ծանոթություն-N6 և N8 վնասվածքների առաջացման մեխանիզմը և սրահի ներսում դրանց հնարավոր շարունակությունների բացակայությունը կարելի է բացատրել նրանով, որ նշված վնասվածքներն առաջանալու պահին, ավտոմեքենայի վերը նշված դռները, կրակոցների պահին, հավանաբար գտնվել են. 1) բացված վիճակում, իսկ N6 և N8 վնասվածքները մեկ գնդակի միջանցիկ վնասման հետևանք են, կամ` 2) փակված վիճակում, որի դեպքում վերը նշված դռների վրա առկա մեկական վնասվածքները կարող են հանդիսանալ երկու առանձին կրակոցների ներգործության հետևանք, իսկ ավտոմեքենայի ձախ կողային դռները կրակոցների պահին, գտնվելիս են եղել բացված վիճակում և գնդակները, չվնասելով ավտոմեքենայի սրահը կամ դռները, անարգել դուրս են եկել բացված դռների բաց տարածքով։ Չի բացառվում նաև այն տարբերակը, որ կրակոցի պահին, ավտոմեքենայի կողային դռների ապակիներով դեպի սրահը մուտք գործած գնդակները դիպչեին միայն սրահում գտնվող որևէ շարժական օբյեկտ/ների/ի (այդպիսին, օրինակ, կարող է հանդիսանալ ավտոմեքենայի ներսում գտնվող ուղևորը և այլն) և վերջիններիս վրա առաջացնեին մուտքի կույր հրազենային-գնդակային բնույթի վնասվածքներ։
• N7 քսվածքատիպ կույր վնասվածքը` ավտոմեքենայի առջևի աջ կողային դռան հետին եզրային հատվածի վրա և վերջինիս շարունակությունը կազմող N71 վնասվածքը` հետևի աջ կողային դռան առաջամասում առկա և առջևի աջ կողային դռան հետ եզրավորող (միջակայքում գտնվող) ռետինե շերտի վրա` հանդիսանում են մուտքի կույր հրազենային-գնդակային բնույթի վնասվածքներ` պատճառված աջից ձախ, առջևից հետ, վերևից ներքև ուղղությամբ` մեկ կրակոցի հետևանքով։ Նշված ռետինե շերտի հետազոտությամբ, վերջինիս մեջ կրակված գնդակ չի հայտնաբերվել։
3. Ավտոմեքենայի շարժիչի ծածկոցի մետաղական մակերեսի վրա` դիմապակուն մոտ, առկա խորքային դինամիկ տեսքի քսվածքատիպ վնասվածքները (քերծվածքները) հրազենային չեն և հավանաբար առաջացել են նմանատիպ վնասվածքներ առաջացնող որևէ օտար առարկայի ներգործության հետևանքով։
4. Կրակոցների պահին զենքի փողն` իր դիմային կտրվածով, ուղղված է եղել դեպի ավտոմեքենայի վրա առկա մուտքի միջանցիկ և կույր հրազենային-գնդակային վնասվածքները։
5. Փորձաքննությանը տրամադրված վիճակում վնասվածքների հետևանքով, «Porsche Cayenne-Turbo» մակնիշի 05 ՕԼ 500 պ/h ավտոմեքենայի /գույքի/ վնասի չափի շուկայական արժեքը 09.12.10թ. դրությամբ գործող շուկայական գներով գնահատվում է 3009000 /երեք միլիոն ինը հազար/ դրամ։
/հատոր 3, գ.թ. 62-72/
Փորձագետ Վահագն Սարգսի Իսկանդարյանի ցումունքներով այն մասին, որ հանդիսանում է ՀՀ ոստիկանության ՓՔՎ ապրանքագիտական և տնտեսագիտական հետազոտությունների բաժանմունքի պետը։ Իր կողմից իրականացվել է թիվ 15112010 քրեական գործով նշանակված դատաձգաբանական, դատաքիմիական և դատաապրանքագիտական համալիր փորձաքննության դատաապրանքագիտական մասը և տրվել է թիվ 2889 եզրակացությունը։ Փորձաքննությանը ներկայացված «Պորշե Կայեն Տուրբո» մակնիշի, 05 ՕԼ 500 պետհամարանիշի ավտոմեքենայի հետազոտությամբ պարզվել է, որ դրա վրա առկա վնասվածքների հետևանքով ավտոմեքենայի վնասի չափի շուկայական արժեքը 09.12.2010թ. դրությամբ գործող շուկայական գներով գնահատվում է 3.009.000 ՀՀ դրամ։
Ավտոմեքենայի շարժիչի ծածկոցի մետաղական մակերեսի վրա առկա խորքային դինամիկ տեսքի քսվածքատիպ ոչ հրազենային վնասվածքների վերանորոգման աշխատանքների շուկայական արժեքը կարող է կազմել 30.000 ՀՀ դրամ, իսկ օգտագործվող նյութերի ողջ ծավալի ընդհանուր շուկայական արժեքը կարող է կազմել 12.000 ՀՀ դրամ, այսինքն` շարժիչի ծածկոցի վերանորոգման աշխատանքների և օգտագործվող նյութերի ընդհանուր շուկայական արժեքը կկազմի 42.000 ՀՀ դրամ գումար։ Հետևաբար «Պորշե Կայեն Տուրբո» մակնիշի, 05 ՕԼ 500 պետհամարանիշի ավտոմեքենայի սեփականատիրոջը պատճառված նյութական վնասի չափը` առանց շարժիչի ծածկոցի վնասվածքների, կկազմի 2.967.000 /3.009.000-42.000/ ՀՀ դրամ գումար։
/դատական նիստի արձանագրություն, հատոր 5, գ.թ. 140-141/
Դատակենսաբանական փորձաքննության 25.01.2011թ. թիվ 600 եզրակացությամբ, որի համաձայն`
«1. Փորձաքննությանը ներկայացված Պորշե-Կայեն-Տուրբո» մակնիշի 05 ՕԼ 500 պետհամարանիշի ավտոմեքենայի հետևի ձախ դռան ներսային բռնակից մոտ 15սմ դեպի ձախ գտնվող հատվածում և հետևի աջ նստատեղին` առաջային եզրից մոտավորապես 12-13սմ հեռավորության վրա հայտնաբերված կասկածելի հետքերում հաստատվեց արյան առկայություն, որը պատկանում է մարդու և առաջացել է ըստ արյան ABO իզոշճաբանական համակարգի A խումբ ունեցող որևէ անձից կամ անձանցից։
2. Փորձաքննության ներկայացված «Պորշե-Կայեն-Տուրբո» մակնիշի 05 ՕԼ 500 պետհամարանիշի ավտոմեքենայի հետևի աջ նստատեղի ձախ եզրային կողմնային հետին մասում հայտնաբերված կասկածելի հետքում արյուն չի հայտնաբերվել։
3. Վերը նշված հետքերը կրող առարկաների բնույթը և հետքերի, փոքր չափսերը թույլ չեն տալիս անցնել դրանց առաջացման վաղեմության որոշմանը։
4. Վերը նշված հետքերը «պատկանում են կնոջ, թե տղամարդու» հարցին չեն կարող պատասխանել բաժանմունքում համապատասխան մասնագետ` բջջաբան չլինելու պատճառով։
5. Փորձաքննության ներկայացված «Տոյոտա Պրադո» մակնիշի 88 PL 008 պետհամարանիշի ավտոմեքենայի զննությամբ արյան կասկածելի հետքեր չեն հայտնաբերվել»։
/հատոր 3, գ.թ. 23-25/
Դատակենսաբանական փորձաքննությանն 08.02.2011թ. թիվ 31 եզրակացությամբ, որի համաձայն`
«1. Փորձաքննության ներկայացված Վահագն Գրիգորյանի արյան նմուշն ըստ արյան ABO իզոշճաբանական համակարգի պատկանում է B խմբին։
2. Փորձաքննության ներկայացված Գուժ Աղաբեկյանի, Էռնեստ և Գեորգի Թառոյանների արյան նմուշներն ըստ արյան ABO իզոշճաբանական համակարգի պատկանում են A խմբին։
3. Համաձայն փորձագետի 10.01.2011թ. թիվ 586 եզրակացության «Հետևություններ» բաժնի 2-րդ կետի. «2. Փորձաքննության ներկայացված գլխարկի գագաթային մասից կտրված կտորներում հաստատվեց մարդկային ծագման քրտինքի առկայություն։ Նշված հետքերում կլանման-անջատման ռեակցիայով հաստատվել է A հակածնի առկայություն, որը կարող էր առաջանալ արտադրություններում` մասնավորապես քրտինքում A հակածին պարունակող և արյան A խումբ ունեցող որևէ անձից կամ անձանցից»։ Հետևաբար նշված գլխարկի վրա հայտնաբերված քրտինքը կարող էր առաջանալ ինչպես Գուժ Աղաբեկյանի, այնպես էլ Էռնեստ և Գեորգի Թառոյանների քրտինքի հաշվին, բայց չէր կարող առաջանալ Վահագն Գրիգորյանի քրտինքի հաշվին։
4. Համաձայն փորձագետի 25.01.2011թ. թիվ 600 եզրակացության «Հետևություններ» բաժնի 1-ին կետի. 1. Փորձաքննության ներկայացված «Պորշե-Կայեն-Տուրբո» մակնիշի 05 ՕԼ 500 պետհամարանիշի ավտոմեքենայի հետևի ձախ դռան ներսային բռնակից մոտ 15սմ դեպի ձախ գտնվող հատվածում և հետևի աջ նստատեղին` առաջային եզրից մոտավորապես 12-13սմ հեռավորության վրա հայտնաբերված կասկածելի հետքերում հաստատվեց արյան առկայություն, որը պատկանում է մարդու և առաջացել է ըստ արյան ABO իզոշճաբանական համակարգի A խումբ ունեցող որևէ անձից կամ անձանցից»։ Հետևաբար նշված ավտոմեքենայում հայտնաբերված արյունը կարող էր առաջանալ ինչպես Գուժ Աղաբեկյանի, այնպես էլ Էռնեստ և Գեորգի Թառոյանների արյան հաշվին, բայց չէր կարող առաջանալ Վահագն Գրիգորյանի արյան հաշվին»։
/հատոր 3, գ.թ. 94-95/
Դատակենսաբանական փորձաքննությանն 11.02.2011թ. թիվ 37 եզրակացությամբ, որի համաձայն` «1. Փորձաքննության ներկայացված Էռնեստ Թառոյանի արյան նմուշն ըստ արյան ABO իզոշճաբանական համակարգի պատկանում է A խմբին։
2. Փորձաքննությանը ներկայացված վերնաշապիկի վրա տեղակայված կասկածելի հետքերում հաստատվեց արյան առկայություն, որը պատկանում է մարդու և առաջացել է ըստ արյան ABO իզոշճաբանական համակարգի A խումբ ունեցող որևէ անձից, այդ թվում նաև կարող էր առաջանալ Էռնեստ Թառոյանից։
3. Փորձաքննության ներկայացված վերնաշապիկի վրա տեղակայված արյան հետքերի առաջացման վաղեմությունը որոշվել է ըստ վերը նշված ձեռնարկի` հետքերի վաղեմության որոշման համար մեթոդական նամակ չլինելու պատճառով։ Ձեռնարկում բերված աղյուսակի համաձայն հետքերի առաջացման վաղեմությունը համապատասխանում է մինչև 2 ամսվա ժամկետը»։
/հատոր 3, գ.թ. 91-93/
Դատաբժշկական փորձաքննության 10.02.2011թ. թիվ 3229 եզրակացությամբ, որի համաձայն` «Է. Թառոյանի ստացած մարմնական վնասվածքը` գլխի աջ կողմնային շրջանի սալջարդ վերքի ձևով, հասցվել է բութ առարկայով, հնարավոր է որոշման մեջ նշված ժամկետին, որը պատճառել է առողջությանը թեթև վնաս` առողջության կարճատև քայքայումով, ի նկատի ունենալով վնասվածքի հետ անմիջական պատճառական կապի մեջ եղած հետևանքների տևողությունը ոչ պակաս 6 օրից և ոչ ավելի 21 օրից»։
/հատոր 3, գ.թ. 98-99/
Դատաբժշկական լրացուցիչ փորձաքննության 06.05.2011թ. թիվ 3230 եզրակացությամբ, որի համաձայն` «Գ. Թառոյանի ստացած մարմնական վնասվածքները` աջ դաստակի 5-րդ դաստակային ոսկրի կոտրվածքի, ձախից ճակատային շրջանի վերքի, այժմ սպիի ձևով, պատճառվել են բութ առարկաների ազդեցությամբ, հնարավոր է նշված ժամկետում, որոնք միասին վերցրած պատճառել են առողջությանը միջին ծանրության վնաս, առողջության տևական քայքայումով, նկատի ունենալով վնասվածների հետ անմիջական պատճառական կապի մեջ եղած հետևանքների տևողությունը քսանմեկ օրից ավելի։ Ինչ վերաբերվում է ստացած վնասվածքների ծանրության աստիճաններին առանձին-առանձին վերցրած, ապա ձախից ճակատային շրջանի վերքը` այժմ սպիի ձևով, պատճառվել է սահմանափակ մակերես ունեցող բութ առարկայի ազդեցությամբ, որպիսին կարող է հանդիսանալ նաև օդաճնշիչ ատրճանակից կատարված 4.5մմ տրամաչափի մետաղական գնդակի ազդեցությամբ, որը առողջության թեթև վնասի հատկանիշներ չի պարունակում։ Իսկ աջ դաստակի 5-րդ դաստակային ոսկրի կոտրվածքը կարող էր պատճառվել ինչպես բութ առարկայի անմիջական ազդեցությամբ, այնպես էլ վայր ընկնելու ընթացքում նմանատիպ առարկայի կամ մակերեսին համահարվածվելու հետևանքով, որը պատճառել է առողջությանը միջին ծանրության վնաս` առողջության տևական քայքայումով, նկատի ունենալով վնասվածքների հետ անմիջական պատճառական կապի մեջ եղած հետևանքների տևողությունը քսանմեկ օրից ավելի»։
/հատոր 4, գ.թ. 95-96/
Դատաբժշկական փորձաքննության 02.02.2011թ. թիվ 1840/հ եզրակացությամբ, որի համաձայն` «Քաղ. Գ. Աղաբեկյանի ստացած մարմնական վնասվածքը` ձախ նախաբազկի շրջանի հրազենային գնդակային, միջանցիկ վիրավորման /ծղիկային զարկերակի վնասումով/ ձևով, պատճառվել է հրազենային գնդակային զենքից արձակած կրակոցով, հնարավոր է նշված ժամկետում, որը պատճառել է առողջությանը միջին ծանրության վնաս` առողջության տևական քայքայումով ի նկատի ունենալով վնասվածքների հետ անմիջական պատճառական կապի մեջ եղած հետևանքների տևողությունը։ Ըստ բժշկական փաստաթղթերի հրազենային «մուտքի» անցքը տեղակայված է ձախ նախաբազկի հետին մակերեսին, իսկ «ելքի» անցքը ներսային մակերեսին։ Ըստ բժշկական փաստաթղթերի տվյալների հրազենային «մուտքի» անցքի շուրջը կրակոցի լիցքի լրացուցիչ գործոնների առկայության վերաբերյալ գրառումներ չկան»։
/հատոր 3, գ.թ. 96-97/
Դատաբժշկական փորձաքննության 02.02.2011թ. թիվ 1834հ եզրակացությամբ, որի համաձայն` «Քաղ. Վ. Գրիգորյանի ստացած մարմնական վնասվածքները` ձախ ակնակապճի շրջանի փափուկ հյուսվածքների արյունազեղման, ձախ աչքի ակնագնդի ենթակոնյուկտիվալ արյունազեղման, գլխուղեղի ցնցման, աջ բազկի շրջանի արյունազեղման, աջ ազդրի շրջանի հրազենային գնդակային, միջանցիկ վիրավորման ձևով, պատճառվել են` ձախ ակնակապճի շրջանի փափուկ հյուսվածքների արյունազեղումը, ձախ աչքի ակնագնդի ենթակոնյուկտիվալ արյունազեղումը, գլխուղեղի ցնցումը, աջ բազկի շրջանի արյունազեղումը բութ, կոշտ առարկաների ներգործությամբ, իսկ աջ ազդրի շրջանի հրազենային վնասվածքը` հրազենային գնդակային զենքից արձակված կրակոցով, հնարավոր է նշված ժամկետում, որոնք միասին վերցրած պատճառել են առողջությանը միջին ծանրության վնաս` առողջության տևական քայքայումով ի նկատի ունենալով վնասվածքների հետ անմիջական պատճառական կապի մեջ եղած հետևանքների տևողությունը քսանմեկ օրից ավելի։ Աջ բազկի շրջանի արյունազեղումն առանձին վերցրած առողջությանը թեթև վնասի հատկանիշներ չի պարունակում։ Աջ ազդրի շրջանի հրազենային գնդակային, միջանցիկ վիրավորումը առանձին վերցրած պատճառել է առողջությանը միջին ծանրության վնաս` առողջության տևական քայքայումով։ Իսկ ձախ ակնակապճի շրջանի փափուկ հյուսվածքների արյունազեղումը, ձախ աչքի ակնագնդի ենթակոնյուկտիվալ արյունազեղումը, գլխուղեղի ցնցումը առանձին-առանձին որակավորել հնարավոր չէ, վերջիններս միասին վերցված պատճառել են առողջությանը թեթև վնաս առողջության կարճատև քայքայումով, ի նկատի ունենալով վնասվածքների հետ անմիջական պատճառական կապի մեջ եղած հետևանքների տևողությունը ոչ պակաս վեց օրից և ոչ ավելի քսանմեկ օրից։ Անձնական զննության ժամանակ աջ ազդրի շրջանի վնասվածքները եղել են վիրաբուժական մշակման ենթարկված։ Հրազնեի տեսակի որոշումը չի մտնում դատաբժշկական փորձագետի իրավասության մեջ։ Վնասվածքը ստանալիս Վ. Գրիգորյանը եղել է իր ազդրի դրսային մակերեսով ուղղված դեպի հրազենային զենքի փողի լայնական կտրվածքը։ Ըստ բժշկական փաստաթղթերի տվյալների հրազենային «մուտքի» անցքը տեղակայված է աջ ազդրի դրսային մակերեսին, իսկ «ելքի» անցքը ներսային մակերեսին և վերքային խողովակը ազդրի երկայնական առանցքի նկատմամբ ունի աջից ձախ, ներքևից-վերև և քիչ առջևից-հետ ուղղություն։ Ըստ բժշկական փաստաթղթերի տվյալների հրազենային «մուտքի» անցքի շուրջը կրակոցի լիցքի լրացուցիչ գործոնների առկայության վերաբերյալ գրառումներ չկան»։
/հատոր 3, գ.թ. 136-137/
Դատաձգաբանական և դատաքիմիական համալիր փորձաքննության 20.04.2011թ. թիվ 135 եզրակացությամբ, որի համաձայն`
«1. Թիվ 15112010 քր. գործով փորձաքննությանը ներկայացված հագուստներից, մասնավորապես` Գ.Աղաբեկյանի և Վ.Գրիգորյանի փորձաքննությանը ներկայացված հագուստների վրա հայտնաբերված վնասվածքները հանդիսանում են հրազենային-գնդակային բնույթի միջանցիկ վնասվածքներ` պատճառված պղինձ պարունակող հավանաբար 9մմ տրամաչափի գնդակների ներգործության հետևանքով` լիցքի լրացուցիչ գործոնների ազդեցության սահմաններից դուրս տարածությունից կամ արգելաշերտի միջոցով, որոնցից`
• Գ.Աղաբեկյանի փորձաքննությանը ներկայացված կաշվե բաճկոնի ձախ թևքի ստորին հատվածում հայտնաբերված N1 վնասվածքը և երկարաթև սվիտերի ձախ թևի ստորին հատվածում հայտնաբերված N11 վնասվածքը հանդիսանում են մուտքի միջանցիկ հրազենային-գնդակային բնույթի վնասվածքներ, իսկ դրանց շարունակությունները կազմող` N12 վնասվածքը երկարաթև սվիտերի ձախ թևքի ստորին հատվածում և N13 վնասվածքը կաշվե բաճկոնի ձախ թևքի ստորին հատվածում` ելքի միջանցիկ հրազենային-գնդակային բնույթի վնասվածքներ` պատճառված մեկ կրակոցի արդյունքում։
• Վ.Գրիգորյանի փորձաքննությանը ներկայացված անդրավարտիքի աջ փողքի հետևամասում հայտնաբերված N1 վնասվածքը հանդիսանում է մուտքի միջանցիկ հրազենային-գնդակային բնույթի վնասվածք, որի շարունակությունն է կազմում` անդրավարտիքի նույն աջ փողքի հետևամասում հայտնաբերված ելքի N11 հրազենային-գնդակային բնույթի միջանցիկ վնասվածքը` պատճառված աջից ձախ, ներքևից վերև ուղղությամբ` մեկ կրակոցի հետևանքով։ Անդրավարտիքի ձախ փողքի հետևամասում հայտնաբերված N12 և N13 վնասվածքները նույնպես հանդիսանում են միմյանց շարունակությունը կազմող հրազենային-գնդակային բնույթի միջանցիկ վնասվածքներ, որոնք` մուտք-ելք շարունակական մեխանիզմով, կարող են հանդիսանալ անդրավարտիքի աջ փողքի հետևամասում հայտնաբերված N1 և N11 վնասվածքների հնարավոր շարունակությունները։ Նշված վնասվածքները պատճառած գնդակը` համաձայն դատաբժշկական «Թիվ 1834/հ»-10թ. եզրակացության տվյալների, վնասել է միայն տուժողի աջ ազդրը, իսկ ձախ ազդրի շրջանում վնասվածքներ չկան։ Չի բացառվում, որ անդրավարտիքի ձախ փողքի հետևամասում հայտնաբերված երկու միջանցիկ վնասվածքները հանդիսանան ոչ թե անդրավարտիքի աջ փողքի հետևամասը վնասած գնդակի, այլ առանձին կրակոցի արդյունքում արձակված գնդակի ներգործության հետևանք։
2. Կրակոցների պահին Գ.Աղաբեկյանը և Վ.Գրիգորյանն` իրենց հագին եղած վերը նշված հագուստների վրա առկա մուտքի միջանցիկ հրազենային-գնդակային վնասվածքների մասով, ուղղված են եղել դեպի կրակող զենքի փողի դիմային կտրվածքը։ Նշված անձանց հագուստների վրա հայտնաբերված վնասվածքները կարող էին պատճառված լինել ՀՀ ոստիկանության ՓՔՎ փորձագետի թիվ «N2887»10թ. և «N2889»-10թ. եզրակացություններին ներկայացված 9մմ տրամաչափի գնդակներով։
3. Է. Թառոյանի, Ա. Թառոյանի, Գ. Թառոյանի, Է. Շախիկյանի և Ա. Մանուկյանի փորձաքննությանը ներկայացված հագուստների վրա հրազենային բնույթի կամ այլ առարկաների արտաքին ներգործության հետևանքով առաջացած և քրեագիտական հետազոտության օբյեկտ հանդիսացող վնասվածքներ` չեն հայտնաբերվել։
4. Է. Թառոյանի, Ա. Թառոյանի, Է. Շախիկյանի, Գ. Թառոյանի և Ա. Մանուկյանի փորձաքննությանը ներկայացված հագուստների մակերեսներին կրակոցի արգասիքներ չհայտնաբերվեցին։ Գ. Աղաբեկյանի և Վ. Գրիգորյանի հագուստների վրա հրազենային վնասվածքների առկայության պատճառով, դրանց վրա անտիմոնի մետաղացման հետքեր չեն հետազոտվել, քանի որ նշված հագուստների վրա արդեն իսկ առկա են կրակոցի արգասիքներ։»։
/հատոր 3, գ.թ. 240-248/
Դեպքի վայրի զննության մասին 09.12.2010թ. և դեպքի վայրի լրացուցիչ զննության մասին 25.06.2011թ. արձանագրություններով, որոնց համաձայն` Երևանի պետական համալսարանի կենսաբանական ֆակուլտետի մասնաշենքը գտնվում է Երևան քաղաքի Չարենցի փողոցի թիվ 8 հասցեում։ Մասնաշենքի կենտրոնական մուտքը Չարենցի փողոցի կողմից է։ Մասնաշենքի դիմաց երկկողմանի երթևեկության ճանապարհ է, որի մյուս կողմում` մասնաշենքի դիմաց, Չարենցի թիվ 9 հասցեում գտնվում է բազմահարկ, բազմաբնակարան շենք, որի 1-ին հարկում գտնվում են «Միդնայթ» սրճարանը, «Լանդշաֆտ» և «Սաունաներ, լողավազաններ» խանութները։ Դրանից քիչ վերև` Չարենցի թիվ 7 հասցեում գտնվում է բազմահարկ, բազմաբնակարան շենք, որի առաջին հարկում գտնվում է «Կերամիկա» խանութը։ Կենսաբանական ֆակուլտետի մասնաշենքի ձախ վերջնամասից աստիճաններ են իջնում դեպի ԵՊՀ իրավագիտության ֆակուլտետի մասնաշենք և գրադարան։ Մասնաշենքի և ճանապարհի միջև ընկած հատվածում մայթն է, որը մասնաշենքի մուտքի դիմացի հատվածում ունի 6x25մ չափսեր, դրանից վերև և ներքև մայթը նեղանում է։
Կենսաբանական ֆակուլտետի մասնաշենքի դիմացի մայթի և ճանապարհի բանուկ հատվածի վրայից հայտնաբերվել և առգրավվել են թվով 7 հատ, 9 մմ տրամաչափի կրակված պարկուճներ, մեկ հատ կրակված գնդակ, 10 հատ մետաղյա կոտորակներ։
/հատոր 1, գ.թ. 4-20, հատոր 4, գ.թ. 180-185/
Էռնեստ Թառոյանի մասնակցությամբ կատարված դեպքի վայրի զննության մասին 28.06.2011թ. արձանագրությամբ, որի համաձայն` Երևանի Սայաթ-Նովա փողոցի թիվ 4 հասցեում գտնվող շենքի առաջին հարկում` փողոցի կողմից աջ կողմում գտնվում է «Տիկնիկային թատրոնը», որից ձախ` թիվ 100 տարածքում գտնվում է «N1» բիլիարդանոցը, որտեղ ըստ Էռնեստ Թառոյանի հայտարարության` 2010 թվականի դեկտեմբերի 8-ին գտնվել է իր ընկերների հետ։ Գուժ Աղաբեկյանի և Վահագն Գրիգորյանի հետ այդ օրը հանդիպել են նշված բիլիարդանոցի մոտ, որտեղից կամարով մտել են շենքի բակ և այնտեղ վերը նշված անձինք ծեծի են ենթարկել իրեն։ Բիլիարդանոցի անմիջապես ձախ կողմում գտնվում է «Ինտեր օպտիկ» խանութը, որից ձախ` Սայաթ-Նովա թիվ 4 և 6 շենքների միջև գտնվում է դեպի նշված շենքերի բակ տանող կամարը։ Սայաթ-Նովա փողոցի թիվ 6 շենքի դիմաց, 30x40մ չափերի խաղահրապարակ է։ Նշված շենքին ուղղահայաց, դրա վերջնամասից սկսվում է Աբովյան փողոցի թիվ 13 շենքը, որը ձգվում է խաղահրապարակի ամբողջ երկայնքով։ Խաղահարապարակի չորս կողմերում ճանապարհ է։ Վերը նշված կամարի մուտքից ուղիղ դեպի ներքև առկա է 70մ երկարությամբ ասֆալտապատ ճանապարհ, որը ձգվում է խաղահրապարակի աջ կողմով։ Էռնեստ Թառոյանը կամարի մոտից մատնացույց է արել վերը նշված ճանապարհը, ապա նշված ճանապարհի` կամարից 50 մետր հեռավորության վրա գտնվող հատվածի աջ կողմում գտնվող քարե շինությունը, որի դռան վրա առկա է էլեկտրական հոսանք բնորոշող նշան և հայտարարել է, որ նշված շինության դիմաց են Վահագն Գրիգորյանը և Գուժ Աղաբեկյանը 2010 թվականի դեկտեմբերի 8-ին ծեծել իրեն։ Այնուհետև Է. Թառոյանը մատնացույց է արել նշված շինության հետևի մասում` դրանից 15մ հեռավորության վրա գտնվող, Երևանի Աբովյան փողոցի թիվ 5 հասցեի բազմահարկ բնակելի շենքի առաջին հարկում գտնվող «Ժասմին» գեղեցկության սրահը և հայտարարել է, որ վնասվածքը ստանալուց հետո այդտեղ է լվացվել։ Վերը նշված շինության դիմաց` ճանապարհի մյուս կողմում դրված են աղբամաններ, որոնցից 12 մետր դեպի ներքև առկա է կոշիկի վերանորոգման կրպակ։ Այն գտնվում է գեղեցկության սրահի դիմաց։ Նշված ճանապարհի վերջամասում առկա է ավտոլվացման գործող կետ, որի դիմաց ճանապարհը թեքվում է դեպի ձախ և շարունակվում է դեպի Երևանի Աբովյան փողոցի թիվ 13 շենքի տակ գտնվող կամարը, որտեղով էլ դուրս է գալիս դեպի Աբովյան փողոց։
/հատոր 4, գ.թ. 192-204/
Վիկտոր Կարապետյանի մասնակցությամբ կատարված դեպքի վայրի զննության մասին 28.06.2011թ. արձանագրությամբ, որի համաձայն` Վիկտոր Կարապետյանը Երևանի Սայաթ-Նովա փողոցի թիվ 4 և 6 շենքերի մեջտեղում գտնվող կամարի մոտից մատնացույց է արել Երևանի Սայաթ-Նովա փողոցի թիվ 6 շենքի վերջամասում` առաջին հարկում գտնվող բնակարանի շագանակագույն պատուհանները և հայտարարել է, որ բնակվում է նշված բնակարանում։ Այնուհետև նույն կամարի մոտից մատնացույց է արել ուղիղ դեպի ներքև` դեպի «Ժասմին» գեղեցկության սրահ տանող ճանապարհի մեջտեղի հատվածը և հայտարարել է, որ 2010 թվականի դեկտեմբերի 8-ին, երբ տանից դուրս է եկել, նշված վայրում տեսել է Էռնեստ Թառոյանին և ևս մի տղայի, որին նախքան այդ վերջինիս հետ տեսել է բիլիարդանոցում, իսկ նրանց կողքից փախչելիս տեսել է երեք անծանոթ տղաների։ Վիկտոր Կարապետյանի կողմից մատնացույց արված ճանապարհի ձախ կողմում առկա է խաղահրապարակ, իսկ կամարից 50 մետր դեպի ներքև` աջ կողմում առկա է քարե շինություն, որի դռան վրա առկա է էլեկտրական հոսանք բնորոշող նշան։ Նշված շինության դիմաց աղբամաններ են, իսկ հետևի կողմում` «Ժասմին» գեղեցկության սրահը, որի դիմաց կոշիկի վերանորոգման կրպակ է։ Վիկտոր Կարապետյանը մատնացույց է արել ճանապարհի` Էլեկտրական հոսանքի մատակարարման շինության և աղբամանների միջև գտնվող հատվածը և հայտարարել է, որ Էռնեստ Թառոյանին և նրա հետ եղած տղային այդ վայրում է տեսել կանգնած, իսկ փախչող տղաներին տեսել է նրանցից ներքև` դեպի Աբովյան փողոց փախչելիս։ Վ.Կարապետյանի մատնացույց արած ճանապարհի վերջնամասից դեպի ձախ` Երևանի Աբովյան փողոցի թիվ 13 շենքի ներքևի մասում գտնվող կամարից ելք է դեպի Աբովյան փողոց։
/հատոր 4, գ.թ. 206-210/
Ավտոմեքենայի զննում կատարելու վերաբերյալ 09.12.2010թ. արձանագրությամբ, որի համաձայն` «Պորշե-Կայեն-Տուրբո» մակնիշի, 05 ՕԼ 500 պետհամարանիշի ավտոմեքենայի աջակողմյան առջևի դռան ապակու միջնամասում առկա է մեկ հատ միջանցիկ վնասվածք, իսկ նույն դռան բռնակից շուրջ 25սմ դեպի ներքև առկա է մետաղի գունաթափված տեղամաս։ Աջակողմյան հետևի դռան միջնամասում` ոտնակից շուրջ 56սմ դեպի վերև, առկա է միջանցիկ վնասվածք, որից 30սմ դեպի աջ և քիչ վերև առկա է ևս մեկ միջանցիկ վնասվածք։ Նշված դռան բռնակից շուրջ 30սմ դեպի ներքև` անվաթևի վրա, առկա է մեկ միջանցիկ վնասվածք, իսկ բռնակից շուրջ 10սմ դեպի դռան միջնամասը և շուրջ 2սմ դեպի վերև առկա է ևս մեկ միջանցիկ վնասվածք։ Նշված դռան ապակին վնասված վիճակում է, դրա ստորին հատվածում, դռան հետ միացման հատվածից շուրջ 2սմ դեպի վերև առկա է ևս մեկ միջանցիկ վնասվածք։
/հատոր 1, գ.թ. 27/
«Մակարով» տեսակի ատրճանակ ներկայացնելու և զննելու մասին 09.12.2010թ. արձանագրությամբ, որի համաձայն` Էդգար Շախիկյանի հայր Մովսես Հակոբի Շախիկյանը 2010 թվականի դեկտեմբերի 9-ին ներկայացրել է դատարկ փամփշտատուփով, առանց գործարանային համարի և ապահովող սարքի «Մակարով» տեսակի ատրճանակ և հայտարարել է, որ այն, նույն օրը, ժամը 12.30-ի սահմաններում գտել է Երևանի Բագրատունյաց փողոցի թիվ 33 շենքի մոտից։ Այդտեղ ատրճանակ լինելու մասին իրեն ասել է որդին` Էդգար Շախիկյանը։
/հատոր 1, գ.թ. 63/
«Վալտեր» տեսակի ատրճանակը և Գուժ Աղաբեկյանի անձնագիրը ներկայացնելու և զննելու մասին 09.12.2010թ. արձանագրությամբ, որի համաձայն` Գուժ Աղաբեկյանի եղբայր Գագիկ Աղաբեկյանը, 2010 թվականի դեկտեմբերի 9-ին ներկայացրել է «Վալտեր ՍՊ99 քոմպակտ» տեսակի ատրճանակ, որի փամփշտատուփը և փողը զննման պահին եղել են դատարկ վիճակում։ Գագիկ Աղաբեկյանը հայտարարել է, որ նշված ատրճանակն օրինական կարգով պատկանում է եղբորը` Գուժ Աղաբեկյանին։ Գագիկ Աղաբեկյանը ներկայացրել է նաև Գուժ Աղաբեկյանի AH0495133 անձնագիրը։
/հատոր 1, գ.թ. 67/
Առգրավում և զննում կատարելու մասին 21.01.2011թ. արձանագրությամբ, որի համաձայն` «Պորշե-Կայեն-Տուրբո» մակնիշի, 05 ՕԼ 500 պետհամարանիշի ավտոմեքենայի սրահի հետևի նստատեղի թիկնակի դիմային ստորին հատվածի պաստառի շրջանաձև պատռվածքից` սպունգի միջից հայտնաբերվել և առգրավվել է պղնձագույն, 1.2սմx9մմ չափերի, փամփուշտի դեֆորմացված գնդակի նման մետաղական իր։
/հատոր 2, գ.թ. 231-232/
Առգրավում և զննում կատարելու մասին 21.01.2011թ. արձանագրությամբ, որի համաձայն` Գուժ Աղաբեկյանի եղբայր Գագիկ Աղաբեկյանից առգրավվել են սև կաշվե բաճկոն, մոխրագույն սվիտեր։ Վերջինս հայտարարել է, որ նշված հագուստները 2010 թվականի դեկտեմբերի 8-ին Երևանի Չարենց փողոցում տեղի ունեցած դեպքի ժամանակ եղել են եղբոր` Գուժ Աղաբեկյանի հագին։ Սև գույնի բաճկոնի զննմամբ պարզվել է, որ դրա օձիքի ներքևի հատվածի պիտակի վրա առկա է «Վաշերոն Կոնստանտին» /«VACHERON CONSTANTIN»/ գրառումը։ Բաճկոնի ձախ թևի ստորին եզրից շուրջ 6.5սմ դեպի վերև և միջնակարից շուրջ 3սմ դեպի ձախ առկա է շուրջ 2.5x4.5սմ չափերի պատռվածք։ Նմանատիպ պատռվածք առկա է նաև թևի նույն հատվածում առկա ներքին պաստառի վրա։ Վերը նշված միջնակարից շուրջ 10սմ վերև գտնվող հատվածում կարը շուրջ 2սմ քանդված է։ Նույն թևի ստորին մասից շուրջ 6.5սմ դեպի վերև և առաջին վնասվածքի ձախ եզրից շուրջ 2.5սմ ձախ առկա է ևս մեկ վնասվածք` 0.5x1սմ չափերի։ Նշված հատվածում` պաստառի վրա վնասվածք չի հայտնաբերվել։ Նշված վնասվածքների շրջակայքում առկա են գորշ գույնի արնանման հետքեր։ Նույն հատվածում կաշին փոքր ինչ կոշտացած է։ Բաճկոնի մեջտեղի հատվածում առկա շղթայի ձախ հատվածի վրա` ներքևից 156սմ դեպի վերև, շղթայի երկու ատամիկները բացակայում են։ Բացակայում է նաև շղթայի սեղմնակի վրա առկա բռնակը։ Սվիտերի զննմամբ պարզվել է, որ դրա օձիքի պիտակի վրա առկա է «Այս Բերգ» /«ICE BERG»/ գրառումը։ Սվիտերի ձախ թևի վրա` ներքևից շուրջ 8.5սմ դեպի վերև` միջնակարից շուրջ 1սմ դեպի աջ առկա է շուրջ 0.5սմ տրամագծով վնասվածք։ Նույն թևի վրա` ներքևից 6սմ դեպի վերև և միջնակարից 6սմ դեպի ձախ առկա է շուրջ 1սմ երկարության վնասվածք։
/հատոր 2, գ.թ. 236-237/
Հագուստներ ներկայացնելու մասին 09.12.2010թ. արձանագրությամբ, որի համաձայն` Վահագն Գրիգորյանի հայր Մուշեղ Գրիգորյանը ներկայացրել է «Բալման» ֆիրմայի մեկ հատ շագանակագույն տաբատ, որի հետին աջակողմյան հատվածում հայտնաբերվել են արնանման հետքեր և կտրվածք։ Մ.Գրիգորյանը հայտարարել է, որ երբ 2010 թվականի դեկտեմբերի 8-ին իր որդի Վահագն Գրիգորյանը ոտքի շրջանում վնասվածք ստացած և դեմքը կապտած վիճակում տուն է մտել, նշված տաբատը եղել է նրա հագին։
/հատոր 1, գ.թ. 31/
Առգրավում և զննում կատարելու մասին 09.12.2010թ. արձանագրությամբ, որի համաձայն` Էռնեստ Թառոյանից առգրավվել է սպիտակ վերնաշապիկ, որի վրա հորիզոնական և ուղղահայաց կարմիր, բարակ կետագծերով ձևավորվում են վանդակներ։ Վերնաշապիկի օձիքի հետևի պիտակի վրա առկա են «Սանտինո, Պունտո Մոդա, Մեյդ ին Իթալի» /«Santino, Punto Moda, Made in Itali»/ գրառումները։ Վերնաշապիկն առջևի մասում կոճկվում է կոճակներով, որոնցից վերևից 3-րդ, 5-րդ, 6-րդ և 7-րդ կոճակների համար նախատեսված անցքերի վերին եզրերը շուրջ 0.5սմ չափով պատռված են, իսկ 3-րդ, 4-րդ և 6-րդ կոճակները բացակայում են, դրանց տեղում առկա են սպիտակ թելի մնացորդներ։ Վերնաշապիկի օձիքի աջ եզրային հատվածից սկսած առկա են կարմրադարչնագույն արնանման նյութի հետքեր, որոնք ծավալվում են օձիքից դեպի ներքև` կոճակների և աջ ուսագոտու ուղղությամբ, որոնց խտությունը նոսրանում է վերից վար և նույն ուղղությամբ հետքերը բարակում են։ Արնանման նմանատիպ կետիկավոր հետքեր են առկա նաև վերնաշապիկի մեջտեղի և ձախ թևքի հատվածներում։
Էռնեստ Թառոյանը հայտարարել է, որ նշված վերնաշապիկն իր հագին է եղել 2010 թվականի դեկտեմբերի 8-ին Երևանի Սայաթ-Նովա և Չարենց փողոցներում տեղի ունեցած դեպքերի ժամանակ։ Դրա վրայի արնանման հետքերն իր արյունն է, որը հոսել է Երևանի Սայաթ-Նովա փողոցում իրեն ծեծի ենթարկելիս գլխի շրջանում առաջացած վերքից։
/հատոր 1, գ.թ. 99-100/
Փաստաթղթի զննման մասին 03.08.2011թ. արձանագրությամբ, որի համաձայն` Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 24.12.2010թ. որոշման հիման վրա «Ղ-Տելեկոմ» ՓԲ ընկերությունից 2011 թվականի մայիսի 23-ին ստացված 23.05.2011թ. Ref.No SU/5675-1/230511/5510 գրությանը կից ուղարկված վերծանումների զննմամբ պարզվել է, որ փաստաթղթի հարցվող հեռախոսահամարների մուտքային հեռախոսազանգերի հատվածի 1-ին էջի վերին հատվածում առկա են հետևյալ գրառումները` «Վիվասելի 98000150, 93444455, 93444144, 77000555, 94787077, 98800400, 77042323, 93285843, 98000650, 77042323, 98000350 հեռախոսահամարից կայացած ՀԽ - Մուտքային»։ Փաստաթղթի յուրաքանչյուր էջը բաղկացած է հետևյալ սյունակներից`

VivaCell GSM No. Cell ID Region Address Ձև Քաղաքի կոդ Քաղաքի անվանում Հեռախոսահամար Ամսաթիվ օօ.աա.տա Ժամ ժժ.րր.վվ Տևող.

Յուրաքանչյուր սյունակի տակ առկա են դրա վերաբերյալ տեղեկություններ։
Մուտքային հեռախոսազանգերի հատվածի 2-րդ էջում 093285843 /Րաֆֆի Հարությունյան/ հեռախոսահամարի վերաբերյալ համապատասխան սյունակներում առկա գրառումների համաձայն` 093285843 հեռախոսահամարը 08.12.2010թ. ժամը 16։42-ին մուտքային հեռախոսազանգ է ստացել 099555000 /Աշոտ Մանուկյան/ հեռախոսահամարից։ Հեռախոսազանգը տևել է 0.20 վայրկյան, իսկ ժամը 17։00-ին, 17։03-ին, 17։48-ին և 17։51-ին` 098041166 /Գուժ Աղաբեկյան/ հեռախոսահամարից։ Հեռախոսազանգերը տևել են համապատասխանաբար` 0.10; 0.05; 1.18 և 0.30 վայրկյան։
Մուտքային հեռախոսազանգերի հատվածի 6-րդ էջում 098000150 /Էռնեստ Թառոյան/ հեռախոսահամարի վերաբերյալ համապատասխան սյունակներում առկա գրառումների համաձայն` 098000150 հեռախոսահամարը 08.12.2010թ., ժամը 17։05-ին մուտքային հեռախոսազանգ է ստացել 093444144 /Գեորգի Թառոյան/ հեռախոսահամարից։ Հեռախոսազանգը տևել է 0.45 վայրկյան։
Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 19.05.2011թ. որոշման հիման վրա «ԱրմենՏել» ՓԲ ընկերությունից 2011 թվականի հունիսի 1-ին ստացված 30.05.2011թ. ԱԾ 00/ 1629 - գրությանը կից ուղարկված վերծանումների զննմամբ պարզվել է, որ փաստաթղթի` 091616116 /Րաֆֆի Հարությունյան/ հեռախոսահամարի վերաբերյալ հատվածում` 1-ին էջի վերին հատվածում առկա են հետևյալ գրառումները` «Հարությունյան Լիանա, ք.Երևան Քանաքեռ 4փ 1նրբ փ.1»։ Դրանից ներքև` «Վերծանում ըստ Cell_տվյալների» գրառումները, որից ներքև առկա են թվով 8 սյունակներ`

Ձև Կանչող հեռախոս Կանչվող հեռախոս Ամսաթիվ օօ.աա.տա Տևողություն Cell Id Cell անվանում Կայանի տեղակայման հասցե

Յուրաքանչյուր սյունակի տակ առկա են դրա վերաբերյալ տեղեկություններ։
1-ին և 2-րդ էջերում 091616116 /Րաֆֆի Հարությունյան/ հեռախոսահամարի վերաբերյալ համապատասխան սյունակներում առկա գրառումների համաձայն` 091616116 հեռախոսահամարից 08.12.2010թ., ժամը 16։47-ին ելքային հեռախոսազանգ է կատարվել դեպի 099555000 /Աշոտ Մանուկյան/ հեռախոսահամարը։ Հեռախոսազանգը տևել է 0.09 վայրկյան։ Ժամը 16։50-ին, 19։34-ին և 19։45-ին ելքային հեռախոսազանգեր են կատարվել դեպի 099111198 /Գուժ Աղաբեկյան/ հեռախոսահամարը։ Հեռախոսազանգերը համապատասխանաբար տևել են 0.38; 0.13; 0.53 վայրկյան, իսկ ժամը 18։40-ին ելքային հեռախոսազանգ է կատարվել դեպի 098000150 /Էռնեստ Թառոյան/ հեռախոսահամարը։ Հեռախոսազանգը տևել է 0.09 վայրկյան։
/հատոր 5, գ.թ. 94-95/
Իրեղեն ապացույց ճանաչված, «Պորշե-Կայեն-Տուրբո» մակնիշի, 05 ՕԼ 500 պետհամարանիշի ավտոմեքենայով, դեպքի վայրից հայտնաբերված յոթ կրակված պարկուճներով, մեկ գնդակով, տաս մետաղական գնդաձև կոտորակներով, «Պորշե-Կայեն-Տուրբո» մակնիշի, 05 ՕԼ 500 պետհամարանիշի ավտոմեքենայի սրահի հետևի նստատեղի պաստառի միջից հայտնաբերված երեք գնդակներով, «ՊՄ» տեսակի առանց համարի ատրճանակով, «Վալտեր ՍՊ99 քոմպակտ» տեսակի օդաճնշիչ ատրճանակով, Գուժ Աղաբեկյանի, Վահագն Գրիգորյանի, Էռնեստ Թառոյանի հագուստներով։
/հատոր 2, գ.թ. 191, հատոր 5, գ.թ. 184-185/
Պաշտպանության կողմի միջնորդությամբ դատարանում որպես վկա հարցաքննված ներքոհիշյալ անձինք հայտնեցին հետևյալը.
Վկա Արման Գառնիկի Հարությունյանը ցուցմունք տվեց այն մասին, որ 2010թ. դեկտեմբերի սկզբին հրավիրված է եղել իր համակուրսեցի Արսենի ծննդյան տարեդարձին, որին հրավիրված են եղել նաև իր համակուրսեցիներ Նշանը և Գուժը։ Պայմանավորվել են, որ ինքը պետք է տաքսի ավտոմեքենայով գնա Նշանի հետևից, որից հետո Երևանի պետական համալսարանի մոտից պետք է նաև Գուժին վերցնեին։ Երևանի Չարենց փողոցով երթևեկելիս` համալսարանի մոտ նկատել են Գուժին, Վահագնին, Աշոտին և ևս մի քանի տղաների, որոնց չի ճանաչում։ Տեսել է նաև տասից քսան տղաների, որոնք եկել են Գուժենց ուղղությամբ։ Գուժի ձեռքին որևէ առարկա չի տեսել, իսկ նրանց մոտեցող տղաների ձեռքին փայտյա ձողեր են եղել։ Շրջադարձ կատարելու ժամանակ կրակոցներ են լսել, որի պատճառով շրջադարձ չեն կատարել և շարունակել են ճանապարհը։ Այնուհետև Նշանին տարել է տուն, որից հետո ինքը նույնպես տուն է գնացել։ Գուժին չի մոտեցել, քանի որ վախեցել է։ Դեպքից մի քանի օր հետո իմացել է, որ Գուժին ձեռքի հրազենային վնասվածքով տեղափոխել են հիվանդանոց, իսկ դեպքի մանրամասների մասին տեղեկություն չունի։ Ինքն անձնական օգտագործման ավտոմեքենա չունի, սակայն երբեմն վարում է իրենց ընտանիքին պատկանող ավտոմեքենան։
/դատական նիստի արձանագրություն/
Վկա Նշան Մարսելի Մաթևոսյանը ցուցմունք տվեց այն մասին, որ 2010թ. դեկտեմբերի սկզբին ինքը, Գուժը և Արմանը հրավիրված են եղել իրենց համակուրսեցի Արսենի ծննդյան տարեդարձին։ Պայմանավորվել են, որ Արմանը տաքսի ավտոմեքենայով պետք է գնար իր հետևից, որից հետո Երևանի Չարենց փողոցից պետք է վերցնեին նաև Գուժին։ Երբ մոտեցել են, որպեսզի Գուժին վերցնեն` նկատել են շուրջ քսան տղաների, որոնց ձեռքին փայտյա ձողեր են եղել և նրանք շարժվել են դեպի Գուժենց կողմ։ Գուժի հետ կանգնած տեսել է նաև Վահագնին և Աշոտին։ Գուժի ձեռքին որևէ առարկա չի նկատել։ Տաքսու վարորդին խնդրել է կանգնեցնել ավտոմեքենան և երբ վարորդը ճանապարհի երրորդ շարքից վերադասավորվել է դեպի առաջին շարք` կրակոցներ են լսել, որից հետո վարորդին խնդրել են շարունակել ճանապարհը։ Դրանից հետո ինքը գնացել է տուն։ Ինքն անձնական օգտագործման ավտոմեքենա չունի։ Դեպքից հետո տեղեկացել է, որ վիճաբանությունը տեղի է ունեցել աղջկա պատճառով, իսկ Գուժին ձեռքի վնասվածքով տեղափոխել են հիվանդանոց։ Մանրամասների մասին տեղեկություն չունի, քանի որ այլևս չի շփվում Գուժի հետ։
/դատական նիստի արձանագրություն/
Վկա Գրիգոր Էմիլի Պետոյանը ցուցմունք տվեց այն մասին, որ աշխատում է Տիկնիկային թատրոնում որպես պահակ։ Իր աշխատանքը հերթափոխով է, որի ժամանակ փողոցում չի լինում, նստում է աշխատասենյակում։ Չի կարող հիշել, թե 2010թ. դեկտեմբերի 08-ին աշխատանքի եղել է, թե ոչ, սակայն աշխատանքի գրանցամատյանում նշված է, որ եղել է։ Դեպքի մասին տեղեկացել է քննիչից և վերջինս իրեն հայտնել է, որ դեպքը տեղի է ունեցել Երևանի Սայաթ-Նովա փողոցի վրա, իսկ իր աշխատասենյակը շենքի հակառակ կողմում է և պատուհանները նայում են դեպի Տիկնիկային թատրոնի բակ, հետևաբար ինքը չէր կարող որևէ բան նկատել։ Աշխատավայրի պատուհանները եվրոպական արտադրության են, ուստի ձայնամեկուսիչ են։ Աշխատասենյակում ունի հեռուստացույց, որը հիմնականում միացված է լինում։
/դատական նիստի արձանագրություն/
Վկա Արմինե Ալբերտի Սարգսյանը ցուցմունք տվեց այն մասին, որ աշխատում է Երևանի Սայաթ-Նովա փողոցում գտնվող «Ինտեր օպտիկ» խանութում որպես վաճառողուհի։ Աշխատում է ժամը 10.00-ից մինչև 20.00-ը։ Կոնկրետ չի կարող ասել, հավանաբար 2010թ. դեկտեմբերին աշխատանքի եղել է և որևէ արտառոց բան` վիճաբանության ձայներ կամ հայհոյանքներ չի լսել, ուստի դեպքի մասին ոչինչ ասել չի կարող։
/դատական նիստի արձանագրություն/
Վկա Սերգեյ Ռուբենի Քոչարյանը ցուցմունք տվեց այն մասին, որ 2010թ. աշխատել է Տիկնիկային թատրոնի բակում գտնվող ավտոլվացման կետում որպես ավտոլվացող։ Դեպքի վերաբերյալ իրեն որևէ բան հայտնի չէ։ Որևէ վիճաբանության ձայներ չի լսել։ Եթե լսեր, ապա դուրս կգար, որպեսզի իմանար, թե ինչ է տեղի ունեցել։ Կոնկրետ չի հիշում, թե 2010թ. դեկտեմբերին աշխատանքի եղել է, թե ոչ, քանի որ այդ ընթացքում շուրջ մեկ ամիս հիվանդ է եղել։
/դատական նիստի արձանագրություն/
Վկա Ալբերտ Հակոբի Հակոբյանը ցուցմունք տվեց այն մասին, որ աշխատում է Երևանի Սայաթ-Նովա փողոցում գտնվող կոշիկի վերանորոգման կրպակում որպես կոշկակար։ Աշխատանքի կոնկրետ սահմանված գրաֆիկ չունի, սակայն սովորաբար այնտեղ լինում է ժամը 10.00-ից մինչև 21.00-ը։ Չի կարող ասել, թե դեպքի օրը աշխատավայրում եղել է, թե ոչ, իսկ եթե եղել է, ապա ոչինչ չի լսել, քանի որ տարածքը հսկայական է։ Դեպքի մասին ոչինչ ասել չի կարող, քանի որ այդ մասին առաջին անգամ լսել է քննիչից։
/դատական նիստի արձանագրություն/
Վկա Արամ Կառլենի Մակյանը ցուցմունք տվեց այն մասին, որ աշխատում է «Կերամիկա» խանութին պատկանող լողավազանների խանութում որպես վաճառող, որը գտնվում է Երևանի Չարենցի փողոցում, «Կերամիկա» խանութի հարևանությամբ։ Աշխատանքը սկսվում է ժամը 10.00-ին և ավարտվում է ժամը 19.00-ին։ 2010թ. դեկտեմբերի 8-ին որևէ տարօրինակ դեպք չի նկատել, բարձր ձայներ, կրակոցներ չի լսել։ Այդ մասին հետագայում իմացել է քննիչից։
/դատական նիստի արձանագրություն/
Վկա Հակոբ Աշոտի Կարապետյանը նախաքննության ժամանակ ցուցմունք է տվել այն մասին, որ հանդիսանում է Երևանի Չարենցի 9 հասցեում գտնվող «Միդնայթ Բիսթ» սրճարանի սեփականատերը։ Օրվա մեջ հաճախ է լինում սրճարանում, հիմնականում իր աշխատասենյակում։ 2010թ. դեկտեմբերի 8-ին նույնպես գտնվել է սրճարանում։ Այդ օրը Երևանի Չարենցի փողոցում որևէ տարօրինակ դեպքի ականատես չի եղել, սակայն հաջորդ օրը ինտերնետից տեղեկացել է, որ նախորդ օրը, երեկոյան իրենց սրճարանի մոտակայքում ինչ-որ վիճաբանություն է եղել և նույնիսկ կրակոցներ են եղել։ Ինքը հարցուփորձ է արել սրճարանի աշխատակիցներին, սակայն ոչ ոք ոչինչ չի իմացել։ Քանի որ սրճարանը նկուղային հարկում է և միշտ երաժշտություն է միացված, ուստի փողոցը չի երևում և այնտեղից որևէ ձայն չի լսվում։ Դեպքի մասին խոսել է նաև դռնապահ Սերգեյի հետ, սակայն նա նույնպես հայտնել է, որ ոչինչ չի տեսել, քանի որ այդ ժամերին սրճարանում ճաշելիս է եղել։
/հատոր 3, գ.թ. 89-90/
Վկա Արսեն Օնիկի Ասատրյանը նախաքննության ժամանակ ցուցմունք է տվել այն մասին, որ ծնվել է 1991թ. դեկտեմբերի 8-ին։ 2010թ. դեկտեմբերի 8-ին ինքը միջոցառում է կազմակերպել Հոկտեմբերյանում գտնվող իրենց տանը, որին բացի իր բարեկամներից, հրավիրել է նաև համակուրսեցիներին։ Չի հիշում, թե կոնկրետ ժամը քանիսին են եկել իր համակուրսեցիները, սակայն նրանց մեջ չեն եղել Գուժը, Նշանը և Արմանը։ Այնուհետև համակուրսեցիների մեջ խոսակցություններ են տարածվել, որ Երևանի Չարենց փողոցում վիճաբանություն է տեղի ունեցել, որին մասնակցել են նաև Գուժը և իրենց կուրսի 2-րդ հոսքի ուսանող Էդգար Շախիկյանը։ Տեղեկացել է նաև, որ վիճաբանության ժամանակ կրակոցներ են եղել և Գուժը ձեռքի շրջանում վնասվածք է ստացել։ Գուժը, Նշանը և Արմանն այդ օրն այդպես էլ չեն եկել իրենց տուն։
/հատոր 4, գ.թ. 113-115/
Վկա Ելենա Կոմիտասի Անդրիազյանը նախաքննության ժամանակ ցուցմունք է տվել այն մասին, որ աշխատում է Երևանի Սայաթ-Նովա 4 հասցեում գտնվող «N1» բիլիարդ ակումբում։ Աշխատանքը հերթափոխով է։ 2010թ. դեկտեմբերի 8-ին իր հերթափոխի օրն է եղել։ Աշխատանքի է եկել ժամը 11.00-ին և այն վերջացրել է ժամը 00.00-ից 01.00-ի սահմաններում։ Ճանաչում է իրենց մշտական հաճախորդներ Ալիկին և Էրիկին, որոնք գրեթե ամեն օր, նույնիսկ օրը մի քանի անգամ գալիս են իրենց ակումբ` բիլիարդ խաղալու։ Նրանք երբեմն գալիս են նաև իրենց ընկերների հետ, որոնցից ճանաչում է միայն Վիտյային, որը բնակվում է կողքի շենքում։ Դկտեմբերի 8-ին Էրիկը մի քանի տղաների հետ եկել է իրենց ակումբ, որից հետո եկել է նաև Վիտյան։ Տղաները շատ աշխույժ են եղել, ինչ-որ աղջկա մասին են խոսել, որին նվեր պետք է տային կամ հանդիպեին նրա հետ։ Որոշ ժամանակ խաղալուց հետո տղաները հեռացել են ակումբից։ Նրանց հեռանալուց հետո գոռգոռոցներ և հայհոյանքներ չի լսել և որևէ վիճաբանության մասին տեղեկություն չունի։ Ակումբը գտնվում է նկուղային հարկում և եթե դրա դիմաց վիճաբանություն լիներ` ինքը դա չէր կարող տեսնել։ Դրանից հետո եղբայրները երկար ժամանակ ակումբ չեն եկել, ինչը շատ անսովոր է եղել։ Շուրջ հինգ օր անց ակումբում տեսել է Վիտյային և հարցրել է տղաների` ակումբ չգալու պատճառը, ինչին Վիտյան պատասխանել է, որ ինչ-որ կռիվ է եղել, տղաները խնդիր ունեն և դրա համար չեն գալիս ակումբ։
/հատոր 2, գ.թ. 221-222/
Վկա Արարատ Ալբերտի Զաքարյանը նախաքննության ժամանակ ցուցմունք է տվել այն մասին, որ Երևանի Շմիդտի թիվ 5 հասցեում գործում է իրեն պատկանող ավտոլվացման և ավտովերանորոգման կետերը, որոնք գտնվում են նույն հասցեում գտնվող «Ժասմին» գեղեցկության սրահի կողքին։ Ավտովերանորոգման կետում աշխատում է ինքը, իսկ ավտոլվացման կետում` Սերգեյ Քոչարյանը։ Սովորաբար աշխատում են առավոտյան ժամը 10.00-ից մինչև 18.00-ը, սակայն դա կախված է նրանից, թե գործ ունեն` թե ոչ, իսկ ավտոլվացման կետը անձրևոտ եղանակին փակ է լինում։ Կոնկրետ չի կարող հիշել, թե 2010թ. դեկտեմբերի 8-ին ինքը և Սերգեյ Քոչարյանը աշխատանքի եղել են, թե ոչ։ Չի հիշում նաև, որ 2010թ. դեկտեմբերին որևէ վիճաբանություն տեսած լինի։ Ինչ վերաբերվում է ձայներ կամ գոռգոռոցներ լսելուն, ապա այդպիսիք երբեմն լսվում են, քանի որ ավտոտեխսպասարկման կետը գտնվում է մի քանի շենքերի բակում, իսկ այդպիսի ձայները միշտ չեն, որ վիճաբանության են լինում։ Բացի այդ, ձմռանը ավտոլվացման և ավտովերանորոգման կետերի դռները փակ վիճակում են լինում, քանի որ այդ ժամանակ ներսում վառարան է վառվում, ուստի չէին կարող որևէ վիճաբանություն տեսնել, իսկ գոռգոռոցներ կամ հայհոյանքներ չի հիշում, որ այդ ընթացքում լսած լինի։
/հատոր 4, գ.թ. 234-235/



Դատարանի իրավական վերլուծությունները

Վերլուծելով ամբաստանյալներ Էդգար Մովսեսի Շախիկյանի և Գեորգի Գուրգենի Թառոյանի նախաքննական և դատաքննական ցուցմունքները, դրանք համադրելով այլ ապացույցների հետ, գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, դատարանը գտնում է, որ ամբաստանյալ Էդգար Մովսեսի Շախիկյանի կողմից, նրա մեղավորությամբ, ուրիշի գույքը դիտավորությամբ վնասելը, որը խոշոր չափերի վնաս է պատճառել, ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 185-րդ հոդվածի 2-րդ մասի 2-րդ կետով նախատեսված հանցագործության հատկանիշներին։
Ապացուցված է նաև ամբաստանյալ Էդգար Մովսեսի Շախիկյանի կողմից, նրա մեղավորությամբ, մի խումբ անձանց հետ, բռնություն գործադրելով, անձի առողջությանը միջին ծանրության վնաս պատճառելու հետ զուգորդված, զենքի գործադրմամբ խուլիգանություն կատարելը, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 258-րդ հոդվածի 4-րդ մասով նախատեսված հանցագործության հատկանիշներին։
Ամբաստանյալ Գեորգի Գուրգենի Թառոյանի կողմից, նրա մեղավորությամբ, մի խումբ անձանց հետ խուլիգանություն կատարելը, որը զուգորդվել է անձի նկատմամբ բռնություն գործադրելով` ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցագործության հատկանիշներին։
Ուսումնասիրելով ամբաստանյալների անձը բնութագրող տվյալները, պատասխանատվությունն ու պատիժը մեղմացնող ու ծանրացնող հանգամանքները, ամբաստանյալ Էդգար Մովսեսի Շախիկյանի նկատմամբ նրա կատարած յուրաքանչյուր հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նախկինում դատված չի եղել, բնութագրվում է դրական, դպրոցում ցուցաբերած գերազանց առաջադիմության համար պարգևատրվել է Գարեգին Նժդեհի անվան հուշամեդալով, ինքնակամ ներկայացել է նախաքննության մարմնին, ներկայացրել է հրազեն հանդիսացող ատրճանակը, իրեն լիովին մեղավոր է ճանաչել և զղջացել է կատարածի համար։ Ամբաստանյալի պատասխանատվությունը և պատիժը մեղմացնող կամ ծանրացնող հանգամանքներ դատարանը չի արձանագրում։
Ամբաստանյալ Էդգար Մովսեսի Շախիկյանն իր կատարած` Հայաստանի Հանրապետության քրեական օրենսգրքի 185-րդ հոդվածի 2-րդ մասի 2-րդ կետով և 258-րդ հոդվածի 4-րդ մասով նախատեսված յուրաքանչյուր հանցագործության համար ենթակա է պատժի ազատազրկման ձևով։
Քննարկելով ՀՀ քրեական օրենսգրքի 185-րդ հոդվածի 2-րդ մասի 2-րդ կետով նախատեսված հանցագործություն կատարելու համար նշանակված պատիժն ամբաստանյալ Էդգար Մովսեսի Շախիկյանի կողմից կրելու հարցը` դատարանը գտնում է, որ այդ հոդվածով, սույն դատավճռով նրա նկատմամբ ենթակա է կիրառման Հայաստանի Հանրապետության Ազգային ժողովի «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ ԱԺ 2011թ. մայիսի 26-ի որոշումը։
Քննարկելով ՀՀ քրեական օրենսգրքի 258-րդ հոդվածի 4-րդ մասով նախատեսված հանցագործության համար նշանակված պատիժն ամբաստանյալ Էդգար Մովսեսի Շախիկյանի կողմից կրելու հարցը` դատարանը գտնում է հետևյալը.
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011թ. մայիսի 26-ի որոշման 8-րդ կետի 5-րդ ենթակետի և 13-րդ կետի 4-րդ ենթակետի համաձայն` ՀՀ քրեական օրենսգրքի 258-րդ հոդվածի 4-րդ մասով նախատեսված հանցագործություն կատարելու համար դատապարտված անձանց պատժաչափի չկրած մասը պետք է կրճատել մեկ քառորդով։
Հաշվի առնելով, որ Էդգար Շախիկյանի նկատմամբ վերոհիշյալ համաներման ակտի կիրառման հարցում խոչընդոտներ չկան` դատարանը գտնում է, որ «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011թ. մայիսի 26-ի որոշման կիրառմամբ, Էդգար Շախիկյանի նկատմամբ ՀՀ քրեական օրենսգրքի 258-րդ հոդվածի 4-րդ մասով նշանակված պատժաչափի չկրած մասը, դատավճռի` օրինական ուժի մեջ մտնելուց հետո պետք է կրճատել մեկ քառորդով։
Ամբաստանյալ Գեորգի Գուրգենի Թառոյանի նկատմամբ պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա նախկինում դատված չի եղել, բնութագրվում է դրական, վատառողջ է` տառապում է «Հեպատիտ Ց վիրուս, խրոնիկ հեպատիտ» հիվանդությամբ։ Ամբաստանյալի պատասխանատվությունը և պատիժը մեղմացնող կամ ծանրացնող հանգամանքներ դատարանը չի արձանագրում։
Հաշվի առնելով գործի հանգամանքները, ամբաստանյալի պատասխանատվությունը և պատիժը մեղմացնող հանգամանքների բացակայությունը` դատարանը գտնում է, որ ամբաստանյալ Գեորգի Գուրգենի Թառոյանն իր կատարած` Հայաստանի Հանրապետության քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցագործության համար ենթակա է պատժի այդ հանցագործության համար նախատեսված պատիժներից առավել խիստ պատժի` ազատազրկման ձևով, քանի որ պատժի նվազ խիստ տեսակ տուգանքը չի կարող ապահովել պատժի նպատակները։
Միաժամանակ, ՀՀ քրեական օրենսգրքի 69-րդ հոդվածի 3-րդ մասի կիրառմամբ, ազատազրկման ձևով նշանակված պատժին հաշվակցման է ենթակա Գեորգի Թառոյանին կալանքի տակ պահելու չորս օրը։
Քննարկելով նշանակված պատիժն ամբաստանյալ Գեորգի Գուրգենի Թառոյանի կողմից կրելու հարցը` դատարանը գտնում է, որ սույն դատավճռով նրա նկատմամբ ենթակա է կիրառման «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ ԱԺ 2011թ. մայիսի 26-ի որոշումը։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, 28.12.2010թ. և 19.08.2011թ. որոշումներով իրեղեն ապացույցներ ճանաչված, «Պորշե-Կայեն-Տուրբո» մակնիշի, 05 ՕԼ 500 պետհամարանիշի ավտոմեքենան պետք է թողնել տուժող Ա. Հովակիմյանի տնօրինմանը, դեպքի վայրից հայտնաբերված յոթ պարկուճները, մեկ գնդակը, տաս հատ մետաղական գնդաձև կոտորակները, «Պորշե-Կայեն-Տուրբո» մակնիշի, 05 ՕԼ 500 պետհամարանիշի ավտոմեքենայի սրահի հետևի նստատեղի պաստառի միջից հայտնաբերված երեք գնդակները պետք է ոչնչացնել, «ՊՄ» տեսակի առանց համարի ատրճանակը պետք է հանձնել ՀՀ Ոստիկանության տնօրինմանը, «Վալտեր ՍՊ99 քոմպակտ» տեսակի օդաճնշիչ ատրճանակը և Գուժ Աղաբեկյանի հագուստները պետք է վերադարձնել Գուժ Աղաբեկյանին, Վահագն Գրիգորյանի հագուստները` Վահագն Գրիգորյանին, իսկ Էռնեստ Թառոյանի հագուստները` Էռնեստ Թառոյանին։
Քննարկելով խափանման միջոցների հարցը` դատարանը գտնում է, որ ամբաստանյալ Էդգար Շախիկյանի նկատմամբ որպես խափանման միջոց կալանավորումն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Ամբաստանյալ Գեորգի Թառոյանի նկատմամբ որպես կալանավորման այլընտրանքային խափանման միջոց գրավը ենթակա է վերացման, իսկ գրավի գումար հանդիսացող 500.000 /հինգ հարյուր հազար/ ՀՀ դրամը, մուծված 14.12.2010թ. Գուրգեն Թառոյանի կողմից` Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 900013298014 հաշվին, ենթակա է վերադարձման այդ գումարը վճարած Գուրգեն Թառոյանին։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 357-360-րդ, 364-367-րդ, 369-373-րդ հոդվածներով, դատարանը`


Վ Ճ Ռ Ե Ց


1. Ամբաստանյալ Էդգար Մովսեսի Շախիկյանին մեղավոր ճանաչել Հայաստանի Հանրապետության քրեական օրենսգրքի 185-րդ հոդվածի 2-րդ մասի 2-րդ կետով և 258-րդ հոդվածի 4-րդ մասով նախատեսված հանցանքներում և դատապարտել. ՀՀ քրեական օրենսգրքի 185-րդ հոդվածի 2-րդ մասի 2-րդ կետով` ազատազրկման 3 /երեք/ տարի ժամկետով, ՀՀ քրեական օրենսգրքի 258-րդ հոդվածի 4-րդ մասով` ազատազրկման 4 /չորս/ տարի ժամկետով։
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011թ. մայիսի 26-ի որոշման 1-ին կետի 1-ին ենթակետի կիրառմամբ ամբաստանյալ Էդգար Մովսեսի Շախիկյանին ազատել ՀՀ քրեական օրենսգրքի 185-րդ հոդվածի 2-րդ մասի 2-րդ կետով նախատեսված հանցագործության կատարման համար նշանակված պատիժը կրելուց։
Էդգար Շախիկյանի մասով դատավճռի` օրինական ուժի մեջ մտնելուց հետո, «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011թ. մայիսի 26-ի որոշման 8-րդ կետի 5-րդ ենթակետի և 13-րդ կետի 4-րդ ենթակետի կիրառմամբ, ՀՀ քրեական օրենսգրքի 258-րդ հոդվածի 4-րդ մասով Էդգար Շախիկյանի նկատմամբ նշանակված պատժի` 4 /չորս/ տարի ժամկետով ազատազրկման չկրած մասը կրճատել մեկ քառորդով։
Պատժի մնացած մասն ամբաստանյալ Էդգար Մովսեսի Շախիկյանը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի կրման սկիզբը հաշվելով 2010թ. դեկտեմբերի 10-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
2. Ամբաստանյալ Գեորգի Գուրգենի Թառոյանին մեղավոր ճանաչել Հայաստանի Հանրապետության քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցանքում և դատապարտել ազատազրկման 2 /երկու/ տարի ժամկետով։
ՀՀ քրեական օրենսգրքի 69-րդ հոդվածի 3-րդ մասի կիրառմամբ հաշվակցելով կալանքի տակ պահելու 4 /չորս/ օրը` ամբաստանյալ Գեորգի Գուրգենի Թառոյանի նկատմամբ պատիժ նշանակել ազատազրկում է 1 /մեկ/ տարի 11 /տասնմեկ/ ամիս 26 /քսանվեց/ օր ժամկետով։
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ ԱԺ 2011թ. մայիսի 26-ի որոշման 1-ին կետի 1-ին ենթակետի կիրառմամբ ամբաստանյալ Գեորգի Գուրգենի Թառոյանին ազատել պատիժը կրելուց։
Կալանավորման այլընտրանքային խափանման միջոց գրավը վերացնել և գրավի գումար հանդիսացող 500.000 /հինգ հարյուր հազար/ ՀՀ դրամը, մուծված 14.12.2010թ. Գուրգեն Թառոյանի կողմից` Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 900013298014 հաշվին, հետ վերադարձնել նրան։
Դատավճռի օրինական ուժի մեջ մտնելուց հետո, 28.12.2010թ. և 19.08.2011թ. որոշումներով իրեղեն ապացույցներ ճանաչված, «Պորշե-Կայեն-Տուրբո» մակնիշի, 05 ՕԼ 500 պետհամարանիշի ավտոմեքենան թողնել տուժող Ա. Հովակիմյանի տնօրինմանը, դեպքի վայրից հայտնաբերված յոթ պարկուճները, մեկ գնդակը, տաս հատ մետաղական գնդաձև կոտորակները, «Պորշե-Կայեն-Տուրբո» մակնիշի, 05 ՕԼ 500 պետհամարանիշի ավտոմեքենայի սրահի հետևի նստատեղի պաստառի միջից հայտնաբերված երեք գնդակները ոչնչացնել, «ՊՄ» տեսակի առանց համարի ատրճանակը հանձնել ՀՀ Ոստիկանության տնօրինմանը, «Վալտեր ՍՊ99 քոմպակտ» տեսակի օդաճնշիչ ատրճանակը և Գուժ Աղաբեկյանի հագուստները վերադարձնել Գուժ Աղաբեկյանին, Վահագն Գրիգորյանի հագուստները վերադարձնել Վահագն Գրիգորյանին, իսկ Էռնեստ Թառոյանի հագուստները` Էռնեստ Թառոյանին։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։

ԴԱՏԱՎՈՐ` Մ. ՄԱՐՏԻՐՈՍՅԱՆ