Ո Ր Ո Շ ՈՒ Մ
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.


նախագահող դատավոր` Մ. Մարտիրոսյան,
քարտուղար` Տ. Գրիգորյան,

մասնակցությամբ`
մեղադրող,
ՀՀ գլխավոր դատախազության
ավագ դատախազ Կ. Փիլոյանի,

պաշտպան Հ. Բաբայանի,

տուժողի ներկայացուցիչ Հ. Գրիգորյանի,



2011թ. հոկտեմբերի 28-ին, դատարանում, դռնբաց դատական նիստում, ԵԿԴ-0172/01/11 /58204711/ քրեական գործով ըստ մեղադրանքի
Վիգեն Լևոնի Իսանյանի`
ծնված 1984թ. հուլիսի 20-ին Երևանում, հայ, Հայաստանի Հանրապետության քաղաքացի, բարձրագույն կրթությամբ, ամուսնացած, խնամքին ոչ ոք, նախկինում չդատված, աշխատում է ՀՀ ոստիկանության ԿՀԴՊԳՎ 1-ին վարչության 3-րդ բաժնում որպես օպերլիազոր, բնութագրվում է դրական, հաշվառված է և բնակվում է Երևանի Թումանյան փողոցի թիվ 5ա շենքի թիվ 4-5 բնակարանում, կալանքի տակ չէ, մեղադրվում է ՀՀ քրեական օրենսգրքի 188-րդ հոդվածի 3-րդ մասի 1-ին կետով,
քննարկելով ամբաստանյալ Վիգեն Լևոնի Իսանյանի պաշտպան Հ. Բաբայանի միջնորդությունը` ամբաստանյալի նկատմամբ քրեական հետապնդումը դադարեցնելու և քրեական գործի վարույթը կարճելու մասին,


Պ Ա Ր Զ Ե Ց

Վիգեն Լևոնի Իսանյանին մեղադրանք է առաջադրվել ՀՀ քրեական օրենսգրքի 188-րդ հոդվածի 3-րդ մասի 1-ին կետով հետևյալ արարքի համար. «որ նա` չունենալով համապատասխան պետական գրանցում և հաշվառում, հանրային էլեկտրոնային հաղորդակցության ցանցերի լիցենզիա և համապատասխան պայմանագիր, իրականացրել է լիցենզավորման ենթակա՝ միջազգային զանգերի տերմինացիա, այսինքն՝ ապօրինի ձեռնարկատիրական գործունեություն, որը զուգորդվել է պետությանն ու կազմակերպությանն առանձնապես խոշոր չափերի վնաս պատճառելով։
Այսպես.
Վիգեն Իսանյանը, 2009 թվականից աշխատելով ՀՀ ոստիկանության ԿՀԴՊԳՎ 1-ին վարչության 3-րդ՝ բարձր տեխնոլոգիաների ոլորտում կատարվող հանցագործությունների դեմ պայքարի բաժնում՝ որպես օպերլիազոր, լինելով համակարգչային մասնագետ ու աշխատանքի բնույթից ելնելով տիրապետելով միջազգային զանգերի տերմինացիա իրականացնելու համար անհրաժեշտ գիտելիքներին, չունենալով համապատասխան պետական գրանցում և հաշվառում, հանրային էլեկտրոնային հաղորդակցության ցանցերի լիցենզիա, ինչպես նաև՝ օպերատորի՝ «ԱրմենՏել» ՓԲԸ-ի հետ հանրային էլեկտրոնային հաղորդակցության ցանցերի փոխկապակցման ծառայությունների մատուցման պայմանագիր, 2010 թվականի սկզբներին ձեռք է բերել միջազգային զանգերի տերմինացիա իրականացնելու համար անհրաժեշտ սարքավորումներ և 2010 թվականի փետրվարից նախ ծնողների՝ Երևան քաղաքի Թումանյան փողոցի 5«ա» շենքի 4-5 բնակարանում, որից հետո, 2010թ. դեկտեմբերից արդեն իր վարձակալած՝ Երևան քաղաքի Նար-Դոս փողոցի 1-ին շենքի 33 բնակարանում տեղադրելով համացանցի հասանելիությամբ ապահովված «VoIP» և «GSM» ցանցերի միակցիչ հանգույց, այլ անհրաժեշտ սարքավորումներ ու բջջային հեռախոսաքարտեր, 2010թ. փետրվարի 12-ից մինչև 2011թ. ապրիլի 22-ն ընկած ժամանակահատվածում իրականացրել է լիցենզավորման ենթակա՝ միջազգային զանգերի տերմինացիա, այսինքն՝ միջազգային մուտքային հեռախոսազանգերը նշված սարքավորումներով փոխակերպել է տեղական միջօպերատորական հեռախոսա-զանգերի և նույն սարքերի միջոցով վերջավորում կատարել «ԱրմենՏել» ՓԲԸ-ի ցանցում՝ դրանով իսկ իրականացնելով ապօրինի ձեռնարկատիրական գործունեություն, որը զուգորդվել է պետությանը 1.621.312 դրամի, իսկ «ԱրմենՏել» ՓԲԸ-ին՝ 13.712.970 դրամի՝ ընդհանուրը պետությանն ու կազմակերպությանն առանձնապես խոշոր չափերի՝ 15.334.282 դրամի վնաս պատճառելով։»։
Քրեական գործի նախաքննության ընթացքում կատարվել են համակարգչատեխնիկական և դատահաշվապահական փորձաքննություններ ՀՀ ԳԱԱ «Փորձաքննությունների ազգային բյուրո» պետական ոչ առևտրային կազմակերպության կողմից /հատոր 1, գ.թ. 208-235, հատոր 2, գ.թ. 187-199/։ Համաձայն ՀՀ ԳԱԱ «Փորձաքննությունների ազգային բյուրո» պետական ոչ առևտրային կազմակերպության տնօրենի առաջին տեղակալ Ա. Գահնապետյանի 10.10.2011թ. թիվ 11-1261 գրության` փորձաքննությունները կատարվել են համապատասխանաբար 2011թ. հունիս և օգոստոս ամիսներին և դրանց արժեքը կազմել է համապատասխանաբար 755700 /յոթ հարյուր հիսունհինգ հազար յոթ հարյուր/ և 82440 /ութսուներկու հազար չորս հարյուր քառասուն/ ՀՀ դրամ գումար, որն արդեն իսկ փոխանցված է ՀՀ գլխավոր դատախազության կողմից։
2011թ. հոկտեմբերի 28-ին, դատական նիստում, ամբաստանյալ Վիգեն Իսանյանի պաշտպան Հ. Բաբայանը դատարանին հայտնեց, որ ամբաստանյալի կողմից որպես հանցագործությամբ պատճառված վնասի հատուցում ՀՀ հատուկ քննչական ծառայության 900008038011 դեպոզիտ հաշվին վճարվել է 18.391.000 ՀՀ դրամ գումար, որի մուծված լինելը հաստատող անդորրագրերը կցված են քրեական գործին։ Ամբաստանյալ Վ. Իսանյանի դիմումի համաձայն, ՀՀ հատուկ քննչական ծառայությունը, նշված հաշվին եղած գումարներից, 19.10.2011թ. վճարման հանձնարարագրերով, նախաքննությամբ պարզված գումարները փոխանցել է «ԱրմենՏել» ՓԲԸ-ի և ՀՀ պետական եկամուտների նախարարության հաշվեհամարներին։ Բացի այդ, ամբաստանյալ Վ. Իսանյանի կողմից «ԱրմենՏել» ՓԲԸ-ին է վճարվել 823.600 ՀՀ դրամ գումար` որպես պատճառված վնասի նկատմամբ հաշվարկված տույժի և տուգանքի գումար, ինչպես նաև նրա կողմից վճարվել են դատական ծախսերը` 758457 և 82740 ՀՀ դրամի չափով։ Պաշտպանը դատարանին ներկայացրեց` 19.10.2011թ. վճարման հանձնարարագրերի պատճենները, որոնց համաձայն ՀՀ ՀՔԾ ՀԿԳ քննիչ Ա. Գրիգորյանի 19.10.2011թ. զեկուցագրի հիման վրա ՀՀ ֆինանսների և Էկոնոմիկայի նախարարությունից «ԱրմենՏել» ՓԲԸ-ի և ՀՀ պետական եկամուտների կոմիտեի հաշվեհամարներին են փոխանցվել համապատասխանաբար 13.712.970 /տասներեք միլիոն յոթ հարյուր տասներկու հազար իննը հարյուր յոթանասուն/ և 4.676.664 /չորս միլիոն վեց հարյուր յոթանասունվեց հազար վեց հարյուր վաթսունչորս/ ՀՀ դրամ գումար, Վիգեն Իսանյանի /անձնագիր AF0311760 011 08.06.01/ կողմից 2011թ. հոկտեմբերի 25-ին «ԱրմենՏել» ՓԲԸ-ի հաշվին 823.600 /ութ հարյուր քսաներեք հազար վեց հարյուր/ ՀՀ դրամ և ՀՀ դատարանների նախագահների խորհրդի հաշվին 758.457 /յոթ հարյուր հիսունութ հազար չորս հարյուր հիսունյոթ/ և 82.440 /ութսուներկու հազար չորս հարյուր քառասուն/ ՀՀ դրամ գումար մուծված լինելու վերաբերյալ վճարման անդորրագրերը և միջնորդեց ամբաստանյալի նկատմամբ քրեական հետապնդումը դադարեցնել և քրեական գործի վարույթը կարճել` հաշվի առնելով Հայաստանի Հանրապետության քրեական օրենսգրքում տեղի ունեցած փոփոխությունները։
Ամբաստանյալը միացավ պաշտպանի միջնորդությանը։
Տուժող «ԱրմենՏել» ՓԲ ընկերության ներկայացուցիչ Հ. Գրիգորյանը միջնորդության դեմ չառարկեց և դատարանին հայտնեց, որ «ԱրմենՏել» ՓԲ ընկերությանը հանցագործությամբ պատճառված 13.712.970 ՀՀ դրամի նյութական վնասը և դրա նկատմամբ հաշվարկված 822.778 ՀՀ դրամ տույժերն ու տուգանքներն ամբաստանյալի կողմից ամբողջությամբ վերականգնվել է, ընկերությունն ամբաստանյալի նկատմամբ որևէ պահանջ չունի։
Մեղադրողը միջնորդության դեմ չառարկեց։
Քննարկելով պաշտպանի միջնորդությունը` դատարանը գտնում է հետևյալը.
ՀՀ քրեական օրենսգրքի 18-րդ հոդվածի 1-ին մասի համաձայն` «Հանցագործություն է համարվում մեղավորությամբ կատարված` հանրության համար վտանգավոր այն արարքը, որը նախատեuված է uույն oրենuգրքով։»։
ՀՀ քրեական օրենսգրքի 72-րդ հոդվածի համաձայն` «Առաջին անգամ ոչ մեծ ծանրության կամ միջին ծանրության հանցանք կատարած անձը կարող է ազատվել քրեական պատասխանատվությունից, եթե նա հանցանք կատարելուց հետո կամովին ներկայացել է մեղայականով, աջակցել է հանցագործությունը բացահայտելուն, հատուցել կամ այլ կերպ հարթել է հանցագործությամբ պատճառված վնասը։
2. Այլ տեսակի հանցանք կատարած անձը քրեական պատասխանատվությունից ազատվում է միայն սույն օրենսգրքի Հատուկ մասի հոդվածով հատկապես նախատեսված դեպքերում։»։
ՀՀ քրեական օրենսգրքի 189-րդ հոդվածի 5-րդ մասի համաձայն` «Սույն օրենսգրքի 188-րդ, 189-րդ, 193-րդ, 194-րդ, 205-րդ և 206-րդ հոդվածներով նախատեսված արարքները կատարած անձն ազատվում է քրեական պատասխանատվությունից, եթե նա հատուցում է հանցագործությամբ պատճառված վնասը և հաշվարկված տույժերն ու տուգանքները։»։
Դատական քննությամբ հիմնավորվել է, որ տուժող «ԱրմենՏել» ՓԲԸ-ին պատճառված 13.712.970 /տասներեք միլիոն յոթ հարյուր տասներկու հազար իննը հարյուր յոթանասուն/ ՀՀ դրամ գումարի չափով վնասը, դրա նկատմամբ հաշվարկված 822.778 /ութ հարյուր քսաներկու հազար յոթ հարյուր յոթանասունութ/ ՀՀ դրամ տույժերն ու տուգանքները, պետությանը պատճառված 1.621.312 /մեկ միլիոն վեց հարյուր քսանմեկ հազար երեք հարյուր տասներկու/ ՀՀ դրամ գումարի չափով վնասը և դրա նկատմամբ հաշվարկված 3.055.352 /երեք միլիոն հիսունհինգ հազար երեք հարյուր հիսուներկու/ ՀՀ դրամ տուժերն ու տուգանքներն ամբաստանյալի կողմից հատուցվել են, տուժող «ԱրմենՏել» ՓԲԸ-ն ամբաստանյալի դեմ որևէ պահանջ չի ներկայացնում, տուժողի և ամբաստանյալի միջև հատուցման ենթակա վնասի կապակցությամբ վեճ առկա չէ։
Հաշվի առնելով գործի հանգամանքները և վերոգրյալը` դատարանը գտնում է, որ գործի վարույթը ենթակա է կարճման, ամբաստանյալ Վիգեն Լևոնի Իսանյանի նկատմամբ քրեական հետապնդումը ենթակա է դադարեցման, իսկ նրա նկատմամբ ընտրված խափանման միջոց չհեռանալու մասին ստորագրությունը ենթակա է վերացման։
Քննարկելով գույքի վրա դրված կալանքի հարցը` դատարանը գտնում է, որ Վիգեն Լևոնի Իսանյանի գույքի վրա նախաքննության մարմնի 03.06.2011թ. որոշմամբ դրված կալանքը պետք է վերացնել։
Քննարկելով իրեղեն ապացույցների հարցը` դատարանը գտնում է, որ 2011թ. օգոստոսի 2-ի որոշմամբ իրեղեն ապացույցներ ճանաչված ութ հանգույցով «ՋԻ ԷՍ ԷՄ» երթուղիչը, դրանում առկա հինգ հեռախոսաքարտերը, չորս հանգույցով անսարք «ՋԻ ԷՍ ԷՄ» երթուղիչը, գործարանային փաթեթավորմամբ «ՋԻ ԷՍ ԷՄ» երթուղիչը, սարքը հոսանքին միացնելու համակարգերն ու ալեհավաքները, 34 չօգտագործված հեռախոսաքարտերը և յոթ հեռախոսաքարտերը պետք է բռնագրավել և հանձնել ՀՀ ֆինանսների նախարարության տնօրինմանը, «Սամսունգ» տեսակի երկու բջջային հեռախոսները, երկու հիշողության կրիչները /ֆլեշ/, «Ասուս» տեսակի համակարգիչը, հոսանքին միացելու համակարգը պետք է վերադարձնել ամբաստանյալ Վիգեն Իսանյանին, «Էյչ-Էս-Բի-ՍԻ Բանկ Հայաստան» ՓԲԸ-ի «001 092568 001» համարի և «001 044023 001» համարի պլաստիկ քարտերը պետք է թողնել Արա Հովհաննիսյանի և Նինա Սերեդայի տնօրինմանը, հեռախոսաքարտերի տաս դատարկ տուփերը պետք է ոչնչացնել, իսկ գործին կցված փաստաթղթերն ու մյուս իրեղեն ապացույցները պետք է պահել քրեական գործի հետ միասին։
Վերոգրյալների հիման վրա և ղեկավարվելով ՀՀ քրեական դատավարության օրենսգրքի` 35-րդ, 37-րդ, 41-րդ, 312-րդ, 313-րդ հոդվածներով, դատարանը


Ո Ր Ո Շ Ե Ց

ԵԿԴ-0172/01/11 քրեական գործով ըստ մեղադրանքի Վիգեն Լևոնի Իսանյանի` ՀՀ քրեական օրենսգրքի 188-րդ հոդվածի 3-րդ մասի 1-ին կետով, քրեական գործի վարույթը կարճել և ամբաստանյալ Վիգեն Լևոնի Իսանյանի նկատմամբ քրեական հետապնդումը դադարեցնել` հանցագործությամբ պատճառված վնասը հատուցված լինելու պատճառաբանությամբ։
Վիգեն Լևոնի Իսանյանի նկատմամբ ընտրված խափանման միջոց չհեռանալու մասին ստորագրությունը վերացնել։
Վիգեն Լևոնի Իսանյանի գույքի վրա նախաքննության մարմնի 03.06.2011թ. որոշմամբ դրված կալանքը վերացնել։
Իրեղեն ապացույցներ ճանաչված ութ հանգույցով «ՋԻ ԷՍ ԷՄ» երթուղիչը, դրանում առկա հինգ հեռախոսաքարտերը, չորս հանգույցով անսարք «ՋԻ ԷՍ ԷՄ» երթուղիչը, գործարանային փաթեթավորմամբ «ՋԻ ԷՍ ԷՄ» երթուղիչը, սարքը հոսանքին միացնելու համակարգերն ու ալեհավաքները, 34 չօգտագործված հեռախոսաքարտերը և յոթ հեռախոսաքարտերը բռնագրավել և հանձնել ՀՀ ֆինանսների նախարարության տնօրինմանը, «Սամսունգ» տեսակի երկու բջջային հեռախոսները, երկու հիշողության կրիչները /ֆլեշ/, «Ասուս» տեսակի համակարգիչը, հոսանքին միացելու համակարգը վերադարձնել ամբաստանյալ Վիգեն Իսանյանին, «Էյչ-Էս-Բի-ՍԻ Բանկ Հայաստան» ՓԲԸ-ի «001 092568 001» համարի և «001 044023 001» համարի պլաստիկ քարտերը թողնել Արա Հովհաննիսյանի և Նինա Սերեդայի տնօրինմանը, հեռախոսաքարտերի տաս դատարկ տուփերը ոչնչացնել, իսկ գործին կցված փաստաթղթերն ու մյուս իրեղեն ապացույցները պահել քրեական գործի հետ միասին։
Սույն որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում։

ԴԱՏԱՎՈՐ՝ Մ. ՄԱՐՏԻՐՈՍՅԱՆ