ԵԿԴ/0149/01/11






ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«29» սեպտեմբերի 2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղարներ Ռ.Ավետյան
Կ.Կարապետյան
մեղադրող Ա.Աֆանդյան
պաշտպան Ա.Թովմասյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Նորայր Հարությունի Համբարձումյանի` ծնված 1980 թվականի օգոստոսի 7-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, նախկինում չդատապարտված, անհատ ձեռներեց, հաշվառված է Երևան քաղաքի Մարգարյան փողոցի 2-րդ նրբանցք 14-րդ շենքի 14-րդ բնակարանում: Մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով, արգելանքի տակ է 2011 թվականի հունիսի 19-ից:
1. Գործի դատավարական նախապատմությունը.
2010 թվականի հունիսի 19-ին ՀՀ ոստիկանության Կենտրոնականի քննչական բաժնի քննիչ Ա.Տոնոյանի որոշմամբ ՀՀ քրեական օրենսգրքի 316-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 13137811 քրեական գործը:
2011 թվականի հունիսի 21-ին ՀՀ ոստիկանության Կենտրոնականի քննչական բաժնի քննիչ Ա.Տոնոյանի որոշմամբ թիվ 13137811 քրեական գործով Նորայր Հարությունի Համբարձումյանին մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով:
2011 թվականի հուլիսի 28-ին Նորայր Հարությունի Համբարձումյանի վերաբերյալ քրեական գործը մեղադրական եզրակացությամբ ուղարկվել է Դատարան, որին շնորհվել է ԵԿԴ/0149/01/11 համարը:
Նորայր Համբարձումյանին մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով` այն արարքի համար, որ նա 2011 թվականի հունիսի 18-ին` ժամը 22:30-ին, Երևան քաղաքի Հանրապետության հրապարակում իր անձնական օգտագործման «Աուդի-А4» մակնիշի 08ՍՍ707 պետհամարանիշի ավտոմեքենայով ՃԵԿ-ի խախտում կատարելուց հետո, չենթարկվելով ՀՀ ոստիկանության ՃՈ 1-ին գումարտակի 1-ին վաշտի 2-րդ դասակի տեսուչ, ոստիկանության ավագ լեյտենանտ Գևորգ Ավագի Մարտիրոսյանի օրինական պահանջներին, իր ծառայողական պարտականությունները կատարելու հետ կապված` չի ներկայացրել վարորդական իրավունքի վկայականը և ավտոմեքենայի տեխնիկական անձնագիրը` քաշքշել է, հրել նրան, տվել սեռական բնույթի հայհոյանքներ, այնուհետև անձը ճշտելու, սթափության վիճակը ստուգելու համար ոստիկանության Կենտրոնականի բաժին բերման ենթարկվելուց հետո հերթապահ մասում հրաժարվել է ավտոմեքենայի բանալիները տրամադրել երթևեկելի մասից դուրս հանելու և տուգանային հրապարակ տեղափոխելու համար ՃՈ աշխատակցի օրինական պահանջներին, հայհոյել և կյանքի կամ առողջության համար ոչ վտանգավոր բռնություն գործադրելով` ապտակել է Գ.Մարտիրոսյանի դեմքին` պատճառելով ֆիզիկական ցավ:
2. Արագացված դատական քննություն.
Մինչ դատաքննությունն սկսելն ամբաստանյալ Նորայր Հարությունի Համբարձումյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Նորայր Հարությունի Համբարձումյանը կատարել է արարք` նախատեսված ՀՀ քրեական օրենսգրքի 316-րդ հոդվածի 1-ին մասով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ՀՀ ոստիկանության ինֆորմացիոն կենտրոնի պահանջագիրը, ամուսնության և ծննդյան վկայականների պատճենները, «Մարգարյան 25» համատրիության նախագահի կողմից տրված տեղեկանքը, բնութագիրը, դիպլոմի պատճենը, սթափության վիճակի զննության արձանագրությունը, եկավ հետևյալ եզրահանգման.
Նորայր Համբարձումյանի անձը դրականորեն բնութագրող հանգամանքներ են ամուսնացած լինելը, բարձրագույն կրթությունը ունենալը և կատարածի համար զղջալը:
Նորայր Համբարձումյանի պատասխանատվությունն ու պատիժը մեղմացնող հանգամանք է խնամքին 14 տարին չլրացած երկու երեխաների (Լիլի Նորայրի Համբարձումյան` ծնված 2010 թվականի հունիսի 3-ին և Հռիփսիմե Նորայրի Համբարձումյան` ծնված 2007 թվականի փետրվարի 14-ին) և վատառողջ մոր առկայությունը:
Դատարանը գտնում է, որ Նորայր Համբարձումյանի պատասխանատվությունն ու պատիժը մեղմացնող հանգամանքներ պետք է դիտել նաև նախկինում արատավորված` դատապարտված չլինելը և դրականորեն բնութագրվելը:
Դատարանը միաժամանակ արձանագրում է, որ Նորայր Համբարձումյանի պատասխանատվությունն ու պատիժը ծանրացնող հանգամանք պետք է դիտել այն, որ նա հանցանք կատարելու պահին գտնվել է ալկոհոլի ազդեցության վիճակում:
Կատարած արարքի համար ամբաստանյալ Նորայր Համբարձումյանը ենթակա է քրեական պատասխանատվության և պատժի:
Դատարանը, հաշվի առնելով Նորայր Համբարձումյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ինչպես նաև այն, որ Նորայր Համբարձումյանի կատարած արարքի համար ՀՀ քրեական օրենսգրքի 316-րդ հոդվածի 1-ին մասի սանկցիայով նախատեսված է պատիժ նաև ազատազրկման ձևով, գտնում է, որ նրա նկատմամբ պատիժ պետք է նշանակել ազատազրկման ձևով, որը նա պետք է կրի:
Դատարանը գտնում է, որ Նորայր Համբարձումյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Նորայր Համբարձումյանի պատժի կրման սկիզբը պետք է հաշվել 2011 թվականի հունիսի 19-ից, քանի որ այդ օրը նա ձերբակալվել է, իսկ 2011 թվականի հունիսի 21-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերը դատարանի նախաձեռնությամբ ամբաստանյալ Նորայր Համբարձումյանից ենթակա չեն բռնագանձման, քանի որ տուժողը, հնարավորություն ունենալով իր շահերը դատարանում ներկայացնել, ամբաստանյալին որևէ պահանջ չի ներկայացրել: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մաuի 2-8-րդ կետերով նախատեսված դատական ծախսերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի` ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը

ՎՃՌԵՑ

Նորայր Հարությունի Համբարձումյանին մեղավոր ճանաչել ՀՀ քրեական օրենսգրքի 316-րդ հոդվածի 1-ին մասով և պատիժ նշանակել ազատազրկում` 9 (ինը) ամիս ժամկետով` պատժի կրման սկիզբը հաշվելով 2011 թվականի հունիսի 19-ից:
Նորայր Հարությունի Համբարձումյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին մասի 1-ին կետով նախատեսված հիմքով):

ԴԱՏԱՎՈՐ Մ.ՊԱՊՈՅԱՆ