գործ` ԵԿԴ/0148/01/11
Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության դատարանը

Նախագահությամբ դատավոր` Արմեն Բեկթաշյանի
քարտուղարությամբ` Լուսինե Ղամբարյանի
մասնակցությամբ` մեղադրող` Աշոտ Նադոյանի
պաշտպան` Արթուր Աթարբեկյանի

2011 թվականի սեպտեմբերի 08-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի`

Ստեփան Վոլոդյայի Սիմոնյանի` ծնված 01.04.1978 թվականին, Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, խնամքինª 4 անձ, նախկինում չդատված, ծառայել է ՀՀ ոստիկանության համակարգում, բնակվել է Երևան քաղաքի, Կովկասյան փողոցի 73 տանը, կալանքի տակ է 14.07.2011թվականից:

Ստեփան Վոլոդյայի Սիմոնյանը մեղադրվում է ՀՀ քրեական օրենսգրքի 311 հոդվածի 1-ին մասով:
16.07.2011 թվականի որոշմամբ Ստեփան Վոլոդյայի Սիմոնյանի նկատմամբ որպես խափանման միջոց է ընտրվել կալանավորումը:

Գործի դատավարական նախապատմությունը.

ՀՀ ոստիկանության Երևան քաղաքի վարչության ՔՀ բաժնի 3-րդ բաժանմունքի ավագ օպեր-լիազոր Ստեփան Սիմոնյանի կողմից կաշառք ստանալու դեպքի առթիվ ՀՀ հատուկ քննչական խառայության հատկապես կարևոր գործերի քննության վարչությունում 2011 թվականի հուլիսի 14-ին ՀՀ քրեական օրենսգրքի 311 հոդվածի 1-ին մասի հատկանիշներով հարուցվել է թիվ 62205411 քրեական գործը:
Կաշառք ստանալու կասկածանքով 2011 թվականի հուլիսի 14-ին Ստեփան Վոլոդյայի Սիմոնյանը ձերբակալվել է:
2011 թվականի հուլիսի 16-ի որոշմամբ թիվ 62205411 քրեական գործով Ստեփան Վոլոդյայի Սիմոնյանը ՀՀ քրեական օրենսգրքի 311 հոդվածի 1-ին մասով ներգրավվել է որպես մեղադրյալ:
2011 թվականի հուլիսի 16-ի որոշմամբ Ստեփան Վոլոդյայի Սիմոնյանի նկատմամբ որպես խափանան միջոց է ընտրվել կալանավորումը:
2011 թվականի հուլիսի 16-ի որոշմամբ Ստեփան Վոլոդյայի Սիմոնյանին ՀՀ քրեական օրենսգրքի 311 հոդվածի 1-ին մասով առաջադրված մեղադրանքը փոփոխվել է, մեղադրանքի տեքստը լրացվել է և նրան նոր մեղադրանք է առաջադրվել ՀՀ քրեական օրենսգրքի 311 հոդվածի 1-ին մասով:
Ստեփան Վոլոդյայի Սիմոնյանին` ՀՀ քրեական օրենսգրքի 311 հոդվածի 1-ին մասով մեղադրանք է առաջադրվել այն բանի համար, որ նա լինելով պաշտոնատար անձ, կաշառք տվողի օգտին իր լիազորությունների շրջանակում գործողություն չկատարելու համար, անձամբ ստացել է կաշառք, այն է` ամբաստանյալ Ստեփան Վոլոդյայի Սիմոնյանը աշխատելով ՀՀ ոստիկանության Երևան քաղաքի վարչության ՔՀ բաժնի 3-րդ բաժանմունքում` որպես ավագ օպեր-լիազոր, հանդիսանալով պաշտոնատար անձ, 2011 թվականի հուլիսի 13-ին իր վստահելի անձից (ագենտից) ստանալով օպերատիվ տեղեկություն այն մասին, որ Երևան քաղաքի Դավթաշեն 4-րդ թաղամասի բնակիչ, գործով վկա Էդգար Բաբկենի Գալստյանը թմրամիջոցներ է օգտագործում և ճշտելով, որ վերջինս ունի բավականին լուրջ ֆինանսական կարողություններ, Ս.Սիմոնյանը որոշել է ստացված տեղեկատվությունն օգտագործել իր օգտին: Այդ կապակցությամբ 2011 թվականի հուլիսի 14-ին, առավոտյան, Ստեփան Սիմոնյանը գնացել է Դավթաշեն 4-րդ թաղամաս, որտեղ շենքի բակի երիտասարդներից մեկի` քննությամբ չպարզված անհայտ անձի օգնությամբ գտել է Էդգար Գալստյանի բնակարանը, ապա հանդիպելով վերջինիս կնոջը` գործով վկա Աննա Անդրանիկի Առաքելյանին և պարզելով, որ Է.Գալստյանը տանը չէ, ճշտել է նրա բջջային հեռախոսահամարն ու հեռացել այնտեղից: Քիչ անց Ս.Սիմոնյանը զանգահարել է Է.Գալստյանին, ներկայացել որպես ոստիկանության Երևան քաղաքի վարչության քրեական հետախուզության աշխատակից, պահանջել է հանդիպել, ապա պայմանավորվածության համաձայն` նույն օրը` ժամը 15-ի սահմաններում, Երևան քաղաքի Մաշտոցի պողոտայում հանդիպել է նրան: Խոսակցության ընթացքում Ստեփան Սիմոնյանն հայտնել է իրեն հասած տեղեկության մասին, ապա վերջինիս նարկոդիսպանսեր բժշկական հետազոտման չներկայացնելու և համապատասխան քաշքշուկներից զերծ մնալու դիմաց պահանջել է 500 ԱՄՆ դոլար կաշառք, որի դեպքում խոստացել է մոռանալ նրա մասին: Էդգար Գալստյանը համաձայնել է Ս.Սիմոնյանի առաջարկին, սակայն ժամանակ է խնդրել` պահանջվող գումարը գտնելու համար: Է.Գալստյանը հեռանալով հանդիպման վայրից գնացել է ՀՀ ոստիկանության 6-րդ գլխավոր վարչություն, որտեղ հայտարարություն է տվել` ոստիկանի կողմից իրենից կաշառք պահանջելու վերաբերյալ: Հայտարարության հիման վրա ոստիկանության ԿՀԴՊ գլխավոր վարչության աշխատակիցների կողմից ձեռնարկվել են համապատասխան օպերատիվ-հետախուզական միջոցառումներ, որոնց շրջանակներում Էդգար Գալստյանի մարմնի վրա տեղադրվել է տեխնիկական սարքավորում, հատուկ քիմիական նյութերով մշակվել և Է.Գալստյանին են տրամադրվել հինգ հատ 100 ԱՄՆ դոլարանոց թղթադրամներ ու կազմակերպվել է հանդիպման տեսաձայնանկարահանումը: Այնուհետև, նույն օրը ժամը 21-ի սահմաններում Էդգար Գալստյանը զանգահարել է Ստեփան Սիմոնյանին և պատրաստակամություն հայտնել նրա հետ հանդիպելու, ապա պայմանավորվածության համաձայն հանդիպել են վերջինիս աշխատավայրի մոտ` Երևան քաղաքի Խանջյան փողոցում: Հանդիպման ժամանակ Է.Գալստյանը փորձել է ճշտել, թե ով է նման տեղեկություն հայտնել իր մասին, սակայն Ս.Սիմոնյանը պատասխանել է, որ պատահական տաքսու վարորդից է իմացել ու կրկնել է, որ գումարն իրեն տալուց հետո ոչ մի խնդիր չի ունենա: Նույն պահին Էդգար Գալստյանը Սստեփան Սիմոնյանին է տվել 184.035 ՀՀ դրամին համարժեք 500 ԱՄՆ դոլար գումարը, որից հետո նրանք բաժանվել են: Այնուհետև, մոտենալով վարչության շենքին, Ստեփան Սիմոնյանը զգացել է, որ իրեն հետևում են, վազքով մտնելով շենք` թաքնվել է առաջին հարկում գտնվող զուգարանում և որոշելով վերացնել կաշառքի գումարը` այն գցել է զուգարանի կոյուղու մեջ, սակայն նույն պահին բռնվել է ՀՀ ոստիկանության ԿՀԴՊՎ ԳՎ աշխատակիցների կողմից ու բերման ենթարկվել ՀՀ ոստիկանության ԿՀԴՊՎ գլխավոր վարչություն:
Էդգար Բաբկենի Գալստյանի կողմից Ստեփան Վոլոդյայի Սիմոնյանին 500 ԱՄՆ դոլար ապօրինի վարձատրություն տալու փաստի առթիվ 2011 թվականի հուլիսի 1-ի որոշմամբ Էդգար Բաբկենի Գալստյանն ազատվել է քրեական պատասխանատվությունից` ՀՀ քրեական օրենսգրքի 312 հոդվածի 4-րդ մասի պահանջներով:
27.07.2011 թվականին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան:

Արագացված դատական քննություն.

Մինչև դատաքննության սկսվելը ամբաստանյալ Ստեփան Վոլոդյայի Սիմոնյանը միջնորդություն է ներկայացրել` դատական քննությունն արագացված կարգով անցկացնելու` հայտարարելով, որ առաջադրված մեղադրանքն իրեն պարզ է, համաձայն է մեղադրանքի հետ և առաջադրված մեղադրանքում իրեն մեղավոր է ճանաչում, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացնում է կամավոր, պաշտպանի հետ խորհրդակցելուց հետո:
Դատարանը պարզելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, 16.08.2011 թվականին որոշում է կայացրել արագացված կարգով դատական քննություն անցկացնելու մասին:

Դատարանի իրավական վերլուծությունները.

Այսպիսով, քրեական գործով ձեռք բերված ապացույցների ընդհանուր կարգով սահմանված հետազոտություն չկատարելով, արագացված դատաքննությամբ հիմք ընդունելով մեղադրանքի հիմքում դրված ապացույցները, դատարանը հանգեց այն համոզման, որ ամբաստանյալ Ստեփան Վոլոդյայի Սիմոնյանը լինելով պաշտոնատար անձ, կաշառք տվողի օգտին իր լիազորությունների շրջանակում գործողություն չկատարելու համար, անձամբ ստացել է կաշառք` որպիսի արարքի համար նա պետք է պատասխանատվության ենթարկվի ՀՀ քրեական օրենսգրքի 311 հոդվածի 1-ին մասով:
ՀՀ քրեական օրենսգրքի 61-րդ հոդվածի 2-րդ մասի համաձայն` պատժի չափը և տեսակը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով:
Ամբաստանյալ Ստեփան Վոլոդյայի Սիմոնյանն անկեղծորեն խոստովանեց և զղջաց կատարած արարքի համար, նախկինում դատապարտված չի եղել, բնութագրվում է դրականորեն, խնամքին են գտնվում 03.08.2000 թվականին ծնված Անդրանիկ Ստեփանի Սիմոնյանը, 24.09.2008 թվականին ծնված Գուրգեն Ստեփանի Սիմոնյանը, որի մոտ ախտորոշվել է ՍՇԻ, տոքսիկ ձև հիվանդությունը, լեղաքարային հիվանդությամբ տառապող կինը, ՙՊարկինսոն՚ հիվանդությամբ տառապող երկրորդ խմբի հաշմանդամ հայրը:
Որպես պատասխանատվությունը և պատիժը մեղմացնող հանգամանք դատարանը դիտում է Ստեփան Սիմոնյանի խնամքին մինչև 14 տարեկան երկու երեխաների առկայությունը:
Պատասխանատվությունը և պատիժը ծանրացնող հանգամանքներ չկան:
Սույն քրեական գործով ամբաստանյալ Ստեփան Վոլոդյայի Սիմոնյանին մեղադրանք է առաջադրվել ՀՀ քրեական օրենսգրքի 311-րդ հոդվածի 1-ին մասով, որի սանկցիան նախատեսում է հետևյալ պատժատեսակները` ՙՏուգանք՝ նվազագույն աշխատավարձի երեքհարյուրապատիկից հինգհարյուրապատիկի չափով կամ ազատազրկում՝ առավելագույնը հինգ տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը երեք տարի ժամկետով՚:
ՀՀ քրեական օրենսգրքի 61-րդ հոդվածի 1-ին մասի համաձայն` ՙՀանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում՝ հաշվի առնելով սույն օրենսգրքի Ընդհանուր մասի դրույթները՚:
Վերլուծելով ՀՀ քրեական օրենսգրքի 311-րդ հոդվածի 1-ին մասի սանկցիայով նախատեսված ՙՏուգանք՚ պատժատեսակի նշանակման հնարավորությունը` դատարանը գտնում է, որ ամբաստանյալ Ստեփան Վոլոդյայի Սիմենյանի նկատմամբ ՀՀ քրեական օրենսգրքի 311-րդ հոդվածի 1-ին մասի սանկցիայով նախատեսված ՙՏուգանք՚ պատժատեսակը չի կարող նշանակվել, հետևյալ պատճառաբանությամբ.
Ամբաստանյալ Ստեփան Վոլոդյայի Սիմոնյանը ծառայելով իրավապահ մարմիններում` հանդիսանալով ոստիկանության աշխատակից, հանցագորոծությունները կանխելու փոխարեն, գիտակցաբար կատարել է քրեորեն հետապնդելի արարք` լինելով պաշտոնատար անձ, կաշառք տվողի օգտին իր լիազորությունների շրջանակում գործողություն չկատարելու համար, անձամբ ստացել է կաշառք, կատարել է միջին ծանրության հանցագործություն, ուստի վերը նշվածը հաշվի առնելով դատարանը գտնում է, որ ամբաստանյալ Ստեփան Վոլոդյայի Սիմոնյանի նկատմամբ պետք է նշանակել ՀՀ քրեական օրենսգրքի 311-րդ հոդվածի 1-ին մասի սանկցիայով նախատեսված ՙԱզատազրկում՚ պատժատեսակը:
Դատարանը քննարկելով ամբաստանյալի նկատմամբ ընտրված խափանման միջոցի, ապացույցների և իրեղեն ապացույցների հարցերը, գտնում է, որ ամբաստանյալ Ստեփան Վոլոդյայի Սիմոնյանի նկատմամբ ընտրված խափանման միջոցը` կալանավորումը, պետք է թողնել անփոփոխ, քրեական գործով ապացույց ճանաչված փաստաթղթերըª թղթադրամները քիմիական մշակման ենթարկելու, ՀՀ ոստիկանության Երևան քաղաքի վարչությունում լինելու, ձեռքերի, հագուստների զննության քիմիական նյութեր հայտնաբերելու մասին արձանագրությունները պետք է թողնել քրեական գործին կցված, քրեական գործով իրեղեն ապացույց ճանաչված` ամբաստանյալ Ստեփան Սիմոնյանի վերնահագուստը պետք է վերադարձնել նրան, թվով 5 հատª FB80424008E, HF80424008E, HB62251373L, HF80424009E և DL11463455A համարանիշերի 100 ԱՄՆ դոլարանոց թղթադրամները պետք է հանձնել ՀՀ ոստիկանության կազմակերպված հանցավորության դեմ պայքարի գլխավոր վարչությանը, ՙVCD-132՚ տեսաձայնասկավառակը պետք է թողնել քրեական գործին կցված, իսկ Ստեփան Սիմոնյանի ձեռքերից վերցված քիմիական նյութերով խծուծները պետք է ոչնչացնել` դատավճիռն օրինական ուժի մեջ մտնելու պահից:

Եզրափակիչ մաս.

Ղեկավարվելով ՀՀ քրեական դատավարության օրենսգրքի 357-360 և 3753 հոդվածներով, դատարանը.


Վ Ճ Ռ Ե Ց`

Ստեփան Վոլոդյայի Սիմոնյանին` մեղավոր ճանաչել ՀՀ քրեական օրենսգրքի 311 հոդվածի 1-ին մասով և նրան դատապարտել ազատազրկման` 1 /մեկ/ տարի ժամկետով` որոշակի պաշտոններ, այն է` ոստիկանության ծառայողի կամ քրեակատարողական ծառայողի պաշտոններ զբաղեցնելու իրավունքի զրկմամբ` 1 /մեկ/ տարի ժամկետով:
Ստեփան Վոլոդյայի Սիմոնյանի պատժի սկիզբը հաշվել 14.07.2011 թվականց, խափանման միջոցըª կալանավորումը, թողնել անփոփոխ:
Քրեական գործով ապացույց ճանաչված փաստաթղթերըª թղթադրամները քիմիական մշակման ենթարկելու, ՀՀ ոստիկանության Երևան քաղաքի վարչությունում լինելու, ձեռքերի, հագուստների զննության քիմիական նյութեր հայտնաբերելու մասին արձանագրությունները թողնել քրեական գործին կցված:
Քրեական գործով իրեղեն ապացույց ճանաչված` վերնահագուստը վերադարձնել Ստեփան Սիմոնյանին, թվով 5 հատª FB18247760C, HF80424008E, HB62251373L, HF80424009E և DL11463455A համարանիշերի 100 ԱՄՆ դոլարանոց թղթադրամները հանձնել ՀՀ ոստիկանության կազմակերպված հանցավորության դեմ պայքարի գլխավոր վարչությանը, ՙVCD-132՚ տեսաձայնասկավառակը թողնել քրեական գործին կցված, իսկ Ստեփան Սիմոնյանի ձեռքերից վերցված քիմիական նյութերով խծուծները ոչնչացնել` դատավճիռն օրինական ուժի մեջ մտնելու պահից:
Սույն դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում:


ԴԱՏԱՎՈՐ` Ա. ԲԵԿԹԱՇՅԱՆ