Գործ ԵԿԴ/0147/01/11
Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը

Նախագահությամբ դատավոր` Արմեն Բեկթաշյանի
քարտուղարությամբ` Լուսինե Ղամբարյանի
մասնակցությամբ` մեղադրող` Հայկ Էյրամջյանի

2011 թվականի օգոստոսի 04-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի`

Հակոբ Գագիկի Աբրահամյանի` ծնված 05.11.1986 թվականին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, չի աշխատում, նախկինում չդատված, հաշվառված և փաստացի բնակվում է Երևան քաղաքի, Նուբարաշեն 5-րդ փողոցի թիվ 5 տանը:

Հակոբ Գագիկի Աբրահամյանը մեղադրվում է ՀՀ քրեական օրենսգրքի 268 հոդվածի 1-ին մասվ:
25.05.2011 թվականի որոշմամբ Հակոբ Գագիկի Աբրահամյանի նկատմամբ որպես խափանման միջոց է ընտրվել ստորագրություն չհեռանալու մասին:

Գործի դատավարական նախապատմությունը.

ՀՀ ոստիկանության Կենտրոնականի բաժնում 2011 թվականի մայիսի 25-ին ՀՀ քրեական օրենսգրքի 268 հոդվածի 1-ին մասի հատկանիշներով հարուցվել է թիվ 13131211 քրեական գործը:
2011 թվականի մայիսի 25-ի որոշմամբ թիվ 13131211 քրեական գործով կասկածյալ Հակոբ Գագիկի Աբրահամյանի նկատմամբ որպես խափանման միջոց է ընտրվել ստորագրություն չհեռանալու մասին:
2011 թվականի մայիսի 27-ի որոշմամբ Հակոբ Գագիկի Աբրահամյանը ՀՀ քրեական օրենսգրքի 268 հոդվածի 1-ին մասով ներգրավվել է որպես մեղադրյալ:
Նախաքննական մարմնի կողմից Հակոբ Գագիկի Աբրահամյանին ՀՀ քրեական օրենսգրքի 268 հոդվածի 1-ին մասով մեղադրանք է առաջադրվել այն բանի համար, որ նա առանց իրացնելու նպատակի, ապօրինի ձեռք է բերել, պատրաստել ու պահել զգալի չափերի թմրամիջոց, այն է` Երևան քաղաքի Նուբարաշեն թաղամասի 5-րդ փողոցի 5-րդ տան բնակիչ Հակոբ Գագիկի Աբրահամյանը 2011 թվականի մայիսի 24-ին վարելով ՙԳազել՚ մակնիշի S 0100 պետհամարանիշի երթուղային ավտոմեքենան, գնացել է Արարատի մարզի Արևշատ գյուղ: Ճանապարհին, ժամը 1200-ի սահմաններում, Արևշատ գյուղի մոտակայքում` Ա. Պուշկինի փողոցին հարող դաշտում, նկատել է վայրի աճող կանեփի թփեր և հասկացել, որ դրանցից կարելի է թմրամիջոց պատրաստել, որից հետո Հ.Աբրահամյանը քաղելու միջոցով ապօրինի ձեռք է բերել կանեփի թփերը և մանրացնելու ու չորացնելու միջոցով ապօրինի կերպով պատրաստել է մարիխուանա տեսակի թմրամիջոց, որի մի մասը ծխելու միջոցով օգտագործել է, իսկ մնացած` 1,55 գրամ քաշով չորացված մարիխուանա տեսակի թմրամիջոցը պահել է իր մոտ: Ապօրինի թմրամիջոց պահելու կասկածանքով 2011 թվականի մայիսի 25-ին Հ.Աբրահամյանը բերման է ենթարկվել ՀՀ Ոստիկանության Կենտրոնականի բաժին, որտեղ կատարված անձնական խուզարկությամբ վերջինիս ջինսե տաբատի աջ գրպանից հայտնաբերվել է թղթի փաթեթ, որի մեջ առկա է եղել իր կողմից նախօրեին քաղված կանեփի մնացած մասը` 1,55 գրամ հաստատուն քաշով չորացրած մարիխուանա տեսակի թմրամիջոցը:
2011 թվականի հուլիսի 22-ին թիվ 13131211 քրեական գործը մեղադրական եզրակացությամբ ուղարկվել է ՀՀ Կենտրոն և Նորք-Մարաշ վարչական շրջանների ընդհանուր իրավասության դատարան:

Ապացույցների հետազոտում և գնահատում.

Ամբաստանյալ` Հակոբ Գագիկի Աբրահամյանը ՀՀ քրեական օրենսգրքի 268 հոդվածի 1-ին մասով առաջադրված մեղադրանքում իրեն մեղավոր ճանաչեց և ցուցմունք տվեց այն մասին, որ ընկերոջ հետ հանդիպելու նպատակով 2011 թվականի մայիսի 24-ին, ժամը 1200-ի սահմաններում գնացել է Արարատի մարզի Արևշատ գյուղ և ճանապարհին` Արևշատ գյուղի մոտ գտնվող դաշտերից մեկում նկատել է կանեփի թփեր, որոշել է անձնական օգտագործման նպատակով կանեփի թփերի տերևներից պոկել ու չորացնել: Ապա իջնելով ավտոմեքենայից իր անձնական օգտագործման համար քաղել է կանեփի տերևներից, որոնք հետո չորացրել է և դրա որոշ մասը մեկ անգամ ծխելու եղանակով օգտագործել է, իսկ մնացած մասը պահել է իր մոտ և դրա մասին ոչ ոքի չի հայտնել: Հաջորդ օրը` 2011 թվականի մայիսի 25-ին իր հայրն իրեն վատ է զգացել և ինքը որոշել է օգնել նրան` վարել ՙ89՚ համարի ՙԳազել՚ մակնիշի երթուղային ավտոմեքենան: Խանջյան փողոցում իրեն է կանգնեցրել անծանոթ մի տղա, հարցրել կայարան գնում է, թե ոչ, ինքն էլ ասել է, որ գնում է, որից հետո այդ տղան նստել է ավտոմեքենան ու ինքը վարել է դեպի կայարանի ուղղությամբ: Նույն փողոցում ինքը կանգնել է մի դեղատան մոտ և ուղևորին խնդրել է դեղատնից մի քանի հատ ՙպիպետկա՚ գնել, որից հետո ուղևորն իջել է ավտոմեքենայից, դեղատնից իր համար մի քանի հատ ՙպիպետկա՚ գնել ու տվել է իրեն: Ինքը դրանք դրել է իր տաբատի գրպանը և այդ ժամանակ իրենց են մոտեցել ոստիկանության աշխատակիցները և ժամը 1200-ի սահմաններում իրենց բերման են ենթարկել ոստիկանության բաժին, որտեղ էլ իր անձնական խուզարկությամբ` տաբատի աջ գրպանից հայտնաբերվել է իր մոտ պահած թմրամիջոցը: Ինքը որևէ մեկի թմրամիջոց չի իրացրել, կանեփի թփերը պոկել է իր անձնական օգտագործման համար: Կատարածի համար զղջում է:
Ամբաստանյալ Հակոբ Գագիկի Աբրահամյանի կատարած հանցանքը` ՀՀ քրեական օրենսգրքի 268 հոդվածի 1-ին մասով, հիմնավորվել են նաև հետևյալ ապացույցներով.
Վկա` Վլադ Կառլենի Մկրտչյանի նախաքննական ցուցմունքով այն մասին, որ աշխատում է ՙBF Փրինթ՚ տաքսի ծառայությունում` որպես վարորդ: 2011 թվականի մայիսի 25-ին, ժամը 24-ի սահմաններում, երբ ինքը գտնվել է Երևան քաղաքի Պարոնյան փողոցում, իրեն են մոտեցել ոստիկանության աշխատակիցներ և որպես ընթերակա հանդես գալու համար հրավիրել են ՀՀ ոստիկանության Կենտրոնի բաժանմունք, որտեղ եղել է ես մեկ ընթերակա և բերման ենթարկված երկու քաղաքացիների իրենց ներկայությամբ ենթարկել են անձնական խուզարկության, քաղաքացի Հովիկ Ավետիսյանի անձնական խուզարկությամբ ոչինչ չի հայտնաբերվել, իսկ Հակոբ Աբրահամյանի անձնական խուզարկությամբ նրա տաբատի աջ գրպանից հայտնաբերվել է սպիտակ թղթի մեջ փաթաթված դեղնականաչավուն զանգված, որն իրենց ներկայությամբ կշռվել է ոստիկանության աշխատակիցների կողմից, որը կազմել է մոտ երկու գրամ, որից հետո այն փաթեթավորվել ու կնիքվել է ոստիկանների կողմից: Այդ ժամանակ Հ.Աբրահամյանը հայտնել է, որ իր մոտից հայտնաբերվածը ՙպլան է՚` այսինքն թմրամիջոց, որն ինքը քաղել ու պահել է` անձնական օգտագործման համար: Դրանից հետո ոստիկանների կողմից կազմված արձանագրության տակ ինքը և մյուս ընթերական ստորագրել են և դուրս են եկել Կենտրոնականի բաժնից:
Վկա` Նորայր Էդվարդի Իսրայելյանի նախաքննական ցուցմունքով այն մասին, որ որ աշխատում է ՙԿառատ՚ տաքսի ծառայությունում` որպես վարորդ: 2011 թվականի մայիսի 25-ին, 0000-ից 0030-ն ընկած ժամանակահատվածում իր ավտոմեքենայով գտգտնվել է Երևան քաղաքի Պարոնյան փողոցում, իրեն են մոտեցել ոստիկանության աշխատակիցներ և որպես ընթերակա հանդես գալու համար հրավիրել են ՀՀ ոստիկանության Կենտրոնի բաժանմունք, որտեղ եղել է ես մեկ ընթերակա և բերման ենթարկված երկու քաղաքացիների իրենց ներկայությամբ ենթարկել են անձնական խուզարկության, քաղաքացի Հովիկ Ավետիսյանի անձնական խուզարկությամբ ոչինչ չի հայտնաբերվել, իսկ Հակոբ Աբրահամյանի անձնական խուզարկությամբ նրա տաբատի աջ գրպանից հայտնաբերվել է սպիտակ թղթի մեջ փաթաթված դեղնականաչավուն զանգված, որն իրենց ներկայությամբ կշռվել է ոստիկանության աշխատակիցների կողմից, որը կազմել է մոտ երկու գրամ, որից հետո փաթեթավորվել ու կնիքվել է ոստիկանների կողմից: Այդ ժամանակ Հ.Աբրահամյանը հայտնել է, որ իր մոտից հայտնաբերվածը ՙպլան է՚` այսինքն թմրամիջոց, որն ինքը քաղել ու պահել է` անձնական օգտագործման համար: Դրանից հետո ոստիկանների կողմից կազմված արձանագրության տակ ինքը և մյուս ընթերական ստորագրել են և դուրս են եկել Կենտրոնականի բաժնից:
Դատաքիմիական փորձաքննության թիվ 177 Ք եզրակացությամբ այն մասին, որ փորձաքննության ներկայացված 1,55 գրամ հաստատուն քաշով նյութը հանդիսանում է չորացված մարիխուանա տեսակի թմրամիջոց: /Հետազոտությամբ ծախսվել է 0,1 գրամ մարիխուանա/:
Տոքսիկոքիմիական փորձաքննության Հմ` 11-1427 եզրակացությամբ այն մասին, որ Հակոբ Գագիկի Աբրահամյանից վերցված մեզի և մազի փորձանմուշների մեջ հայտնաբերվել են կանաբինոիդների խմբին պատկանող թմրամիջոցի թմրալկալոիդներ:
Դատաքիմիական փորձաքննության 184 Ք եզրակացությամբ այն մասին, որ փորձաքննության ներկայացված ընդհանուր 307 գրամ քաշով ամբողջական բույսերը հանդիսանում են կանեփի թփեր, պարունակում են թմրալկալոիդ տետրահիդրոկաննաբինոլ: Թփերի սորտային պատկանելիությունը պարզել հնարավոր չէ` բույսերի վեգետացիայի ոչ ավարտական փուլում գտնվելու պատճառով: Փորձաքննության ներկայացված կանեփի թփերը և Հ.Աբրահամյանի անձնական խուզարկության ժամանակ հայտնաբերված, Հմ. 177 Ք եզրակացությամբ հետազոտված, չորացված մարիխուանա տեսակի թմրամիջոցը, ըստ մորֆոլոգիական հատկանիշների և հանքային քիմիական բաղադրության միմյանցից տարբերվում են:
Դատանարկոլոգիական փորձաքննության թիվ 0143-11 եզրակացությամբ այն մասին, որ Հակոբ Գագիկի Աբրահամյանի մոտ թմրանյութերի գործածումը կրում է էպիզոդիկ բնույթ, ուստի հարկադիր բուժման կարիք չունի:
Հակոբ Գագիկի Աբրահամյանին անձնական խուզարկության ենթարկելու մասին արձանագրությամբ, իրեղեն ապացույցներով և քրեական գործի մյուս նյութերով:
Հակոբ Գագիկի Աբրահամյանին անձնական խուզարկության ենթարկելու մասին արձանագրությամբ, իրեղեն ապացույցներով և քրեական գործի մյուս նյութերով:
Քննչական փորձարարություն կատարելու վերաբերյալ արձանագրությամբ այն մասին, որ Հակոբ Գագիկի Աբրահամյանը մատնացույց է արելԱրարտի մարզի Արևշատ գյուղի Ա.Պուշկինի փողոցի մերձակայքում գտնվող դաշտը և հայտարարել, որ 2011 թվականի մայիսի 24-ին նշված վայրից քաղել է կանեփի թփեր` հետագայում ծխելու եղանակով գործածելու համար:
Դատարանը, հետազոտելով քրեական գործով ձեռք բերված ապացույցները և գնահատելով դրանց վերաբերելիության, թույլատրելիության, իսկ ամբողջ ապացույցներն իրենց համակցությամբ գործի լուծման համար բավարարության տեսանկյունից, հանգում է այն հետևության, որ ամբաստանյալ Հակոբ Գագիկի Աբրահամյանը ընկերոջը տեսակցելու նպատակով 2011 թվականի մայիսի 24-ին ժամը 1200-ի սահմաններում, իր հորը պատկանող ՙԳազել՚ մակնիշի S 0100 պետհամարանիշի ՙ89՚ երթուղային ավտոմեքենայով գնացել է Արարատի մարզի Արևշատ գյուղ: Ճանապարհին` Արևշատ գյուղի Ա.Պուշկինի փողոցին հարող դաշտում, նկատելով կանեփի թփեր, որոշել իր օգտագործման համար այդ թփերից քաղել, չորացնել ու թմրամիջոց պատրաստել, որից հետո Հ.Աբրահամյանը քաղելու միջոցով ապօրինի ձեռք է բերել կանեփի թփերը և մանրացնելու ու չորացնելու միջոցով պատրաստել է մարիխուանա տեսակի թմրամիջոց, որի մի մասը ծխելու միջոցով օգտագործել է, իսկ մնացած` 1,55 գրամ քաղով չորացված մարիխուանա տեսակի թմրամիջոցը պահել է իր մոտ: Թմրամիջոց ապօրինի պահելու կասկածանքով ՀՀ Ոստիկանության Կենտրոնականի բաժի աշխատակիցների կողմից 2011 թվականի մայիսի 25-ին Հ.Աբրահամյանը բերման է ենթարկվել ՀՀ Ոստիկանության Կենտրոնականի բաժին, որտեղ ընթերակաների մասնակցությամբ կատարված անձնական խուզարկությամբ վերջինիս տաբատի աջ գրպանից հայտնաբերվել է թղթի փաթեթ, որի մեջ եղել իր կողմից քաղված կանեփի մնացած մասը` 1,55 գրամ հաստատուն քաշով չորացրած մարիխուանա տեսակի թմրամիջոցը:

Դատարանի իրավական վերլուծությունները.

Այսպիսով, ընդհանուր կարգով սահմանված դատաքննությամբ հետազոտված ապացույցների հիման վրա դատարանն ապացուցված է համարում, որ ամբաստանյալ Հակոբ Գագիկի Աբրահամյանը առանց իրացնելու նպատակի, ապօրինի ձեռք է բերել, պատրաստել ու պահել զգալի չափերով թմրամիջոց` որպիսի արարքի համար նա պետք է պատասխանատվության ենթարկվի ՀՀ քրեական օրենսգրքի 268 հոդվածի 1-ին մասով:
ՀՀ քրեական օրենսգրքի 61-րդ հոդվածի 2-րդ մասի համաձայն` պատժի չափը և տեսակը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով:
Ամբաստանյալ Հակոբ Գագիկի Աբրահամյանը նախկինում դատապարտված չի եղել:
Պատասխանատվությունը և պատիժը մեղմացնող ու ծանրացնող հանգամանքներ չկան:
Դատարանը քննարկելով ամբաստանյալի նկատմամբ ընտրված խափանման միջոցի և իրեղեն ապացույցի հարցերը, գտնում է, որ ամբաստանյալ Հակոբ Գագիկի Աբրահամյանի նկատմամբ ընտրված խափանման միջոցը` ստորագրություն չհեռանալու մասին, պետք է վերացնել և նրան պետք է վերցնել կալանքի դատական նիստերի դահլիճում, իսկ քրեական գործով իրեղեն ապացույց ճանաչված 1,45 գրամ քաշով չորացված մարիխուանա տեսակի թմրամիջոցը պետք է ոչնչացենլ` դատավճիռն օրինական ուժի մեջ մտնելու պահից:

Եզրափակիչ մաս.

Ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց`

Հակոբ Գագիկի Աբրահամյանին մեղավոր ճանաչել ՀՀ քրեական օրենսգրքի 268 հոդվածի 1-ին մասով և նրան դատապարտել ազատազրկման 3 /երեք/ ամիս ժամկետով:
Հակոբ Գագիկի Աբրահամյանի նկատմամբ ընտրված խափանման միջոցը` ստորագրություն չհեռանալու մասին, վերացնել և նրան վերցնել կալանքի դատական նիստերի դահլիճում:
Հակոբ Գագիկի Աբրահամյանի պատժի սկիզբը հաշվել 04.08.2011 թվականից:
Քրեական գործով իրեղեն ապացույց ճանաչված 1,45 գրամ քաշով չորացված մարիխուանա տեսակի թմրամիջոցը ոչնչացենլ` դատավճիռն օրինական ուժի մեջ մտնելու պահից:
Սույն դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում:


ԴԱՏԱՎՈՐ` Ա. ԲԵԿԹԱՇՅԱՆ