ԵԿԴ/0144/01/11





ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«18» հուլիսի 2012թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղարներ Ռ.Ավետյան
Կ.Կարապետյան
մեղադրող Ս.Աբրահամյան
Ա.Քալաշյան
Հ.Էյրմաջյան
տուժող Տ.Ավետիսյան
պաշտպան Կ.Մանուչարյան

դռնբաց դատական նիստում քննեց քրեական գործն ըստ մեղադրանքի`
Քրիստինե Միխայելի Տատարոգուլոյի` ծնված 1979 թվականի հոկտեմբերի 5-ին Երևան քաղաքում, ազգությամբ հույն, ՀՀ քաղաքացի, միջնակարգ կրթությամբ, չամուսնացած, չի աշխատում, նախկինում դատապարտված, հաշվառված է Երևան քաղաքի Վարդաշենի 6-րդ փողոցի 68ա շենքի 531-րդ սենյակում, մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով, արգելանքի տակ է 2011 թվականի հունիսի 6-ից:
1. Գործի դատավարական նախապատմությունը.
2011 թվականի հունիսի 6-ին ՀՀ ոստիկանության Կենտրոնականի քննչական բաժնի ավագ քննիչ Հ.Սարգսյանի որոշմամբ ՀՀ քրեական օրենսգրքի 316-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 13132611 քրեական գործը:
2011 թվականի հունիսի 6-ին ՀՀ ոստիկանության Կենտրոնականի քննչական բաժնի ավագ քննիչ Հ.Սարգսյանի որոշմամբ թիվ 13132611 քրեական գործով Քրիստինե Միխայելի Տատարոգուլոյին մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով:
2011 թվականի հուլիսի 9-ին ՀՀ ոստիկանության Կենտրոնականի քննչական բաժնի ավագ քննիչ Հ.Սարգսյանի որոշմամբ թիվ 13132611 քրեական գործով Քրիստինե Միխայելի Տատարոգուլոյին առաջադրված մեղադրանքը փոփոխվել է և նրան նոր մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով:
2011 թվականի հուլիսի 21-ին Քրիստինե Միխայելի Տատարոգուլոյի վերաբերյալ թիվ 13132611 քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան, որտեղ քրեական գործին շնորհվել է ԵԿԴ/0144/01/11 համարը:
2011 թվականի հուլիսի 22-ին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի դատավոր Գ.Ավետիսյանի որոշմամբ թիվ ԵԿԴ/0144/01/11 քրեական գործն ընդունվել է վարույթ:
2011 թվականի հոկտեմբերի 27-ին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի դատավոր Մ.Պապոյանի որոշմամբ թիվ ԵԿԴ/0144/01/11 քրեական գործն ընդունվել է վարույթ:
Քրիստինե Միխայելի Տատարոգուլոյին մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով` այն արարքի համար, որ նա 2011 թվականի հունիսի 5-ին` ժամը 23:00-ի սահմաններում, գտնվելով 1-ին աստիճանի ալկոհոլային հարբածության վիճակում, Երևան քաղաքի Բաղրամյան և Մոսկովյան փողոցների խաչմերուկում չենթարկվելով իր ծառայողական պարտականությունները կատարող իշխանության ներկայացուցիչ` ՀՀ ոստիկանության ՊՊԾ գնդի 3-րդ հատուկ գումարտակի 1-ին վաշտի 2-րդ դասակի ոստիկան, ոստիկանության կրտսեր սերժանտ Տիգրան Ալեքսանի Ավետիսյանի օրինական պահանջներին, իր ծառայողական պարտականությունները կատարելու հետ կապված` հասարակական կարգի խախտումը դադարեցնելու համար, վիճաբանել է նրա հետ, տվել սեռական բնույթի հայհոյանքներ և առողջության համար ոչ վտանգավոր բռնություն գործադրելով` ձեռքին եղած անձրևանոցով հարվածներ է հասցրել վերջինի գլխին և մարմնի այլ մասերին` պատճառելով ֆիզիկական ցավ և թեթև վնասի հատկանիշներ չպարունակող մարմնական վնասվածք` ձախ դաստակի 1-ին մատի հիմնային ֆալանգի ափային մակերեսի քերծվածքի ձևով:
2. Ապացույցների հետազոտում և գնահատում.
Դատական քննության ընթացքում ամբաստանյալ Քրիստինե Տատարոգուլոն առաջադրված մեղադրանքում իրեն մեղավոր չճանաչեց, սակայն դատական վիճաբանությունների փուլում` իր ճառում, զղջաց կատարածի համար և խնդրեց մեղմ պատիժ սահմանել: Ամբաստանյալ Քրիստինե Տատարոգուլոն ցուցմունք տվեց այն մասին, որ 2011 թվականի հունիսի 5-ին ինքը տանը 2-3 բաժակ օղի է խմել և պարտքով գումար խնդրելու համար գնացել է ընկերուհու մոտ, ով եղել է «Օպերայի և բալետի ազգային ակադեմիական թատրոնի» հարևանությամբ: Նշված վայրում ինքը մոտեցել է իր ծանոթ երկու աղջիկներին` Վարսենիկին ու Մարինեին: Այդ ժամանակ իրենց մոտեցել են ոստիկանության համազգեստով երկու ոստիկաններ ու իրենց ասել, որպեսզի իրենք «ռադ լինեն» այդտեղից: Աղջիկները վախենալով ասել են ներողություն ու գնացել են: Իսկ ինքը նրանց ասել է, որ նրանք իրեն նման պահանջ ներկայացնելու իրավունք չունեն, և ինքն այդտեղից չի գնում: Ոստիկաններն իրեն ասել են, որ եթե ինքը չգնա այդտեղից, ապա նրանք իրեն ոստիկանություն կտանեն, իսկ ինքը նրանց պատասխանել է, որ ինքն այնպիսի արարք չի արել, որ նրանք իրեն ոստիկանություն տանեն: Այդ ժամանակ ոստիկանները մեքենա են կանչել: Այնուհետև եկել է ոստիկանության մեքենան, որի միջից դուրս է եկել ևս մեկ ոստիկան, ով կոպիտ արտահայտությամբ ասել է. «սրա համար են մեքենա կանչել»: Դրանից հետո ոստիկանները փորձել են իր ձեռքից քաշել, իսկ ինքն ասել է, որպեսզի իր ձեռքը թողեն, ինքն ինքնուրույն կնստի նրանց մեքենան: Ոստիկանները հայհոյել են, բռնել իր մազերից ու քաշել-նստեցրել մեքենան: Այդ ժամանակ կոտրվել է իր կոշիկի կրունկը: Մեքենայի մեջ ինքը նրանց ասել է, որ ազգությամբ հույն է և ինքը կդիմի այնտեղ, որտեղ պետք է ու նրանք պատասխան կտան իրենց արարքի համար: Մեքենայի մեջ ոստիկաններն իրեն տվել են իր անձրևանոցը, որը եղել է կոտրված: Ինքը կարծում է, որ ոստիկանները իրեն որպես մարմնավաճառի են տարել ոստիկանություն: Ոստիկանությունում ինքը խնդրել է, որպեսզի նրանք իրեն թույլ տան գնալ տուն, սակայն նրանք թույլ չեն տվել: Այդ ամենից ինքը վիրավորվել է, գնացել է զուգարան և գարեջրի շշի ապակիով վնասել է իրեն: Ինքը չի հիշում, որ անձրևանոցով հարվածած լինի ոստիկաններին: Իր ընկերները զբաղվում են մարմնավաճառությամբ, ինքը նույնպես զբաղվել է մարմնավաճառությամբ և կանգնել այդ նույն վայրում, սակայն մոտ մեկ ամիս էր չէր զբաղվում դրանով:
Տուժող Տիգրան Ավետիսյանը դատական քննության ընթացքում ցուցմունք տվեց այն մասին, որ աշխատում է ՀՀ ոստիկանության Երևան քաղաքի վարչության ՊՊԾ գնդի 3-րդ հատուկ գումարտակի 1-ին վաշտի 2-րդ դասակում` որպես ոստիկան: 2011 թվականի հունիսի 5-ին Գևորգ Զաքարյանի հետ միասին ծառայություն են իրականացրել Կասկադ համալիրի և Մոսկովյան փողոցի միջև ընկած տարածքում: Նույն օրը` ժամը 23:00-ի սահմաններում, իրենց սպասարկվող երթուղու հարակից տարածքից` Բաղրամյան և Մոսկովյան փողոցների խաչմերուկի մոտից լսել են աղմուկի ձայներ: Ձայների ուղղությամբ մոտենալով` նկատել են երեք մարմնավաճառների, ովքեր բարձրաձայն գռեհիկ ծիծաղել են և հայհոյել միմյանց: Իրենք նրանցից պահանջել են դադարեցնել հասարակական կարգի խախտումը` հայհոյանքները, և հեռանալ այդտեղից: Նրանցից երկուսն ընդունել են իրենց օրինական պահանջներն ու հեռացել են, իսկ Քրիստինե Տատարոգուլոն շարունակել է հայհոյել, չի ենթարկվել իրենց օրինական պահանջներին, և ասել, թե իրենք ով են, որ նրան ասեն ինչ անի: Իրենք մոտ 10 րոպե փորձել են հանգստացնել նրան, սակայն նա շարունակել է սեռական բնույթի հայհոյանքներ տալ նաև իրենց: Դրանից հետո իրենք ռադիոկապի միջոցով կանչել են պարեկային ավտոմեքենա: Ավտոմեքենայի գալուց հետո իրենք փորձել են Քրիստինեին մոտեցնել ավտոմեքենային, սակայն նա ձեռքին գտնվող անձրևանոցով մի քանի անգամ հարվածել է իր գլխին, ուսին ու մարմնի տարբեր հատվածներին: Այնուհետև իրենք բռնել են նրա ձեռքից, նրան նստեցրել ավտոմեքենան ու տարել ՀՀ ոստիկանության Կենտրոնականի բաժին: Այդ ժամանակ Քրիստինեն եղել է ոգելից խմիչքի ազդեցության տակ:
Վկա Գևորգ Զաքարյանը դատական քննության ընթացքում ցուցմունք տվեց այն մասին, որ ինքը ոստիկան է և 2011 թվականի հունիսի 5-ին ծառայություն է իրականացրել Երևան քաղաքի Կենտրոն վարչական շրջանում: Նույն օրը` ժամը 23:30-ի սահմաններում, ինքը և իր գործընկեր Տիգրան Ավետիսյանը Բաղրամյան և Մոսկովյան փողոցների խաչմերուկի մոտ լսել են բարձր ձայներ, որի պատճառով մոտեցել են և տեսել երեք կանանց, ովքեր բարձրաձայն հայհոյանքներ են տվել միմյանց: Իրենք նրանցից պահանջել են, որպեսզի չխախտեն հասարակական կարգը: Նրանցից երկուսը ենթարկվել են իրենց օրինական պահանջներին ու հեռացել այդտեղից, իսկ երրորդը` Քրիստինե Տատարոգուլոն, սկսել է զազրախոսել և հայհոյել իրենց: Դրանից հետո իրենք ռադիոկապի միջոցով կանչել են պարեկային ավտոմեքենա: Ավտոմեքենայի մոտենալուց հետո, Տիգրանը փորձել է Քրիստինեին մոտեցնել ավտոմեքենային, որպեսզի նրան բերման ենթարկեն ոստիկանություն, սակայն նա անձրևանոցով մի քանի անգամ հարվածել է Տիգրանի գլխին ու մարմնի տարբեր մասերին: Այնուհետև պարեկային ավտոմեքենայի ավագ Վարուժան Գասկասյանի օգնությամբ իրենք նրան նստեցրել են մեքենան ու բերման ենթարկել ՀՀ ոստիկանության Կենտրոնականի բաժին:
Վկա Վարուժան Գասկասյանը դատական քննության ընթացքում ցուցմունք տվեց այն մասին, որ դեպքի օրը ծառայություն է իրականացրել Երևան քաղաքի Մաշտոցի պողոտայում: Այդ ժամանակ ռադիոկապի միջոցով իրենց կանչել են Բաղրամյան և Մոսկովյան փողոցների խաչմերուկի մոտ: Իրենք գնացել են նշված վայր, որտեղ Քրիստինե Տատարոգուլոն գոռգոռացել է, հայհոյել ոստիկաններին ու անձրևանոցով մի քանի անգամ հարվածել Տիգրան Ավետիսյանի գլխին: Ավտոմեքենայի վարորդ Հայկն իջել է մեքենայից, բռնել նրա ձեռքից, բերել, նստեցրել է ավտոմեքենան, և նրան բերման են ենթարկել ոստիկանության բաժին:
Վկա Հայկ Նաջարյանը դատական քննության ընթացքում ցուցմունք տվեց այն մասին, որ 2011 թվականի հունիսի 5-ին` ժամը 23:00-ի սահմաններում, պարեկային ավտոմեքենայով իրենք իրականացրել են ծառայություն: Այդ ժամանակ ռադիոկապի միջոցով իրենց օգնության են կանչել: Իրենք գնացել են կանչվող վայր և տեսել, որ Տիգրան Ավետիսյանը բռնել է Քրիստինե Տատարոգուլոյի ձեռքից, և նրանք մոտենում են ավտոմեքենային: Ինքը դուրս է եկել ավտոմեքենայից ու հենց այդ պահին Քրիստինեն սև անձրևանոցով հարվածել է Տիգրանի գլխին: Ինքը մոտեցել է նրանց և մի կերպ Քրիստինեին նստեցրել են ավտոմեքենան: Ավտոմեքենայի մեջ Քրիստինեն շարունակել է սեռական բնույթի հայհոյանքներ տալ իրենց: Քրիստինեն եղել է ոգելից խմիչքի ազդեցության տակ, քանի որ նրա վրայից ալկոհոլի հոտ է եկել:
Տիգրան Ավետիսյանի և Քրիստինե Տատարոգուլոյի 2011 թվականի հունիսի 8-ի առերես հարցաքննության արձանագրության համաձայն` Տիգրան Ավետիսյանը ցուցմունք է տվել այն մասին, որ 2011 թվականի հունիսի 5-ին Գևորգ Զաքարյանի հետ ծառայություն է իրականացրել թիվ 0383 երթուղում, որն իր մեջ ներառում է Մոսկովյան փողոցից «Կասկադ» համալիրի մերձակա տարածքը: Նույն օրը` ժամը 23:00-ի սահմաններում, Բաղրամյան և Մոսկովյան փողոցների խաչմերուկում գտնվող բանկոմատի կողմից լսվել են աղմուկի ձայներ, ինչի պատճառով մոտեցել են և տեսել երեք մարմնավաճառների, ովքեր գռեհիկ ծիծաղել և սեռական բնույթի հայհոյանքներ են տվել: Իրենք նրանցից պահանջել են դադարեցնել հասարակական կարգի խախտումը: Նրանցից երկուսը ենթարկվել են իրենց օրինական պահանջներին, իսկ մյուսը` Քրիստինե Տատարոգուլոն, շարունակել է և սկսել սեռական բնույթի հայհոյանքներ տալ իրենց: Իրենք փորձել են հանգստացնել նրան, սակայն նա կրկին չի ենթարկվել իրենց օրինական պահանջներին, որի պատճառով իրենք ռադիոկապի միջոցով օգնություն են կանչել թիվ 0311 պարեկային ավտոմեքենային: Թիվ 0311 պարեկային ավտոմեքենայի մոտենալուց հետո ինքը փորձել է Քրիստինեին մոտեցնել ավտոմեքենան, սակայն նա ձեռքում գտնվող անձրևանոցով մի քանի անգամ հարվածել է իր գլխին, ձեռքերին և ուսին, որի հետևանքով անձրևանոցը կոտրվել է: Այդ ժամանակ իրենք, նրա ձեռքից բռնած քաշելով, նրան մոտեցրել են պարեկային ավտոմեքենային և բերման ենթարկել ՀՀ ոստիկանության Կենտրոնականի բաժին: Իսկ Քրիստինե Տատարոգուլոն ցուցմունք է տվել, այն մասին, որ Տիգրան Ավետիսյանը ստում է, իրենք հայհոյանքներ չեն տվել, չեն վիրավորել և չեն հարվածել: Դեպքը եղել է այնպես, ինչպես ինքն է հայտնել իր ցուցմունքում:
Փորձագետի 2011 թվականի հունիսի 6-ի թիվ 1484 եզրակացության համաձայն` Տիգրան Ավետիսյանի ստացած մարմնական վնասվածքը` ձախ դաստակի 1-ին մատի հիմնային ֆալանգի ափային մակերեսի քերծվածքի ձևով հասցվել է բութ, կոշտ առարկայով, հնարավոր է նշված ժամկետում, չի բացառվում որոշման մեջ նկարագրված գործի հանգամանքներում, որը առողջության թեթև վնասի հատկանիշներ չի պարունակում:
Փորձագետի 2011 թվականի հունիսի 20-ի թիվ 1287 եզրակացության համաձայն` ներկայացված անձրևանոցի վրա առկա վնասվածքները կարող էին առաջանալ ինչպես համեմատաբար պինդ առարկային հարվածելու, այնպես էլ ձեռքով վնասված մասերում ֆիզիկական ուժի ներգործությունների` հնարավոր է նաև մարդու մարմնին հարվածելու հետևանքով:
Իրեղեն ապացույց ճանաչելու մասին 2011 թվականի հունիսի 21-ի որոշման համաձայն` Քրիստինե Տատարոգուլոյին պատկանող անձրևանոցը ճանաչվել է իրեղեն ապացույց և կցվել քրեական գործին, որը հետազոտել է դատական քննության ընթացքում:
Ծննդյան թիվ ԱԱ020805 վկայականի պատճենի համաձայն` 2004 թվականի նոյեմբերի 2-ին ծնված Մելինե Սահակի Տատարոգուլոյի մայրը Քրիստինե Միխայելի Տատարոգուլոն է:
Սթափության վիճակի զննության թիվ 102133 արձանագրության համաձայն` 2011 թվականի հունիսի 6-ին` ժամը 04:00-ին, կատարված զննությամբ Քրիստինե Տատարոգուլոն գտնվել է առաջին աստիճանի հարբածության վիճակում:
ՀՀ ոստիկանության ինֆորմացիոն կենտրոնի պահանջագրի համաձայն` 2007 թվականի սեպտեմբերի 19-ին Երևան քաղաքի Էրեբունի և Նուբարաշեն համայնքների առաջին ատյանի դատարանի դատավճռով Քրիստինե Միխայելի Տատարոգուլոն մեղավոր է ճանաչվել ՀՀ քրեական օրենսգրքի 258-րդ հոդվածի 2-րդ մասով, 258-րդ հոդվածի 4-րդ մասով, 113-րդ հոդվածի 1-ին մասով և ՀՀ քրեական օրենսգրքի 66-րդ հոդվածի կիրառմամբ դատապարտվել ազատազրկման` 4 (չորս) տարի 6 (վեց) ամիս ժամկետով: 2010 թվականի նոյեմբերի 4-ին պայմանական վաղաժամկետ ազատվել է պատժի մնացած մասը` 1 (մեկ) տարի 2 (երկու) ամիս 5 (հինգ) օր ժամկետով ազատազրկումը կրելուց:
2007 թվականի սեպտեմբերի 19-ին Երևան քաղաքի Էրեբունի և Նուբարաշեն համայնքների առաջին ատյանի դատարանի դատավճռի համաձայն` Քրիստինե Միխայելի Տատարոգուլոն մեղավոր է ճանաչվել ՀՀ քրեական օրենսգրքի 258-րդ հոդվածի 2-րդ մասով, 258-րդ հոդվածի 4-րդ մասով և 113-րդ հոդվածի 1-ին մասով: ՀՀ քրեական օրենսգրքի 258-րդ հոդվածի 2-րդ մասով նրա նկատմամբ պատիժ է նշանակվել ազատազրկում` 3 (երեք) ամիս ժամկետով: ՀՀ քրեական օրենսգրքի 258-րդ հոդվածի 4-րդ մասով նրա նկատմամբ պատիժ է նշանակվել ազատազրկում` 4 (չորս) տարի ժամկետով: ՀՀ քրեական օրենսգրքի 113-րդ հոդվածի 1-ին մասով նրա նկատմամբ պատիժ է նշանակվել ազատազրկում` 6 (վեց) ամիս ժամկետով: ՀՀ քրեական օրենսգրքի 66-րդ հոդվածի կիրառմամբ նրա նկատմամբ վերջնական պատիժ է սահմանվել ազատազրկում` 4 (չորս) տարի 6 (վեց) ամիս ժամկետով, պատժի կրման սկիզբը հաշվվել է 2007 թվականի հուլիսի 9-ից:
Կոտայքի մարզի ընդհանուր իրավասության առաջին ատյանի դատարանի 2010 թվականի նոյեմբերի 4-ի որոշման համաձայն` Քրիստինե Միխայելի Տատարոգուլոն պայմանական վաղաժամկետ ազատվել է պատժի մնացած մասը` 1 (մեկ) տարի 2 (երկու) ամիս 5 (հինգ) օր ժամկետով ազատազրկումը կրելուց:
Ձերբակալման 2011 թվականի հունիսի 6-ի արձանագրության համաձայն` 2011 թվականի հունիսի 6-ին` ժամը 15:30-ին, Քրիստինե Միխայելի Տատարոգուլոն ձերբակալվել է:
Կալանավորումը որպես խափանման միջոց ընտրելու մասին միջնորդությունը քննության առնելու մասին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2011 թվականի հունիսի 8-ի որոշման համաձայն` Քրիստինե Միխայելի Տատարոգուլոյի նկատմամբ որպես խափանման միջոց ընտրվել է կալանավորումը, կալանավորման սկիզբը հաշվվել է 2011 թվականի հունիսի 6-ից:
3. Դատարանի իրավական վերլուծությունները.
Վերոգրյալ ապացույցները վերլուծելու և համադրելու արդյունքում Դատարանը գալիս է այն եզրահանգման, որ Քրիստինե Միխայելի Տատարոգուլոն 2011 թվականի հունիսի 5-ին` ժամը 23:00-ի սահմաններում, Երևան քաղաքի Բաղրամյան և Մոսկովյան փողոցների խաչմերուկում բարձրաձայն հայհոյել է, որից հետո չենթարկվելով ծառայություն իրականացնող ՀՀ ոստիկանության ՊՊԾ գնդի 3-րդ հատուկ գումարտակի 1-ին վաշտի 2-րդ դասակի ոստիկան Տիգրան Ալեքսանի Ավետիսյանի օրինական պահանջներին, հայհոյել է նրան և անձրևանոցով հարվածել նրա գլխին ու մարմնի տարբեր մասերին` պատճառելով թեթև վնասի հատկանիշներ չպարունակող մարմնական վնասվածք` ձախ դաստակի 1-ին մատի հիմնային ֆալանգի ափային մակերեսի քերծվածքի ձևով: Այսինքն` Քրիստինե Միխայելի Տատարոգուլոն առողջության համար ոչ վտանգավոր բռնություն է գործադրել իշխանության ներկայացուցչի նկատմամբ` կապված նրա կողմից իր ծառայողական պարտականությունները կատարելու հետ, ինչը համապատասխանում է ՀՀ քրեական օրենսգրքի 316-րդ հոդվածի 1-ին մասի հատկանիշներին:
Ապացուցված է Քրիստինե Միխայելի Տատարոգուլոյի մեղավորությունը ՀՀ քրեական օրենսգրքի 316-րդ հոդվածի 1-ին մասով նախատեսված արարքը կատարելու մեջ:
Քրիստինե Տատարոգուլոյի անձը դրականորեն բնութագրող հանգամանք է կատարածի համար զղջալը:
Դատարանը գտնում է, որ Քրիստինե Տատարոգուլոյի պատասխանատվությունն ու պատիժը մեղմացնող հանգամանք է խնամքին 14 տարին չլրացած երեխայի (Մելինե Սահակի Տատարոգուլո` ծնված 2004 թվականի նոյեմբերի 2-ին) առկայությունը:
Դատարանը գտնում է, որ Քրիստինե Տատարոգուլոյի պատասխանատվությունն ու պատիժը ծանրացնող հանգամանք է հանցանքն ալկոհոլի ազդեցության տակ կատարելը:
Կատարած արարքի համար ամբաստանյալ Քրիստինե Տատարոգուլոն ենթակա է քրեական պատասխանատվության և պատժի:
Դատարանը, հաշվի առնելով Քրիստինե Տատարոգուլոյի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալը, պատասխանատվությունն ու պատիժը մեղմացնող և ծանրացնող հանգամանքները, ինչպես նաև այն, որ Քրիստինե Տատարոգուլոյի կատարած արարքի համար ՀՀ քրեական օրենսգրքի 316-րդ հոդվածի 1-ին մասի սանկցիայով նախատեսված է պատիժ նաև ազատազրկման ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով:
Դատարանը միաժամանակ հարկ է համարում նկատել, որ Կոտայքի մարզի ընդհանուր իրավասության առաջին ատյանի դատարանի 2010 թվականի նոյեմբերի 4-ի որոշմամբ Քրիստինե Միխայելի Տատարոգուլոն պայմանական վաղաժամկետ ազատվել է Երևան քաղաքի Էրեբունի և Նուբարաշեն համայնքների առաջին ատյանի դատարանի 2007 թվականի սեպտեմբերի 19-ի դատավճռով նշանակված` 4 (չորս) տարի 6 (վեց) ամիս ժամկետով ազատազրկման ձևով պատժի մնացած մասը` 1 (մեկ) տարի 2 (երկու) ամիս 5 (հինգ) օրը կրելուց և այդ ընթացքում` 2011 թվականի հունիսի 5-ին, կատարել է սույն դատավճռով հաստատված արարքը:
ՀՀ քրեական օրենսգրքի 76-րդ հոդվածի 6-րդ մասի 3-րդ կետի համաձայն` եթե պատժի չկրած մասի ընթացքում դատապարտյալը կատարում է դիտավորյալ հանցանք, ապա դատարանը նրա նկատմամբ պատիժ է նշանակում ՀՀ քրեական օրենսգրքի 67-րդ հոդվածով նախատեսված կանոններով:
Դատարանը, նկատի ունենալով, որ Քրիստինե Տատարոգուլոն պատժի չկրած մասի ընթացքում կատարել է միջին ծանրության դիտավորյալ հանցանք, գտնում է, որ Կոտայքի մարզի ընդհանուր իրավասության առաջին ատյանի դատարանի 2010 թվականի նոյեմբերի 4-ի որոշմամբ նրա նկատմամբ կիրառված պայմանական վաղաժամկետ ազատումը պետք է վերացնել և Քրիստինե Տատարոգուլոյի նկատմամբ վերջնական պատիժ նշանակել ՀՀ քրեական օրենսգրքի 67-րդ հոդվածով սահմանված կարգով` սույն դատավճռով նշանակված պատիժին մասնակիորեն գումարել Երևան քաղաքի Էրեբունի և Նուբարաշեն համայնքների առաջին ատյանի դատարանի 2007 թվականի սեպտեմբերի 19-ի դատավճռով նշանակված վերջնական պատժի` 4 (չորս) տարի 6 (վեց) ամիս ժամկետով ազատազրկման չկրած մասի` 1 (մեկ) տարի 2 (երկու) ամիս 5 (հինգ) օր ժամկետով ազատազրկման 3 (երեք) ամիսը, որը նա պետք է կրի:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Քրիստինե Տատարոգուլոյի պատժի կրման սկիզբը պետք է հաշվել 2011 թվականի հունիսի 6-ից, քանի որ նա ձերբակալվել է այդ օրը, իսկ 2011 թվականի հունիսի 8-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Քրիստինե Տատարոգուլոյի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո` 2011 թվականի հունիսի 21-ի որոշմամբ իրեղեն ապացույց ճանաչված` հանցագործության գործիք հանդիսացող անձրևանոցը պետք է ոչնչացնել:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախսերը` տուժողին հանցագործության հետևանքով պատճառված վնասի փոխհատուցման գումարները, ամբաստանյալ Քրիստինե Տատարոգուլոյից Դատարանի նախաձեռնությամբ ենթակա չեն բռնագանձման, քանի որ տուժողի կողմից իր գույքային շահերն անձամբ պաշտպանելու հնարավորությունից զրկված լինելու վերաբերյալ տվյալները բացակայում են: Քրիստինե Տատարոգուլոյից բռնագանձման ենթակա չեն նաև ՀՀ քրեական դատավարության օրենսգրքի 168-րդ հոդվածի 1-ին մասի 2-6-րդ կետերով նախատեսված դատական ծախսերը, քանի որ 4-րդ և 6-րդ կետերով նախատեսված դատական ծախսեր ընդհանրապես չկան, իսկ 2-րդ, 3-րդ և 5-րդ կետերով նախատեսված դատական ծախսերի վերաբերյալ տվյալները բացակայում են: Ավելին` նման պահանջ դատարանին չի ներկայացվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Քրիստինե Միխայելի Տատարոգուլոյին մեղավոր ճանաչել ՀՀ քրեական օրենսգրքի 316-րդ հոդվածի 1-ին մասով և պատիժ նշանակել ազատազրկում` 1 (մեկ) տարի ժամկետով:
Կոտայքի մարզի ընդհանուր իրավասության առաջին ատյանի դատարանի 2010 թվականի նոյեմբերի 4-ի որոշմամբ Քրիստինե Միխայելի Տատարոգուլոյի նկատմամբ կիրառված պայմանական վաղաժամկետ ազատումը վերացնել:
ՀՀ քրեական օրենսգրքի 67-րդ հոդվածով սահմանված կարգով` սույն դատավճռով նշանակված պատժին` 1 (մեկ) տարի ժամկետով ազատազրկմանը մասնակիորեն գումարել Երևան քաղաքի Էրեբունի և Նուբարաշեն համայնքների առաջին ատյանի դատարանի 2007 թվականի սեպտեմբերի 19-ի դատավճռով նշանակված վերջնական պատժի` 4 (չորս) տարի 6 (վեց) ամիս ժամկետով ազատազրկման չկրած մասի` 1 (մեկ) տարի 2 (երկու) ամիս 5 (հինգ) օր ժամկետով ազատազրկման 3 (երեք) ամիս ժամկետով ազատազրկումը և Քրիստինե Միխայելի Տատարոգուլոյի նկատմամբ վերջնական պատիժ նշանակել ազատազրկում` 1 (մեկ) տարի 3 (երեք) ամիս ժամկետով` պատժի կրման սկիզբը հաշվելով 2011 թվականի հունիսի 6-ից:
Քրիստինե Միխայելի Տատարոգուլոյի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո 2011 թվականի հունիսի 21-ի որոշմամբ իրեղեն ապացույց անձրևանոցը ոչնչացնել:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ