գործ` ԵԿԴ/0142/01/11
Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության դատարանը

Նախագահությամբ դատավոր` Արմեն Բեկթաշյանի
քարտուղարությամբ` Լուսինե Ղամբարյանի
մասնակցությամբ` մեղադրող` Հայկ էյրամջյանի
տուժող` Վասիլե Ավրամովիչի
թարգմանիչ` Անուշ Խանիկյանի

2011 թվականի սեպտեմբերի 07-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի`

Արմեն Ռուբիկ-Ռոմիկի Սիմոնյանի` ծնված 08.04.1961 թվականին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին ոչ ոք, չի աշխատել, նախկինում դատված` Ուկրաինայի Հանրապետության Դոնեցկի մարզային դատարանի քրեական գործերով դատական կոլեգիայի կողմից 09.09.1987 թվականի դատավճռով ՈւՀ քրեական օրենսգրքի 93 հոդվածի ՙգ՚, ՙդ՚ կետերով, ՈւՀ քրեական օրենսգրքի 17-93 հոդվածի ՙգ՚ կետով դատապարտվել է մահապատժի: 03.02.1988 թվականին ՈւՀ Գերագույն Խորհրդի նախագահության հրամանագրով ներում է շնորհվել և մահապատիժը փոխարինվել է ազատազրկման` 20 /քսան/ տարի ժամկետով: Սյունիքի մարզի առաջին ատյանի դատարանի 26.12.2003 թվականի որոշմամբ պայմանակետ վաղակետ ազատվել է 3 /երեք/ տարի 1 /մեկ/ ամիս 29 /քսանինը/ օր չկրած պատժից, դատվածությունը չմարված, բնակվել է Երևան քաղաքի Սայաթ-Նովա նրբանցքի 78 տանը, կալանքի տակ է 03.03.2011 թվականից:

Արմեն Ռուբիկ-Ռոմիկի Սիմոնյանը մեղադրվում է ՀՀ քրեական օրենսգրքի 104 հոդվածի 1-ին մասով և ՀՀ քրեական օրենսգրքի 112 հոդվածի 1-ին մասով:
03.03.2011թվականի որոշմամբ Արմեն Ռուբիկ-Ռոմիկի Սիմոնյանի նկատմամբ որպես խափանման միջոց է ընտրվել կալանավորումը:

Գործի դատավարական նախապատմությունը.

ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում 2011 թվականի մարտի 03-ին ՀՀ քրեական օրենսգրքի 104 հոդվածի 1-ին մասի և ՀՀ քրեական օրենսգրքի 112 հոդվածի 1-ին մասի հատկանիշներով հարուցվել է թիվ 13112911 քրեական գործը:
2011 թվականի մարտի 03-ին, ժամը 0150-ի սահմաններում սպանություն կատարելու կասկածանքով ոստիկանության Կենտրոնականի բաժին բերման է ենթարկվել Երևան քաղաքի Սայաթ-Նովա նրբանցքի 78 տան բնակիչ Արմեն Ռուբիկ-Ռոմիկի Սիմոնյանը, որը հայտարարել է, որ դանակը, որով հարվածել է Ա.Նազարյանին թաքցրել է Սարկավագի 72 շենքի աստիճանավանդակների վերևի մասում` բետոնե սյուների հետևում:
2011 թվականի մարտի 03-ին սպանության կասկածանքով Արմեն Ռուբիկ-Ռոմիկի Սիմոնյանը ձերբակալվել է:
2011 թվականի մարտի 03-ի որոշմամբ Արմեն Ռուբիկ-Ռոմիկի Սիմոնյանը ՀՀ քրեական օրենսգրքի 104 հոդվածի 1-ին մասի և ՀՀ քրեական օրենսգրքի 112 հոդվածի 1-ին մասի հատկանիշներով ներգրավվել է որպես մեղադրյալ:
2011 թվականի մարտի 03-ի որոշմամբ մեղադրյալ Արմեն Ռուբիկ-Ռոմիկի Սիմոնյանի նկատմամբ որպես խափանման միջոց է ընտրվել կալանավորումը:
2011 թվականի հունիսի 27-ի որոշմամբ Արմեն Ռուբիկ-Ռոմիկի Սիմոնյանին` ՀՀ քրեական օրենսգրքի 104 հոդվածի 1-ին մասով և ՀՀ քրեական օրենսգրքի 112 հոդվածի 1-ին մասով առաջադրված մեղադրանքը փոփոխվել է, մեղադրանքի ծավալից հանվել է պատժի չկրած մասը ունենալու հանգամանքը, նրան առաջադրվել է նոր մեղադրանք` ՀՀ քրեական օրենսգրքի 104 հոդվածի 1-ին մասով և ՀՀ քրեական օրենսգրքի 112 հոդվածի 1-ին մասով: Ընտրված խափանման միջոցը թողնվել է անփոփոխ:
Նախաքննական մարմնի կողմից Արմեն Ռուբիկ-Ռոմիկի Սիմոնյանին ՀՀ քրեական օրենսգրքի 104 հոդվածի 1-ին մասով և ՀՀ քրեական օրենսգրքի 112 հոդվածի 1-ին մասով մեղադրանք է առաջադրվել այն բանի համար, որ նա 2011 թվականի մարտի 2-ին, ժամը 2030-ի սահմաններում վիճաբանության ընթացքում առաջացած անձնական անբարյացակամ փոխհարաբերությունների հողի վրա, Արթուր Ռուբենի Նազարյանին ապօրինաբար կյանքից զրկելու դիտավորությամբ, իր գրպանում եղած խոհանոցային դանակով հարվածներ է հասցրել նրա մարմնի տարբեր հատվածներին և դիտավորությամբ ապօրինաբար զրկել նրան կյանքից:
Բացի այդ, Արմեն Ռուբիկ-Ռոմիկի Սիմոնյանը նշված ժամանակահատվածում դանակով հարվածել է վիճաբանությունը կանխելու նպատակով իրենց մոտեցած Վասիլե Ավրամովիչին և դիտավորությամբ նրա առողջությանը պատճառել կյանքին վտանգ սպառնացող ծանր վնաս:
Երևան քաղաքի բնակիչ, Արմեն Ռուբիկ-Ռոմիկի Սիմոնյանը 1987 թվականի սեպտեմբերի 9-ին, Ուկրաինայի Հանրապետության Դոնեցկի մարզային դատարանի քրեական գործերով դատական կոլեգիայի կողմից Ուկրաինայի Հանրապետության քրեական օրենսգրքի 93 հոդվածի ՙգ՚, ՙդ՚ կետերով և Ուկրաինայի Հանրապետության քրեական օրենսգրքի 17-93 հոդվածի ՙգ՚ կետով դատապարտվել է մահապատժի: 1988 թվականի փետրվարի 03-ին Ուկրաինայի Հանրապետության Գերագույն Խորհրդի նախագահության հրամանագրով Ա.Սիմոնյանին ներում է շնորհվել և մահապատիժը փոխարինվել է ազատազրկման` 20 /քսան/ տարի ժամանակով: 2003 թվականի դեկտեմբերի 26-ին Ա.Սիմոնյանը պայմանական վաղակետ ազատվել է պատժից՝ ունենալով 3 /երեք/ տարի 1 /մեկ/ ամիս 29 /քսանինը/ օր չկրած պատիժ, որից հետո բնակվել է Երևան քաղաքի Սայաթ-Նովա 78 տանը` ընտանիքի հետ: Երևան քաղաքում հաճախ այցելել է ՙՕղակաձև՚ զբոսայգի, որտեղ ծանոթացել է տուժողներ` Երևան քաղաքի բնակիչ` Արթուր Ռուբենի Նազարյանի և մշտական բնակության վայր չունեցող Վասիլե Ավրամովիչի հետ: Նրանց միջև ձևավորվել է նորմալ հարաբերություններ, իսկ վկա՝ Երևան քաղաքի բնակիչ Վարդան Բաղդասարյանին ճանաչել է երկար ժամանակ: Միասին ՙՕղակաձև՚ զբոսայգում հաճախ են հանդիպել, որի ընթացքում օգտագործել են ալկահոլային խմիչքներ, զբաղվել են թղթախաղով, որի հետևանքով Ա.Սիմոնյանը 220.000 ՀՀ դրամի պարտք է կուտակել Ա.Նազարյանի հանդեպ:
2011 թվականի մարտի 02-ին ժամը 20-ի սահմաններում Արմեն Ռուբիկ-Ռոմիկի Սիմոնյանը տանը օգտագործելով օղի և գտնվելով երրորդ աստիճանի խմածության վիճակում, իրեն ապահով զգալու համար վերցնելով խոհանոցային դանակը, միայնակ դուրս է եկել տանից և գնացել Երևան քաղաքի Իսահակյան փողոց: Երևան քաղաքի ՙՕղակաձև՚ զբոսայգու 2-րդ հատվածում գտնվող ՙԿամերային երաժշտության տան՚ առջև հանդիպել է հանգուցյալ Արթուր Նազարյանին, ում պետք է վերադարձներ այդ օրը պարտված գումարից 15.000 ՀՀ դրամը: Ա.Նազարյանին կանչել է իր մոտ: Այդ ընթացքում քիչ հեռու կանգնած են եղել գործով տուժող Վասիլե Ավրամովիչը, վկաներ՝ Վարդան Բաղդասարյանը և մշտական բնակության վայր չունեցող վկա Վոն Դեն Յունի Կլառան: Երբ Ա.Նազարյանը մոտեցել է Ա.Սիմոնյանին նրանց միջև սկսվել է խոսակցություն` թղթախաղով պարտված պարտքի վերաբերյալ, որից հետո առաջացած անձնական անբարյացակամ փոխհարաբերությունների հողի վրա սկսել են միմյանց հետ վիճաբանել, որի ժամանակ Արմեն Ռուբիկ-Ռոմիկի Սիմոնյանը Արթուր Ռուբենի Նազարյանին ապօրինաբար կյանքից զրկելու դիտավորությամբ, դանակով հարվածներ է հասցրել նրա մարմնի տարբեր հատվածներին՝ պատճառելով կյանքի հետ անհամատեղելի կտրած վերք` աջ դաստակի ափային մակերեսին, ծակած-կտրած չթափանցող վերք` կրծքավանդակի ձախ կեսի առաջային մակերեսին, որովայնի աջ կեսի թափանցող վնասվածք, ձախ վերին վերջույթի կտրած-ծակած վնասվածքներ, վերքային խողովակների ընթացքով անոթների, ձախից՝ չորրորդ կողոսկրի մասնակի վնասումով, աջ թոքի ստորին բլթի լյարդի մեծ բլթի, ստոծանու, հաստ աղու վնասվածքների ձևով և ապօրինաբար դիտավորությամբ Ա.Նազարյանին զրկել կյանքից: Վիճաբանության ընթացքում գործով վկա Վարդան Բաղդասարյանը տեսնելով, որ Ա.Սիմոնյանը և Ա.Նազարյանը հարվածում են միմյանց և Ա.Սիմոնյանի ձեռքին նկատելով խոհանոցային դանակ, փորձել է այն վերցնել և ձեռքով բռնել է դանակի շեղբը, որպեսզի վերջինս Ա.Նազարյանին այլևս չհարվածի դանակով, սակայն Ա.Սիմոնյանը քաշելով դանակը վնասել է Վ.Բաղդասարյանի աջ ձեռքը: Բացի այդ Ա.Սիմոնյանը նշված ժամանակահատվածում դանակով հարվածել է վիճաբանությունը կանխելու նպատակով իրենց մոտեցած Վասիլե Ավրամովիչին և դիտավորությամբ նրա առողջությանը պատճառել կյանքին վտանգ սպառնացող ծանր վնաս՝ որովայնի ձախ կեսի առաջա-կողմնային մակերեսի ծակած-կտրած թափանցող վերքի ձևով: Վիճաբանությունն ավարտվելուց հետո նշված վայրով պատահական անցնելիս է եղել Ա.Սիմոնյանի որդին՝ վկա Ռոման Ռուբիկ-Ռոմիկի Սիմոնյանը: Ռ.Սիմոնյանը քաշելով Ա.Սիմոնյանի թևից վերջինիս ուղեկցել է տուն:
2011 թվականի հուլիսի 09-ի որոշմամբ` թիվ 13112911 քրեական գործով Արմեն Ռուբիկ-Ռոմիկի Սիմոնյանի կողմից Վարդան Բաղդասարյանի առողջությանը թեթև մարմնական վնասվածք պատճառելու դեպքով քրեական հետապնդում չի իրականացվել` Ա.Սիմոնյանի արարքում հանցակազմի բացակայության պատճառաբանությամբ:
2011 թվակականի հուլիսի 18-ին թիվ 13112911 քրեական գործը մեղադրական եզրակացությամբ ուղարկվել է ՀՀ Կենտրոն և Նորք-Մարաշ վարչական շրջանների ընդհանուր իրավասության դատարան:

Ապացույցների հետազոտում և գնահատում

Ամբաստանյալ` Արմեն Ռուբիկ-Ռոմիկի Սիմոնյանը ՀՀ քրեական օրենսգրքի 104 հոդվածի 1-ին մասով և ՀՀ քրեական օրենսգրքի 112 հոդվածի 1-ին մասով առաջադրված մեղադրանքներում իրեն մեղավոր ճանաչեց և ցուցմունք տվեց այն մասին, որ 2011 թվականի մարտի 02-ին գտնվել է տանը, մի քանի բաժակ օղի է խմել և ժամը 2000-ի սահմաններում դուրս է եկել տանից ու գնացել է Իսահակյան փողոց` Երևան քաղաքի ՙՕղակաձև՚ զբոսայգի, որտեղ հանդիպել է իր ծանոթ Արթուր Նազարյանին, որին թղթախաղով 220.000 ՀՀ դրամ գումար է պարտվել, Տոնիին ու նրա ընկերուհուն` Կլառային, որոնց մինչ այդ մի երկու-երեք անգամ է հանդիպել, իրենց թաղամասի բնակիչ Վարդան Բաղդասարյանին, որոնք միասին նստած հաց են կերել: Ինքը մոտեցել է նրանց Արթուր իրենքից պահանջել է թղթախաղով պարտված պարտ-գումարը, ինքն էլ ասել է, որի չի տալու այդ գումարը, որից իրենք սկսել են վիճաբանել ու հարվածել իրար: Ինքն էլ տեսնելով, որ չի կարողանում հաղթել Արթուրին, այնտեղ եղած դանակը վերցնելով հարվածել է Արթուրին` առաջինը հարվածել է նրա որովայնին, իսկ մյուսները չի հիշում, թե մարմնի որ մասերին է հարվածել: Այդ ժամանակ Տոնին բռնել է իր կոկորդից, ինքն էլ դանակով հարվածել է նաև Տոնիին, քանի որ նա գտնվել է իր թիկունքում, ինքը չի տեսել, թե նրա մարմնի որ մասին է հարվածել: Հարվածելու ընթացքում ինքն ընկել է գետնին, Վարդանը ոտքը դրել է իր թևին, իր կարծիքով նա ցանկացել է դանակը վերցնել իր ձեռքից ու պաշտպանել Տոնիին ու Արթուրին: Ինքը քաշել է դանակը ու հենց այդ պահին այնտեղ է եկել իր որդին` Ռոմիկը և իրեն տարել է տուն: Տուն գնալուց հետո թաքնվելու նպատակով ինքը տանից դուրս է եկել, ճանապարհին դանակը թաքցրել է Սարկավագի 72 շենքի աստիճանավանդակների վերևի մասում` բետոնե սյուների հետևում, որից հետո որոշել է գնալ Քանաքեռ, սակայն ոստիկանության աշխատակիցներն իրեն հայտնաբերել ու բերման են ենթարկել ոստիկանության բաժին: Ինքը ոստիկաններին ցույց է տվել, թե որտեղ է թաքցրել դանակը: Կատարածի համար զղջում է:
Ամբաստանյալ Արմեն Ռուբիկ-Ռոմիկի Սիմոնյանի կատարած հանցանքները` ՀՀ քրեական օրենսգրքի 104 հոդվածի 1-ին մասով և ՀՀ քրեական օրենսգրքի 112 հոդվածի 1-ին մասով, հիմնավորվել են նաև հետևյալ ապացույցներով.
Տուժող` Վասիլե Սրետենովի Ավրամովիչի ցուցմունքով այն մասին, որ Արթուր Նազարյանի և Վարդան Բաղդասարյանի հետ գտնվել է մտերիմ հարաբերությունների մեջ, ՙՕղակաձև՚ զբոսայգում միասին հաճախ հաց են կերել և օգտագործել են ալկոհոլային խմիչքներ: Արմեն Սիմոնյանին ճանաչել է Ա.Նազարյանի միջոցով և եղել են դեպքեր, որ նրա հետ ևս օգտագործել են ալկոհոլային խմիչքներ: 2011 թվականի մարտի 02-ին, կեսօրին, Ա.Նազարյանը հայտնել է, որ թղթախաղով Ա.Սիմոնյանին գումար է ՙկրել՚ և վերջինս պետք է այդ օրը, ժամը 18-ի սահմաններում 60.000 ՀՀ դրամ գումարը բերի: Նույն օրը ժամը 2000-ի սահմաններում ինքը և իր ընկերուհին` Կլառան կանգնած են եղել Երևան քաղաքի ՙՕղակաձև՚ զբոսայգում գտնվող ՙԿամերային երաժշտության տան՚ հարևանությամբ, նկատել է, որ Ա.Նազարյանն և Ա.Սիմոնյանը վիճում են և միմյանց հարվածներ հասցնում: Մոտեցել է նրանց ու փորձել է բաժանել, այդ ժամանակ նկատել է, թե ինչպես է Ա.Սիմոնյանը դանակով հարվածել Ա.Նազարյանին: Ինքը վախից թեքվել է ու այդ ժամանակ Արմենը դանակով հարվածել է նաև իր որովայնի ձախ հատվածին, որից ինքը ընկել է գետնին: Այդ ընթացքում Վարդանը մոտեցել է, որ վերցնի դանակը, սակայն Արմենը քաշելով դանակը կտրել է նրա ձեռքը, որից հետո Վարդանը փախչել է այնտեղից: Ինքը մի կերպ քայլելով գնացել է Կլառայի մոտ, որից հետո կորցրել է գիտակցությունը և արթնացել է միայն հիվանդանոցում: Այդ ժամանակ էլ տեղեկացել է, որ ստացած մարմնական վնասվածքներից Արթուրը մահացել է: Ամբաստանյալ Արմեն Սիմոնյանի նկատմամբ բողոք և քաղաքացիական հայցի պահանջ չի ներկայացնում:
Վկա` Վարդան Ռաֆիկի Բաղդասարյանի ցուցմունքով այն մասին, որ բնակվում է Երևան քաղաքի Սայաթ-Նովա փողոցի 21 շենքի 40 բնակարանում: Մշտական աշխատանք չունի, սակայն երեկոյան ժամերին զբաղվում է ՙստայանչիկությամբ՚, նույն աշխատանքով է զբաղվել նաև տուժող, այժմ հանգուցյալ Արթուր Նազարյանը, որի հետ եղել են ընկերներ: Ճանաչել է նաև իրենց թաղամասում բնակվող Արմեն Սիմոնյանին, որը իր կնոջը և աներոջը սպանելու համար նախկինում դատապարվել է: 2011 թվականի մարտի 02-ին, ժամը 17-ի սահմաններում դուրս գալով տանից գնացել է դեպի Իսահակյան փողոցի կողմը: Ճանապարհին` ՙՕղակաձև՚ զբոսայգում հանդիպել է Արթուր Նազարյանին, որից էլ տեղեկացել է, որ Արմեն Սիմոնյանը թղթախաղով 250.000 ՀՀ դրամ գումար է նրան պարտվել, որից 60.000 ՀՀ դրամ գումարը նա պահանջել է, իսկ մնացածը ոչ: Ասել է նաև, որ ժամը 18-ի սահմաններում Արմենը 18.000 ՀՀ դրամ գումարը պետք է բերի: Այդ ժամանակ ինքը գնելով մեկ շիշ օղու սպիրտ, բացել է այն, լցրել կոկա-կոլայի շշի մեջ, գնել է նաև մեկ շիշ ֆանտա և ՙՕղակաձև՚ զբոսայգում մի քանի բաժակ օղի է խմել, որից հետո գնացել է ՙստայանչիկություն՚ անելու: Ճանապարհին` ՙԿամերային երաժշտության տան՚ մոտ, տեսել է, որ Արթուրը և Արմենը վիճում են իրար հետ` հարվածում միմյանց, որից հետո նրանք երկուսն էլ գետնին ընկած գլորվել են ու շարունակել են միմյանց հարվածելը: Մոտենալով նրանց, տեսել է, որ Արմենի ձեռքին բավականին մեծ խոհանոցային դանակ կա: Ինքը ոտքը դրել է Արմենի ձեռքի վրա, որպեսզի վերցնի դանակը, որից հետո դանակի շեղբը բռնել է ձեռքով, սակայն չի կարողացել այն վերցնել Արմենի ձեռքից, վերջինս էլ քաշելով դանակը կտրել է իր ձեռքի ափը, որից հետո Արմենը կանգնել է ընկած տեղից, ինքն էլ վախենալով նրանից փախչել է: Այդ ընթացքում նկատել է Վասիլե Ավրամովիչին, որին իրենք նաև Տոնի են ասում: Տոնին ամբողջոովին արյունոտ է եղել: Ինքը Ա.Նազարյանին և Վ.Ավրամովիչին դանակով հարվածելու պահը չի տեսել, սակայն երբ փորձել է փախչել, միայն այդ ժամանակ է նկատել Ա.Ավրամովիչին վնասված: Այդ պահին այնտեղ է եկել Ա.Սիմոնյանի տղան` Ռոմիկը ու նրան տարել է այնտեղից: Նրանց հեռանալուց հետո ինքը մոտեցել է Արթուրն ու տեսել, որ նա ողջ է և ցանկանալով օգնել նրան, վերջինիս գրպանից հանել է բջջային հեռախոսը ու փորձել է զանգահարել շտապ օգնություն, սակայն չկարողանալով օգտվել բջջաին հեռախոսից, վազելով գնացել է մոտակայքում բնակվող իրենց ընկերոջ` Վարդան Ժամխարյանի տուն, հայտնել է կատարվածի մասին, որից հետո Վարդանի հետ միասին գնացել են դեպքի վայր, որտեղ էլ հանդիպել են ոստիկանների: Դրանից հետո ոստիկաններն իրեն բերման են ենթարկել ոստիկանության Կենտրոնականի բաժին, այդ ժամանակ էլ ինքը տեղեկացել է, որ Արթուրը մահացել է, իսկ Վասիլեին տեղափոխել են հիվանդանոց: Կռվի ժամանակ շրջապատում հավաքված մարդիկ չեն եղել, ինքը միայն նկատել է Վասիլեի ընկերուհուն` Կլառային: Հետագայում Վասիլեից իմացել է, որ նա նույնպես ցանկացել է բաժանել Արմենին ու Արթուրին ու այդ ժամանակ Արմենը դանակով հարվածել է նրան: Քանի որ ինքը վնասվածքը ստացել է Արմեն Սիմոնյանին ու Արթուր Նազարյանին բաժանելու ժամանակ, այդ պատճառով էլ Արմեն Սիմոնյանի նկատմամբ բողոք և պահանջ չի ներկայացնում:
Վկա` Վոն Դեն Յունի Կլառայի ցուցմունքով այն մասին, որ տուժող Վասիլե Ավրամովիչի հոտ գտնվում են փաստական ամուսնական հարաբերությունների մեջ, ապրում են միասին, մշտական բնակության վայր չունեն ու գիշերում են փողոցում` Օպերայի կամ ՙԿամերային երաժշտության տան՚ հարևանությամբ գտնվող կանգառներից մեկում: Ճանաչում է Վարդան Բաղդասարյանին, որը հաճախակի է հանդիպում Վասիլեի հետ և միասին ալկոհոլ են օգտագործում: Ճանաչել է նաև Արթուր Նազարյանին, որը ՙԿամերային երաժշտության տան՚ մոտակայքում զբաղվել է ՙստայանչիկությամբ՚ ու ինքը և Վասիլեն մտերիմ հարաբերությունների մեջ են գտնվել նրա հետ: 2011 թվականի մարտի 2-ին, ժամը 2030 սահմաններում ինքը, Վասիլեն ու Վարդանը կանգնած զրուցել են Երևան քաղաքի ՙՕղակաձև՚ զբոսայգում գտնվող կանգառից քիչ հեռու: Իրենցից մի քանի մետր հեռավորության վրա է գտնվել նաև Արթուրը: Այդ ժամանակ Արթուր Նազարյանին է մոտեցել իրեն անծանոթ, բարձրահասակ, նիհար կազմվածքով մի տղամարդ, որը մոտենալով Արթուրին սկսել է ծեծել նրան: Այդ ժամանակ ինքը բարձր ձայնով ու գոռգոռալով ասել է Վասիլեին, որ օգնության գնա Արթուրին ու այդ պահին նկատել է, որ Արթուրը և այդ անծանոթը ընկել են գետնին: Վասիլեն շրջվելով ու տեսնելով, որ Արթուրը վիճում է այդ տղամարդու հետ, գնացել է Արթուրին օգնելու` բաժանելու կռվողներին: Վասիլեի հետևից գնացել է նաև Վարդանը: Մոտ մեկ րոպե անց իրեն է մոտեցել Վասիլեն ու ցույց տալով արյունահոսող վերքը ասել է, որ իրեն խփել են: Այդ ժամանակ ինքը նկատել է, որ Վասիլեի աղիքները դուրս են եկել և գոռացել է Վ.Բաղդասարյանին, որպեսզի շտապ օգնություն կանչի: Մինչ Վասիլեի մոտենալը ինքը այդ անծանոթ տղամարդու մոտ դանակ է տեսել: Վասիլեն վիրավորված գնացել է ՙՍԱՍ՚ սուպերմարկետ, որտեղից էլ զանգահարել են շատապ օգնություն ու Վասիլեին տեղափոխել են հիվանդանոց: Հետո իմացել է, որ այդ նիհար ու բարձրահասակ տղամարդը դանակով հարվածել է Վարդանին ու Արթուրին, որից Արթուրը մահացել է:
Վկա` Վարդան Ռաշիդի Ժամխարյանի ցուցմունքով այն մասին, որ 2011 թվականի մարտի 02-ին, ինքը իր ընտանքի հտ միասին նշել է իր ծննդյան օրը, ժամը 2030-ից մինչև 2100-ն ընկած ժամանակահատվածում իր բնակարան է եկել նույն թաղամասի բնակիչ Վարդան Բաղդասարյանը և կանչելով դուրս, հայտնել է, որ իրենց թաղամասի բնակիչ Արմեն Սիմոնյանը ՙՕղակաձև՚ զբոսայգում դանակով հարվածել է Արթուր Նազարյանին և Վասիլե Ավրամովիչին, որին Տոնի են ասում ու ասել է, որ զանգի շտապ օգնություն: Վարդանի հետ շտապ գնացել են դեպքի վայր, որտեղ նկատել են հավաքված ոստիկաններին: Ինքը տեղյակ չէ, թե Արմենն ինչու է դանակով հարվածել Արթուրին ու Տոնիին: Դեպքի մասին այլ մանրամասներ իրեն հայտնի չեն:
Վկա` Ռոման Ռուբիկ-Ռոմիկի Սիմոնյանի ցուցմունքով այն մասին, որ Արմեն Սիմոնյանն իր հայրն է, սակայն իր հայրանունը գրվել է պապիկի անունով: 2011 թվականի մարտի 02-ին, ժամը 2030-ի սահմաններում, տատիկի համար դեղ գնելու նպատակով գնացել է դեղատուն: Ճանապարհին` ՙՕղակաձև՚ զբոսայգում, ՙԿամերային երաժշտության տան՚ դիմաց նկատել է հորը` Արմեն Սիմոնյանին, որը այդ ժամանակ պառկած է եղել գետնին, իսկ իրենց հարևան Վարդան Բաղդասրյանը փորձել է նրա ձեռքից վերցնել դանակը: Երբ ինքը հասել է նրանց, հայրն արդեն կանգնած է եղել և ինքն էլ բռնելով նրա թևից նրան քաշելով տարել է տուն: Այդ ժամանակ հայրը դանակը պահել է իր մոտ: Հասնելով տուն` հայրն իրեն ասել է, որ միջադեպի պատճառով գնում է այլ տեղ: Դրանից երկու օր անց իմացել է, որ ՙՕղակաձև զբոսայգու՚ մոտ տեղի ունեցած միջադեպի ժամանակ իր հայրը դանակով հարվածել է ինչ որ անձի, որն էլ դրա հետևանքով մահացել է:
Դատաբժշկական փորձաքննության թիվ 239 եզրակացությամբ այն մասին, որ ելնելով Ա.Նազարյանի դիակային փոփոխությունների զարգացման աստիճանից պետք է ենթադրել, որ մահը վրա է հասել փորձաքննությունից մոտ 14-16 ժամ առաջ: Ա.Նազարյանի մահը վրա է հասել արտաքին և ներքին արյունահոսությունից, կրծքավանդակի որովայնի վերին ձախ վերջույթի աջ դաստակի կտրած, ծակած-կտրած թափանցող և չթափանցող վնասվածքներ ստանալու հետրևանքով՝ ինչը հիմնավորվում է փորձաքննությամբ հետևյալ վնասվածքներով՝ կտրած վերք աջ դաստակի ափային մակերեսին, ծակած կտրած չթափանցող վերք կրծքավանդակի ձախ կեսի առաջային մակերեսին, որովայնի աջ կեսի թափանցող վնասվածք, ձախ վերին վերջույթի կտրած ծակած վնասվածքներ, վերքային խողովակների ընթացքով անոթների, ձախից՝ չորորդ կողոսկրի մասնակի վնասումով, աջ թոքի ստորին բլթի լյարդի մեծ բլթի, ստոծանու, հաստաղու վնասվածքներ, հեղուկ և մակարդված արյուն աջ պլևրալ խոռոչում և որովայնի խոռոչում՝ որոնք էլ պատճառվել են կենդանության օրոք սուր ծակող կտրող գործիքի /ների/ ներգործության հետևանքով: Ա.Նազարյանի դիակի դատաբժշկական փորձաքննությամբ հայտնաբերվել են նաև գլխի ձախ ծոծրակաոկողմային հատվածի փափուկ հյուսվածքների ենթամաշկային արյունազեղում՝ գլխուղեղի փափուկ թաղանթների միկրոցիրկուլյար գերարյունություն, էրիթրոստազներով ու էքստրավազատներով, մանր արյունազեղման օջախներով, ձախ դաստակի չորորդ, հինգերորդ մատների միջային ֆալանգների թիկնային մակերեսների քերծվածքներ, որոնք նույնպես պատճառվել են կենդանության օրոք բութ առարկաների ներգործության հետևանքով, որոնք մահվան հետ անմիջական պատճառական կապի մեջ չեն գտնվում, որոնցից՝ ձախ դաստակի քերծվածքները առողջության թեթև վնասի հատկանիշներ չեն պարունակում, իսկ գլխի ձախ ծոծրակաոկողմնային հատվածի փափուկ հյուսվածքների ենթամաշկային արյունազեղումը՝ գլուղեղի փափուկ թաղանթների միկրոցիրկուլյար գերարյունությամբ, էրիթրոստազներով ու էքստրավազատներով, մանր արյունազեղման օջախներով, ունի կենդանության ժամանակվա առողջության թեթև վնաս պարունակող մարմնական վնասվածքների հատկանիշներ: Վանսվածքները ստանալու պահին տուժողը և հարձակվողը միմյանց նկատմամբ կարող էին գտնվել բոլոր հնարավոր դիրքերում: Ա. Նազարյանը չի բացառվում, որ ստացած մարմանական վնասվածքներով որոշակի կարճ ժամանկահատված կարողանար կատարել որևէ ինքնուրույն գործողություն/շարժվել, բղավել և այլն/: Դիակի սկզբնական դիրքը փոփոխվելու մասին վկայող տվյալներ չկան: Ա. Նազարյանի դիակից վերցված արյան մեջ հայտնաբերվել է 2,5 պրոմիլլէ էթիլ ալկոհոլ, ինչը համապատասխանում է ալկոհոլային հարբածության միջին աստիճանի վերին սահմանին: Դատաբժշկական փորձաքննությամբ վերջինիս ստամոքսում հայտնաբերվել է գորշավուն գույնի շիլայանման պարունակություն, որի բաղադրական կազմը որոշել հնարավոր չէ:
Դատաբժշկական փորձաքննության թիվ 489 եզրակացությամբ այն մասին, որ Վարդան Բաղդասարյանի ստացած մարմնական վնասվածքը՝ աջ դաստակի շրջանի կտրած վերքի ձևով, պատճառվել է սուր կտրող գործիքով, հնարավոր է որոշման մեջ նշված ժամկետում և փորձաքննվողի կողմից նշված հանգամանքներում, որը պատճառել է առողջությանը թեթև վնաս՝ առողջության կարճատև քայքայումով, ի նկատի ունենալովվնասվածքի հետ անմիջական պատճառական կապի մեջ եղած հետևանքների տևողությունը ոչ պակաս վեց օրից և ոչ ավելի քսանմեկ օրից:
Դատաբժշկական փորձաքննության թիվ 488 եզրակացությամբ այն մասին, որ Ա.Սիմոնյանի ստացած մարմնական վնասվածքը՝ աջ դաստակի շրջանի քերծվածքի ձևով, պատճառվել է բութ առարկայով, հնարավոր է որոշման մեջ նշված ժամկետում և առողջության թեթև վնասի հատկանիշներ չի պարունակու:
Դատաբժշկական փորձաքննության թիվ 231/հ եզրակացությամբ այն մասին, որ Վ.Ավրամովիչի ստացած մարմնական վնասվածքը ըստ բժշկական փաստաթղթերի՝ որովայնի ձախ կեսի առաջա-կողմնային մակերեսի ծակած-կտրած թափանցող վերքի ձևով, որը ուղեկցվել է ճարպոնի և լայնաձիգ աղու շճաթաղանթի վնասումներով, ներքին արյունահոսությամբ, պատճառվել է սուր ծակող-կտրող գործիքով, հնարավոր է նշված ժամկետում, չի բացառվում որոշման մեջ նշված գործի հանգամանքներին և պատճառել է առողջությանը ծանր վնաս, կյանքին վտանգ սպառնացող:
Դատակենսաբանական փորձաքննության թիվ 104 եզրակացությամբ այն մասին, որ հանգուցյալ Արթուր Ռուբենի Նազարյանի դիակից ներկայացված արյան նմուշն ըստ արյան ABO իզոշճաբանական համակարգի պատկանում է O խմբին:
Փորձաքննությանը ներկայացված տուժող Վասիլե Ավրամովիչի արյան նմուշն ըստ արյան ABO իզոշճաբանական համակարգի պատկանում է ուղեկցող H հակածինով արյան A խմբին:
Փորձաքննությանը ներկայացված տուժող Վարդան Բաղդասարյանի արյան նմուշն ըստ արյան ABO իզոշճաբանական համակարգի պատկանում է O խմբին:
Փորձաքննությանը ներկայացված Արմեն Ռուբիկ-Ռոմիկի Սիմոնյանի արյան նմուշն ըստ արյան ABO իզոշճաբանական համակարգի պատկանում է ABխմբին:
Փորձաքննությանը ներկայացված՝ ՙՕղակաձև՚ զբոսայգու երկրորդ հատված, կամերային տան մուտքից ձախակողմյան սալիկապատ արահետի եզրաքարի վրայից՚ բամբակե, եզրաքարին դրված շշերի մոտ-ից մարլայի, ձախ արահետի թեքման անկյունում դիակի մոտից բամբակե խծուծներով վերցրած կասկածելի հետքերում հաստատվեց արյան առկայություն, որը պատկանում է մարդու և ըստ արյան ABO իզոշճաբանական համակարգի պատկանում է O խումբ ունեցող անձի, կամ անձանց, այդ թվում նաև կարող էր առաջանալ ինչպես հանգուցյալ Արթուր Ռուբենի Նազարյանից, այնպես էլ տուժող Վարդան Բաղդասարյանից:
Փորձաքննությանը ներկայացված խոհանոցային դանակի բռնակի աջ և ձախ, ստորին ու վերին մակերեսներին, շեղբի աջ ու ձախ կողմնային մակերեսներին հաստատվեց արյան առկայություն, որը պատկանում է մարդու և ըստ արյան ABO իզոշճաբանական համակարգի առաջացել է օբյեկտներ 5,7-11-ում՝ արյան O խումբ ունեցող անձից, կամ անձանցից, այդ թվում նաև կարող էր առաջանալ ինչպես հանգուցյալ Արթուր Ռուբենի Նազարյանից, այնպես էլ տուժող Վարդան Բաղդասարյանից, օբյեկտ 6-ում /բռնակ/՝ ուղեկցող H հակածինով արյան A խումբ ունեցող անձից կամ անձանցից, այդ թվում նաև կարող էր առաջանալ տուժող Վասիլե Ավրամովիչից կամ էլ արյան O և A խումբ ունեցող անձնաց արյան խառնուրդից /հետքում հակամարմիններ չեն հայտնաբերվել/, որի դեպքում էլ չի բացառվում հետքի առաջացումը ինչպես հանգուցյալ Ա.Ռ.Նազարյանից, այնպես էլ տուժողներ Վ.Ռ.Բաղդասարյանից և Վ.Ավրամովիչից:
Փորձաքննությանը ներկայացված ապակյա ՙֆանտա՚ գրառմամբ պիտակով տարայի վրա հայտնաբերված կասկածելի հետքերում հաստատվեց արյան առկայություն, որը պատկանում է մարդու և ըստ արյան ABO իզոշճաբանական համակարգի պատկանում է O խումբ ունեցող անձից, կամ անձանցից, այդ թվում նաև կարող էր առաջանալ ինչպես հանգուցյալ Արթուր Ռուբենի Նազարյանից, այնպես էլ տուժող Վարդան Բաղդասարյանից:
Փորձաքննությանը ներկայացված՝ Արմեն Ռուբիկ-Ռոմիկի Սիմոնյանի կաշվե կիսամուշտակի վրա տեղակայված կասկածելի հետքերում հաստատվեց արյան առկայություն, որը պատկանում է մարդու և ըստ արյան ABO իզոշճաբանական համակարգի առաջացել է արյան A խումբ ունեցող անձից, կամ անձանցից, այդ թվում նաև կարող էր առաջանալ ինչպես հանգուցյալ Արթուր Ռուբենի Նազարյանից, այնպես էլ տուժող Վարդան Բաղդասարյանից:
Փորձաքննությանը ներկայացված՝ Վասիլե Ավրամովիչի կաշվե բաճկոնի, կիսավերորկուի, սպորտային մայկայի, ջինսե վերնաշապիկի, մոխրասև տրիկոտաժե վերնաշապիկի վրա տեղակայված կասկածելի հետքերում հաստատվեց արյան առկայություն, որը պատկանում է մարդու և ըստ արյան ABO իզոշճաբանական համակարգի առաջացել է ուղեկցող H հակածինով արյան A խումբ ունեցող անձից, կամ անձանցից, այդ թվում նաև կարող էր առաջանալ տուժող Վասիլե Արամովիչից:
Փորձաքննությանը ներկայացված՝ հանգուցյալ Արթուր Նազարյանին պատկանող սպորտային ՙԱդիդաս՚ տեսակի անդրավարտիքի, սպիտակ բաճկոնի, սև կարճաթև մայկայի, ջեմպրի, աղաղած կաշվից կիսամուշտակի, կոշիկներից ձախ թայի վրա տեղակայված կասկածելի հետքերում հաստատվեց արյան առկայություն, որը պատկանում է մարդու և ըստ արյան ABO իզոշճաբանական համակարգի առաջացել է արյան O խումբ ունեցող անձից, կամ անձանցից, այդ թվում նաև կարող էր առաջանալ ինչպես հանգուցյալ Արթուր Ռուբենի Նազարյանից, այնպես էլ տուժող Վարդան Բաղդասարյանից:
Դատահետքաբանական, դատաբժշկական և քրեագիտական համալիր փորձաքննության թիվ 853 եզրակացությամբ այն մասին, որ փորձաքննությանը ներկայացված՝ Վասիլե Ավրամովիչի և Արթուր Նազարյանի հագուստների վրա առկա վնասվածքները /տեղակայությունները, չափերը և առաջացման մեղանիզմները տես հետազոտական մասում/ իրենց բնույթով ծակած-կտրած են և կարող էին առաջանալ ինչպես փորձաքննությանը ներկայացված դանակի շեղբի, այնպես էլ նմանատիպ՝ ծակող-կտրող շեղբ ունեցող այլ գործիքի/ների/, հնարավոր է՝ դանակի/ների/ շեղբի ներգործությունների շեղակի և անմիջական /բնույթը տես հետազոտական մասում/ ներթափանցումների արդյունքներում:
Փորձաքննությանը ներկայացված Արթուր Նազարյանի վերարկուի, սպորտային վերնամասի, սվիտրի և մայկայի աջ և ձախ կողմերի վերին կիսամասերի վրա առկա երկուական վնասվածքները իրենց տեղակայությամբ, ուղղվածությամբ և չափերով հիմնականում համընկնում են վերջինիս դիակի վնասվածքների վերաբերյալ դ/բ-ի թիվ 239 եզրակացության մեջ նշված կրծքավանդակի ձախ կեսի պտկային գծով առկա լայնական տեղակայված ծակած-կտրած վերքի հետ:
Ա. Նազարյանի վերարկուի և սպորտային վերնամասի ձախ թևքի առաջամասի վերին դիմային մակերեսին առկա ընդհանուր թվով երկու վնասվածքները իրենց տեղակայությամբ և չափերով հիմնականում համընկնում են վերջինիս դիակի վնասվածքների վերաբերյալ դ/բ-ի թիվ 239 եզրակացության մեջ նշված կրծքավանդակի ձախ բազկի վ/3-ի առաջնային մակերեսին և ձախ նախաբազկի ս/3-ի առաջադրսային մակերեսներին առկա ծակած-կտրած վերքերի հետ:
Փորձաքննությանը ներկայացված Վասիլե Ավարամովիչի դրապատիպ բաճկոնի, կաշվետիպ բաճկոնի, սվիտերի, վերնաշապաիկի և մայկայի հետևամասերի ձախ կողմերի կենտորնական ձախ կողակարերին հարող մակերեսների վրա առկա մեկական վնասվածքները իրենց տեղակայությամբ, ուղղվածությամբ և չափերով հիմնականում համընկնում են Վ. Ավրամովիչի մարմնական վնասվածքի վերաբերյալ դ/բ-ի թիվ 231 եզրակացության մեջ նշված որովայնի ձախ կեսի առաջակողմնային մակերեսի ծակած-կտրած թափանցող վերքի ձևով վերքի հետ:
Ամբուլատոր դատահոգեբուժական փորձաքննության թիվ 164/11 եզրակացությամբ այն մասին, որ Արմեն Ռուբիկ-Ռոմիկի Սիմոնյանը որևէ հոգեկան հիվանդությամբ չի տառապել և չի տառապում: Որպես հոգեպես առողջ անձնավորություն փորձաքննվողը կարող էր ու կարող է հաշիվ տալ իրեն իր գործողությունների համար և ղեկավարել դրանք, ինչպես իրավախախտումներ կատարելու պահին, այնպես էլ ներկայումս: Ուստի Արմեն Ռուբիկ-Ռոմիկի Սիմոնյանին իրեն մեղսագրվող արարքների նկատմամբ հարկ է ճանաչել մեղսունակ: Իր ներկա հոգեկան վիճակով կարող է մասնակցել դատաքննչական գործողություններին:
Արմեն Սիմոնյանի կողմից հանցագործության գործիք հանդիսացող դանակը մատնացույց անելու վերաբերյալ կազմված արձանագրությամբ այն մասին, որ Ա.Սիմոնյանը Երևան քաղաքի Սարկավագի 72 շենքի մուտքի աստիճանավանդակի վերջին աստիճանի աջ կողմում գտնվող բետոնյա սյուների հետևի մասից ներկայացրել է դեպքի օրը իր մոտ եղած խոհանոցային դանակը, որով հարվածել է Ա.Նազարյանին և Վ.Ավրամովիչին:

Քննչական փորձարարություն կատարելու վերաբերյալ կազմված արձանագրությամբ այն մասին, որ կասկածյալ Արմեն Սիմոնյանը մատնացույց անելով Երևան քաղաքի ՙՕղակաձև՚ զբոսայգում գտնվող ՙԿամերային երաժշտության տան՚ հարևանությամբ գտնվող արահետի կանաչապատ հատվածը և հայտնել, որ 2011 թվականի մարտի 02-ին, ժամը 2000-ի սահմաններում վիճաբանել է Ա.Նազարյանի հետ, որի ընթացքում իր մոտ եղած խոհանոցային դանակով հարվածներ է հասցրել Ա.Նազարյանին, այնուհետև նույն դանակով վնասվածքներ է հասցրել բաժանելու նպատակով իրեն մոտեցած Վ.Ավրամովիչին:
Դեպքի վայրի զննության արձանագրությամբ այն մասին, որ 02.03.2011 թվականին Երևան քաղաքի ՙՕղակաձև՚ զբոսայգում գտնվող ՙԿամերային երաժշտության տան՚ ձախակողմյան սալիկապատ արահետի եզրաքարի վրայից հայտնաբերվել են տարաներ, արնանման հետքեր և Ա.Նազարյանի դիակը:
Դեպքի ժամանակ տուժող Վ.Ավրամովիչի հագին եղած հագուստները թիվ մեկ համալսարանական հիվանդանոցի ընդունարանի բուժքույր Գայանե Խասատյանի կողմից ներկայացնելու վերաբերյալ կազմված արձանագրությամբ:
ՀՀ ԱՆ ԴԲԳԳԿ-ից Արթուր Նազարյանի հագին դեպքի ժամանակ եղած հագուստներն առգրավվելու վերաբերյալ կազմված արձանագրությամբ:
Դեպքի ժամանակ Արմեն Սիմոնյանի հագին եղած հագուստներն առգրավվելու վերաբերյալ կազմված արձանագրությամբ:
Իրեղեն ապացույց ճանաչված դանակի, բամբակե խծուծների, Ա.Նազարյանի, Ա.Սիմոնյանի, Վ.Ավրամովիչի հագուստների առկայությամբ:
Դատարանը, հետազոտելով քրեական գործով ձեռք բերված ապացույցները և գնահատելով դրանց վերաբերելիության, թույլատրելիության, իսկ ամբողջ ապացույցներն իրենց համակցությամբ գործի լուծման համար բավարարության տեսանկյունից, հանգում է այն հետևության, որ ամբաստանյալ Արմեն Ռուբիկ-Ռոմիկի Սիմոնյանի ցուցմունքի այն մասը, որ չկարողանալով կռվի ընթացքում Արթուրին հաղթել, այնտեղ եղած դանակը վերցնելով հարվածել է Արթուրին, արժանահավատ չէ և նպատակ է հետապնդում մեղմացնելու իր կողմից կատարած հանցանքը ու նրա ցուցմունքի այդ մասը ժխտվում է իր իսկ նախաքննական ցուցմունքով այն մասին, որ 2011 թվականի մարտի 02-ին գտնվել է տանը, մի քանի բաժակ օղի է խմել և ապահով լինելու համար իր հետ վերցնելով խոհանոցային դանակը, ժամը 2000-ի սահմաններում դուրս է եկել տանից ու գնացել է Իսահակյան փողոց` Երևան քաղաքի ՙՕղակաձև՚ զբոսայգի:
Դատաքննությամբ հիմնավորվեց, որ ամբաստանյալ Արմեն Ռուբիկ-Ռոմիկի Սիմոնյանը Երևան քաղաքի Սայաթ-Նովա նրբանցքի 78 հացեում գտնվող իր տանը օգտագործելով օղի, իրեն ապահով զգալու համար վերցնելով խոհանոցային դանակը, դուրս է եկել տանից և գնացել Երևան քաղաքի Իսահակյան փողոց: Երևան քաղաքի ՙՕղակաձև՚ զբոսայգու 2-րդ հատվածում գտնվող ՙԿամերային երաժշտության տան՚ առջև հանդիպել է գործով տուժող, այժմ հանգուցյալ Արթուր Նազարյանին, որին այդ օրը պետք է վերադարձներ թղթախաղում պարտված 250.000 ՀՀ դրամ գումարից 15.000 ՀՀ դրամը: Ա.Սիմոնյանը տեսնելով Ա.Նազարյանին կանչել է իր մոտ և զրույցի ընթացքում նրան ասել, որ թղթախաղով պարտված գումարը չի տալու, որի պատճառով Ա.Սիմոնյանի ու Ա.Նազարյանի միջև վիճաբանություն է սկսվել, որից հետո նրանք երկուսով սկսել են հարվածներ հասցնել միմյանց, որի հետևանքով ընկել են գետնին և այդ ընթացքում շարունակել են իրար հարվածել: Արմեն Սիմոնյանը տանից իր հետ վերցրած խոհանոցային դանակով, սպանելու նպատակով, դիտավորյալ հարվածել է Արթուր Նազարյանի որովայնին ու մարմնի տարբեր մասերին` պատճառելով նրան կյանքի հետ անհամատեղելի` կտրած վերք աջ դաստակի ափային մակերեսին, ծակած կտրած չթափանցող վերք կրծքավանդակի ձախ կեսի առաջային մակերեսին, որովայնի աջ կեսի թափանցող վնասվածք, ձախ վերին վերջույթի կտրած ծակած վնասվածքներ, վերքային խողովակների ընթացքով անոթների, ձախից՝ չորորդ կողոսկրի մասնակի վնասումով, աջ թոքի ստորին բլթի լյարդի մեծ բլթի, ստոծանու, հաստաղու վնասվածքներ: Նրանցից մի քանի մետր հեռավորության վրա կանգնած` գործով տուժող Վասիլե Սրետենովի Ավրամովիչը, գործով վկաներ՝ Վարդան Ռաֆիկի Բաղդասարյանը և Վոն Դեն Յունի Կլառան տեսնելով, որ Ա.Սիմոնյանը և Ա.Նազարյանը ծեծում են միմյանց, բաժանելու նպատակով մոտեցել են նրանց: Արթուր Նազարյանին պաշտպանելու նպատակով Վասիլե Ավրամովիչը բռնել է ամբաստանյալ Արմեն Սիմոնյանի կոկորդից ու այդ ժամանակ վերջինս դանակով դիտավորությամբ հարվածելով Վ.Ավրամովիչիի որովայնին, նրա առողջությանը` պատճառել է կյանքին վտանգ սպառնացող ծանր վնաս՝ որովայնի ձախ կեսի առաջա-կողմնային մակերեսի ծակած-կտրած թափանցող վերքի ձևով: Վ.Բաղդասրյանն էլ նկատելով Արմեն Սիմոնյանի ձեռքի դանակը, այն վերցնելու նպատակով ոտքը դրել է նրա ձեռքի վրա, ապա բռնելով դանակի շեղբը` փորձել է այն վերցնել, որպեսզի վերջինս Ա.Նազարյանին այլևս չհարվածի, սակայն Ա.Սիմոնյանը քաշելով դանակը անզգուշությամբ վնասել է Վ.Բաղդասարյանի աջ ձեռքը` նրա առողջությանը` աջ դաստակի շրջանի կտրած վերքի ձևով, պատճառելով առողջության կարճատև քայքայումով մարմնական վնասվածք: Այդ ժամանակ ամբաստանյալ Արմեն Սիմոնյանի որդին՝ գործով վկա Ռոման Ռուբիկ-Ռոմիկի Սիմոնյանը, անցնելով ՙՕղակաձև՚ զբոսայգու միջով, տեսնելով, որ հայրը կռիվ է անում, բռնելով նրա թևից ուղեկցել է նրան տուն: Նրանց հեռանալուց հետո Վ.Բաղդասարյանը մոտեցել է Ա.Նազարյանին և տեսնելով, որ վերջինս ողջ է, փոձել է նրա բջջային հեռախոսով շատպօգնություն զանգել, սակայն չկարողանալով օգտվել բջջային հեռախոսից, Վ.Բաղդասարյանը գնացել է գործով վկա Վարդան Ռաշիդի Ժամխարյանի` Երևան քաղաքի Սայաթ-Նովա նրբանցքի 76 տուն, նրան հայտնել կատարվածի մասին, որից հետո նրանք միասին գնացել են դեպքի վայր, որտեղ հանդիպել են ոստիկանության աշխատակիցներին: Տուն գնալուց հետո Ա.Սիմոնյանը թաքնվելու նպատակով տանից դուրս է եկել ու ճանապարհին` Երևան քաղաքի Սարկավագի 72 շենքի մուտքի աստիճանավանդակի վերջին աստիճանի աջ կողմում գտնվող բետոնյա սյուների հետևի մասում թաքցրել է հանցագործության գործիք հանդիսացող դանակը, որից հետո փորձել է թաքնվել, սակայն ժամը 0150-ի սահմաններում նույն շենքի բակից ՀՀ ոստիկանության Կենտրոնականի բաժնի աշխատակիցները նրան հայտնաբերել են: Այդ ժամանակ Ա.Սիմոնյանը մատնացույց է արել այն վայրը, որտեղ թաքցրել է դանակը, որից հետո ոստիկանության աշխատակիցները նրան բերման են ենթարկել ոստիկանության բաժին: Ստացած մարմնական վնասվածքների հետևանքով Արթուր Նազարյանը մահացել է:
Տուժողի իրավահաջորդ Վահան Ռոբրտի Նազարյանի կողմից ամբաստանյալ Արմեն Սիմոնյանի նկատմամաբ բողոք և քաղաքացիական հայցի պահանջ չի ներկայացվել:

Դատարանի իրավական վերլուծությունները.

Այսպիսով, ընդհանուր կարգով սահմանված դատաքննությամբ հետազոտված ապացույցների հիման վրա դատարանն ապացուցված է համարում, որ ամբաստանյալ Արմեն Ռուբիկ-Ռոմիկի Սիմոնյանը ապօրինաբար մեկ ուրիշին դիտավորությամբ զրկելով կատարել է սպանություն, ինչպես նաև դիտավորությամբ մեկ ուրիշի առողջությանը պատճառել է կյանքի համար վտանգավոր ծանր մարմնական վնասվածք` որպիսի արարքների համար նա պետք է պատասխանատվության ենթարկվի ՀՀ քրեական օրենսգրքի 104 հոդվածի 1-ին մասով և ՀՀ քրեական օրենսգրքի 112 հոդվածի 1-ին մասով:
ՀՀ քրեական օրենսգրքի 61-րդ հոդվածի 2-րդ մասի համաձայն` պատժի չափը և տեսակը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով:
Ամբաստանյալ Արմեն Ռուբիկ-Ռոմիկի Սիմոնյանը անկեղծորեն խոստովանեց և զղջաց կատարածի համար, նախկինում եղել է դատապարտված, դատվածությունը չմարված:
Պատասխանատվությունը և պատիժը մեղմացնող հանգամանքներ չկան:
Որպես պատասխանատվությունը և պատիժը ծանրացնող հանգամանք դատարանը դիտում է այն, որ Արմեն Ռուբիկ-Ռոմիկի Սիմոնյանը հանցանքը կատարել է ալկոհոլի ազդեցության տակ:
Ամբաստանյալ Արմեն Ռուբիկ-Ռոմիկի Սիմոնյանի նկատմամբ պատիժ նշանակելիս, դատարանը գտնում է, որ պետք է կիրառել ՀՀ քրեական օրենսգրքի 66 հոդվածի 4-րդ մասը և յուրաքանչյուր հանցագործության համար առանձին պատիժ նշանակելով, վերջնական պատիժ պետք է նշանակել պատիժները մասնակիորեն գումարելու միջոցով:
Դատարանը քննարկելով ամբաստանյալի նկատմամբ ընտրված խափանման միջոցի և իրեղեն ապացույցի հարցերը, գտնում է, որ ամբաստանյալ Արմեն Ռուբիկ-Ռոմիկի Սիմոնյանի նկատմամբ ընտրված խափանման միջոցը` կալանավորումը, պետք է վերացնել և նրան պետք է թողնել անփոփոխ մինչև դատավճռի օրինական ուժի մեջ մտնելը, իսկ քրեական գործով իրեղեն ապացույց ճանաչված և քրեական գործին կցված պոլիէթիլենային և ապակյա տարաները, բամբակյա խծուծները, մառլյայի կտորները, դանակը պետք է ոչնչացնել, ամբաստանյալ Արմեն Սիմոնյանի և տուժող Վասիլե Ավրամովիչի հագուստները պետք է վերադարձնել նրանց, Արթուր Նազարյանի հագուստները պետք է վերադարձնել տուժողի իրավահաջորդ Վահան Նազարյանին` դատավճիռն օրինական ուժի մեջ մտնելուց հետո:

Եզրափակիչ մաս.

Ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց`

Արմեն Ռուբիկ-Ռոմիկի Սիմոնյանին մեղավոր ճանաչել ՀՀ քրեական օրենսգրքի 104 հոդվածի 1-ին մասով և ՀՀ քրեական օրենսգրքի 112 հոդվածի 1-ին մասով և նրան` ՀՀ քրեական օրենսգրքի 104 հոդվածի 1-ին մասով դատապարտել ազատազրկման 11 /տասնմեկ/ տարի ժամկետով, ՀՀ քրեական օրենսգրքի 112 հոդվածի 1-ին մասով` ազատազրկման 5 /հինգ/ տարի ժամկետով: ՀՀ քրեական օրենսգրքի 66 հոդվածի 4-րդ մասի կիրառմամբ ՀՀ քրեական օրենսգրքի 104 հոդվածի 1-ին մասով նշանակված 11 /տասնմեկ/ տարի ազատազրկմանը մասնակիորեն գումարել ՀՀ քրեական օրենսգրքի 112 հոդվածի 1-ին մասով նշանակված 5 /հինգ/ տարի պատժից 4 /չորս/ տարի ազատազրկումը և վերջնական պատիժ նշանակել ազատազրկում 15 /տասնհինգ/ տարի ժամկետով:
Արմեն Ռուբիկ-Ռոմիկի Սիմոնյանի պատժի սկիզբը հաշվել 03.03.2011 թվականից, խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Քրեական գործով իրեղեն ապացույց ճանաչված և քրեական գործին կցված պոլիէթիլենային և ապակյա տարաները, բամբակյա խծուծները, մառլյայի կտորները, դանակը` ոչնչացնել, ամբաստանյալ Արմեն Սիմոնյանի և տուժող Վասիլե Ավրամովիչի հագուստները վերադարձնել նրանց, Արթուր Նազարյանի հագուստները վերադարձնել տուժողի իրավահաջորդ Վահան Նազարյանին` դատավճիռն օրինական ուժի մեջ մտնելուց հետո:
Սույն դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում:


ԴԱՏԱՎՈՐ` Ա. ԲԵԿԹԱՇՅԱՆ