ԳՈՐԾ N- ԵԿԴ/0119/01/11

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ՔՐԵԱԿԱՆ ՎԵՐԱՔՆՆԻՉ ԴԱՏԱՐԱՆ
Ո Ր Ո Շ ՈՒ Մ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

<31> օգոստոսի 2011թ. ք.Երևան

ՀՀ քրեական վերաքննիչ դատարանը /այսուհետ` Վերաքննիչ դատարան/
հետևյալ կազմով`

ՆԱԽԱԳԱՀՈՂ ԴԱՏԱՎՈՐ` Ե.ԴԱՐԲԻՆՅԱՆ
ԴԱՏԱՎՈՐՆԵՐ` Ա.ՀՈՎՀԱՆՆԻՍՅԱՆ
Մ.ՊԵՏՐՈՍՅԱՆ
ՔԱՐՏՈՒՂԱՐՈՒԹՅԱՄԲ` Տ.Հակոբյանի

ՄԱՍՆԱԿՑՈՒԹՅԱՄԲ`

ՄԵՂԱԴՐՈՂ` Ա.Ասանդյանի
ՊԱՇՏՊԱՆ` Ա.Թովմասյանի


Դռնբաց դատական նիստում, ամբաստանյալ Բարիս Թովմասյանի շահերի պաշտպան Արշակ Թովմասյանի վերաքննիչ բողոքնի հիման վրա, վճռաբեկ վարույթի կանոններով, քննության առնելով քրեական գործն ըստ մեղադրանքի ԲԱՐԻՍ ԱՐԹՈՒՐԻ ԹՈՎՄԱՍՅԱՆԻ` ՀՀ քրեական օրենսգրքի 258-րդ հոդվածի 3-րդ մասի 2-րդ կետով,

Պ Ա Ր Զ Ե Ց


ԳՈՐԾԻ ԴԱՏԱՎԱՐԱԿԱՆ ՆԱԽԱՊԱՏՄՈՒԹՅՈՒՆԸ.
2011թ. մայիսի 02-ին Կենտրոնականի քննչական բաժնի ավագ քննիչ Կ.Սահակյանի կողմից հարուցվել և վարույթ է ընդունվել թիվ 13124711 քրեական գործը` ՀՀ քրեական օրենսգրքի 258-րդ հոդվածի 3-րդ մասի 2-րդ կետով:
Կենտրոնականի քննչական բաժնի ավագ քննիչ Կ.Սահակյանի 2011թ. մայիսի 03-ի որոշմամբ Բարիս Արթուրի Թովմասյանի նկատմամբ որպես խափանման միջոց է ընտրվել չհեռանալու մասի ստորագրությունը:
2011թ. մայիսի 10-ին Բարիս Արթուրի Թովմասյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 2-րդ կետով:
2011թ. հունիսի 14-ին սույն քրեական գործը հաստատված մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան:
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 2011թ. հունիսի 30-ի դատավճռով ամբաստանյալ Բարիս Արթուրի Թովմասյանը մեղավոր է ճանաչվել ՀՀ քրեական օրենսգրքի 258-րդ հոդվածի 3-րդ մասի 2-րդ կետով նախատեսված հանցանքում և դատապարտվել տուգանքի` նվազագույն աշխատավարձի հինգհարյուրապատիկի` 500.000 /հինգ հարյուր հազար/ ՀՀ դրամի չափով:
<Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին> ՀՀ ԱԺ 2011թ. մայիսի 26-ի որոշման 1-ին կետի 3-րդ ենթակետի կիրառմամբ ամբաստանյալ Բարիս Արթուրի Թովմասյանն ազատվել է պատիժը կրելուց:
Բարիս Արթուրի Թովմասյանի նկատմամբ ընտրված խափանման միջոց չհեռանալու մասին ստորագրությունը վերացվել է:
Ընդհանուր իրավասության դատարանի 2011թ. հունիսի 30-ի դատավճռի դեմ վերաքննիչ բողոք է բերել ամբաստանյալ Բարիս Թովմասյանի շահերի պաշտպան Արշակ Թովմասյանը, որը Վերաքննիչ դատարանի 2011թ. օգոստոսի 09-ի որոշմամբ ընդունվել է վարույթ:
Վերաքննիչ բողոքի դեմ գրավոր պատասխաններ չեն ներկայացվել:


ԳՈՐԾԻ ՓԱՍՏԱԿԱՆ ՀԱՆԳԱՄԱՆՔՆԵՐԸ.
Ամբաստանյալ Բարիս Արթուրի Թովմասյանին մեղադրանք է առաջադրվել այն բանի համար, որ նա 2011թ. ապրիլի 30-ին` ժամը 20:30-ի սահմաններում, իր ընկերուհու` Էլեոնորա Գևորգի Հարությունյանի հետ, գնացել են Երևան քաղաքի Կողբացու փողոցում գտնվող <Այրիշ փաբ>: Որոշակի ժամանակ այնտեղ անցկացնելուց հետո կենցաղային հարցի շուրջ վիճաբանել են միմյանց հետ, և Է.Հարությունյանը ցանկություն է հայտնել տուն գնալու, իսկ Բ.Թովմասյանը պատրաստակամություն` նրան տուն ճանապարհելու: Միասին նստել են տաքսի ավտոմեքենա և ուղևորվել դեպի Գր.Լուսավորիչ փողոց: Գր.Լուսավորչի և Իտալական փողոցների խաչմերուկի մոտ իջել են տաքսի մեքենայից և որոշել քայլել ու զրուցել և անցնելով փողոցը` քայլել են դեպի ՀՀ-ում Իտալիայի Հանրապետության դեսպանատան ուղղությամբ:
Այդ ընթացքում Բ.Թովմասյանը կոպիտ կերպով խախտելով հասարակական կարգը` վիճաբանել է իր ընկերուհու` Էլեոնորա Հարությունյանի հետ, որի ընթացքում հրել է վերջինիս, գցել գետնին ու փորձել հարվածել: Վերջինիս գործողությունները նկատվել են ՀՀ ԱԱԾ ԴՆՊՎ 1-ին բաժնի 2-րդ բաժանմունքի աշխատակիցներ Վահե Վարդանյանի, Արթուր Մանուկյանի և Անուշավան Թումանյանի կողմից, որոնք մոտեցել ու դիտողություն են արել Բ.Թովմասյանին, պահանջել դադարեցնել խուլիգնությունը, սակայն վերջինս, արհամարհելով նրանց, իր խուլիգանական գործողությունները զուգորդել է իշխանության ներկայացուցիչ հանդիսացող, տվյալ տարածքում հասարակական կարգի պահպանություն իրականացնող և խուլիգանությունը խափանող վերոհիշյալ ԱԱԾ աշխատակիցներին դիմադրություն ցույց տալով, այն է` հարվածներ է հասցրել վերջիններիս ու տվել սեռական բնույթի հայհոյանքներ:



ՎԵՐԱՔՆՆԻՉ ԲՈՂՈՔԻ ՀԻՄՔԵՐԸ, ՀԻՄՆԱՎՈՐՈՒՄՆԵՐԸ ԵՎ ՊԱՀԱՆՋԸ.
Ամբաստանյալ Բարոս Թովմասյանի շահերի պաշտպան Արշակ Թովմասանն իր վերաքննիչ բողոքով հայտնել է, որ սույն քրեական գործը հարուցվել է քրեական դատավարության օրենսգրքի դրույթերի կոպիտ խախտումներով, ոչ այն անձի նկատմամբ և ոչ այն փաստերով, որոնք առկա են քրեական գործի նյութերում, ավելին` քրեական գործի նյութերում առկա և նախաքննության մարմնի կողմից ապացույցներ դիտված փաստաթղթերն ընդհանրապես կապ չունեն մեղադրական եզրակացությունում մատնանշված հանգամանքների հետ:
Պաշտպանը հայտնել է, որ նախաքննության մարմինը մեղադրական եզրակացությունը կազմելիս հաշվի է առել միայն ԱԱԾ աշխատակիցների նախօրոք պայմանավորված, բայցևայնպես իրար հակասող ցուցմունքները: Իսկ նախաքննության ընթացքում որպես վկա հարցաքննված Էլեոնորա Հարությունյանը հայտնել է, որ Բարիս Թովմասյանն իր ընկերն է, իրենք պատրաստվում են ամուսնանալ, դեպքի օրը վերջինս իրեն չի հարվածել և գետնին չի գցել, և ամբողջ պատմությունը ծագել է նրանից, որ զինվորական հագուստով մեկն առանց ներկայանալու միջամտել է իրենց անձնական խոսակցությանը, Բ. Թովմասյանը բարձր տոնով խնդրել է չխառնվել, վերոհիշյալ անձը դա ընդունել է որպես վիրավորանք և հայհոյել է Բարիս Թովմասյանին, որից հետո իրեն են մոտեցել իր երեք աշխատակիցները և միասին շարունակել են Բարիս Թովմասյանի ծեծը: Նախաքննության մարմինն անտեսել է Բարիս Թովմասյանի և Էլեոնորա Հարությունյանի ցուցմունքներն այն մասին, որ ԱԱԾ աշխատակիցներն անմիջապես ձեռնաշղթաներ են հագցրել Բարիս Թովմասյանին և այդպես շարունակել իրենց ծեծը, ինչի մասին են վկայում է նաև Փորձագետի թիվ 1079 եզրակացությունը:
Ըստ պաշտպանի` նախաքննության մարմնի կողմից անտեսված ամենակարևոր հանգամանքներից դատաբժշկական փորձաքննությունների արդյունքները, որոնցից ակնհայտ է դառնում, որ Բարիս Թովմասյանն է ծեծի ենթարկվել ԱԱԾ աշխատակիցների կողմից:
Պաշտպանի պնդմամբ, նախաքննության մարմնի կողմից ԱԱԾ աշխատակիցների նկատմամբ քրեական հետանդում չիրականացնելու մասին 09.06.2011թ. անօրինական է, քանի որ, անտեսելով մեղադրյալ Բարիս Թովմասյանի իրավունքները, նախաքննության մարմինը նրան չի ծանոթացրել այդ որոշումը բողոքարկելու իր իրավունքի հետ, բերման ենթարկվելու պահից Բարիս Թովմասյանն ու Էլեոնորա Հարությունյանը մինչև առավոտ ապօրինի պահվել են անազատության մեջ, որով խախտվել են վերջիններիս սահմանադրական իրավունքները:
Ինչ վերաբերում է ընդհանուր իրավասության դատարանում սույն քրեական գործի քննությանը` ապա այս առումով պաշտպան Ա.Թովմասյանը նշել է, որ դատաքննությամբ ևս ոչ մի կերպ չի հիմնավորվել ամբաստանյալ Բարիս Թովմասյանի մեղավորությունն իրեն մեղսագրվող արարքի կատարման մեջ: Պաշտպանը մշել է, որ ամբաստանյալի նկատմամբ մեղադրական դատական ակտի կայացման արդյունքում Դատարանի կողմից իր պաշտպանյալի նկատմամբ բռնություն գործադրած անձանց իրավունքները գերակայել են, ինչի արդյունքում իրականում քրեական օրենսգրքով չթույլատրված արարք կատարած անձինք հանդես են եկել որպես վկա և տուժող, իսկ անմեղ անձը դատապարտվել է:
Ելնելով վերոգրյալից` ամբաստանյալ Բարիս Թովմասյանի շահերի պաշտպան Արշակ Թովմասյանը խնդրել է ամբողջությամբ բեկանել Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 2011թ. հունիսի 30-ի մեղադրական դատավճիռը, կայացնել նոր դատական ակտ, որով Բարիս Արթուրի Թովմասյանին ճանաչել անմեղ և արդարացնել:



ՎԵՐԱՔՆՆԻՉ ԴԱՏԱՐԱՆԻ ՊԱՏՃԱՌԱԲԱՆՈՒԹՅՈՒՆՆԵՐԸ ԵՎ ԵԶՐԱՀԱՆԳՈՒՄԸ.
Վերաքննիչ դատարանը, քննության առնելով վերաքննիչ բողոքը` բողոքի հիմքերի և հիմնավորումների սահմաններում, լսելով նաև բողոքում ներկայացված հետևությունները հիմնավորելու մասին ամբաստանյալի և պաշտպանի պատճառաբանությունները, մեղադրողի պատասխանը դրա դեմ, ինչպես նաև ուսումնասիրելով և վերլուծելով գործի նյութերը, դրանք գնահատելով իրենց համակցությամբ, հանգում է այն հետևության, որ պաշտպան Ա.Թովմասյանի կողմից բերված վերաքննիչ բողոքը պետք է մերժել հետևյալ պատճառաբանությամբ.
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը, կատարելով ապացույցների հետազոտություն և համաձայն ՀՀ քրեական դատավարության օրենսգրքի 127-րդ հոդվածի պահանջի` յուրաքանչյուր ապացույց գնահատելով` վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, հանգել է այն հետևության, որ Բարիս Արթուրի Թովմասյանի մեղավորությունը ՀՀ քրեական օրենսգրքի 258-րդ հոդվածի 3-րդ մասի 2-րդ կետով նախատեսված հանցավոր արարքի կատարման մեջ հիմնավորվել է գործով ձեռք բերված հետևյալ ապացույցներով.
Տուժող ՀՀ ԱԱԾ ԴՆՊՎ 1-ին բաժնի 2-րդ բաժանմունքի օպերատիվ աշխատակից Անուշավան Ալեքսանդրի Թումանյանի ցուցմունքով այն մասին, որ 2011թ. ապրիլի 30-ին` ժամը 22։00-ից ծառայություն է իրականացրել ՀՀ-ում Իտալիայի Հանրապետության դեսպանատան տարածքում։ Հերթափոխը ընդունելուց որոշ ժամանակ անց լսել է աղջկա բղավոցի ձայն և արագ գնալով ձայնի ուղղությամբ` նկատել է, որ մի տղա, որը հետագայում պարզվել է, որ Բարիս Թովմասյանն է, հրելով գետնին է գցել մի աղջկա և փորձել է հարվածել։ Իր գործընկեր Վ. Վարդանյանը, որը ծառայություն է իրականացրել ՀՀ-ում Ֆրանսիայի դեսպանատան տարածքում, արագ մոտենալով` փորձել է կանխել Բ. Թովմասյանի հետագա գործողությունները, սակայն Բ. Թովմասյանը սեռական բնույթի հայհոյանքներ տալով` դիմադրություն է ցույց տվել ու քաշքշել է Վ. Վարդանյանին։ Նկատելով այդ ամենը` մյուս գործընկերոջ և Ա. Մանուկյանի հետ մոտեցել են, ներկայացել որպես ԱԱԾ աշխատակիցներ և փորձել են կարգի հրավիրել Բ. Թովմասյանին, սակայն նա շարունակել է դիմադրություն ցույց տալ, բռունցքով հարվածներ է հասցրել իր աչքին և Ա. Մանուկյանի դեմքին։ Մի կերպ, նրա նկատմամբ ուժ գործադրելով` ոլորել են նրա ձեռքերը, բերել են պահակակետ և տեղի ունեցածի մասին զեկուցել են հերթապահ մաս։ Քիչ անց եկել են ոստիկանության աշխատակիցները, որոնք Բ. Թովմասյանին բերման են ենթարկել ոստիկանության Կենտրոնական բաժին։ Քանի որ այդ օրն անձրևել է և գետինը թաց է եղել, իսկ Բարիս Թովմասյանը գտնվել է հարբած վիճակում, այդ պատճառով նա մի քանի անգամ սայթաքել և վայր է ընկել գետնին։
/դատական նիստի արձանագրություն, գ.թ. 37-38, 97/։
Վկա ՀՀ ԱԱԾ ԴՆՊՎ 1-ին բաժնի 2-րդ բաժանմունքի օպերատիվ աշխատակից Արթուր Գեղամի Մանուկյանի ցուցմունքով այն մասին, որ 2011թ. ապրիլի 30-ին` ժամը 22։00-ից, նույն բաժանմունքի աշխատակից Վազգեն Հրայրի Վարդանյանի հետ ծառայություն են իրականացրել ՀՀ-ում Իտալիայի և Ֆրանսիայի Հանրապետությունների դեսպանատների տարածքում։ Հերթափոխը ընդունելուց որոշ ժամանակ անց լսել են աղջկա բղավոցի ձայն և արագ գնալով ձայնի ուղղությամբ` նկատել են, որ մի տղա, որը հետագայում պարզվել է, որ Բարիս Թովմասյանն է, հրելով գետնին է գցել մի աղջկա և փորձել է հարվածել։ Վ. Վարդանյանը, որը նույնպես ծառայություն է իրականացրել ՀՀ-ում Ֆրանսիայի դեսպանատան տարածքում, արագ մոտենալով` փորձել է կանխել նրա հետագա գործողությունները, ներկայացել է որպես ԱԱԾ աշխատակից և հարցրել, թե ինչ է անում։ Բ. Թովմասյանը պատասխանել է, որ դա նրա գործը չէ և սեռական բնույթի հայհոյանքներ տալով` ձեռքով հարվածել է Վ. Վարդանյանին աչքի շրջանում։ Բ. Թովմասյանի գործողությունները կանխելու համար ինքը փորձել է ոլորել նրա ձեռքերը, սակայն վերջինս դիմադրություն է ցույց տվել ու քաշքշել է իրեն։ Նկատելով այդ ամենը` Ա. Թումանյանը և Ա. Մանուկյանը մոտեցել են, ներկայացել են որպես ԱԱԾ աշխատակիցներ և փորձել են կարգի հրավիրել Բ. Թովմասյանին, սակայն նա շարունակել է դիմադրություն ցույց տալ, բռունցքով հարվածներ է հասցրել Ա. Թումանյանի աչքին և Ա. Մանուկյանի դեմքին։ Մի կերպ նրա նկատմամբ ուժ գործադրելով` ոլորել են ձեռքերը, բերել են պահակակետ և տեղի ունեցածի մասին զեկուցել են հերթապահ մաս։ Քիչ անց եկել են ոստիկանության աշխատակիցները, որոնք Բ. Թովմասյանին բերման են ենթարկել ոստիկանության Կենտրոնական բաժին։
/դատական նիստի արձանագրություն, գ.թ. 39-40/։
Վկա ՀՀ ԱԱԾ ԴՆՊՎ 1-ին բաժնի 2-րդ բաժանմունքի օպերատիվ աշխատակից Վազգեն Հրայրի Վարդանյանի ցուցմունքով այն մասին, որ 2011թ. ապրիլի 30-ին` ժամը 22։00-ից, նույն բաժանմունքի աշխատակից Արթուր Գեղամի Մանուկյանի հետ ծառայություն են իրականացրել ՀՀ-ում Իտալիայի և Ֆրանսիայի Հանրապետությունների դեսպանատների տարածքում։ Հերթափոխը ընդունելուց որոշ ժամանակ անց լսել են աղջկա բղավոցի ձայն և արագ գնալով ձայնի ուղղությամբ` նկատել են, որ մի տղա, որը հետագայում պարզվել է, որ Բարիս Թովմասյանն է, հրելով գետնին է գցել մի աղջկա և փորձել է հարվածել։ Վ. Վարդանյանը, որը նույնպես ծառայություն է իրականացրել ՀՀ-ում Ֆրանսիայի դեսպանատան տարածքում, արագ մոտենալով` փորձել է կանխել նրա հետագա գործողությունները, ներկայացել է որպես ԱԱԾ աշխատակից և հարցրել, թե ինչ է անում, ինչին Բ. Թովմասյանը պատասխանել է, որ դա նրա գործը չէ և սեռական բնույթի հայհոյանքներ տալով` ձեռքով հարվածել է Վ. Վարդանյանին աչքի շրջանում։ Բ. Թովմասյանի գործողությունները կանխելու համար ինքը փորձել է ոլորել նրա ձեռքերը, սակայն վերջինս դիմադրություն է ցույց տվել ու քաշքշել է իրեն։ Նկատելով այդ ամենը` Ա. Թումանյանը և Ա. Մանուկյանը մոտեցել են, ներկայացել են որպես ԱԱԾ աշխատակիցներ և փորձել են կարգի հրավիրել Բ. Թովմասյանին, սակայն նա շարունակել է դիմադրություն ցույց տալ, բռունցքով հարվածներ է հասցրել Ա. Թումանյանի աչքին և Ա. Մանուկյանի դեմքին։ Մի կերպ, նրա նկատմամբ ուժ գործադրելով` ոլորել են ձեռքերը, բերել են պահակակետ և տեղի ունեցածի մասին զեկուցել են հերթապահ մաս։ Քիչ անց եկել են ոստիկանության աշխատակիցները, որոնք Բ. Թովմասյանին բերման են ենթարկել ոստիկանության Կենտրոնական բաժին։
/դատական նիստի արձանագրություն, գ.թ. 41-42/։
Վկա Էլեոնորա Գևորգի Հարությունյանի ցուցմունքով այն մասին, որ 2011թ. ապրիլի 30-ին` ժամը 20։30-ի սահմաններում, իր ընկեր Բարիս Արթուրի Թովմասյանի հետ գնացել են Երևանի Կողբացի փողոցում գտնվող սրճարան` համերգ դիտելու։ Որոշ ժամանակ այնտեղ մնալուց հետո ցանկություն է հայտնել դուրս գալ, սակայն Բարիսն առարկել է։ Իրենք վիճել են։ Երբ ասել է, որ ցանկանում է տուն գնալ, Բ. Թովմասյանը պատրաստակամություն է հայտնել նրան տուն ճանապարհել։ Այդպես միասին նստել են տաքսի ավտոմեքենա և ուղևորվել են Գր. Լուսավորիչ փողոցի ուղղությամբ։ Գր. Լուսավորչի և Իտալական փողոցների խաչմերուկի մոտ իջել են տաքսուց։ Որոշել են քայլել և զրուցել։ Անցնելով փողոցը` քայլել են ՀՀ-ում Իտալիայի և Ֆրանսիայի Հանրապետութունների դեսպանատների ուղղությամբ։ Խոսակացության ընթացքում վիճաբանել են կենցաղային հարցերի շուրջ, որի ընթացքում Բ. Թովմասյանը բարձր տոնով է խոսել իր հետ։ Ինքն էլ բարձրաձայն պատասխանել է նրան։ Բարիս Թովմասյանն իրեն չի հարվածել, չի հրել և չի հայհոյել։ Ինքը վայր է ընկել` ոտքը սայթաքելու պատճառով։ Իրենց մոտեցած համազգեստով անձիք բռնություններ են գործադրել Բարիս Թովմասյանի նկատմամբ, քաշքշել ու հարվածել են նրան, ձեռնաշղթաներ են հագցրել ու պահել են իրենց պահակակետում։
/դատական նիստի արձանագրություն, գ.թ. 44-46/։
Բ. Թովմասյանի, Է. Հարությունյանի, Ա. Թումանյանի, Ա. Մանուկյանի և Վ. Վարդանյանի առերես հարցաքննությունների արձանագրություններով, որոնց համաձայն Ա. Թումանյանը, Ա. Մանուկյանը և Վ. Վարդանյանը Բ. Թովմասյանին և Է. Հարությունյանին առերես պնդել են, որ Բ. Թովմասյանը հրել և վայր է գցել Է. Հարությունյանին, փորձել է հարվածել, չի ենթարկվել իրենց օրինական պահանջներին, այդ ընթացքում իրենց նկատմամբ բռնություն է գործադրել։
/գ.թ. 57-66, 70-71/։
Դատաբժշկական փորձաքննության 06.05.2011թ. թիվ 1076 եզրակացությամբ այն մասին, որ` «Ա. Թումանյանի ստացած մարմնական վնասվածքները ձախ աչքի դրսային անկյան շրջանի և վերին կոպի, բերանի լորձաթաղանթի շրջանի արյունազեղման և լորձաթաղանթի պատռվածքի, ձախ այտային շրջանի ենթամաշկային արյունահավաքի ձևով, հասցվել են բութ, կոշտ առարկայով /ներով/, հնարավոր են որոշման մեջ նշված ժամկետին, որոնք առողջության թեթև վնասի հատկանիշներ չեն պարունակում»։
/գ.թ. 86-87/
Ամբաստանյալ Բարիս Արթուրի Թովմասյանը ցուցմունք է տվել այն մասին, որ առաջադրված մեղադրանքում իրեն մեղավոր չի ճանաչում, 2011թ. ապրիլի 30-ին` ժամը 20։30-ի սահմաններում, իր ընկերուհի Էլեոնորա Գևորգի Հարությունյանի հետ գնացել են Երևանի Կողբացի փողոցում գտնվող բար` համերգային ծրագիր դիտելու։ Որոշ ժամանակ այնտեղ անցկացնելուց հետո վիճաբանել են միմյանց հետ և Է. Հարությունյանը ցանկություն է հայտնել տուն գնալ, իսկ ինքը ճանապարհել է նրան։ Գր. Լուսավորչի և Իտալական փողոցների խաչմերուկի մոտ անցնելով փողոցը` քայլել են դեպի ՀՀ-ում Իտալիայի և Ֆրանսիայի Հանրապետութունների դեսպանատների ուղղությամբ։ Խոսակացության ընթացքում գոռացել է ընկերուհու վրա, որը հետ է գնացել և վայր է ընկել։ Այդ ընթացքում իրեն է մոտեցել համազգեստով մի անձնավորություն և ասել «ինչ ես անում` արա»։ Քանի որ գտնվել է նյարդայնացած վիճակում` բարձր տոնով պատասխանել է, որ դա իր անձնական գործն է և նրա գործը չէ։ Այդ անձը, որն ինչպես հետագայում է իմացել` Վազգեն Վարդանյանն է, պատասխանել է «էս ում տեղն ես դրել» ու սեռական բնույթի հայհոյանք տալով` բռունցքով հարված է հասցրել իր դեմքին։ Հարվածից ընկել է խոտերի մեջ, իսկ նա շարունակել է հարվածներ հասցնել իրեն։ Այդ ընթացքում մոտեցել են համազգեստով ևս երկու անձինք, որոնք նույնպես հարվածներ են հասցրել իրեն, տվել են սեռական բնույթի հայհոյանքներ և ձեռնաշղթաներ հագցնելով` տարել են պահակակետ, որից հետո եկել են ոստիկանության աշխատակիցները և իրեն բերման են ենթարկել ոստիկանության Կենտրոնական բաժին։ Միջադեպի նախաձեռնողը ինքը չի եղել, իր ընկերուհուն չի հրել և չի հարվածել։ Առաջինը ԱԱԾ աշխատակիցներն են հարվածել և հայհոյել իրեն և հնարավոր է, որ պաշտպանվելու նպատակով ինքն էլ հարվածած լինի։ Ինքն հարբած չի եղել, քանի որ մինչ այդ ընդամենը մեկ շիշ գարեջուր է խմել։
/դատական նիստի արձանագրություն, գ.թ. 55-56, 77-78/։
Վերաքննիչ դատարանը բողոքներում առաջադրված հարցադրումներին անդրադառնալուց առաջ հարկ է համարում արձանագրել հետևյալը.
ՀՀ քրեական օրենսգքրի 258-րդ հոդվածի համաձայն`
1. Խուլիգանությունը՝ դիտավորությամբ հասարակական կարգը կոպիտ կերպով խախտելը, որն արտահայտվել է հասարակության նկատմամբ բացահայտ անհարգալից վերաբերմունքով՝(…):
2. Նույն արարքը, որը զուգորդվել է անձի նկատմամբ բռնություն գործադրելով կամ դա գործադրելու սպառնալիքով, ինչպես նաև ուրիշի գույքը ոչնչացնելով կամ վնասելով (…):
3. Սույն հոդվածի երկրորդ մասով նախատեսված արարքը, որը՝
1) կատարվել է մի խումբ անձանց կամ կազմակերպված խմբի կողմից,
2) զուգորդվել է իշխանության ներկայացուցչին կամ հասարակական կարգի պահպանության պարտականություն իրականացնող կամ հասարակական կարգի խախտումը խափանող անձին դիմադրություն ցույց տալով,
3) կատարվել է նախկինում խուլիգանություն կատարած անձի կողմից,
4) զուգորդվել է անձի առողջությանը միջին ծանրության վնաս պատճառելով,
5) զուգորդվել է բացառիկ ցինիզմով՝
(…):
Արման Խաչատրյանի վերաբերյալ թիվ ՎԲ 223/06 24.10.2006թ. գործով որոշման մեջ Վճռաբեկ դատարանն իրավական դիրքորոշում է հայտնել այն մասին, որ «Խուլիգանությունը կարող է կատարվել միայն ուղղակի դիտավորությամբ։ Դա նշանակում է, որ մեղավոր անձը ոչ միայն գիտակցում է, որ իր գործողություններով խախտում է հասարակական կարգն ու բացահայտ անհարգալից վերաբերմունք դրսևորում հանրության հանդեպ, այլև ցանկանում է կատարել այդ գործողությունները։ Խուլիգանական արարքը կարող է կատարվել միայն խուլիգանական մղումներից ելնելով։ Իսկ արարքը համարվում է խուլիգանական մղումներով կատարված, եթե այն կատարվում է հասարակության և բարոյականության նորմերի նկատմամբ անթաքույց արհամարհանքի հողի վրա, երբ մեղավոր անձի վարքը հանդիսանում է բացահայտ մարտահրավեր` ուղղված հասարակական կարգի դեմ և թելադրված է լինում շրջապատին հակադրվելու, վերջինիս հանդեպ արհամարհական վերաբերմունք ցուցաբերելու ցանկությամբ։
Վերոշարադրյալ վերլուծությունից բխում է, որ խուլիգանության, ինչպես հասարակ, այնպես էլ որակյալ հանցակազմերի սուբյեկտիվ կողմի պարտադիր հատկանիշ է արարքում խուլիգանական մղումների առկայությունը, այսինքն` ՀՀ քրեական օրենսգքրի 258-րդ հոդվածի 3-րդ մասի 2-րդ մասի նախատեսված արարքը, այն է` խուլիգանությունը, որը զուգորդվել է անձի նկատմամբ բռնություն գործադրելով կամ դա գործադրելու սպառնալիքով:
Գործով ձեռք բերված ապացույցներից երևում է, որ ամբաստանյալ Բարիս Արթուրի Թովմասյանը 2011թ. ապրիլի 30-ին` ժամը 20:30-ի սահմաններում, իր ընկերուհու` Էլեոնորա Գևորգի Հարությունյանի հետ, գնացել են Երևան քաղաքի Կողբացու փողոցում գտնվող <Այրիշ փաբ>: Որոշակի ժամանակ այնտեղ անցկացնելուց հետո կենցաղային հարցի շուրջ վիճաբանել են միմյանց հետ, և Է.Հարությունյանը ցանկություն է հայտնել տուն գնալու, իսկ Բ.Թովմասյանը պատրաստակամություն` նրան տուն ճանապարհելու: Միասին նստել են տաքսի ավտոմեքենա և ուղևորվել դեպի Գր.Լուսավորիչ փողոց: Գր.Լուսավորչի և Իտալական փողոցների խաչմերուկի մոտ իջել են տաքսի մեքենայից և որոշել քայլել ու զրուցել և անցնելով փողոցը` քայլել են դեպի ՀՀ-ում Իտալիայի Հանրապետության դեսպանատան ուղղությամբ:
Այդ ընթացքում Բ.Թովմասյանը կոպիտ կերպով խախտելով հասարակական կարգը` վիճաբանել է իր ընկերուհու` Էլեոնորա Հարությունյանի հետ, որի ընթացքում հրել է վերջինիս, գցել գետնին ու փորձել հարվածել: Վերջինիս գործողությունները նկատվել են ՀՀ ԱԱԾ ԴՆՊՎ 1-ին բաժնի 2-րդ բաժանմունիք աշխատակիցներ Վահե Վարդանյանի, Արթուր Մանուկյանի և Անուշավան Թումանյանի կողմից, որոնք մոտեցել ու դիտողություն են արել Բ.Թովմասյանին, պահանջել դադարեցնել խուլիգնությունը, սակայն վերջինս, արհամարհելով նրանց, իր խուլիգանական գործողությունները զուգորդել է իշխանության ներկայացուցիչ հանդիսացող, տվյալ տարածքում հասարակական կարգի պահպանություն իրականացնող և խուլիգանությունը խափանող վերոհիշյալ ԱԱԾ աշխատակիցներին դիմադրություն ցույց տալով, այն է` հարվածներ է հասցրել վերջիններիս ու տվել սեռական բնույթի հայհոյանքներ:
Վերաքննիչ դատարանը, ներկայացված բողոքի հիմքերի և հիմնավորումների սահմաններում ստուգման ենթարկելով քրեական գործի փաստական հանգամանքների բացահայտման և քրեական օրենքի ճշտությունը, ինչպես նաև գործը քննելիս և լուծելիս քրեադատավարական օրենքի պահանջների պահպանումը, ուսումնասիրության և գնահատման ենթարկելով քրեական գործում առկա նյութերը, հանգում է այն հետևության, որ ընդհանուր իրավասության դատարանը, պատշաճ իրավական ընթացակարգի շրջանակներում ստուգման ենթարկելով քրեական գործի հիմքում դրված ապացույցների ձեռքբերման աղբյուրները, յուրաքանչյուր ապացույց գնահատելով թույլատրելիության, վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, ամբաստանյալ Բարիս Թովմասյանի` 258-րդ հոդվածի 3-րդ մասի 2-րդ կետով, հանգել է ճիշտ հետևության, նրան մեղսագրված արարքի քրեաիրավական գնահատականը ճիշտ է տրվել, ուստի դատավճիռը բեկանելու հիմքեր չկան, իսկ դատավճիռն այդ մասով օրինական և հիմնավորված է:
Ինչ վերաբերում է պաշտպանի բողոքի հիմնավորումներին այն մասին, որ ԱԱԾ աշխատակիցների ոչ օրինաչափ գործողություններին վարույթն իրականացնող մարմնի կողմից տրվել է ոչ ճիշտ և գործի նյութերից չբխող իրավական գնահատական, ապա Վերաքննիչ դատարանն արձանագրում է, որ նախաքննության ընթացքում պաշտպանական կողմի այդ պատճառաբանությունների շուրջ քննություն է կատարվել, և դեռևս 2010թ. հունիսի 09-ին քննիչի կողմից <Քրեական հետապնդում չիրականացնելու մասին> որոշում է կայացվել, որով ՀՀ քրեական օրենսգրքի 43-րդ հոդվածի և ՀՀ քրեական դատավարության օրենսգրքի 35-րդ հոդվածի 1-ին մասի 2-րդ կետի հիմքով Վահե Վարդանյանի, Արթուր Մանուկյանի և Անուշավան Թովմասյանի նկատմամբ ամբաստանյալ Բարիս Թովմասյանին առողությանը թեթև վնասի հատկանիշներ չպարունակող մարմնական վնասվածքներ պատճառելու դեպքի առթիվ քրեական հետապնդում չի իրականացվել` նրանց արարքներում հանցակազմի բացակայության պատճառաբանությամբ:
/տես` գ/թ. 102-103/
Իսկ 2010թ. հունիսի 10-ին Բարիս Թովմասյանը ծանոթացել է գործի նյութերին /գ/թ. 105/, սակայն այդ որոշումը նրա կողմից չի բողոքարկվել:
Այսպիսով, Վերաքննիչ դատարանը, ներկայացված բողոքի հիմքերի և հիմնավորումների սահմաններում ստուգման ենթարկելով քրեական գործի փաստական հանգամանքների բացահայտման և քրեական օրենքի ճշտությունը, ինչպես նաև գործը քննելիս և լուծելիս քրեադատավարական օրենքի պահանջների պահպանումը, ուսումնասիրության և գնահատման ենթարկելով քրեական գործում առկա նյութերը, հանգում է այն հետևության, որ ընդհանուր իրավասության դատարանը, պատշաճ իրավական ընթացակարգի շրջանակներում ստուգման ենթարկելով քրեական գործի հիմքում դրված ապացույցների ձեռքբերման աղբյուրները, յուրաքանչյուր ապացույց գնահատելով թույլատրելիության, վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, ամբաստանյալ Բարիս Արթուրի Թովմասյանի` ՀՀ քրեական օրենսգրքի 258-րդ հոդվածի 3-րդ մասի 2-րդ կետով, մեղավորության վերաբերյալ հանգել է ճիշտ հետևության, նրան մեղսագրված արարքի քրեաիրավական գնահատականը ճիշտ է տրվել, ուստի դատավճիռը բեկանելու հիմքեր չկան, իսկ դատավճիռն այդ մասով օրինական և հիմնավորված է:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 393-395-րդ, 399-րդ, 402-րդ, 412-րդ, 418-րդ հոդվածներով` Վերաքննիչ դատարանը

Ո Ր Ո Շ Ե Ց


Ամբաստանյալ Բարիս Թովմասյանի շահերի պաշտպան Արշակ Թովմասյանի վերաքննիչ բողոքը և Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 2011թ. հունիսի 30-ի դատավճիռն ըստ մեղադրանքի ԲԱՐԻՍ ԱՐԹՈՒՐԻ ԹՈՎՄԱՍՅԱՆԻ` ՀՀ քրեական օրենսգրքի 258-րդ հոդվածի 3-րդ մասի 2-րդ կետով, թողնել օրինական ուժի մեջ:



ՆԱԽԱԳԱՀՈՂ ԴԱՏԱՎՈՐ` Ե.ԴԱՐԲԻՆՅԱՆ

ԴԱՏԱՎՈՐՆԵՐ ` Ա.ՀՈՎՀԱՆՆԻՍՅԱՆ

Մ.ՊԵՏՐՈՍՅԱՆ