գործ` ԵԿԴ/0112/01/11
Ո Ր Ո Շ Ո ՒՄ

/<<Համաներում հայտարարելու մասին>> որոշումը կիրառելու, քրեական
գործի վարույթը կարճելու և քրեական հետապնդումը դադարեցնելու մասին/

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության դատարանը

Նախագահությամբ դատավոր` Ա.Բեկթաշյանի
քարտուղարությամբ` Լ.Ղամբարյանի
մասնակցությամբ` մեղադրող` Ա.Գալստյանի
պաշտպան` Ս.Ասլանյանի

2011 թվականի օգոստոսի 06-ին, դռնբաց դատական նիստում քննության առնելով քրեական գործն ըստ մեղադրանքի Աղասի Ալբերտի Հովսեփյանի` ծնված 31.05.1969 թվականին Երևան քաղաքում, ազգությամբ հայ, ՀՀ քաղաքացի, միջնակարգ-մասնագիտական կրթությամբ, ամուսնացած, խնամքին 2 անձ, նախկինում դատված, դատվածությունը մարված, չի աշխատել, բնակվել է Երևան քաղաքի Օգանովի փողոցի 15 շենքի թիվ 2 բնակարանում, մեղադրվում է ՀՀ քրեական օրենսգրքի 325 հոդվածի 1-ին մասով, ամբաստանյալ Աղասի Ալբերտի Հովսեփյանի պաշտպան Սարգիս Ասլանյանի դիմումը` ՀՀ ազգային ժողովի կողմից 19.06.2009 թվականին ընդունված <<Համաներում հայտարարելու մասին>> որոշման կիրառմամբ Աղասի Ալբերտի Հովսեփյանի վերաբերյալ քրեական գործի վարույթը կարճելու և քրեական հետապնդումը դադարեցնելու մասին,

Պ Ա Ր Զ Ե Ց`

Անհայտ անձի կողմից իրավունք վերապահող փաստաթուղթ կեղծելու և օգտագործելու դեպքի առթիվ 2010 թվականի օգոստոսի 26-ին ՀՀ ոստիկանության Կենտրոնականի քննչական բաժնում ՀՀ քրեական օրենսգրքի 325 հոդվածի 1-ին մասի հատկանիշներով հարուցվել է թիվ 13143010 քրեական գործը:
2011 թվականի մայիսի 26-ին Աղասի Ալբերտի Հովսեփյանը ՀՀ քրեական օրենսգրքի 325 հոդվածի 1-ին մասով թիվ 13143010 քրեական գործով ներգրավվել է որպես մեղադրյալ:
Աղասի Ալբերտի Հովսեփյանին ՀՀ քրեական օրենսգրքի 325 հոդվածի 1-ին մասով մեղադրանք է առաջադրվել այն բանի համար, որ նա պատրաստել և օգտագործել է իրավունք վերապահող ակնհայտ կեղծ փաստաթուղթ.
Ամբաստանյալ Աղասի Ալբերտի Հովսեփյանը 2007 թվականի ապրիլ ամսին Ռազմիկ Վլադիմիրի Եղիազարյանի կորցրած` AC0494687 համարի անձնագիրը գտնելով, վերջինիս լուսանկարի փոխարեն փակցրել է իր ծանոթ` Նվեր Սամվելի Բեջանյանի լուսանկարը և այդ կերպ պատրաստել ակնհայտ կեղծ փաստաթուղթ հանդիսացող` վերջինիս լուսանկարով և Ռ.Եղիազարյանի տվյալներով անձնագիր: Դրանից հետո Ա.Հովսեփյանն իր կողմից պատրաստված ակնհայտ կեղծ փաստաթղթի մասին առանց տեղյակ պահելու, հիշյալ փաստաթուղթն օգտագործելու նպատակով Ն.Բեջանյանի հետ 2007 թվականի մայիսի 15-ին գնացել է Երևան քաղաքի Վ.Սարգսյան փողոցի թիվ 6 հասցեում գործող <<Արմենտել>> ՓԲ ընկերության բաժանորդների սպասարկման կետ, որտեղ կեղծ փաստաթուղթն օգտագործելով, այն ներկայացրել է սպասարկման կետի աշխատակցին, որը կազմել է հեռախոսակապի ծառայության մատուցման պայմանագրի նախագիծ և պատճենահանել է ներկայացված անձնագիրը: Դրանից հետո Ա.Հովսեփյանը պայմանագրի նախագիծը ստորագրման համար ներկայացրել է Ն.Բեջանյանին, որը տեղում անձնագիրը զննելով գիտակցել է դրա կեղծված լինելու հանգամնքը և ստորագրել է այն, որի հիման վրա էլ Ա.Հովսեփյանը ձեռք է բերել և շահագործել է <<Արմենտել>> ՓԲ ընկերության 091-23-57-20 համարի բաժանորդային հեռախոսաքարտը, սակայն վճարում չի կատարել, որի պատճառով <<Արմենտել>> ՓԲ ընկերությանը պատճառել է 252.000 ՀՀ դրամի վնաս:
2011 թվականի մայիսի 25-ի որոշմամբ թիվ 13143010 քրեական գործով Նվեր Սամվելի Բեջանյանի նկատմամբ քրեական հետապնդումը դադարեցվել է` վաղեմության ժամկետն անցնելու հիմքով:
Նախաքննության ընթացքում պարզվել է նաև, որ Աղասի Ալբերտի Հովսեփյանը զբաղվելով կեղծ ձեռնարկատիրությամբ, առանց ձեռնարկատիրական գործունեություն իրականացնելու մտադրության, իր ծանոթների և հարազատների անվամբ 2008-2010 թվականների ընթացքում ստեղծել է թվով 12 կազմակերպություններ, որի նպատակը եղել է հարկերից խուսափելը և նյութական այլ օգուտներ քաղելը, ինչպես նաև առանց ապրանքների մատակարարման կամ առանց ծառայությունների մատուցման կեղծ փաստաթղթեր տրամադրելը, որի հետևանքով պետությանը պատճառվել է առանձնապես խոշոր չափերի` 459.160.163 ՀՀ դրամի վնաս, որից 28.146.885 ՀՀ դրամ գումարը նախաքննության ընթացքում վերականգնվել է: Նշված արարքների համար Աղասի Ալբերտի Հովսեփյանին մեղադրանք է առաջադրվել ՀՀ քրեական օրենսգրքի 189 հոդվածի 3-րդ մասով, ՀՀ քրեական օրենսգրքի 325 հոդվածի 1-ին մասով և ՀՀ քրեական օրենսգրքի 215 հոդվածի 1-ին մասով, 28.02.2011 թվականին քրեական գործն ուղարկվել է Արագածոտնի մարզի ընդհանուր իրավասության դատարան:
2011 թվականի մայիսի 31-ին թիվ 13143010 քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան:
Դատաքննության ընթացքում ամբաստանյալ Աղասի Ալբերտի Հովսեփյանի հարազատների կողմից <<Արմենտել>> ՓԲ ընկերությանը պատճառված 252.000 ՀՀ դրամ վնասն ամբողջությամբ վերկանգնվել է:
2011 թվականի օգոստոսի 05-ին ամբաստանյալ Աղասի Ալբերտի Հովսեփյանի պաշտպան Ս.Ասլանյանի կողմից միջնորդություն է ներկայացվել դատարան` իր պաշտպանյալ Աղասի Ալբերտի Հովսեփյանի նկատմամբ ՀՀ ԱԺ կողմից 19.06.2009 թվականին ընդունված <<Համաներում հայտարարելու մասին>> որոշումը կիրառելու և թիվ ԵԿԴ/0112/01/11 քրեական գործը կարճելու վերաբերյալ:
ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի համաձայն` «քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ընդունվել է համաներման ակտ», իսկ նույն հոդվածի 5-րդ մասը սահմանում է, որ «դատարանը, հայտնաբերելով քրեական հետապնդումը բացառող հանգամանքներ, լուծում է ամբաստանյալի նկատմամբ քրեական հետապնդումը դադարեցնելու հարցը»:
«Համաներում հայտարարելու մասին» ՀՀ Ազգային ժողովի 2009 թվականի հունիսի 19-ի թիվ Ն-152-4 որոշման (այսուհետ նաև` Համաներման որոշում) 5-րդ կետի 1-ին ենթակետի համաձայն` «Նյութերով քրեական հետապնդում չհարուցել և քրեական հետապնդում չիրականացնել, ինչպես նաև կարճել այն անձանց կատարած հանցագործությունների վերաբերյալ հետաքննության մարմինների, նախաքննության մարմինների կամ դատարանի վարույթում գտնվող` մինչև 2009 թվականի հունիսի 1-ը կատարած հանցագործություններով քրեական գործերը, որոնցով` անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան երեք տարի ժամկետով ազատազրկում»:
ՀՀ քրեական օրենսգրքի 325-րդ հոդվածի 1-ին մասի սանկցիան որպես պատիժ նախատեսում է տուգանք՝ նվազագույն աշխատավարձի երկուհարյուրապատիկից չորսհարյուրապատիկի չափով, կամ ազատազրկում՝ առավելագույնը երկու տարի ժամկետով:
Համաներման որոշման 8-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` Համաներման որոշման 8-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ: Սակայն հարկ է նկատել, որ թվարկված հոդվածների և հոդվածների մասերի շարքից բացակայում է ՀՀ քրեական օրենսգրքի 325-րդ հոդվածի 1-ին մասը, այսինքն` ՀՀ քրեական օրենսգրքի 325-րդ հոդվածի 1-ին մասով նախատեսված արարքներ կատարած անձանց նկատմամբ համաներման կիրառումը սահմանափակված չէ:
Սույն քրեական գործի նյութերում բացակայում է նաև Համաներման որոշման 8-րդ կետի մյուս ենթակետերում նշված այն սահմանափակումները, որոնք կարող են արգելք հանդիսանալ Համաներման որոշման կիրառման համար:
Դատարանը, հիմք ընդունելով վերը նշվածը և նկատի ունենալով, որ Աղասի Ալբերտի Հովսեփյանը հանցանքը կատարել է մինչև 01.06.2009 թվականը և այն, որ Աղասի Ալբերտի Հովսեփյանը ու նրա պաշտպանը խնդրել են Ա.Հովսեփյանի նկատմամբ կիրառել համաներման որոշումը, գտնում է, որ համաներման որոշման կիրառմամբ սույն քրեական գործի վարույթը պետք է կարճել և Աղասի Ալբերտի Հովսեփյանի նկատմամբ քրեական հետապնդումը պետք է դադարեցնել:
Դատարանը գտնում է, որ քրեական գործով ապացույց ճանաչված այլ փաստաթուղթ հանդիսացող` 093-05-97-22 և 091-23-57-20 հեռախոսահամարներից կատարված հեռախոսազանգերի վերծանումները և 15.05.2007 թվականին կնքված հեռախոսաքարտ ձեռք բերելու պայմանագիրը պետք է թողնել քրեական գործին կցված:
Ելնելով վերոգրյալից, ղեկավարվելով ՀՀ քրեական դատավարության օրենսգրքի 35 հոդվածի 1-ին մասի 13-րդ կետով, 41-րդ, 151-րդ, 313-րդ հոդվածներով և հիմք ընդունելով «Համաներում հայտարարելու մասին» ՀՀ Ազգային ժողովի 2009 թվականի հունիսի 19-ի թիվ Ն-152-4 որոշումը, դատարանը

Ո Ր Ո Շ Ե Ց

Աղասի Ալբերտի Հովսեփյանի վերաբերյալ` ՀՀ քրեական օրենսգրքի 325 հոդվածի 1-ին մասով քրեական գործի վարույթը կարճել և քրեական հետապնդումը դադարեցնել` նրա նկատմամբ կիրառելով ՀՀ Ազգային Ժողովի կողմից 19.06.2009 թվականին ընդունված <<Համաներում հայտարարելու մասին>> որոշման 5-րդ կետի 1-ին ենթակետը:
Քրեական գործով ապացույց ճանաչված այլ փաստաթուղթ հանդիսացող` 093-05-97-22 և 091-23-57-20 հեռախոսահամարներից կատարված հեռախոսազանգերի վերծանումները և 15.05.2007 թվականին կնքված հեռախոսաքարտ ձեռք բերելու պայմանագիրը` թողնել քրեական գործին կցված:
Որոշումը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում:


ԴԱՏԱՎՈՐ` Ա.ԲԵԿԹԱՇՅԱՆ