գործ` ԵԿԴ/0110/01/11

Ո Ր Ո Շ Ո ՒՄ
/<<Համաներում հայտարարելու մասին>> որոշումը կիրառելու, քրեական
գործի վարույթը կարճելու և քրեական հետապնդումը դադարեցնելու մասին/

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության դատարանը
Նախագահությամբ դատավոր` Արմեն Բեկթաշյանի
քարտուղարությամբ` Կիմա Մելքոնյանի
մասնակցությամբ` մեղադրող` Վիգեն Միլիտոնյանի

2011 թվականի հունիսի 01-ին, դռնբաց դատական նիստում քննության առնելով քրեական գործն ըստ մեղադրանքի Գևորգ Ալբերտի Մելիքյանի` ծնված 06.07.1970 թվականին Աշտարակ քաղաքում, ազգությամբ հայ, ՀՀ քաղաքացի, ութամյա կրթությամբ, ամուսնացած, խնամքին երկու անձ, նախկինում դատված, դատվածությունը չմարված, չի աշխատում, երկրորդ խմբի հաշմանդամ, բնակվել է Արագածոտնի մարզի Օշական գյուղի 13 փակուղու 6 տանը, կալանքի տակ է 12.04.2011 թվականից, մեղադրվում է ՀՀ քրեական օրենսգրքի 268 հոդվածի 2-րդ մասի 1-ին և 2-րդ կետերով, ամբաստանյալ Գևորգ Ալբերտի Մելիքյանի միջնորդությունը` 26.05.2011 թվականին ընդունված <<Համաներում հայտարարելու մասին>> որոշման կիրառմամբ իր վերաբերյալ քրեական գործի վարույթը կարճելու և քրեական հետապնդումը դադարեցնելու մասին,

Պ Ա Ր Զ Ե Ց Ի`

2011 թվականի ապրիլի 12-ին ՀՀ ոստիկանության քննչական գլխավոր վարչության քննության վարչությունում ՀՀ քրեական օրենսգրքի 268 հոդվածի 2-րդ մասի 1-ին և 2-րդ կետերով հատկանիշներով հարուցվել է թիվ 69101911 քրեական գործը:
2011 թվականի ապրիլի 13-ին Գևորգ Ալբերտի Մելիքյանին ՀՀ քրեական օրենսգրքի 268 հոդվածի 2-րդ մասի 1-ին և 2-րդ կետերով մեղադրանք է առաջադրվել այն բանի համար, որ նա առանց իրացնելու նպատակի թմրամիջոց ապօրինի ձեռք բերելու և պահելու համար լինելով դատապարտված, դատվածությունը չմարված, կրկին անգամ, քննությամբ չպարզված օրը և հանգամանքներում առանց իրացնելու նպատակի ապօրինի ձեռք է բերել խոշոր չափերի` 1,35 գրամ <<ափիոն>> տեսակի թմրամիջոց և այն պահել է բաճկոնի աջ գրպանում, որն էլ նույն օրը հայտնաբերվել է ՀՀ ոստիկանության ԿՀԴՊ գլխավոր վարչության աշխատակիցների կողմից` նրա անձնական խուզարկությամբ:
Գ.Մելիքյանին խոշոր չափերի <<ափիոն>> տեսակի թմրամիջոց ապօրինի իրացնող անձի ինքնությունը պարզված չլինելու պատճառով 2011 թվականի մայիսի 19-ի ՀՀ ոստիկանության ՔԳՎ ՀԿԳ քննության վարչության ՀԿԳ ավագ քննիչ Ա.Հովհաննիսյանի կողմից կայացված որոշմամբ` թիվ 69101911 քրեական գործից մեղադրյալ Գևորգ Ալբերտի Մելիքյանի վերաբերյալ մասն առանձնացվել է առանձին վարույթ և տրվել է 69101911/1 համարը:
2011 թվականի մայիսի 25-ին թիվ 69101911/1 քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան:
01.06.2011 թվականին նշանակված դատական նիստի ընթացքում մեղադրող Վ.Միլիտոնյանը միջնորդեց` քրեական գործի մինչդատական վարույթի ընթացքում Գևորգ Ալբերտի Մելիքյանին` օրենսգրքի 268 հոդվածի 2-րդ մասի 1-ին և 2-րդ կետերով առաջադրված մեղադրանքը փոփոխել և նրան նոր մեղադրանք առաջադրել` ՀՀ քրեական օրենսգրքի 268 հոդվածի 2-րդ մասի 2-րդ կետով, պատճառաբանելով, որ <<ՀՀ քրեական օրենսգրքում փոփոխություններ և լրացումներ կատարելու մասին>> 23.05.2011 թվականին ընդունված ՀՀ օրենքի 26-րդ հոդվածի համաձայն նույն օրենսգրքի 268 հոդվածի 2-րդ մասի 1-ին կետը ճանաչվել է ուժը կորցրաց, իսկ համաձայն ՀՀ քրեական օրենսգրքի 13 հոդվածի 1-ին մասի` արարքի հանցավորությունը վերացնող, պատիժը մեղմացնող կամ հանցանք կատարած անձի վիճակն այլ կերպ բարելավող օրենքը հետադարձ ուժ ունի, այսինքն` տարածվում է մինչև այդ օրենքն ուժի մեջ մտնելը համապատասխան արարք կատարած անձանց, այդ թվում այն անձանց վրա, ովքեր կրում են պատիժը կամ կրել են դա, սակայն ունեն դատվածություն:
Ամբաստանյալ Գևորգ Ալբերտի Մելիքյանը ՀՀ քրեական օրենսգրքի 268 հոդվածի 2-րդ մասի 2-րդ կետով առաջադրված մեղադրանքում իրեն մեղավոր ճանաչեց և դատարանին միջնորդեց` 26.05.2011 թվականին ընդունված <<Համաներում հայտարարելու մասին>> որոշման կիրառմամբ իր վերաբերյալ քրեական գործի վարույթը կարճելու և քրեական հետապնդումը դադարեցնելու մասին:
ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի համաձայն` «քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ընդունվել է համաներման ակտ», իսկ նույն հոդվածի 5-րդ մասը սահմանում է, որ «դատարանը, հայտնաբերելով քրեական հետապնդումը բացառող հանգամանքներ, լուծում է ամբաստանյալի նկատմամբ քրեական հետապնդումը դադարեցնելու հարցը»:
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման (այսուհետ նաև` Համաներման որոշում) 6-րդ կետի 2-րդ ենթակետի համաձայն` «քրեական հետապնդում պետք է չհարուցել և քրեական հետապնդում չիրականացնել, ինչպես նաև կարճել մինչև 2011 թվականի մայիսի 1-ը կատարած հանցագործությունների վերաբերյալ հետաքննության մարմինների, նախաքննության մարմինների կամ դատարանի վարույթում գտնվող քրեական գործերը, բացառությամբ սույն որոշման 8-րդ կետի 4-րդ և 5-րդ ենթակետերով նախատեսված դեպքերի, որոնցով անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան երեք տարի ժամկետով ազատազրկում»:
ՀՀ քրեական օրենսգրքի 268 հոդվածի 2-րդ մասի 2-րդ կետի սանկցիան որպես պատիժ նախատեսում է ազատազրկում՝ առավելագույնը երեք տարի ժամկետով:
Համաներման որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` համաներման որոշման 9-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ: Սակայն հարկ է նկատել, որ թվարկված հոդվածների և հոդվածների մասերի շարքից բացակայում են ՀՀ քրեական օրենսգրքի 268 հոդվածի 2-րդ մասի 2-րդ կետը, այսինքն` ՀՀ քրեական օրենսգրքի 268 հոդվածի 2-րդ մասի 2-րդ կետով նախատեսված արարքներ կատարած անձանց նկատմամբ համաներման կիրառումը սահմանափակված չէ:
Սույն քրեական գործի նյութերում բացակայում է նաև համաներման որոշման 9-րդ կետի մյուս ենթակետերում նշված այն սահմանափակումները, որոնք կարող են արգելք հանդիսանալ համաներման որոշման կիրառման համար:

Դատարանը, հիմք ընդունելով վերը նշվածը և նկատի ունենալով, որ Գևորգ Ալբերտի Մելիքյանը խնդրել է իր նկատմամբ կիրառել համաներման որոշումը, գտնում է, որ համաներման որոշման կիրառմամբ սույն քրեական գործի վարույթը պետք է կարճել և Գևորգ Ալբերտի Մելիքյանի նկատմամբ քրեական հետապնդումը դադարեցնել:
Դատարանը, նկատի ունենալով, որ վերը նշված հիմնավորմամբ սույն քրեական գործի վարույթը պետք է կարճել և Գևորգ Ալբերտի Մելիքյանի նկատմամբ քրեական հետապնդումը դադարեցնել, գտնում է, որ նրա նկատմամբ խափանման միջոց կիրառելու անհրաժեշտությունը վերացել է, ուստի Գևորգ Ալբերտի Մելիքյանի նկատմամբ ընտրված խափանման միջոցը` կալանավորումը, պետք է վերացնել և նրան պետք է անհապաղ ազատ արձակել, իսկ քրեական գործով ապացույց ճանաչված այլ փաստաթուղթ հանդիսացող` 12.04.2011 թվականին Գևորգ Ալբերտի Մելիքյանին բերման ենթարկելու, նրան անձնական խուզարկության ենթարկելու մասին արձանագրություններն ու Գարիկ Հակոբի Կիրակոսյանի և Մարկ Վանիկի Հովհաննիսյանի 12.04.2011 թվականի բացատրությունները պետք է թողնել քրեական գործին կցված, քրեական գործով իրեղեն ապացույց ճանաչված Գևորգ Մելիքյանի անձնական խուզարկությամբ հայտնաբերված 1,30 գրամ քաշով ափիոն տեսակի թմրամիջոցը /հետազոտությամբ ծախսվել է 0,05 գրամ հաստատուն քածով <<ափիոնից>>/ պետք է ոչնչացնել:
Ելնելով վերոգրյալից, ղեկավարվելով ՀՀ քրեական դատավարության օրենսգրքի 35 հոդվածի 1-ին մասի 13-րդ կետով, 41-րդ, 151-րդ, 313-րդ հոդվածներով և հիմք ընդունելով «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշումը, դատարանը

Ո Ր Ո Շ Ե Ց

Գևորգ Ալբերտի Մելիքյանի վերաբերյալ` ՀՀ քրեական օրենսգրքի 268 հոդվածի 2-րդ մասի 2-րդ կետով քրեական գործի վարույթը կարճել և քրեական հետապնդումը դադարեցնել` նրա նկատմամբ կիրառելով ՀՀ Ազգային Ժողովի կողմից 26.05.2011 թվականին ընդունված <<Համաներում հայտարարելու մասին>> որոշման 6-րդ կետի 2-րդ ենթակետը:
Գևորգ Ալբերտի Մելիքյանի նկատմամբ ընտրված խափանման միջոցը` կալանավորումը, վերացնել և նրան անհապաղ ազատ արձակել:
Քրեական գործով ապացույց ճանաչված այլ փաստաթուղթ հանդիսացող` 12.04.2011 թվականին Գևորգ Ալբերտի Մելիքյանին բերման ենթարկելու, նրան անձնական խուզարկության ենթարկելու մասին արձանագրություններն ու Գարիկ Հակոբի Կիրակոսյանի և Մարկ Վանիկի Հովհաննիսյանի 12.04.2011 թվականի բացատրությունները թողնել քրեական գործին կցված:
Քրեական գործով իրեղեն ապացույց ճանաչված Գևորգ Մելիքյանի անձնական խուզարկությամբ հայտնաբերված 1,30 գրամ քաշով ափիոն տեսակի թմրամիջոցը ոչնչացնել:
Որոշումը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում:


ԴԱՏԱՎՈՐ` Ա.ԲԵԿԹԱՇՅԱՆ