գործ` ԵԿԴ/0108/01/11
Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության դատարանը


Նախագահությամբ դատավոր` Արմեն Բեկթաշյանի
քարտուղարությամբ` Լուսինե Ղամբարյանի
մեղադրող` Լևոն Չարխիֆալակյանի
պաշտպան` Արթուր Աթարբեկյանի


2011 թվականի հոկտեմբերի 13-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի`


Աշոտ Գուրգենի Սահակյանի` ծնված 22.09.1964 թվականին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, նախկինում չդատված, չի աշխատել, բնակվել է Երևան քաղաքի Բագրատունյաց փողոցի, 51 շենքի 53 բնակարանում, կալանքի տակ է 17.02.2011 թվականից:

Աշոտ Գուրգենի Սահակյանը մեղադրվում է ՀՀ քրեական օրենսգրքի 266 հոդվածի 1-ին մասով:
18.02.2011 թվականի որոշմամբ Աշոտ Գուրգենի Սահակյանի նկատմամբ որպես խափանման միջոց է ընտրվել կալանավորումը:

Գործի դատավարական նախապատմությունը.

2011 թվականի փետրվարի 16-ին, ժամը 2100-ի սահմաններում ՀՀ ոստիկանության Կենտրոնական բաժնի աշխատակիցների կողմից թմրանյութ պահելու, օգտագործելու և իրացնելու կասկածանքով ՀՀ ոստիկանության Կենտրոնական բաժին բերման են ենթարկել Երևան քաղաքի նիզամի փողոցի 52 տան բնակիչ, 08.02.1956 թվականին ծնված Պապիկ Վլադիմիրի Սաքոյանը, որի մոտից հայտնաբերվել է 0,2 գրամ քաշով սպիտակ գույնի կես դեղահաբ: Ոստիկանության բաժնում ընթերակաների ներկայությամբ, վերջինս հայտարարել է, որ իր մոտից հայտնաբերված սպիտակ, օվալաձև դեղահաբի կես կտորը հանդիսանում է ՙՍուբուտեքս՚ տեսակի դեղահաբ:
16.02. 2011 թվականին Պապիկ Սաքոյանը բացատրություն է տվել այն մասին, որ շուրջ 5 տարի է օգտագործում է թմրանյութ, որը վերջին շրջանում ձեռք է բերում Աշոտ Սահակյանից:
2011 թվականի փետրվարի 17-ին, ժամը 0930-ին թմրանյութ պահելու, օգտագործելու և իրացնելու կասկածանքով Երևան քաղաքի Բագրատունյաց 51 շենքի 53 բնակարանից ՀՀ ոստիկանության Մարաշի բաժանմունք բերման է ենթարկվել 22.09.1964 թվականին ծնված Աշոտ Գուրգենի Սահակյանը:
2011 թվականի փետրվարի 17-ին ՀՀ ոստիկանության Կենտրոնականի քննչական բաժնում ՀՀ քրեական օրենսգրքի 266 հոդվածի 1-ին մասի և ՀՀ քրեական օրենսգրքի 268 հոդվածի 2-րդ մասի 1-ին կետի հատկանիշներով հարուցվել է թիվ 13109711 քրեական գործը:
2011 թվականի փետրվարի 18-ի որոշմամբ Պապիկ Վլադիմիրի Սաքոյանը ՀՀ քրեական օրենսգրքի 268 հոդվածի 2-րդ մասի 1-ին կետով ներգրավվել է որպես մեղադրյալ և նույն օրը նրա նկատմամբ որպես խափանման միջոց է ընտրվել կալանավորումը:
2011 թվականի փետրվարի 18-ի որոշմամբ Աշոտ Գուրգենի Սահակյանը ՀՀ քրեական օրենսգրքի 266 հոդվածի 2-րդ մասի 2.1 կետով ներգրավվել է որպես մեղադրյալ և նույն օրը նրա նկատմամբ որպես խափանման միջոց է ընտրվել կալանավորումը:
2011 թվականի մայիսի 13-ի որոշմամբ` Աշոտ Գուրգենի Սահակյանի անվամբ սեփականության իրրավունքով գրանցված անշարժ և շարժական գուկքի վրա կալանք է դրվել:
2011 թվականի մայիսի 26-ին թիվ 13109711 քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան:
2011 թվականի հունիսի 01-ի որոշմամբ` Պապիկ Վլադիմիրի Սաքոյանի վերաբերյալ` ՀՀ քրեական օրենսգրքի 268 հոդվածի 1-ին մասով քրեական գործի վարույթը կարճել և քրեական հետապնդումը դադարեցնել` նրա նկատմամբ կիրառելով ՀՀ ազգային ժողովի կողմից 26.05.2011 թվականին ընդունված ՙՀամաներում հայտարարելու մասին՚ որոշման 6-րդ կետի 2-րդ ենթակետը:
2011 թվականի հունիսի 15-ի դատական նիստի ընթացքում Երևանի Կենտրոն և Նորք-Մարաշ վարչական շրջանների դատախազության ավագ դատախազ Լ.Չարխիֆալակյանի կողմից ներկայացվել է նույն օրը կայացված որոշումը, համաձայն որի` թիվ 13109711 քրեական գործով ամբաստանյալ Աշոտ Գուրգենի Սահակյանին ՀՀ քրեական օրենսգրքի ՀՀ քրեական օրենսգրքի 266 հոդվածի 2-րդ մասի 2.1 կետով առաջադրված մեղադրանքը փոփոխվել է և նրան մեղադրանք է առաջադրվել ՀՀ քրեական օրենսգրքի 266 հոդվածի 1-ին մասով, նկատի ունենալով ՀՀ ԱԺ 23.05.2011 թվականին ընդունված ՀՀ օրենքով` ՀՀ քրեական օրենսգրքում կատարված փոփոխությունները և լրացումները:
Աշոտ Գուրգենի Սահակյանին ՀՀ քրեական օրենսգրքի 266 հոդվածի 1-ին մասով մեղադրանք է առաջադրվել այն բանի համար, որ նա իրացնելու նպատակով ապօրինի ձեռք է բերել, պահել ու ապօրինի իրացրել է թմրամիջոց.
Աշոտ Գուրգենի Սահակյանը քննությամբ չպարզված անձից և հանգամանքներում ապօրինի ձեռք է բերել և պահել 0,008 գրամ քաշով ՙԲուպրենորֆին՚ տեսակի թմրամիջոց, որը 2010 թվականի դեկտեմբեր ամսվա վերջին` քննությամբ չպարզված օրը 20.000 ՀՀ դրամ գումարով Երևան քաղաքի Շենգավիթ թաղամասում ապօրինի իրացրել է Պապիկ Վլադիմիրի Սաքոյանին:
Բացի այդ, Աշոտ Գուրգենի Սահակյանը, քննությամբ չպարզված անձից և հանգամանքներում, իրացնելու նպատակով ապօրինի ձեռք է բերել և պահել 0,008 գրամ քաշով ՙԲուպրենորֆին՚ տեսակի թմրամիջոց, որը 2011 թվականի հունվար ամսվա սկզբին` քննությամբ չպարզված օրը 20.000 ՀՀ դրամ գումարով Երևան քաղաքի Շենգավիթ թաղամասում ապօրինի իրացրել է Պապիկ Վլադիմիրի Սաքոյանին:
Դրանից մի քանի օր անց Աշոտ Գուրգենի Սահակյանը, քննությամբ չպարզված անձից և հանգամանքներում, իրացնելու նպատակով ապօրինի ձեռք է բերել և պահել 0,008 գրամ քաշով ՙԲուպրենորֆին՚ տեսակի թմրամիջոց, որը քննությամբ չպարզված օրը 20.000 ՀՀ դրամ գումարով Երևան քաղաքի Շենգավիթ թաղամասում ապօրինի իրացրել է Պապիկ Վլադիմիրի Սաքոյանին:
Բացի այդ, Աշոտ Գուրգենի Սահակյանը քննությամբ չպարզված անձից և հանգամանքներում, ապօրինի ձեռք է բերել և պահել 0,008 գրամ քաշով ՙԲուպրենորֆին՚ տեսակի թմրամիջոց, որը 2011 թվականի փետրվարի 16-ին 20.000 ՀՀ դրամ գումարով Երևան քաղաքի Շենգավիթ թաղամասում ապօրինի իրացրել է Պապիկ Վլադիմիրի Սաքոյանին, որի կեսը վերջինս գործածել է, իսկ մյուս կեսը` 0,004 գրամ քաշով պահել է իր մոտ, որն էլ նույն օրը` ժամը 2100-ի սահմաններում ՀՀ ոստիկանության Կենտրոնականի բաժնի Մարաշի բաժանմունքում կատարված նրա անձնական խուզարկության ընթացքում հայտնաբերվել է նրա մոտից:
2011 թվականի մայիսի 17-ի որոշմամբ թիվ 13109711 քրեական գործով ինքնությունը չպարզված անձի կողմից Աշոտ Գուրգենի Սահակյանին ՙԲուպրենորֆին՚ տեսակի թմրամիջոց իրացնելու` ՀՀ քրեական օրենսգրքի 266 հոդվածի 2-րդ մասի 2.1 կետով նախատեսված հանցագործության դեպքով մասն անջատվել է և գործի քննությունն այդ մասով շարունակվել է առանձին վարույթում` տրվել է 13129811 համարը:

Ապացույցների հետազոտում և գնահատում.

Ամբաստանյալ` Աշոտ Գուրգենի Սահակյանը ՀՀ քրեական օրենսգրքի 261 հոդվածի 1-ին մասով առաջադրված մեղադրանքներում իրեն մեղավոր չճանաչեց, դատաքննության ընթացքում հրաժարվեց ցուցմունք տալուց և հարցերին պատասխանելուց:
Սույն գործով ամբաստանյալ` Պապիկ Վլադիմիրի Սաքոյանի ցուցմունքով այն մասին, որ Աշոտ Սահակյանին ճանաչում է` որպես նույն թաղամասի բնակչի: Նախաքննության ընթացքում Աշոտ Սահակյանի նկատմամբ զրպարտություն է արել, ասելով, որ թմրանյութը Աշոտից է վերցրել: Ոստիկանության բաժնում ցուցմունքներ տալիս ՙլոմկայի՚ մեջ է եղել, հեռախոսի վերջին հեռախոսազանգն էլ Աշոտինն է եղել, ինքն էլ Աշոտին 80.000 դրամ գումար է պարտք եղել, որի համար իր ձերբակալումից մեկ օր առաջ վիճել է Աշոտի հետ, այդ պատճառով էլ որոշել է այդ գումարը չվերադարձնել ու ասել, որ թմրանյութը ձեռք է բերել նրանից: Իրականում ինքը թմրանյութ է օգտագործել և այն ձեռք է բերել դեղատնից` գնելով ՙՍուպրալգին՚ տեսակի թմրամիջոց, պատրաստել է թմրանյութ ու ներարկվելու միջոցով գործածել է: 3 կամ 4 անգամ էլ թմրանյութ է ձեռք բերել իրեն անծանոթ ազգությամբ պարսիկ մի տղայից, որքան հիշում է նրա անունն Ահմեդ է եղել, որի հետ պայմանավորվել են հանդիպել ՙԳՈՒՄ՚-ի շուկայի մոտ, որտեղ էլ ինքը գնել է թմրանյութը: Ինքը բազմիցս փորել է այդ անծանոթին գտնել, որպեսզի նա գա և ասի, որ ինքը նրանից է թմրանյութ գնել, այլ ոչ թե Աշոտից, սակայն չի կարողացել նրան գտնել: պատժից ազատվելուց հետո կրկին փորձել է գտնել նրան, սակայն չի կարողացել: Նախաքննության ընթացքում` ոստիկանության բաժնում տված ցուցմունքը ճիշտ չէ, չի համապատասխանում իրականությանը, ՙՆուբարաշեն՚ քրեակատարողական հիմնարկում 04.03.2011 թվականին տրված լրացուցիչ ցուցմունքն է ճիշտ, քանի որ այդ ժամանակ ինքն արդեն ՙլոմկայից՚ դուրս է եկել ու ճիշտ ցուցմունք է տվել:
Պապիկ Սաքոյանի և Աշոտ Սահակյանի միջև կատարված առերես հարցաքննության արձանագրությամբ, որի ընթացքում Պապիկ Սաքոյանը Աշոտ Սահակյանին առերես պնել է, որ նրանից 4-5 անգամ 20.000 ՀՀ դրամով գնելու միջոցով ապօրինի ձեռք է բերել բուպրենորֆին տեսակի թմրամիջոց պարունակող սուբուտեքս տեսակի հաբեր:
Ամբաստանյալ Աշոտ Գուրգենի Սահակյանի կատարած հանցանքը` ՀՀ քրեական օրենսգրքի 266 հոդվածի 1-ին մասով, հիմնավորվել է հետևյալ ապացույցներով.
Վկա` Նարեկ Ժորայի Կիրակոսյանի նախաքննական ցուցմունքով այն մասին, որ 2011 թվականի փետրվարի 16-ին, ժամը 21-ի սահմաններում, ոստիկանության Կենտրոնական բաժնի Մարաշի բաժանմունքում որպես ընթերական մասնակցել է թմրանյութ պահելու, իրացնելու և օգտագործելու կասկածանքով ոստիկանության Կենտրոնական բաժնի Մարաշի բաժանմունք բերման ենթարկված Պապիկ Վոլոդյայի Սաքոյանի անձնական խուզարկությանը: Ոստիկանները խուզարկության են ենթարկել այդ անձին և իր հետ հրավիրված մեկ այլ ընթերակայի ներկայությամբ Պ.Սաքոյանի սպորտային վերնազգեստի ձախ գրպանից հայտնաբերել են ծխախոտի ֆոլգայի մեջ փաթեթավորված սպիտակ դեղահաբի կես հատիկ և 11.400 ՀՀ դրամ գումար: Հայտնաբերված դեղահաբը իրենց ներկայությամբ կշռվել է, որը կազմել է 0,2 գրամ, փաթեթավորվել ու կնիքվել է: Պ.Սաքոյանը հայտարարել է, որ իր մոտից հայտնաբերված հաբի կես կտորը ՙՍուբոտեքս՚ տեսակի դեղահաբ է: Ինքը և մյուս ընթերական ստորագրել են կազմված արձանագրության տակ:
Անձին ոստիկանության բաժին բերման ենթարկելու, անձնական խուզարկության ենթարկելու մասին արձանագրություններով, Ժորա Գրիշայի Հակոբջանյանի բացատրությունով:
Դատաքիմիական փորձաքննության թիվ 51 Ք եզրակացությամբ այն մասին, որ փորձաքննության ներկայացված դեղահաբի կտորում հայտնաբերվեց բուպրենորֆին տեսակի թմրամիջոց: Դեղահաբի կտորում բուպրենորֆինի քաշը կազմում է 0,004 գրամ:
Տոքսիկոքիմիական փորձաքննության Հմ` 11-0386 եզրակացությամբ այն մասին, որ Աշոտ Գուրգենի Սահակյանից վերցված մեզի և մազի փորձանմուշների մեջ հայտնաբերվել են ապիոիդների շարքի բուպրենորֆին տեակի դեղամիջոցի հետքեր:
Տոքսիկոքիմիական փորձաքննության Հմ` 11-0385 եզրակացությամբ այն մասին, որ Պապիկ Վլադիմիրի Սաքոյանից վերցված մեզի և մազի փորձանմուշների մեջ հայտնաբերվել են կանաբինոիդների խմբին պատկանող թմրամիջոցի թմրալկալոիդներ:
Դատանարկոլոգիական փորձաքննության Հմ` 041-11 եզրակացությամբ այն մասին, որ Աշոտ Գուրգենի Սահակյանի մոտ թմրանյութերի գործածումը կրում է էպիզոդիկ բնույթ, ուստի հարկադիր բուժման կարիք չունի:
Դատանարկոլոգիական փորձաքննության Հմ` 040-11 եզրակացությամբ այն մասին, որ Պապիկ Վլադիմիրի Սաքոյանը տառապում է ՙԱփիոնային թմրամոլություն՚ ախտորոշմամբ, ուստի հարկադիր բուժման կարիք ունի, հակացուցումներ չկան:
Դատարանը, հետազոտելով քրեական գործով ձեռք բերված ապացույցները և գնահատելով դրանց վերաբերելիության, թույլատրելիության, իսկ ամբողջ ապացույցներն իրենց համակցությամբ գործի լուծման համար բավարարության տեսանկյունից, հանգում է այն հետևության, որ ամբաստանյալ Աշոտ Գուրգենի Սահակյանը, կատարած հանցավոր արարքում` ՀՀ քրեական օրենսգրքի 266 հոդվածի 1-ին մասով, իրեն մեղավոր չճանաչելով, նպատակ է հետապնդում խույս տալ քրեական պատասխանատվությունից և նրա կատարած հանցանքը հիմնավորվել է ինչպես Պապիկ Վլադիմիրի Սաքոյանի նախաքննական ցուցմունքներով (բացառությամբ 04.03.2011 թվականին տրված լրացուցիչ ցուցմունքի), այնպես էլ Պ.Սաքոյանի ու Ա.Սահակյանի միջև 17.02.2011 թվականին կատարված առերես հարցաքննության արձանագրությամբ:
Դատարանն արժանահավատ չի համարում նաև վկա Պասպիկ Վլադիմիրի Սաքոյանի 04.03.2011 թվականին տրված լրացուցիչ և դատաքննական ցուցմունքներն այն մասին, որ նախաքննական ցուցմունքի այն մասը, որ ինքը թմրանյութը ձեռք է բերել Աշոտ Սահակյանից, ճիշտ չէ, չի համապատասխանում իրականությանը, ինքը երբևէ Աշոտ Սահակյանից թմրանյութ չի գնել, այլ այն ձեռք է բերել իրեն անծանոթ, ազգությամբ պարսիկ մի անձից, Աշոտ Սահակյանին գումար պարտք լինելու պատճառով է նրա անունը գրել, գտնում է, որ այն ճիշտ չէ և չի համապատասխանում իրականությանը ու նպատակ է հետապխնդում Ա.Սահակյանին քրեական պատասխանատվությունից ազատելու և նրա ցուցմունքները ժխտվում են իր իսկ նախաքննական ցուցմունքով (բացառությամբ 04.03.2011 թվականին տրված լրացուցիչ ցուցմունքի) այն մասին, որ մոտ 5 տարի առաջ սկսել է օգտագործել թմրանյութեր` օգտագործել է բենզին, կոաքսիլ և այլ տեսակի դեղահաբեր: Աշոտ Սահակյանին ճանաչել է իրենց թաղամասից, դեռևս մանկուց, նրա հետ գտնվել է նորմալ փոխհարաբերությունների մեջ: Ինքը Աշոտ Գուրգենի Սահակյանից մի քանի անգամ ձեռք է բերել սուբուտեքս տեսակի դեղահաբեր: 2010 թվականի դեկտեմբերի 31-ից մի քանի օր առաջ, իրենց թաղամասում հանդիպել է Ա.Սահակյանին, ու քանի որ գտնվել է շատ վատ վիճակում` ՙԼոմկայի՚ մեջ, վերջինիս հայտնել է, որ իր մոտ կախվածություն է առաջացել թմրանյութերից և ուզում է թողնել դրանց գործածելը, իսկ դրա համար անհրաժեշտ է սուբոտեքս գործածել: Ա.Սահակյանն էլ ասել է, որ կփորձի օգնել և փոխանակվել են հեռախոսահամարներով` ինքը տվել է իր բնակարանի 010-44-94-93 հեռախոսահամարը, իսկ Ա.Սահակյանը` իր բնակարանի 010-48-30-22 հեռախոսահամարը: Այդ հանդիպումից մի քանի օր անց` մինչև Նոր տարի, Ա.Սահակյանը զանգահարել է իրեն, ասել, որ դեղը գտել է և կանչել է իրենց շենքի մոտ: Հանդիպման ժամանակ Ա.Սահակյանը տեղեկացրել է, որ դեղի մեկ հաբն արժե 20.000 դրամ, որից էլ նշված գումարով գնել է մեկ հաբ ՙՍուբուտեքս՚: Նշված հաբը երկու անգամով օգտագործել է տանը: Նոր տարուց հետո տեսնելով, որ չի կարողանում թողնել թմրամիջոց գործածելը` կրկին զանգահարել է Աշոտին, հարցրել, թե կարող է վերջինս մի հաբ էլ ճարել, որին Աշոտ Սահակյանը դրական պատասխան է տվել: 2011 թվականի հունվարի սկզբներին կրկին զանգահարելով և պայմանավորվելով հանդիպել են Աշոտի հետ և 20.000 ՀՀ դրամով վերջինիցս գնել է ևս մեկ հատ սուբուտեքս: Տեսնելով, որ չի կարողանում թողնել թմրամիջոցների գործածումը ևս երկու անգամ Ա.Սահակյանից վերցրել է սուբուտեքսի մեկական հաբեր: Վերջին անգամ Ա.Սահակյանից սուբուտեքս տեսակի դեղահաբ գնել է 2011 թվականի փետրվարի 16-ին: Նշված օրը, ժամը 17-ի սահմաններում, հեռախոսազանգի միջոցով ունեցած պայմանավորվածության համաձայն հանդիպել է Ա.Սահակյանին և մեկ հաբ սուբուտեքսի համար նրան վճարելով 20.000 դրամ` թմրամիջոցը ձեռք բերել: Գնված սուբուտեքս տեսակի հաբը բերել է տուն, հաբի կեսն օգտագործել է, իսկ մյուս կեսը պահել է գրպանում` հաջորդ օրը գործածելու համար: Որոշ ժամանակ անց, երբ տանից դուրս է եկել, շենքի բակում իրեն են մոտեցել ոստիկանության աշխատակիցները և բերման ենթարկել ոստիկանության Կենտրոնական բաժնի Մարաշի բաժանմունք, որտեղ կատարված անձնական խուզարկությամբ հայտնաբերվել է իր գրպանում պահված սուբուտեքս տեսակի հաբի կեսը: Աշոտ Սահակյանից սուբուտեքս տեսակի հաբ է ձեռք բերել 4 կամ 5 անգամ: Թմրամիջոցը գործածել է միայնակ, երբևէ որևէ մեկին չի տվել, բացի Ա.Սահակյանից որևէ մեկը չի իմացել, որ թմրամիջոց է ձեռք բերում, այնպես էլ Պապիկ Սաքոյանի և Աշոտ Սահակյանի առերես հարցաքննությամբ:
Դատաքննությամբ հիմնավորվեց, որ Աշոտ Գուրգենի Սահակյանը քննությամբ չպարզված անձից և հանգամանքներում ապօրինի ձեռք է բերել և պահել 0,008 գրամ քաշով ՙԲուպրենորֆին՚ տեսակի թմրամիջոց, որը 2010 թվականի դեկտեմբեր ամսվա վերջին` քննությամբ չպարզված օրը 20.000 ՀՀ դրամ գումարով ապօրինի իրացրել է Պապիկ Վլադիմիրի Սաքոյանին:
Բացի այդ, Աշոտ Գուրգենի Սահակյանը, քննությամբ չպարզված անձից և հանգամանքներում, իրացնելու նպատակով ապօրինի ձեռք է բերել և պահել 0,008 գրամ քաշով ՙԲուպրենորֆին՚ տեսակի թմրամիջոց, որը 2011 թվականի հունվար ամսվա սկզբին` քննությամբ չպարզված օրը 20.000 ՀՀ դրամ գումարով ապօրինի իրացրել է Պապիկ Վլադիմիրի Սաքոյանին:
Դրանից մի քանի օր անց` քննությամբ չպարզված անձից և հանգամանքներում, Աշոտ Գուրգենի Սահակյանը իրացնելու նպատակով ապօրինի ձեռք է բերել և պահել 0,008 գրամ քաշով ՙԲուպրենորֆին՚ տեսակի թմրամիջոց, որը քննությամբ չպարզված օրը 20.000 ՀՀ դրամ գումարով Երևան քաղաքի Շենգավիթ թաղամասում ապօրինի իրացրել է Պապիկ Վլադիմիրի Սաքոյանին:
Բացի այդ, Աշոտ Գուրգենի Սահակյանը քննությամբ չպարզված անձից և հանգամանքներում, ապօրինի ձեռք է բերել և պահել 0,008 գրամ քաշով ՙԲուպրենորֆին՚ տեսակի թմրամիջոց, որը 2011 թվականի փետրվարի 16-ին 20.000 ՀՀ դրամ գումարով Երևան քաղաքի Շենգավիթ թաղամասում ապօրինի իրացրել է Պապիկ Վլադիմիրի Սաքոյանին, որի կեսը վերջինս գործածել է, իսկ մյուս կեսը` 0,004 գրամ քաշով պահել է իր մոտ, որն էլ նույն օրը` ժամը 2100-ի սահմաններում ՀՀ ոստիկանության Կենտրոնականի բաժնի Մարաշի բաժանմունքում կատարված նրա անձնական խուզարկության ընթացքում հայտնաբերվել է նրա մոտից:

Դատարանի իրավական վերլուծությունները.

Այսպիսով, ընդհանուր կարգով սահմանված դատաքննությամբ հետազոտված ապացույցների հիման վրա դատարանն ապացուցված է համարում, որ ամբաստանյալ Աշոտ Գուրգոնի Սահակյանը իրացնելու նպատակով ապօրինի ձեռք է բերել, պահել ու ապօրինի իրացրել է թմրամիջոց` որպիսի արարքի համար նա պետք է պատասխանատվության ենթարկվի ՀՀ քրեական օրենսգրքի 266 հոդվածի 1-ին մասով:
ՀՀ քրեական օրենսգրքի 61-րդ հոդվածի 2-րդ մասի համաձայն` պատժի չափը և տեսակը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով:
Ամբաստանյալ Աշոտ Գուրգոնի Սահակյանը բնութագրվում է դրականորեն, խնամքին է գտնվում թոշակառու մայրը, նախկինում դատապարտված չի եղել:
Պատասխանատվությունը և պատիժը մեղմացնող ու ծանրացնող հանգամանքներ չկան:
Դատարանը քննարկելով ամբաստանյալի նկատմամբ ընտրված խափանման միջոցի, իրեղեն ապացույցի և այլ ապացույցերի հարցերը, գտնում է, որ ամբաստանյալ Աշոտ Գուրգոնի Սահակյանի նկատմամբ ընտրված խափանման միջոցը` կալանավորումը, պետք է թողնել անփոփոխ, քրեական գործով ապացույց ճանաչված` Ա.Սահակյանի քաղաքային 010-48-30-22, բջջային 093-48-30-22, Պ.Սաքոյանի 010-44-94-93 քաղաքային հեռախոսահամարների վերծանումները, Պապիկ Սաքոյանի անձնական խուզարկության արձանագրությունը պետք է թողնել քրեական գործին կցված, իսկ քրեական գործով իրեղեն ապացույց ճանաչված, քրեական գործին կցված 0,004 գրամ քաշով ՙբուպրենորֆին՚ տեսակի թմրամիջոցը պետք է ոչնչացնել`դատավճիռն օրինական ուժի մեջ մտնելու պահից:
Դատարանը գտնում է, որ Աշոտ Սահակյանի անվամբ սեփականության իրավունքով գրանցված անշարժ և շարժական գույքերի վրա 13.05.2011 թվականի որոշմամբ դրված կալանքը պետք է վերացնել` դատավճիռն օրինական ուժի մեջ մտնելու պահից:

Եզրափակիչ մաս.

Ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց`

Աշոտ Գուրգենի Սահակյանին մեղավոր ճանաչել ՀՀ քրեական օրենսգրքի 266 հոդվածի 1-ին մասով և նրան դատապարտել ազատազրկման` 3 /երեք/ տարի ժամկետով:
Աշոտ Գուրգենի Սահակյանի պատժի սկիզբը հաշվել 17.02.2011 թվականից, խափանման միջոցը` կալանավորումը, թողնել անփոփոխ:
Աշոտ Սահակյանի անվամբ սեփականության իրավունքով գրանցված անշարժ և շարժական գույքերի վրա 13.05.2011 թվականի որոշմամբ դրված կալանքը` վերացնել դատավճիռն օրինական ուժի մեջ մտնելու պահից:
Քրեական գործով ապացույց ճանաչված` Ա. Սահակյանի քաղաքային 010-48-30-22, բջջային 093-48-30-22, Պ.Սաքոյանի 010-44-94-93 քաղաքային հեռախոսահամարների վերծանումներպը, Պապիկ Սաքոյանի անձնական խուզարկության արձանագրությունը թողնել քրեական գործին կցված:
Քրեական գործով իրեղեն ապացույց ճանաչված, քրեական գործին կցված 0,004 գրամ քաշով ՙբուպրենորֆին՚ տեսակի թմրամիջոցը ոչնչացնել:
Սույն դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում:


ԴԱՏԱՎՈՐ` Ա. ԲԵԿԹԱՇՅԱՆ