գործ` ԵԿԴ/0099/01/11

Ո Ր Ո Շ Ո ՒՄ
/«Համաներում հայտարարելու մասին» որոշումը կիրառելու, քրեական
գործի վարույթը կարճելու և քրեական հետապնդումը դադարեցնելու մասին/

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության դատարանը

Նախագահությամբ դատավոր` Արմեն Բեկթաշյանի
քարտուղարությամբ` Լուսինե Ղամբարյանի
մասնակցությամբ` մեղադրող` Լևոն Չարխիֆալակյանի

2011 թվականի հունիսի 27-ին, Երևան քաղաքում, դռնբաց դատական նիստում քննության առնելով քրեական գործով ըստ մեղադրանքի Արթուր Աշոտի Դավթյանի` ծնված 06.08.1988 թվականին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, նախկինում չդատված, չի աշխատում, բնակվում է Երևան քաղաքի Սիսակյան փողոցի, 4-րդ շենքի, 26 բնակարանում, մեղադրվում է ՀՀ քրեական օրենսգրքի 258 հոդվածի 2-րդ մասով և Դավիթ Արայիկի Առաքելյանի` ծնված 20.11.1988 թվականին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, նախկինում չդատված, չի աշխատում, բնակվում է Երևան քաղաքի Սիսակյան փողոցի, 4-րդ շենքի, 83 բնակարանում, մեղադրվում է ՀՀ քրեական օրենսգրքի 258 հոդվածի 2-րդ մասով, ամբաստանյալներ Արթուր Աշոտի Դավթյանի և Դավիթ Արայիկի Առաքելյանի դիմումները` 26.05.2011 թվականին ընդունված «Համաներում հայտարարելու մասին» որոշման կիրառմամբ իրենց վերաբերյալ քրեական գործի վարույթը կարճելու և քրեական հետապնդումը դադարեցնելու մասին,

Պ Ա Ր Զ Ե Ց`

Միմյանց հետ վիճաբանելու և մարմնական վնասվածք պատճառելու համար 2011 թվականի հունվարի 27-ին ՀՀ ոստիկանության քննչական գլխավոր վարչության Երևան քաղաքի ՔՎ Կենտրոնականի քննչական բաժին բերման են ենթարկվել Երևան քաղաքի Սիսակյան փողոցի, 4-րդ շենքի, 83 բնակարանի բնակիչ Դավիթ Արայիկի Առաքելյանը, Երևան քաղաքի Սիսակյան փողոցի, 4-րդ շենքի, 26 բնակարանի բնակիչ Արթուր Աշոտի Դավթյանը, Երևան քաղաքի Սիսակյան փողոցի, 4-րդ շենքի, 20 բնակարանի բնակիչ Վարդան Բաբկենի Անտոնյանը, Երևան քաղաքի Քանաքեռ 2-րդ փողոցի 2-րդ նրբանցքի 15 տան բնակիչ Հենրիկ Մասիսի Հովհաննիսյանը:
2011 թվականի փետրվարի 02-ին ՀՀ ոստիկանության քննչական գլխավոր վարչության Երևան քաղաքի ՔՎ Կենտրոնականի քննչական բաժնում ՀՀ քրեական օրենսգրքի 258 հոդվածի 2-րդ մասի հատկանիշներով հարուցվել է թիվ 13104111 քրեական գործը:
2011 թվականի մարտի 24-ին Դավիթ Արայիկի Առաքելյանը ՀՀ քրեական օրենսգրքի 258 հոդվածի 3-րդ մասի 1-ին կետով ներգրավվել է որպես մեղադրյալ և նույն օրը նրա նկատմամբ որպես խափանման միջոց է ընտրվել ստորագրություն չհեռանալու մասին:
2011 թվականի մարտի 26-ին Արթուր Աշոտի Դավթյանը ՀՀ քրեական օրենսգրքի 258 հոդվածի 3-րդ մասի 1-ին կետով ներգրավվել է որպես մեղադրյալ և նույն օրը նրա նկատմամբ որպես խափանման միջոց է ընտրվել ստորագրություն չհեռանալու մասին:
2011 թվականի ապրիլի 28-ի որոշմամբ` Դավիթ Արայիկի Առաքելյանին ՀՀ քրեական օրենսգրքի 258 հոդվածի 3-րդ մասի 1-ին կետով առաջադրված մեղադրանքի ծավալը փոփոխվել է և նրան նոր մեղադրանք է առաջադրվել ՀՀ քրեական օրենսգրքի 258 հոդվածի 2-րդ մասով: Նույն օրը Դ.Առաքելյանը ՀՀ քրեական օրենսգրքի 258 հոդվածի 2-րդ մասով ներգրավվել է որպես մեղարդյալ:
2011 թվականի ապրիլի 28-ի որոշմամբ` Արթուր Աշոտի Դավթյանին ՀՀ քրեական օրենսգրքի 258 հոդվածի 3-րդ մասի 1-ին կետով առաջադրված մեղադրանքի ծավալը փոփոխվել է և նրան նոր մեղադրանք է առաջադրվել ՀՀ քրեական օրենսգրքի 258 հոդվածի 2-րդ մասով: Նույն օրը Ա.Դավթյանը ՀՀ քրեական օրենսգրքի 258 հոդվածի 2-րդ մասով ներգրավվել է որպես մեղարդյալ:
Արթուր Աշոտի Դավթյանին և Դավիթ Արայիկի Առաքելյանին ՀՀ քրեական օրենսգրքի 258 հոդվածի 2-րդ մասով մեղադրանք է առաջադրվել այն բանի համար, որ նրանք դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք արտահայտելով հասարակության նկատմամբ, բռնության գործադրմամբ, կատարել են խուլիգանություն.
Ամբաստանյալներ Արթուր Աշոտի Դավթյանը և Դավիթ Արայիկի Առաքելյանը, գտնվելով երրորդ աստիճանի ալկոհոլային հարբածության վիճակում, 2011 թվականի հունվարի 27-ին ժամը 2000-ի սահմաններում, իրենց ծանոթներ, գործով վկաներ Հենրիկ Մասիսի Հովհաննիսյանի և Վարդան Բաբկենի Անտոնյանի հետ միասին, Երևան քաղաքի Մոսկովյան փողոցի 8 հասցեում գտնվող «Հեվն» գիշերային ակումբում նստել են միևնույն սեղանի շուրջ, պատվիրել գարեջուր, օղի, լիմոն, «Սփրայթ» տեսակի լիմոնադ, խմել և զրուցել են: Այնուհետև` Արթուր Դավթյանի և Դավիթ Առաքելյանի միջև ակումբի բարի մոտ «Մարտինի» խմիչքի գումարը վճարելու շուրջ վեճ է ծագել, որի ժամանակ խափանելով ակումբի բնականոն աշխատանքը, ակումբի աշխատակիցների և հաճախորդների ներկայությամբ, սեռական բնույթի հայոյանքներ են տվել միմյանց հասցեի: Վիճաբանության ձայներից սրճարան է եկել ակումբի մենեջեր Գայանե Մեծոյանը և Ա.Դավթյանին և Դ.Առաքելյանին դուրս հրավիրել ակումբից: Դուրս գալով ակումբից` Իսահակյան-Մոսկովյան փողոցների խաչմերուկում, Ա.Դավթյանը և Դ.Առաքելյանը շարունակել են խուլիգանական գործողությունները` անցորդների ներկայությամբ, շուրջ 10 րոպե տևողությամբ միմյանց հասցեի սեռական բնույթի հայոյանքներ տվել, որի ընթացքում Արթուր Դավթյանը բռնություն գործադրելով հարվածել է Դավիթ Առաքելյանին` վերջինիս առողջությանը` աջ աչքի ստորին կոպի անրյունազեղման ձևով, պատճառել թեթև վնասի հատկանիշներ չպարունակող մարմնական վնասվածք: Այնուհետև` նշված տարածքը սպասարկող ոստիկանության ՊՊԾ աշխատակիցներ, գործով վկաներ Էդգար Մխիթարյանը և Հայկ Հարությունյանը, գոռգոռոցի ու հայոյանքի ձայներ լսելով մոտեցել են վիճողներին, բաժանել նրանց, ապա բերման ենթարկել ՀՀ ոստիկանության Կենտրոնականի բաժին, որտեղ Դավիթ Առաքելյանը շարունակել է խուլիգանական գործողությունները` բարձրաձայն հայոյանքներ է տվել և գլխով հարվածելով կոտրել է ՀՀ ոստիկանության Երևան քաղաքի վարչության Կենտրոնականի բաժնի հերթապահ մասի` 9,650 /ինը հազար վեց հարյուր հիսուն/ ՀՀ դրամ արժողությամբ պահակակետի դռան ապակին, որի վնասը հետագայում փոխհատուցել է:
2011 թվականի մայիսի 19-ին թիվ 13104111 քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան:
2011 թվականի հունիսի 20-ին դատական նիստի ընթացքում ամբաստանյալներ Դավիթ Արայիկի Առաքելյանը և Արթուր Աշոտի Դավթյանը ՀՀ քրեական օրենսգրքի 258 հոդվածի 2-րդ մասով առաջադրված մեղադրանքներում իրենց մեղավոր ճանաչեցին և ներկայացրեցին դիմումներ` 26.05.2011 թվականին ընդունված <<Համաներում հայտարարելու մասին>> որոշման կիրառմամբ իրենց վերաբերյալ քրեական գործի վարույթը կարճելու և քրեական հետապնդումը դադարեցնելու մասին:
ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի համաձայն` «Քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ընդունվել է համաներման ակտ», իսկ նույն հոդվածի 5-րդ մասը սահմանում է` «Դատարանը, հայտնաբերելով քրեական հետապնդումը բացառող հանգամանքներ, լուծում է ամբաստանյալի նկատմամբ քրեական հետապնդումը դադարեցնելու հարցը»:
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման (այսուհետ նաև` Համաներման որոշում) 6-րդ կետի 2-րդ ենթակետի համաձայն` «քրեական հետապնդում պետք է չհարուցել և քրեական հետապնդում չիրականացնել, ինչպես նաև կարճել մինչև 2011 թվականի մայիսի 1-ը կատարած հանցագործությունների վերաբերյալ հետաքննության մարմինների, նախաքննության մարմինների կամ դատարանի վարույթում գտնվող քրեական գործերը, բացառությամբ սույն որոշման 8-րդ կետի 4-րդ և 5-րդ ենթակետերով նախատեսված դեպքերի, որոնցով անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան երեք տարի ժամկետով ազատազրկում»:
ՀՀ քրեական օրենսգրքի 258-րդ հոդվածի 2-րդ մասի սանկցիան որպես պատիժ նախատեսում է տուգանք՝ նվազագույն աշխատավարձի հարյուրապատիկից երեքհարյուրապատիկի չափով, կամ կալանք` մեկից երեք ամիս ժամկետով, կամ ազատազրկում` առավելագույնը երկու տարի ժամկետով:
Համաներման որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` Համաներման որոշման 9-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ: Սակայն հարկ է նկատել, որ թվարկված հոդվածների և հոդվածների մասերի շարքից բացակայում է ՀՀ քրեական օրենսգրքի 258-րդ հոդվածի 2-րդ մասը, այսինքն` ՀՀ քրեական օրենսգրքի 258-րդ հոդվածի 2-րդ մասով նախատեսված արարքներ կատարած անձանց նկատմամբ համաներման կիրառումը սահմանափակված չէ:
Սույն քրեական գործի նյութերում բացակայում է նաև Համաներման որոշման 9-րդ կետի մյուս ենթակետերում նշված այն սահմանափակումները, որոնք կարող են արգելք հանդիսանալ Համաներման որոշման կիրառման համար:

Դատարանը, հիմք ընդունելով վերը նշվածը և նկատի ունենալով, որ Դավիթ Արայիկի Առաքելյանը և Արթուր Աշոտի Դավթյանը խնդրել են իրենց նկատմամբ կիրառել Համաներման որոշումը, գտնում է, որ Համաներման որոշման կիրառմամբ սույն քրեական գործի վարույթը պետք է կարճել և Դավիթ Արայիկի Առաքելյանի և Արթուր Աշոտի Դավթյանի նկատմամբ քրեական հետապնդումը դադարեցնել:
Դատարանը, նկատի ունենալով, որ վերը նշված հիմնավորմամբ սույն քրեական գործի վարույթը պետք է կարճել և Դավիթ Արայիկի Առաքելյանի ու Արթուր Աշոտի Դավթյանի նկատմամբ քրեական հետապնդումը դադարեցնել, գտնում է, որ նրանց նկատմամբ խափանման միջոց կիրառելու անհրաժեշտությունը վերացել է, ուստի սույն որոշումն օրինական ուժի մեջ մտնելուց հետո Դավիթ Արայիկի Առաքելյանի և Արթուր Աշոտի Դավթյանի նկատմամբ ընտրված խափանման միջոցները` չհեռանալու մասին ստորագրությունը, պետք է վերացնել:
Քրեական գործով իրեղեն ապացույց ճանաչված դռան կոտրված ապակու նմուշները պետք է ոչնչացնել:
Ելնելով վերոգրյալից, ղեկավարվելով ՀՀ քրեական դատավարության օրենսգրքի 35 հոդվածի 1-ին մասի 13-րդ կետով, 41-րդ, 151-րդ, 313-րդ հոդվածներով և հիմք ընդունելով «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային Ժողովի 2011 թվականի մայիսի 26-ի թիվ ԱԺՈ-277-Ն որոշումը, դատարանը

Ո Ր Ո Շ Ե Ց

Դավիթ Արայիկի Առաքելյանի վերաբերյալ` ՀՀ քրեական օրենսգրքի 258 հոդվածի 2-րդ մասով քրեական գործի վարույթը կարճել և քրեական հետապնդումը դադարեցնել` նրա նկատմամբ կիրառելով ՀՀ Ազգային Ժողովի կողմից 26.05.2011 թվականին ընդունված «Համաներում հայտարարելու մասին» որոշման 6-րդ կետի 2-րդ ենթակետը:
Դավիթ Արայիկի Առաքելյանի նկատմամբ ընտրված խափանման միջոցը` ստորագրություն չհեռանալու մասին վերացնել, որոշումն օրինական ուժի մեջ մտնելու պահից:
Արթուր Աշոտի Դավթյանի վերաբերյալ` ՀՀ քրեական օրենսգրքի 258 հոդվածի 2-րդ մասով քրեական գործի վարույթը կարճել և քրեական հետապնդումը դադարեցնել` նրա նկատմամբ կիրառելով ՀՀ Ազգային Ժողովի կողմից 26.05.2011 թվականին ընդունված «Համաներում հայտարարելու մասին» որոշման 6-րդ կետի 2-րդ ենթակետը:
Արթուր Աշոտի Դավթյանի նկատմամբ ընտրված խափանման միջոցը` ստորագրություն չհեռանալու մասին վերացնել, որոշումն օրինական ուժի մեջ մտնելու պահից:
Քրեական գործով իրեղեն ապացույց ճանաչված դռան կոտրված ապակու նմուշները` ոչնչացնել:
Որոշումը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում:



ԴԱՏԱՎՈՐ` Ա.ԲԵԿԹԱՇՅԱՆ