գործ` ԵԿԴ/0094/01/11

Ո Ր Ո Շ Ո ՒՄ
/<<Համաներում հայտարարելու մասին>> որոշումը կիրառելու, քրեական
գործի վարույթը կարճելու և քրեական հետապնդումը դադարեցնելու մասին/

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության դատարանը

Նախագահությամբ դատավոր` Ա.Բեկթաշյանի
քարտուղարությամբ` Կ.Մելքոնյանի
մասնակցությամբ` մեղադրող` Ա. Բեգինյանի
պաշտպան` Ն.Սվարյանի

2011 թվականի հունիսի 01-ին, դռնբաց դատական նիստում քննության առնելով քրեական գործն ըստ մեղադրանքի Վահան Ռուբենի Գյուլամիրյանցի` ծնված 31.08.1961 թվականին Երևան քաղաքում, ազգությամբ հայ, ՀՀ քաղաքացի, միջնակարգ-մասնագիտական կրթությամբ, ամուսնացած, խնամքին ոչ ոք, նախկինում չդատված, չի աշխատում, բնակվում է Երևան քաղաքի Շարուրի փողոցի 2ա շենքի 18 բնակարանում, մեղադրվում է ՀՀ քրեական օրենսգրքի 325 հոդվածի 1-ին մասով, ամբաստանյալ Վահան Ռուբենի Գյուլամիրյանցի դիմումը` 26.05.2011 թվականին ընդունված <<Համաներում հայտարարելու մասին>> որոշման կիրառմամբ իր վերաբերյալ քրեական գործի վարույթը կարճելու և քրեական հետապնդումը դադարեցնելու մասին,

Պ Ա Ր Զ Ե Ց`

2011 թվականի մարտի 21-ին ՀՀ ոստիկանության քննչական գլխավոր վարչության Երևան քաղաքի ՔՎ Կենտրոնականի քննչական բաժնում ՀՀ քրեական օրենսգրքի 325 հոդվածի 1-ին մասի հատկանիշներով հարուցվել է թիվ 13115511 քրեական գործը:
2011 թվականի ապրիլի 21-ին Վահան Ռուբենի Գյուլամիրյանցը ՀՀ քրեական օրենսգրքի 325 հոդվածի 1-ին մասով ներգրավվել է որպես մեղադրյալ:
2011 թվականի մայիսի 04-ին Վահան Ռուբենի Գյուլամիրյանցին ՀՀ քրեական օրենսգրքի 325 հոդվածի 1-ին մասով առաջադրված մեղադրանքի ծավալը փոփոխվել է և նրան նոր մեղադրանք է առաջադրվել ՀՀ քրեական օրենսգրքի 325 հոդվածի 1-ին մասով:
Վահան Ռուբենի Գյուլամիրյանցին ՀՀ քրեական օրենսգրքի 325 հոդվածի 1-ին մասով մեղադրանք է առաջադրվել այն բանի համար, որ նա պատրաստել և օգտագործել է ակնհայտ կեղծ փաստաթուղթ հանդիսացող վարորդական իրավունքի վկայական.
Վահան Գյուլամիրյանցը 2007 թվականի ընթացքում Երևան քաղաքի Բաղրամյան պողոտայով քայլելու ընթացքում գտել է գետնին ընկած` Սմբատ Արմենակի Ղարագյոզյանի տվյալներով լրացված UA 039376 համարի վարորդական իրավունքի վկայականը: Այնուհետև, 2010 թվականի օգոստոս ամսվա ընթացքում Վ.Գյուլամիրյանցը Երևան քաղաքում գործող <<Ույուտ>> տաքսի ծառայությունում աշխատանքի անցնելու նպատակով իր անունը, ազգանունը, հայրանունը, ծննդյան ամսաթիվը և լուսանկարը վերասոսնձման եղանակով փակցրել է Ս.Ղարագյոզյանի վարորդական իրավունքի վկայականին և այդ կերպ պատրաստել իրավունք վերապահող ակնհայտ կեղծ փաստաթուղթ, որն աշխատանքի ընդունվելիս ներկայացրել է տաքսի ծառայություն և այդ կերպ օգտագործել: 2010 թվականի օգոստոսի 30-ին, ժամը 1720-ի սահմաններում Վ.Գյուլամիրյանցը <<Ույուտ>> տաքսի ծառայությանը պատկանող <<ՎԱԶ 21074>> մակնիշի Տ 5418 պետհամարանիշի ավտոմեքենասն վարելու ընթացքում, Երևան քաղաքի Վաղարշյան-Կոմիտաս փողոցների հատման մասում խախտել է ճանապարհային երթևեկուևթյան կանոնները և իրավախախտման փաստն արձանագրող ճանապարհային ոստիկանության աշխատակիցներին ներկայացնելով` օգտագործել է ակնհայտ կեղծ փաստաթուղթ հանդիսացող վարորդական իրավունքի վկայականը:
Դրանից հետո` 2010 թվականի սեպտեմբերի 03-ին, ժամը 2105-ի սահմաններում Վ.Գյուլամիրյանցը <<Ույուտ>> տաքսի ծառայությանը պատկանող <<ՎԱԶ 21074>> մակնիշի Տ 5418 պետհամարանիշի ավտոմեքենան վարելու ընթացքում< Երևան քաղաքի Գայի պողոտայում խախտել է ճանապարհային երթևեկության կանոնները և իրավախախտման փաստն արձանագրող ճանապարհային ոստիկանության աշխատակիցներին ներկայացնելով` կրկին օգտագործել է ակնհայտ կեղծ փաստաթուղթ հանդիսացող վարորդական իրավունքի վկայականը:
Վահան Գյուլամիրյանցը 2011 թվականի փետրվարիկ 01-ին աշխատանքի ընդունվելու համար դիմել է Երևան քաղաղքում գործող <<Արքայորդի>> տաքսի ծառայություն, որտեղ կրկին ներկայացրել է ակնհայտ կեղծ փաստաթուղթ հանդիսացող վարորդական իրավունքի վկայականը:
2011 թվակայնի փետրվարի 11-ին, ժամը 2200-ի սահմաններում Վ.Գյուլամիրյանցն իր կողմից շահագործվող <<Արքայորդի>> տաքսի ծառայությանը պատկանող <<ՎԱԶ 21074>> մակնիշի Տ 3385 պետհամարանիշի ավտոմեքենան վարելու ընթացքում, Երևան քաղաքի Գ.Լուսավորիչ և Իտալիայի փողոցների խաչմերուկում խախտել է ճանապարհային երթևեկության կանոնները և իրավախախտման փաստն արձանագրող ճանապարհային ոստիկանության աշխատակիցներին ներկայացնելով` կրկին օգտագործել է ակնհայտ կեղծ փաստաթուղթ հանդիսացող վարորդական իրավունքի վկայականը, սակայն ճանապարհային ոստիկանության աշխատակիցները նկատելով վարորդական իրավունքի վկայականի վրա կատարված կեղծիքները, այն ներկայացրել են ՃՊԾ 1-ին սպայական գումարտակի հրամանատարի տեղակալ Հայկազ Մաթևոսյանին:
2011 թվականի մայիսի 11-ին թիվ 13115511 քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան:
01.06.2011 թվականի դատական նիստի ընթացքում aմբաստանյալ Վահան Ռուբենի Գյուլամիրյանցը ՀՀ քրեական օրենսգրքի 325 հոդվածի 1-ին մասով առաջադրված մեղադրանքում իրեն մեղավոր ճանաչեց և դատարանին ներկայացրեց դիմում` 26.05.2011 թվականին ընդունված <<Համաներում հայտարարելու մասին>> որոշման կիրառմամբ իր վերաբերյալ քրեական գործի վարույթը կարճելու և քրեական հետապնդումը դադարեցնելու մասին:
ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի համաձայն` «քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ընդունվել է համաներման ակտ», իսկ նույն հոդվածի 5-րդ մասը սահմանում է, որ «դատարանը, հայտնաբերելով քրեական հետապնդումը բացառող հանգամանքներ, լուծում է ամբաստանյալի նկատմամբ քրեական հետապնդումը դադարեցնելու հարցը»:
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման (այսուհետ նաև` Համաներման որոշում) 6-րդ կետի 2-րդ ենթակետի համաձայն` «քրեական հետապնդում պետք է չհարուցել և քրեական հետապնդում չիրականացնել, ինչպես նաև կարճել մինչև 2011 թվականի մայիսի 1-ը կատարած հանցագործությունների վերաբերյալ հետաքննության մարմինների, նախաքննության մարմինների կամ դատարանի վարույթում գտնվող քրեական գործերը, բացառությամբ սույն որոշման 8-րդ կետի 4-րդ և 5-րդ ենթակետերով նախատեսված դեպքերի, որոնցով անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան երեք տարի ժամկետով ազատազրկում»:
ՀՀ քրեական օրենսգրքի 325-րդ հոդվածի 1-ին մասի սանկցիան որպես պատիժ նախատեսում է տուգանք՝ նվազագույն աշխատավարձի երկուհարյուրապատիկից չորսհարյուրապատիկի չափով, կամ ազատազրկում՝ առավելագույնը երկու տարի ժամկետով:
Համաներման որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` Համաներման որոշման 9-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ: Սակայն հարկ է նկատել, որ թվարկված հոդվածների և հոդվածների մասերի շարքից բացակայում է ՀՀ քրեական օրենսգրքի 325-րդ հոդվածի 1-ին մասը, այսինքն` ՀՀ քրեական օրենսգրքի 325-րդ հոդվածի 1-ին մասով նախատեսված արարքներ կատարած անձանց նկատմամբ համաներման կիրառումը սահմանափակված չէ:
Սույն քրեական գործի նյութերում բացակայում է նաև Համաներման որոշման 9-րդ կետի մյուս ենթակետերում նշված այն սահմանափակումները, որոնք կարող են արգելք հանդիսանալ Համաներման որոշման կիրառման համար:

Դատարանը, հիմք ընդունելով վերը նշվածը և նկատի ունենալով, որ Վահան Ռուբենի Գյուլամիրյանցը խնդրել է իր նկատմամբ կիրառել Համաներման որոշումը, գտնում է, որ Համաներման որոշման կիրառմամբ սույն քրեական գործի վարույթը պետք է կարճել և Վահան Ռուբենի Գյուլամիրյանցի նկատմամբ քրեական հետապնդումը դադարեցնել:
Դատարանը, նկատի ունենալով, որ վերը նշված հիմնավորմամբ սույն քրեական գործի վարույթը պետք է կարճել և Վահան Ռուբենի Գյուլամիրյանցի նկատմամբ քրեական հետապնդումը դադարեցնել, գտնում է, որ նրա նկատմամբ խափանման միջոց կիրառելու անհրաժեշտությունը վերացել է, ուստի սույն որոշումն օրինական ուժի մեջ մտնելուց հետո Վահան Ռուբենի Գյուլամիրյանցի նկատմամբ ընտրված խափանման միջոցը` չհեռանալու մասին ստորագրությունը, պետք է վերացնել, իսկ քրեական գործով իրեղեն ապացույց ճանաչված Վահան Ռուբենի Գյուլամիրյանցի անվամբ UA 039376 համարի վարորդական իրավունքի կեղծ վկայականը պետք է թողնել քրեական գործին կցված, ապացույց ճանաչված այլ փաստաթուղթ հանդիսացող` թիվ 799934 և 834404 արձանագրությունները պետք է թողնել քրեական գործին կցված:
Ելնելով վերոգրյալից, ղեկավարվելով ՀՀ քրեական դատավարության օրենսգրքի 35 հոդվածի 1-ին մասի 13-րդ կետով, 41-րդ, 151-րդ, 313-րդ հոդվածներով և հիմք ընդունելով «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշումը, դատարանը

Ո Ր Ո Շ Ե Ց

Վահան Ռուբենի Գյուլամիրյանցի վերաբերյալ` ՀՀ քրեական օրենսգրքի 325 հոդվածի 1-ին մասով քրեական գործի վարույթը կարճել և քրեական հետապնդումը դադարեցնել` նրա նկատմամբ կիրառելով ՀՀ Ազգային Ժողովի կողմից 26.05.2011 թվականին ընդունված <<Համաներում հայտարարելու մասին>> որոշման 6-րդ կետի 2-րդ ենթակետը:
Վահան Ռուբենի Գյուլամիրյանցի նկատմամբ ընտրված խափանման միջոցը` ստորագրություն չհեռանալու մասին վերացնել, որոշումն օրինական ուժի մեջ մտնելու պահից:
Քրեական գործով իրեղեն ապացույց ճանաչված Վահան Ռուբենի Գյուլամիրյանցի անվամբ UA 039376 համարի վարորդական իրավունքի կեղծ վկայականը թողնել քրեական գործին կցված:
Քրեական գործով ապացույց ճանաչված այլ փաստաթուղթ հանդիսացող` թիվ 799934 և 834404 արձանագրությունները թողնել քրեական գործին կցված:
Որոշումը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում:


ԴԱՏԱՎՈՐ` Ա.ԲԵԿԹԱՇՅԱՆ