գործ` ԵԿԴ/0084/01/11
Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Կենտրոն և Նորք-Մարաշ վարչական շրջանների
ընդհանուր իրավասության դատարանը

Նախագահությամբ դատավոր` Արմեն Բեկթաշյանի
քարտուղարությամբ` Լուսինե Ղամբարյանի
մասնակցությամբ` մեղադրող` Վիգեն Միլիտոնյանի
պաշտպան` Համազասպուհի Գրիգորյանի
թարգմանիչ` Թադևոս Պասկևիչյանի

2011 թվականի հուլիսի 22-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի`

Խոսե Պոնսե Սանչեսի` ծնված 05.02.1970 թվականին Իսպանիայի Թագավորության Սեվիլիա քաղաքում, ազգությամբ իսպանացի, Իսպանիայի Թագավորության քաղաքացի, միջնակարգ կրթությամբ, ամուսնալուծված, խնամքին 2 անձ, նախկինում չդատված, անհատ ձեռներեց, հաշվառված է Իսպանիայի Թագավորության Սևիլիա քաղաքի Վասկո Դե Գամա փողոցի 149 տանը, կալանքի տակ է 05.11.2010 թվականից:

Խոսե Պոնսե Սանչեսը մեղադրվում է ՀՀ քրեական օրենսգրքի 266 հոդվածի 3-րդ մասի 2-րդ կետով և ՀՀ քրեական օրենսգրքի 34-215 հոդվածի 2-րդ մասով:
06.11.2010 թվականի որոշմամբ Խոսե Պոնսե Սանչեսի նկատմամբ որպես խափանման միջոց է ընտրվել կալանավորումը:

Գործի դատավարական նախապատմությունը.

ՙԿանալ 2010՚ կանխարգելիչ օպերատիվ-հետախուզական միջոցառումների շնորհիվ 2010 թվականի նոյեմբերի 05-ին, ժամը 0630-ի սահմաններում Երևան քաղաքի մարզահամերգային համալիրի մոտից ՀՀ ոստիկանության կազմակերպված հանցավորության դեմ պայքարի գլխավոր վարչություն բերման է ենթարկվել Իսպանիայի քաղաքացի 05.02.1970 թվականին ծնված, Իսպանիայի Սևիլիա քաղաքի Վասկո Դե Գամա փողոցի 149 տան բնակիչ Խոսե Պոնսե Սանչեսը` իր ճամպրուկով, որի հատակի և կողային պատերի բացվածքի միջից հայտնաբերվել և առգրավվել է մոտ 974,55 գրամ քաշով սպիտակ գույնի ՙԱմֆիտամին՚ տեսակի թմրամիջոցի նմանվող փոշենման զանգված:
ՀՀ ոստիկանության քննչական գլխավոր վարչության հատկապես կարևոր գործերի քննության վարչությունում 2010 թվականի նոյեմբերի 05-ին ՀՀ քրեական օրենսգրքի 266 հոդվածի 3-րդ մասի 2-րդ կետով հարուցվել է թիվ 69107710 քրեական գործը:
2010 թվականի նոյեմբերի 05-ին Խոսե Պոնսե Սանչեսը ՀՀ քրեական օրենսգրքի 266 հոդվածի 3-րդ մասի 2-րդ կետով նախատեսված հանցագործություն կատարելու կասկածանքով ձերբակալվել է:
Նախաքննական մարմնի կողմից 2010 թվականի նոյեմբերի 06-ին որոշում է կայացվել թիվ 69107710 քրեական գործով Խոսե Պոնսե Սանչեսին` ՀՀ քրեական օրենսգրքի 266 հոդվածի 3-րդ մասի 2-րդ կետով, որպես մեղադրյալ ներգրավվելու մասին և նույն օրը նրա նկատմամբ որպես խափանման միջոց է ընտրվել կալանավորումը:
Համաձայն ՀՀ ոստիկանության կազմակերպված հանցավորության դեմ պայքարի գլխավոր վարչության պետի տեղակալ Ն.Մնացականյանի կողմից 2010 թվականի դեկտեմբերի 06-ին տրված թիվ 4520 գրության` ձեռնարկված օպերատիվ-հետախուզական միջոցառումների արդյունքում պարզվել է, որ 03.11.2010 թվականին Խոսե Պոնսե Սանչեսին ՙմետամֆետամին՚ տեսակի թմրամիջոցը իրացրել է Իրանի Իսլամական Հանրապետության քաղաքացի Սեյեդհոսսեին Նիարակին: Վերջինս Հայաստանի Հանրապետությունում է գտնվել 22.09.2010 թվականից մինչև 22.09.2010 թվականը, 26.10.2010 թվականից մինչև 03.11.2010 թվականը և 2010 թվականի դեկտեմբերի 10-ի թիվ 4582 գրության համաձայն` Հոսսեին Նիարակին 03.11.2010 թվականին, ժամը 2059-ին հատել է Մեղրիի անցակետը:
2011 թվականի մարտի 23-ի որոշմամբ Սեյեդհոսսեին Սեյեդմոհամմադի Հոսսեինի Նիարակին ՀՀ քրեական օրենսգրքի 266 հոդվածի 3-րդ մասի 2-րդ կետով և ՀՀ քրեական օրենսգրքի 215 հոդվածի 2-րդ մասով ներգրավվել է որպես մեղադրյալ: Նույն օրը նրա նկատմամբ հայտարարվել է հետախուզում և որպես խափանման միջոց է ընտրվել կալանավորումը:
2011 թվականի մարտի 31-ի որոշմամբ Խոսե Պոնսե Սանչեսին` ՀՀ քրեական օրենսգրքի 266 հոդվածի 3-րդ մասի 2-րդ կետով առաջադրված մեղադրանքը փոփոխվել ու լրացվել է և նրան նոր մեղադրանք է առաջադրվել ՀՀ քրեական օրենսգրքի 266 հոդվածի 3-րդ մասի 2-րդ կետով և ՀՀ քրեական օրենսգրքի 34-215 հոդվածի 2-րդ մասով:
2011 թվականի ապրիլի 13-ի որոշմամբ Խոսե Պոնսե Սանչեսին` ՀՀ քրեական օրենսգրքի 266 հոդվածի 3-րդ մասի 2-րդ կետով և ՀՀ քրեական օրենսգրքի 34-215 հոդվածի 2-րդ մասով առաջադրված մեղադրանքը փոփոխվել է և նրան մեղադրանք է առաջադրվել ՀՀ քրեական օրենսգրքի 266 հոդվածի 3-րդ մասի 2-րդ կետով և ՀՀ քրեական օրենսգրքի 34-215 հոդվածի 2-րդ մասով:
2011 թվականի ապրիլի 13-ին որոշում է կայացվել թիվ 69107710 քրեական գործից Սեյեդհոսսեին Սեյեդմոհամմադի Հոսսեինի Նիարակիի կողմից 2010 թվականի նոյեմբերի 03-ին, ժամը 1400-ի սահմաններում մաքսանենգ ճանապարհով ՀՀ տեղափոխված ճամպրուկը, թաքստոցում պահվող առանձնապես խոշոր չափերի ՙմետամֆետամին՚ տեսակի թմրամիջոցի պարունակությամբ Խոսե Պոնսե Սանչեսին ապօրինի իրացնելու մասն առանձին վարույթում անջատելու վերաբերյալ, անջատված մասին տրվել է 69107710/1 համարը:
Խոսե Պոնսե Սանչեսին` ՀՀ քրեական օրենսգրքի 266 հոդվածի 3-րդ մասի 2-րդ կետով և ՀՀ քրեական օրենսգրքի 34-215 հոդվածի 2-րդ մասով մեղադրանք է առաջադրվել այն բանի համար, որ նա իրացնելու նպատակով ապօրինի ձեռք է բերել և պահել առանձնապես խոշոր չափերով թմրամիջոց, ինչպես նաև փորձել է Հայաստանի Հանրապետության մաքսային սահմանով առանց մաքսային հսկողության թմրամիջոցներ տեղափոխելով կատարել մաքսանենգություն, սակայն իր կամքից անկախ հանգամանքներով հանցագործությունն ավարտին չի հասցրել.
Իսպանիայի թագավորության քաղաքացի` Խոսե Պոնսե Սանչեսը, թմրամիջոցների ապօրինի շրջանառությամբ զբաղվող իսպանացի Ռոմերո Վերգաս Մերխիոյի կողմից հավաքագրվել է Հայաստանի Հանրապետությունից Իսպանիայի Թագավորությունում իրացնելու նպատակով առանձնապես խոշոր չափերի ՙմետամֆետամին՚ տեսակի թմրամիջոց փոխադրելու համար: Այդ նպատակով Խոսե Պոնսե Սանչեսը 2010 թվականի նոյեմբերի 02-ի Բարսելոնա-Մոսկվա-Երևան չվերթով, նոյեմբերի 03-ին ժամանել է Երևան և իր հետ ունենալով նոյեմբերի 05-ին հետադարձ չվերթի ուղետոմսերը, ժամանակավորապես բնակվել է նախապես պատվիրված ՙԱնի Պլազա՚ հյուրանոցի թիվ 807 սենյակում: Նույն օրը, ժամը 1346-ին, Խոսե Պոնսե Սանչեսը պայմանավորվածության համաձայն դուրս է եկել ՙԱնի Պլազա՚ հյուրանոցի կենտրոնական մուտքից, քայլելով մոտեցել մուտքից դեպի աջ` մոտ տասը մետր հեռավորության վրա կանգնած, գործով մեղադրյալ, հետախուզման մեջ գտնվող, Իրանի Իսլամական Հանրապետության քաղաքացի Սեյեդհոսսեին Սեյեդմոհամմադի Հոսսեինի Նիարակիին, գրկախառնվել նրան, որից հետ նույն վայրում կանգնեցրել են պատահական` գործով չպարզված տաքսի ավտոմեքենա և նստելով ավտոմեքենան միասին հեռացել են: Նույն օրը, ժամը 1403-ին, գործով վկա Հայկ Լենսերի Աբրահամյանի թիվ 1 տաքսի ծառայությանը պատկանող ավտոմեքենայով Խոսե Պոնսե Սանչեսը վերադարձել է հյուրանոց, կայանել կենտրոնական մուտքի դիմաց, ապա առջևի նստատեղից իջնելով բացել է ավտոմեքենայի հետևի դուռը, նստատեղից վերցրել Սեյեդհոսսեին Սեյեդմոհամմադի Հոսսեինի Նիարակիի կողմից արդեն իսկ իրեն փոխանցված ճամպրուկը` թաքստոցում պահվող առանձնապես խոշոր չափերի ՙմետամֆետամին՚ տեսակի թմրամիջոցի պարունակությամբ և բարձրացել թիվ 807 սենյակ: Հյուրանոցի համարում Խոսե Պոնսե Սանչեսն Իսպանիայից իր հետ բերած ճամպրուկում դրված իրերը տեղադրել է իրեն փոխանցված` ՙմետամֆետամինի՚ պարունակությամբ դատարկ ճամպրուկի մեջ, իսկ իրենը` կասկածանքի տեղիք չտալու համար պատռել է և տվել հարկի սպասուհի` գործով վկա Գոհար Հրաչիկի Մելքոնյանին: Ժամը 1418-ին, Խոսե Պոնսե Սանչեսը իր մոտ գտնվող` Սեյեդհոսսեին Սեյեդմոհամմադի Հոսսեինի Նիարակիի կողմից փոխանցած ՙՍիմենս A՚ տեսակի բջջային հեռախոսում տեղադրված 099-51-96-79 հեռախոսահամարին իրանական 989329568003 հեռախոսահամարից զանգահարել է Իրանում թմրամիջոցների ապօրինի շրջանառությամբ զբաղվող ոմն Թոմասը, որը 8 րոպե 30 վայրկյան տևողությամբ զրուցել է նրա հետ, տեղեկացել իրացնելու նպատակով թմրամիջոցի ձեռք բերման և դրա հետագա փոխադրման մանրամասներին: Հաջորդ օրը` 2010 թվականի նոյեմբերի 05-ին, կեսգիշերից հետո, մինչև հետադարձ չվերթով մեկնելը, Ռոմերո Վերգաս Մերխիոյի կողմից օգտագործվող 34637144807 և իսպանական 34954634011 ու 34954636232 հեռախոսահամարներից համապատասխանաբար` ժամը 0153-ին, 0154-ին, 0206-ին և 0224-ին նախազգուշացնող հեռախոսազանգեր ստանալուց հետո, Խոսե Պոնսե Սանչեսը ՙԶվարթնոց՚ օդանավակայան գնալու փոխարեն, գործով վկա Հայրիկ Համայակի Ենոքյանին պատկանող տաքսի ավտոմեքենայով փորձել է մեկնել Թբիլիսի, սակայն իր կամքից անկախ հանգամանքներով հանցագործությունն ավարտին չի կարողացել հասցնել, քանի որ ՀՀ ոստիկանության ԿՀԴՊ ԳՎ աշխատակիցները, իրացնելով Մոսկվայում Իտալիայի դեսպանատնից 2010 թվականի նոյեմբերի 04-ին ստացված` Խոսե Պոնսե Սանչեսի վերաբերյալ օպերատիվ տեղեկությունները, ճանապարհից թմրամիջոց իրացնելու կասկածանքով վերջինիս բերման են ենթարկել 6-րդ վարչություն, որտեղ էլ ճամպրուկի զննությամբ հայտնաբերել են իրացնելու նպատակով փոխադրվող` առանձնապես խոշոր չափերի` 974,55 գրամ ՙմետամֆետամին՚ տեսակի թմրամիջոցը:
04.05.2011 թվականին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան:

Ապացույցների հետազոտում և գնահատում.

Ամբաստանյալ` Խոսե Պոնսե Սանչեսը ՀՀ քրեական օրենսգրքի 266 հոդվածի 3-րդ մասի 2-րդ կետով և ՀՀ քրեական օրենսգրքի 34-215 հոդվածի 2-րդ մասով առաջադրված մեղադրանքներում իրեն մեղավոր ճանաչեց մասնակիորեն, դատաքննության ընթացքում հրաժարվեց ցուցմունք տալուց և հարցերին պատասխանելուց, սակայն հայտնեց, որ ինքը չի իմացել, որ ճամպրուկում թմրանյութ կա, ներողություն է խնդրում Հայաստանից, կատարածի համար զղջում է:
Ամբաստանյալ Խոսե Պոնսե Սանչեսի կատարած հանցանքները` ՀՀ քրեական օրենսգրքի 266 հոդվածի 3-րդ մասի 2-րդ կետով և ՀՀ քրեական օրենսգրքի 34-215 հոդվածի 2-րդ մասով, հիմնավորվել են նաև հետևյալ ապացույցներով.
Վկա` Գոհար Հրաչիկի Մելքոնյանի ցուցմունքով այն մասին, որ շուրջ տասը տարի է աշխատում է ՙԱնի Պլազա Հոթել՚ ՓԲ ընկերությունում` որպես սպասուհի և սպասարկում է հյուրանոցի 8-րդ հարկը: 2010 թվականի նոյեմբերի 3-ին, ժամը 0800-ից գտնվել է աշխատանքի վայրում, սպասարկել հյուրանոցի 8-րդ հարկը և նկատել է, թե ինչպես է հյուրանոցի 807 սենյակը տրամադրվել հյուրի` ամբաստանյալին: Ինքն այդ հյուրի մոտ որևէ մարդու չի տեսել, նաև չի նկատել, թե նա հյուրանոցից դուրս եկել է, թե ոչ: Օրվա ընթացքում, ստույգ ժամը չի հիշում, նշված սենյակի հյուրը դուրս է եկել միջանցք և մոտենալով իրեն տվել է ձեռքում եղած ճամպրուկը` հասկացնելով, որ այն պետք է դեն նետել: Ինքը վերցնելով ճամպրուկը և տեսնելով, որ միայն շղթան է պոկված, այն դրել է իր սենյակում: Դրանից հետո ինքը հյուրին այլևս չի տեսել: Նախաքննության ընթացքում ինքը ճամպրուկը ներկայացրել է քննիչին:
Վկա` Հայկ Լենսերի Աբրահամյանի ցուցմունքով այն մասին, որ 2003 թվականի ապրիլ ամսից աշխատում է թիվ 1 տաքսի ծառայությունում` որպես վարորդ: 2010 թվականի նոյեմբերի 03-ին, ժամը 14-ի սահմաններում, իրեն ամրակցված ՙՇկոդա՚ մակնիշի 3440 պետհամարանիշի ավտոմեքենայով Երևան քաղաքի Աբովյան-Բուզանդ փողոցների հատման խաչմերուկի մոտով անցնելիս, իրեն կանգնեցրել են երկու տղամարդ, որոնցից մեկի ձեռքում եղել է սև գույնի ճամպրուկ: Ինքն աջ ընդունելով կանգնել է, ճամպրուկով տղամարդը բացել է իր կողքի դուռը, իրեն է տվել մի թուղթ, որի վրա հայերեն տառերով գրված է եղել ՙԱնի Պլազա՚: Ինքը հասկանալով, որ այդ տղամարդն օտարերկրացի է և ցանկանում է գնալ ՙԱնի Պլազա՚ հյուրանոց, գլխի շարժումով հասկացրել է նրան, որ կարող է նստել ավտոմեքենան, որից հետո վերջինս ճամպրուկը դրել է հետևի նստատեղին, նստել իր կողքի նստատեղին և իրենք շարժվել են դեպի ՙԱնի Պլազա՚ հյուրանոց: Հյուրանոցի մուտքի դռան մոտ հասնելով ուղևորը 600 ՀՀ դրամ գումար վճարելով իջել է ավտոմեքենայից, մտել հյուրանոց, ինքն էլ հեռացել է այնտեղից:
Վկա` Հայրիկ Համայակի Ենոքյանի ցուցմունքով այն մասին, որ թոշակառու է և նյութական կարիքները բավարարելու համար երբեմն իր անձնական ավտոմեքենան վարում է` որպես տաքսի ավտոմեքենա` հիմնականում Երևան քաղաքի ՙՍասունցի Դավիթ՚ կայարանից հաճախորդներ է տեղափոխում դեպի Թբիլիսի: Այդ նպատակով կայարանի ավտոկայանի աշխատակիցներին է տվել իր տան հեռախոսահամարը, որպեսզի հաճախորդ լինելու դեպքում զանգահարեն և տեղյակ պահեն իրեն: 2010 թվականի նոյեմբերի 03-ին, ժամը 05-ի սահմաններում իրեն է զանգահարել կայարանի ավտոկայանի աշխատիցներից մեկը, որի անունը չգիտի, և հայտնել, որ Թբիլիսի մեկնող հաճախորդ կա: Ինքն ասել է, որ նրան կտանի Թբիլիսի, ապա անմիջապես հագել է հագուստը և տանից դուրս եկել, գնացել է կայարան, որտեղ` ավտոկայանի աշխատակցի մոտ տեսել է մի արտասահմանցու, որին էլ ինքը պետք է տեղափոխեր Վրաստան: Համաձայնության են եկել, որ նրան 45.000 ՀՀ դրամ գումարով կտանի Վրաստան, որից հետո այդ տղամարդը իր մոտ եղած ճամպրուկը դրել է ավտոմեքենայի բեռնախցիկը, նստել իր կողքի նստատեղին և ուղևոևվել են դեպի Վրաստան: Բենզին լիցքավորելու նպատակով, ճանապարհին` մարզահամերգային համալիրի շենքի հարևանությամբ գտնվող բենզալցակայանում կանգնել է, այդ ժամանակ իրենց են մոտեցել ոստիկանության աշխատակիցներ և հրավիրել 6-րդ վարչություն, որտեղ էլ ինքը տեղեկացել է, որ ուղևորի ճամպրուկում մոտ մեկ կիլոգրամ թմրանյութ է հայտնաբերվել:
Դատաքիմիական փորձաքննության թիվ 643 Ք եզրակացության համաձայն` փորձաքննության ներկայացված 974,55 գրամ քաշով սպիտակ գույնի փոշենման նյութում հայտնաբերվեց ՙմետամֆետամին՚ տեսակի թմրամիջոց, հիդրոքլորիդի տեսքով: Նյութում մետամֆետամինի քաշը կազմում է 783 գրամ: Փորձաքննության ներկայացված թվով 10 հատ պոլիմերային կտորների վրա հայտնաբերվեցին մետամֆետամին տեսակի թմրամիջոցի հետքեր: (Ներկայացված 974,55 գրամ քաշով մետամֆետամինից ծախսվեց 0,5 գրամ):
Դատաքիմիական փորձաքննության Հմ` 0889 եզրակացության համաձայն` 05.11.2010 թվականին Խոսե Պոնսե Սանչեսի մեզի փորձանմուշում հայտնաբերվեցին կանաբիսի թմրամիջոցների թմրալկալոիդները և ֆենիլալկիլամինների խմբի մետամֆետամինի հետքերը:
2010 թվականի նոյեմբերի 10-ին ՙԱնի Պլազա Հոթել՚ ՓԲ ընկերության անվտանգության բաժնից առգրավված լազերային ՙCD՚ սկավառակը զննելու մասին արձանագրությամբ այն մասին, որ Խոսե Պոնսե Սանչեսը 2010 թվականի նոյեմբերի 3-ին, ժամը 1346-ին դուրս է եկել ՙԱնի Պլազա Հոթել՚ ՓԲ ընկերության կենտրոնական մուտքից, քայլելով մոտեցել է մուտքից դեպի աջ, մոտավորապես տասը մետր հեռավորության վրա կանգնած մի տղամարդու, գրկախառնվել նրան, որից հետո երկուսով կայնգնեցրել են տաքսի ավտոմեքենա, նստել ու հեռացել: Ժամը 1403-ին հյուրանոցի կենտրոնական մուտքի դիմաց կայանել է մեկ այլ տաքսի ավտոմեքենա, որի առջևի նստատեղից իջել է Խոսե Պոնսե Սանչեսը, բացել ավտոմեքենայի հետևի դուռը, նստատեղից վերցրել ճամպրուկ և մտել հյուրանոց:
Իրեղեն ապացույց հանդիսացող 974,05 գրամ քաշով ՙմետամֆետամին՚ տեսակի թմարմիջոցով և թվով տասը հատ պոլիմերային կտորներով:
Անձին լուսանկարներով ճանաչման ներկայացնելու մասին արձանագրությամբ այն մասին, որ վկա Հայկ Լենսերի Աբրահամյանը անձանց լուսանկարները զննելուց հետո ճանաչել է 4-րդ համարի տակ փակցված լուսանկարով Սեյեդհոսսեին Սեյեդմոհամմադի Հոսսեինի Նիարակին, որը հանդիսանում է այն անձանցից մեկը, որոնք 2010 թվականի նոյեմբերի 3-ին, ժամը 14-ի սահմաններում Երևան քաղաքի Աբովյան-Բուզանդ փողոցների խաչմերուկում կանգնեցրել են իրեն, լուսանկարում պատկերված անձը և մեկ ուրիշ տղամարդ գրկախառնվել են, որից հետո մյուս տղամարդը ճամպրուկով նստել է իր ավտոմեքենայի մեջ, որին ինքը տեղափոխել է Անի հյուրանոց:
Անձին լուսանկարներով ճանաչման ներկայացնելու մասին արձանագրությամբ այն մասին, որ մեղադրյալ Խոսե Պոնսե Սանչեսը անձանց լուսանկարները զննելուց հետո ճանաչել է 2-րդ համարի տակ փակցված լուսանկարով Սեյեդհոսսեին Սեյեդմոհամմադի Հոսսեինի Նիարակին, որը հանդիսանում է այն անձը, ով իրեն է փոխանցել ճապրուկը:
Դատարանը, հետազոտելով քրեական գործով ձեռք բերված ապացույցները և գնահատելով դրանց վերաբերելիության, թույլատրելիության, իսկ ամբողջ ապացույցներն իրենց համակցությամբ գործի լուծման համար բավարարության տեսանկյունից, հանգում է այն հետևության, որ ամբաստանյալ Խոսե Պոնսե Սանչեսի պատճառաբանությունները` կատարած հանցավոր արարքներում` ՀՀ քրեական օրենսգրքի 266 հոդվածի 3-րդ մասի 2-րդ կետով և 34-215 հոդվածի 2-րդ մասով, իրեն մասնակի մեղավոր ճանաչելը, նպատակ է հետապնդում խույս տալ քրեական պատասխանատվությունից ու նրա հայտարարությունն այն մասին, թե ինքը չի իմացել, որ ճամպրուկում թմրանյութ կա, արժանահավատ չէ, նպատակ է հետապնդում խույս տալ քրեական պատասխանատվությունից և նրա հայտարարությունը հերքվում է ինչպես վկաների ցուցմունքով, այնպես էլ հեռախոսային խոսակցությունների վերածումներով, ՙԱնի Պլազա Հոթել՚ ՓԲ ընկերության անվտանգության բաժնից առգրավված լազերային ՙCD՚ սկավառակը զննելու մասին արձանագրությամբ:
Դատաքննությամբ հիմնավորվեց, որ Իսպանիայի թագավորության քաղաքացի` ամբաստանյալ Խոսե Պոնսե Սանչեսը, թմրամիջոցների ապօրինի շրջանառությամբ զբաղվող իսպանացի Ռոմերո Վերգաս Մերխիոյի կողմից հավաքագրվել է Հայաստանի Հանրապետությունից Իսպանիայի Թագավորությունում իրացնելու նպատակով առանձնապես խոշոր չափերի ՙմետամֆետամին՚ տեսակի թմրամիջոց փոխադրելու համար: Այդ նպատակով ամբաստանյալ Խոսե Պոնսե Սանչեսը 2010 թվականի նոյեմբերի 02-ի Բարսելոնա-Մոսկվա-Երևան չվերթով, նոյեմբերի 03-ին ժամանել է Երևան և իր հետ ունենալով նոյեմբերի 05-ին հետադարձ չվերթի ուղետոմսը, ժամանակավորապես բնակվել է նախապես պատվիրված ՙԱնի Պլազա Հոթել՚ ՓԲ ընկերության հյուրանոցի թիվ 807 սենյակում: Նույն օրը, ժամը 1346-ին, ամբաստանյալ Խոսե Պոնսե Սանչեսը պայմանավորվածության համաձայն դուրս է եկել ՙԱնի Պլազա Հոթել՚ ՓԲ ընկերության հյուրանոցի գլխավոր մուտքից, քայլելով մոտեցել մուտքից դեպի աջ` մոտ տասը մետր հեռավորության վրա կանգնած, գործով մեղադրյալ, հետախուզման մեջ գտնվող, Իրանի Իսլամական Հանրապետության քաղաքացի Սեյեդհոսսեին Սեյեդմոհամմադի Հոսսեինի Նիարակիին, գրկախառնվել նրան, որից հետ միասին կանգնեցրել են պատահական` գործով չպարզված տաքսի ավտոմեքենա և նստելով ավտոմեքենան երկուսով հեռացել են այնտեղից: Նույն օրը ժամը 1400-ի սահմաններում Խ.Սանչեսը և Ս.Նիարակին Երևան քաղաքի Աբովյան-Բուզանդ փողոցների հատման խաչմերուկի մոտ կանգնեցրել են թիվ 1 տաքսի ծառայությանը պատկանող գործով վկա Հայկ Լենսերի Աբրահամյանին ամրակցված ՙՇկոդա՚ մակնիշի 3440 պետհամարանիշի տաքսի ավտոմեքենան, Խ.Սանչեսը մոտեցել է ավտոմեքենայի վարորդին, տվել մի թուղթ, որի վրա հայերեն տառերով գրված է եղել ՙԱնի Պլազա՚: Վկա Հ.Աբրահամյանը հասկանալով, որ այդ տղամարդիկ օտարերկրացիներ են, գլխի շարժումով հասկացրել է նրանց, որ կարող են նստել ավտոմեքենան, որից հետո Խ.Սանչեսը իր ձեռքում եղած ճամպրուկը դրել է հետևի նստատեղին, նստել իր կողքի նստատեղին, ինքը նստել վարորդի կողքի նստատեղին նրանք շարժվել են դեպի ՙԱնի Պլազա՚ հյուրանոց: Հյուրանոցի մուտքի դռան մոտ հասնելով Խոսե Պոնսե Սանչեսը ավտոմեքենայի առջևի նստատեղից իջնելով բացել է ավտոմեքենայի հետևի դուռը, նստատեղից վերցրել Սեյեդհոսսեին Սեյեդմոհամմադի Հոսսեինի Նիարակիի կողմից արդեն իսկ իրեն փոխանցված ճամպրուկը` թաքստոցում պահվող առանձնապես խոշոր չափերի ՙմետամֆետամին՚ տեսակի թմրամիջոցի պարունակությամբ և բարձրացել թիվ 807 սենյակ: Հյուրանոցի համարում Խոսե Պոնսե Սանչեսն Իսպանիայից իր հետ բերած ճամպրուկում դրված իրերը տեղադրել է Ս.Նիարակիի կողմից իրեն փոխանցված` ՙմետամֆետամինի՚ պարունակությամբ դատարկ ճամպրուկի մեջ և կասկածանքի տեղիք չտալու համար իր ճամպրուկի շղթան պոկել ու տվել է հարկի սպասուհի` գործով վկա Գոհար Հրաչիկի Մելքոնյանին: Ժամը 1418-ին, իրանական 989329568003 հեռախոսահամարից Խոսե Պոնսե Սանչեսի մոտ գտնվող` Սեյեդհոսսեին Սեյեդմոհամմադի Հոսսեինի Նիարակիի կողմից փոխանցած ՙՍիմենս A՚ տեսակի բջջային հեռախոսում տեղադրված 099-51-96-79 հեռախոսահամարին է զանգահարել Իրանում թմրամիջոցների ապօրինի շրջանառությամբ զբաղվող քննությամբ չպարզված ոմն Թոմասը, որը 8 րոպե 30 վայրկյան տևողությամբ զրուցել է նրա հետ, տեղեկացել իրացնելու նպատակով թմրամիջոցի ձեռք բերման և դրա հետագա փոխադրման մանրամասներին: Հաջորդ օրը` 2010 թվականի նոյեմբերի 05-ին, կեսգիշերից հետո, մինչև հետադարձ չվերթով մեկնելը, Ռոմերո Վերգաս Մերխիոյի կողմից օգտագործվող 34637144807 և իսպանական 34954634011 ու 34954636232 հեռախոսահամարներից համապատասխանաբար` ժամը 0153-ին, 0154-ին, 0206-ին և 0224-ին նախազգուշացնող հեռախոսազանգեր ստանալուց հետո, Խոսե Պոնսե Սանչեսը ՙԶվարթնոց՚ օդանավակայան գնալու փոխարեն, գնացել է Երևան քաղաքի ՙՍասունցի Դավիթ՚ կայարան, որտեղից էլ գործով վկա Հայրիկ Համայակի Ենոքյանին պատկանող տաքսի ավտոմեքենայով փորձել է մեկնել Թբիլիսի քաղաք, սակայն իր կամքից անկախ հանգամանքներով հանցագործությունն ավարտին չի կարողացել հասցնել, քանի որ ՀՀ ոստիկանության կազմակերպված հանցավորության դեմ պայքարի գլխավոր վարչության աշխատակիցները, իրացնելով Մոսկվայում Իտալիայի դեսպանատնից 2010 թվականի նոյեմբերի 04-ին ստացված` Խոսե Պոնսե Սանչեսի վերաբերյալ օպերատիվ տեղեկությունները, ճանապարհից` մարզահամերգային համալիրի հարևանությամբ գտնվող բենզալցակայանից, թմրամիջոց իրացնելու կասկածանքով վերջինիս և գործով վկա Հայրիկ Համայակի Ենոքյանին բերման են ենթարկել 6-րդ վարչություն, որտեղ էլ վարորդի և ընթերակաների մասնակցությամբ Խ.Սանչեսի ճամպրուկի զննությամբ` հատակի և կողային պատերի բացվածքի միջից հայտնաբերվել են առանձնապես խոշոր չափերի` 974,55 գրամ ՙմետամֆետամին՚ տեսակի թմրամիջոցը:

Դատարանի իրավական վերլուծությունները.

Այսպիսով, ընդհանուր կարգով սահմանված դատաքննությամբ հետազոտված ապացույցների հիման վրա դատարանն ապացուցված է համարում, որ ամբաստանյալ Խոսե Պոնսե Սանչեսը իրացնելու նպատակով ապօրինի ձեռք է բերել և պահել առանձնապես խոշոր չափերով թմրամիջոց, ինչպես նաև փորձել է Հայաստանի Հանրապետության մաքսային սահմանով առանց մաքսային հսկողության թմրամիջոցներ տեղափոխելով կատարել մաքսանենգություն, սակայն իր կամքից անկախ հանգամանքներով հանցագործությունն ավարտին չի հասցրել` որպիսի արարքների համար նա պետք է պատասխանատվության ենթարկվի ՀՀ քրեական օրենսգրքի 266 հոդվածի 3-րդ մասի 2-րդ կետով և ՀՀ քրեական օրենսգրքի 34-215 հոդվածի 2-րդ մասով:
ՀՀ քրեական օրենսգրքի 61-րդ հոդվածի 2-րդ մասի համաձայն` պատժի չափը և տեսակը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով:
Ամբաստանյալ Խոսե Պոնսե Սանչեսը նախկինում դատապարտված չի եղել:
Պատասխանատվությունը և պատիժը մեղմացնող ու ծանրացնող հանգամանքներ չկան:
Դատարանը գտնում է, որ Խոսե Պոնսե Սանչեսի անձնական խուզարկությամբ հայտնաբերված և ՀՀ ոստիկանության ՔԳՎ ՀԿԳ քննության վարչության իրեղեն ապացույցների սենյակում պահվող Խ.Սանչեսին պատկանող գույքի` ՙՍամսունգ E 250 I՚ և ՙՍիմենս A 70՚ տեսակի բջջային հեռախոսների, հեռախոսաքարտերի, երկու հատ սպիտակ գույնի մետաղից ապարանջանների, երկու հատ սպիտակ գույնի մետաղից մատանիների, սպիտակ գույնի մետաղից պարանոցի շղթայի, սպիտակ գույնի մետաղից պարանոցի շղթայից և խաչի, ՙFIVA՚ տեսակի ձեռքի ժամացույցի, երեք հատ 500 եվրո թղթադրամների վրա 12.04.2011 թվականի որոշմամբ դրված կալանքը` դատավճիռն օրինական ուժի մեջ մտնելու պահից պետք է վերացնել և գույքը պետք է վերադարձնել Խոսե Սանչեսին:
Դատարանը քննարկելով ամբաստանյալի նկատմամբ ընտրված խափանման միջոցի և իրեղեն ապացույցի հարցերը, գտնում է, որ ամբաստանյալ Խոսե Պոնսե Սանչեսի նկատմամբ ընտրված խափանման միջոցը` կալանավորումը, պետք է թողնել անփոփոխ, քրեական գործով ապացույց ճանաչված` Մոսկվայում Իտալիայի դեսպանատնից ուղարկված փաստաթղթերը պետք է թողնել քրեական գործին կցված, իսկ քրեական գործով իրեղեն ապացույց ճանաչված և քրեական գործին կցված 974,05 գրամ ՙմետամֆետամին՚ տեսակի թմրամիջոցը և թվով 10 հատ պոլիմերային կտորները պետք է ոչնչացնել:

Եզրափակիչ մաս.

Ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց`

Խոսե Պոնսե Սանչեսին մեղավոր ճանաչել ՀՀ քրեական օրենսգրքի 266 հոդվածի 3-րդ մասի 2-րդ կետով և ՀՀ քրեական օրենսգրքի 34-215 հոդվածի 2-րդ մասով և նրան ՀՀ քրեական օրենսգրքի 266 հոդվածի 3-րդ մասի 2-րդ մասով դատապարտել ազատազրկման` 9 /ինը/ տարի ժամկետով` առանց գույքի բռնագրավման, ՀՀ քրեական օրենսգրքի 34-215 հոդվածի 2-րդ մասով` ազատազրկման 4 /չորս/ տարի ժամկետով: ՀՀ քրեական օրենսգրքի 66 հոդվածի 4-րդ մասի կիրառմամբ ՀՀ քրեական օրենսգրքի 266 հոդվածի 3-րդ մասի 2-րդ կետով նշանակված 9 /ինը/ տարի ազատազրկմանը մասնակի գումարել ՀՀ քրեական օրենսգրքի 34-215 հոդվածի 2-րդ մասով նշանակված 4 /չորս/ տարի պատժից 1 /մեկ/ տարի ազատազրկումը և վերջնական պատիժ նշանակել ազատազրկում 10 /տասը/ տարի ժամկետով:
Խոսե Պոնսե Սանչեսի պատժի սկիզբը հաշվել 05.11.2010 թվականից, խափանման միջոցը` կալանավորումը, թողնել անփոփոխ:
Խոսե Պոնսե Սանչեսի անձնական խուզարկությամբ հայտնաբերված և ՀՀ ոստիկանության ՔԳՎ ՀԿԳ քննության վարչության իրեղեն ապացույցների սենյակում պահվող Խ.Սանչեսին պատկանող գույքի` ՙՍամսունգ E 250 I՚ և ՙՍիմենս A 70՚ տեսակի բջջային հեռախոսների, հեռախոսաքարտերի, երկու հատ սպիտակ գույնի մետաղից ապարանջանների, երկու հատ սպիտակ գույնի մետաղից մատանիների, սպիտակ գույնի մետաղից պարանոցի շղթայի, սպիտակ գույնի մետաղից պարանոցի շղթայից և խաչի, ՙFIVA՚ տեսակի ձեռքի ժամացույցի, երեք հատ 500 եվրո թղթադրամների վրա 12.04.2011 թվականի որոշմամբ դրված կալանքը` դատավճիռն օրինական ուժի մեջ մտնելու պահից վերացնել և գույքը վերադարձնել Խոսե Սանչեսին:
Քրեական գործով ապացույց ճանաչված` Մոսկվայում Իտալիայի դեսպանատնից ուղարկված փաստաթղթերը, թողնել քրեական գործին կցված:
Քրեական գործով իրեղեն ապացույց ճանաչված և քրեական գործին կցված 974,05 գրամ ՙմետամֆետամին՚ տեսակի թմրամիջոցը և թվով 10 հատ պոլիմերային կտորները` ոչնչացնել:
Սույն դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում:



ԴԱՏԱՎՈՐ` Ա. ԲԵԿԹԱՇՅԱՆ