ԵԿԴ/0079/01/11







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«23» մայիսի 2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ա.Մնացականյան
մեղադրող Վ.Հովհաննիսյան
պաշտպան Ն.Մեհրաբյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Կորյուն Դերենիկի Խալաթյանի` ծնված 1970 թվականի հունվարի 24-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, նախկինում չդատապարտված, չի աշխատում, հաշվառված է Երևան քաղաքի Նոր Արեշի 15-րդ փողոցի 9-րդ շենքի 19-րդ բնակարանում: Մեղադրանք է առաջադրվել ՀՀ քրեական օրենսգրքի 325-րդ հոդվածի 1-ին մասով, խափանման միջոց ընտրվել է ստորագրություն չհեռանալու մասին:
1. Գործի դատավարական նախապատմությունը.
2010 թվականի նոյեմբերի 23-ին ՀՀ ոստիկանության Նոր Նորքի քննչական բաժնի քննիչ Ն.Հարությունյանի որոշմամբ ՀՀ քրեական օրենսգրքի 325-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 17135210 քրեական գործը:
2010 թվականի դեկտեմբերի 10-ին ՀՀ ոստիկանության Կենտրոնականի քննչական բաժնի քննիչ Գ.Երիցյանի որոշմամբ թիվ 17135210 քրեական գործն ընդունվել է վարույթ:
2010 թվականի դեկտեմբերի 23-ին ՀՀ ոստիկանության քննչական գլխավոր վարչության ՀԿԳ քննության վարչության ՀԿԳ ավագ քննիչ Ղ.Գևորգյանի որոշմամբ թիվ 17135210 քրեական գործն ընդունվել է վարույթ:
2011 թվականի ապրիլի 14-ին ՀՀ ոստիկանության քննչական գլխավոր վարչության ՀԿԳ քննության վարչության ՀԿԳ ավագ քննիչ Ղ.Գևորգյանի որոշմամբ թիվ 17135210 քրեական գործով Դերենիկ Կորյունի Խալաթյանի նկատմամբ ՀՀ քրեական օրենսգրքի 325-րդ հոդվածով քրեական հետապնդում չի իրականցվել նրա արարքում հանցակազմի բացակայության հիմքով:

2011 թվականի ապրիլի 15-ին ՀՀ ոստիկանության քննչական գլխավոր վարչության ՀԿԳ քննության վարչության ՀԿԳ ավագ քննիչ Ղ.Գևորգյանի որոշմամբ թիվ 17135210 քրեական գործով Կորյուն Դերենիկի Խալաթյանին մեղադրանք է առաջադրվել ՀՀ քրեական օրենսգրքի 325-րդ հոդվածի 1-ին մասով:
2011 թվականի ապրիլի 18-ին ՀՀ ոստիկանության քննչական գլխավոր վարչության ՀԿԳ քննության վարչության ՀԿԳ ավագ քննիչ Ղ.Գևորգյանի որոշմամբ թիվ 17135210 քրեական գործից անջատվել է ոմն Արթուրի կողմից կեղծ ատեստատ իրացնելու վերաբերյալ մասը, որին շնորհվել է 17135210/1 համարը:
2011 թվականի ապրիլի 26-ին Կորյուն Դերենիկի Խալաթյանի վերաբերյալ քրեական գործը մեղադրական եզրակացությամբ ուղարկվել է Դատարան:
Կորյուն Դերենիկի Խալաթյանին մեղադրանք է առաջադրվել ՀՀ քրեական օրենսգրքի 325-րդ հոդվածի 1-ին մասով` այն արարքի համար, որ նա իր որդու` Դերենիկ Կորյունի Խալաթյանի համար 2010 թվականի հուլիս-օգոստոս ամիսներին, Երևան քաղաքի Կենտրոն վարչական շրջանի տարածքում` Վարդան Մամիկոնյանի արձանի մոտ, ժամը 17:00-ի սահմաններում ոմն Արթուրից, օգտագործելու նպատակով, 60.000 ՀՀ դրամ գումարով ձեռք է բերել իրավունք վերապահող պաշտոնական փաստաթուղթ հանդիսացող միջնակարգ (լրիվ) ընդհանուր կրթության ԱԱ479232 սերիական համարի կեղծ ատեստատ, որն էլ 2010 թվականի սեպտեմբերի 15-ին ներկայացրել է Երևանի ճարտարապետության և շինարարության պետական համալսարանի հեռակա ուսուցման համակարգի դիմորդների փաստաթղթեր ընդունող հանձնաժողովին` այդ կերպ օգտագործելով այն:
2. Արագացված դատական քննություն.
Մինչ դատաքննությունն սկսելն ամբաստանյալ Կորյուն Դերենիկի Խալաթյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Կորյուն Դերենիկի Խալաթյանը կատարել է արարք` նախատեսված ՀՀ քրեական օրենսգրքի 325-րդ հոդվածի 1-ին մասով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, բնութագիրը, ՀՀ ոստիկանության ինֆորմացիոն կենտրոնի պահանջագիրը, Դերենիկ Կորյունի Խալաթյանի և Սերժ Կորյունի Խալաթյանի անձնագրերի պատճենները, եկավ հետևյալ եզրահանգման.
Կորյուն Խալաթյանի անձը դրականորեն բնութագրող հանգամանքներ են ինքնախոստովանական ցուցմունքներ տալը և կատարածի համար զղջալը:
Կորյուն Խալաթյանի պատասխանատվությունն ու պատիժը մեղմացնող հանգամանք է խնամքին 14 տարին չլրացած (Սերժ Կորյունի Խալաթյան` ծնված 2000 թվականի նոյեմբերի 14-ին) և անչափահաս (Դերենիկ Կորյունի Խալաթյան` ծնված 1993 թվականի հուլիսի 10-ին) երեխաների առկայությունը:
Դատարանը գտնում է, որ Կորյուն Խալաթյանի պատասխանատվությունն ու պատիժը մեղմացնող հանգամանքներ պետք է դիտել նաև նախկինում արատավորված` դատապարտված չլինելը և դրականորեն բնութագրվելը:
Դատարանը միաժամանակ արձանագրում է, որ Կորյուն Խալաթյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Կորյուն Խալաթյանը ենթակա է քրեական պատասխանատվության և պատժի:
Դատարանը, հաշվի առնելով Կորյուն Խալաթյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պատիժ պետք է նշանակել տուգանքի ձևով:
Դատարանը գտնում է, որ Կորյուն Խալաթյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո` 2011 թվականի ապրիլի 8-ի որոշմամբ իրեղեն ապացույցներ ճանաչված` Դերենիկ Կորյունի Խալաթյանի անվամբ ԱԱ479232 սերիական համարով միջնակարգ (լրիվ) ընդհանուր կրթության ատեստատի և Երևանի ճարտարապետության և շինարարության պետական համալսարանի հեռակա ուսուցման համակարգի դիմորդների փաստաթղթերն ընդունող հանձնաժողովի կողմից կազմված թիվ 07017010 անձնական գործի հարցը պետք է թողնել լուծելու թիվ 17135210/1 քրեական գործով:
Դատարանը գտնում է, որ դատական ծախսերն ամբաստանյալ Կորյուն Խալաթյանից ենթակա չեն բռնագանձման, քանի որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախս սույն քրեական գործով չկա, իսկ 2-8-րդ կետերով նախատեսված դատական ծախսերն արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի, ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը

ՎՃՌԵՑ

Կորյուն Դերենիկի Խալաթյանին մեղավոր ճանաչել ՀՀ քրեական օրենսգրքի 325-րդ հոդվածի 1-ին մասվ և պատիժ նշանակել տուգանք` նվազագույն աշխատավաձի երկուհարյուրհիսնապատիկի չափով:
Կորյուն Դերենիկի Խալաթյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո` 2011 թվականի ապրիլի 8-ի որոշմամբ իրեղեն ապացույցներ ճանաչված` Դերենիկ Կորյունի Խալաթյանի անվամբ ԱԱ479232 սերիական համարով միջնակարգ (լրիվ) ընդհանուր կրթության ատեստատի և Երևանի ճարտարապետության և շինարարության պետական համալսարանի հեռակա ուսուցման համակարգի դիմորդների փաստաթղթերն ընդունող հանձնաժողովի կողմից կազմված թիվ 07017010 անձնական գործի հարցը թողնել լուծելու թիվ 17135210/1 քրեական գործով:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին մասի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ