ԵԿԴ/0074/01/11






ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

01.06.2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)` նախագահող դատավոր Մ.Պապոյան, քարտուղարությամբ Ռ.Ավետյանի, մասնակցությամբ մեղադրող Ա.Կարապետյանի, տուժողի ներկայացուցիչ Ն.Իսրաելյանի, ամբաստանյալ Ռազմիկ Սարգսի Խալաթյանի, պաշտպան Հ.Բաղդասարյանի, դռնբաց դատական նիստում քննելով քրեական գործն ըստ մեղադրանքի Ռազմիկ Սարգսի Խալաթյանի (ծնված 1976 թվականի հուլիսի 29-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, դատվածություն չունեցող, չի աշխատում, հաշվառված է Երևան քաղաքի Դավթաշենի 4-րդ թաղամասի 8-րդ շենքի 26-րդ բնակարանում, խափանման միջոց է ընտրվել ստորագրություն չհեռանալու մասին)` ՀՀ քրեական օրենսգրքի 258-րդ հոդվածի 2-րդ մասով

Պ Ա Ր Զ Ե Ց

2010 թվականի նոյեմբերի 25-ին ՀՀ ոստիկանության Կենտրոնականի քննչական բաժնի քննիչ Ս.Պետրոսյանի որոշմամբ ՀՀ քրեական օրենսգրքի 258-րդ հոդվածի 2-րդ մասով նախատեսված հանցագործության հատկանիշներով հարուցվել և վարույթ է ընդունվել թիվ 15108510 քրեական գործը:
2010 թվականի դեկտեմբերի 15-ին ՀՀ ոստիկանության Կենտրոնականի քննչական բաժնի քննիչ Ս.Պետրոսյանի որոշմամբ թիվ 15108510 քրեական գործով Ռազմիկ Սարգսի Խալաթյանին մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով:
2011 թվականի ապրիլի 13-ին ՀՀ ոստիկանության Կենտրոնականի քննչական բաժնի քննիչ Ս.Պետրոսյանի որոշմամբ թիվ 15108510 քրեական գործով Ռազմիկ Սարգսի Խալաթյանին առաջադրված մեղադրանքի ծավալը լրացվել է և նրան նոր մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով:
2011 թվականի ապրիլի 13-ին ՀՀ ոստիկանության Կենտրոնականի քննչական բաժնի քննիչ Ս.Պետրոսյանի որոշմամբ թիվ 15108510 քրեական գործով Ռազմիկ Սարգսի Խալաթյանի կողմից ապօրինի կերպով սառը զենք կրելու կապակցությամբ քրեական հետապնդում չի իրականացվել` հանցակազմի բացակայության հիմքով:
2011 թվականի ապրիլի 26-ին Ռազմիկ Սարգսի Խալաթյանի վերաբերյալ քրեական գործը մեղադրական եզրակացությամբ ուղարկվել է Դատարան:
Ռազմիկ Սարգսի Խալաթյանին մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով` այն արարքի համար, որ նա 2010 թվականի նոյեմբերի 8-ին` ժամը 18:30-ի սահմաններում ՀՀ ԱՆ «Հոգեբուժական բժշկական կենտրոն» ՓԲ ընկերության «Նորք» կլինիկայում վիճաբանել է բուժաշխատակիցների հետ, որի ընթացքում կոպիտ կերպով խախտելով հասարակական կարգը, որն արտահայտվել է հասարակության նկատմամբ բացահայտ անհարգալից վերաբերմունք դրսևորելով, աղմկել է և հայհոյել, ոտքերով և ձեռքերով հարվածել և վնասել է կլինիկայի գույքը` պատճառելով 35.000 ՀՀ դրամի գույքային վնաս, իր այդ դիտավորյալ գործողություններով շուրջ 40 րոպե տևողությամբ խանգարել է հիվանդների հանգիստը և խաթարել կլինիկայի բնականոն աշխատանքը:
2011 թվականի ապրիլի 27-ին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի դատավոր Մ.Պապոյանը Ռազմիկ Սարգսի Խալաթյանի վերաբերյալ թիվ ԵԿԴ/0074/01/11 քրեական գործն ընդունել է վարույթ:
2011 թվականի մայիսի 31-ին նշանակված դատական նիստի ժամանակ ամբաստանյալ Ռազմիկ Սարգսի Խալաթյանը դիմում ներկայացնելով խնդրել է «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման կիրառմամբ թիվ ԵԿԴ/0074/01/11 քրեական գործի վարույթը կարճել և իր նկատմամբ քրեական հետապնդումը դադարեցնել, իսկ տուժողի ներկայացուցիչ Նարինե Իսրաելյանը` հայտնել է, որ ամբաստանյալ Ռազմիկ Խալաթյանի կողմից պատճառված վնասը փոխհատուցվել է և նրա նկատմամբ որևէ պահանջ չունեն:
ՀՀ ոստիկանության ինֆորմացիոն կենտրոնի պահանջագրի համաձայն`
-1997 թվականին Հրազդանի ժողովրդական դատարանի դատավճռով Ռազմիկ Սարգսի Խալաթյանը մեղավոր է ճանաչվել Քրեական օրենսգրքի 118-րդ հոդվածով և 231-րդ հոդվածի 1-ին մասով և նրա նկատմամբ վերջնական պատիժ է նշանակվել ազատազրկում` 1 տարի ժամկետով: 1997 թվականի հունիսի 17-ին համաներման ակտով ազատվել է պատժից,
-2004 թվականի սեպտեմբերի 29-ին Ռազմիկ Սարգսի Խալաթյանի նկատմամբ ՀՀ քրեական օրենսգրքի 325-րդ հոդվածի 1-ին մասով հարուցված քրեական գործի վարույթը կարճվել է ՀՀ քրեական դատավարության օրենսգրքի 37-րդ հոդվածի 1-ին մասով նախատեսված հիմքով,
-2007 թվականի դեկտեմբերի 5-ին Երևան քաղաքի Կենտրոն և Նորք-Մարաշ համայնքների առաջին ատյանի դատարանի դատավճռով Ռազմիկ Սարգսի Խալաթյանը մեղավոր է ճանաչվել ՀՀ քրեական օրենսգրքի 185-րդ հոդվածի 2-րդ մասի 2-րդ կետով և նրա նկատմամբ պատիժ է նշանակվել ազատազրկում` 6 ամիս ժամկետով: ՀՀ քրեական օրենսգրքի 70-րդ հոդվածի կիրառմամբ նշանակված պատիժը պայմանականորեն չի կիրառվել և սահմանվել է փորձաշրջան` 1 տարի ժամկետով:
Երևան քաղաքի Կենտրոն և Նորք-Մարաշ համայնքների առաջին ատյանի դատարանի 2007 թվականի դեկտեմբերի 5-ի դատավճռի պատճենի համաձայն` Ռազմիկ Սարգսի Խալաթյանը մեղավոր է ճանաչվել ՀՀ քրեական օրենսգրքի 185-րդ հոդվածի 2-րդ մասի 2-րդ կետով և նրա նկատմամբ պատիժ է նշանակվել ազատազրկում` 6 ամիս ժամկետով:
ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի համաձայն` «քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ընդունվել է համաներման ակտ», իսկ նույն հոդվածի 5-րդ մասը սահմանում է, որ «դատարանը, հայտնաբերելով քրեական հետապնդումը բացառող հանգամանքներ, լուծում է ամբաստանյալի նկատմամբ քրեական հետապնդումը դադարեցնելու հարցը»:
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման (այսուհետ նաև` Համաներման որոշում) 6-րդ կետի 2-րդ ենթակետի համաձայն` «քրեական հետապնդում պետք է չհարուցել և քրեական հետապնդում չիրականացնել, ինչպես նաև կարճել մինչև 2011 թվականի մայիսի 1-ը կատարած հանցագործությունների վերաբերյալ հետաքննության մարմինների, նախաքննության մարմինների կամ դատարանի վարույթում գտնվող քրեական գործերը, բացառությամբ սույն որոշման 8-րդ կետի 4-րդ և 5-րդ ենթակետերով նախատեսված դեպքերի, որոնցով անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան երեք տարի ժամկետով ազատազրկում»:
ՀՀ քրեական օրենսգրքի 258-րդ հոդվածի 2-րդ մասի սանկցիան որպես պատիժ նախատեսում է տուգանք` նվազագույն աշխատավարձի հարյուրապատիկից երեքհարյուրապատիկի չափով, կամ կալանք` մեկից երեք ամիս ժամկետով, կամ ազատազրկում` առավելագույնը երկու տարի ժամկետով:
Համաներման որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` Համաներման որոշման 9-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ: Սակայն հարկ է նկատել, որ թվարկված հոդվածների և հոդվածների մասերի շարքից բացակայում է ՀՀ քրեական օրենսգրքի 258-րդ հոդվածի 2-րդ մասը, այսինքն` ՀՀ քրեական օրենսգրքի 258-րդ հոդվածի 2-րդ մասով նախատեսված արարքներ կատարած անձանց նկատմամբ համաներման կիրառումը սահմանափակված չէ:
Սույն քրեական գործի նյութերում բացակայում է նաև Համաներման որոշման 9-րդ կետի մյուս ենթակետերում նշված այն սահմանափակումները, որոնք կարող են արգելք հանդիսանալ Համաներման որոշման կիրառման համար:
Դատարանը, հիմք ընդունելով վերը նշվածը և նկատի ունենալով, որ Ռազմիկ Սարգսի Խալաթյանը խնդրել է իր նկատմամբ կիրառել Համաներման որոշումը, գտնում է, որ Համաներման որոշման կիրառմամբ սույն քրեական գործի վարույթը պետք է կարճել և Ռազմիկ Սարգսի Խալաթյանի նկատմամբ քրեական հետապնդումը դադարեցման:
Դատարանը, նկատի ունենալով, որ վերը նշված հիմնավորմամբ սույն քրեական գործի վարույթը պետք է կարճել և Ռազմիկ Սարգսի Խալաթյանի նկատմամբ քրեական հետապնդումը դադարեցնել, գտնում է, որ նրա նկատմամբ խափանման միջոց կիրառելու անհրաժեշտությունը վերացել է, ուստի սույն որոշումն օրինական ուժի մեջ մտնելուց հետո Ռազմիկ Խալաթյանի նկատմամբ ընտրված խափանման միջոցը` չհեռանալու մասին ստորագրությունը, պետք է վերացնել:
Ելնելով վերոգրյալից, ղեկավարվելով ՀՀ քրեական դատավարության օրենսգրքի 35-րդ, 41-րդ, 151-րդ, 313-րդ և 379-րդ հոդվածներով և հիմք ընդունելով «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշումը` Դատարանը

Ո Ր Ո Շ Ե Ց

Թիվ ԵԿԴ/0074/01/11 քրեական գործի վարույթը կարճել և Ռազմիկ Սարգսի Խալաթյանի նկատմամբ քրեական հետապնդումը դադարեցնել` համաներման ակտի ընդունման հիմքով:
Որոշումն օրինական ուժի մեջ մտնելուց հետո Ռազմիկ Սարգսի Խալաթյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Սույն որոշումը կարող է բողոքարկվել Հայաստանի Հանրապետության քրեական վերաքննիչ դատարան` հրապարակման օրվանից մեկամսյա ժամկետում::


ԴԱՏԱՎՈՐ Մ.ՊԱՊՈՅԱՆ