ԵԿԴ/0072/01/11






ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

02.06.2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ նաև` Դատարան)` նախագահող դատավոր Մ.Պապոյան, քարտուղարությամբ Ռ.Ավետյանի, մասնակցությամբ մեղադրող Ա.Մնացականյանի, տուժողի իրավահաջորդ Ա.Մնացականյանի, ամբաստանյալ Սպարտակ Գագիկի Պետրոսյանի, պաշտպան Բ.Վարդանյանի, դռնբաց դատական նիստում քննելով քրեական գործն ըստ մեղադրանքի Սպարտակ Գագիկի Պետրոսյանի (ծնված 1985 թվականի նոյեմբերի 7-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, չամուսնացած, նախկինում չդատապարտված, աշխատում է «Սոլիդ Մակերես» ՍՊ ընկերությունում` որպես քար մշակող, հաշվառված է Երևան քաղաքի Թբիլիսյան խճուղու 2-րդ շենքի 41-րդ բնակարանում, խափանման միջոց է ընտրվել ստորագրություն չհեռանալու մասին)` ՀՀ քրեական օրենսգրքի 242-րդ հոդվածի 2-րդ մասով
Պ Ա Ր Զ Ե Ց

2011 թվականի փետրվարի 24-ին ՀՀ ոստիկանության Երևան քաղաքի քննչական վարչության ՃՏՀ քննության բաժնի քննիչ Ա.Ասատուրյանի որոշմամբ ՀՀ քրեական օրենսգրքի 242-րդ հոդվածի 2-րդ մասով նախատեսված հանցագործության հատկանիշներով հարուցվել և վարույթ է ընդունվել թիվ 60104111 քրեական գործը:
2011 թվականի ապրիլի 6-ին ՀՀ ոստիկանության Երևան քաղաքի քննչական վարչության ՃՏՀ քննության բաժնի քննիչ Ա.Ասատուրյանի որոշմամբ թիվ 60104111 քրեական գործով Սպարտակ Գագիկի Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 2-րդ մասով:
2011 թվականի ապրիլի 21-ին Սպարտակ Գագիկի Պետրոսյանի վերաբերյալ քրեական գործը մեղադրական եզրակացությամբ ուղարկվել է Դատարան:
Սպարտակ Գագիկի Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 2-րդ մասով` այն արարքի համար, որ նա 2011 թվականի փետրվարի 21-ին` ժամը 13:30-ի սահմաններում, իր անձնական օգտագործման «Ֆոլկսվագեն-Գոլֆ» մակնիշի 19ՕԼ131 պետհամարանիշի ավտոմեքենան վարել է Երևան քաղաքի Արշակունյաց պողոտայով` Նժդեհի փողոցի կողմից Գ.Լուսավորիչ փողոցի ուղղությամբ, իր ուղեմասի 4-րդ գոտիով` շուրջ 60 կմ/ժ արագությամբ: Համընթաց երթևեկությամբ ուղեմասի 1-ին գոտիում, «Սուրմալու» տոնավաճառի դիմացից անցնող` չկարգավորվող հետիոտնային անցումների մոտ կանգնած բեռնատարի, ինչպես նաև 2-րդ և 3-րդ գոտիներով ընթացող ավտոմեքենաների վարորդների կողմից ընթացքի դանդաղեցման պայմաններում նա խախտել է ՃԵԿ-ի 104-րդ կետի պահանջը` համոզված չլինելով հետիոտնի բացակայության մեջ, շարունակել է նույն ուղղությամբ և արագությամբ երթևեկությունը` մինչև 3-րդ գոտիով ընթացող ավտոմեքենայի կանգ առնելը, որի հետևանքով էլ ավտոմեքենայի առջևի աջ կողային մասով վրաերթի է ենթարկել իր ընթացքի ուղղության նկատմամբ աջից դեպի ձախ կողմ, հանգիստ վազքով, հետիոտնային անցումներով պողոտան հատող Գուրգեն Պատվականի Պապիկյանին ու անզգուշությամբ նրան պատճառել մահ:
2011 թվականի ապրիլի 26-ին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի դատավոր Մ.Պապոյանը Սպարտակ Գագիկի Պետրոսյանի վերաբերյալ թիվ ԵԿԴ/0072/01/11 քրեական գործն ընդունել է վարույթ:
2011 թվականի մայիսի 10-ին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի որոշմամբ Սպարտակ Գագիկի Պետրոսյանի վերաբերյալ թիվ ԵԿԴ/0072/01/11 քրեական գործը նշանակվել է դատական քննության:
2011 թվականի մայիսի 31-ին նշանակված դատական նիստի ժամանակ ամբաստանյալ Սպարտակ Գագիկի Պետրոսյանը խնդրել է «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման կիրառմամբ թիվ ԵԿԴ/0072/01/11 քրեական գործի վարույթը կարճել և իր նկատմամբ քրեական հետապնդումը դադարեցնել:
Տուժողի իրավահաջորդ Անահիտ Մնացականյանը հայտնել է, որ ամբաստանյալ Սպարտակ Պետրոսյանի կողմից պատճառված վնասը փոխհատուցվել է և նրա նկատմամբ որևէ պահանջ չունի:
ՀՀ ոստիկանության ինֆորմացիոն կենտրոնի պահանջագրի համաձայն` Սպարտակ Գագիկի Պետրոսյանը նախկինում դատապարտված չի եղել:
Իրեղեն ապացույց ճանաչելու մասին 2011 թվականի ապրիլի 11-ի որոշման համաձայն` Գուրգեն Պատվականի Պապիկյանի հագուստները ճանաչվել են իրեղեն ապացույց:
ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի համաձայն` «քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ընդունվել է համաներման ակտ», իսկ նույն հոդվածի 5-րդ մասը սահմանում է, որ «դատարանը, հայտնաբերելով քրեական հետապնդումը բացառող հանգամանքներ, լուծում է ամբաստանյալի նկատմամբ քրեական հետապնդումը դադարեցնելու հարցը»:
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման (այսուհետ նաև` Համաներման որոշում) 6-րդ կետի 4-րդ ենթակետի համաձայն` «քրեական հետապնդում պետք է չհարուցել և քրեական հետապնդում չիրականացնել, ինչպես նաև կարճել մինչև 2011 թվականի մայիսի 1-ը կատարած հանցագործությունների վերաբերյալ հետաքննության մարմինների, նախաքննության մարմինների կամ դատարանի վարույթում գտնվող քրեական գործերը, բացառությամբ սույն որոշման 8-րդ կետի 4-րդ և 5-րդ ենթակետերով նախատեսված դեպքերի, որոնցով անձինք կարող են մեղադրվել կամ մեղադրվում են անզգուշությամբ հանցագործություններ կատարելու մեջ, որոնց համար նախատեսված է պատիժ` ոչ ավելի, քան հինգ տարի ժամկետով ազատազրկում:
Անզգուշությամբ կատարվող հանցագործություն համարվող ՀՀ քրեական օրենսգրքի 242-րդ հոդվածի 2-րդ մասի սանկցիան որպես պատիժ նախատեսում է ազատազրկում` առավելագույնը հինգ տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով:
Համաներման որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` Համաներման որոշման 9-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ: Սակայն հարկ է նկատել, որ թվարկված հոդվածների և հոդվածների մասերի շարքից բացակայում է ՀՀ քրեական օրենսգրքի 242-րդ հոդվածի 2-րդ մասը, այսինքն` ՀՀ քրեական օրենսգրքի 242-րդ հոդվածի 2-րդ մասով նախատեսված արարքներ կատարած անձանց նկատմամբ համաներման կիրառումը սահմանափակված չէ:
Սույն քրեական գործի նյութերում բացակայում է նաև Համաներման որոշման 9-րդ կետի մյուս ենթակետերում նշված այն սահմանափակումները, որոնք կարող են արգելք հանդիսանալ Համաներման որոշման կիրառման համար:
Դատարանը, հիմք ընդունելով վերը նշվածը և նկատի ունենալով, որ Սպարտակ Գագիկի Պետրոսյանը խնդրել է իր նկատմամբ կիրառել Համաներման որոշումը, գտնում է, որ Համաներման որոշման կիրառմամբ սույն քրեական գործի վարույթը պետք է կարճել և Սպարտակ Գագիկի Պետրոսյանի նկատմամբ քրեական հետապնդումը դադարեցնել:
Դատարանը, նկատի ունենալով, որ վերը նշված հիմնավորմամբ սույն քրեական գործի վարույթը պետք է կարճել և Սպարտակ Գագիկի Պետրոսյանի նկատմամբ քրեական հետապնդումը դադարեցնել, գտնում է, որ նրա նկատմամբ խափանման միջոց կիրառելու անհրաժեշտությունը վերացել է, ուստի սույն որոշումն օրինական ուժի մեջ մտնելուց հետո Սպարտակ Գագիկի Պետրոսյանի նկատմամբ ընտրված խափանման միջոցը` չհեռանալու մասին ստորագրությունը, պետք է վերացնել:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ որոշումն օրինական ուժի մեջ մտնելուց հետո 2011 թվականի ապրիլի 11-ի որոշմամբ իրեղեն ապացույց ճանաչված` Գուրգեն Պատվականի Պապիկյանի հագուստները պետք է վերադարձնել տուժողի իրավահաջորդ Անահիտ Մնացականյանին:
Ելնելով վերոգրյալից, ղեկավարվելով ՀՀ քրեական դատավարության օրենսգրքի 35-րդ, 41-րդ, 116-րդ, 119-րդ, 151-րդ, 313-րդ և 379-րդ հոդվածներով և հիմք ընդունելով «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշումը` Դատարանը

Ո Ր Ո Շ Ե Ց

Թիվ ԵԿԴ/0072/01/11 քրեական գործի վարույթը կարճել և Սպարտակ Գագիկի Պետրոսյանի նկատմամբ քրեական հետապնդումը դադարեցնել` համաներման ակտի ընդունման հիմքով:
Որոշումն օրինական ուժի մեջ մտնելուց հետո Սպարտակ Գագիկի Պետրոսյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Որոշումն օրինական ուժի մեջ մտնելուց հետո 2011 թվականի ապրիլի 11-ի որոշմամբ իրեղեն ապացույց ճանաչված` Գուրգեն Պատվականի Պապիկյանի հագուստները վերադարձնել տուժողի իրավահաջորդ Անահիտ Մնացականյանին:
Սույն որոշումը կարող է բողոքարկվել Հայաստանի Հանրապետության քրեական վերաքննիչ դատարան` հրապարակման օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ