ԵԿԴ/0061/01/11




ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«19» ապրիլի 2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Ա.Աֆանդյան
տուժողներ Կ.Սարգսյան
Մ.Քեշիշյան
պաշտպան Ա.Զաքարյան

դռնբաց դատական նիստում քննեց քրեական գործն ըստ մեղադրանքի`
Սամսոն Սարգսի Խաչատրյանի` ծնված 1960 թվականի փետրվարի 2-ին Վանաձոր քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, չի աշխատում, նախկինում չդատապարտված, հաշվառված է Վանաձոր քաղաքի Ստեփանյան փողոցի 9-րդ տանը, բնակվել է Երևան քաղաքի Ա.Ավետիսյան փողոցի 76-րդ շենքի 5-րդ բնակարանում: Մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով, արգելանքի տակ է 2011 թվականի մարտի 13-ից:
1. Գործի դատավարական նախապատմությունը.
2011 թվականի մարտի 3-ին ՀՀ ոստիկանության Կենտրոնականի քննչական բաժնի ավագ քննիչ Ս.Հակոբյանի որոշմամբ ՀՀ քրեական օրենսգրքի 316-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 13113211 քրեական գործը:
2011 թվականի մարտի 15-ին ՀՀ ոստիկանության Կենտրոնականի քննչական բաժնի ավագ քննիչ Ս.Հակոբյանի որոշմամբ թիվ 13113211 քրեական գործով Սամսոն Սարգսի Խաչատրյանին մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով:
2011 թվականի մարտի 18-ին ՀՀ ոստիկանության Կենտրոնականի քննչական բաժնի ավագ քննիչ Ս.Հակոբյանի որոշմամբ թիվ 13113211 քրեական գործից անջատվել է 2011 թվականի մարտի 1-ին` ժամը 18:00-ի սահմաններում, անհայտ անձանց կողմից իշխանության ներկայացուցիչ հանդիսացող ոստիկանության ծառայողների նկատմամբ բռնություն գործադրելու վերաբերյալ մասը, որին շնորհվել է 13115011 համարը:
2011 թվականի ապրիլի 1-ին Սամսոն Սարգսի Խաչատրյանի վերաբերյալ քրեական գործը մեղադրական եզրակացությամբ ուղարկվել է Դատարան:
Սամսոն Սարգսի Խաչատրյանին մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով` այն արարքի համար, որ նա 2011 թվականի մարտի 1-ին` ժամը 18:00-ի սահմաններում, Երևան քաղաքի Մաշտոց և Կորյուն փողոցների խաչմերուկում Հայ ազգային կոնգրեսի կողմից կազմակերպված հանրահավաքին մասնակցող, գործով ինքնությունները չպարզված անձանց հետ փակել են Մաշտոցի պողոտայի երթևեկելի հատվածը, որից հետո չենթարկվելով իրենց ծառայողական պարտականությունները կատարող` իշխանության ներկայացուցիչ հանդիսացող ՀՀ ոստիկանության Էրեբունու բաժնի պետի օպերատիվ գծով տեղակալ Միհրան Քեշիշյանի, Երևան քաղաքի վարչության քրեական հետախուզության բաժնի 3-րդ բաժանմունքի պետ Լևոն Խաչատրյանի, նույն բաժանմունքի ավագ օպերլիազորներ Կարեն Սարգսյանի և Ռոման Կիրակոսյանի օրինական պահանջներին` այն է ազատել ճանապարհի երթևեկելի հատվածը, չխոչընդոտել տրանսպորտային միջոցների երթևեկությանը, չխախտել հասարակական կարգը, սակայն չկատարելով վերջինների օրինական պահանջները` սկսել են անհիմն վիճաբանել Միհրան Քեշիշյանի, Լևոն Խաչատրյանի, Ռոման Կիրակոսյանի և Կարեն Սարգսյանի հետ և նրանց առողջության համար ոչ վտանգավոր բռնություն գործադրելով` Սամսոն Խաչատրյանը ձեռքով հարվածել է Կարեն Սարգսյանին և Միհրան Քեշիշյանին` վերջինին պատճառելով մարմնական վնասվածք` դեմքի աջ կեսի շրջանի քերծվածքի ձևով, որն առողջության թեթև վնասի հատկանիշներ չի պարունակել:
2. Ապացույցների հետազոտում և գնահատում.
Դատական քննության ընթացքում ամբաստանյալ Սամսոն Խաչատրյանը առաջադրված մեղադրանքում իրեն մեղավոր չճանաչեց և օգտվելով իր իրավունքից` հրաժարվեց ցուցմունք տալ:
Տուժող Միհրան Քեշիշյանը դատական քննության ընթացքում ցուցմունք տվեց այն մասին, որ աշխատում է ՀՀ ոստիկանության Երևան քաղաքի վարչության Էրեբունու բաժնում` որպես բաժնի պետի տեղակալ: 2011 թվականի մարտի 1-ին` ժամը 17:00-ից սկսած, համաձայն համապատասխան հրահանգի, հասարակական կարգը պահպանելու նպատակով ՀՀ ոստիկանության Էրեբունու բաժնի աշխատակիցներով ծառայություն են իրականացրել Երևան քաղաքի «Մատենադարանին» հարող տարածքում, որտեղ կազմակերպված է եղել հանրահավաք: Այդտեղ ծառայություն են իրականացրել նաև ՀՀ ոստիկանության այլ ստորաբաժանումների աշխատակիցներ, որոնց մի մասը եղել է համազգեստով, իսկ մյուս մասը` քաղաքացիական հագուստով: Այդ օրն ինքը եղել է քաղաքացիական հագուստով, քանի որ այդպիսի հրաման է եղել: Հանրահավաքի մասնակիցներին հատկացված է եղել տարածք, սակայն ժամը 17:30-ի սահմաններում հանրահավաքի մասնակիցները, խախտելով հասարակական կարգը, դուրս են եկել Մաշտոցի պողոտայի և Կորյունի փողոցի հատման կետի երթևեկելի գոտի, ինչի պատճառով այդ հատվածում երթևեկությունը կանգնել է: Այդ ընթացքում հանրահավաքի մասնակիցների և համազգեստով ոստիկանների միջև սկսվել է հրմշտոց: Այդ ոստիկաններին օգնելու համար ինքը ոստիկանության աշխատակիցներ Կարեն Սարգսյանի, Լևոն Խաչատրյանի և Ռոման Կիրակոսյանի հետ մոտեցել են նրանց, ներկայացել որպես ոստիկանության աշխատակիցներ, ցույց տվել իրենց ծառայողական վկայականները և փորձել հանրահավաքի մասնակիցներին կարգի հրավիրել, նրանցից պահանջել են բարձրանալ դեպի «Մատենադարանի» ուղղությամբ, սակայն վերջինները եղել են շատ ագրեսիվ, չեն ենթարկվել իրենց պահանջներին և ստեղծել են քաշքշուկ: Այդ ժամանակ հանրահավաքի երիտասարդ մասնակիցներից մեկն իրենից պահանջել է նայելու համար նրան տալ իր ծառայողական վկայականը, սակայն ինքը չի տվել: Սամսոն Խաչատրյանը տեսել է իր ծառայողական վկայականը, քանի որ գտնվել է այդ երիտասարդի կողքին: Ինքն այդտեղ մոտեցել է այն ժամանակ, երբ հանրահավաքի մասնակիցները, այդ թվում` Սամսոն Խաչատրյանը, գտնվել են երթևեկելի գոտում: Այդ միջադեպի ժամանակ ինքն աջ կողմում մարմնական վնասվածք` քերծվածք է ստացել, որը պատճառվել է Սամսոն Խաչատրյանի կողմից: Ինքը նկատել է Սամսոնի հարվածը և կարծում է, որ նա հարվածել է բռունցքով: Բացի Սամսոնից, իրենց հարվածել են նաև այլ անձինք: Դեպքի ժամանակ ինքն ու Կարեն Սարգսյանը գտնվել են կողք-կողքի: Իրենք ցանկացել են Սամսոնին բերման ենթարկել ոստիկանության բաժին, սակայն չեն կարողացել, քանի որ նա և իրենց հարվածող մյուս անձինք, որոնց չի ճանաչում, խառնվել են հանրահավաքի մասնակիցներին ու բարձրացել վերև: Դեպքի ժամանակ ինքը որևէ մեկին չի վիրավորել և որևէ գործողություն չի կատարել, որը կարող էր հրահրել հարված հասցնելուն: Իր ներկայությամբ Սամսոն Խաչատրյանի նկատմամբ բռնություն չի գործադրվել: Այնուհետև իմացել է, որ այդ դեպքի ժամանակ Սամսոնը հարվածել է նաև Կարեն Սարգսյանին:
Տուժող Կարեն Սարգսյանը դատական քննության ընթացքում ցուցմունք տվեց այն մասին, որ աշխատում է ՀՀ ոստիկանության Երևան քաղաքի վարչության քրեական հետախուզության բաժնում` որպես ավագ օպերլիազոր: 2011 թվականի մարտի 1-ին` ժամը 17:00-ից սկսած, քաղաքացիական հագուստով, հասարակական կարգը պահպանելու նպատակով ծառայություն է իրականացրել Երևան քաղաքի Կորյունի փողոցի վերջնամասում` «Մատենադարանի» տարածքում, որտեղ Հայ ազգային կոնգրեսը հանրահավաք է անցկացրել: Հանրահավաքի մասնակիցներին հատկացված է եղել փողոցի բանուկ մասից վերև` դեպի «Մատենադարան» ընկած տարածքը, որտեղ համազգեստով ծառայություն են իրականացրել ոստիկանության աշխատակիցները: Ժամը 18:00-ի սահմաններում հանրահավաքի մասնակիցների մի մասը, հրելով ոստիկանության համազգեստով աշխատակիցներին, իջել և կանգնել են փողոցի մեջտեղի մասում, որի պատճառով հրմշտոց է սկսվել: Այդ ժամանակ ինքն ու Միհրան Քեշիշյանը մոտեցել են նրանց, իսկ իրենցից մի քանի քայլ հեռավորության վրա կանգնած են եղել Լևոն Խաչատրյանն ու Ռոման Կիրակոսյանը: Իրենք ներկայացել են որպես ոստիկանության աշխատակիցներ, ցույց տվել իրենց ծառայողական վկայականները և հանրահավաքի մասնակիցներից պահանջել ազատել փողոցը, չխոչընդոտել երթևեկությանը ու բարձրանալ վերև, քանի որ այնտեղ բավականաչափ ազատ տեղեր են եղել: Իր կողմից ծառայողական վկայականը ցույց տալու ժամանակ Սամսոն Խաչատրյանը կանգնած է եղել այդտեղ: Իրենց պահանջից հետո հրմշտոցը շարունակվել է, և այդ ընթացքում շուրջ 4-5 անձանց հետ, որոնց թվում եղել է նաև Սամսոնը, քաշքշուկ է ստեղծվել, որի ընթացքում Սամսոնը ձեռքով հարվածել է իր երեսին` դնչի հատվածում, սակայն ինքը վնասվածք չի ստացել: Ինքը կանգնած է եղել Միհրան Քեշիշյանի հետ, ով նույնպես հարված է ստացել դեմքին: Իրենք Սամսոնին այդ օրը բերման չեն ենթարկել, քանի որ հանրահավաքի մասնակիցները նրան քաշել են «Մատենադարանի» ուղղությամբ, և այլևս հնարավոր չի եղել տեսնել նրան: Իրենք ոչինչ չեն հրահրել, երեխաներին չեն ծեծել, հայհոյանք չեն տվել և որևէ մեկին չեն վիրավորել, իսկ Սամսոնի հագին արյունոտված շոր չի տեսել:
Վկա Հակոբ Սանթրոսյանը դատական քննության ընթացքում ցուցմունք տվեց այն մասին, որ 2011 թվականի մարտի 1-ին «Մատենադարանի» տարածքում կազմակերպված հանրահավաքի կապակցությամբ համազգեստով ծառայություն է իրականացրել «Պոնչիկանոցի» դիմացի մայթում: Իրենց ծառայության նպատակը եղել է հասարակական կարգի պահպանումը, այդ թվում` հանրահավաքի մասնակիցների կողմից երթևեկությանը խոչընդոտելը կանխելը: Ժամը 18:00-ի սահմաններում ժողովուրդը դուրս է եկել երթևեկելի գոտի, որի պատճառով երթևեկելի գոտու կեսը փակվել է: Իրենք նրանցից պահանջել են բարձրանալ մայթ ու չխոչընդոտել երթևեկությանը, քանի որ մայթին բավականաչափ ազատ տեղ է եղել: Այդ ժամանակ ետևի մասից իրենց մոտեցել են իրեն անծանոթ, քաղաքացիական հագուստով ոստիկաններ, կրկին պահանջել դուրս գալ փողոցից, չխոչընդոտել երթևեկությունը և ենթարկվել համազգեստով ոստիկանների օրինական պահանջներին: Այդ ժամանակ ժողովուրդը նորից շարունակել է հրմշտոցը և կրկին շարժվել դեպի փողոց: Այդ ընթացքում ինքը նկատել է, որ իրենից մոտ 10 մետր հեռավորության վրա հարվածներ են տեղի ունեցել, սակայն չի կարող ասել դրանք փոխադարձ են եղել, թե ոչ: Ինքը նկատել է ձեռքեր և փորձել է մոտենալ այդտեղ, բայց չի կարողացել, քանի որ ժողովրդի բազմություն եղել է շատ խիտ: Ինքը չի նկատել, որ այդ քաղաքացիական հագուստով անձինք ինչ-որ բռնի գործողություն կատարեն, քաշքշեն կամ վիրավորեն: Ինքը չի կարող ասել` Սամսոն Խաչատրյանն այդտեղ եղել է, թե ոչ:
Վկա Կոստան Բուդաղյանը դատական քննության ընթացքում ցուցմունք տվեց այն մասին, որ 2011 թվականի մարտի 1-ին (ծառայությունը սկսելու կոնկրետ ժամը չի հիշում) ծառայություն է իրականացրել Երևան քաղաքի Մաշտոցի պողոտայում` «Մատենադարանի» հարևանությամբ: Այդ ժամանակ հանրահավաքի մասնակիցները փակել են ճանապարհի երթևեկելի մասը: Իրենց ծառայողական խնդիր եղել է երթևեկության բնականոն ընթացքի ապահովումը: Հանրահավաքի մասնակիցները դուրս են եկել փողոց, չեն ենթարկվել իրենց օրինական պահանջներին: Այդ ժամանակ իրենց օգնելու նպատակով մոտեցել են Միհրան Քեշիշյանն ու Կարեն Սարգսյանը, ովքեր եղել են քաղաքացիական հագուստով, ցույց են տվել ծառայողական վկայականները և պահանջել կատարել ոստիկանների օրինական պահանջները: Այդ ընթացքում «Պոնչիկանոցի» ու «Մատենադարանի» միջև ընկած հատվածում տեղի է ունեցել միջադեպ, որի ընթացքում մի քաղաքացի (հանարավաքը վերջանալուց հետո ինքն իրենց աշխատակիցներից իմացել է, որ դա Սամսոն Խաչատրյանն է) ձեռքով հարվածել է Միհրան Քեշիշյանի դեմքին: Ինքը տեսել է մեկ հարված: Քաղաքացիական հագուստով անձինք որևէ արտառոց գործողություն չեն կատարել: Այդ ընթացում ինքը ծառայություն է իրականացրել Հակոբ Սանթրոսյանի հետ, և գիտի, որ նա ոստիկանության աշխատակից է: Տուժողներին դեմքով ճանաչում է մոտ երեք տարի, սակայն Միհրան Քեշիշյանի աշխատանքի կոնկրետ վայրը չգիտի: Նախնական քննության ընթացքում իր տված ցուցմունքը համապատասխանում է իրականությանը:
Վկա Կոստան Բուդաղյանը նախնական քննության ընթացում ցուցմունք է տվել այն մասին, որ 1995 թվականից ծառայում է ոստիկանության համակարգում: 2011 թվականի մարտի 1-ին Հայ Ազգային կոնգրեսի կողմից կազմակերպված հանրահավաքի կապակցությամբ ժամը 15:00-ից ոստիկանության ՊՊԾ գնդի հետ ծառայություն են իրականացրել «Մատենադարանի» տարածքում` հասարակական կարգը պահպանելու համար: Ժամը 18:00-ից 18:30-ի սահմաններում հանրահավաքի մասնակիցները դուրս են եկել Մաշտոցի պողոտայի եթևեկելի մաս ու խոչընդոտել երթևեկությանը և հասարակական տրանսպորտին: Այդ ժամանակ իրենք պահանջել են դուրս գալ ճանապարհից և չխանգարել տրանսպորտի երթևեկությանը, սակայն հանրահավաքի մասնակիցները իրենց չեն ենթարկվել և շարունակել են իրենց գործողությունները` դուրս չգալով այդ հատվածից, շարժվելով ավելի առաջ և անտեսելով իրենց օրինական պահանջները: Այդ ժամանակ ինքը նկատել է, որ ծառայություն են իրականացնում նաև քաղաքացիական հագուստով ոստիկաններ: Նրանցից մի քանիսը եկել են իրենց օգնության և երթևեկելի մասը փակող ու հասարակական կարգ խախտող հանրահավաքի մասնակիցներին ներկայացել որպես ոստիկանության աշխատակիցներ, ցույց տվել իրենց ծառայողական վկայականները, ինչից հետո պահանջել են, որպեսզի այդ քաղաքացիները դուրս գան երթևեկելի մասից և չխոչընդոտեն երթևեկությանը, քանի որ խցանումներ են առաջացել: Այդ քաղաքացիները նրանց նույնպես չեն ենթարկվել և սկսել են քաշքշել, իսկ հանրահավաքի մասնակիցներից մի խումբ, ովքեր եղել են ավելի ակտիվ, քաշքշել են այդ ոստիկաններին, ինչպես նաև հարվածներ հասցրել նրանց: Դա կատարվել է շատ արագ, և ինքը չի կարողացել օգնության հասնել, ինչից հետո այդ անձինք, խառնվելով հանրահավաքի մասնակիցներին, անհետացել են: Իրենց օգնության եկած քաղաքացիական համազգեստով ոստիկանության աշխատակիցներին չի ճանանչել, նրանց արտաքինը նկարագրել չի կարող, տեսնելու դեպքում չի ճանաչի, սակայն այնտեղ լսելով իմացել է, որ նրանցից մեկը ՀՀ ոստիկանության Էրեբունու բաժնի պետի օպերատիվ գծով տեղակալն է: Հանրահավաքի մասնակիցների արտաքինը, ովքեր հարվածել են այդ ոստիկաններին, չի կարող նկարագրել, տեսնելու դեպքում չի կարող ճանաչել, քանի որ խառնաշփոթ վիճակ է եղել:
Վկա Լևոն Խաչատրյանը դատական քննության ընթացքում ցուցմունք տվեց այն մասին, որ 2011 թվականի մարտի 1-ին` ժամը 16:00-ից սկսած, Հայ ազգային կոնգրեսի կողմից անցկացվող հանրահավաքի կապակցությամբ ծառայություն է իրականացրել «Մատենադարանին» հարակից հատվածում` նպատակ ունենալով պահպանել հասարակական կարգը: Ծառայություն իրականացնելիս ինքը եղել է քաղաքացիական հագուստով, քանի որ աշխատում է քրեական հետախուզությունում: Ժամը 17:00-ի սահմաններում հավաքված բազմությունը սկսել է ոստիկաններին հրելով առաջ գալ դեպի Կորյուն-Մաշտոց փողոցների հատման անկյուն և խոչընդոտել երթևեկությանը: Այդ ժամանակ ինքը և իր հետ ծառայություն իրականացնող` իր բաժանմունքի աշխատակիցները մի քանի անգամ (քանի որ տարբեր պահերի հարաբերվել են տարբեր քաղաքացիների հետ), նախապես ցույց տալով իրենց ծառայողական վկայականները, ներկայացել են որպես ոստիկանության աշխատակիցներ և փորձել քաղաքացիներին բացատրել, որ պետք է ետ կանգնել, չփակել ճանապարհի երթևեկելի մասը և չխոչընդոտել երթևեկությանը: Իրենց պահանջին ի պատասխան` քաղաքացիներն ասել են, որ ոչ երթևեկելի մասում կանգնելու տեղ չկա, նրանք իրավունք ունեն երբ ուզեն, որտեղ ուզեն կանգնեն, ոչ ոք իրավունք չունի նրանց ասել, թե որտեղ կանգնեն, սակայն ոչ երթևեկելի մասերում եղել են կանգնելու ազատ տեղեր: Այդ ընթացում մի խումբ անձինք, ովքեր եղել են ավելի ագրեսիվ և կոնֆլիկտային, սկսել են չենթարկվել իրենց օրինական պահանջներին և առաջացել է քաշքշոց: Այդ ժամանակ ծառայություն են իրականացրել նաև համազգեստ կրող ոստիկանության աշխատակիցներ, ովքեր փորձել են շղթա կազմել ու կանխել շարժումը դեպի ճանապարհի երթևեկելի հատված: Իրենք երկրորդ շարքում նույնպես փորձել են հանգստացնել քաղաքացիներին: Այդ քաշքշուկի ժամանակ Սամսոն Խաչատրյանը հարվածել է Կարեն Սարգսյանին, իսկ այդ պահին ինքը գտնվել է նրանցից մոտ 5-10 մետր հեռավորության վրա: Այդ ընթացում վնասվել է նաև իր աջ ձեռքի բութ մատը: Ինքը նայել է աջ և տեսել է, որ ոստիկանության մյուս աշխատակիցները` Միհրան Քեշիշյանը, Կարեն Սարգսյանը և Ռոման Կիրակոսյանը փորձել են հավաքված այդ մի քանի անձին, որոնց մեջ եղել է նաև Սամսոն Խաչատրյանը, բացատրել, որ չպետք է խոչընդոտել մեքենաների երթևեկությանը: Ինքն անմիջապես շարժվել է նրանց ուղղությամբ, որպեսզի բռնի և բերման ենթարկի Սամսոն Խաչատրյանին, սակայն չի հասցրել, քանի որ նա մտել է բազմության մեջ և կորել իրենց տեսադաշտից: Ընդհանրապես ինքն ու տուժողները գտնվել են մեկ շարքի վրա, սակայն երբ սկսվել է քաշքշուկ, ինքը նրանց մի պահ կորցրել է իր տեսադաշտից և տեսել է միայն այն պահին, երբ տեղի է ունեցել հարվածը: Նրանք կանգնած են եղել մի փոքր ավելի վերև և իր կանգնած տեղից ակնհայտ նկատել է Սամսոն Խաչատրյանի ձախ ձեռքի հարվածը Կարեն Սարգսյանի դեմքին: Այլ հարվածներ ինքը չի նկատել: Մինչ այդ հարվածը, ինքն իր գործընկերների կողմից որևէ վիրավորական արտահայտություն չի լսել և բռնությանը բնորոշ պահվածք չի նկատել:
Վկա Ռոման Կիրակոսյանը դատական քննության ընթացքում ցուցմունք տվեց այն մասին, որ աշխատում է ՀՀ ոստիկանության Երևան քաղաքի վարչությունում: 2011 թվականի մարտի 1-ին Հայ ազգային կոնգրեսի կողմից կազմակերպված հանրահավաքի կապակցությամբ ծառայություն է իրականացրել Երևան քաղաքի Մաշտոցի պողոտայում` «Մատենադարանին» հարակից տարածքում: Իր հետ ծառայություն են իրականցրել նաև ՀՀ ոստիկանության Երևան քաղաքի վարչության քրեական հետախուզության բաժնի 3-րդ բաժանմունքի պետ Լևոն Խաչատրյանը, ավագ օպերլիազոր Կարեն Սարգսյանը և ՀՀ ոստիկանության Էրեբունու բաժնի պետի օպերատիվ գծով տեղակալ Միհրան Քեշիշյանը: Իրենք ծառայություն են իրականացրել քաղաքացիական հագուստով, սակայն այդտեղ ծառայություն են իրականացրել նաև ոստիկանության ծառայողներ, ովքեր եղել են ոստիկանի համազգեստով: Հանրահավաքը սկսվել է ժամը 17:00-ի սահմաններում: Ժամը 18:00-ի սահմաններում հանրահավաքի մասնակիցները դուրս են եկել Մաշտոցի պողոտայի երթևեկելի մաս և խոչընդոտել մեքենաների ազատ տեղաշարժը: Այդ ժամանակ ոստիկանները հանրահավաքի մասնակիցներից պահանջել են ազատել Մաշտոցի պողոտան և հանրահավաքը շարունակել սահմանված վայրում, սակայն նրանք չեն ենթարկվել ոստիկանների պահանջներին: Այդ ամենը տեսնելով` իրենք մոտեցել են նրանց, ներկայացել որպես ոստիկանության աշխատակիցներ, ցույց տվել իրենց ծառայողական վկայականները և նույնպես պահանջել, որ այդ անձինք դուրս գան փողոցից, սակայն նրանք իրենց պահանջները նույնպես չեն կատարել և շարունակել են այդ գործողությունները: Ներկայանալու պահին Սամսոն Խաչատրյանը եղել է այդտեղ և տեսել է ծառայողական վկայականը: Իրենց մոտենալուց հետո հանրահավաքի մասնակիցները սկսել են քաշքշուկ առաջացնել, հրել և հարվածել իրենց: Այդ մասնակիցներից առավել ակտիվ են եղել 4-5 անձինք, որոնցից առավել ակտիվը եղել է Սամսոն Խաչատրյանը: Ինքը տեսել է, որ քաշքշուկի ժամանակ Սամսոն Խաչատրյանը հարվածել է Կարեն Սարգսյանի և Միհրան Քեշիշյանի դեմքերին, որի հետևանքով Միհրան Քեշիշյանը բերանի հատվածում ստացել է մարմնական վնասվածք: Հարվածի պահին ինքը գտնվել է նրանցից մոտ 1-1,5 մետր հեռավորության վրա: Դրանից հետո այդ 4-5 անձինք խառնվել են ժողովրդին, ինչի պատճառով իրենք չեն կարողացել նրանց բերման ենթարկել ոստիկանություն: Քաշքշուկի ժամանակ իրեն ևս հարվածել են, սակայն չի կարող հիշել, թե կոնկրետ ով է եղել հարվածողը: Ոստիկանները որևէ անօրինական գործողություն չեն կատարել, իսկ տուժողները որևէ մեկին չեն վիրավորել:
Անձին լուսանկարով ճանաչման ներկայացնելու մասին 2011 թվականի մարտի 4-ի արձանագրության համաձայն` Կարեն Սարգսյանին ճանաչման են ներկայացվել չորս լուսանկարներ: Կարեն Սարգսյանը, զննելով իրեն ճանաչման ներկայացված չորս անձանց լուսանկարները, մատնացույց է արել 2-րդ համարի տակ փակցված լուսանկարը և հայտարարել, որ այդ լուսանկարում պատկերված անձն այն անձն է, ով 2011 թվականի մարտի 1-ին Հայ ազգային կոնգրեսի կողմից կազմակերպված ցույցի ժամանակ չորս անձանց հետ դիմադրել է իրեն, չի ենթարկվել օրինական պահանջներին և քաշքշել ու հարվածել է: Այդ անձը հարվածել է իրեն և Միհրան Քեշիշյանին:
ՀՀ ոստիկանության Կենտրոնականի քննչական բաժնի ավագ քննիչ Ս.Հակոբյանի կողմից 2011 թվականի մարտի 4-ին կազմված տեղեկանքի համաձայն` անձին լուսանկարով ճանաչման ներկայացնելու մասին արձանագրության մեջ ձախից աջ հաջորդականությամբ 2-րդը փակցված լուսանկարում պատկերված է Սամսոն Սարգսի Խաչատրյանը:
Անձին լուսանկարով ճանաչման ներկայացնելու մասին 2011 թվականի մարտի 4-ի արձանագրության համաձայն` Ռոման Կիրակոսյանին ճանաչման են ներկայացվել չորս լուսանկարներ: Ռոման Կիրակոսյանը, զննելով իրեն ճանաչման ներկայացված չորս անձանց լուսանկարները, մատնացույց է արել 2-րդ համարի տակ փակցված լուսանկարը և հայտարարել, որ դա այն անձի լուսանկարն է, ով 2011 թվականի մարտի 1-ին Հայ ազգային կոնգրեսի կողմից կազմակերպված ցույցի ժամանակ` ժամը 18:00-ի սահմաններում, չի ենթարկվել իր և գործընկերների օրինական պահանջներին, հարվածել է Միհրան Քեշիշյանին ու Կարեն Սարգսյանին և դիմել փախուստի: Ռոման Կիրակոսյանը հայտարարել է, որ նշված լուսանկարում պատկերված անձին ճանաչել է գլխի կառուցվածքից, դիմագծերից և այլ արտաքին հատկանիշներից:
ՀՀ ոստիկանության Կենտրոնականի քննչական բաժնի ավագ քննիչ Ս.Հակոբյանի կողմից 2011 թվականի մարտի 4-ին կազմված տեղեկանքի համաձայն` անձին լուսանկարով ճանաչման ներկայացնելու մասին արձանագրության մեջ ձախից աջ հաջորդականությամբ 2-րդը փակցված լուսանկարում պատկերված է Սամսոն Սարգսի Խաչատրյանը:
Անձին լուսանկարով ճանաչման ներկայացնելու մասին 2011 թվականի մարտի 4-ի արձանագրության համաձայն` Լևոն Խաչատրյանին ճանաչման են ներկայացվել չորս լուսանկարներ: Լևոն Խաչատրյանը, զննելով իրեն ճանաչման ներկայացված չորս անձանց լուսանկարները, մատնացույց է արել ձախից 4-րդ համարի տակ փակցված լուսանկարը և հայտարարել, որ դա այն անձն է, ով 2011 թվականի մարտի 1-ին` ժամը 18:00-ի սահմաններում, չի ենթարկվել իրենց օրինական պահանջներին, հարվածել է Միհրան Քեշիշյանին ու Կարեն Սարգսյանին և դիմել փախուստի: Լևոն Խաչատրյանը հայտարարել է, որ նշված լուսանկարում պատկերված անձին ճանաչել է նրա դիմագծերից, մազերից, ճակատի կառուցվածքից և այլ արտաքին հատկանիշներից:
ՀՀ ոստիկանության Կենտրոնականի քննչական բաժնի ավագ քննիչ Ս.Հակոբյանի կողմից 2011 թվականի մարտի 4-ին կազմված տեղեկանքի համաձայն` անձին լուսանկարով ճանաչման ներկայացնելու մասին արձանագրության մեջ ձախից աջ հաջորդականությամբ 4-րդը փակցված լուսանկարում պատկերված է Սամսոն Սարգսի Խաչատրյանը:
Անձին լուսանկարով ճանաչման ներկայացնելու մասին 2011 թվականի մարտի 4-ի արձանագրության համաձայն` Միհրան Քեշիշյանին ճանաչման են ներկայացվել չորս լուսանկարներ: Միհրան Քեշիշյանը, զննելով իրեն ճանաչման ներկայացված անձանց, մատնացույց է արել ձախից աջ 1-ին լուսանկարում պատկերված անձին և հայտարարել, որ դա այն անձն է, ով 2011 թվականի մարտի 1-ին` ժամը 18:00-ի սահմաններում, Հայ ազգային կոնգրեսի կողմից կազմակերպված հանրահավաքի ժամանակ դիմադրել է իրեն` չենթարկվելով իր օրինական պահանջներին, որի ընթացքում հարվածել է իրեն ու Կարեն Սարգսյանին և դիմել փախուստի: Միհրան Քեշիշյանը հայտարարել է, որ նշված լուսանկարում պատկերված անձին ճանաչել է դիմագծերից և արտաքին այլ հատկանիշներից:
ՀՀ ոստիկանության Կենտրոնականի քննչական բաժնի ավագ քննիչ Ս.Հակոբյանի կողմից 2011 թվականի մարտի 4-ին կազմված տեղեկանքի համաձայն` անձին լուսանկարով ճանաչման ներկայացնելու մասին արձանագրության մեջ ձախից աջ հաջորդականությամբ 1-ինը փակցված լուսանկարում պատկերված է Սամսոն Սարգսի Խաչատրյանը:
Փորձագետի 2011 թվականի մարտի 3-ի թիվ 484 եզրակացության համաձայն` Կարեն Սարգսյանի օբյեկտիվ քննությամբ մարմնական վնասվածքներին բնորոշ օբյեկտիվ հատկանիշներ չեն հայտնաբերվել:
Փորձագետի 2011 թվականի մարտի 11-ի թիվ 485 եզրակացության համաձայն` Լևոն Խաչատրյանի մոտ դատաբժշկական փորձաքննությամբ մարմնական վնասվածքների օբյեկտիվ հատկանիշներ չեն հայտնաբերվել:
Փորձագետի 2011 թվականի մարտի 3-ի թիվ 486 եզրակացության համաձայն` Միհրան Քեշիշյանի ստացած մարմնական վնասվածքը` դեմքի աջ կեսի շրջանի քերծվածքի ձևով, հետևանք է բութ առարկայի ազդեցության, հնարավոր է նշված ժամկետում, որն առողջությանը թեթև վնաս չի պատճառել:
Փորձագետի 2011 թվականի մարտի 3-ի թիվ 487 եզրակացության համաձայն` Ռոման Կիրակոսյանի մոտ փորձաքննության պահին 2011 թվականի մարտի 1-ի դեպքի վաղեմությանը համապատասխանող մարմնական վնասվածքների օբյեկտիվ հատկանիշներ չեն հայտնաբերվել:
Անձին ճանաչման ներկայացնելու մասին 2011 թվականի մարտի 13-ի արձանագրության համաձայն` Միհրան Քեշիշյանին ճանաչման են ներկայացվել չորս անձինք, որոնցից ձախից աջ 4-րդը եղել է Սամսոն Սարգսի Խաչատրյանը: Միհրան Քեշիշյանը, զննելով իրեն ճանաչման ներկայացված անձանց, մատնացույց է արել ձախից աջ 4-րդը կանգնած անձին և հայտարարել, որ նրան ճանաչում է 2011 թվականի մարտի 1-ից: Հայ ազգային կոնգրեսի կողմից կազմակերպված հանրահավաքի ժամանակ մի խումբ անձինք դուրս են եկել Մաշտոցի պողոտայի երթևեկելի հատված: Իրեն ճանաչման ներկայացված անձանցից ձախից 4-րդը կանգնած անձը չի ենթարկվել իրենց օրինական պահանջներին, դուրս չի եկել փողոցի երթևեկելի հատվածից, քաշքշել է իրեն ու հարվածել դեմքին, որից հետո մտնելով հանրահավաքի մյուս մասնակիցների մեջ` անհետացել է: Միհրան Քեշիշյանը հայտարարել է, որ անձին ճանաչել է հասակից, տարիքից, մազերի ձևից և այլ արտաքին հատկանիշներից: Իսկ Սամսոն Խաչատրյանը հայտարարել է, որ իրեն ճանաչողին ինքը չի հարվածել:
Անձին ճանաչման ներկայացնելու մասին 2011 թվականի մարտի 13-ի արձանագրության համաձայն` Կարեն Սարգսյանին ճանաչման են ներկայացվել չորս անձինք, որոնցից ձախից աջ 3-րդը եղել է Սամսոն Սարգսի Խաչատրյանը: Կարեն Սարգսյանը, զննելով իրեն ճանաչման ներկայացված չորս անձանց, մատնացույց է արել ձախից 3-րդը կանգնած անձին և հայտարարել, որ դա այն անձն է, ով 2011 թվականի մարտի 1-ին Հայ ազգային կոնգրեսի կողմից կազմակերպված հանրահավաքին մասնակցող անձանց հետ փակել է Մաշտոցի պողոտայի երթևեկելի հատվածը և չենթարկվելով իրենց օրինական պահանջներին, այն է` դուրս գալ երթևեկելի հատվածից, վիճաբանել է իրենց հետ, ինչից հետո ձեռքերով հարվածել է իր գլխին, նաև հարվածել է Միհրան Քեշիշյանին ու դիմել փախուստի: Կարեն Սարգսյանը հայտարարել է, որ իրենք ներկայացել են ոստիկանության աշխատակիցներ, ցույց տվել իրենց ծառայողական վկայականները, քանի որ եղել են քաղաքացիական հագուստով: Կարեն Սարգսյանը հայտարարել է նաև, որ անձին ճանաչել է հասակից, տարիքից, մազերից և այլ արտաքին հատկանիշներից: Իսկ Սամսոն Խաչատրյանը հայտարարել է, որ իրեն որևէ մեկը ոստիկանության աշխատակից չի ներկայացել, թեև ընդհարում է եղել` ինչ-որ մեկը հարվածել է մի աղջկա, ինքը պաշտպանելու նպատակով ձեռք է գցել և հրարավոր է, որ դիպած լինի:
Անձին ճանաչման ներկայացնելու մասին 2011 թվականի մարտի 13-ի արձանագրության համաձայն` Լևոն Խաչատրյանին ճանաչման են ներկայացվել չորս անձինք, որոնցից ձախից աջ 1-ինը եղել է Սամսոն Սարգսի Խաչատրյանը: Լևոն Խաչատրյանը, զննելով իրեն ճանաչման ներկայացված չորս անձանց, մատնացույց է արել ձախից 1-ինը կանգնած անձին և հայտարարել, որ ճանաչում է այդ անձին: Դա այն անձն է, ով 2011 թվականի մարտի 1-ին Հայ ազգային կոնգրեսի կողմից կազմակերպված հանրահավաքի ժամանակ մի շարք մասնակիցների հետ դուրս են եկել Մաշտոցի պողոտայի երթևեկելի հատված, այդտեղ ծառայություն իրականացնող ոստիկանության աշխատակիցների օրինական պահանջներին չեն ենթարկվել, դուրս չեն եկել երթևեկելի փողոցից: Այդ ժամանակ ինքը օպերլիազորներ Ռոման Կիրակոսյանի, Կարեն Սարգսյանի և Էրեբունու բաժնի պետի օպերատիվ գծով տեղակալ Միհրան Քեշիշյանի հետ մոտեցել են նշված անձանց, ցույց տվել իրենց ծառայողական վկայականները, ներկայացել որպես ոստիկանության աշխատակիցներ և պահանջել, որպեսզի դուրս գան փողոցից, սակայն նշված անձինք չեն ենթարկվել իրենց օրինական պահանջներին, քաշքշել են իրենց և իր ճանաչած անձը, չենթարկվելով իրենց օրինական պահանջներին, հարվածել է Միհրան Քեշիշյանին ու Կարեն Սարգսյանին: Լևոն Խաչատրյանը հայտարարել է, որ ճանաչել է դեմքից, հասակից, քթից, ճակատի ձևից, մազերից և այլ արտաքին հատկանիշներից: Իսկ Սամսոն Խաչատրյանը հայտարարել է, որ որևէ մեկը քաղաքացիական հագուստով իրեն ոստիկան չի ներկայացել, քաշքշուկ է եղել, որի ընթացում ինքնապաշտպանվելու համար ինչ-որ մեկին ձեռք է գցել:
Անձին ճանաչման ներկայացնելու մասին 2011 թվականի մարտի 13-ի արձանագրության համաձայն` Ռոման Կիրակոսյանին ճանաչման են ներկայացվել չորս անձինք, որոնցից ձախից աջ 3-րդը եղել է Սամսոն Սարգսի Խաչատրյանը: Ռոման Կիրակոսյանը, զննելով իրեն ճանաչման ներկայացված չորս անձանց, մատնացույց է արել ձախից 3-րդը կանգնած անձին և հայտարարել որ դա այն անձանցից մեկն է, ով 2011 թվականի մարտի 1-ին Հայ ազգային կոնգրեսի կողմից կազմակերպված հանրահավաքին մասնակցող անձանց հետ դուրս են եկել Մաշտոցի պողոտայի երթևեկելի հատված, որտեղ համազգեստով ոստիկանները պահանջել են դուրս գալ երթևեկելի հատվածից, սակայն վերջինները չեն ենթարկվել: Այդ ժամանակ ինքը, Կարեն Սարգսյանը, Լևոն Խաչատրյանը և Միհրան Քեշիշյանը, քանի որ եղել են քաղաքացիական հագուստով, մոտեցել են նրանց, ցույց տվել իրենց ծառայողական վկայականները, ներկայացել որպես ոստիկանության աշխատակիցներ և պահանջել, որպեսզի դուրս գան երթևեկելի հատվածից, սակայն նրանք, չենթարկվելով իրենց պահանջներին, քաշքշել և հարվածել են իրենց: Այդ ժամանակ նկատել է, որ իր ճանաչած անձը հարվածել է Միհրան Քեշիշյանին ու Կարեն Սարգսյանին: Ռոման Կիրակոսյանը հայտարարել է, որ անձին ճանաչել է հասակից, ճակատից, մազերից և դիմագծերից: Իսկ Սամսոն Խաչատրյանը հայտարարել է, որ իրեն որևէ մեկը ոստիկան չի ներկայացել, իրեն ճանաչողին չի ճանաչում, այդ ժամանակ տղայական քաշքշուկ է եղել, ինքը փորձել է բաժանել, իրեն հայհոյել են, հարվածել ոտքին, ինքն էլ ինքնապաշտպանվելու նպատակով ձեռք է գցել:
Զննություն կատարելու մասին 2011 մարտի 16-ի արձանագրության համաձայն` «zlm.am» կայքի հայկական տեսանյութեր բաժնի «Հայտուբ» բաժնի տեսանյութերի մեջ առկա է «Մարտիմեկյան միջադեպեր» անվանումով տեսանյութ, որի ուսումնասիրությամբ պարզվել է, որ տեսանյութի աջ ստորին հատվածում առկա է «Երևան, Մարտի 1, 2011թ.» գրառումը, իսկ ձախակողմյան վերջին հատվածում առկա է «ԳԱԼԱ» հեռուստաընկերության հոլոգրաֆիկ նշանը: Տեսանյութի ուսումնասիրությամբ պարզվել է, որ այն պարունակում է տեղեկություններ 2011 թվականի մարտի 1-ին Հայ ազգային կոնգրեսի կողմից կազմակերպված հանրահավաքի ժամանակ Սամսոն Խաչատրյանի կողմից ոստիկանության ծառայողներ, քրեական գործով տուժողներ Կարեն Սարգսյանի և Միհրան Քեշիշյանի նկատմամբ բռնություն գործադրելու վերաբերյալ: Տեսանյութի ընդհանուր տևողությունը չորս րոպե վեց վայրկյան է: Տեսանյութի զննությամբ պարզվել է, որ հանրահավաքի մասնակիցներից մի խումբ անձինք դուրս են եկել Մաշտոց-Կորյուն փողոցների երթևեկելի հատված և չենթարկվելով ոստիակնության ծառայողների օրինական պահանջներին` չեն ազատել երթևեկելի հատվածը: Տեսանյութի 03:07 րոպեին Սամսոն Խաչատրյանը վիճաբանում է ՀՀ ոստիկանության Էրեբունու բաժնի պետի օպերատիվ գծով տեղակալ Միհրան Քեշիշյանի և ՀՀ ոստիկանության Երևան քաղաքի վարչության քրեական հետախուզության բաժնի 3-րդ բաժանմունքի ավագ օպերլիազոր Կարեն Սարգսյանի հետ: Այնուհետև 03:10 րոպեին Սամսոն Խաչատրյանը ձախ ձեռքի բռունցքով հարվածում է Կարեն Սարգսյանի դեմքին, որից հետո 03:13 րոպեի սահմաններում ձախ ձեռքով հարվածում է Միհրան Քեշիշյանին, որից հետո մտնելով հանրահավաքի մյուս մասնակիցների մեջ` անհետանում է: Կարեն Սարգսյանը հայտարարել է, որ տեսանյութում տեղի ունեցած միջադեպը եղել է այն ժամանակ, երբ իրենք արդեն Սամսոն Խաչատրյանին և հանրահավաքի մյուս մասնակիցներին ներկայացել են որպես ոստիկանության ծառայողներ և ցույց տվել իրենց վկայականները, որից հետո տեղի է ունեցել տեսանյությում առկա միջադեպը, որի ժամանակ Սամսոն Խաչատրյանը հարվածել է թե իրեն, թե Միհրան Քեշիշյանին: Նշված տեսանյությում պատկերված է հենց այն դեպքը, որտեղ Սամսոն Խաչատրյանը հարվածել է իրեն և Միհրան Քեշիշյանին: Զննությունն ավարտելուց հետո տեսանյութը ձայնագրառվել է լազերային սկավառակի վրա և կցվել արձանագրությանը:
Այլ փաստաթուղթ հանդիսացող սկավառակը որպես ապացույց ճանաչելու և քրեական գործին կցելու մասին 2011 թվականի մարտի 18-ի որոշման համաձայն` թիվ 13112311 քրեական գործով «ԶԼՄ.ԱՄ» կայքի հայկական տեսանյութեր բաժնի «Հայտուբ» ենթաբաժնի տեսանյութերի մեջ առկա «Մարտիմեկյան միջադեպ» անվանումով, չորս րոպե վեց վայրկյան տևողությամբ այլ փաստաթուղթ հանդիսացող տեսանյութի լազերային սկավառակը ճանաչվել է որպես ապացույց և կցվել քրեական գործին:
Քրեական գործով ապացույց ճանաչված այլ փաստաթուղթ հանդիսացող լազերային սկավառակը հետազոտվել է քրեական գործի դատական քննության ընթացքում:
ՀՀ ոստիկանության ինֆորմացիոն կենտրոնի պահանջագրի համաձայն` Սամսոն Սարգսի Խաչատրյանը նախկինում դատապարտված չի եղել:
«ՀՀ բռնցքամարտի ֆեդերացիա» հասարակական կազմակերության նախագահի կողմից տրված բնութագրի համաձայն` Սամսոն Խաչատրյանը սպորտի վաստակավոր վարպետ է, բազմաթիվ մրցաշարերի հաղթող և մրցանակակիր, մասնակցել է արցախյան պատերազմին, ստեղծել «Սամսոն» ջոկատը, ավարտել է Վանաձորի «Հովհաննես Թումանյանի անվան» պետական մանկավարժական ինստիտուտը, պարգևատրվել է «ԽՍՀՄ ժողովուրդների բարեկամության» շքանշանով, ամուսնացած է, ունի երկու որդի, երկու դուստր:
2010 թվականի հունիսի 25-ին տրված հիվանդության պատմագրի քաղվածքի համաձայն` Սամսոն Սարգսի Խաչատրյանը վատառողջ է:
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի 2011 թվականի մարտի 15-ի որոշման համաձայն` Սամսոն Սարգսի Խաչատրյանի նկատմամբ որպես խափանման միջոց ընտրվել է կալանավորումը: Կալանավորման սկիզբը հաշվվել է 2011 թվականի մարտի 13-ից:
3. Դատարանի իրավական վերլուծությունները.
Վերոգրյալ ապացույցները վերլուծելու և համադրելու արդյունքում Դատարանը գալիս է այն եզրահանգման, որ Սամսոն Սարգսի Խաչատրյանը 2011 թվականի մարտի 1-ին` ժամը 18:00-ի սահմաններում, Երևան քաղաքի Մաշտոցի պողոտայի և Կորյունի փողոցի հատման հատվածում Հայ ազգային կոնգրեսի կողմից կազմակերպված հանրահավաքի ժամանակ, քրեական գործով չպարզված անձանց հետ, փակել է Մաշտոցի պողոտայի երթևեկելի հատվածը, որի ընթացքում հարվածել է ՀՀ ոստիկանության Էրեբունու բաժնի պետի օպերատիվ գծով տեղակալ Միհրան Քեշիշյանին և ՀՀ ոստիկանության Երևան քաղաքի վարչության քրեական հետախուզության բաժնի 3-րդ բաժանմունքի ավագ օպերլիազոր Կարեն Սարգսյանին` կապված վերջինների կողմից հասարակական կարգը պահպանելու` իրենց ծառայողական պարտականությունները կատարելու հետ, այն է` ազատել Երևան քաղաքի Մաշտոցի պողոտայի երթևեկելի հատվածը և չխոչընդոտել տրանսպորտի երթևեկությանը, ինչի արդյունքում Միհրան Քեշիշյանին պատճառվել է մարմնական վնասվածք` դեմքի աջ կեսի շրջանի քերծվածքի ձևով, որն առողջությանը թեթև վնաս չի պատճառել: Այսինքն` Սամսոն Սարգսի Խաչատրյանը առողջության համար ոչ վտանգավոր բռնություն է գործադրել իշխանության ներկայացուցիչների նկատմամբ` կապված նրանց կողմից իրենց ծառայողական պարտականությունները կատարելու հետ, ինչը համապատասխանում է ՀՀ քրեական օրենսգրքի 316-րդ հոդվածի 1-ին մասի հատկանիշներին:
Ապացուցված է Սամսոն Սարգսի Խաչատրյանի մեղավորությունը ՀՀ քրեական օրենսգրքի 316-րդ հոդվածի 1-ին մասով նախատեսված արարքը կատարելու մեջ:
Սամսոն Խաչատրյանի անձը դրականորեն բնութագրող հանգամանքներ են ամուսնացած լինելը, չորս երեխա ունենալը, բարձրագույն կրթություն ունենալը, սպորտի վաստակավոր վարպետ լինելը և «ԽՍՀՄ ժողովուրդների բարեկամության» շքանշանով պարգևատրված լինելը:
Դատարանը գտնում է, որ Սամսոն Խաչատրյանի պատասխանատվությունն ու պատիժը մեղմացնող հանգամանքներ պետք է դիտել նախկինում արատավորված` դատապարտված չլինելը, դրականորեն բնութագրվելը, արցախյան ազատամարտին մասնակցելը և վատառողջ լինելը:
Կատարած արարքի համար ամբաստանյալ Սամսոն Խաչատրյանը ենթակա է քրեական պատասխանատվության և պատժի:
Դատարանը, հաշվի առնելով Սամսոն Խաչատրյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ Սամսոն Խաչատրյանի կողմից կատարված արարքի համար ՀՀ քրեական օրենսգրքի 316-րդ հոդվածի 1-ին մասի սանկցիայով նախատեսված է պատիժ նաև ազատազրկման ձևով, գտնում է, որ նրա նկատմամբ պատիժ պետք է նշանակել ազատազրկման ձևով:
Համաձայն ՀՀ քրեական դատավարության օրենսգրքի 360-րդ հոդվածի` դատավճիռ կայացնելիս դատարանը մի շարք այլ հարցերի հետ միասին պետք է լուծի նաև այն հարցը, թե ամբաստանյալն արդյոք պետք է կրի իր նկատմամբ նշանակված պատիժը, թե` ոչ:
ՀՀ քրեական օրենսգրքի 70-րդ հոդվածի համաձայն` եթե դատարանը, ազատազրկման ձևով պատիժ նշանակելով, հանգում է հետևության, որ դատապարտյալի ուղղվելը հնարավոր է առանց պատիժը կրելու, ապա կարող է որոշում կայացնել այդ պատիժը պայմանականորեն չկիրառելու մաuին: ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ-124/07 որոշմամբ ՀՀ քրեական օրենսգրքի 70-րդ հոդվածի կիրառման կապակցությամբ արտահայտել է այն իրավական դիրքորոշումը, որ վկայակոչված հոդվածի կիրառումը հանցագործության տեսակի հետ կապված որևէ սահմանափակման չի ենթարկվում և դրա կիրառումը սահմանափակված չէ նաև հանցավոր արարքի վտանգավորության աստիճանով ու բնույթով, ինչպես նաև անձանց շրջանակով, որոնց նկատմամբ այն չի կարող կիրառվել: ՀՀ վճռաբեկ դատարանը միաժամանակ նշել է. «ՀՀ քրեական օրենսգրքի 70-րդ հոդվածի կիրառման հիմնական պայմանը պատճառաբանված լինելն է: Նշանակված պատիժը պայմանականորեն չկիրառելիս դատարանը պետք է հանգամանորեն քննության առնի ինչպես հանցագործության կատարման, այնպես էլ հանցավորի անձին վերաբերող բոլոր հանգամանքները: Կարևորն այն է, որ հանգի հիմնավոր եզրակացության, որ դատապարտյալի ուղղումը հնարավոր է առանց նշանակված պատիժը կրելու»:
ՀՀ վճռաբեկ դատարանը մեկ այլ` 2008 թվականի փետրվարի 1-ի թիվ ՎԲ-01/08 որոշմամբ նշել է, որ պատիժը պայմանականորեն չկիրառելու իրավական հիմքերը բացահայտելու համար ՀՀ քրեական օրենսգրքի 70-րդ հոդվածում սահմանված իրավադրույթներն անհրաժեշտ է մեկնաբանել նաև ՀՀ քրեական օրենսգրքի 48-րդ հոդվածի 2-րդ մասով ամրագրված պատժի նպատակների համատեքստում, այսինքն` պատիժը պայմանականորեն չկիրառելու մասին որոշում կայացնելիս իրավասու դատարանը յուրաքանչյուր դեպքում պետք է քննարկի նաև պատժի` սոցիալական արդարության վերականգնման և պատժի ենթարկված անձի ուղղվելու նպատակների իրացման հարցը: ՀՀ վճռաբեկ դատարանը միաժամանակ նշել է, որ սոցիալական արդարությունը վերականգնելու և պատժի ենթարկված անձի ուղղվելու մասին կարող է վկայել հանցագործությունից հետո հանցավորի դրսևորած վարքագիծը, մասնավորապես` տուժողին պատճառած վնասը հարթելը կամ այն հարթելուն ուղղված ողջամիտ միջոցներ ձեռնարկելը:
Դատարանը, հաշվի առնելով Սամսոն Խաչատրյանի արարքի բնույթն ու կատարման հանգամանքները, նրան դրականորեն բնութագրող և պատասխանատվությունն ու պատիժը մեղմացնող վերը նշված հանգամանքները, գալիս է այն հետևության, որ ամբաստանյալ Սամսոն Խաչատրյանի ուղղվելը հնարավոր է առանց նրա կողմից ազատազրկման ձևով նշանակված պատիժը կրելու, այսինքն` կիրառելի է ՀՀ քրեական օրենսգրքի 70-րդ հոդվածը:
Դատարանի այս հետևությունը պայմանավորված է նաև այն հանգամանքով, որ սույն քրեական գործով տուժողներ Միհրան Քեշիշյանը և Կարեն Սարգսյանը հայտնել են, որ ամբաստանյալից որևէ պահանջ չունեն:
ՀՀ քրեական դատավարության օրենսգրքի 374-րդ հոդվածի համաձայն` ամբաստանյալի նկատմամբ պատիժը պայմանականորեն չկիրառելու դեպքում, եթե ամբաստանյալը կալանքի տակ է գտնվում, դատարանը նրան անհապաղ ազատում է կալանքից դատական նիստի դահլիճում: Քանի որ ամբաստանյալ Սամսոն Խաչատրյանի նկատմամբ նշանակված պատիժը վերոգրյալ հիմնավորմամբ պետք է պայմանականորեն չկիրառվի, ուստի նրա նկատմամբ ընտրված խափանման միջոցը` կալանավորումը, պետք է վերացնել և նրան անհապաղ ազատ արձակել:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերն ամբաստանյալ Սամսոն Խաչատրյանից ենթակա չեն բռնագանձման, քանի որ տուժողներ Միհրան Քեշիշյանը և Կարեն Սարգսյանը, հնարավորությունը ունենալով ներկայացնելու իրենց շահերը, ամբաստանյալին որևէ պահանջ չեն ներկայացրել: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մասի 2-6-րդ կետերով նախատեսված դատական ծախսերին, ապա դրանք նույնպես ամբաստանյալից ենթակա չեն բռնագանձման, քանի որ 4-6-րդ կետերով նախատեսված դատական ծախսեր ընդհանրապես չկան, իսկ 2-րդ և 3-րդ կետերով նախատեսված ծախսերի վերաբերյալ տվյալները բացակայում են, ավելին` նման պահանջ Դատարան չի ներկայացվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Սամսոն Սարգսի Խաչատրյանին մեղավոր ճանաչել ՀՀ քրեական օրենսգրքի 316-րդ հոդվածի 1-ին մասով և պատիժ նշանակել ազատազրկում` 1 (մեկ) տարի ժամկետով` պատժի ժամկետին հաշվակցելով արգելանքի տակ գտնվելու ժամկետը` 1 (մեկ) ամիս 6 (վեց) օրը:
ՀՀ քրեական օրենսգրքի 70-րդ հոդվածի կիրառմամբ Սամսոն Սարգսի Խաչատրյանի նկատմամբ նշանակված պատիժը պայմանականորեն չկիրառել և սահմանել փորձաշրջան` 1 (մեկ) տարի ժամկետով:
Սամսոն Սարգսի Խաչատրյանի նկատմամբ ընտրված խափանման միջոցը` կալանավորումը, վերացնել և նրան անհապաղ ազատել կալանքից:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ