Գործ թիվ ԵԿԴ/ 0060/01/


ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

ՆԱԽԱԳԱՀՈՂ ԴԱՏԱՎՈՐ՝ Գ. Ավետիսյան
ՔԱՐՏՈՒՂԱՐՈՒԹՅԱՄԲ՝ Հ.Հովհաննիսյանի
ՄԱՍՆԱԿՑՈՒԹՅԱՄԲ՝
ՄԵՂԱԴՐՈՂ՝ Ս. Աբրահամյանի
ՊԱՇՏՊԱՆ՝ Կ. Աղաջանյանի
ՏՈՒԺՈՂ` Վ. Պետրոսյանի
2011թ. մայիսի 11-ին, դռնբաց դատական նիստում, դատարանում, քննեց քրեական գործն ըստ մեղադրանքի Մանիկ Մարտիրոսի Մալխասյանի` ծնված 1953թ. փետրվարի 1-ին
Վանաձոր քաղաքում, ազգությամբ` հայ, ՀՀ քաղաքացի, միջնակարգ-մասնագիտական կրթությամբ, ամուսնացած, խնամքին 5 թոռները, չի աշխատում, նախկինում չդատված, հաշվառված է` Երևան, Բագրատունյաց փողոցի 16-րդ շենքի 14-րդ բնակարանում, փաստացի բնակվում է` Երևանի, Գլինկայի փողոցի թիվ 9 տանը, մեղադրվում է ՀՀ քրեական օրենսգրքի 258-րդ հոդվածի 1-ին մասով։ Առաջադրված մեղադրանքում իրեն մեղավոր ճանաչեց։

Քրիստինե Էդուարդի Մալխասյանի` ծնված
1975թ. հոկտեմբերի 5-ին Երևանում, ազգությամբ` հայ, ՀՀ քաղաքացի, միջնակարգ կրթությամբ, ամուսնալուծված, չի աշխատում, խնամքին են գտնվել մինչև 14 տարեկան 5 երեխաները, երկու անգամ դատված` 1. Երևանի Շենգավիթ համայնքի առաջին ատյանի դատարանի 2004թ. դեկտեմբերի 24-ի դատավճռով ՀՀ քրեական օրենսգրքի 178-րդ հոդվածի 2-րդ մասի 1-ին և 3-րդ կետերով` դատապարտվել է ազատազրկման` 2 տարի ժամկետով, պատժից ազատվել է ժամկետը լրանալու կապակցությամբ, 2. Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2010թ. դեկտեմբերի 23-ի դատավճռով ՀՀ քրեական օրենսգրքի 178-րդ հոդվածի 2-րդ մասի 1-ին, 2-րդ և 3-րդ կետերով դատապարտվել է ազատազրկման` 3 տարի ժամկետով, դատվածությունը` չմարված, Երևանի Կենտրոն և Նորք Մարաշ վարչական շրջանների ընդհանուր իրավասության դատարանի դատավճռով կալանքի տակ է 2010թ դեկտեմբերի 22-ից, հաշվառված է` Երևանի, Ֆրունզեի փողոցի թիվ 6/7շենքի 34-րդ բնակարանում, փաստացի բնակվել է` Երևանի, Գլինկայի փողոցի թիվ 9 տանը, մեղադրվում է ՀՀ քրեական օրենսգրքի 316-րդ հոդվածի 1-ին մասով։ Առաջադրված մեղադրանքում իրեն մեղավոր ճանաչեց։


Թիվ 15111810 քրեական գործը ՀՀ քրեական օրենսգրքի 258-րդ հոդվածի 1-ին մասով հարուցվել է 2010 թվականի դեկտեմբերի 8-ին ՀՀ ոստիկանության ՔԳՎ Երևանի ՔՎ Կենտրոնականի քննչական բաժնի կողմից։
Ամբաստանյալ Մանիկ Մարտիրոսի Մալխասյանին` Հայաստանի Հանրապետության քրեական օրենսգրքի 258-րդ հոդվածի 1-ին մասով, իսկ ամբաստանյալ Քրիստինե Էդուարդի Մալխասյանին Հայաստանի Հանրապետության քրեական օրենսգրքի 316-րդ հոդվածի 1-ին մասով մեղադրանք է առաջադրվել հետևյալ արարքի համար`
2010թ. նոյեմբերի 4-ին Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում կայացել է դատական նիստ, որտեղ քննվել է թիվ 15106910 քրեական գործն, ըստ մեղադրանքի Քրիստինե Էդուարդի Մալխասյանի ՀՀ քրեական օրենսգրքի 178-րդ հոդվածի 2-րդ մասի 1-ին, 2-րդ և 3-րդ կետերով։ Դատական նիստին ներկա է գտնվել ամբաստանյալի մայրը` ամբաստանյալ Մանիկ Մալխասյանը, որի նկատմամբ` տեղից ելույթներ ունենալու միջոցով դատական նիստի կարգը մի քանի անգամ խանգարելու համար, դատարանի որոշմամբ կիրառվել է դատական սանկցիա` հեռացում դատական նիստերի դահլիճից։ Ամբաստանյալ Մ.Մալխասյանը չի ենթարկվել դատական նիստը նախագահողի` դահլիճից հեռանալու կարգադրությանը, որի պատճառով դահլիճից դուրս է հրավիրվել ծառայություն իրականացնող, իշխանության ներկայացուցիչներ հանդիսացող ՀՀ դատական դեպարտամենտի դատական կարգադրիչների ծառայության Կենտրոնի ստորաբաժանման դատական կարգադրիչներ` տուժող Վաչագան Ռաշիդի Պետրոսյանի և վկա Արմեն Արթուրի Սեդրակյանի կողմից։
Դրանից հետո ամբաստանյալ Մանիկ Մալխասյանը, դատարանի առաջին հարկի միջանցքում, շուրջ 30 րոպե տևողությամբ կոպիտ կերպով խախտել է հասարակական կարգը և արտահայտել բացահայտ անհարգալից վերաբերմունք հասարակության նկատմամբ, այսինքն` աղմկել է և հայհոյանքներ տվել դատական կարգադրիչներ` Վաչագան Պետրոսյանի և Արմեն Սեդրակյանի հասցեին, իր այդ դիտավորյալ գործողություններով խանգարելով նաև դատարանի բնականոն աշխատանքը։ Վերջիններիս կողմից դատարանի շենքից դուրս բերվելուց հետո, ամբաստանյալ Մ.Մալխասյանը շարունակել է իր դիտավորյալ գործողությունները` ձեռքերով և ոտքերով հարվածել է դատարանի շենքի ապակյա դռներին և պատերին։
Դատական կարգադրիչներ` Վ.Պետրոսյանը և Ա.Սեդրակյանը, ինչպես նաև աղմուկի ձայները լսելով նրանց միացած դատական կարգադրիչների ծառայության Կենտրոնի ստորաբաժանման պետ, վկա Արթուր Հենրիկի Փիլոսյանը փորձել են կարգի հրավիրել Մ.Մալխասյանին, ով սակայն չի ենթարկվել նրանց օրինական պահանջներին և շարունակել է աղմուկը` հրահրելով` իր մանկահասակ թոռներին հարվածել դատարանի շենքի ապակյա դռանը և պատերին։
Այդ ժամանակ ամբաստանյալ Քրիստինե Մալխասյանը լքել է դատական նիստերի դահլիճը, մոտեցել վիճաբանողներին և տեսնելով, որ ծառայություն իրականացնող դատական կարգադրիչ Վաչագան Պետրոսյանը փորձել է խափանել իր մոր` ամբաստանյալ Մանիկ Մալխասյանի կողմից հասարակական կարգը խախտելու դիտավորյալ գործողությունները, Վ.Պետրոսյանի նկատմամբ գործադրել է նրա առողջության համար ոչ վտանգավոր բռնություն` կապված վերջինիս կողմից իր ծառայողական պարտականությունները կատարելու հետ։ Այն է. մոտենալով Վ.Պետրոսյանին, իր հագից հանել է կոշիկները, դրանցից մեկով, դիտավորությամբ երկու անգամ հարվածել Վ.Պետրոսյանի գլխին, պատճառելով մարմնական վնասվածք` ձախ գագաթա-ծոծրակային շրջանի արյունազեղման ձևով, որն առողջությանը թեթև վնասի հատկանիշներ չի պարունակում։
Դրանից հետո ամբաստանյալ Քրիստինե Մալխասյանը վերադարձել է դատական նիստերի դահլիճ, քիչ անց դարձյալ դուրս եկել դատարանի շենքից, որից հետո` մոր և երեխաների հետ միասին հեռացել է դեպքի վայրից։
Մինչ դատաքննությունը սկսելը ամբաստանյալներ Մանիկ Մարտիրոսի Մալխասյանը և Քրիստինե Էդուարդի Մալխասյանը միջնորդեցին դատական քննությունն անցկացնել արագացված կարգով և դատարանում հայտարարեցին, որ գիտակցում են իրենց կողմից ներկայացված միջնորդության բնույթը և հետևանքները, միջնորդությունը ներկայացրել են կամավոր՝ խորհրդակցելով պաշտպանների հետ, գիտակցում են արագացված դատաքննություն անցկացնելու հետևանքները, առաջադրված մեղադրանքն իրենց պարզ և հասկանալի է, համաձայն են իրենց առաջադրված մեղադրանքի հետ, առաջադրված մեղադրանքում իրենց մեղավոր են ճանաչում։
Մեղադրողը և տուժող Վ.Պետրոսյանը դատական քննությունն արագացված կարգով անցկացնելու դեմ չառարկեց։
Համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմանները՝ դատարանը որոշում է կայացրել արագացված կարգով դատական քննություն անցկացնելու մասին։
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Մանիկ Մարտիրոսի Մալխասյանը կատարել է ՀՀ քրեական օրենսգրքի 258-րդ հոդվածի 1-ին մասով նախատեսված արարքը, իսկ ամբաստանյալ Քրիստինե Էդուարդի Մալխասյանը` ՀՀ քրեական օրենսգրքի 316-րդ հոդվածի 1-ին մասով նախատեսված արարքը։
Դատարանը պատիժը սահմանելիս հաշվի է առնում ամբաստանյալ Մ. Մալխասյանի կատարած հանցանքի` խուլիգանության` հանրության համար վտանգավորության աստիճանը և բնույթը ու ամբաստանյալ Մ. Մալխասյանի անձնավորությունը։
Դատարանը պատիժը սահմանելիս հաշվի է առնում ամբաստանյալ Ք. Մալխասյանի կատարած հանցանքի` իշխանության ներկայացուցչի նկատմամբ առողջության համար ոչ վտանգավար բռնություն գործադրելու` կապված վերջինիս կողմից իր ծառայողական պարտականությունները կատարելու հետ` հանրության համար վտանգավորության աստիճանը և բնույթը ու ամբաստանյալ Ք. Մալխասյանի անձնավորությունը։
Դատարանը որպես պատասխանատվությունը և պատիժը մեղմացնող հանգամանք դիտում է այն, որ ամբաստանյալ Մանիկ Մալխասյանը 58 տարեկան, իսկ Ք. Մալխասյանը 36 տարեկան կանայք են, Մ.Մալխասյանը հանցանքը կատարում է առաջին անգամ, նախկինում դատված, արատավորված չի եղել, Քրիստինե Մալխասյանը ունի մինչև 14 տարեկան 5 երեխա, ովքեր գտնվում են ամբաստանյալ Մանիկ Մալխասյան խնամքին, Մանիկ Մալխասյանը և Քրիստինե Մալխասյանը ընդունում են իրենց մեղսագրված հանցանքը և զղջում դրա համար, տուժողը խնդրել է ամբաստանյալների նկատմամբ մեղմ պատիժ սահմանել։
Պատասխանատվությունը և պատիժը ծանրացնող հանգամանքներ չկան։
Կատարած արարքների համար ամբաստանյալներ Մ. Մալխասյանը և Քրիստինե Մալխասյանը ենթակա են պատժի` Քրիստինե Մալխասյանը ազատազրկման ձևով, նկատի ունենալով, որ նրան նպատակահարմար է պատժիչ դաստիարակչական ներգործության ենթարկել հասարակությունից մեկուսացնելու պայմաններում։ Այդպիսի հետևության դատարանը գալիս է հաշվի առնելով արարքի բոլոր փաստական և քրեաիրավական բնութագրերը, պատասխանատվությունը և պատիժը մեղմացնող հանգամանքները, հանցավորի անձը բնութագրող տվյալները, մասնավորապես այն, որ հանցագործությունը կատարվել է վերջինիս վերաբերյալ քրեական գործի դատաքննության ընթացքում` դատարանի շենքում, դատարանի աշխատողի նկատմամբ։
Դատարանը գտավ, որ ամբաստանյալ Մանիկ Մալխասյանի նկատմամբ ընտրված խափանման միջոցը` ստորագրություն չհեռանալու մասին պետք է թողնել անփոփոխ մինչև դատավճռի օրինական ուժի մեջ մտնելը։
Դատարանը գտավ, որ ամբաստանյալ Քրիստինե Մալխասյանի նկատմամբ ընտրված խափանման միջոց` կալանավորումը պետք է թողնել անփոփոխ` մինչև դատավճռի օրինական ուժի մեջ մտնելը։
Դատարանը գտավ, որ պատժի սկիզբը պետք է հաշվել Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2010թ. դեկտեմբերի 22-ի դատավճռով նշանակված պատժի սկզբի օրվանից` 2010թ. դեկտեմբերի 22-ից, նկատի ունենալով, որ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2010թ. դեկտեմբերի 22-ի դատավճռով նշանակված պատժին` ՀՀ քրեական օրենսգրքի 66-րդ հոդվածի հիմունքներով պետք է մասնակի գումարել սույն դատավճռով նշանակված պատիժը։
Ղեկավարվելով ՀՀ քրեական դատավարության օրենսգրքի 357-360-րդ, 364-365-րդ, 369-372-րդ, 3753-րդ հոդվածներով՝ դատարանը
Վ Ճ Ռ Ե Ց
Ամբաստանյալ Մանիկ Մարտիրոսի Մալխասյանին մեղավոր ճանաչել Հայաստանի Հանրապետության քրեական օրենսգրքի 258-րդ հոդվածի 1-ին մասով և դատապարտել տուգանքի նվազագույն աշխատավարձի երեսնապատիկի` երեսուն հազար ՀՀ դրամի չափով։
Ամբաստանյալ Մանիկ Մարտիրոսի Մալխասյանի նկատմամբ ընտրված խափանման միջոցը` ստորագրություն չհեռանալու մասին թողնել անփոփոխ` մինչև դատավճռի օրինական ուժի մեջ մտնելը։
Ամբաստանյալ Քրիստինե Էդուարդի Մալխասյանին մեղավոր ճանաչել Հայաստանի Հանրապետության քրեական օրենսգրքի 316-րդ հոդվածի 1-ին մասով և դատապարտել ազատազրկման մեկ տարի ժամկետով։
ՀՀ քրեական օրենսգրքի 66-րդ հոդվածի 6-րդ կետի հիմունքներով նշանակված պատիժը մասնակի գումարելու միջոցով` Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2010թ. դեկտեմբերի 22-ի դատավճռով նշանակված երեք տարի ժամկետով ազատազրկում պատժին գումարել սույն դատավճռով` Հայաստանի Հանրապետության քրեական օրենսգրքի 316-րդ հոդվածի 1-ին մասով նշանակված` մեկ տարի ժամկետով ազատազրկում պատժից վեց ամիս ժամկետով ազատազրկումը, Քրիստինե Էդուարդի Մալխասյանի նկատմամբ վերջնական պատիժ սահմանել ազատազրկում` երեք տարի վեց ամիս ժամկետով։
Պատիժը կրելու սկիզբը հաշվել 2010թ. դեկտեմբերի 22-ից` Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2010թ. դեկտեմբերի 22-ի դատավճռով նշանակված պատժի սկզբի օրվանից։
Ամբաստանյալ Քրիստինե Էդուարդի Մալխասյանը պատիժը կրելու է ՀՀ արդարադատության նախարարության համապատասխան քրեակատարողական հիմնարկում։
Ամբաստանյալ Քրիստինե Էդուարդի Մալխասյանի նկատմամբ ընտրված խափանման միջոց` կալանավորումը թողնել անփոփոխ` մինչև դատավճռի օրինական ուժի մեջ մտնելը։
Դատավճիռը հրապարակման օրվանից մեկամսյա ժամկետում կարող է բողոքարկվել Հայաստանի Հանրապետության վերաքննիչ քրեական դատարան` բացառությամբ ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքի։

ԴԱՏԱՎՈՐ՝ Գ. Ավետիսյան