Ո Ր Ո Շ ՈՒ Մ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Գործ. ԵԿԴ/0042/01/11
25 հոկտեմբերի 2011թ. ք.Երևան
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ`
ՆԱԽԱԳԱՀՈՂ ԴԱՏԱՎՈՐ` Գ. ՄԵԼԻՔ-ՍԱՐԳՍՅԱՆ
ԴԱՏԱՎՈՐՆԵՐ` Մ.ՊԵՏՐՈՍՅԱՆ
Ս. ՀԱՄԲԱՐՁՈՒՄՅԱՆ
ՔԱՐՏՈՒՂԱՐՈՒԹՅԱՄԲ` Է. ՀԱՐՈՒԹՅՈՒՆՅԱՆՒ

ՄԱՍՆԱԿՑՈՒԹՅԱՄԲ`
ՄԵՂԱԴՐՈՂ` Կ. ԲԱՏԻԿՅԱՆԻ
ՊԱՇՏՊԱՆ` Վ. ՄԱՆՈՒԿՅԱՆԻ
ԱՄԲԱՍՏԱՆՅԱԼ` Ն. ՍԱՐԳՍՅԱՆԻ
ՏՈՒԺՈՂ` Ա. ՄՆԱՑԱԿԱՆՅԱՆԻ
ՏՈՒԺՈՂԻ ՆԵՐԿԱՅԱՑՈՒՑԻՉ` Վ. ՄԿՐՏՉՅԱՆԻ

Դռնբաց դատական նիստում վճռաբեկության կարգով քննության առնելով ամբաստանյալ Ն. Սարգսյանի շահերի պաշտպան Վ. Մանուկյանի վերաքննիչ բողոքը` քրեական գործով ըստ մեղադրանքի Նարեկ Գևորգի Սարգսյանի` ՀՀ քրեական օրենսգրքի 112-րդ հոդվածի 2-րդ մասի 1-ին կետով, Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 2011 թվականի հուլիսի 21-ի դատավճռի դեմ.

Պ Ա Ր Զ Ե Ց

1/. Գործի դատավարական նախապատմությունը և փաստական հանգամանքները.
ՀՀ ոստիկանության ՔԳՎ Երևան քաղաքի ՔՎ Կենտրոնականի քննչական բաժնի քննիչ Ա.Մանուկյանը 2010թ. օգոստոսի 25-ի որոշմամբ ՀՀ քրեական օրենսգրքի 112-րդ հոդվածի 2-րդ մասի 1-ին կետով հարուցել է թիվ 13142210 քրեական գործը։
ՀՀ ոստիկանության ՔԳՎ Երևան քաղաքի ՔՎ ԾՀՔ բաժնի ՀԿԳ ավագ քննիչ Ա.Թադևոսյանը 2010թ. օգոստոսի 25-ի որոշումներով թիվ 13142210 քրեական գործն ընդունել է իր վա-րույթ և ձերբակալել է Նարեկ Գևորգի Սարգսյանին։
ՀՀ ոստիկանության ՔԳՎ Երևան քաղաքի ՔՎ ԾՀՔ բաժնի ՀԿԳ ավագ քննիչ Ա.Թադևոսյանը 2010թ. օգոստոսի 28-ի որոշմամբ Նարեկ Գևորգի Սարգսյանին ներգրավել է որպես մեղադրյալ և նրան մեղադրանք է առաջադրել ՀՀ քրեական օրենսգրքի 112-րդ հոդվածի 2-րդ մասի 1-ին կետով։
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 2010թ. օգոստոսի 28-ի որոշմամբ Ն.Սարգսյանի նկատմամբ` որպես խափանման միջոց, ընտրվել է կալանավորումը` երկու ամիս ժամկետով։
ՀՀ ոստիկանության ՔԳՎ Երևան քաղաքի ՔՎ ԾՀՔ բաժնի պետի տեղակալ Ա.Կոստան-յանը 2010թ. նոյեմբերի 11-ի որոշմամբ թիվ 13142210 քրեական գործն ընդունել է իր վարույթ։
ՀՀ ոստիկանության ՔԳՎ Երևան քաղաքի ՔՎ ԾՀՔ բաժնի պետի տեղակալ Ա.Կոստանյանը 2011թ. փետրվարի 14-ի որոշումներով Ն.Սարգսյանին 2010թ. օգոստոսի 28-ին ՀՀ քրեական օրենսգրքի 112-րդ հոդվածի 2-րդ մասի 1-ին կետով առաջադրված մեղադրանքը լրացրել, նրան ներգրավել է որպես մեղադրյալ և նոր մեղադրանք է առաջադրել երկու անձանց դիտավո-րությամբ կյանքին վտանգ սպառնացող առողջությանը ծանր վնաս պատճառելու համար` նախատեսված ՀՀ քրեական օրենսգրքի 112-րդ հոդվածի 2-րդ մասի 1-ին կետով։
2011թ. մարտի 9-ին թիվ 13142210 քրեական գործը մեղադրական եզրակացությամբ ու-ղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան` ըստ էության քննելու համար։
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասու-թյան դատարանի (դատավոր Գ.Պողոսյան) 2011թ. մարտի 12-ի որոշմամբ Նարեկ Գևորգի Սարգսյանի վերաբերյալ ՀՀ քրեական օրենսգրքի 112-րդ հոդվածի 2-րդ մասի 1-ին կետով քրեական գործն ընդունվել է վարույթ, իսկ 2011թ. մարտի 25-ի որոշմամբ նշանակվել է դատաքննության։
Ամբաստանյալ Նարեկ Սարգսյանին ՀՀ քրեական օրենսգրքի 112-րդ հոդվածի 2-րդ մասի 1-ին կետով մեղադրանք է առաջադրվել այն բանի համար, որ նա. «2010թ. օգոստոսի 24-ին՝ ժա-մը 22-ի սահմաններում, Երևան քաղաքի Գ.Քոչար փողոցի 21 հասցեում տեղակայված «Առլեկի-նո» կարաոկե ակումբի դիմաց վիճաբանել է Ազատ Մկրտչյանի և Արամ Մնացականյանի հետ, որի ընթացքում կյանքին վտանգ սպառնացող, առողջությանը ծանր վնաս պատճառելու դիտավորությամբ, իր մոտ պահվող սուր ծակող-կտրող գործիքով բազմաթիվ հարվածներ է հասցրել վերջիններիս՝ մասնավորապես հինգ հարված Ազատ Մկրտչյանին՝ պատճառելով որովայնի ծակած-կտրած թափանցող վերքի, կրծքավանդակի ձախ կեսի հետին մակերեսի շրջանի կտրած-ծակած թափանցող վերքի՝ ձախ թոքի ստորին բլթի և ստոծանու մասնակի վնասումով, աջ նախաբազկի կտրած-ծակած վերքի՝ ծղիկային զարկերակի և ջլերի վնասումով, ձախ բազկի կտրած-ծակած վերքի, իսկ Ա.Մնացականյանին մեկ հարված՝ պատճառելով որովայնի առաջային պատի ծակած-կտրած թափանցող վիրավորման՝ լեղապարկի բարակ և հաստ աղիների վնասումների ձևով»։
Երևան քաղաքի Կենտրոն և Նորք-Մարաշ վարչական շրջանների
առաջին ատյանի դատարանի 2011թ. հուլիսի 21-ի դատավճռով Նարեկ Գևորգի Սարգսյանը մեղավոր է ճանաչվել ՀՀ քրեական օրենսգրքի 112-րդ հոդվածի 2-րդ մասի 1-ին կետով և դատապարտվել է ազատազրկման 6 (վեց) տարի ժամկետով, որը պետք է կրի ՀՀ ԱՆ համապատասխան քրեակատարողական հիմնարկում։
Պատժի կրման սկիզբը հաշվվել է 2010թ. օգոստոսի 25-ից։
Ն.Սարգսյանի նկատմամբ ընտրված խափանման միջոցը թողնվել է անփոփոխ` մինչև դատավճռի օրինական ուժի մեջ մտնելը։
Իրեղեն ապացույցները` բամբակյա երեք խծուծը և սպորտային գլխարկը որոշվել է ոչնչացնել, իսկ Ա.Մկրտչյանի մայկան ու Ա.Մնացականյանի ուսաժապավենով մայկան պետք է վերադարձնել նրանց։

2/. Վերաքննիչ բողոքի հիմքերը, փաստարկները և պահանջը.
Վերոհիշյալ դատավճռի դեմ վերաքննիչ բողոք է բերել ամբաստանյալ Ն. Սարգսյանի շահերի պաշտպան Վ. Մանուկյանը` հետևյալ հիմքերի սահմաններում, ներքոհիշյալ հիմնավորումներով.
Բողոքաբերը հայտնել է, որ ընդհանուր իրավասության դատարանի դատավճիռը կայացվել է դատավարական և նյութական իրավունքի նորմերի ակնհայտ կոպիտ խախտումներով, այն է` քրեական գործի քննությամբ խախտվել է ՀՀ քրեական դատավարության օրենսգրքի 7-11, 17-18, 23-25, 72, 105, 58-59, 243, 303 հոդվածների, <<Մարդու իրավունքների և հիմնարար ազատությունների պաշտպանության մասին>> Եվրոպական կոնվեցիայի 6-րդ հոդվածի պահանջները:
Նարեկ Սարգսյանին առաջադրված մեղադրանքը անհիմն է, Նարեկ Սարգսյանի գործողությունները իրավական առումով ճիշտ որակված չեն և նրա գործողություններում բացակայում են ՀՀ քրեական օրենսգրքի 112-րդ հոդվածի 2-րդ մասի 1-ին կետով նախատեսված հանցակազմի հատկանիշները:
Նարեկ Սարգսյանը ի սկզբանե ոչ մեկի վիրավորելու, հարվածելու դիտավորություն չի ունեցել, միջադեպի բոլոր փուլերում վարել է քաղաքակիրթ, հանգիստ խոսակցություն, նույնիսկ հայհոյանքի տեսքով արտահայտությունը տալու ընթացքում և դրանից հետո վախի մթնոլորտ ստեղծելու համար իր գրպանից չի հանել և սպառնալիքներ չի տվել այդ դանակով, այս ամենը լոկ վկայում է այն մասին, որ Նարեկ Սարգսյանն իր մոտ կրած դանակը գործի դնելու ոչ մի նպատակ, դիտավորություն և ցանկություն չի ունեցել և ստիպված նման քայլի է դիմել այնքանով, որ իրենից շատ անգամ ֆիզիկապես ուժեղ, արևելյան մարզաձևերով մարզված անձանց կողմից դաժանաբար մասնագիտորեն ծեծի ենթարկվելու պատճառով ստիպված է եղել մեջքի վրա ընկած վիճակում գրպանից հանել այդ դանակը և նման եղանակով պաշտպանվել, քանի որ այդ պահին, հաշվի առնելով բազմաթիվ անկանոն հարվածների հաջորդականությունը, իր և նրանց եղած դիքը, ամբաստանյալը իր կյանքի միակ փրկության ելքը տեսել է այդ դանակի մեջ: Այդ է վկայում նաև այն հանգամանքը, որ դեպքից անմիջապես հետո Նարեկ Սարգսյանը ինքնակամ մեղայականով ներկայացել է ոստիկանության բաժին, ինչը ուղղակիորեն վկայում է, որ նա ի սկզբանե որևէ մեկին ծանր մարմնական վնասվածքներ պատճառելու դիտավորություն չի ունեցել, և առհասարակ, հանցանք կատարելու ցանկություն չի ունեցել:
Տուժողներ Ազատ Մկրտչյանի և Արամ Մնացականյանի գործողությունների ինտենսիվությունը, ժամանակը, դրանց ռեալ վտանգը իրոք անմիջական սպառնալիք են եղել ամբաստանյալի կյանքի և առողջության համար, ինչը թույլ է տալիս համոզմունք արտահայտելու, որ Նարեկ Սարգսյանը միջադեպի ամբողջ ընթացքում միայն պաշտպանվել է, բայց մի նախապայմանով, որ նա պաշտպանվելիս դուրս է եկել դրա անհրաժեշտ սահմաններից, որը հանդես է եկել նրա ձեռքում դանակի առկայությամբ: Այս առումով, նրա գործողությունները միանշանակ ենթակա են որակման ՀՀ քրեական օրենսգրքի 116-րդ հոդվածի 2-րդ մասի հատկանիշներով, այլ ոչ թե ՀՀ քրեական օրեսգրքի 112 հոդվածի 2-րդ մասի 1-ին կետով:
Բացի այդ, առ այսօր չի ստուգվել, թե Սեմյոն Եդիգարյանի դեմքի շրջանում պատճառված վնասվածքը ի վերջո ում կողմից է պատճառվել և ընդհանրապես ոտքին հասցված հարվածը դիտավորությամբ կատարված գործողության, թե անզգուշության հետևանք է:
Արդյունքում, խորացված և բազմակողմանի քննություն չկատարելը, իր հերթին հանգեցրել է ամբաստանյալի գործողությունների ոչ ճիշտ որակմանը և դրանց ոչ ճիշտ իրավական գնահատական տալուն:
Նարեկ Սարգսյանին ձերբակալման և որպես կասկածյալ հարցաքննության, այնուհետև որպես մեղադրյալ ներգրավելու պահին մինչդատական վարույթ իրականացնող մարմնի կողմից չի ապահովվել պաշտպանի մասնակցությունը:
Քրեական գործի ողջ նախաքննության ընթացքում նշանակվել են բազմաթիվ և բազմատեսակ փորձաքննություններ, սակայն գրեթե բոլոր դեպքերում խախտվել են ՀՀ քրեական դատավարության օրենսգրքի 247 հոդվածի պահանջները:
Նարեկ Սարգսյանը, քննության ժամանակ իրազեկված չլինելով քննության արդյունքներին և ժամանակին չծանոթանալով նշանակված փորձաքննությունների որոշումների և դրանց եզրակացությունների հետ, արդյունքում զրկվել է իր բոլոր դատավարական իրավունքներից` ընդհուպ փորձաքննությանը մասնակցելուց, իր առարկությունները ներկայացնելուց կամ փորձագետներին բացարկ հայտնելու իր իրավունքից: Նման պայմաններում գործի քննությունը կատարվել է խիստ թերի, միակողմանի, որի հետևանքով շատ ու շատ հարցեր, հանգամանքներ ու հակասություններ չեն պարզաբանվել, կասկածները չեն փարատվել, որոնց վառ օրինակներից մեկն է հանդիսանում համալիր դատահետքաբանական-դատաբժշկական փորձաքննության եզրակացությունը:
Ապացույցները ձեռք են բերվել օրենքի կոպիտ խախտմամբ և ՀՀ քրեական դատավարության օրենսգրքի 105 հոդվածի համաձայն չեն կարող դրվել մեղադրանքի հիմքում:
Քրեաիրավական առումով նրա գործողությունները ենթակա են որակման ՀՀ քրեական օրենսգրքի 116-րդ հոդվածի 2-րդ մասով: Ասինքն` Նարեկ Սարգսյանը տվյալ միջադեպի ժամանակ իր կյանքն ու առողջությունը փրկելիս, տուժողներին ծանր մարմնական վնասվածքներ պատճառելիս, անցել է անհրաժեշտ պաշտպանության սահմանները և նրա գործողությունները իրենց մեջ պարունակում են ՀՀ քրեական օրենսգրքի 116-րդ հոդվածի 2-րդ մասի հատկանիշներ:
Խնդրել է ելենելով վերոգրյալից ընդհանուր իրավասության դատարանի 21.07.2011 թվականի դատավճիռը բեկանել և հաշվի առնելով քրեական գործի փաստական հանգամանքները, ինչպես նաև արդարադատության արդյունավետությունից ելնելով Նարեկ Սարգսյանի գործողությունները վերաորակել ՀՀ քրեական օրենսգրքի 116-րդ հոդվածի 2-րդ մասի հատկանիշներին համապատասխան կամ ամբաստանյալի նկատմամբ սահմանել ՀՀ քրեական օրենսգրքի 112-րդ հոդվածի 2-րդ մասի 1-ին կետով սահմանված նվազագույն պատժաչափը:
3/.Վերաքննիչ դատարանի պատճառաբանությունները և եզրահանգումները.
Վերաքննիչ դատարանը, ստուգելով գործի փաստական հանգամանքների բացահայտման ու քրեական օրենքի կիրառման ճշտությունը, ինչպես նաև գործը քննելիս և լուծելիս քրեադատավարական օրենքի նորմերի պահպանումը, լսելով պաշտպանական կողմի հիմնավորումները վերաքննիչ բողոքի կապակցությամբ և մեղադրողի պատասխանը բողոքի դեմ, վերլուծելով քրեական գործի նյութերը, հանգում է այն հետևության, որ ամբաստանյալ Նարեկ Գևորգի Սարգսյանի մեղքը ՀՀ քրեական օրենսգրքի 112-րդ հոդվածի 2-րդ մասի 1-ին կետով նախատեսված արարքը կատարելու մեջ հաստատված է, իսկ պաշտպանական կողմից բերված պատճառաբանություններն ու վերաքննիչ բողոքի փաստարկները` ամբաստանյալին առաջադրված մեղադրանքը վերաորակելու վերաբերյալ, հերքված են նորքոհիշյալ ապացույցներով.
Ամբաստանյալ Ն.Սարգսյանը ցուցմունք է տվել այն մասին, որ նա 23.08.2010թ-ին ընկերուհուց` Աննա Մկրտչյանից, տեղեկանալով, որ հաջորդ օրը նրա ծննդյան տարեդարձն է, որը նշվելու է «Առլեկինո» կարաոկե բարում, ընդունել է նրա հրավերքը և հաջորդ օրը` ժամը 19-ի սահմաններում, ընկերոջ` Սեմյոն Եդիգարյանի հետ միասին գնացել են «Առլեկինո» կարաոկե-բար, որտեղ, նախօրոք պատվիրված սեղանի շուրջ, նստած են եղել Աննան, նրա մայրը, քույրը, հարազատները և ընկերուհիները։ Ընկերոջ հետ «Ռեդբուլ»-ով խառնած օղի են խմել, իսկ աղջիկները՝ գինի, որից հետո սկսել են պարել։ Աննայի հետ պարելիս նկատել է, որ իրենց սեղանի շուրջ նստած աղջիկների կողքին պարում է հրեշի տեսք ունեցող դիմակով մի տղա, ինչն աղջիկների մոտ վախ և տհաճություն է առաջացրել, որի պատճառով մոտեցել է այդ տղային ու զգուշացրել, որ դիմակով չպարի։ Երաժշտությունը բարձր լինելու պատճառով միմյանց չեն հասկացել, որի համար դուրս են եկել բարից և դրսում` զրույցի ընթացքում, նրանից պահանջել է դիմակով չպարել, որը մյուս կողմից ընկալվել է նորմալ և միասին վերադարձել են բար։
Որոշ ժամանակ անց՝ պարելու ընթացքում, նկատել է նույն դիմակով երիտասարդին։ Կրկին մոտեցել է այդ տղային և դարձյալ, միմյանց չլսելու պատճառով, դուրս են եկել բարից։ Իր հետ դուրս է եկել նաև իր ընկեր Սեմյոնը, իսկ դիմակով պարողի հետ՝ նրա ընկերը, և միասին քայլելով` գնացել են Կորյունի փողոցի ուղղությամբ։ Իրենց միջև տեղի է ունեցել նույն խոսակցությունը, որի ժամանակ այդ տղան իրեն ասել է, որ դիմակով չպարելու համար իրեն ոչ ոք չի զգուշացրել։ Նրան պատասխանել է, որ կարող է ընկերը եղած լինի և մեկ անգամ ևս զգուշացրել է, որ ոչ ոք չպարի դիմակով։ Սեղանակիցներին չանհանգստացնելու նպատակով և խոսակցությունն ավելորդ չշարունակելու համար` փորձել է վերադառնալ բար, սակայն երբ շրջվել է, այն տղան, ով խոսելիս է եղել իր հետ, բռունցքով ուժեղ հարվածել է իր գլխի ձախ հատվածին։ Հարվածից ընկել է գետնին, որից հետո այդ երկու տղաները հարձակվել, նստել են իր վրա և սկսել ձեռքերով հարվածներ հասցնել։ Չկարողանալով շարժվել և պատասխանել նրանց հարվածներին` նյարդայնացած վիճակում հայհոյանքներ է տվել վերջիններիս, մի պահ կարողացել է ձեռքը տանել գրպանը և հանել է իր մոտ եղած ծալովի, մոտ 13-15 սմ ընդհանուր երկարությամբ, 1-1,5 սմ լայնությամբ, բռնակը պլաստմասից, սև գույնի, շեղբի մի կողմը սրված, իսկ մյուս կողմը բութ դանակը, որով սկսել է անկանոն հարվածներ հասցնել իր վրա նստած տղաներին։ Հարվածներից հետո ազատվել է նրանց ձեռքից և փախել է Կորյունի փողոցի ուղղությամբ։ Ճանապարհին նկատել է, որ հագուստներն ամբողջովին արյունոտված են, իսկ աջ ձեռքի բութ մատից և ցուցամատից արյուն է հոսել։ Դրանից հետո, իր մոտ եղած դանակը դեն է գցել և պատահական տաքսի ավտոմեքենայով գնացել է տուն։ Ճանապարհին զանգահարել է Աննային ու ասելով, որ կռիվ է արել և իրեն լավ չի զգում` խնդրել է ավարտել խնջույքն ու գնալ տուն։ Տուն հասնելով` փոխել է արյունոտված հագուստները և դուրս եկել բակ, որտեղ հանդիպել է Սեմյոնին, ում դեմքին նկատել է վնասվածքներ, սակայն չի հիշում, թե ինչ են խոսել միմյանց հետ։ Այնուհետև զանգահարել է Աննային և խնդրել հանդիպել բակում։ Հանդիպման ընթացքում պատմել է կատարվածի մասին և նրան տալով դեպքի պահին իր հագին եղած` արյունոտված անդրավարտիքը` խնդրել է լվանալ այն։
Ամբաստանյալը պնդել է, որ տուժողներին դանակով հարվածել է պառկած դիրքից։
Տուժող Արամ Մնացականյանի ցուցմունքի համաձայն` 2010թ. օգոստոսի 24-ին՝ ժամը 16-ի սահմաններում, ընկերների` Ազատ Մկրտչյանի, Արթուր Նիազյանի և Հաբեթ Մկրտչյանի հետ գնացել են ք.Երևանի Գ.Քոչար փողոցում գտնվող «Առլեկինո» կարաոկե-բար, որտեղ` նախնական պայմանավորվածության համաձայն, հանդիպել են իրենց մյուս ընկերներին և ընկերուհիներին։
Բարում իր ընկերներից Նաիրի Սարգսյանը պարել է իր հետ բերած դիմակով, ինչը, ըստ ամբաստանյալի, դուր չի եկել նրա հետ եղած աղջիկներին, որի համար ամբաստանյալի առաջարկով բարից դուրս են եկել փողոց, որտեղ խոսել և պայմանավորվել են, որ դիմակով այլևս չեն պարի։ Դրանից մոտ մեկ ժամ անց, նկատելով բարից դուրս եկող Ազատին և ամբաստանյալին, գնացել է նրանց հետևից։ Դրսում ամբաստանյալն Ազատին հարցրել է, թե ինչու է նա իրենց աղջիկներին մոտ պարում, ինչին Ազատը պատասխանել է, որ իրենք պարում են իրենց աղջիկների հետ։ Դրանից հետո ամբաստանյալը հայհոյել է` ասելով նրա մերը, ով կպարի իր հետ եղած աղջիկների հետ։ Հայհոյելու համար Ազատը խփել է ամբաստանյալին ու երբ վերջինս ընկել է գետնին, մոտեցել է նրան, և այդ պահին` կիսականգնած վիճակում, ամբաստանյալը հարվածել է իրեն։ Փորի մասում հարված և ցավ զգալով` հետ է գնացել։ Տեսել է նաև Ազատին, ում ձեռքը վնասված է եղել։ Դրանից հետո, զգալով, որ արյունահոսում է, զանգահարել են բարում գտնվող ընկերներից մեկին և Նաիրի Սարգսյանի «ԲՄՎ» մակնիշի ավտոմեքենայով իրենց տեղափոխել են հիվանդանոց։
Տուժող Ազատ Մկրտչյանի նույնաբովանդակ ցուցմունքների համաձայն` 2010թ. օգոստոսի 24-ի երեկոյան ք.Երևանի Գ.Քոչար փողոցում գտնվող «Առլեկինո» կարաոկե բարում ընկերների հետ զվարճանալու և պարելու ընթացքում նրան է մոտեցել ամբաստանյալը և հրավիրել բարից դուրս։ Նրանց հետ դուրս է եկել նաև Արամ Մնացականյանը, և երբ խոսակցության ընթացքում ամբաստանյալն Ա.Մկրտչյանին մեղադրել է իր հետ եկած աղջիկների հետ պարելու համար է, նա հերքել է դա ու պատճառաբանել է, որ սրահում տեղ չլինելու պատճառով է պարել բեմի վրա, այսինքն՝ այնտեղ, որտեղ եղել է ամբաստանյալի և նրա հետ եղած անձանց սեղանը։ Այնուհետև, ամբաստանյալը հայհոյել է նրան` ասելով` ով իրենց աղջիկներին մոտ պարի, ես նրա մերը...։ Դրանից վրդովված` բռունցքով հարվածել է ամբաստանյալի գլխին, որից նա վայր է ընկել։ Դրանից հետո Արամի հետ մոտեցել են ամբաստանյալին՝ կրկին հարվածելու նպատակով, սակայն վերջինս հանել է դանակը, կամ այդ կարգի ինչ-որ ուրիշ բան և հարվածներ հասցրել իրենց։ Հարվածներ ստանալուց հետո նստել է բարի դիմաց գտնվող նստարանին, որից հետո ընկերների օգնությամբ տեղափոխվել են հիվանդանոց։
Վկաներ Արթուր Նիազյանի և Հաբեթ Մկրտչյանի նույնաբովանդակ ցուցմունքների համաձայն` 2010թ. օգոստոսի 24-ին` ժամը 22-ի սահմաններում, երբ ընկերուհիների, ընկերների, այդ թվում` տուժողների հետ գտնվել են «Առլեկինո» կարաոկե-բարում, նկատել են, որ տուժողները` Արամը և Ազատը, բարում չեն։ Այդ պահին զանգահարել է Ազատը և իրենց խնդրել է շտապ դուրս գալ բարից։ Անմիջապես դուրս են եկել և տեսել են Ազատին` բարի մուտքից քիչ հեռու տեղադրված նստարանին նստած, արյունոտված վիճակում։ Նրանից քիչ հեռու նկատել են Արամին, ով, որովայնը ձեռքերով բռնած, մոտեցել է իրենց։ Տեսնելով դա` Ազատին և Արամին իրենց ընկեր Նաիրի Սարգսյանի «ԲՄՎ» մակնիշի ավտոմեքենայով շտապ տեղափոխել են թիվ 1 հիվանդանոց։ Հետագայում տուժողներից տեղեկացել են, որ նրանց դանակով հարվածողը եղել է իրենց հետևի սեղանի շուրջ նստած տղան։
Վկա` տուժողի օրինական ներկայացուցիչ, Վաղարշակ Մկրտչյանի նույնաբովանդակ ցուցմունքի համաձայն` 24.08.2010թ.` ժամը՝ 18-ի սահմաններում, որդին զանգահարել է իրեն և տեղեկացրել, որ ընկեր-ընկերուհիների հետ գտնվում է «Առլեկինո» կարաոկե-բարում։ Վերջին անգամ նրա հետ հեռախոսով զրուցել է ժամը 20:55-ին։ Ժամը 22-ի սահմաններում Ազատի ընկեր Արամի մորից տեղեկանալով, որ իրենց որդիները գտնվում են հիվանդանոցում` գնացել և հիվանդանոցում տեղեկացել է, որ Ազատը և Արամը դանակահարված են ու վիրահատվում են։ Մի քանի օր անց` հիվանդանոցում, Ազատն իրեն պատմել է, որ բարից դուրս տեղի ունեցած վիճաբանության ընթացքում ամբաստանյալը դանակով հարվածներ է հասցրել իրեն և Արամին ու դիմել փախուստի։
Վկա Աննա Մկրտչյանի ցուցմունքի համաձայն` ամբաստանյալ Ն.Սարգսյանին ճանաչում է մոտ 3 տարի և նրա հետ հանդիպումների ընթացքում հաճախակի նկատել է, որ նա դանակ է կրում գոտկատեղում։
2010թ. օգոստոսի 24-ին` ժամը 1830-ի սահմաններում, իր ծննդյան տարեդարձը նշելու համար մոր, հարազատների, զարմուհիների և ընկերուհու հետ միասին գնացել են «Առլեկինո» կարաոկե-բար։ Հրավիրել է նաև Ն.Սարգսյանին, ով ժամը 19-ի սահմաններում ընկերոջ՝ Սեմյոնի հետ միացել է իրենց։ Բարում իրենց սեղանը գտնվել է բեմի վրա, իսկ դրանից ներքև գտնվող սեղանի մոտ նստած են եղել մոտ 15 աղջիկ-տղաներ։ Պարելու ընթացքում հարևան սեղանի տղաներից մեկն իրենց մոտ պարել է ուրվականի դիմակով, ինչն իրենց դուր չի եկել։ Այդ մասին Ն. Սարգսյանը զգուշացրել է դիմակով պարող տղային և վերջինս դադարել է դիմակով պարել։ Ժամը 21:30-ի սահմաններում, երբ իրենք կրկին պարել են, հարևան սեղանի շուրջ նստած տղաներից մեկը, ով եղել է սպիտակ վերնաշապիկով և սպիտակ սպորտային գլխարկով, պարել է բեմի վրա` իրենց շատ մոտ՝ քսվելով իրենց, որի պատճառով դադարել են պարել։ Դա նկատել է Նարեկը, ով, զրուցելով այդ տղայի հետ, նրա հետ դուրս են եկել բարից։ Ժամը 22:00-ի սահմաններում Նարեկը, զանգահարելով և ասելով, որ վիճաբանել է հարևան սեղանի տղաների հետ ու դանակահարել է նրանց, խնդրել է շուտ դուրս գալ բարից և գնալ տուն։ Մոտ 30 րոպե անց, երբ գտնվել են տանը, Նարեկը զանգահարել և խնդրել է հանդիպել շենքի բակում։ Հանդիպելով նրան` նկատել է, որ Նարեկի հագուստները փոխված են, իսկ աջ ձեռքի բութ մատը և ցուցամատը վնասված-կապված են։ Իր հարցին նա պատասխանել է, որ դանակով խփելու ընթացքում է վնասել մատները։ Նա նաև պատմել է, որ բարից դուրս վիճել է վերը նշված սպիտակ գլխարկով տղայի և նրա ընկերոջ հետ, որի ընթացքում ձեռքով հարվածել են իր գլխին, որի պատճառով ինքը վայր է ընկել, որից հետո, գոտկատեղից հանելով դանակը, խփել է նրանց։
Դրանից հետո Նարեկը, տալով իր ջինսե արյունոտված անդրավարտիքը, խնդրել է լվանալ այն։ Վերադառնալով տուն` կատարվածի մասին պատմել է մորը և լվանալու համար նրան է տվել Նարեկի անդրավարտիքը։
Վկա Նունիկ Կիրակոսյանի նույնաբովանդակ ցուցմունքի համաձայն` դստեր` Աննայի, ծննդյան տարեդարձը 2010թ. օգոստոսի 24-ին «Առլեկինո» կարաոկե-բարում նշելուց հետո, երբ գտնվել են տանը, Աննան պատմել է, որ Նարեկը և նրա ընկերը, ովքեր նույնպես բարում մասնակցել էին դստեր ծննդյան տարեդարձին, բարից դուրս կռիվ են արել։ Քիչ անց Աննային զանգահարել է Նարեկը և Աննան դուրս է եկել բակ։ Վերադառնալով տուն՝ նա պատմել է, որ Նարեկը կռվի ժամանակ դանակով մարդ է խփել։ Նա նաև իրեն է տվել Նարեկի արյունոտված անդրավարտիքը և խնդրել է լվանալ այն։
Վկա Սեմյոն Եդիգարյանի ցուցմունքի համաձայն` 2010թ. օգոստոսի 24-ի երեկոյան ընկերոջ` Նարեկի, հետ մասնակցել է նրա ընկերուհու՝ Աննայի ծննդյան տարեդարձին, ինչը նշվել է «Առլեկինո» կարաոկե-բարում, որտեղ Նարեկի հետ նկատողություն են արել հարևան սեղանի մոտ նստած տղաներից մեկին, ով պարել է ուրվականի տեսք ունեցող դիմակով, ինչը տհաճ է եղել իրենց սեղանի շուրջ նստածներին։ Որոշ ժամանակ անց, երբ կրկին պարել են, հարևան սեղանի տղաներից մեկը սկսել է պարել իրենց սեղանակից աղջիկներին շատ մոտ` քսմսվելով նրանց, ինչը դուր չի եկել իրենց։ Նարեկը մոտեցել է այդ տղաներից մեկին և զրուցել։ Այդ ընթացքում գնացել է զուգարան, իսկ երբ վերադարձել է, նկատել է, որ Նարեկը բարում չէ։ Անմիջապես դուրս գալով բարից՝ նկատել է Նարեկին` երկու տղայի հետ զրուցելիս։ Մինչ նրանց հասնելը, նշված տղաները հարվածել են Նարեկին, որից վերջինս վայր է ընկել։ Նրանցից մեկը կռացել է Նարեկի վրա և նրան հարվածել ձեռքերով, իսկ մյուսը հարվածել է Նարեկին` կանգնած դիրքից՝ ոտքերով։ Մոտենալով նրանց՝ միջամտելու նպատակով Նարեկի վրա կռացած տղային մի կողմ է հրել և փորձել է Նարեկին բարձրացնել։ Այդ ժամանակ նույն տղան, որին ինքը մի կողմ է հրել, ձեռքով կամ ոտքով աջ կողքից հարվածել է իր դեմքին, որից ինքը, կորցնելով հավասարակշռությունը, վայր է ընկել։ Ուշքի գալով` նկատել է, որ ոչ-ոք չկա և վազել է դեպի Կորյունի փողոց, որտեղ, մոտենալով ցայտաղբյուրին, ցանկացել է լվացվել։ Այդ պահին մոտեցել է Նարեկը, ում դեմքին և մայկայի վրա եղել են արյան հետքեր, սակայն վնասվածքներ չի ունեցել։ Դրանից հետո միասին տաքսի ավտոմեքենայով գնացել են տուն։ Աբովյան փողոցում Նարեկն իջել է ավտոմեքենայից և ասել, որ կհանդիպեն 1-2 ժամից` իրենց բակում։ Մոտ 1 ժամ անց բակում հանդիպել է Նարեկին, ով եղել է փոխված հագուստներով։
«Դեպքի վայրի զննության մասին» 24.08.2010թ. արձանագրության համաձայն` դեպքի վայր է հանդիսացել Գ.Քոչար փողոցի 21 հասցեում գտնվող «Առլեկինո» կարաոկե-բարի դիմացի տարածքը։ Բարից մոտ 45 մետր դեպի Կորյունի փողոց տանող ուղղությամբ առկա են եղել արնանման հետքեր, որոնք գտնվել են լապտերից 1-2 մետր հեռավորության վրա։ Լապտերի անմիջապես կողքին ընկած է եղել սպիտակ գույնի սպորտային գլխարկ՝ արնանման հետքերով։ Բարի մուտքի դռնից 7 մետրից մինչև 30 մետր հեռավորության վրա՝ դեպի Կորյունի փողոց տանող ուղղությամբ, տեղ-տեղ առկա են եղել արնանման նյութի հետքեր, իսկ մուտքի դռան դիմացի հատվածում՝ մոտ 8 մետր հեռավորության վրա՝ կենտրոնական ընտրական հանձնաժողովի շենքի ուղղությամբ, առկա է եղել մետաղյա նստարան, որի դիմացի հատվածում թափված է եղել արնանման հեղուկի զանգված և եղել են կաթիլային արնանման հետքեր։ Նշված արնանման հետքերից` 3 տարբեր վայրերից, բամբակյա խծուծներով վերցվել են նմուշներ, որոնք սպորտային գլխարկի հետ միասին առգրավվել են։
«Կրիմինալ դեպքերի մատյաններ զննելու մասին» 24.08.2010թ. արձանագրության համաձայն` «ԵՊԲՀ» թիվ 1 հիվանդանոցի ընդունարանի թիվ 1 ահազանգման մատյանի 61-րդ էջում 27-րդ համարի տակ առկա է հետևյալ գրառումը` Ազատ Վաղինակի Մկրտչյան, ծնված 1993թ., հասցե` ք.Եղվարդ, Սաֆարյան 1-ին նրբանցք 49 տուն, ընդունելությունը 24.08.2010թ.` ժամը 2255-ին` առանց ուղեգրի, ախտորոշումը որովայնի աջ կեսի, աջ և ձախ վերին վերջույթների ծակած վերքեր։ Ըստ ուղեկցողի հայտարարության նրան բերել են «Առլեկինո» կարաոկե ակումբի մոտից, որտեղ դանակահարել են։ Դեպքի մասին հայտնվել է 56-02-02 հեռախոսահամարին։
Նույն մատյանի թիվ 18 հերթական համարում առկա է հետևյալ գրառումը` Արամ Գրիգորի Մնացականյան, ծնված 1992թ., ք.Եղվարդ, Սաֆարյան 1-ին նրբանցք, 19 տուն, ընդունելությունը 24.08.2010թ.` ժամը 22:55-ին` առանց ուղեգրի, ախտորոշումը` որովայնի աջ կտրած-ծակած վերք։ Ըստ ուղեկցողի հայտարարության՝ նրան բերել են «Առլեկինո» կարաոկե ակումբի մոտից, որտեղ դանակահարել են։ Դեպքի մասին հայտնվել է 56-02-02 հեռախոսահամարին։
«Անձի ինքնակամ ոստիկանության բաժին ներկայանալու մասին» 25.08.2010թ. արձանագրության համաձայն` 25.08.2010թ.՝ ժամը 15:00-ի սահմաններում, ոստիկանության Կենտրոնականի բաժին է ներկայացել Նարեկ Գևորգի Սարգսյանը և հայտնել, որ 24.08.2010թ. «Առլեկինո» կարաոկե բարի դիմաց ծագած վիճաբանության ժամանակ իր մոտ եղած գաղտնի փականով դանակով հարվածել և մարմնական վնասվածքներ է պատճառել իր հետ վիճաբանող անձանց։
Դատաբժշկական փորձաքննության 02.09.2010թ. թիվ 2210 եզրակացության համաձայն` Ն.Սարգսյանի ստացած մարմնական վնասվածքները` աջ ազդրի շրջանի ճանկռվածքի, աջ դաստակի առաջին և երկրորդ մատների շրջանների կտրված վերքերի ձևով, հասցվել են սուր կտրող գործիքով, ճանկռվածքը սրածայր գործիքով, և նրա առողջությանը պատճառվել է թեթև վնաս՝ առողջության կարճատև քայքայումով։
Դատաբժշկական փորձաքննության 11.09.2010թ. թիվ 1244/հ եզրակացության համաձայն` Ա.Մնացականյանի ստացած մարմնական վնասվածքները` որովայնի առաջային պատի ծակած-կտրած թափանցող վիրավորման՝ լեղապարկի, բարակ և հաստ աղիների վնասումների ձևով, հասցվել են սուր ծակող-կտրող գործիքով և առաջացրել են առողջությանը ծանր վնաս՝ կյանքին վտանգ սպառնացող։
Դատաբժշկական փորձաքննության 11.09.2010թ. թիվ 1245/հ եզրակացության համաձայն` Ա.Մկրտչյանի ստացած մարմնական վնասվածքները` աջ այտային շրջանի արյունազեղման, որովայնի ծակած-կտրած թափանցող վերքի, գոտկային շրջանի հետորովայնային տարածության կտրած-ծակած թափանցող վերքի, կրծքավանդակի ձախ կեսի հետին մակերեսի շրջանի կտրած-ծակած թափանցող վերքի՝ ձախ թոքի ստորին բլթի և ստոծանու մասնակի վնասումով, աջ նախաբազկի կտրած-ծակած վերքի՝ ծղիկային զարկերակի և ջլերի վնասումով, ձախ բազկի կտրած-ծակած վերքի ձևերով, առաջացրել են առողջությանը ծանր վնաս՝ կյանքին վտանգ սպառնացող:
Դատաբժշկական փորձաքննության 22.09.2010թ. թիվ 377 եզրակացության համաձայն` փորձաքննությանը ներկայացված 3 բամբակյա խծուծներով դեպքի վայրից վերցված և սպորտային գլխարկի վրա տեղակայված կասկածելի հետքերում հաստատվել է արյան առկայություն, որը պատկանում է մարդու և ըստ արյան ABO իզոշճաբանական համակարգի առաջացել են.
«Առլեկինո» կարաոկե բարից 45 և 15 մմ հեռավորությունների վրա եղած արյան հետքե-րը` արյան A խումբ ունեցող որևէ անձից կամ անձանցից, այդ թվում` նաև կարող էին առաջանալ ինչպես Ա.Մնացականյանից, այնպես էլ` Ա.Մկրտչյանից, բայց ոչ Ն.Սարգսյանից։
Սպորտային գլխարկի վրա` ձախ առաջակողմնային մասում տեղակայված արյան հետքը` արյան A խումբ ունեցող անձից կամ անձանցից, որի դեպքում չի բացառվում դրա առաջացումը ինչպես Ա.Մնացականյանից, այնպես էլ` Ա.Մկրտչյանից, բայց ոչ Ն.Սարգսյանից։
Դատահետքաբանական և դատաբժշկական համալիր փորձաքննության 18.10.2010թ. հմ 10-2336 եզրակացության համաձայն` փորձաքննությանը ներկայացված Ա.Մկրտչյանի մայկայի վրա առկա են մեխանիկական վնասվածքներ, որոնք իրենց բնույթով ծակած-կտրած են և առաջացել են միակողմանի սուր սայր ունեցող ծակող-կտրող գործիքի՝ դանակի ներգործությունից։
Ա.Մնացականյանի վերնազգեստի և ուսաժապավեններով մայկայի առաջամասերի աջ կողմերում առկա են մեկական մեխանիկական վնասվածքներ, որոնք իրենց բնույթով ծակած-կտրած են և առաջացել են միաժամանակ միակողմանի սուր սայր ունեցող ծակող-կտրող գործիքի՝ դանակի ներգործությունից, ընդ որում` հագուստների մեջ ներթափանցման մակարդակների ազդող գործիքի շեղբը ունեցել է մոտ 10-ից 13 մմ լայնություն։ Ա.Մնացականյանի աջից որովայնի առաջային պատի և նրա հագուստների վրա առկա վնասվածքներն իրենց բնույթով ծակած-կտրած են, դրանք իրենց տեղակայություններով և չափերով համապատասխանում են միմյանց և առաջացել են միաժամանակ` միակողմանի սուր սայր ունեցող ծակող-կտրող գործիքի մեկ ներգործության արդյունքում։
Ա.Մկրտչյանի մարմնի հագուստով ծածկված մասերի վնասվածքները և նրա վերնահագուստի վրա առկա վնասվածքներն իրենց բնույթով ծակած-կտրած են, տեղակայություններով, չափերով հիմնականում համապատասխանում են միմյանց և կարող էին առաջանալ միակողմանի սուր ծայր ունեցող ծակող-կտրող գործիքի ներգործությունից։ Ընդ որում, Ա.Մկրտչյանի որովայնի առաջային պատի աջ կեսի և նրա հագուստի առաջամասում առկա ծակած-կտրած վնասվածքները առաջացել են միաժամանակ` սուր ծակող-կտրող գործիքի դանակի մեկ ներգործության արդյունքում։ Ա.Մկրտչյանի կրծքավանդակի ձախ կեսի հետին մակերեսի թիակային գծով ծակած-կտրած վնասվածքը և նրա հագուստի հետին հատվածում առկա ծակած-կտրած վնասվածքն իրենց տեղակայություններով համապատասխանում են միմյանց ու առա-ջացել են միակողմանի սայր ունեցող սուր ծակող-կտրող գործիքի մեկ ներգործության արդյուն-քում։ Ա.Մկրտչյանի կրծքավանդակի հետին մակերեսի հարողնաշարային գծով ծակած-կտրած վնասվածքը և նրա հագուստի հետնամասի աջ կողմում առկա ծակած-կտրած վնասվածքն ա-ռաջացել են միակողմանի սուր սայր ունեցող ծակող-կտրող գործիքի դանակի մեկ ներգործության արդյունքում։ Ա.Մկրտչյանի ձախ բազկի վերին երրորդի դրսային մակերեսի ծակած-կտրած վնասվածքներն իրենց տեղակայություններով համապատասխանում են միմյանց և առաջացել են միակողմանի սուր սայր ունեցող ծակող-կտրող գործիքի դինամիկ ներգործության արդյունքում։
Դատահոգեբուժական ամբուլատոր փորձաքննության 28.10.2010թ. 349/10 եզրակացության համաձայն` 2009թ. հունիսին Ն.Սարգսյանը տարել է նևրոտիկ մակարդակի հոգեկան գործունեության ժամանակավոր հիվանդագին խանգարում` «չափավոր արտահայտված ասթենիկ խանգարում»-ի ձևով, որի կապակցությամբ նրան տրվել է տարկետում՝ 3 տարի ժամանակով, հետագայում դուրս է եկել վերը նշված հոգեկան գործունեության ժամանակավոր հիվանդագին խանգարման վիճակից և ինչպես իրավախախտումը կատարելու պահին, այնպես էլ ներկայումս Ն.Սարգսյանը որևէ հոգեկան հիվանդությամբ չի տառապել և չի տառապում, ուստի Ն.Սարգսյանին մեղսագրվող արարքի համար հարկ է ճանաչել մեղսունակ։ Իրավախախտումը կատարել է հասարակ հարբածության վիճակում։
Դատահետքաբանական-դատաբժշկական համալիր փորձաքննության 03.02.2011թ. հմ 10-3459 եզրակացության համաձայն` հաշվի առնելով Ա.Մնակացականյանի և հատկապես Ա. Մկրտչյանի մարմնական և նրանց հագուստների ծակած-կտրած բնույթի վնասվածքների տեղակայությունները (բացառապես իրանի վերին կեսի՝ որովայնի, կրծքավանդակի, բազկի շրջաններում, Ա.Մկրտչյանի մոտ նաև տարբեր մակերեսների տեղակայումներով և դրանց համապատասխան հագուստների վրա առկա ծակած-կտրած բնույթի վնասվածքների անկյունների ուղղվածությամբ), հիմքեր չկան հաստատելու դրանց առաջացման հնարավորությունը Ն.Սարգսյանի ցուցմունքում նշված մեխանիզմով՝ գետնին ընկած դիրքից։ Դրանց պատճառման հնարավարությունն առավել հավանական է կանգնած կամ դրան մոտ դիրքերից։
«Իրեղեն ապացուց ճանաչելու մասին» 09.02.2011թ. որոշման համաձայն` երեք բամբակյա խծուծները, սպորտային գլխարկը, Ա.Մկրտչյանի մայկան, Ա.Մնացականյանի ուսաժապավենով մայկան ճանաչվել են իրեղեն ապացույցներ ու կցվել քրեական գործին։
Այսպիսով, վերաքննիչ դատարանը հետազոտելով նախաքննության, առաջին ատյանի դատարանի և վերաքննիչ դատարանի դատաքննությունների ընթացքում ձեռք բերված ապացույցները, դրանցից յուրաքանչյուրը գնահատելով վերաբերելիության, թույլատրելիության, իսկ ամբողջ ապացույցները իրենց համակցությամբ` գործի լուծման համար բավարարության տեսանկյունից, հանգում է այն հետևության, որ ամբաստանյալ Նարեկ Գևորգի Սարգսյանին առաջադրված մեղադրանքը հիմնավորված և հաստատված է գործին վերաբերվող փոխկապակցված, հավաստի ապացույցների բավարար ամբողջությամբ, քրեական գործի ինչպես նախաքննությամբ, այնպես էլ դատաքննության ընթացքում քրեադատավարական օրենքի էական խախտումներ, որոնք գործին մասնակցող անձանց օրենքով երաշխավորված իրավունքներից զրկելու կամ դրանցում սահմանափակելու կամ այլ ճանապարհով խոչընդոտել են գործի հանգամանքների բազմակողմանի, լրիվ և օբյեկտիվ հետազոտմանը, ազդել են կամ կարող են ազդել գործով ճիշտ որոշում կայացնելու վրա, թույլ չեն տրվել և գործի փաստական հանգամանքների մասին դատարանի դատավճռում շարադրված հետևությունները բխում են քրեական գործով ձեռք բերված ապացույցներից, ամբաստանյալի նկատմամբ կիրառվել է քրեական այն օրենքը, որը ենթակա էր կիրառման, այսինքն նրան մեղսագրված արարքը համապատասխանում է ՀՀ քրեական օրենսգրքի 112-րդ հոդվածի 2-րդ մասի 1-ին կետի հատկանիշներին, որի համար նա պետք է ենթարկվի քրեական պատասխանատվության և նշանակված պատիժը պետք է կրի ազատազրկման ձևով:
Վերաքննիչ դատարանը անդրադառնալով ամբաստանյալի նկատմամբ նշանակված պատժի հարցին, հանգում է այն հետևության, որ ընդհանուր իարվասության դատարանի դատավճիռը այդ մասով ենթակա է փոփոխման` նկատի ունենալով հետևյալը.
ՀՀ քրեական օրենսգրքի 10-րդ, 48-րդ և 61-րդ հոդվածների դրույթներից հետևում է, որ հանցագործության համար մեղավոր ճանաչված անձի նկատմամբ ինչպես պատժատեսակի և պատժաչափի, այնպես էլ նշանակված պատիժը կրելու նպատակահարմարության վերաբերյալ դատարանի կողմից կայացված որոշումը պետք է հիմնված լինի կատարած հանցագործության, դրա առանձնահատկությունների, գործի կոնկրետ հանգամանքների, հանցավորի անձի, պատասխանատվությունն ու պատիժը մեղմացնող կամ ծանրացնող հանգամանքների բազմակողմանի գնահատման վրա` նպատակ ունենալով ապահովել ՀՀ քրեական օրենսգրքի 48-րդ հոդվածի 2-րդ մասում նշված պատժի նպատակների իրագործման հնարավորությունը:
Սույն քրեական գործի նյութերի ուսումնասիրությունից ակնհայտ է դառնում, որ դատարանը պատիժ նշանակելիս հաշվի է առել հանցագործության բնույթը, հանրության համար վտանգավորության աստիճանը և ամբաստանյալի անձը:
Որպես պատիժն ու պատասխանատվությունը մեղմացնող հանգամանք հաշվի է առել, որ ամբաստանյալը առաջին անգամ է դատապարտվում, բնութագրվում է դրական, ինքնակամ է ներկայացել ոստիկանություն, հանցագործությամբ տուժողներին պատճառված գույքային վնասները հատուցել են:
Ամբաստանյալի պատասխանատվությունը և պատիժը ծանրացնող հանգամանքներ չեն արձանագրվել:
Տուժողը և տուժողի ներկայացուցիչը քաղաքացիական հայց չեն հարուցել, իսկ վերաքննիչ դատարանում խնդրել են ամբաստանյալի նկատմամբ մեղմ պատիժ նշանակել:
Ընդհանուր իրավասության դատարանը պատիժ նշանակելիս պատիժ նշանակելու ընդհանուր սկզբունքներից ելնելով չի պատճառաբանել, թե պատասխանատվությունը և պատիժը մեղմացնող նշված հանգամանքների առկայության պայմաններում ինչու չի նշանակում մեղսագրվող հոդվածով նախատեսված նվազագույն պատիժը, որը կոնկրետ գործով կհամապատասխանի պատժի նշանակման ընդհանուր սկզբունքներին, ամբաստանյալի ուղղմանը և սոցիալական արդարության վերականգնմանը, ուստի վերաքննիչ քրեական դատարանը գտնում է, որ ամբաստանյալի նկատմամբ պետք է նշանակել մեղսագրված հոդվածով նախատեսված նվազագույն պատիժը` հաշվի առնելով ամբաստանյալի անձը բնութագրող տվյալները, երիտասարդ տարիքը, տարած առողջական հիվանդագին վիճակը` ասթենիկ խանգարման ձևով, արարքի կատարման շարժառիթները, տուժողների նախահարձակ լինելու հանգամանքը և նրանց դիրքորոշումը, որ նրանց պատճառված նյութական վնասները հարթված լինելու պայմաններում նրանք հաշտվել են ամբաստանյալի հետ և խնդրել են նրա նկատմամբ նշանակել ամենամեղմ պատիժը /հ. 3, գթ.թ 92, 94/:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 393-395-րդ, 399-րդ, 402-րդ հոդվածներով ՀՀ Վերաքննիչ քրեական դատարանը.

Ո Ր Ո Շ Ե Ց

Պաշտպան Վ. Մանուկյանի վերաքննիչ բողոքը բավարարել մասնակիորեն:
Նարեկ Գևորգի Սարգսյանի նկատմամբ ՀՀ քրեական օրենսգրքի 112-րդ հոդվածի 2-րդ մասի 1-ին կետով Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 21.07.2011 թվականի դատավճիռը փոփոխել պատժի մասով:
Նարեկ Գևորգի Սարգսյանին մեղավոր ճանաչել ՀՀ քրեական օրենսգրքի 112-րդ հոյդվածի 2-րդ մասի 1-ին կետով և դատապարտել ազատազրկման 5 /հինգ/ տարի ժամկետով:
Մնացած մասով դատավճիռը թողնել անփոփոխ:
Որոշումը կարող է բողոքարկվել ՀՀ Վճռաբեկ դատարանի քրեական պալատին` այն հրապարակելու պահից մեկամսյա ժամկետում։