Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

23 դեկտեմբերի 2011թ. ք. Երևան

ԵԿԴ-0040/01/11

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղարներ` Տ. Գրիգորյան,
Է. Մկրտչյան,

մասնակցությամբ`
մեղադրող,
Հայաստանի Հանրապետության
/այսուհետ ՀՀ/ գլխավոր
դատախազության սեփականության և
տնտեսական գործունեության դեմ ուղղված
հանցագործությունների գործերով
վարչության ավագ դատախազ Լ. Հովհաննիսյանի,

պաշտպան Կ. Սիմիդյանի

տուժող Ռ. Բաղդասարյանի,

թարգմանիչներ Շ. Աղաբալյանի,
Ա. Ադիխանյանի,
Վ. Հայրապետյանի


դատարանում, դռնբաց դատական նիստում քննեց գործն ըստ մեղադրանքի
Գիլբերտ Բոնգոյի
ծնված 1980թ. ապրիլի 19-ին Պորտ Ջենտիում (Գաբոն), Կոնգոյի Հանրապետության քաղաքացի, միջնակարգ կրթությամբ, Հայաստանի Հանրապետությունում դատվածություն չունի, ըստ իր հայտարարության բնակվել է Ֆրանսիայում, Փարիզի Լյինյուղեքսիոն թիվ 2 հասցեում, կալանքի տակ է 09.04.2010թ.-ից, մեղադրվում է ՀՀ քրեական օրենսգրքի 177-րդ հոդվածի 3-րդ մասի 1-ին, 2-րդ կետերով, 34-178-րդ հոդվածի 3-րդ մասի 1-ին, 2-րդ կետերով, 329-րդ հոդվածի 2-րդ մասով։

Գործի դատավարական նախապատմությունը

Թիվ 69110309 քրեական գործը ՀՀ ոստիկանության ՔԳՎ ՀԿԳ քննության վարչությունում հարուցվել է 2009թ. դեկտեմբերի 17-ին, ՀՀ քրեական օրենսգրքի 177-րդ հոդվածի 3-րդ մասի 1-ին կետով։
Քննիչի 2011թ. փետրվարի 24-ի որոշմամբ, Ռուբեն Բաղդասարյանի նկատմամբ, նրա կողմից Գիլբերտ Բոնգոյին վնաս պատճառելու մասով քրեական հետապնդում չի իրականացվել և քրեական գործի մասը կարճվել է` վնաս պատճառած արարքը քրեական օրենքով իրավաչափ համարվելու պատճառաբանությամբ։
Քննիչի նույն օրվա մեկ այլ որոշմամբ, թիվ 69110309 քրեական գործից անջատվել է Գիլբերտ Բոնգոյի վերաբերյալ մասը և անջատված մասին շնորհվել է 69110309/1 համարը։
Ամբաստանյալ Գիլբերտ Բոնգոյին նախաքննության մարմնի կողմից մեղադրանք է առաջադրվել ՀՀ քրեական օրենսգրքի 177-րդ հոդվածի 3-րդ մասի 1-ին, 2-րդ կետերով, 34-178-րդ հոդվածի 3-րդ մասի 1-ին, 2-րդ կետերով, 329-րդ հոդվածի 2-րդ մասով հետևյալ արարքների համար. «որ նա` ոմն Ջոնի, Լիբերիայի Հանրապետության քաղաքացի` Չարլզ Բլամոի, Շվեդիայի քաղաքացի` Ֆրանսիզ Վրեհ Ռեդդի հետ համաձայնության գալով ստեղծել են կազմակերպված հանցավոր խումբ` այսինքն շահադիտական դրդումներով նախնական համաձայնության են եկել առանձնապես խոշոր չափերի գումարների հափշտակություն կատարելու վերաբերյալ և այդ հանցանքները կատարելու համար տևական ժամանակով նախապես կազմել են կայուն հանցավոր խումբ։
Իրականացնելով իրենց հանցավոր դիտավորությունը, ոմն Ջոնը 2009թ. նոյեմբեր ամսին զանգահարել է Երևան քաղաքի «Խաչ-Հար» ՍՊԸ-ի տնօրեն` Ռուբեն Խաչիկի Բաղդասարյանին և ներկայանալով որպես խոշոր գործարար, ՀՀ-ում ներդրումներ կատարելու առաջարկ է արել, այնուհետև հայտնել է, որ ավելի կոնկրետ պայմանավորվածություններ ձեռք բերելու նպատակով Երևան կուղարկի իր ներկայացուցչին։ 2009թ. նոյեմբեր ամսի տարբեր օրերին Երևան են ժամանել կազմակերպված խմբի անդամներ Չարլզ Բլամոն և Ֆրանսիզ Վրեհ Ռեդդը։ Երևան քաղաքում հանդիպելով Ռուբեն Բաղդասարյանին ներկայացել են որպես ֆինանսական մեծ կարողություններ ունեցող գործարարներ, համատեղ գործունեության առաջարկ են արել և սուտ խոստումներ են տվել, իբր այդ նպատակով կարող են Հայաստան ներկրել մեկ միլիոն ԱՄՆ դոլար արժողության ադամանդյա քարեր, միաժամանակ որպես երաշխիք, որ ապրանքի ներկրումից հետո վճարումը կկատարվի, պահանջել են իրենց ցույց տալ կանխիկ մեկ միլիոն ԱՄՆ դոլար գումարը։ Միաժամանակ հայտնել են, որ նշված գումարը այլ նպատակով ծախսելու հնարավորությունը բացառելու համար իրենք հատուկ սև գույնի քիմիական նյութով կներկեն ԱՄՆ դոլարները, իսկ ադամանդյա քարերը Հայաստան բերելուց հետո այդ գումարները մեկ այլ քիմիական նյութով կմշակեն, որից հետո ԱՄՆ դոլարները կստանան իրենց սկզբնական տեսքը։
2009թ. դեկտեմբերի 2-ին Չարլզ Բլամոն և Ֆրանսիզ Վրեհ Ռեդդը պայմանավորվածության համաձայն Ռուբեն Բաղդասարյանին հանդիպել են Երևան քաղաքի Զաքիյան փողոցի 5 շենքի 27 բնակարանում, որտեղ Ռ.Բաղդասարյանը մեկ միլիոն ԱՄՆ դոլար գումարը ցույց է տվել նրանց, վերջիններս դրանք փաթաթել են փայլաթիթեղներով, մշակել սև գույնի անհայտ քիմիական նյութով և տեղադրելով դույլի մեջ պատճառաբանել են, որ քիմիական պրոցեսի համար անհրաժեշտ է շուրջ 15 րոպե ժամանակ։ Վերը նշված գործողություններով Չարլզ Բլամոն և Ֆրանսիզ Վրեհ Ռեդդը ապահովել են հափշտակվող գումարներին իրենց հասանելիությունը, ապա օգտվելով Ռ.Բաղդասարյանի կողմից ծխելու նպատակով պատշգամբ դուրս գալու հանգամանքից գողացել` Ռ.Բաղդասարյանից գաղտնի հափշտակել են վերջինիս պատկանող առանձնապես խոշոր չափի 385.600.000 ՀՀ դրամին համարժեք մեկ միլիոն ԱՄՆ դոլար գումարը և ՀՀ-ից հեռանալու համար ժամանակ շահելու նպատակով հափշտակված գումարը փոխարինել են նախապես իրենց կողմից պատրաստված նմանատիպ փայլաթիթեղներով փաթեթավորված թղթերով։ Հափշտակությունը կատարելուց հետո Չարլզ Բլամոն և Ֆրանսիզ Վրեհ Ռեդդը դիմել են փախուստի, իսկ Ռուբեն Բաղդասարյանը տեսնելով, որ վերջիններս չեն պատասխանում հեռախոսազանգերին, կասկածելով ստուգել է փայլաթիթեղների պարունակությունը և հայտնաբերել է հափշտակության փաստը։
Չբավարարվելով ձեռք բերածով, ոմն Ջոնը, Չարլզ Բլամոն, Ֆրանսիզ Վրեհ Ռեդդը և Գիլբերտ Բոնգոն կրկին անգամ կազմակերպված հանցավոր խմբով որոշել են խարդախությամբ տիրանալ Ռուբեն Բաղդասարյանի առանձնապես խոշոր չափի գումարներին։ Իրականացնելով իրենց հանցավոր դիտավորությունը` ոմն Ջոնը իբր տեղեկացված չլինելով հափշտակության չափի մասին, հեռախոսազրույցներ է ունեցել Ռուբեն Բաղդասարյանի հետ, որը հայտնել է, որ ներկված գումարը ոչ թե մեկ միլիոն ԱՄՆ դոլար է, այլ երեք միլիոն։ Ոմն Ջոնը շարունակելով Ռուբեն Բաղդասարյանի հետ հեռախոսազրույցները` խաբեությունն իրագործելու նպատակով դոլարների մաքրման պատրվակով վերջինիցս պահանջել է 600.000 ԱՄՆ դոլար գումար։ 2010թ. ապրիլի 1-ին ոմն Ջոնը Ռ.Բաղդասարյանի հետ հեռախոսազանգով հայտնել է, որ Երևան քաղաք կուղարկի իր ներկայացուցչին։ 2010թ. ապրիլի 7-ին Գիլբերտ Բոնգոն օգտագործելով Ֆրանսիայի Հանրապետության քաղաքացու Սևռան 93270, Ալե Քրիստոֆ Կոլոմբ 4 հասցեում հաշվառված Իբրահիմա Կոիտաի 02YI 95086 համարի անձնագիրը՝ Փարիզ-Երևան չվերթով ժամանել է Երևան քաղաք և առանց սահմանված փաստաթղթերի ու առանց պատշաճ թույլտվության կազմակերպված խմբի կողմից միասնական դիտավորությամբ ապօրինի հատել է Հայաստանի Հանրապետության պահպանվող պետական սահմանի Զվարթնոց անցակետը։ Գիլբերտ Բոնգոն Երևանում հանդիպելով Ռուբեն Բաղդասարյանին հաստատել է Ջոնի հանձնարարությամբ իր ժամանելու նպատակը և 2010թ. ապրիլի 9-ին Երևան քաղաքի Գրիբոյեդով փողոցի 17 հասցեում գտնվող «Տիգրան» ՍՊ ընկերության գրասենյակում չարաշահելով Ռուբեն Բաղդասարյանի վստահությունը, իրեն տրամադրված Չարլզ Բլամոնի և Ֆրենսիզ Վրեհ Ռեդդի կողմից փայլաթիթեղներով փաթեթավորված թղթերի նմուշը տեսնելով հայտարարել է, որ դրանք բավարար վիճակում են, ինքը կարող է դրանք մաքրել հատուկ քիմիական նյութով ու վերածել ԱՄՆ դոլարների, ինչի համար պահանջել է առանձնապես խոշոր չափերի 238.800.000 ՀՀ դրամին համարժեք 600.000 ԱՄՆ դոլար գումար, սակայն նշված գումարը խաբեությամբ հափշտակելու` իր հանցավոր մտադրությունը չի կարողացել ավարտին հասցնել իր կամքից անկախ հանգամանքներով, քանի որ նույն պահին բռնվել է ոստիկանության աշխատակիցների կողմից։»։
2011թ. մարտի 02-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Գործով չպարզված, արտերկրում բնակվող ոմն Ջոնը, 2009թ. նոյեմբերին զանգահարել է Երևանում գործող, «Խաչ-Հար» ՍՊԸ-ի տնօրեն Ռուբեն Խաչիկի Բաղդասարյանին և ներկայանալով որպես խոշոր գործարար` ՀՀ-ում ներդրումներ կատարելու առաջարկ է արել։ Այնուհետև հայտնել է, որ ավելի կոնկրետ պայմանավորվածություններ ձեռք բերելու նպատակով Երևան կուղարկի իր ներկայացուցչին։ 2009թ. նոյեմբերի տարբեր օրերին Երևան են ժամանել Չարլզ Բլամոն, Ֆրանսիզ Վրեհ Ռեդդը և հանդիպելով Ռուբեն Բաղդասարյանին` ներկայացել են որպես ֆինանսական մեծ կարողություններ ունեցող գործարարներ։ Նրանք համատեղ գործունեության առաջարկ են արել և հայտնել, որ կարող են էժան գներով Հայաստան ներկրել մեկ միլիոն ԱՄՆ դոլար ընդհանուր արժողության ադամանդյա քարեր։ Որպես երաշխիք, որ ապրանքի ներկրումից հետո վճարումը կկատարվի, պահանջել են իրենց ցույց տալ Ռ. Բաղդասարյանի ունեցած մեկ միլիոն ԱՄՆ դոլար կանխիկ գումարը։ Միաժամանակ հայտնել են, որ նշված գումարն այլ նպատակով ծախսելու հնարավորությունը բացառելու համար իրենք հատուկ, սև գույն ունեցող, քիմիական նյութով կներկեն այդ թղթադրամները, իսկ ադամանդյա քարերը Հայաստան բերելուց հետո այդ թղթադրամները մեկ այլ քիմիական նյութով կմշակեն, որից հետո դրանք կստանան իրենց սկզբնական տեսքը։ Տուժող Ռ. Բաղդասարյանը համաձայնվել է։
2009թ. դեկտեմբերի 2-ին Չարլզ Բլամոն և Ֆրանսիզ Վրեհ Ռեդդը, պայմանավորվածության համաձայն, Ռուբեն Բաղդասարյանին հանդիպել են Երևան քաղաքի Զաքիյան փողոցի 5 շենքի թիվ 27 բնակարանում, որտեղ Ռ. Բաղդասարյանը մեկ միլիոն ԱՄՆ դոլար կանխիկ գումարը ներկայացրել է նրանց։ Վերջիններս թղթադրամները փաթաթել են փայլաթիթեղներով, մշակել են սև գույն ունեցող, անհայտ քիմիական նյութով և տեղադրելով դույլի մեջ` պատճառաբանել են, որ քիմիական մշակման համար անհրաժեշտ է շուրջ 15 րոպե ժամանակ։ Այնուհետև, օգտվելով Ռ. Բաղդասարյանի` ծխելու նպատակով պատշգամբ դուրս գալու հանգամանքից, Ռ. Բաղդասարյանից գաղտնի հափշտակել են վերջինիս պատկանող, առանձնապես խոշոր չափի` 385.600.000 ՀՀ դրամին համարժեք մեկ միլիոն ԱՄՆ դոլար գումարը, դրա փոխարեն թողնելով նախապես իրենց կողմից պատրաստված, նմանատիպ փայլաթիթեղներով փաթեթավորված թղթեր։
Չարլզ Բլամոյի և Ֆրանսիզ Վրեհ Ռեդդի հեռանալուց հետո, Ռուբեն Բաղդասարյանը տեսնելով, որ վերջիններս չեն պատասխանում իր հեռախոսազանգերին` ստուգել է փայլաթիթեղների պարունակությունը և տեսել, որ այնտեղ ընդամենը թղթի ներկված կտորներ են։ Դրանից հետո, ոմն Ջոնի հետ ունեցած հեռախոսային խոսակցության ընթացքում, տուժող Ռ. Բաղդասարյանը հայտնել է, իբրև թե ներկված թղթադրամների գումարն իրականում կազմել է երեք միլիոն ԱՄՆ դոլար և պահանջել է կատարել իրենց պարտավորություններն ու մաքրել թղթադրամները։ Ոմն Ջոնը շարունակելով Ռուբեն Բաղդասարյանի հետ հեռախոսազրույցները, կրկին խարդախությամբ նրանից գումար հափշտակելու նպատակով, ներկված թղթադրամների մաքրման պատրվակով վերջինիցս պահանջել է ևս 600.000 ԱՄՆ դոլար գումար, որին Ռ. Բաղդասարյանը համաձայնվել է։ 2010թ. ապրիլի 1-ին ոմն Ջոնը Ռ.Բաղդասարյանին հեռախոսազանգով հայտնել է, որ այդ նպատակով Երևան է ուղարկում իր ներկայացուցչին։
Ամբաստանյալ, Կոնգոյի Հանրապետության քաղաքացի Գիլբերտ Բոնգոն, տուժող Ռ. Բաղդասարյանից 600.000 ԱՄՆ դոլար գումար հափշտակելու, առանց սահմանված փաստաթղթերի և առանց պատշաճ թույլտվության Հայաստանի Հանրապետության պահպանվող պետական սահմանը ապօրինի հատելու վերաբերյալ նախնական համաձայնության գալով ոմն Ջոնի և գործով չպարզված այլ անձանց հետ, 2010թ. ապրիլի 7-ին, օգտագործելով Ֆրանսիայի Հանրապետության քաղաքացու` Սևռան 93270, Ալե Քրիստոֆ Կոլոմբ 4 հասցեում հաշվառված Իբրահիմա Կոիտայի 02YI 95086 համարի անձնագիրը, Փարիզ-Երևան չվերթով ժամանել է Երևան, առանց սահմանված փաստաթղթերի և պատշաճ թույլտվության, մի խումբ անձանց հետ նախնական համաձայնությամբ, ապօրինի հատել է Հայաստանի Հանրապետության պահպանվող պետական սահմանը Զվարթնոց անցակետում։ Գիլբերտ Բոնգոն Երևանում հանդիպելով Ռուբեն Բաղդասարյանին` հաստատել է ոմն Ջոնի հանձնարարությամբ իր ժամանման նպատակը։ 2010թ. ապրիլի 9-ին, Երևան քաղաքի Գրիբոյեդով փողոցի թիվ 17 հասցեում գտնվող, «Տիգրան» ՍՊ ընկերության գրասենյակում, չարաշահելով Ռուբեն Բաղդասարյանի վստահությունը, իրեն տրամադրված, Չարլզ Բլամոնի և Ֆրենսիզ Վրեհ Ռեդդի կողմից փայլաթիթեղներով փաթեթավորված թղթերի նմուշը տեսնելով` ամբաստանյալ Գ. Բոնգոն հայտնել է, որ դրանք բավարար վիճակում են, ինքը կարող է դրանք մաքրել հատուկ քիմիական նյութով և դրանք վերածել ԱՄՆ դոլարների, ինչի համար պահանջել է առանձնապես խոշոր չափերի` 238.800.000 ՀՀ դրամին համարժեք 600.000 ԱՄՆ դոլար գումար, այսինքն կազմակերպված խմբի կողմից, խարդախությամբ փորձել է հափշտակել առանձնապես խոշոր չափերի գումար, սակայն իր մտադրությունը չի կարողացել ավարտին հասցնել իր կամքից անկախ հանգամանքներով, քանի որ նույն պահին բռնվել է ոստիկանության աշխատակիցների կողմից։
Քրեական գործի նախաքննության ընթացքում կատարվել են տեսաձայնագրառման, համակարգչատեխնիկական փորձաքննություններ և փաստաթղթաբանական, նյութագիտական և կենսաբանական համալիր փորձաքննություն ՀՀ ԳԱԱ «Փորձաքննությունների ազգային բյուրո» պետական ոչ առևտրային կազմակերպության կողմից։ Փորձաքննությունների ընդհանուր արժեքը կազմել է 494.640 /չորս հարյուր իննսունչորս հազար վեց հարյուր քառասուն/ ՀՀ դրամ գումար /հատոր 2, գ.թ. 134, 179, հատոր 3, գ.թ. 12/։



Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Տուժող Ռուբեն Խաչիկի Բաղդասարյանի ցուցմունքներով այն մասին, որ 2009թ. նոյեմբերին իրեն է զանգահարել Ջոն անունով անձնավորություն, ներկայացել է որպես խոշոր գործարար, ՀՀ-ում ներդրումներ կատարելու առաջարկ է արել, այնուհետև հայտնել է, որ ավելի կոնկրետ պայմանավորվածություններ ձեռք բերելու նպատակով Երևան կուղարկի իր ներկայացուցչին։ 2009թ. նոյեմբեր ամսվա տարբեր օրերին Երևան են ժամանել Չարլզ Բլամոն և Ֆրանսիզ Վրեհ Ռեդդը։ Վերջիններս Երևանում հանդիպել են իրեն և ներկայացել են որպես ֆինանսական մեծ կարողություններ ունեցող գործարարներ։ Այնուհետև նրանք համատեղ գործունեության առաջարկ են արել և հայտնել, որ այդ նպատակով կարող են Հայաստան ներկրել մեկ միլիոն ԱՄՆ դոլար ընդհանուր արժողության ադամանդյա քարեր։ Որպես երաշխիք, որ ապրանքի ներկրումից հետո վճարումը կկատարվի, պահանջել են իրենց ցույց տալ մեկ միլիոն ԱՄՆ դոլար կանխիկ գումար։ Միաժամանակ հայտնել են, որ նշված գումարն այլ նպատակով ծախսելու հնարավորությունը բացառելու համար իրենք սև գույնի, քիմիական հատուկ նյութով կներկեն ԱՄՆ դոլարները, իսկ ադամանդյա քարերը Հայաստան բերելուց հետո այդ թղթադրամները մեկ այլ քիմիական նյութով կմաքրեն, որից հետո դրանք կստանան իրենց սկզբնական տեսքը։
2009թ. դեկտեմբերի 2-ին Չարլզ Բլամոն և Ֆրանսիզ Վրեհ Ռեդդը իր հետ հանդիպել են Երևան քաղաքի Զաքիյան փողոցի թիվ 5 շենքի թիվ 27 բնակարանում, որտեղ ինքը մեկ միլիոն ԱՄՆ դոլար կանխիկ գումարը ցույց է տվել նրանց։ Վերջիններս դրանք փաթաթել են փայլաթիթեղներով, մշակել են սև գույնի, անհայտ քիմիական նյութով, տեղադրել են դույլի մեջ և ասել, որ քիմիական պրոցեսի համար անհրաժեշտ է շուրջ 15 րոպե ժամանակ։ Ինքը ցանկացել է ծխել, սակայն Չ. Բլամոն և Ֆ. Ռեդդը պատճառաբանել են, թե դա վտանգավոր է և ինքը դուրս է եկել պատշգամբ։ Երբ վերադարձել է, Չ. Բլամոն և Ֆ. Ռեդդը հայտնել են, որ քիմիական նյութերը վերջացել են և կիսատ թողած գործը կարող են ավարտել հետագայում։ Որոշ ժամանակ հետո ինքը զանգահարել է Չ. Բլամոյի և Ֆ. Ռեդդի հեռախոսահամարներին, սակայն նրանք հեռախոսազանգերին չեն պատասխանել։ Այնուհետև բացել է փայլաթիթեղյա փաթեթները և տեսել, որ թղթադրամների փոխարեն միայն ներկված թղթեր են։ Հասկացել է, որ Չ. Բլամոն և Ֆ. Ռեդդին իրենից գողացել են առանձնապես խոշոր չափի` 385.600.000 ՀՀ դրամին համարժեք մեկ միլիոն ԱՄՆ դոլար գումարը։
Այնուհետև շարունակել է հեռախոսազրույցներ ունենալ Ջոնի հետ և նրան հայտնել է, իբրև թե ներկված թղթադրամներով գումարը ոչ թե մեկ միլիոն ԱՄՆ դոլար է, այլ երեք միլիոն։ Ջոնը շարունակելով իր հետ հեռախոսազրույցները` թղթադրամների մաքրման համար իրենից պահանջել է 600.000 ԱՄՆ դոլար գումար, որի հետ ինքը համաձայնվել է։ 2010թ. ապրիլի 1-ին Ջոնն իր ընկեր Արամ Առաքելյանի միջոցով, հեռախոսազանգով հայտնել է, որ Երևան քաղաք կուղարկի իր ներկայացուցչին։
2010թ. ապրիլի 7-ին, Փարիզ-Երևան չվերթով Երևան է ժամանել մի անձնավորություն, որը ներկայացել է որպես Իբրահիմա Կոիտա և հայտնել, որ իրեն ուղարկել է Ջոնը, որպեսզի մաքրի Չարլզ Բլամոյի և Ֆրանսիզ Ռեդդի կողմից ներկված թղթերը։ Նա պահանջել է այդ սևացրած թղթերը, որոնք զննելով` հայտնել է, որ դրանք լավ որակ ունեն և նա կարող է դրանք մաքրել, որից հետո դրանք կվերածվեն դոլարների, ինչի համար պահանջել է 600.000 ԱՄՆ դոլար գումար։ Մինչ այդ, Ի. Կոիտան իբրև թե թղթերի որակը ստուգելու համար առաջարկել է փակել լուսամուտների վարագույրները, որպեսզի մթության պայմաններում զննի դրանք։ Դրանից հետո, երբ վերջինս հասկացել է, որ հնարավոր է, որ շուտով ոստիկանները գան, փորձել է դիմել փախուստի, սակայն ինքը և Ա.Առաքելյանը բռնել են նրա ոտքերից, ինչի հետևանքով Ի. Կոիտան վայր է ընկել և վնասվածք ստացել։ Հետագայում իմացել է, որ Իբրահիմա Կոիտա ներկայացած անձնավորությունը հանդիսանում է Գիլբերտ Բոնգոն։ Մինչ այդ նա բազմաթիվ հեռախոսային խոսակցություններ է ունեցել Ջոնի հետ։
/դատական նիստի արձանագրություն, հատոր 1, գ.թ. 58-61, 93, հատոր 2, գ.թ. 14-16/
Տուժող՝ Ռ.Բաղդասարյանն իր նախաքննական ցուցմունքները պնդել է նաև ամբաստանյալ Գ.Բոնգոյի հետ առերես հարցաքննության ժամանակ։
/հատոր 3, գ.թ. 18-20/
Վկա Արամ Իգորի Առաքելյանի ցուցմունքներով այն մասին, որ հանդիսանում է Ռուբեն Բաղդասարյանի ընկերը։ Քանի որ լավ տիրապետում է անգլերեն լեզվին, Ռ. Բաղդասարյանն իրեն խնդրել է պատասխանել ինչ-որ Ջոնի հեռախոսազանգերին։ Ջոնը իր հետ տեղի ունեցած հեռախոսազրույցների ժամանակ դոլարների մաքրման համար Ռ.Բաղդասարյանից պահանջել է 600.000 ԱՄՆ դոլար գումար և Ռ. Բաղդասարյանը համաձայնվել է։
2010թ. ապրիլի 1-ին Ջոնը հեռախոսազանգով խնդրել է Ռ. Բաղդասարյանին հայտնել, որ Երևան է ուղարկելու իր ներկայացուցչին՝ ինչ-որ թղթեր ներկից մաքրելու համար։ 2010թ. ապրիլի 7-ին Փարիզ-Երևան չվերթով Երևան է ժամանել մի անձնավորություն, որը ներկայացել է որպես Բեն և հայտնել, որ իրեն ուղարկել է Ջոնը, որպեսզի մաքրի Չարլզ Բլամոյի և Ֆրանսիզ Ռեդդի կողմից ներկված թղթերը։ Բենը պահանջել է այդ սևացրած թղթերը, որոնք զննելով` հայտնել է, որ դրանք լավ որակ ունեն և կարող է դրանք նյութերից մաքրել, որից հետո դրանք կվերածվեն դոլարների։ Մինչ այդ, վերջինս իբրև թե թղթերի որակը ստուգելու համար առաջարկել է փակել լուսամուտների վարագույրները, որպեսզի մթության պայմաններում զննի դրանք։ Դրանից հետո նա փորձել է դիմել փախուստի, սակայն ինքը և Ռ. Բաղդասարյանը բռնել են Բենի ոտքերից, ինչի հետևանքով վերջինս վայր է ընկել և վնասվածք ստացել։ Այնուհետև եկել են ոստիկանները և նրան բերման են ենթարկել։ Հետագայում իմացել է, որ որպես Բեն ներկայացած անձնավորությունը հանդիսանում է Գիլբերտ Բոնգոն։ Վերջինս բազմիցս հեռախոսային խոսակցություններ է ունեցել Ջոնի հետ։ Ինքը Ռ. Բաղդասարյանի խնդրանքով ձայնագրել է Ջոնի և Գ.Բոնգոյի հեռախոսազանգերի խոսակցությունները և պահանջները։
/դատական նիստի արձանագրություն, հատոր 2, գ.թ. 26-29/
Վկա Արամ Առաքելյանն իր նախաքննական ցուցմունքները պնդել է նաև ամբաստանյալ Գ.Բոնգոյի հետ առերես հարցաքննության ժամանակ։
/հատոր 3, գ.թ. 21-22/
Վկա Թելման Տաֆիկի Մելքոնյանի ցուցմունքներով այն մասին, որ աշխատում է «Խաչ-Հար» ՍՊ ընկերությունում որպես վարորդ։ 2009թ. նոյեմբերին ընկերության տնօրեն Ռուբեն Բաղդասարյանի հետ տեսել է մի սևամորթ տղամարդու և հետաքրքրվելով` տեղեկացել է, որ նա խոշոր գործարար է, ընկերությունում ցանկանում է ներդրումներ կատարել։ Այնուհետև, 2009թ. նոյեմբերի վերջերին ընկերության տնօրեն Ռ.Բաղդասարյանի հանձնարարությամբ գնացել է Երևան քաղաքի «Երևան» հյուրանոց, որտեղ տեսել է երկու սևամորթների, որոնցից մեկի անունը եղել է Չարլզ, իսկ մյուսինը՝ Սեմ։ Նրանց տեղափոխել է «Գոլդեն Թուլիբ» հյուրանոց՝։ 2009թ. դեկտեմբերի սկզբներին նրանցից մեկին ուղեկցել է Զվարթնոց օդնավակայան, որն իր հետ ունեցել է մեծ ճամպրուկ։
/դատական նիստի արձանագրություն, հատոր 1, գ.թ. 148-150/
Վկա Հռիփսիմե Խաչիկի Խաչիկյանի նախաքննական ցուցմունքով այն մասին, որ 2007թ.-ից աշխատել է «Խաչ-Հար» ՍՊ ընկերությունում որպես թարգմանչուհի։ Հաճախ զբաղվել է ընկերության էլեկտրոնային փոստի ուսումնասիրմամբ և թարգմանությամբ։ 2009թ. հոկտեմբերին էլեկտրոնային փոստում նկատել է Լոնդոնից ինչ-որ Ջոն անունով անձնավորության հաղորդագրությունն այն մասին, որ իբրև թե վերջինս ունի մեծ գումարներ և ցանկանում է ներդրումներ կատարել, խնդրել է իրեն փոխանցել ընկերության տնօրինության հեռախոսահամարներից որևէ մեկը։ Ինքն այդ մասին տեղեկացրել է ընկերության տնօրեն Ռուբեն Բաղդասարյանին և ստանալով վերջինիս համաձայնությունը` փոխանցել է տնօրենի բջջային հեռախոսահամարը։
2009թ. նոյեմբերին Ջոնը զանգահարել է իրեն և ներկայանալով որպես խոշոր գործարար` ՀՀ-ում ներդրումներ կատարելու առաջարկ է արել։ Այնուհետև հայտնել է, որ ավելի կոնկրետ պայմանավորվածություններ ձեռք բերելու նպատակով Երևան կուղարկի իր ներկայացուցչին։
2009թ. նոյեմբեր ամսվա տարբեր օրերին Երևան են ժամանել Չարլզ Բլամոն և Ֆրանսիզ Վրեհ Ռեդդը։ Վերջինս ներկայացել է որպես Սեմ։ Երևան քաղաքում հանդիպելով իրեն և Ռուբեն Բաղդասարյանին` նրանք հայտնել են, որ ֆինանսական մեծ կարողություններ ունեցող գործարարներ են և համատեղ գործունեության առաջարկ են արել։ Ինքն այդ ամենը թարգմանել է Ռ. Բաղդասարյանին։ Ինքն այդ սևամորթներին մի քանի անգամ հանդիպել է նաև ճաշկերույթների ժամանակ, որոնց ընթացքում կրկին քննարկվել է նույն թեման։
/հատոր 1, գ.թ. 284-287/
Փաստաթղթաբանական, նյութագիտական և կենսաբանական համալիր փորձաքննության 08.06.2010թ. թիվ 10-0954 եզրակացությամբ, որի համաձայն՝ «Ներկայացված 65x155մմ չափերի սև, սպիտակ և սպիտակ՝ եզրային հատվածներում բաց շագանակագույն թղթերի վրա որևէ տպագրություն չկա, սև թղթերի մի խումբը կատարված է համակարգչային տարբեր տեսակի շիթային տպիչներով, իսկ մյուս մասը հավանաբար պատրաստված է գործարանային եղանակով։
Սպիտակ եզրային հատվածներում բաց շագանակագույն թղթերի վրա եզրային հատվածներում բաց շագանակագույն թղթերը կարող էին կտրվել ինչպես գործարանային, այնպես էլ տնայնագործական եղանակով։
Փորձաքննությանը ներկայացված ուղղանկյունաձև սպիտակ և սև գույնի թղթերի վրա, որոնցից սև գույնի թղթերի եզրային հատվածների վրա առկա են սպիտակ երանգի ուղղանկյունաձև հետքեր, իսկ սպիտակ գույնի թղթերի եզրային հատվածների վրա առկա են շականակագույն հետքեր, որոնք իրենց երանգներով տարբերվում են թղթերի միջնահատվածների երանգներից, առկա են յոդի հետքեր։
Փորձաքննությանը ներկայացված talc de venise, 250g գրառմամբ վարդագույն տուփերի մեջ առկա սպիտակ գույնի 247,62 գրամ և 261,32 գրամ մաքուր քաշերով փոշենման զանգվածները իրենց բաղադրության մեջ պարունակում են մագնեզիումի անօրգանական միացություն, չեն պարունակում որևէ թմրակտիվ և հոգեմետ բաղադրատարրեր, համապատասխանում են միմյանց լուծիչների ազդեցությամբ` լուծելիությամբ, իրենց կշռային ցուցանիշներով (+ 10 գրամ ինտերվալով) համապապատասխանում են տուփերի վրա առկա չափանիշներին։
Փորձաքննությանը ներկայացված ապակյա տարայում առկա կարմրաշագանակագույն, յուրահատուկ հոտով հեղուկը իր բաղադրության մեջ պարունակում է յոդ` հանդիսանում է յոդի լուծույթ։
Փորձաքննությանը ներկայացված սպիտակ գույնի թափանցիկ դատարկ սրվակները իրենցից ներկայացնում են պոլիմերային դատարկ սրվակներ, որոնց մեջ որևէ նյութի հետքեր չկան։
Փորձաքննությանը ներկայացված Laroscorbine 1 g/5 ml գրառումներով գործարանային զոդման թվով հինգ սրվակներում առկա են 5 միլիլիտր ծավալով թափանցիկ հեղուկներ, որոնք չեն պարունակում որևէ թմրակտիվ և հոգեմետ բաղադրատարրեր։ Սրվակներից յուրաքանչյուրի բաղադրության մեջ առկա է ասկորբինաթթու։ Սրվակներում առկա ասկորբինաթթվի պարունակությամբ և ծավալով համապատասխանում են տուփի վրա առկա գրառումներին։
/հատոր 3, գ.թ. 6-11/
Համակարգչատեխնիկական փորձաքննության 20.05.2010թ. թիվ 10-0874 եզրակացությամբ, որի համաձայն՝ փորձաքննությանը ներկայացված «BlackBerry 9500» մակնիշի բջջային հեռախոսի IMEI անհատականացման արժեքը` 359484026271950։
Փորձաքննությանը ներկայացված «BlackBerry 9500» մակնիշի բջջային հեռախոսի մեջ տեղադրված «Vivacell», «prepaid» գրառումներով հեռախոսային քարտի անհատականացման համարը (ICC ID)` 8937493309022358125։
Փորձաքննությանը ներկայացված «BlackBerry 9500» մակնիշի բջջային հեռախոսի հիշողության մեջ առկա են մի շարք գրառումներ, այդ թվում՝ Իբրահիմա Կոիտա ներկայացած՝ Գիլբերտ Բոնգոյի կողմից վերջին զանգերի ցանկում առկա է ոմն Ջոնի` Մեծ Բրիտանիայի 447529972655 հեռախոսահամարը՝ որպես ստացված և հավաքված համար, իսկ հեռախոսի հիշողության մեջ գործածողի կողմից ստեղծված ձայնագրություններ և կարճ հաղորդագրություններ չեն հայտնաբերվել։
/հատոր 2, գ.թ. 163-170/
Մատնադրոշմային փորձաքննության 21.10.2010թ. թիվ 2543 եզրակացությամբ, որի համաձայն` «Թիվ 69110309 քր. գործով փորձաքննության ներկայացված Իբրահիմա Կոիտայի տաս մատնադրոշմները և Գիլբերտ Բոնգոյի տաս մատնադրոշմների պատճենները համապատասխանաբար համընկնում են միմյանց հետ, այսինքն դրանք պատկանում են միևնույն անձի»։
/հատոր 4, գ.թ. 3-8/
Խուզարկություն կատարելու մասին 09.04.2010թ. արձանագրությամբ, որի համաձայն` Գիլբերտ Բոնգոյի` ՀՀ-ում ժամանակավոր բնակության վայրում, Արմավիրի մարզի Թաիրով գյուղում գտնվող «Զվարթնոց» հյուրանոցի թիվ 46 սենյակում կատարված խուզարկությամբ հայտնաբերվել են նաև Իբրահիմա Կոիտայի` Ֆրանսիայի Հանրապետության քաղաքացու թիվ 02 YI 95086 անձնագիրը, «Տալք դե վենիսե Գիֆրեր» /«talc de venise Gifrer»/ տեսակի նյութերը, ապակյա սրվակով յոդանման նյութը, դատարկ սրվակները, «Լարոսքորբայն» /«Laroscorbine»/ տեսակի դեղամիջոցը։
/հատոր 2, գ.թ. 36-42/
Նմուշներ ստանալու մասին 12.04.2010թ. արձանագրությամբ, որի համաձայն` Գ. Բոնգոյից վերցվել են մատնադրոշմային նմուշներ, ինչպես նաև վերջինս լուսանկարահանվել է փորձագետի կողմից։
/հատոր 2, գ.թ. 72/
Մարմնի քննում կատարելու մասին 12.04.2010թ. և անձնագիրը զննելու մասին 19.01.2011թ. արձանագրութուններով, որոնց համաձայն` որպես Իբրահիմա Կոիտա ներկայացած Գիլբերտ Բոնգոյի հասակը կազմում է 172սմ, իսկ Իբրահիմա Կոիտայի` Ֆրանսիայի Հանրապետության քաղաքացու թիվ 02 YI 95086 անձնագրում վերջինիս հասակը նշված է 184սմ։
/հատոր 2, գ.թ. 76, հատոր 4, գ.թ. 31/
Հեռախոսահամարի ելքային և մուտքային զանգերը զննելու մասին 03.05.2010թ. արձանագրությամբ, որի համաձայն՝ Գիլբերտ Բոնգոյի կողմից Երևան քաղաքում օգտագործված, 098-32-48-97 բջջային հեռախոսահամարից առկա են ելքային և մուտքային զանգեր ոմն Ջոնի` Մեծ Բրիտանիայի 447529972655 հեռախոսահամարին և Ղազախստանի 74992711999 հեռախոսահամարին, որոնք առկա են նաև Ֆրենսիզ Վրեհ Ռեդդի կողմից Երևան քաղաքում օգտագործված, 099-19-56-03 հհեռախոսազանգերի վերծանումների ցանկում։
/հատոր 2, գ.թ. 138-141/
Որպես այլ փաստաթուղթ` ապացույց ճանաչված, ՀՀ Ինտերպոլի ազգային կենտրոնական բյուրոյից 05.10.2010թ. թիվ 33/A-2807-PE 2/416/49/10, 09.07.2010թ. թիվ 33/A-1916-PE 2/416/49/10 և 31.05.2010թ. թիվ 33/A-1482-PE 2/416/49/10 գրություններով և դրանց կից փաստաթղթերով, որոնց համաձայն` Իբրահիմա Կոիտայի մատնահետքերի պատճենների համեմատության արդյունքում պարզվել է, որ դրանք համընկնում են Գիլբերտ Բոնգոյի /ծնված 19.04.1980թ./ մատնահետքերի հետ։ Վերջինս անցնում է Ֆրանսիայի օտարերկրացիների հաշվառումներով՝ իրավախախտումներ կատարելու համար։ Համաձայն ստացված տեղեկատվության` Իբրահիմա Կոիտաի 02YI 95086 համարի անձնագիրն իսկական է, տրվել է Կոիտա Իբրահիմին, որը 2006թ. հայտարարվել է որպես կորած, իսկ նրա անձնական տվյալներն ապօրինի կերպով յուրացվել են։ Ստացված տեղեկատվության համաձայն՝ Գիլբերտ Բոնգոն ծնվել է 19.04.1980թ. Պորտ Ջենտիում, Գաբոն, Կոնգոյի քաղաքացի է։ Ֆրանսիայում Ինտերպոլի ԱԿԲ-ից ստացվել են Կոիտա Իբրահիմի և Գիլբերտ Բոնգոյի լուսանկարները, որոնց համեմատության արդյունքում պարզվել է, որ լուսանկարներում պատկերված անձինք հանդիսանում են միևնույն անձը` Գիլբերտ Բոնգոն։
/հատոր 4, գ.թ. 48-51/
Իրեղեն ապացույցներ ճանաչված, Իբրահիմա Կոիտայի` Ֆրանսիայի Հանրապետության քաղաքացու թիվ 02 YI 95086 անձնագրով, «Տալք դե վենիսե Գիֆրեր» /«talc de venise Gifrer»/ տեսակի նյութերով, ապակյա սրվակով յոդանման նյութով, դատարկ սրվակներով, «Լարոսքորբայն» /«Laroscorbine»/ տեսակի դեղամիջոցով, Չարլզ Բլամոյի և Ֆրանսիզ Վրեհ Ռեդդի կողմից Ռ. Բաղդասարյանին տրամադրված թղթերով։
/հատոր 2, գ.թ. 104-106/
Առաջադրված մեղադրանքում Գիլբերտ Բոնգոն իրեն մեղավոր չի ճանաչել և ցուցմունքներ է տվել այն մասին, որ իրականում ինքը Իբրահիմա Կոիտան է։ 2009թ.-ից բնակվում է Փարիզում` կնոջ և երկու աղջիկների հետ միասին։ Ֆրանսիայում զբաղվել է հագուստի առևտրով։ Հագուստի առևտրի համար իր ընկեր Չիբո Նգաբսի Բեննից պարտքով գումար է խնդրել։ Վերջինս առաջարկել է ընկերակցել և միասին ուղևորվել Հայաստան՝ Երևան քաղաք, որից հետո խոստացել է իրեն պարտքով գումար տալ։ Ինքը համաձայնվել է և 2010թ. ապրիլի 7-ին Չիբոն իրեն է տվել Փարիզ-Երևան չվերթի ավիատոմսեր։ Միասին գնացել են Ֆրանսիայի «Շարլ Դը Գոլ» օդանավակայան, սակայն այդտեղ ոստիկանները Չիբո Բենին ձերբակալել են և ինքը միայնակ մեկնել է Հայաստան։ Մինչ այդ իրեն Չ.Բենը տվել է իր ֆրանսիացի ընկերներից Սերժի հեռախոսահամարը, որն իրեն հայտնել է, թե Արամին Երևանում պետք է հավաստիացնի, որ ինչ-որ բիզնես ունեն և նախկինում մնացած սև գույնի թղթերը ինքը պետք է մաքրի։ Երբ հանդիպել են Արամին, վերջինս իրեն հարցրել է, թե որքան գումար է անհրաժեշտ այդ թղթերը մաքրելու համար։ Ինքը պատասխանել է, որ ցանկանում է տեսնել այդ թղթերի որակը, որից հետո միայն կմաքրի այդ թղթերը։
2010թ. ապրիլի 9-ին Երևան քաղաքի ինչ-որ ընկերության գրասենյակում հանդիպել է Արամին և Ռուբիկ անունով անձնավորությանը։ Ինքն այդտեղ պահանջել է այդ սևացրած թղթերը, որոնց նայելով և զննելով` հայտնել է, որ դրանք լավ որակի են և կարող է նյութերից մաքրել, որից հետո դրանք կվերածվեն դոլարների։ Մինչ այդ ինքը այդ թղթերի որակը ստուգելու համար առաջարկել է փակել լուսամուտների վարագույրները՝ մթության պայմաններում դրանք զննելու համար։ Այնուհետև սենյակ են մտել 5-8 անձինք և իրեն ծեծի ենթարկել։ Դրանից հետո եկել են ոստիկանները և իրեն բերման ենթարկել։
Գիլբերտ Բոնգոն իր նախկին ընկերն է եղել։ Երբ Ֆրանսիայում, հյուրանոցներից մեկից դուրս գալու ժամանակ իրեն և այդ ընկերոջը փորձել են բռնել ոստիկանները` Գ.Բոնգոն փախել է, իսկ իրեն բռնել են և վերջինիս փաստաթղթերը վերագրել են իրեն։ Իր տեղեկություններով Գ. Բոնգոն մահացել է։
/դատական նիստի արձանագրություն, հատոր 2, գ.թ. 25, 56,143-145, հատոր 3, գ.թ. 27-28, հատոր 4, գ.թ. 65/



Դատարանի իրավական վերլուծությունները.

Վերլուծելով ամբաստանյալ Գիլբերտ Բոնգոյի ցուցմունքները, դրանք համադրելով այլ ապացույցների հետ, գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, դատարանը գտնում է, որ ամբաստանյալ Գիլբերտ Բոնգոյի նախաքննական և դատաքննական ցուցմունքները` Իբրահիմա Կոիտան հանդիսանալու, խարդախությամբ գումար հափշտակելու փորձ կատարած չլինելու, պետական սահմանն ապօրինի հատած չլինելու մասին, իրականությանը չեն համապատասխանում, քրեական պատասխանատվությունից և պատժից խուսափելու նպատակ են հետապնդում և հերքվում են արդեն իսկ նշված ապացույցներով։
Քննարկելով վկա Արամ Առաքելյանի կողմից կատարված հեռախոսային խոսակցությունների ձայնագրությունները պարունակող լազերային սկավառակի հիման վրա կատարված տեսաձայնագրառման փորձաքննության 27.04.2010թ. թիվ 10-0873 և տեսաձայնագրառման փորձաքննության 19.08.2010թ. թիվ 14471006 լրացուցիչ եզրակացությունների` որպես ապացույցի թույլատրելիության հարցը, դատարանը գտնում է, որ որպես ապացույց դրանք թույլատրելի չեն հետևյալ պատճառաբանությամբ.
ՀՀ Սահմանադրության 23-րդ հոդվածի համաձայն` «Առանց անձի համաձայնության նրա վերաբերյալ չի կարելի հավաքել, պահպանել, օգտագործել կամ տարածել այլ տեղեկություններ, քան նախատեսված է օրենքով։ Արգելվում է անձին վերաբերող տեղեկությունների օգտագործումն ու տարածումը, եթե դա հակասում է տեղեկությունների հավաքման նպատակներին կամ չի նախատեսված օրենքով։
Յուրաքանչյուր ոք ունի նամակագրության, հեռախոսային խոսակցությունների, փոստային, հեռագրական և այլ հաղորդումների գաղտնիության իրավունք, որը կարող է սահմանափակվել միայն օրենքով սահմանված դեպքերում և կարգով, դատարանի որոշմամբ»։
ՀՀ քրեական դատավարության դատավարության օրենսգրքի 278-րդ հոդվածի 1-ին մասի համաձայն` «Դատարանը քննում է քննչական, օպերատիվ-հետախուզական գործողություններ կատարելու և անձի սահմանադրական իրավունքները և ազատությունները սահմանափակող դատավարական հարկադրանքի միջոցներ կիրառելու վերաբերյալ միջնորդությունները»։
Նույն օրենսգրքի 279-րդ հոդվածի համաձայն` «Դատարանի որոշմամբ կատարվում են բնակարանի խուզարկությունը, ինչպես նաև նամակագրության, հեռախոսային խոսակցությունների, փոստային, հեռագրական և այլ հաղորդումների գաղտնիության սահմանափակման հետ կապված քննչական գործողությունները»։
Նույն օրենսգրքի 105-րդ հոդվածի 1-ին մասի 3-րդ և 5-րդ կետերի համաձայն` «Քրեական գործով վարույթում մեղադրանքի հիմքում չեն կարող դրվել և որպես ապացույց օգտագործվել այն նյութերը, որոնք ձեռք են բերվել` տվյալ քրեական գործով քրեական դատավարություն իրականացնելու, համապատասխան քննչական կամ այլ դատավարական գործողություն կատարելու իրավունք չունեցող անձի կողմից, քննչական կամ այլ դատավարական գործողության կատարման կարգի էական խախտմամբ»։
Վերոհիշյալ ձայնագրությունները կատարվել են քրեական գործով քրեական դատավարություն իրականացնելու, համապատասխան քննչական կամ այլ դատավարական գործողություն կատարելու իրավունք չունեցող անձ, վկա Արամ Առաքելյանի կողմից, չի պահպանվել այդ գործողության` օրենքով սահմանված կատարման կարգը։ Հետևաբար այդ ձայնագրությունների հիման վրա կատարված տեսաձայնագրառման փորձաքննության 27.04.2010թ. թիվ 10-0873 և տեսաձայնագրառման փորձաքննության 19.08.2010թ. թիվ 14471006 լրացուցիչ եզրակացությունները մեղադրանքի հիմքում դրվել և որպես ապացույց օգտագործվել չեն կարող։
Վերլուծելով ամբաստանյալ Գիլբերտ Բոնգոյին առաջադրված մեղադրանքը, գործով ձեռք բերված ապացույցները` դատարանը գտնում է, որ ամբաստանյալ Գիլբերտ Բոնգոյի կողմից, նրա մեղավորությամբ, առանձնապես խոշոր չափերով, կազմակերպված խմբի կողմից խարդախության փորձ կատարելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 34-178-րդ հոդվածի 3-րդ մասի 1-ին և 2-րդ կետերով նախատեսված հանցագործության հատկանիշներին։
Ապացուցված է նաև ամբաստանյալ Գիլբերտ Բոնգոյի կողմից, նրա մեղավորությամբ, մի խումբ անձանց կողմից նախնական համաձայնությամբ, առանց սահմանված փաստաթղթերի և առանց պատշաճ թույլտվության Հայաստանի Հանրապետության պահպանվող պետական սահմանը հատելը, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 329-րդ հոդվածի 2-րդ մասով նախատեսված հանցագործության հատկանիշներին։
Ամբաստանյալ Գիլբերտ Բոնգոյի կողմից, նրա մեղավորությամբ, կազմակերպված խմբի կողմից, առանձնապես խոշոր չափերով գողություն կատարելն ապացուցված չէ, նրա արարքն այդ մասով ճիշտ չի որակված և ՀՀ քրեական օրենսգրքի 177-րդ հոդվածի 3-րդ մասի 1-ին և 2-րդ կետերով նախատեսված հանցագործության հատկանիշներին չի համապատասխանում հետևյալ պատճառներով`
ՀՀ քրեական օրենսգրքի 177-րդ հոդվածի համաձայն`
«1. Գողությունը՝ ուրիշի գույքի զգալի չափերով գաղտնի հափշտակությունը
(…)
3. Գողությունը, որը կատարվել է՝
1) առանձնապես խոշոր չափերով,
2) կազմակերպված խմբի կողմից,
(…)
պատժվում է ազատազրկմամբ` չորսից ութ տարի ժամկետով` գույքի բռնագրավմամբ կամ առանց դրա։»։
ՀՀ քրեական դատավարության օրենսգրքի 18-րդ հոդվածի 3-րդ մասի համաձայն` «Հանցանք գործելու մեջ անձի մեղավորության մասին հետևությունը չի կարող հիմնվել ենթադրությունների վրա, այն պետք է հաստատվի գործին վերաբերող փոխկապակցված հավաստի ապացույցների բավարար ամբողջությամբ։»։
Նույն հոդվածի 4-րդ մասի համաձայն` «Մեղադրանքն ապացուցված լինելու վերաբերյալ բոլոր կասկածները, որոնք չեն կարող փարատվել սույն օրենսգրքի դրույթներին համապատասխան պատշաճ իրավական ընթացակարգի շրջանակներում, մեկնաբանվում են հօգուտ մեղադրյալի կամ կասկածյալի։»։
ՀՀ քրեական դատավարության օրենսգրքի 35-րդ հոդվածի 2-րդ մասի համաձայն` «Քրեական հետապնդումը ենթակա է դադարեցման, իսկ գործի վարույթը ենթակա է կարճման` կատարված հանցագործությանը կասկածյալի կամ մեղադրյալի մասնակցությունն ապացուցված չլինելու արդյունքում, եթե սպառված են նոր ապացույցներ ձեռք բերելու բոլոր հնարավորությունները։»։
ՀՀ քրեական դատավարության օրենսգրքի 126-րդ հոդվածի համաձայն` «Գործով հավաքված ապացույցները ենթակա են բազմակողմանի և օբյեկտիվ ստուգման` ձեռք բերված ապացույցի վերլուծության, այն այլ ապացույցների հետ համադրելու, նոր ապացույցներ հավաքելու, ապացույցների ձեռքբերման աղբյուրներն ստուգելու միջոցով։»։
ՀՀ քրեական դատավարության օրենսգրքի 127-րդ հոդվածի համաձայն`
«1. Յուրաքանչյուր ապացույց ենթակա է գնահատման` վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից։
2. Հետաքննության մարմնի աշխատակիցը, քննիչը, դատախազը, դատավորը, ղեկավարվելով օրենքով, ապացույցները գնահատում են ապացույցների համակցության մեջ` դրանց բազմակողմանի, լրիվ և օբյեկտիվ քննության վրա հիմնված իրենց ներքին համոզմամբ։»։
Քրեական գործով ձեռք բերված և հետազոտված ապացույցներով հիմնավորվել է, որ 2009թ. դեկտեմբերի 2-ին Չարլզ Բլամոն և Ֆրանսիզ Վրեհ Ռեդդը, պայմանավորվածության համաձայն, Ռուբեն Բաղդասարյանին հանդիպել են Երևան քաղաքի Զաքիյան փողոցի 5 շենքի 27 բնակարանում, որտեղ Ռ.Բաղդասարյանը մեկ միլիոն ԱՄՆ դոլար գումարը ցույց է տվել նրանց։ Վերջիններս դրանք փաթաթել են փայլաթիթեղներով, մշակել սև գույնի անհայտ քիմիական նյութով և տեղադրելով դույլի մեջ` պատճառաբանել են, որ քիմիական պրոցեսի համար անհրաժեշտ է շուրջ 15 րոպե ժամանակ։ Այնուհետև օգտվելով Ռ.Բաղդասարյանի` ծխելու նպատակով պատշգամբ դուրս գալու հանգամանքից` Չարլզ Բլամոն և Ֆրանսիզ Վրեհ Ռեդդը Ռ. Բաղդասարյանից գաղտնի հափշտակել են վերջինիս պատկանող, առանձնապես խոշոր չափի` 385.600.000 ՀՀ դրամին համարժեք մեկ միլիոն ԱՄՆ դոլար գումարը։ Նշված ժամանակահատվածում ամբաստանյալ Գիլբերտ Բոնգոն Հայաստանի Հանրապետությունում չի գտնվել և Հայաստան է ժամանել 2010թ. ապրիլի 7-ին։
Դատարանին որևէ ապացույց չի ներկայացվել այն մասին, որ ամբաստանյալ Գիլբերտ Բոնգոն, 2009թ. դեկտեմբերին, կազմակերպված խմբի կազմում, գաղտնի հափշտակել է տուժող Ռուբեն Բաղդասարյանի` առանձնապես խոշոր չափերի` 385.600.000 ՀՀ դրամին համարժեք մեկ միլիոն ԱՄՆ դոլար գումարը կամ այդ ժամանակ որևէ առընչություն է ունեցել այդ արարքի հետ։
Այսպիսով, ստուգելով ամբաստանյալ Գիլբերտ Բոնգոյի կողմից, ՀՀ քրեական օրենսգրքի 177-րդ հոդվածի 3-րդ մասի 1-ին և 2-րդ կետերով նախատեսված հանցագործություն կատարելու վերաբերյալ գործով ձեռք բերված ապացույցները դրանց վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, ամբաստանյալի մեղավորության մասին չփարատվող բոլոր կասկածները նրա օգտին մեկնաբանելով` դատարանը գտնում է, որ Գիլբերտ Բոնգոյին ՀՀ քրեական օրենսգրքի 177-րդ հոդվածի 3-րդ մասի 1-ին, 2-րդ կետերով առաջադրված մեղադրանքը հիմնավորող բավարար ապացույցներ առկա չեն, այդ հոդվածով նախատեսված հանցագործությանը ամբաստանյալի մասնակցությունն ապացուցված չէ և սպառված են նոր ապացույցներ ձեռք բերելու բոլոր հնարավորությունները, որի պատճառով պետք է ճանաչել և հռչակել ամբաստանյալ Գիլբերտ Բոնգոյի անմեղությունը ՀՀ քրեական օրենսգրքի 177-րդ հոդվածի 3-րդ մասի 1-ին, 2-րդ կետերով մեղսագրված հանցանքի կատարման մեջ և այդ հոդվածով նա ենթակա է արդարացման։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Գիլբերտ Բոնգոյի նկատմամբ, ՀՀ քրեական օրենսգրքի 34-178-րդ հոդվածի 3-րդ մասի 1-ին, 2-րդ կետերով և 329-րդ հոդվածի 2-րդ մասով նախատեսված հանցագործություններից յուրաքանչյուրի համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը։ Ամբաստանյալի պատասխանատվությունը և պատիժը մեղմացնող կամ ծանրացնող հանգամանքներ դատարանը չի արձանագրում։
Ամբաստանյալ Գիլբերտ Բոնգոն իր կատարած` Հայաստանի Հանրապետության քրեական օրենսգրքի 34-178-րդ հոդվածի 3-րդ մասի 1-ին, 2-րդ կետերով և 329-րդ հոդվածի 2-րդ մասով նախատեսված յուրաքանչյուր հանցագործության համար ենթակա է պատժի ազատազրկման ձևով, որը նա պետք է կրի։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով ամբաստանյալի գույքի վրա դրված կալանքի հարցը` դատարանը գտնում է, որ ամբաստանյալ Գիլբերտ Բոնգոյի գույքի վրա նախաքննության մարմնի 13.04.2010թ. որոշմամբ դրված կալանքը պետք է թողնել անփոփոխ` մինչև դատավճռի կատարումը։
Քննարկելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, իրեղեն ապացույցներ ճանաչված, Իբրահիմա Կոիտայի` Ֆրանսիայի Հանրապետության քաղաքացու թիվ 02 YI 95086 անձնագիրը, «Տալք դե վենիսե Գիֆրեր» /«talc de venise Gifrer»/ տեսակի նյութերը, ապակյա սրվակով յոդանման նյութը, դատարկ սրվակները, «Լարոսքորբայն» /«Laroscorbine»/ տեսակի դեղամիջոցը, Չարլզ Բլամոյի և Ֆրանսիզ Վրեհ Ռեդդի կողմից Ռ. Բաղդասարյանին տրամադրված թղթերը պետք է թողնել քրեական գործից անջատված մասով վարույթն իրականացնող մարմնի տնօրինմանը։
Քննարկելով խափանման միջոցի հարցը` դատարանը գտնում է, որ ամբաստանյալ Գ. Բոնգոյի նկատմամբ որպես խափանման միջոց կալանավորումն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը։
Քննարկելով դատական ծախսերի հարցը` դատարանը գտնում է, որ ամբաստանյալ Գիլբերտ Բոնգոյից հօգուտ ՀՀ պետական բյուջեի բռնագանձման է ենթակա տեսաձայնագրառման, համակարգչատեխնիկական փորձաքննությունների և փաստաթղթաբանական, նյութագիտական և կենսաբանական համալիր փորձաքննության կատարման արժեք հանդիսացող, 494.640 /չորս հարյուր իննսունչորս հազար վեց հարյուր քառասուն/ ՀՀ դրամ գումար` որպես դատական ծախսեր։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 168-169-րդ, 357-360-րդ, 364-366-րդ, 369-373-րդ հոդվածներով, դատարանը`

Վ Ճ Ռ Ե Ց

Ճանաչել և հռչակել ամբաստանյալ Գիլբերտ Բոնգոյի անմեղությունը` ՀՀ քրեական օրենսգրքի 177-րդ հոդվածի 3-րդ մասի 1-ին և 2-րդ կետերով նախատեսված հանցանքի կատարման մեջ և նրան այդ մեղադրանքով արդարացնել` ապացույցների անբավարարության պատճառաբանությամբ։
Ամբաստանյալ Գիլբերտ Բոնգոյին մեղավոր ճանաչել Հայաստանի Հանրապետության քրեական օրենսգրքի 34-178-րդ հոդվածի 3-րդ մասի 1-ին և 2-րդ կետերով, 329-րդ հոդվածի 2-րդ մասով նախատեսված հանցանքներում և դատապարտել. ՀՀ քրեական օրենսգրքի 34-178-րդ հոդվածի 3-րդ մասի 1-ին և 2-րդ կետերով` ազատազրկման 5 /հինգ/ տարի 6 /վեց/ ամիս ժամկետով` առանց գույքի բռնագրավման, 329-րդ հոդվածի 2-րդ մասով` ազատազրկման 6 /վեց/ տարի ժամկետով։ ՀՀ քրեական օրենսգրքի 66-րդ հոդվածով սահմանված` պատիժների մասնակի գումարման սկզբունքի կիրառմամբ, ամբաստանյալ Գիլբերտ Բոնգոյի նկատմամբ պատիժ նշանակել ազատազրկում 11 /տասնմեկ/ տարի ժամկետով` առանց գույքի բռնագրավման, որը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի սկիզբը հաշվելով 2010թ. ապրիլի 09-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Ամբաստանյալ Գիլբերտ Բոնգոյի գույքի վրա նախաքննության մարմնի 13.04.2010թ. որոշմամբ դրված կալանքը թողնել անփոփոխ` մինչև դատավճռի կատարումը։
Դատավճռի օրինական ուժի մեջ մտնելուց հետո, իրեղեն ապացույցներ ճանաչված, Իբրահիմա Կոիտայի` Ֆրանսիայի Հանրապետության քաղաքացու թիվ 02 YI 95086 անձնագիրը, «Տալք դե վենիսե Գիֆրեր» /«talc de venise Gifrer»/ տեսակի նյութերը, ապակյա սրվակով յոդանման նյութը, դատարկ սրվակները, «Լարոսքորբայն» /«Laroscorbine»/ տեսակի դեղամիջոցը, Չարլզ Բլամոյի և Ֆրանսիզ Վրեհ Ռեդդի կողմից Ռ. Բաղդասարյանին տրամադրված թղթերը թողնել քրեական գործից անջատված մասով վարույթն իրականացնող մարմնի տնօրինմանը։
Ամբաստանյալ Գիլբերտ Բոնգոյից հօգուտ ՀՀ պետական բյուջեի բռնագանձել 494.640 /չորս հարյուր իննսունչորս հազար վեց հարյուր քառասուն/ ՀՀ դրամ գումար` որպես դատական ծախսեր։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ