ԵԿԴ/0037/01/11







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«13» մայիսի 2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Ա.Մնացականյան
տուժող Մ.Հակոբյան
պաշտպան Ս.Հարությունյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Գուրգեն Վրեժի Մուրադյանի` ծնված 1971 թվականի դեկտեմբերի 1-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, նախկինում չդատապարտված, չի աշխատում, բնակվում է Երևան քաղաքի Շարուրի փողոցի 24-րդ շենքի 126-րդ բնակարանում: Մեղադրանք է առաջադրվել ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2011 թվականի նոյեմբերի 25-ին ՀՀ ոստիկանության Երևան քաղաքի քննչական վարչության ՃՏՀ քննության բաժնի քննիչ Ա.Ասատուրյանի որոշմամբ ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով նախատեսված հանցագործությունների հատկանիշներով հարուցվել և վարույթ է ընդունվել թիվ 60129610 քրեական գործը:
2011 թվականի փետրվարի 23-ին ՀՀ ոստիկանության Երևան քաղաքի քննչական վարչության ՃՏՀ քննության բաժնի քննիչ Ա.Ասատուրյանի որոշմամբ թիվ 60129610 քրեական գործով Գուրգեն Վրեժի Մուրադյանին մեղադրանք է առաջադրվել ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով:
2011 թվականի փետրվարի 25-ին Գուրգեն Վրեժի Մուրադյանի վերաբերյալ քրեական գործը մեղադրական եզրակացությամբ ուղարկվել է Դատարան:
Գուրգեն Վրեժի Մուրադյանին մեղադրանք է առաջադրվել ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով` այն արարքների համար, որ նա 2010 թվականի նոյեմբերի 20-ին` ժամը 12:40-ի սահմաններում, իրեն վստահված «Զազ-Սենս» մակնիշի 23ՕԼ931 պետհամարանիշի ավտոմեքենայով Երևան քաղաքի Մաշտոցի պողոտայի` դեպի Թումանյան փողոց տանող ուղեմասում` «Բեսթ» սուպերմարկետի դիմաց կանգ առնելու համար հետընթաց շարժվելիս, խախտել է ՃԵԿ-ի 48-րդ կետի և «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդված 3-րդ կետի պահանջները` շարժում սկսելուց առաջ չդիմելով այլ անձանց օգնությանը, չի համոզվել հետընթացի անվտանգության և երթևեկության մյուս մասնակիցների` մասնավորապես շրջակայքում գտնվող հնարավոր հետիոտնների համար խոչընդոտ չառաջացնելու մեջ, տեխնիկական տեսակետից առաջացրել է վտանգ իր երթևեկության համար, որպիսի գործողությունների հետևանքով էլ չի նկատել իր ընթացքի ուղղության նկատմամբ աջից դեպի ձախ կողմ պողոտան հատող Մարինա Ռոբերտի Հակոբյանին և ավտոմեքենայի ետևի աջ մասով վրաերթի է ենթարկել նրան, անզգուշությամբ պատճառել առողջության տևական քայքայումով միջին ծանրության վնաս` ինքն իրեն զրկելով կանխելու տեխնիկական հնարավորությունից: Այնուհետև, Գուրգեն Մուրադյանը, թողնելով ճանապարհատրանսպորտային պատահարի վայրը, հեռացել է:
2. Արագացված դատական քննություն.
Մինչ դատաքննությունն սկսելն ամբաստանյալ Գուրգեն Վրեժի Մուրադյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Գուրգեն Վրեժի Մուրադյանը կատարել է արարքներ` նախատեսված ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, ՀՀ ոստիկանության ինֆորմացիոն կենտրոնի պահանջագիրը, «Սարգիս Թումանյան» համատիրության նախագահի կողմից տրված տեղեկանքը և բնութագիրը, ծննդյան թիվ ԱԱ295045 վկայականի պատճենը, եկավ հետևյալ եզրահանգման.
Գուրգեն Մուրադյանի անձը դրականորեն բնութագրող հանգամանքներ են ամուսնացած լինելը, ինքնախոստովանական ցուցմունքներ տալը և կատարածի համար զղջալը:
Գուրգեն Մուրադյանի պատասխանատվությունն ու պատիժը մեղմացնող հանգամանք է խնամքին 14 տարին չլրացած երեխայի (Էդգար Գուրգենի Մուրադյան` ծնված 2001 թվականի մայիսի 12-ին) առկայությունը:
Դատարանը գտնում է, որ Գուրգեն Մուրադյանի պատասխանատվությունն ու պատիժը մեղմացնող հանգամանքներ պետք է դիտել նաև նախկինում արատավորված` դատապարտված չլինելը և դրականորեն բնութագրվելը:
Վերը նշված անձը դրականորեն բնութագրող և պատասխանատվությունն ու պատիժը մեղմացնող հանգամանքները Գուրգեն Մուրադյանի կատարած բոլոր արարքներով էլ առկա են:
Դատարանը միաժամանակ արձանագրում է, որ Գուրգեն Մուրադյանի պատասխանատվությունն ու պատիժը ծանրացնող հանգամանքներ չկան:
Կատարած արարքների համար ամբաստանյալ Գուրգեն Մուրադյանը ենթակա է քրեական պատասխանատվության և պատժի:
Դատարանը, հաշվի առնելով Գուրգեն Մուրադյանի կատարած արարքների հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Գուրգեն Մուրադյանի կողմից կատարված արարքների համար ՀՀ քրեական օրենսգրքի 242-րդ հոդվածի 1-ին մասի և 244-րդ հոդվածի սանկցիաներով` որպես հիմնական պատիժ, նախատեսված է նաև տուգանք, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար նրա նկատմամբ հիմնական պատիժներ պետք է նշանակել տուգանքի ձևով: Միաժամանակ Դատարանը գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար ամբաստանյալ Գուրգեն Մուրադյանի նկատմամբ պետք է նշանակել ՀՀ քրեական օրենսգրքի 242-րդ հոդվածի 1-ին մասի և 244-րդ հոդվածի սանկցիաներով նախատեսված լրացուցիչ պատիժը` որոշակի գործունեությամբ` վարորդությամբ, զբաղվելու իրավունքից զրկելը:
Դատարանը գտնում է, որ ամբաստանյալ Գուրգեն Մուրադյանի նկատմամբ վերջնական պատիժ պետք է նշանակել ՀՀ քրեական օրենսգրքի 66-րդ հոդվածով սահմանված` հիմնական և լրացուցիչ պատիժները լրիվ գումարելու կանոնի կիրառմամբ:
Դատարանը գտնում է, որ Գուրգեն Մուրադյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո` 2011 թվականի հունվարի 21-ի և փետրվարի 23-ի որոշումներով իրեղեն ապացույց ճանաչված` լազերային սկավառակը պետք է պահել քրեական գործի հետ միասին:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախսերն ամբաստանյալ Գուրգեն Մուրադյանից ենթակա չեն բռնագանձման, քանի որ տուժող Մարինա Հակոբյանը հայտնել է, որ ամբաստանյալից որևէ պահանջ չունի: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մաuի 2-8-րդ կետերով նախատեսված դատական ծախսերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի` ամբաստանյալից ենթակա չեն բռնագանձման:
ՀՀ քրեական դատավարության օրենսգրքի 360-րդ հոդվածի 1-ին մասի 11-րդ կետի համաձայն` դատարանը պետք է լուծի նաև հանցագործությամբ պատճառված գույքային վնասի հատուցումը կամ գույքի հնարավոր բռնագրավումն ապահովելու համար գույքի վրա դրված կալանքը վերացնելու հարցը:
Սույն գործով 2011 թվականի փետրվարի 23-ին կայացվել է գույքի վրա կալանք դնելու մասին որոշում, համաձայն որի որոշվել է քրեական գործով հնարավոր քաղաքացիական հայցը կամ դատական ծախսերն ապահովելու նպատակով կալանք դնել Գուրգեն Մուրադյանի «Զազ-Սենս» մակնիշի 23ՕԼ931 պետհամարանիշի ավտոմեքենայի վրա: Դատարանը, նկատի ունենալով, որ սույն քրեական գործով քաղաքացիական հայց չի ներկայացվել և չկան բռնագանձման ենթակա դատական ծախսեր, գտնում է, որ դատավճիռն օրինական ուժի մեջ մտնելուց հետո` 2011 թվականի փետրվարի 23-ի որոշմամբ «Զազ-Սենս» մակնիշի 23ՕԼ931 պետհամարանիշի ավտոմեքենայի վրա դրված կալանքը պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը

ՎՃՌԵՑ

Գուրգեն Վրեժի Մուրադյանին մեղավոր ճանաչել ՀՀ քրեական օրենսգրքի 242-րդ հոդվածի 1-ին մասով և 244-րդ հոդվածով:
ՀՀ քրեական օրենսգրքի 242-րդ հոդվածի 1-ին մասով Գուրգեն Վրեժի Մուրադյանի նկատմամբ պատիժ նշանակել տուգանք` նվազագույն աշխատավաձի հարյուրապատիկի չափով` զրկելով որոշակի գործունեությամբ` վարորդությամբ զբաղվելու իրավունքից` 1 (մեկ) տարի ժամկետով:
ՀՀ քրեական օրենսգրքի 244-րդ հոդվածով Գուրգեն Վրեժի Մուրադյանի նկատմամբ պատիժ նշանակել տուգանք` նվազագույն աշխատավաձի հարյուրապատիկի չափով` զրկելով որոշակի գործունեությամբ` վարորդությամբ զբաղվելու իրավունքից` 1 (մեկ) տարի ժամկետով:
ՀՀ քրեական օրենսգրքի 66-րդ հոդվածով սահմանված` պատիժները լրիվ գումարելու կանոնի կիրառմամբ, Գուրգեն Վրեժի Մուրադյանի նկատմամբ վերջնական պատիժ նշանակել տուգանք` նվազագույն աշխատավաձի երկուհարյուրապատիկի չափով` զրկելով որոշակի գործունեությամբ` վարորդությամբ, զբաղվելու իրավունքից` 2 (երկու) տարի ժամկետով:
Գուրգեն Վրեժի Մուրադյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
2011 թվականի հունվարի 21-ի և փետրվարի 23-ի որոշումներով իրեղեն ապացույց ճանաչված` լազերային սկավառակը պահել քրեական գործի հետ միասին:
Դատավճիռն օրինական ուժի մեջ մտնելուց հետո` 2011 թվականի փետրվարի 23-ի որոշմամբ «Զազ-Սենս» մակնիշի 23ՕԼ931 պետհամարանիշի ավտոմեքենայի վրա դրված կալանքը վերացնել:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ