ԵԿԴ/0030/01/11






ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

27.06.2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ նաև` Դատարան)` նախագահող դատավոր Մ.Պապոյան, քարտուղարությամբ Ռ.Ավետյանի, մասնակցությամբ մեղադրող Ա.Հակոբյանի, տուժող Ն.Խառատյանի, ամբաստանյալ Արման Վահանի Նավասարդյանի, պաշտպան Ս.Հարությունյանի, դռնբաց դատական նիստում քննելով քրեական գործն ըստ մեղադրանքի Արման Վահանի Նավասարդյանի (ծնված 1975 թվականի փետրվարի 23-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, չամուսնացած, նախկինում չդատապարտված, չի աշխատում, հաշվառված է Երևան քաղաքի Վարդանանց փողոցի 15-րդ տանը, խափանման միջոց է ընտրվել ստորագրություն չհեռանալու մասին)` ՀՀ քրեական օրենսգրքի 213-րդ հոդվածի 1-ին մասով

Պ Ա Ր Զ Ե Ց

2011 թվականի սեպտեմբերի 16-ին ՀՀ ոստիկանության Կենտրոնականի քննչական բաժնի ավագ քննիչ Գ.Բեգոյանի որոշմամբ ՀՀ քրեական օրենսգրքի 213-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 13146710 քրեական գործը:
2011 թվականի նոյեմբերի 11-ին ՀՀ ոստիկանության Կենտրոնականի քննչական բաժնի ավագ քննիչ Գ.Բեգոյանի որոշմամբ թիվ 13146710 քրեական գործով Արման Վահանի Նավասարդյանին մեղադրանք է առաջադրվել ՀՀ քրեական օրենսգրքի 213-րդ հոդվածի 1-ին մասով:
2011 թվականի փետրվարի 23-ին Արման Վահանի Նավասարդյանի վերաբերյալ քրեական գործը մեղադրական եզրակացությամբ ուղարկվել է Դատարան:
Արման Վահանի Նավասարդյանին մեղադրանք է առաջադրվել ՀՀ քրեական օրենսգրքի 213-րդ հոդվածի 1-ին մասով` այն արարքի համար, որ նա 2009 թվականի սեպտեմբերի 19-ին ՀՀ կենտրոնական բանկի կողմից սահմանված բանկային տոկոսի հաշվարկային դրույքի կրկնապատիկը գերազանցող չափով Նաիրա Աշոտի Խառատյանին տվել է 381.960 ՀՀ դրամին համարժեք 1.000 ԱՄՆ դոլար և 448.576 ՀՀ դրամին համարժեք 800 եվրո գումար` ամսեկան 5 տոկոս հավելավճարով, և երեք ամիսների ընթացքում ստացել է 57.294 ՀՀ դրամին համարժեք 150 ԱՄՆ դոլար և 67.286 ՀՀ դրամին համարժեք 120 եվրո` որպես տրված գումարի տոկոսային հավելավճար:
2011 թվականի փետրվարի 24-ին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի դատավոր Մ.Պապոյանի որոշմամբ Արման Վահանի Նավասարդյանի վերաբերյալ թիվ ԵԿԴ/0030/01/11 քրեական գործն ընդունվել է վարույթ:
Քրեական գործի դատական քննության ընթացքում ամբաստանյալ Արման Վահանի Նավասարդյանը խնդրել է «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման կիրառմամբ թիվ ԵԿԴ/0030/01/11 քրեական գործի վարույթը կարճել և իր նկատմամբ քրեական հետապնդումը դադարեցնել, իսկ տուժող Նաիրա Խառատյանը հայտնել է, որ իրեն պատճառված վնասը փոխհատուցվել է:
ՀՀ ոստիկանության ինֆորմացիոն կենտրոնի պահանջագրի համաձայն` Արման Վահանի Նավասարդյանը 2011 թվականի փետրվարի 17-ին ՀՀ ոստիկանության Կենտրոնականի քննչական բաժնի կողմից ՀՀ քրեական օրենսգրքի 213-րդ հոդվածի 1-ին մասով ենթարկվել է քրեական պատասխանատվության:
ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի համաձայն` «քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ընդունվել է համաներման ակտ», իսկ նույն հոդվածի 5-րդ մասը սահմանում է, որ «դատարանը, հայտնաբերելով քրեական հետապնդումը բացառող հանգամանքներ, լուծում է ամբաստանյալի նկատմամբ քրեական հետապնդումը դադարեցնելու հարցը»:
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման (այսուհետ նաև` Համաներման որոշում) 6-րդ կետի 2-րդ ենթակետի համաձայն` «քրեական հետապնդում պետք է չհարուցել և քրեական հետապնդում չիրականացնել, ինչպես նաև կարճել մինչև 2011 թվականի մայիսի 1-ը կատարած հանցագործությունների վերաբերյալ հետաքննության մարմինների, նախաքննության մարմինների կամ դատարանի վարույթում գտնվող քրեական գործերը, բացառությամբ սույն որոշման 8-րդ կետի 4-րդ և 5-րդ ենթակետերով նախատեսված դեպքերի, որոնցով անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան երեք տարի ժամկետով ազատազրկում»:
ՀՀ քրեական օրենսգրքի 213-րդ հոդվածի 1-ին մասի սանկցիան որպես պատիժ նախատեսում է տուգանք` նվազագույն աշխատավարձի երեքհարյուրապատիկից հինգհարյուրապատիկի չափով, կամ ազատազրկում` առավելագույնը երկու տարի ժամկետով:
Համաներման որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` Համաներման որոշման 9-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ: Սակայն հարկ է նկատել, որ թվարկված հոդվածների և հոդվածների մասերի շարքից բացակայում է ՀՀ քրեական օրենսգրքի 213-րդ հոդվածի 1-ին մասը, այսինքն` ՀՀ քրեական օրենսգրքի 213-րդ հոդվածի 1-ին մասով նախատեսված արարքներ կատարած անձանց նկատմամբ համաներման կիրառումը սահմանափակված չէ:
Սույն քրեական գործի նյութերում բացակայում է նաև Համաներման որոշման 9-րդ կետի մյուս ենթակետերում նշված այն սահմանափակումները, որոնք կարող են արգելք հանդիսանալ Արման Վահանի Նավասարդյանի նկատմամբ Համաներման որոշման կիրառման համար:
Դատարանը, հիմք ընդունելով վերը նշվածը, գտնում է, որ Համաներման որոշման կիրառմամբ սույն քրեական գործի վարույթը պետք է կարճել և Արման Վահանի Նավասարդյանի նկատմամբ քրեական հետապնդումը դադարեցնել:
Դատարանը, նկատի ունենալով, որ վերը նշված հիմնավորմամբ սույն քրեական գործի վարույթը պետք է կարճել և Արման Վահանի Նավասարդյանի նկատմամբ քրեական հետապնդումը դադարեցնել, գտնում է, որ նրա նկատմամբ խափանման միջոց կիրառելու անհրաժեշտությունը վերացել է, ուստի սույն որոշումն օրինական ուժի մեջ մտնելուց հետո Արման Վահանի Նավասարդյանի նկատմամբ ընտրված խափանման միջոցը` չհեռանալու մասին ստորագրությունը, պետք է վերացնել:
Ելնելով վերոգրյալից, ղեկավարվելով ՀՀ քրեական դատավարության օրենսգրքի 35-րդ, 41-րդ, 151-րդ, 313-րդ և 379-րդ հոդվածներով և հիմք ընդունելով «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշումը` Դատարանը

Ո Ր Ո Շ Ե Ց

Թիվ ԵԿԴ/0030/01/11 քրեական գործի վարույթը կարճել և Արման Վահանի Նավասարդյանի նկատմամբ քրեական հետապնդումը դադարեցնել` համաներման ակտի ընդունման հիմքով:
Որոշումն օրինական ուժի մեջ մտնելուց հետո Արման Վահանի Նավասարդյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Որոշումը կարող է բողոքարկվել Հայաստանի Հանրապետության քրեական վերաքննիչ դատարան` հրապարակման օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ