ԵԿԴ/0020/01/11




ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«1» հուլիսի 2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Է.Հարությունյան
տուժող Ա.Գևորգյան
պաշտպան Ա.Ավագյան

դռնբաց դատական նիստում քննեց քրեական գործն ըստ մեղադրանքի`
Հայկ Հենրիկի Ղազարյանի` ծնված 1985 թվականի սեպտեմբերի 28-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չի աշխատում, նախկինում չդատապարտված, հաշվառված է Երևան քաղաքի Նորքի 56-րդ տանը, մեղադրանք է առաջադրվել ՀՀ քրեական օրենսգրքի 177-րդ հոդվածի 1-ին մասով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2011 թվականի հունվարի 31-ին ՀՀ ոստիկանության Կենտրոնականի քննչական բաժնի քննիչ Ա.Խաչատրյանի որոշմամբ ՀՀ քրեական օրենսգրքի 177-րդ հոդվածի 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 13103311 քրեական գործը:
2011 թվականի փետրվարի 4-ին ՀՀ ոստիկանության Կենտրոնականի քննչական բաժնի քննիչ Ա.Խաչատրյանի որոշմամբ թիվ 13103311 քրեական գործով Հայկ Հենրիկի Ղազարյանին մեղադրանք է առաջադրվել ՀՀ քրեական օրենսգրքի 177-րդ հոդվածի 1-ին մասով:
2011 թվականի փետրվարի 15-ին Հայկ Հենրիկի Ղազարյանի վերաբերյալ քրեական գործը մեղադրական եզրակացությամբ ուղարկվել է Դատարան:
Հայկ Հենրիկի Ղազարյանին մեղադրանք է առաջադրվել ՀՀ քրեական օրենսգրքի 177-րդ հոդվածի 1-ին մասով` այն արարքի համար, որ նա 2010 թվականի դեկտեմբերի 15-ից մինչև դեկտեմբերի 21-ն ընկած ժամանակահատվածում իրենց հետ Երևան քաղաքի Նորքի «Քիմիկ» պանսիոնատում ժամանակավորապես բնակվող իր մոր` Գալինա Արուտյունովայի ընկերուհու`Արեգնազ Գևորգյանի պայուսակի մեջ դրված դրամապանակից գաղտնի հափշտակել է 1 հատ 190.000 ՀՀ դրամ արժողության տղամարդու մատանի, 1 հատ 21.000 ՀՀ դրամ արժողության կանացի մատանի, 1 հատ 21.000 ՀՀ դրամ արժողության կախազարդ (կուլոն) և 64.000 ՀՀ դրամին համարժեք 150 ԱՄՆ դոլար ու 1.000 ՌԴ ռուբլի` վերջինին պատճառելով զգալի չափերի` 296.000 ՀՀ դրամի գույքային վնաս:
2. Ապացույցների հետազոտում և գնահատում.
Դատական քննության ընթացքում ամբաստանյալ Հայկ Ղազարյանը առաջադրված մեղադրանքում իրեն մեղավոր ճանաչեց մասնակի և ցուցմունք տվեց այն մասին, որ իր կինը բուժվել է հիվնդանոցում, որի համար անհրաժեշտ է եղել գումար: Այդ ընթացքում ինքը գնացել է իրենց տուն և պահարանում դրված կանացի պայուսակի մեջ տեսել ոսկյա զարդեր և գումար: Ինքը, կարծելով, որ դա իր քրոջ պայուսակն է, վերցրել է պայուսակի մեջ գտնվող 1.000 ՌԴ ռուբլին, 150 ԱՄՆ դոլարը և ոսկյա զարդերը` բարակ մատանին, փախլավայաձև կախազարդը և մեկ սև ու չորս մանր սպիտակ քարերով տղամարդու մեծ մատանին: Այնուհետև պարզվել է, որ այդ պայուսակը և դրանում եղած ոսկա զարդերն ու գումարը պատկանել են Արեգնազին: Նշված տարադրամներն ինքը փոխանակել է «Սքայ» սուպերմարկետի տարադրամի փոխանակման կետում, իսկ ոսկյա զարդերը երկու օրվա ընթացքում վաճառել է «Ոսկու աշխարհ» տոնավաճառում` տղամարդու մատանին` 78.000 ՀՀ դրամով, կախազարդն ու կանացի մատանին` ընդհանուր` 40.000 ՀՀ դրամով: «Սքայ» սուպերմարկետում տարադրամը փոխանակելիս ինքը հանդիպել է իր մորեղբոր որդուն, ում հարցին պատասխանել է, որ տարադրմաներն իրեն տվել է իր մայրը:
Տուժող Արեգնազ Գևորգյանը դատական քննության ընթացքում ցուցմունք տվեց այն մասին, որ ինքն ու Հայկի մայրը` Գալինան, միասին աշխատել են դպրոցում և եղել են մտերիմներ: Գալինայի առաջարկով ինքը ժամանակավորապես բնակվել է նրա` Նորքի «Քիմիկ» պանսիոնատի առաջին հարկում գտնվող տանը: Այդ տանը գտնող զգեստապահարանում դրված է եղել իր պայուսակը, որի մեջ եղել են ոսկյա զարդեր և գումար: 2010 թվականի դեկտեմբերին պատահաբար նկատել է, որ պայուսակից բացակայել են բանկի պլաստիկ քարտը, 150 ԱՄՆ դոլար, 1.000 ՌԴ ռուբլի, 6.000 ՀՀ դրամ, բարձր հարգի մոտ 13 գրամ քաշով, ադամանդե քարերով տղամարդու ոսկյա մատանին, մոտ 2,5 գրամ կանացի ոսկյա մատանին և մոտ 2,5 գրամ ոսկյա կախազարդը:
Տուժող Արեգնազ Գևորգյանը նախնական քննության ընթացքում ցուցմունք է տվել այն մասին, որ 2010 թվականի հոկտեմբերից մինչև դեկտեմբերի 31-ը բնակվել է Գալինա Արուտյունովայի տանը, որը գտնվել է Նորքի «Քիմիկ» պանսիոնատում: Նշված տան պահարանում դրված է եղել իր պայուսակը, որի մեջ եղել են փաստաթղթեր, ոսկյա զարդեր և գումար: 2010 թվականի դեկտեմբերի 15-ին ինքը ստուգել է պայուսակը և նշված բոլոր իրերը եղել են տեղում: Դրանից հետո` նույն թվականի դեկտեմբերի 20-ին կամ 21-ին, ինքը ստուգել և տեսել է, որ պայուսակից բացակայել են իր ոսկյա զարդերը` մոտ 60 ԱՄՆ դոլար (21.000 ՀՀ դրամ) արժողությամբ, մոտ 2,5 գրամ քաշով կանանցի մատանին, մոտ 60 ԱՄՆ դոլար (21.000 ՀՀ դրամ) արժողությամբ, մոտ 2,5 գրամ քաշով կախազարդը, մոտ 550 ԱՄՆ դոլար (190.000 ՀՀ դրամ) արժողությամբ, մոտ 13 գրամ քաշով, ադամանդե քարերով, բարձր հարգի ոսկուց տղամարդու մատանին, 64.000 ՀՀ դրամին համարժեք 150 ԱՄՆ դոլար և 1.000 ՌԴ ռուբլի: Ընդհանուր առմամբ իրեն պատճառվել է 296.000 ՀՀ դրամի գույքային վնաս:
Վկա Գալինա Արուտյունովան դատական քննության ընթացքում ցուցմունք տվեց այն մասին, որ իր առաջարկով Արեգնազը մի քանի ամիս բնակվել է իր տանը: Ինքն իր որդի Հայկին հարցրել է, թե արդյոք նա տեղյակ է Արեգնազի ոսկյա իրերից և գումարից, իսկ Հայկը պատասխանել է, որ դրանք նա (Հայկը) է վերցրել, որպեսզի հոգա կնոջ բուժման ծախսերը:
Վկա Անդրանիկ Պողոսյանը դատական քննության ընթացքում ցուցմունք տվեց այն մասին, որ աշխատում է ոսկու շուկայում: 2010 թվականի դեկտեմբերի 20-ին` ժամը 13:00-ի սահմաններում Հայկ Ղազարյանը մոտեցել է իրեն և ասել է, որ ցանկանում է ոսկյա զարդեր վաճառել: Ինքը Հայկից 40.000 ՀՀ դրամով գնել է մոտ 4,5 գրամ ընդհանուր քաշով 580 հարգի ոսկուց կանացի մատանի և կախազարդ, որոնք այնուհետև որպես ջարդոն վաճառել է 42.000 ՀՀ դրամով:
Վկա Էդգար Վիրաբյանը դատական քննության ընթացքում ցուցմունք տվեց այն մասին, որ մոտ 7 տարի աշխատում է ոսկու շուկայում: 2010 թվականի դեկտեմբերին շուկայում Հայկ Ղազարյանը մոտեցել է իրեն և ասել, որ ցանկանում է ոսկյա մատանի վաճառել: Ինքը կոտրելով հանել է մատանու վրայի մեկ սև ու մեկ ցերկոնե քարերը և մատանին կշռել, որի քաշը եղել է 7 գրամ, իսկ ոսկին եղել է 580 հարգի: Սև քարը թանկարժեք չի եղել և արժեցել է մոտ 7 ՀՀ դրամ: Նշված մատանու դիմաց ինքը Հայկին վճարել է 78.000 ՀՀ դրամ: 958 հարգի ոսկուց հնարավոր չէ իր գնած մատանուց պատրաստել:
Վկա Մուշեղ Հարությունյանը նախնական քննության ընթացքում ցուցմունք է տվել այն մասին, որ աշխատում է «Սքայ» սուպերմարկետում: 2010 թվականի դեկտեմբերին «Սքայ» սուպերմարկետի տարադրամի փոխանակման կետի մոտ տեսել է իր հորաքրոջ որդի Հայկ Ղազարյանին: Այդ ժամանակ Հայկը փոխանակել է 1.000 ՌԴ ռուբլի: Ինքը նրան հարցրել է, թե որտեղից այդ գումարը, իսկ Հայկը պատասխանել է, որ մայրն է տվել:
Դեպքի վայրի զննության մասին 2011 թվականի հունվարի 10-ի արձանագրության համաձայն` դեպքի վայր է հանդիսացել Երևան քաղաքի Նորք 56 հասցեում գտնվող նախկին «Քիմիկ» պանսիոնատի շենքը: Շենքի մուտքից դեպի ձախ տեղակայված երկու սենյակներում, ըստ Գալինա Արուտյունովայի, բնակվել է նա` իր ընտանիքով: Գալինա Արուտյունովան մատնացույց է արել երկրորդ սենյակի դիմացի պատի մոտ տեղադրված պահարանը և հայտարարել, որ Արեգնազ Գևորգյանի պայուսակը դրված է եղել այդ պահարանի աջ կողմի վերևի դարակում:
Դատարան ներկայացված հայցադիմումի համաձայն` Արեգնազ Գևորգյանը խնդրել է ամբաստանյալ Հայկ Ղազարյանից հօգուտ իրեն, որպես հանցագործությամբ պատճառված վնաս, բռնագանձել 296.000 ՀՀ դրամ:
2011 թվականի հուլիսի 1-ին` դատական քննության ընթացքում, ամբաստանյալ Հայկ Ղազարյանը տուժող Արեգնազ Գևորգյանին հատուցել է 30.000 ՀՀ դրամ:
ՀՀ ոստիկանության ինֆորմացիոն կենտրոնի պահանջագրի համաձայն` Հայկ Հենրիկի Ղազարյանը նախկինում դատապարտված չի եղել:
Ծննդյան թիվ ԱԲ137351 վկայականի համաձայն` 2011 թվականի մայիսի 16-ին ծնված Հենրիկ Հայկի Ղազարյանի հայրը Հայկ Հենրիկի Ղազարյանն է:
Ծննդյան թիվ ԱԲ137600 վկայականի համաձայն` 2007 թվականի հունվարի 18-ին ծնված Սյուզաննա Հայկի Ղազարյանի հայրը Հայկ Հենրիկի Ղազարյանն է:
Դատարանը, անդրադառնալով տուժող Արեգնազ Գևորգյանի այն ցուցմունքին, որ հափշտակված տղամարդու մատանին եղել մոտ 550 ԱՄՆ դոլար (190.000 ՀՀ դրամ) արժողության, ինչն էլ նախնական քննության մարմնի կողմից ընդունվել է հիմք և դրվել մեղադրանքի հիմքում, գտնում է, որ այդ ցուցմունքն ինքնին բավարար չէ հատատված համարելու, որ այդ մատանու արժեքը կազմել է այդքան, քանի որ քրեական գործի թե նախնական, թե դատական քննության ընթացքում ձեռք չեն բերվել, իսկ տուժողն էլ իր հերթին չի ներկայացրել որևէ այլ ապացույց, ինչով կհաստատվեր տուժողի` նշված ցուցմունքը: Ավելին, քրեական գործի թե նախնական, թե դատական քննության ժամանակ ձեռք բերված տվյալների համաձայն` այդ մատանին Հայկ Ղազարյանի կողմից ոսկու շուկայում վաճառվել է 78.000 ՀՀ դրամով:
3. Դատարանի իրավական վերլուծությունները.
Վերոգրյալ ապացույցները վերլուծելու և համադրելու արդյունքում Դատարանը գալիս է այն եզրահանգման, որ Հայկ Հենրիկի Ղազարյանը 2010 թվականի դեկտեմբերի 15-ից դեկտեմբերի 20-ն ընկած ժամանակահատվածում, Երևան քաղաքի Նորքի 56 հասցեում գտնվող նախկին «Քիմիկ» պանսիոնատում իր մոր` Գալինա Արուտյունովայի հետ ժամանակավորապես բնակվող Արեգնազ Գևորգյանի պայուսակից գաղտնի հափշտակել է 42.000 ՀՀ դրամ ընդհանուր արժողության կանացի ոսկյա մատանի և ոսկյա կախազարդ, 78.000 ՀՀ դրամ արժողության տղամարդու ոսկյա մատանի, ընդհանուր 64.000 ՀՀ դրամին համարժեք 150 ԱՄՆ դոլար և 1.000 ՌԴ ռուբլի: Այսինքն` Հայկ Հենրիկի Ղազարյանը կատարել է ուրիշի գույքի զգալի չափերով գաղտնի հափշտակություն, ինչը համապատասխանում է ՀՀ քրեական օրենսգրքի 177-րդ հոդվածի 1-ին մասի հատկանիշներին:
Ապացուցված է Հայկ Հենրիկի Ղազարյանի մեղավորությունը ՀՀ քրեական օրենսգրքի 177-րդ հոդվածի 1-ին մասով նախատեսված արարքը կատարելու մեջ:
Հայկ Ղազարյանի անձը դրականորեն բնութագրող հանգամանքներ են ամուսնացած լինելը, ինքնախոստովանական ցուցմունքներ տալը և կատարածի համար զղջալը:
Հայկ Ղազարյանի պատասխանատվությունն ու պատիժը մեղմացնող հանգամանքներ են խնամքին 14 տարին չլրացած երկու երեխաների (Հենրիկ Հայկի Ղազարյան` ծնված 2011 թվականի մայիսի 16-ին, Սյուզաննա Հայկի Ղազարյան` ծնված 2007 թվականի հունվարի 18-ին) առկայությունը և հանցագործությամբ պատճառված գույքային վնասի մի մասը կամովին հատուցելը:
Դատարանը գտնում է, որ Հայկ Ղազարյանի պատասխանատվությունն ու պատիժը մեղմացնող հանգամանք պետք է դիտել նաև նախկինում արատավորված` դատապարտված չլինելը:
Դատարանը միաժամանակ արձանագրում է, որ գործում ամբաստանյալ Հայկ Ղազարյանի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Հայկ Ղազարյանը ենթակա է քրեական պատասխանատվության և պատժի:
ՀՀ քրեական օրենսգրքի 61-րդ հոդվածի 3-րդ մասի համաձայն` հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները:
Դատարանը, հաշվի առնելով Հայկ Ղազարյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պատիժ պետք է նշանակել տուգանքի ձևով:
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման (այսուհետ նաև` Համաներման որոշում) 1-ին կետի 3-րդ ենթակետի համաձայն` պատժից պետք է ազատել, բացառությամբ այդ որոշման 8-րդ կետի 4-րդ և 5-րդ ենթակետերով նախատեսված դեպքերի, այն անձանց, որոնց նկատմամբ նշանակվել է ազատությունից զրկելու հետ չկապված պատիժ: Նույն որոշման 15-րդ կետի համաձայն` Համաներման որոշումը կիրառվում է այն անձանց նկատմամբ, որոնք հանցագործություն են կատարել մինչև 2011 թվականի մայիսի 1-ը ներառյալ, իսկ Հայկ Ղազարյանը հանրորեն վտանգավոր արարքը կատարել է 2010 թվականի դեկտեմբերին: Համաներման որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` Համաներման որոշման 9-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքներ կատարած անձանց նկատմամբ համաներումը կիրառելի չէ: Սակայն հարկ է նկատել, որ թվարկված հոդվածների և հոդվածների մասերի շարքից բացակայում է ՀՀ քրեական օրենսգրքի 177-րդ հոդվածի 1-ին մասը, այսինքն` ՀՀ քրեական օրենսգրքի 177-րդ հոդվածի 1-ին մասով նախատեսված արարք կատարած անձանց նկատմամբ համաներման կիրառումը սահմանափակված չէ: Սույն քրեական գործի նյութերում բացակայում է նաև Համաներման որոշման 9-րդ կետի մյուս ենթակետերում նշված այն սահմանափակումները, որոնք կարող են արգելք հանդիսանալ Հայկ Ղազարյանի նկատմամբ Համաներման որոշման կիրառման համար: Հիմք ընդունելով վերը նշվածը` Դատարանը գտնում է, որ ամբաստանյալ Հայկ Ղազարյանին Համաներման որոշման կիրառմամբ պետք է ազատել նշանակված պաժից:
Դատարանը գտնում է, որ դատավճիռն օրինական ուժի մեջ մտնելուց հետո Հայկ Ղազարյանի նկատմամբ ընտրված խափանման միջոցը` չհեռանալու մասին ստորագրությունը, պետք է վերացնել:
ՀՀ քրեական դատավարության օրենսգրքի 360-րդ հոդվածի 1-ին մասի 10-րդ կետի համաձայն` դատավճիռ կայացնելիս դատարանը լուծում է այն հարցը, թե քաղաքացիական հայցը ենթակա է արդյոք բավարարման, ում օգտին և ինչ չափով:
Սույն քրեական գործով տուժող Արեգնազ Շիրակի Գևորգյանը ներկայացրել է քաղաքացիական հայց` ամբաստանյալ Հայկ Ղազարյանից պահանջելով հանցագործությամբ իրեն պատճառված վնասը` 296.000 ՀՀ դրամը, սակայն սույն գործով ձեռք բերված ապացույցներով հաստատվում է, որ Արեգնազ Գևորգյանին հանցագործությամբ պատճառվել է 150 ԱՄՆ դոլարի, 1.000 ՌԴ ռուբլու և 120.000 ՀՀ դրամի վնաս, իսկ 2011 թվականի հուլիսի 1-ին` դատական քննության ընթացքում, ամբաստանյալ Հայկ Ղազարյանը տուժող Արեգնազ Գևորգյանին հատուցել է հանցագործությամբ պատճառված վնասի մի մասը` 30.000 ՀՀ դրամը: Ելնելով նշվածից` Դատարանը գտնում է, որ Հայկ Ղազարյանի դեմ ներկայացված Արեգնազ Գևորգյանի քաղաքացիական հայցի պահանջը պետք է բավարարել մասնակի և Հայկ Ղազարյանից հօգուտ Արեգնազ Գևորգյանի, որպես հանցագործությամբ պատճառված վնաս, բռնագանձել հատուցման պահին 150 ԱՄՆ դոլարին համարժեք ՀՀ դրամ, 1.000 ՌԴ ռուբլուն համարժեք ՀՀ դրամ և 90.000 ՀՀ դրամ:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերն ամբաստանյալ Հայկ Ղազարյանից ենթակա չեն բռնագանձման, քանի որ տուժող Արեգնազ Գևորգյանի քաղաքացիական հայցի պահանջը վերոգրյալ հիմնավորմամբ պետք է բավարարվի մասնակի: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մասի 2-6-րդ կետերով նախատեսված դատական ծախսերին, ապա դրանք ամբաստանյալից նույնպես ենթակա չեն բռնագանձման, քանի որ 3-6-րդ կետերով նախատեսված դատական ծախսեր ընդհանրապես չկան, իսկ 2-րդ կետով նախատեսված ծախսերի վերաբերյալ տվյալները բացակայում են, ավելին` նման պահանջ Դատարան չի ներկայացվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Հայկ Հենրիկի Ղազարյանին մեղավոր ճանաչել ՀՀ քրեական օրենսգրքի 177-րդ հոդվածի 1-ին մասով և պատիժ նշանակել տուգանք` նվազագույն աշխատավաձի չորսհարյուրապատիկի չափով:
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման 1-ին կետի 3-րդ ենթակետի կիրառմամբ Հայկ Հենրիկի Ղազարյանին պատժից ազատել:
Դատավճիռն օրինական ուժի մեջ մտնելուց հետո Հայկ Հենրիկի Ղազարյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Արեգնազ Շիրակի Գևորգյանի քաղաքացիական հայցը բավարարել մասնակի. Հայկ Հենրիկի Ղազարյանից հօգուտ Արեգնազ Շիրակի Գևորգյանի, որպես հանցագործությամբ պատճառված վնաս, բռնագանձել հատուցման պահին 150 (հարյուր hիսուն) ԱՄՆ դոլարին համարժեք ՀՀ դրամ, 1.000 (հազար) ՌԴ ռուբլուն համարժեք ՀՀ դրամ և 90.000 (իննսուն հազար) ՀՀ դրամ:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ