ԵԿԴ/0015/01/11







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«4» մարտի 2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Է.Հարությունյան
պաշտպան Մ.Թովմասյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Քրիստինա Սամվելի Լիսենկոյի` ծնված 1986 թվականի օգոստոսի 16-ին Երևան քաղաքում, ազգությամբ ուկրաինացի, ՀՀ քաղաքացի, միջնակարգ կրթությամբ, չամուսնացած, դատվածություն չունեցող, չի աշխատում, հաշվառված է Արագածոտնի մարզի Ծաղկահովիտ գյուղում, բնակվում է Երևան քաղաքի Կիևյան փողոցի 22-րդ շենքի 12-րդ բնակարանում: Մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով, խափանման միջոց ընտրվել է ստորագրություն չհեռանալու մասին:
1. Գործի դատավարական նախապատմությունը.
2010 թվականի դեկտեմբերի 23-ին ՀՀ ոստիկանության Կենտրոնականի քննչական բաժնի քննիչ Ա.Մանուկյանի որոշմամբ ՀՀ քրեական օրենսգրքի 258-րդ հոդվածի 2-րդ մասով նախատեսված հանցագործության հատկանիշներով հարուցվել և վարույթ է ընդունվել թիվ 15114810 քրեական գործը:
2011 թվականի փետրվարի 4-ին ՀՀ ոստիկանության Կենտրոնականի քննչական բաժնի քննիչ Ա.Մանուկյանի որոշմամբ թիվ 15114810 քրեական գործով Քրիստինա Սամվելի Լիսենկոյին մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով:
2011 թվականի փետրվարի 10-ին Քրիստինա Սամվելի Լիսենկոյի վերաբերյալ քրեական գործը մեղադրական եզրակացությամբ ուղարկվել է Դատարան:
Քրիստինա Սամվելի Լիսենկոյին մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով` այն արարքի համար, որ նա 2010 թվականի նոյեմբերի 14-ին` ժամը 05:30-ի սահմաններում Դիանա Էդուարդի Սիմոնյանի հետ, գտնվելով երկրորդ աստիճանի ալկոհոլային հարբածության վիճակում, ժամանակ անցկացնելու նպատակով փորձել է մտնել Երևան քաղաքի Հանրապետության և Տպագրիչների փողոցների խաչմերուկում գործող «Ամստերդամ» ակումբ, սակայն նրանց չեն թույլատրել, ինչից Քրիստինա Լիսենկոն վրդովվել է և կոպիտ կերպով խախտելով հասարակական կարգն ու հասարկության նկատմամբ բացահայտ անհարգալից վերաբերմունք դրսևորելով` շուրջ 5 րոպե տևողությամբ աղմկել է և տվել սեռական բնույթի հայհոյանքներ: Նույն պահին Հանրապետության փողոցում ծառայություն իրականացնող ՀՀ ոստիկանության ՊՊԾ 3-րդ հատուկ գումարտակի աշխատակիցներ Տ.Դանիելյանը և Գ.Պողոսյանը Դիանա Սիմոնյանին և Քրիստինա Լիսենկոյին բերման են ենթարկել ՀՀ ոստիկանության Կենտրոնականի բաժին, որտեղ վերջինը, շարունակելով իր խուլիգանական գործողությունները, աղմկել և հայհոյել է շուրջ 5 րոպե տևողությամբ, որի ընթացքում ոտքով հարվածել և կոտրել է ոստիկանության բաժնի անցակետի դռան` 12.000 ՀՀ դրամ ընդհանուր արժողության երկու շերտապակիները` իր այդ դիտավորյալ գործողություններով խաթարելով ոստիկանության Կենտրոնականի բաժնի բնականոն աշխատանքը:
2. Արագացված դատական քննություն.
Մինչ դատաքննությունն սկսելն ամբաստանյալ Քրիստինա Սամվելի Լիսենկոն միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Քրիստինա Սամվելի Լիսենկոն կատարել է արարք` նախատեսված ՀՀ քրեական օրենսգրքի 258-րդ հոդվածի 2-րդ մասով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, սթափության վիճակի զննության թիվ 03464 արձանագրությունը և ՀՀ ոստիկանության ինֆորմացիոն կենտրոնի պահանջագիրը, եկավ հետևյալ եզրահանգման.
Քրիստինա Լիսենկոյի անձը դրականորեն բնութագրող հանգամանքներ են ինքնախոստովանական ցուցմունքներ տալը և կատարածի համար զղջալը:
ՀՀ քրեական օրենսգրքի 63-րդ հոդվածի 1-ին մասի 14-րդ կետի համաձայն` պատասխանատվությունը և պատիժը ծանրացնող հանգամանք է հանցանքն ալկոհոլի ազդեցության տակ կատարելը:
Դատարանը, նկատի ունենալով, որ Քրիստինա Լիսենկոն քրեական օրենսգրքով նախատեսված արարքը կատարել է ալկոհոլի ազդեցության տակ, գտնում է, որ նրա պատասխանատվությունն ու պատիժը ծանրացնող հանգամանք է հանցանքն ալկոհոլի ազդեցության տակ կատարելը:
Դատարանը միաժամանակ արձանագրում է, որ Քրիստինա Լիսենկոյի պատասխանատվությունն ու պատիժը մեղմացնող հանգամանքներ չկան:
Կատարած արարքի համար ամբաստանյալ Քրիստինա Լիսենկոն ենթակա է քրեական պատասխանատվության և պատժի:
Դատարանը, հաշվի առնելով Քրիստինա Լիսենկոյի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը ծանրացնող հանգամանքը, պատասխանատվությունն ու պատիժը մեղմացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պատիժ պետք է նշանակել տուգանքի ձևով:
Դատարանը գտնում է, որ Քրիստինա Լիսենկոյի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ դատական ծախսերն ամբաստանյալ Քրիստինա Լիսենկոյից ենթակա չեն բռնագանձման, քանի որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախս սույն քրեական գործով չկա, իսկ 2-8-րդ կետերով նախատեսված դատական ծախսերն արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի, ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը

ՎՃՌԵՑ

Քրիստինա Սամվելի Լիսենկոյին մեղավոր ճանաչել ՀՀ քրեական օրենսգրքի 258-րդ հոդվածի 2-րդ մասվ և պատիժ նշանակել պատիժ նշանակել տուգանք` նվազագույն աշխատավաձի հարյուրհիսնապատիկի չափով:
Քրիստինա Սամվելի Լիսենկոյի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին մասի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ