ԵԿԴ/0013/01/11







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«25» մարտի 2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Ա.Աֆանդյան
տուժող Ն.Վարդանյան
պաշտպան Ա.Ավագյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Ալեքսան Արամի Թադևոսյանի` ծնված 1962 թվականի դեկտեմբերի 19-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, դատվածություն չունեցող, չի աշխատում, մշտական բնակության վայր չունի: Մեղադրանք է առաջադրվել ՀՀ քրեական օրենսգրքի 316-րդ հոդվածի 2-րդ մասով, արգելանքի տակ է 2010 թվականի դեկտեմբերի 16-ից:
1. Գործի դատավարական նախապատմությունը.
2010 թվականի դեկտեմբերի 16-ին ՀՀ հատուկ քննչական ծառայության ՀԿԳ քննիչ Ա.Կարապետյանի որոշմամբ ՀՀ քրեական օրենսգրքի 316-րդ հոդվածով 1-ին մասով նախատեսված հանցագործության հատկանիշներով հարուցվել և վարույթ է ընդունվել թիվ 62209710 քրեական գործը:
2010 թվականի դեկտեմբերի 18-ին ՀՀ հատուկ քննչական ծառայության ՀԿԳ քննիչ Ա.Կարապետյանի որոշմամբ թիվ 62209710 քրեական գործով Ալեքսան Արամի Թադևոսյանին մեղադրանք է առաջադրվել ՀՀ քրեական օրենսգրքի 316-րդ հոդվածով 1-ին մասով:
2010 թվականի դեկտեմբերի 29-ին ՀՀ ոստիկանության Կենտրոնականի քննչական բաժնի քննիչ Հ.Ապրեսյանի որոշմամբ թիվ 62209710 քրեական գործը ընդունվել է վարույթ:

2011 թվականի փետրվարի 1-ին ՀՀ ոստիկանության Կենտրոնականի քննչական բաժնի քննիչ Հ.Ապրեսյանի որոշմամբ թիվ 62209710 քրեական գործով Ալեքսան Արամի Թադևոսյանին առաջադրված մեղադրանքը փոփոխվել է և նրան նոր մեղադրանք է առաջադրվել ՀՀ քրեական օրենսգրքի 316-րդ հոդվածի 2-րդ մասով:
2011 թվականի փետրվարի 2-ին Ալեքսան Արամի Թադևոսյանի վերաբերյալ քրեական գործը մեղադրական եզրակացությամբ ուղարկվել է Դատարան:
Ալեքսան Արամի Թադևոսյանին մեղադրանք է առաջադրվել ՀՀ քրեական օրենսգրքի 316-րդ հոդվածի 2-րդ մասով` այն արարքի համար, որ նա ծառայողական պարտականությունների կատարման հետ կապված իշխանության ներկայացուցիչ հանդիսացող Նարեկ Վարդանյանի կյանքի և առողջության համար գործադրել է վտանգավոր բռնություն: Այսպես. 2010 թվականի դեկտեմբերի 16-ին` ժամը 01:00-ի սահմաններում, իշխանության ներկայացուցիչ հանդիսացող` ՀՀ ոստիկանության Կենտրոնականի բաժնին կից պահպանության բաժնի ոստիկան, ոստիկանության սերժանտ Նարեկ Վարդանյանը Երևան քաղաքի Պուշկինի 56ա հասցեում գործող «Արմֆարմացիա» ՓԲ ընկերության գրասենյակում ծառայողական պարտականությունները կատարելիս գրասենյակի դիմաց նկատել է դանակը ձեռքին շրջող Ալեքսան Թադևոսյանին: Դուրս գալով պահակակետից` Նարեկ Վարդանյանը պահանջել է ներկայացնել դանակը, սակայն Ալեքսան Թադևոսյանը, կյանքի և առողջության համար վտանգավոր բռնություն գործադրելով, ձեռքին եղած ապակե տարայով հարվածել է Նարեկ Վարդանյանի կենսական կարևորագույն նշանակություն ունեցող օրգանի` գլխի շրջանին:
2. Արագացված դատական քննություն.
Մինչ դատաքննությունն սկսելն ամբաստանյալ Ալեքսան Արամի Թադևոսյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Ալեքսան Արամի Թադևոսյանը կատարել է արարք` նախատեսված ՀՀ քրեական օրենսգրքի 316-րդ հոդվածի 2-րդ մասով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները և ՀՀ ոստիկանության ինֆորմացիոն կենտրոնի պահանջագիրը, եկավ հետևյալ եզրահանգման.
Ալեքսան Թադևոսյանի անձը դրականորեն բնութագրող հանգամանքներ են ինքնախոստովանական ցուցմունքներ տալը և կատարածի համար զղջալը:
Դատարանը արձանագրում է, որ Ալեքսան Թադևոսյանի պատասխանատվությունն ու պատիժը մեղմացնող և ծանրացնող հանգամանքներ չկան:
Կատարած արարքի համար ամբաստանյալ Ալեքսան Թադևոսյանը ենթակա է քրեական պատասխանատվության և պատժի:
Դատարանը, հաշվի առնելով Ալեքսան Թադևոսյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքների բացակայությունը, ինչպես նաև այն, որ Ալեքսան Թադևոսյանի կողմից կատարված արարքի համար ՀՀ քրեական օրենսգրքի 316-րդ հոդվածի 2-րդ մասի սանկցիայով նախատեսված է պատիժ միայն ազատազրկման ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Ամբաստանյալ Ալեքսան Թադևոսյանի պատժի կրման սկիզբը պետք է հաշվել 2010 թվականի դեկտեմբերի 16-ից, քանի որ նա ձերբակալվել է այդ օրը, իսկ 2010 թվականի դեկտեմբերի 18-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Ալեքսան Թադևոսյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերը դատարանի նախաձեռնությամբ ամբաստանյալ Ալեքսան Թադևոսյանից ենթակա չեն բռնագանձման, քանի որ տուժողը, հնարավորություն ունենալով դատարանում ներկայացնել իր շահերը, ամբաստանյալին որևէ պահանջ չի ներկայացրել: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մաuի 2-8-րդ կետերով նախատեսված դատական ծախսերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի` ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ, 369-372-րդ, 3751 և 3753 հոդվածներով` Դատարանը

ՎՃՌԵՑ

Ալեքսան Արամի Թադևոսյանին մեղավոր ճանաչել ՀՀ քրեական օրենսգրքի 316-րդ հոդվածի 2-րդ մասվ և պատիժ նշանակել ազատազրկում` 5 (հինգ) տարի ժամկետով` պատժի կրման սկիզբը հաշվելով 2010 թվականի դեկտեմբերի 16-ից:
Ալեքսան Արամի Թադևոսյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը։
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին մասի 1-ին կետով նախատեսված հիմքով):

ԴԱՏԱՎՈՐ Մ.ՊԱՊՈՅԱՆ