Ո Ր Ո Շ ՈՒ Մ
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.


նախագահող դատավոր` Մ. Մարտիրոսյան,
քարտուղար` Տ. Գրիգորյան,

մասնակցությամբ`
մեղադրող,
ՀՀ գլխավոր դատախազության
մարդու դեմ ուղղված հանցագործությունների
գործերով վարչության պետի տեղակալ,
դատախազ Ա. Դավթյանի,

ամբաստանյալ Վ. Գևորգյանի,

պաշտպաններ Լ.Սահակյանի,
Ե. Վարոսյանի,

տուժողների իրավահաջորդներ Օ. Համբարձումյան,
Ա. Պողոսյան,

տուժողի իրավահաջորդի
ներկայացուցիչ Կ. Գրիգորյան,


2011թ. հունիսի 9-ին, դատարանում, դռնբաց դատական նիստում, քննելով ԵԿԴ-0009/01/11 (13202107) քրեական գործն ըստ մեղադրանքի
Վարդան Զավենի Գևորգյանի`
ծնված 1973թ. սեպտեմբերի 5-ին Երևանում, հայ, Հայաստանի Հանրապետության քաղաքացի, բարձրագույն կրթությամբ, ամուսնացած, խնամքին երկու անչափահաս երեխա, որոնցից մեկը մինչև տասչորս տարեկան, նախկինում չդատված, չի աշխատում, հաշվառված է և բնակվել է Երևանի Կոմիտասի փողոցի թիվ 45 շենքի թիվ 10 բնակարանում, կալանքի տակ է 08.10.2010թ.-ից, մեղադրվում է ՀՀ քրեական օրենսգրքի 108-րդ հոդվածով,

Պ Ա Ր Զ Ե Ց

Վարդան Զավենի Գևորգյանին մեղադրանք է առաջադրվել ՀՀ քրեական օրենսգրքի 108-րդ հոդվածով հետևյալ արարքի համար. «որ նա` 2007 թվականի փետրվարի 15-ին` ժամը 03.45-ի սահմաններում, Երևանի Տերյան փողոցի 105/1 հասցեում գործող «Ռելաքս» գիշերային դիսկոտեկ ակումբի սրահում, Մհեր Պողոսյանի և նրա ընկեր Արտաշես Համբարձումյանի կողմից ներքաշվել է վերջիններիս հետ վիճաբանության մեջ, որի ընթացքում Մ. Պողոսյանը և Ա. Համբարձումյանը Վ. Գևորգյանին սպանության սպառնալիքներ տալով, քաշելով և հրելով տարել են ակումբի հետնամուտքի նախասրահ, որտեղ տեղի ունեցած քաշքշուկի և կռվի ընթացքում Մ. Պողոսյանն ու Ա. Համբարձումյանը ձեռքերով, ոտքերով, ապակյա շշերով հարվածներ են հասցրել Վ. Գևորգյանին` գլխի շրջանում դիտավորությամբ պատճառելով առողջությանը թեթև վնասի հատկանիշներ պարունակող սալջարդ վերքի և առողջությանը ծանր վնասի հատկանիշներ պարունակող ճակատոսկրի ներհրված կոտրվածքի ձևով մարմնական վնասվածքներ։ Բացի այդ` Մ. Պողոսյանը և Ա. Համբարձումյանը փորձել են նաև խլել նրա մոտ օրինական կերպով գտնվող «Վիկինգ» մոդելի 024460192 համարի 9մմ տրամաչափի ատրճանակը։ Վ. Գևորգյանն իր առողջությանը սպառնացող` Մ. Պողոսյանի և Ա. Համբարձումյանի վտանգավոր ոտնձգությունից պաշտպանվելիս, ոտնձգության բնույթին և վտանգավորությանն իր համար ակնհայտ անհամապատասխան եղանակով, վերը նշված ատրճանակից, թույլ տալով անհրաժեշտ պաշտպանության սահմանազանցում, սպանելու դիտավորությամբ կրակոցներ է արձակել Մ. Պողոսյանի և Ա. Համբարձումյանի ուղղությամբ և Մ.Պողոսյանին` գլխի ու պարանոցի, իսկ Ա.Համբարձումյանին` գլխի, պարանոցի, կրծքավանդակի ձախ կեսի, ձախ վերին վերջույթի շրջանների հրազենային գնդակային վնասվածքներ պատճառելով՝ կյանքից զրկել է նրանց։»։
Տուժողների իրավահաջորդները և տուժողի իրավահաջորդ Օ. Համբարձումյանի ներկայացուցիչ, փաստաբան Կ. Գրիգորյանը պատշաճ կարգով ծանուցվել են դատական նիստերի ժամանակի և վայրի մասին։ Տուժողների իրավահաջորդները ընդհանրապես դատարան չեն ներկայացել, որևէ գույքային պահանջ ամբաստանյալին չեն ներկայացրել։ 2011թ. հունիսի 8-ին դատարան է ստացվել տուժողի իրավահաջորդի ներկայացուցիչ Կրոմվել Գրիգորյանի դիմումը, որով վերջինս խնդրել է քրեական գործի քննությունն անցկացնել իր բացակայությամբ։
2011թ. հունիսի 9-ին, դատական նիստում ամբաստանյալ Վարդան Զավենի Գևորգյանը հայտնեց, որ համաձայն է, որպեսզի իր նկատմամբ համաներում կիրառվի։
Պաշտպանները և մեղադրողը հայտնեցին, որ ամբաստանյալի նկատմամբ համաներում կիրառելու դեմ չեն առարկում։
ՀՀ քրեական օրենսգրքի 82-րդ հոդվածի համաձայն` «Հանցանք կատարած անձն oրենuդիր մարմնի կողմից ընդունվող համաներման ակտով կարող է ազատվել քրեական պատաuխանատվությունից, ...»։
ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի համաձայն` «... քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե` ... ընդունվել է համաներման ակտ։…
Սույն հոդվածի առաջին մասի 13-րդ կետում նշված հիմքով գործի … վարույթի կարճում և քրեական հետապնդման դադարեցում չի թույլատրվում, եթե չի հատուցվել կամ այլ կերպ չի հարթվել պատճառված վնասը, կամ առկա է վեճ հատուցման ենթակա վնասի կապակցությամբ։ Այս դեպքում ևս գործի վարույթը շարունակվում է սովորական կարգով։»։
Նույն հոդվածի 5-րդ մասի համաձայն` «Դատարանը, հայտնաբերելով քրեական հետապնդումը բացառող հանգամանքներ, լուծում է ամբաստանյալի նկատմամբ քրեական հետապնդումը դադարեցնելու հարցը։»։
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ ԱԺ 2011թ. մայիսի 26-ի որոշման 6-րդ կետի 2-րդ ենթակետի համաձայն` որոշվել է «... քրեական հետապնդում չիրականացնել, ինչպես նաև կարճել մինչև 2011թ, մայիսի 1-ը կատարած հանցագործությունների վերաբերյալ հետաքննության մարմինների, նախաքննության մարմինների կամ դատարանի վարույթում գտնվող քրեական գործերը, ... որոնցով` անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան երեք տարի ժամկետով ազատազրկում.»։
ՀՀ քրեական օրենսգրքի 108-րդ հոդվածով սահմանված հանցագործության համար նախատեսված ազատազրկման ձևով պատժի առավելագույն ժամկետը երեք տարի է։
Ամբաստանյալին վերագրվող հանցագործության հետևանքով պատճառված վնասի` հատուցված կամ որևէ այլ կերպ հարթված չլինելու, հատուցման ենթակա վնասի վերաբերյալ վեճի առկայության մասին տեղեկություններ դատարանին չեն ներկայացվել։
«Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ ԱԺ 2011թ. մայիսի 26-ի որոշման 9-րդ կետում նշվել են այն սահմանափակումները, որոնց առկայության դեպքում համաներումը կիրառելի չէ։
Ամբաստանյալ Վարդան Զավենի Գևորգյանի նկատմամբ համաներման կիրառման համար, վերոհիշյալ որոշման 9-րդ կետով սահմանված որևէ սահմանափակում առկա չէ, որի պատճառով համաներման ակտը նրա նկատմամբ ենթակա է կիրառման։
Այսպիսով, վերոհիշյալ հանգամանքների առկայության պարագայում, «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ ԱԺ 2011թ. մայիսի 26-ի որոշումը սույն քրեական գործի վարույթը բացառող հանգամանք է, որի պատճառով գործի վարույթը ենթակա է կարճման, ամբաստանյալ Վարդան Գևորգյանի նկատմամբ քրեական հետապնդումը ենթակա է դադարեցման, իսկ նրա նկատմամբ ընտրված խափանման միջոց կալանավորումը ենթակա է վերացման։
Քննարկելով իրեղեն ապացույցների հարցը` դատարանը գտնում է, որ 2010թ. դեկտեմբերի 13-ի որոշմամբ իրեղեն ապացույցներ ճանաչված, տուժող Մհեր Պողոսյանի երկարաթև, սև շապիկը պետք է վերադարձնել տուժողի իրավահաջորդ Անդրանիկ Պողոսյանին, տուժող Արտաշես Համբարձումյանի շագանակագույն, երկարաթև և սև, կարճատև շապիկները` տուժողի իրավահաջորդ Օթար Համբարձումյանին, իսկ կրակված չորս պարկուճները և դեֆորմացված երկու գնդակները պետք է ոչնչացնել։
Վերոգրյալների հիման վրա և ղեկավարվելով ՀՀ քրեական դատավարության օրենսգրքի` 35-րդ հոդվածի 1-ին մասի 13-րդ կետով, 5-րդ մասով, 41-րդ հոդվածով, 312-րդ, 313-րդ հոդվածներով, «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ ԱԺ 2011թ. մայիսի 26-ի որոշման 6-րդ կետի 2-րդ ենթակետով և 13-րդ կետի 1) ենթակետի ա. պարբերությամբ, դատարանը

Ո Ր Ո Շ Ե Ց


ԵԿԴ-0009/01/11 (13202107) քրեական գործով ըստ մեղադրանքի Վարդան Զավենի Գևորգյանի` ՀՀ քրեական օրենսգրքի 108-րդ հոդվածով, քրեական գործի վարույթը կարճել և Վարդան Գևորգյանի նկատմամբ քրեական հետապնդումը դադարեցնել` համաներման ակտ ընդունվելու, այն է` «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ ԱԺ 2011թ. մայիսի 26-ի որոշման ընդունման պատճառաբանությամբ։
Վարդան Զավենի Գևորգյանի նկատմամբ ընտրված խափանման միջոց կալանավորումը վերացնել և նրան անհապաղ ազատել կալանքից դատական նիստի դահլիճում։
Իրեղեն ապացույցներ ճանաչված, տուժող Մհեր Պողոսյանի երկարաթև, սև շապիկը վերադարձնել տուժողի իրավահաջորդ Անդրանիկ Պողոսյանին, տուժող Արտաշես Համբարձումյանի շագանակագույն, երկարաթև և սև, կարճատև շապիկները` տուժողի իրավահաջորդ Օթար Համբարձումյանին, իսկ կրակված չորս պարկուճները և դեֆորմացված երկու գնդակները` ոչնչացնել։
Սույն որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում։


ԴԱՏԱՎՈՐ՝ Մ. ՄԱՐՏԻՐՈՍՅԱՆ