ԵԿԴ/0008/01/11




ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«14» հոկտեմբերի 2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ նաև` Դատարան)

Նախագահող դատավոր Մ.Պապոյան
դատական նիստերի քարտուղարներ Ռ.Ավետյան
Կ.Կարապետյան
մեղադրողներ Տ.Բիշարյան
Գ.Հովհաննիսյան
տուժող «Հայաստանի հաշմանդամների
«Փյունիկ» միություն» ՀԿ
տուժողի ներկայացուցիչ Հ.Աբրահամյան
պաշտպան Ա.Ջուվանովա

դռնբաց դատական նիստում քննեց քրեական գործն ըստ մեղադրանքի`
Սամվել Հենրիկի Քուչիկյանի` ծնված 1984 թվականի մարտի 7-ին Գյումրի քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չի աշխատում, նախկինում դատապարտված, բնակվել է Արմավիրի մարզի Գայ գյուղի Սարյան փողոցի 1-ին տանը, մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 1-ին և 3-րդ կետերով, արգելանքի տակ է 2010 թվականի դեկտեմբերի 4-ից:
1. Գործի դատավարական նախապատմությունը.
2010 թվականի ապրիլի 8-ին ՀՀ ոստիկանության Մալաթիայի քննչական բաժնի քննիչ Ա.Սահակյանի որոշմամբ ՀՀ քրեական օրենսգրքի 177-րդ հոդվածի 2-րդ մասի 3-րդ կետով նախատեսված հանցագործության հատկանիշներով հարուցվել և վարույթ է ընդունվել թիվ 16109810 քրեական գործը:
2010 թվականի մայիսի 31-ին ՀՀ ոստիկանության Մալաթիայի քննչական բաժնի քննիչ Ա.Սահակյանի որոշմամբ թիվ 16109810 քրեական գործով վարույթը կասեցվել է` որպես մեղադրյալ ներգրավման ենթակա անձի հայտնի չլինելու հիմքով:
2010 թվականի դեկտեմբերի 2-ին ՀՀ ոստիկանության Մալաթիայի քննչական բաժնի քննիչ Ա.Սահակյանի որոշմամբ թիվ 16109810 քրեական գործով վարույթը վերսկսվել է:
2010 թվականի դեկտեմբերի 3-ին ՀՀ ոստիկանության Մալաթիայի քննչական բաժնի պետ Ս.Սարդարյանի որոշմամբ թիվ 16109810 քրեական գործի նախաքննության կատարումը հանձնարարվել է քննչական խմբին, որի կազմում ընդգրկվել են ՀՀ ոստիկանության Մալաթիայի քննչական բաժնի քննիչներ Ա.Սահակյանը և Տ.Մուրադյանը, քննչական խմբի ղեկավար է նշանակվել քննիչ Ա.Սահակյանը:
2010 թվականի դեկտեմբերի 7-ին ՀՀ ոստիկանության Մալաթիայի քննչական բաժնի քննիչ Ա.Սահակյանի որոշմամբ թիվ 16109810 քրեական գործով Սամվել Հենրիկի Քուչիկյանին մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 1-ին և 3-րդ կետերով:
2010 թվականի դեկտեմբերի 10-ին ՀՀ ոստիկանության Մալաթիայի քննչական բաժնի քննիչ Ա.Սահակյանի որոշմամբ թիվ 16109810 քրեական գործով Սամսոն Արամայիսի Գրիգորյանին մեղադրանք է առաջադրվել ՀՀ քրեական օրենսգրքի 334-րդ հոդվածի 1-ին մասով:
2010 թվականի դեկտեմբերի 28-ին ՀՀ ոստիկանության Մալաթիայի քննչական բաժնի քննիչ Ա.Սահակյանի որոշմամբ թիվ 16109810 քրեական գործով Սամսոն Արամայիսի Գրիգորյանին առաջադրված մեղադրանքը փոփոխվել, լրացվել է և նրան նոր մեղադրանք է առաջադրվել ՀՀ քրեական օրենսգրքի 334-րդ հոդվածի 1-ին մասով:
2010 թվականի դեկտեմբերի 28-ին ՀՀ ոստիկանության Մալաթիայի քննչական բաժնի քննիչ Ա.Սահակյանի որոշմամբ թիվ 16109810 քրեական գործից անջատվել է ոմն Դավիթի և ոմն Գուգուլի վերաբերյալ մասը, որին շնորհվել է 16109810/1 համարը:
2011 թվականի հունվարի 11-ին Սամվել Հենրիկի Քուչիկյանի և Սամսոն Արամայիսի Գրիգորյանի վերաբերյալ թիվ 16109810 քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան, որին շնորհվել է ԵԿԴ/0008/01/11 համարը:
2011 թվականի սեպտեմբերի 27-ին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի որոշմամբ թիվ ԵԿԴ/0008/01/11 քրեական գործով Սամսոն Արամայիսի Գրիգորյանի նկատմամբ քրեական հետապնդումը դադարեցվել է` համաներման ակտի ընդունման հիմքով:
Սամվել Հենրիկի Քուչիկյանին մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 1-ին և 3-րդ կետերով` այն արարքի համար, որ նա 2010 թվականի ապրիլի 8-ին` ժամը 02:00-ի սահմաններում, նախնական համաձայնության գալով ոմն Դավիթի և ոմն Գուգուլի հետ, ապօրինի մուտք է գործել Երևան քաղաքի Ծիծեռնակաբերդի 16 հասցեում տեղակայված «Հայաստանի հաշմանդամների «Փյունիկ» միություն» հասարակական կազմակերպության տարածք, և որպես գործիք հանդիսացող երկաթյա խողովակի միջոցով կոտրել է որպես պահեստարան հանդիսացաող թվով 5 կոնտեյներների կախովի փականները, որոնցից մեկի միջից գաղտնի հափշտակել են թվով 100 տուփ սպորտային կոշիկներ` «Հայաստանի հաշմանդամների «Փյունիկ» միություն» հասարակական կազմակերպությանը պատճառելով զգալի չափերի հասնող` ընդհանուր 249.124 ՀՀ դրամի նյութական վնաս:
2. Ապացույցների հետազոտում և գնահատում.
Դատական քննության սկզբում ամբաստանյալ Սամվել Քուչիկյանը առաջադրված մեղադրանքում իրեն մեղավոր չճանաչեց և ցուցմունք տվեց այն մասին, որ հրաժարվում է նախնական քննության ընթացքում իր տված ցուցմունքներից, քանի որ ինքը որևէ դուռ չի կոտրել և չի մասնակցել իրեն վերագրվող գողությանը: Դեպքի օրը` ժամը 01:00-ից 02:00-ի սահմաններում, իրեն զանգահարել է իր ծանոթ Դավիթը, ասել, որ առկա են սպորտային կոշիկներ, որոնք կարող են վաճառել, և խնդրել, որպեսզի ինքը գնա Երևան քաղաքի «Հրազդան» մարզադաշտի մոտ: Ինքը Գայ գյուղում գտնվող իրենց տնից տաքսի մեքենայով գնացել է «Հրազդան» մարզադաշտի մոտ, որտեղից ոտքով քայլել է նրանց մոտ և տեսել, որ ճանապարհի աջ կողմում` ծառերի տակ առկա են տուփերի մեջ դրված սպորտային կոշիկներ: Այդ ժամանակ Դավիթի հետ եղել է Գուրգեն անունով մի անձ, ում ինքը նախկինում չի ճանաչել: Դավիթն իրեն ասել է, որ սպորտային կոշիկները գողացել են, հարցրել, թե կարող են արդյոք վաճառել դրանք, իսկ ինքն ասել է, որ կփորձի վաճառել: Ինքն ասել է, որ ավտոմեքենա չունի և չի կարող դրանք տանել: Այդ ժամանակ Դավիթը զանգահարել է Սամսոնին, ով եկել է արտասահմանյան մակնիշի «Ջիպ» տեսակի մեքենայով: Իրենք կոշիկների մի մասը դրել են այդ մեքենայի բեռնախցիկը, իսկ մյուս մասը` մեքենայի սրահում, և գնացել: Ճանապարհին` դեպի Կիևյան փողոց տանող հատվածում գտնվող բենզալցակայանի մոտ ինքը վերցրել է մոտ 20-30 զույգ սպորտային կոշիկներ, իջել մեքենայից և պատահական տաքսի մեքենայով գնացել Էջմիածին: Չնայած տուժողը նշել է, որ գողացվել են 100 զույգ սպորտային կոշիկներ, սակայն Սամսոնի մեքենայում այդքան սպորտային կոշիկներ հնարավոր չէր տեղավորել: Այդ ժամանակ ինքն օգտագործել է 077-66-67-68 հեռախոսահամարը: Դատական վիճաբանությունների ժամանակ` իր ճառում ամբաստանյալ Սամվել Քուչիկյանն ամբողջությամբ ընդունեց ՀՀ քրեական օրենսգրքի 177-րդ հոդվածի 2-րդ մասի 1-ին և 3-րդ կետերով իրեն առաջադրված մեղադրանքը, զղջած կատարածի համար և Դատարանից խնդրեց մեղմ պատիժ նշանակել:
Սամվել Քուչիկյանը նախնական քննության ընթացքում` 2010 թվականի դեկտեմբերի 4-ին, որպես կասկածյալ, ցուցմունք է տվել այն մասին, որ բնակվում է Արմավիրի մարզի Գայ գյուղում: 2010 թվականի ապրիլի 7-ն կամ 8-ին առավոտից գտնվել է տանը: Այդ օրն օգտագործել է ոգելից խմիչք և երեկոյան իր մոտ ցանկություն է առաջացել գնալ Երևան: Ինքը գնացել է Երևան քաղաքի կենտրոն, որտեղ իր ծանոթ Դավիթի հետ նորից խմել է օղի: Ինքը և Դավիթը որոշել են գողություն կատարել, որից հետո քայլելով գնացել են «Հրազդան» տոնավաճառի հարևանությամբ գտնվող ճանապարհի մոտ, որտեղ նկատել են կոնտեյներներ: Իրենք շրջել են տարածքում և տեսել, որ այդտեղ ոչ ոք չկա: Ինքը շրջակայքից գտել է երկաթի կտոր, որով կոտրել է կոնտեյներների կողպեքները, և դրանցից մեկից գողացել են տուփեր: Այնուհետև իրենք բացել են տուփերը և տեսել, որ այնտեղ սպորտային կոշիկներ են: Իրենք արկղերը թաքցրել են կոնտեյներներից քիչ հեռու: Այնուհետև այդ ապրանքը տեղափոխելու խնդիր է առաջացել, և Դավիթը զանգահարել է իր ծանոթ Սամսոնին, ով եկել է «Ջիպ» տեսակի մեքենայով, որով տեղափոխել են սպորտային կոշիկները: Ինքը չգիտի, թե այդ կոշիկները ուր են տեղափոխվել, քանի որ ինքը դրանից վերցրել է 30 զույգ և գնացել: Իր կարծիքով Սամսոնը չի իմացել, որ իրենք գողություն են կատարել, քանի որ Դավիթը նրան պատահաբար է զանգել: Հաջորդ օրերին ինքն այդ սպորտային կոշիկները 3.000 ՀՀ դրամով վաճառել է Էջմիածին քաղաքի շուկայում:
Սամվել Քուչիկյանը նախնական քննության ընթացքում` 2010 թվականի դեկտեմբերի 7-ին, որպես մեղադրյալ, ցուցմունք է տվել այն մասին, որ կատարվածին ամբողջությամբ չի մասնակցել: 2010 թվականի ապրիլի 8-ին` ժամը 03:00-04:00 ընկած ժամանակահատվածում է իր ծանոթ Դավիթը զանգահարել է իր 077-66-67-68 բջջային հեռախոսահամարին, կանչել «Հրազդան» տոնավաճառի մոտակայք` ասելով որ ինչ-որ բան կա: Ինքը գնացել է «Հրազդան» տոնավաճառի մոտ (քանի որ եղել է ալկոհոլ օգտագործած վիճակում, չի հիշում կոնկրետ վայրը), հանդիպել Դավիթին, ով իրեն ասել է, որ մոտակայքից սպորտային կոշիկներ է գողացել, սակայն չի ասել, թե կոնկրետ որտեղից: Դավիթն իրեն խնդրել է օգնել տեղափոխել դրանք, որի դիմաց խոստացել է իրեն տալ 30 զույգ սպորտային կոշիկներ, որպեսզի ինքը վաճառի դրանք և գումարը տա նրան, իսկ նա ընդհանուր գումարից իրեն պետք է գումար տար: Քանի որ ինքը մեքենա չի ունեցել, Դավիթը զանգել է Սամսոնին, ով քիչ անց եկել է «Ջիպ» տեսակի մեքենայով: Իրենք սպորտային կոշիկները դրել են մեքենայի մեջ և շարժվել: Ճանապարհի կեսին ինքը վերցրել է 30 զույգ սպորտային կոշիկներ և գնացել: Դրանից հետո ինքը Էջմիածին քաղաքի շուկայում 3.000 ՀՀ դրամով վաճառել է սպորտային կոշիկները, սակայն գումարը Դավիթին չի տվել, քանի որ նրան այլևս չի տեսել: Որպես վկա և կասկածյալ իր տված ցուցմունքներն այն մասին, որ գողությունն ինքն անձամբ է կատարել, չի համապատասխանում իրականությանը:
Սամսոն Գրիգորյանը դատական քննության ընթացքում, որպես ամբաստանյալ, հայտնեց, որ պնդում է նախկինում իր տված ցուցմունքները, իրեն մեղավոր է ճանաչում, զղջում կատարածի համար և հրաժարվում է ցուցմունք տալուց:
Սամսոն Գրիգորյանը նախնական քննության ընթացքում` 2010 թվականի դեկտեմբերի 3-ին, որպես կասկածյալ, ցուցմունք է տվել այն մասին, որ 2010 թվականի ապրիլի 7-ից 8-ն ընկած ժամանակահատածում` ժամը 03:30-ի սահմաններում, իր ընկեր Դավիթը զանգահարել է իր 077-12-21-70 բջջային հեռախոսահամարին և ասել, որպեսզի ինքը շտապ գնա Երևան քաղաքի մարզահամերգային համալիրի մոտակայքում գտնվող ճանապարհի մոտ: Ինքն իր «Միցուբիշի-Պաջերո» մակնիշի մեքենայով գնացել է այնտեղ և հանդիպել Դավիթին, ում հետ շարունակել են ճանապարհը: Իրենք հասել են ճանապարհի միջնամաս, որտեղ ծառերի ետևից դուրս են եկել ևս երկու տղաներ, որոնց ինքը չի ճանաչել: Ընդհանուր խոսակցություններից ինքը լսել է, որ այդ տղաներից մեկի անունը Սամվել է, իսկ մյուսինը` «Գուգուլ»: Նրանց կողքին եղել են շատ տուփեր, և ինքը Դավիթից իմացել է, որ նրանք գողացել են դրանք: Դավիթն առաջարկել է իր մեքենայով տեղափոխել դրանք, իսկ ինքը չի կարողացել մերժել նրան: Իրենք տուփերը դրել են իր մեքենան և տեղափոխել «Գուգուլի» տուն: Դրանից հետո ինքը ետ է վերադարձել, քանի որ ապրանքի մի մասը մնացած է եղել այնտեղ: Դավիթն իրեն ասել է, որ դրանք տանի իր տուն և վաճառի, որից հետո ինքը մնացած 70 տուփը դրել է մեքենայի մեջ և գնացել տուն: Տուփերի մեջ եղել են ոչ նոր սպորտային կոշիկներ: Դավիթն իրեն առաջարկել է օգնել վաճառել դրանք` մեկ զույգը 5.000 ՀՀ դրամով: 2010 թվականի դեկտեմբերի 1-ին ինքը բերման է ենթարկվել ՀՀ ոստիկանության կազմակերպված հանցավորության դեմ պայքարի գլխավոր վարչություն, որտեղ տեսել է Սամվելին, ով դեպքի գիշերը եղել է այնտեղ:
Սամսոն Գրիգորյանը նախնական քննության ընթացքում` 2010 թվականի դեկտեմբերի 10-ին, որպես մեղադրյալ, ցուցմունք է տվել այն մասին, որ 2010 թվականի ապրիլի 8-ին` ժամը 03:30-ի սահմաններում, ինքն իր ծանոթ Դավիթի կանչով գնացել է մարզահամերգային համալիրի հարևանությամբ գտնվող ճանապարհի մեջտեղի հատված, որտեղ, տեսել է ևս երկու տղաների` Սամվել Քուչիկյանին և ոմն «Գուգուլին», որոնց ինքը նախկինում չի ճանաչել: Նրանց մոտ եղել են մոտ 100 տուփ սպորտային կոշիկներ, և ինքը Դավիթից իմացել է, որ դրանք գողացվել են: Դավիթի առաջարկով այդ տուփերի մի մասն իր մեքենայով տեղափոխել է «Գուգուլի» տուն, իսկ մնացած 70 տուփը տեղափոխել է իր տուն, որոնք հետագայում վաճառել է:
Տուժողի ներկայացուցիչ Հակոբ Աբրահամյանը դատական քննության ընթացքում ցուցմունք տվեց այն մասին, որ հանդիսանում է «Հայաստանի հաշմանդամների «Փյունիկ» միություն» հասարակական կազմակերպության նախագահը: 2010 թվականի ապրիլի 8-ի առավոտյան իր օգնական Ռուզաննա Սարգսյանը զանգահարել է իրեն ու ասել, որ կազմակերությանը պատկանող կոնտեյներների դռները բաց են: Ինքն անմիջապես գնացել է տարածք, որտեղ ուսումնասիրություն են կատարել և զանգահարել ոստիկանություն: Պարզվել է, որ կազմակերությանը պատկանող կոնտեյներներից բացակայել են նոր և օգտագործված «Ադիդաս» ֆիրմայի սպորտային կոշիկներ: Առկա փաստաթղթերի համաձայն կազմակերպությանը պատճառվել է 249.124 ՀՀ դրամի վնաս:
Դեպքի վայրի զննության մասին 2010 թվականի ապրիլի 8-ի արձանագրության համաձայն` դեպքի վայրը գտնվել է Երևան քաղաքի Ծիծեռնակաբերդի 16 հասցեում տեղակայված «Հայաստանի հաշմանդամների «Փյունիկ» միություն» հասարակական կազմակերությունում: Կազմակերության շենքի դիմացի հատվածի բաց տարածությունում տեղակայված են եղել երեք կոնտեյներներ, իսկ դրանցից 4 մետր դեպի աջ` ևս երկու կոնտեյներներ: Նշված կոնտեյներներից չորսը ունեցել են միևնույն չափերը, իսկ մեկը եղել է ավելի մեծ: Նշված կոնտեյներների դռները գտնվել են բաց վիճակում և դրանց վրայից բացակայել են կախովի կողպեքները:
«Հայաստանի հաշմանդամների «Փյունիկ» միություն» հասարակական կազմակերության գույքի մասնակի գույքագրման 2010 թվականի ապրիլի 12-ի արձանագրության համաձայն` 2010 թվականի ապրիլի 7-ից 8-ի գիշերը կազմակերության վարչական տարածքում գտնվող 5 բեռնախցերից կատարված գողության պատճառով կատարված գույքագրումից պարզվել է, որ 20տ բեռնատարողությամբ 4 բեռնախցերից պակաս ապրանքներ չեն եղել, իսկ 40տ բեռնախցից պակաս են եղել 16 արկղեր, որոնք պարունակել են նոր և օգտագործված մարզական և սովորական կոշիկ և հագուստ: Առկա գույքագրման ցուցակի հետ համեմատելով` պարզվել է, որ պակաս ապրանքը կազմել է մոտ 160կգ` 275.840 ՀՀ դրամ ընդհանուր արժեքով: Պակաս է եղել նաև հնաոճ մեկ հեռախոս` 5.284 ՀՀ դրամ արժողությամբ: Ընդհանուր պակաս ապրանքների արժեքը կազմել է 281.124 ՀՀ դրամ:
Փորձագետի 2010 թվականի ապրիլի 23-ի թիվ 954 եզրակացության համաձայն` ներկայացված երեք կախովի կողպեքները գործարանային արտադրության են, գտնվում են տեխնիկապես անսարք վիճակում և պիտանի չեն շահագործման համար: Ներկայացված բանալիները նախատեսված են կողպեքներն աշխատեցնելու համար: Կախովի կողպեքի վրա առկա հետքերը կարող էին առաջանալ որևէ հարմարանքի մեխանիկական ուժի գործադրման միջոցով կողպեքը բացելու հետևանքով: Ներկայացված կախովի կողպեքները բացվել են որևէ հարմարանքի, լինգի մեխանիկական ուժի գործադրմամբ: Ներկայացված բանալիների վրա կոպիտ խարտման հետքեր, օտար նյութի մասնիկներ, որոնք կարող էին առաջանալ բանալիներից կրկնօրինակ պատրաստելուց, չեն հայտնաբերվել:
Սպորտային կոշիկներ ներկայացնելու մասին 2010 թվականի դեկտեմբերի 1-ի արձանագրության համաձայն` 2010 թվականի դեկտեմբերի 1-ին Գրիբոյեդով փողոցի 9-րդ բնակարանում Սամվել Քուչիկյանի կինը` Լուսինե Բոբիկյանը ներկայացրել է «Ադիդաս» ֆիրմայի մեկ զույգ սպորտային կոշիկ: Լուսինե Բոբիկյանը հայտարարել է, որ դա իրեն տվել է Սամվել Քուչիկյանը:
Սպորտային կոշիկներ ներկայացնելու մասին 2010 թվականի դեկտեմբերի 1-ի արձանագրության համաձայն` 2010 թվականի դեկտեմբերի 1-ին ՀՀ ոստիկանության կազմակերպված հանցավորության դեմ պայքարի գլխավոր վարչությունում Սամսոն Գրիգորյանի մայրը` Անահիտ Ավետիսյանը ներկայցրել է «Ադիդաս» ֆիրմայի երեք զույգ սպորտային կոշիկներ: Անահիտ Ավետիսյանը հայտարարել է, որ դրանք իրենց տուն է բերել իր որդին` Սամսոն Գրիգորյանը:
Փորձագետի 2010 թվականի դեկտեմբերի 27-ի թիվ 10-3294 եզրակացության համաձայն` փորձաքննությանը տրամադրված չորս զույգ սպորտային կոշիկները պիտանի են հետագա օգտագործման համար, քանի որ դրանց վրա առկա չեն այնպիսի վնասվածքներ, որոնք անհնարին կդարձնեին դրանց հետագա օգտագործումը: Փորձաքննությանը տրամադրված չորս զույգ սպորտային կոշիկներից արտաքուստ տարբերություն չունեցող սպորտային նոր կոշիկների մեկ զույգը փորձաքննության կատարման օրվա դրությամբ վաճառվում են շուրջ 6.000 ՀՀ դրամով, իսկ 2010 թվականի ապրիլի 8-ի դրությամբ դրանց մեկ զույգի արժեքը կազմել է շուրջ 8.000 ՀՀ դրամ: Փորձաքննությանը տրամադրված չորս զույգ սպորտային կոշիկներից երեք զույգից յուրաքանչյուրի հավանական շուկայական արժեքը (ներկայացված վիճակում) փորձաքննության կատարման օրվա դրությամբ կարող է կազմել շուրջ 500 ՀՀ դրամ, իսկ մեկ զույգի շուկայական արժեքը (ներկայացված վիճակում)` 1.000 ՀՀ դրամ: Փորձաքննությանը տրամադրված չորս զույգ սպորտային կոշիկներից երեք զույգից յուրաքանչյուրի հավանական շուկայական արժեքը (ներկայացված վիճակում) 2010 թվականի ապրիլի 8-ի դրությամբ կարող է կազմել շուրջ 800 ՀՀ դրամ, իսկ մեկ զույգի հավանական շուկայական արժեքը (ներկայացված վիճակում)` 1.500 ՀՀ դրամ:
Փորձագետի 2010 թվականի դեկտեմբերի 27-ի թիվ 10-3294 եզրակացությանը կից հաշիվ-ապրանքագիր հանդիսացող հանձնման-ընդունման արձանագրության համաձայն` փորձաքննության համար վճարման ենթակա գումարը կազմում է 13.740 ՀՀ դրամ:
Իրեղեն ապացույց ճանաչելու մասին 2010 թվականի դեկտեմբերի 28-ի որոշման համաձայն` չորս զույգ սպորտային կոշիկները ճանաչվել են իրեղեն ապացույց:
Քննչական փորձարարություն կատարելու մասին 2011 թվականի դեկտեմբերի 3-ի արձանագրության համաձայն` Սամսոն Գրիգորյանի ցուցմուքը ճշտելու և ստուգելու նպատակով կատարվել է փորձարարություն: Այդ նպատակով Սամսոն Գրիգորյանի մատնացույց արած ճանապարհով ՀՀ ոստիկանության Մալաթիայի բաժնից մեքենայով գնացել են Երևան քաղաքի Ծիծեռնակաբերդի 16 հասցեին հարող ճանապարհ: Սամսոն Գրիգորյանը մատնացույց է արել ճանապարհի միջնահատվածի ձախ մայթեզրը և հայտարարել, որ նշված հատվածի ծառերի ետևից դուրս են եկել Սամվել Քուչիկյանը և ոմն «Գուգուլը», որոնց մոտ եղել են գողացված սպորտային կոշիկները, այնուհետև մատնացույց է արել մեքենայի կայանման վայրը և մեկնելու ճանապարհը:
077-66-67-68 հեռախոսահամարի հեռախոսազանգերի վերծանումների համաձայն` 2010 թվականի ապրիլի 7-ի ժամը 21:48-ից մինչև ապրիլի 8-ի ժամը 07:42-ն ընկած ժամանակահատվածում այդ հեռախոսահամարը սպասարկվել է միայն Երևան քաղաքում տեղադրված կայաններից:
ՀՀ ոստիկանության ինֆորմացիոն կենտրոնի պահանջագրի համաձայն` Սամվել Քուչիկյանը.
-2003 թվականի հուլիսի 26-ին Շիրակի մարզի առաջին ատյանի դատարանի դատավճռով մեղավոր է ճանաչվել ՀՀ քրեական օրենսգրքի 177-րդ հոդվածի 2-րդ մասով և դատապարտվել ազատազրկման` 2 տարի ժամետով: 2003 թվականի հոկտեմբերի 27-ին պայմանական վաղաժամկետ ազատվել է պատժի մնացած մասը` 1 տարի 1 ամիս 24 օր ժամկետով ազատազրկումը կրելուց,
-2005 թվականի հունիսի 24-ին Շիրակի մարզի առաջին ատյանի դատարանի դատավճռով մեղավոր է ճանաչվել ՀՀ քրեական օրենսգրքի 177-րդ հոդվածի 2-րդ մասի 3-րդ, 4-րդ կետերով և դատապարտվել ազատազրկման` 3 տարի ժամետով: 2006 թվականի հուլիսի 14-ին համաներման ակտի կիրառմամբ ազատվել է պատժի կրումից:
Ձերբակալման 2010 թվականի դեկտեմբերի 4-ի արձանագրության համաձայն` 2010 թվականի դեկտեմբերի 4-ին` ժամը 14:30-ին, Սամվել Քուչիկյանը ձերբակալվել է:
Կալանավորումը որպես խափանման միջոց կիրառելու վերաբերյալ միջնորդությունը քննության առնելու մասին Երևան քաղաքի Մալաթիա-Սեբաստիա վարչական շրջանի ընդհանուր իրավասության առաջին ատյանի դատարանի 2010 թվականի դեկտեմբերի 7-ի որոշման համաձայն` Սամվել Քուչիկյանի նկատմամբ որպես խափանման միջոց կիրառվել է կալանավորումը: Կալանավորման սկիզբը հաշվվել է 2010 թվականի դեկտեմբերի 4-ից:
Այսպիսով, Դատարանը գտնում է, որ մտացածին են և գործով ձեռք բերված օբյեկտիվ տվյալներով հերքվում են ամբաստանյալ Սամվել Քուչիկյանի տված ցուցմունքներն այն մասին, որ ինքն անմիջականորեն չի մասնակցել իրեն վերագրվող գողությանը և որևէ պահեստարան մուտք չի գործել:
3. Դատարանի իրավական վերլուծությունները.
Վերոգրյալ ապացույցները վերլուծելու և համադրելու արդյունքում Դատարանը գալիս է այն եզրահանգման, որ Սամվել Հենրիկի Քուչիկյանը 2010 թվականի ապրիլի 8-ին` ժամը 02:00-ից 03:00-ի սահմաններում, նախնական համաձայնության գալով գործով չպարզված անձանց հետ, ապօրինի մուտք է գործել Երևան քաղաքի Ծիծեռնակաբերդի 16 հասցեում գտնվող, «Հայաստանի հաշմանդամների «Փյունիկ» միություն» հասարակական կազմակերպությանը պատկանող կոնտեյներներ և այնտեղից գաղտնի, ապօրինի, անհատույց, շահադիտական նպատակներով և առանց վերադարձնելու մտադրության վերցրել զգալի չափերի` ընդհանուր 249.124 ՀՀ դրամ արժողության սպորտային կոշիկներ: Այսինքն` Սամվել Հենրիկի Քուչիկյանը, գործով չպարզված անձանց հետ նախնական համաձայնությամբ, ապօրինի մուտք գործելով պահեստարան, կատարել է ուրիշի` զգալի չափերով գույքի գաղտնի հափշտակություն` գողություն, ինչը համապատասխանում է ՀՀ քրեական օրենսգրքի 177-րդ հոդվածի 2-րդ մասի 1-ին և 3-րդ կետերի հատկանիշներին:
Ապացուցված է Սամվել Հենրիկի Քուչիկյանի մեղավորությունը ՀՀ քրեական օրենսգրքի 177-րդ հոդվածի 2-րդ մասի 1-ին և 3-րդ կետերով նախատեսված արարքը կատարելու մեջ:
Սամվել Քուչիկյանի անձը դրականորեն բնութագրող հանգամանքներ են ամունսացած լինելը և կատարածի համար զղջալը:
Դատարանն արձանագրում է, որ Սամվել Քուչիկյանի պատասխանատվությունն ու պատիժը մեղմացնող և ծանրացնող հանգամանքներ չկան:
Կատարած արարքի համար ամբաստանյալ Սամվել Քուչիկյանը ենթակա է քրեական պատասխանատվության և պատժի:
Դատարանը, հաշվի առնելով Սամվել Քուչիկյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 177-րդ հոդվածի 2-րդ մասի սանկցիայով նախատեսված է պատիժ նաև ազատազրկման ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ oրը հաշվելով մեկ oրվա դիմաց: Դատարանը գտնում է, որ Սամվել Քուչիկյանի պատժի կրման սկիզբը պետք է հաշվել 2010 թվականի դեկտեմբերի 4-ից, քանի որ նա այդ օրը ձերբակալվել է, իսկ 2010 թվականի դեկտեմբերի 7-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Սամվել Քուչիկյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո` 2010 թվականի դեկտեմբերի 28-ի որոշմամբ իրեղեն ապացույց ճանաչված չորս զույգ սպորտային կոշիկները պետք է վերադարձնել «Հայաստանի հաշմանդամների «Փյունիկ» միություն» հասարակական կազմակերպությանը:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերն ամբաստանյալ Սամվել Քուչիկյանից ենթակա չեն բռնագանձման, քանի որ տուժողին պատճառված վնասը Սամսոն Գրիգորյանի կողմից վերականգնվել է: Բռնագանձման ենթակա չեն նաև ՀՀ քրեական դատավարության օրենսգրքի 168-րդ հոդվածի 1-ին մասի 2-րդ և 4-6-րդ կետերով նախատեսված դատական ծախսերը, քանի որ 4-րդ և 6-րդ կետերով նախատեսված դատական ծախսեր ընդհանրապես չկան, իսկ 2-րդ և 5-րդ կետերով նախատեսված ծախսերի վերաբերյալ տվյալները բացակայում են: Ավելին` նման պահանջ դատարանին չի ներկայացվել: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մասի 3-րդ կետով նախատեսված դատական ծախսին, ապա Դատարանը գտնում է, որ Սամվել Քուչիկյանից պետք է բռնագանձել դատաապրանքագիտական փորձաքննության համար վճարվելիք գումարը (հիմք` փորձագետի 2010 թվականի դեկտեմբերի 27-ի թիվ 10-3294 եզրակացությանը կից հաշիվ-ապրանքագիր հանդիսացող հանձնման-ընդունման արձանագրություն)` 13.740 ՀՀ դրամը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 169-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Սամվել Հենրիկի Քուչիկյանին մեղավոր ճանաչել ՀՀ քրեական օրենսգրքի 177-րդ հոդվածի 2-րդ մասի 1-ին և 3-րդ կետերով և պատիժ նշանակել ազատազրկում` 2 (երկու) տարի 6 (վեց) ամիս ժամկետով` պատժի կրման սկիզբը հաշվելով 2010 թվականի դեկտեմբերի 4-ից:
Սամվել Հենրիկի Քուչիկյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո 2010 թվականի դեկտեմբերի 28-ի որոշմամբ իրեղեն ապացույց ճանաչված չորս զույգ սպորտային կոշիկները վերադարձնել «Հայաստանի հաշմանդամների «Փյունիկ» միություն» հասարակական կազմակերպությանը:
Սամվել Հենրիկի Քուչիկյանից հօգուտ Հայաստանի Հանրապետության, որպես դատական ծախս, բռնագանձել 13.740 (տասներեք հազար յոթ հարյուր քառասուն) ՀՀ դրամ:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ