ԵԿԴ/0005/01/11







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«6» մայիսի 2011թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրողներ Ռ.Բունիաթյան
Է.Հարությունյան
տուժողներ Ա.Հակոբյան
Ս.Ասոյան
պաշտպան Լ.Գրիգորյան

դռնբաց դատական նիստում քննեց քրեական գործն ըստ մեղադրանքի`
Անդրանիկ Բորիսի Էլոյանի` ծնված 1989 թվականի հոկտեմբերի 22-ին Կոտայքի մարզի Զովք գյուղում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, չի աշխատում, նախկինում չդատապարտված, հաշվառված է Կոտայքի մարզի Զովք գյուղի 7-րդ փողոցի 9-րդ տանը: Մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով, խափանման միջոց է ընտրվել գրավը,
Սամվել Գրիշայի Հովհաննիսյանի` ծնված 1983 թվականի սեպտեմբերի 6-ին Կոտայքի մարզի Զովք գյուղում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, չի աշխատում, նախկինում չդատապարտված, հաշվառված է Կոտայքի մարզի Զովք գյուղի 6-րդ փողոցի 15-րդ տանը: Մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով, խափանման միջոց է ընտրվել գրավը:
1. Գործի դատավարական նախապատմությունը.
2010 թվականի սեպտեմբերի 1-ին ՀՀ ոստիկանության Կենտրոնականի քննչական բաժնի ավագ քննիչ Ա.Մելքոնյանի որոշմամբ ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցագործության հատկանիշներով հարուցվել և վարույթ է ընդունվել թիվ 13144110 քրեական գործը:
2010 թվականի սեպտեմբերի 4-ին ՀՀ ոստիկանության Կենտրոնականի քննչական բաժնի ավագ քննիչ Ա.Մելքոնյանի որոշմամբ թիվ 13144110 քրեական գործով Անդրանիկ Բորիսի Էլոյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով:
2010 թվականի սեպտեմբերի 4-ին ՀՀ ոստիկանության Կենտրոնականի քննչական բաժնի ավագ քննիչ Ա.Մելքոնյանի որոշմամբ թիվ 13144110 քրեական գործով Սամվել Գրիշայի Հովհաննիսյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով:
2011 թվականի հունվարի 10-ին Անդրանիկ Բորիսի Էլոյանի և Սամվել Գրիշայի Հովհաննիսյանի վերաբերյալ քրեական գործը մեղադրական եզրակացությամբ ուղարկվել է Դատարան:
Անդրանիկ Բորիսի Էլոյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով այն արարքի համար, որ նա, 2010 թվականի սեպտեմբերի 1-ին` ժամը 01:30-ի սահմաններում, Երևան քաղաքի Սայաթ- Նովա փողոցում, խմբի կազմում` զուգորդված հասարակական կարգի խախտումը խափանող անձանց դիմադրություն ցուցաբերելով, կատարել է խուլիգանություն: Այսպես` 2010 թվականի օգոստոսի 31-ին Անդանիկ Էլոյանը Կոտայքի մարզի Զովք գյուղում գտնվող իր տանն ընկերոջ` համագյուղացի Սամվել Հովհաննիսյանի հետ ալկոհոլային խմիչքներ գործածելուց հետո որոշել են Երևան քաղաքում գործող «Օպերա» ակումբում ժամանակ անցկացնել և զվարճանալ: Այդ նպատակով 2010 թվականի սեպտեբերի 1-ին` ժամը 01.00-ի սահմաններում, Անդրանիկ Էլոյանը և Սամվել Հովհաննիսյանն այցելել են Երևան քաղաքի Սայաթ-Նովա փողոցի թիվ 1 հասցեում գործող «Օպերա» ակումբ, սակայն ակումբի աշխատակիցը նրանց թույլ չի տվել ակումբ մուտք գործել` պատճառաբանելով, որ կիսավարտիքով ակումբ մուտք գործելն արգելված է: Դրանից վրդովված Անդրանիկ Էլոյանը և Սամվել Հովհաննիսյանը դուրս են եկել փողոց` այդ ընթացքում հայհոյանքներ տալով ակումբում զվարճացող ազգությամբ պարսիկ քաղաքացիների հասցեին: Նույն պահին «Օպերա» ակումբի մոտակայքով անցնող` ինքնությունը չպարզված ազգությամբ պարսիկ քաղաքացիներից մեկը, տիրապետելով հայերենին, լսել է իրենց հասցեին ուղղված հայհոյանքները, ապա մոտեցել է Անդրանիկ Էլոյանին և Սամվել Հովհաննիսյանին ու նրանցից պարզաբանումներ պահանջել: Այդ կապակցությամբ վերջինների և ինքնությունը չպարզված անձնավորությունների միջև վիճաբանություն է սկսվել, որի ընթացքում Անդրանիկ Էլոյանը և Սամվել Հովհաննիսյանի հետ` խմբի կազմում, կոպիտ կերպով խախտելով հասարակական կարգն ու բացահայտ անհարգալից վերաբերմունք դրսևորելով հասարակության նկատմամբ, աղմկել է և հայհոյել, բռնություն գործադրելով` ձեռքերով և ոտքերով ծեծի է ենթարկել ինքնությունը չպարզված անձնավորություններին, որից հետո հասարակական կարգի խախտումը խափանող Սամվել Ասոյանին և Արթուր Հակոբյանին դիմադրություն ցույց տալով` ծեծի են ենթարկել վերջիններին և այդ կերպ, դիտավորյալ գործողություններով, կոպիտ կերպով խախտել են հասարակական կարգը և խաթարել մոտակայքում գործող «Գլամուր» սրճարանի բնականոն աշխատանքը:
Սամվել Գրիշայի Հովհաննիսյանին մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով այն արարքի համար, որ նա, 2010 թվականի սեպտեմբերի 1-ին` ժամը 01.30-ի սահմաններում, Երևան քաղաքի Սայաթ-Նովա փողոցում, խմբի կազմում` զուգորդված հասարակական կարգի խախտումը խափանող անձանց դիմադրություն ցուցաբերելով, կատարել է խուլիգանություն: Այսպես` 2010 թվականի օգոստոսի 31-ին Սամվել Հովհաննիսյանն ընկերոջ` համագյուղացի Անդրանիկ Էլոյանի տանն ալկոհոլային խմիչքներ գործածելուց հետո որոշել են Երևան քաղաքում գործող «Օպերա» ակումբում ժամանակ անցկացնել և զվարճանալ: Այդ նպատակով 2010 թվականի սեպտեբերի 1-ին` ժամը 01:00-ի սահմաններում, Անդրանիկ Էլոյանը և Սամվել Հովհաննիսյանն այցելել են Երևան քաղաքի Սայաթ-Նովա փողոցի թիվ 1 հասցեում գործող «Օպերա» ակումբ, սակայն ակումբի աշխատակիցը նրանց թույլ չի տվել ակումբ մուտք գործել` պատճառաբանելով, որ կիսավարտիքով ակումբ մուտք գործելն արգելված է: Դրանից վրդովված Անդրանիկ Էլոյանը և Սամվել Հովհաննիսյանը դուրս են եկել փողոց` այդ ընթացքում հայհոյանքներ տալով ակումբում զվարճացող ազգությամբ պարսիկ քաղաքացիների հասցեին: Նույն պահին «Օպերա» ակումբի մոտակայքով անցնող` ինքնությունը չպարզված ազգությամբ պարսիկ քաղաքացիներից մեկը, տիրապետելով հայերենին, լսել է իրենց հասցեին ուղղված հայհոյանքները, ապա մոտեցել է Անդրանիկ Էլոյանին և Սամվել Հովհաննիսյանին ու նրանցից պարզաբանումներ պահանջել: Այդ կապակցությամբ վերջինների և ինքնությունը չպարզված անձնավորությունների միջև վիճաբանություն է սկսվել, որի ընթացքում Անդրանիկ Էլոյանը և Սամվել Հովհաննիսյանի հետ` խմբի կազմում, կոպիտ կերպով խախտելով հասարակական կարգն ու բացահայտ անհարգալից վերաբերմունք դրսևորելով հասարակության նկատմամբ, աղմկել է և հայհոյել, բռնություն գործադրելով` ձեռքերով և ոտքերով ծեծի է ենթարկել ինքնությունը չպարզված անձնավորություններին, որից հետո հասարակական կարգի խախտումը խափանող Սամվել Ասոյանին և Արթուր Հակոբյանին դիմադրություն ցույց տալով` ծեծի են ենթարկել վերջիններին և այդ կերպ, դիտավորյալ գործողություններով, կոպիտ կերպով խախտել են հասարակական կարգը և խաթարել մոտակայքում գործող «Գլամուր» սրճարանի բնականոն աշխատանքը:
2.Ապացույցների հետազոտում և գնահատում.
Դատական քննության ընթացքում ամբաստանյալ Անդրանիկ Էլոյանն առաջադրված մեղադրանքում իրեն մեղավոր ճանաչեց մասնակի և ցուցմունք տվեց այն մասին, որ 2010 թվականի սեպտեմբերի 1-ի գիշերը գնացել է «Գլամուր» սրճարան, որտեղ եկել են իր ընկերներ Սամվել Հովհաննիսյանն ու հանգուցյալ Արտակ Աբրահամյանը: Իրենք նախապես պայմանավորված են եղել, սակայն մինչև «Գլամուր» սրճարան գնալն իրենք գնացել են «Օպերա» ակումբի մոտ, որտեղ իրենց ներս չեն թողել, քանի որ ինքն ու Սամվելը եղել են կիսավարտիքներով: Այդ պահին կիսավարտիքով մի քանի պարսիկ մտել են ներս, և ինքն իրենց արգելող հայ աղջկան հարցրել է, թե ինչպես են նրանց ներս թողնում, իսկ նա պատասխանել է, որ պարսկական «փարթի» է: Որպես հայ իրեն վատ է զգացել, սակայն պարսիկներին չի հայհոյել: Դրանից հետո իրենք գնացել են «Գլամուր» սրճարան, որտեղ նստել են Սայաթ-Նովա պողոտայի մայթի կողմից գտնվող առաջին սեղանի մոտ և պատվիրել սուրճ: Այդ ընթացքում սրճարանի մենեջեր Սամվել Ասոյանը մոտեցել է իր ընկեր Սամվելին, և նրանք կանգնած զրուցել են իրենց սեղանի մոտ: Այդ ժամանակ ինքը կարծել է, թե Սամվել Ասոյանը հայհոյել է իր ընկեր Սամվելին, ինչի պատճառով ձեռքով հրել է Սամվել Ասոյանին, սակայն իր ընկեր Սամվելն ասել է, որ Սամվել Ասոյանը չի հայհոյել, այլ պարզապես ասել է, որպեսզի իրենք մի քիչ ցածր խոսեն: Այնուհետև սկսվել է վիճաբանություն, որից հետո մոտեցել է Արթուր Հակոբյանը և շատ կոպիտ արտահայտություն արել: Վիճաբանությունը տևել է մոտ 2 րոպե, որի ընթացքում ինքը, Սամվել Հովհաննիսյանն ու Սամվել Ասոյանը հայհոյանք չեն տվել: Դրանից հետո եկել են ոստիկանները, և իրենց տարել ոստիկանություն: Ոստիկանների գալուց հետո ինքը չի փորձել կրկին հարվածել Սամվել Ասոյանին: Այդ օրն ինքը ոգելից խմիչք օգտագործած չի եղել: Դեպքի օրը տված բացատրությունն ինքը գրել է իր ձեռքով, սակայն այն թելադրվել է հետաքննիչի կողմից: Դատական քննության վերջում ամբաստանյալ Անդրանիկ Էլոյանն առաջադրված մեղադրանքում իրեն լիովին մեղավոր ճանաչեց և զղջած կատարածի համար:
Դատական քննության ընթացքում ամբաստանյալ Սամվել Հովհաննիսյանն առաջադրված մեղադրանքում իրեն մեղավոր չճանաչեց և ցուցմունք տվեց այն մասին, որ 2010 թվականի օգոստոսի 31-ին` ժամը 17:00-ի սահմաններում, իրենց տանն իր ընկերների հետ ոգելից խմիչք է օգտագործել, որից հետո` ժամը 23:00-ի սահմաններում, գնացել են Օպերա` զբոսնելու: Հավանաբար սեպտեմբերի 1-ի կապակցությամբ այդ օրը սովորականից քիչ մարդիկ են եղել դրսում: Զբոսնելու ընթացքում Անդրանիկը զանգահարել է իրեն և, իմանալով, որ իրենք Օպերայում են, եկել է իրենց մոտ: Անդրանիկի գալուց հետո իրենք մի քիչ զբոսնել են, որից հետո որոշել են գնալ դիսկոտեկ: «Օպերա» ակումբում իրենց ներս չեն թողել, քանի որ իրենք եղել են կիսավարտիքներով: Այդ ժամանակ ինքը նկատել է, որ ներսում կիսավարտիքով անձ կա և հարցրել է, թե ինչպես են նրան ներս թողել, իսկ իրենց ոչ: Իրեն պատասխանել են, որ նրանք պարսիկներ են, վարձել են ակումբը և պարսկական «փարթի» կազմակերպել, ինչի պատճառով հայերին ներս չեն թողնում: Իրենք դուրս են եկել և գնացել այդտեղից մոտ 50 մետր հեռավորության վրա գտնվող «Գլամուր» սրճարան: Սրճարանում իրենք խոսել են բարձր, սակայն հայհոյանքներ չեն տվել: Այդ ժամանակ իրենց է մոտեցել Սամվել Ասոյանն ու ասել, որպեսզի ցածր խոսեն: Ինքը նրան ասել է, որ որևէ խնդիր չկա, ցածր կխոսեն, ինչից հետո իր խնդրանքով Սամվելն իրեն բացատրել է զուգարանի գտնվելու տեղը: Մի քանի քայլ գնալուց հետո ինքը նկատել է, որ Անդրանիկն ու Սամվելը քաշքշում են միմյանց: Այդ ժամանակ ինքն Անդրանիկին հարցրել է, թե ինչու է նա քաշքշում Սամվելին, իսկ նա ասել է, որ Սամվելը կարծես հայհոյել է իրեն: Ինքը փորձել է հանգստացնել նրան, երբ եկել է Արթուրը և կոպիտ արտահայտությամբ ասել, որ իրենք հեռանան այդտեղից, ինչից հետո վերջինն ու Անդրանիկը սկսել են քաշքշել միմյանց: Դրանից մեկ րոպե չանցած եկել են ոստիկանները և իրեն, Անդրանիկին ու Արթուրին տարել ոստիկանության Կենտրոնականի բաժին: Քաշքշուկի ընթացում հայհոյանքներ չեն եղել, սակայն Սամվել Ասոյանն ու Արթուր Հակոբյանն ավելի ագրեսիվ են եղել, քան իրենք: Քաշքշուկի ընթացում սրճարանում նստած են եղել երկու աղջիկներ, ինչպես նաև եղել են 2-3 մատուցողներ: Այդ ընթացքում հավաքվել են մարդիկ, սակայն դրա պատճառն ավելի շատ եղել է ոստիկանների գորգոռոցները: Այդ օրն իրենք երկուսով օգտագործել են մոտ 400 գրամ ալկոհոլ, սակայն այդ հանգամանքը միջադեպի վրա որևէ ազդեցություն չի ունեցել: Իրենց մյուս ընկերը միջադեպին չի միջամտել: Դատական քննության վերջում ամբաստանյալ Սամվել Հովհաննիսյանն առաջադրված մեղադրանքում իրեն լիովին մեղավոր ճանաչեց և զղջած կատարածի համար:
Տուժող Սամվել Ասոյանը դատական քննության ընթացքում ցուցմունք տվեց այն մասին, որ աշխատել է «Գլամուր» սրճարանում որպես մենեջեր: 2010 թվականի սեպտեմբերի 1-ին ինքը գտնվել է աշխատանքի վայրում և խոհանոցում գտնվելու ընթացում բարձր ձայն է լսել: Ինքը մոտեցել է սրճարանի բարին, որտեղ մատուցողներն ասել են, որ ինչ-որ անձինք բարձրաձայն խոսում են, ինչի պատճառով կողքի սեղանին նստած հաճախորդները ցանկանում են հեռանալ: Այդ ժամանակ ինքը մոտեցել է Սայաթ-Նովա պողոտայի ուղղությամբ` մուտքից դեպի աջ դրված սեղանին, որտեղ նստած են եղել Սամվել Հովհաննիսյանը, Անդրանիկ Էլոյանը և ևս մեկ երիտասարդ: Նրանք բարձր ձայնով ինչ-որ բան են քննարկել, և ինքը ցանկացել է նրանց զգուշացնել, որպեսզի նրանք ցածր խոսեն կամ թողնեն հեռանան: Այդ նպատակով ինքը Սամվելի հետ դուրս է եկել մուտքից և Սայաթ-Նովա պողոտայի մայթի վրա նրան ասել, որպեսզի նրանք ցածր խոսեն կամ վճարեն հաշիվը և գնան: Սամվելն ասել է, որ որևէ խնդիր չկա, ինչից հետո իրենք ցանկացել են ներս մտնել, սակայն այդ պահին Անդրանիկը հարվածել է իրեն: Այդ խառնաշփոթի ընթացքում Սամվելն իրեն քաշել է մի կողմ, իսկ ինքը պաշտպանվել է և նրան հրել մի կողմ: Այդ ընթացում ընկել է իր բջջային հեռախոսը, և այն բարձրացնելուց հետո ինքը նկատել է Արթուրին, ով փորձել է բաժանել և մի կողմ տանել Անդրանիկին: Այդ ընթացքում ինքը հայհոյանքներ չի լսել: Վիճաբանությունը տևել է մոտ 2 րոպե: Այդ ժամանակ եկել են ոստիկանները և բռնել տղաներին: Ոստիկանները սկզբում բռնել են նաև իրեն, սակայն հետո բաց են թողել, ինչից հետո ինքը դիմել է փախուստի: Դեպքից մոտ 25 րոպե հետո զանգահարել են իրեն և ասել, որ ներկայանա ոստիկանության Կենտրոնականի բաժին: «Գլամուր» սրճարանի խոհանոցից մոտ 25 մետր հեռավորության վրա է գտնվում «Օպերա» ակումբը: Դեպքի օրը «Գլամուր» սրճարանի շրջակայքում եղել են շատ անցորդներ, այդ թվում` բազմաթիվ պարսիկներ, սակայն սրճարանում որևէ պարսիկ չի եղել: Ինքը սրճարանի ետնամասում պարսիկների հետ կապված որևէ վիճաբանություն չի տեսել, հայհոյանքներ չի լսել: Ինքը չի կարող ասել, թե ինչ է եղել «Օպերա» ակումբի մոտ: Իր նախաքննական և դատաքննական ցուցմունքների տարբերությունը պայմանավորված է նրանով, որ ոստիկանությունում ինքը եղել է շփոթված և չի գիտակցել, թե ինչ ցուցմունք է գրում:
Տուժող Սամվել Ասոյանը նախնական քննության ընթացքում` 2010 թվականի սեպտեմբերի 2-ին, ցուցմունք է տվել այն մասին, որ 2010 թվականի օգոստոսի 2-ից աշխատել է Երևան քաղաքի Սայաթ-Նովա 1/1 հասցեում գործող «Գլամուր» բացօթյա սրճարանում որպես մենեջեր: Իր աշխատանքային պարտականությունների մեջ մտել է մատուցողների աշխատանքին և սրճարանի կարգ ու կանոնին հետևելը: 2010 թվականի սեպտեմբերի 1-ին` ժամը 01:00-ից 01:30-ն ընկած ժամանակահատվածում, սրճարանի հետնամասից` դեպի «Օպերա» ակումբ տանող ճանապարհից աղմուկ է լսել և իրեն թվացել է, որ վիճաբանություն է տեղի ունենում: Մի քանի վայրկյան անց աղմուկը վերածվել է բարձրաձայն հայհոյանքների: Քանի որ սրճարանում եղել են բավականին շատ հաճախորդներ և այդ ամենը պարզ լսելի է եղել հաճախորդներին, ինքը, ցանկանալով պարզել, թե ինչ է կատարվում, գնացել է սրճարանի ետնամաս, որտեղ նկատել է մի խումբ երիտասարդների, ովքեր, ըստ նրանց տեսքի, եղել են պարսիկ կամ սփյուռքահայեր և վիճել են երկու հայ երիտասարդների` Սամվել Հովհաննիսյանի և Անդրանիկ Էլոյանի հետ, ովքեր եղել են կիսավարտիքով: Սամվելը և Անդրանիկը փոխադարձ հարվածներ են հասցրել օտարերկրացիներին և հայհոյել: Ինքը մոտեցել է նրանց և խնդրել չհայհոյել ու լքել տարածքը` ասելով, որ նրանք խանգարում են սրճարանի հաճախորդների հանգիստը և իրենց աշխատանքը: Սակայն վերջինները ոչ միայն չեն դադարեցրել իրենց գործողությունները, այլև սկսել են վիճել իր հետ` ասելով. «էս պարսիկներին ոնցա լինում ամեն տեղ թողում են, մեզ էս վիճակով չեն թողում ոչ մի տեղ»: Դրանից հետո նրանք կրկին հայհոյանք են տվել, իսկ ինքը կրկին նրանց զգուշացրել է, որ չհայհոյեն և չխանգարեն ուրիշների հանգիստը: Վերջիններն իրեն հրել են մի կողմ, և իրենց միջև քաշքշուկ է սկսվել, որի ընթացքում Սամվելը կամ Անդրանիկը մի քանի անգամ բռունցքներով հարվածել են իր կրծքավանդակի շրջանին և ուսերին, որին ի պատասխան` ինքը բռունցքներով հարվածել է իրեն հարվածողին: Այդ ընթացքում իրենց մոտեցել է սրճարանի պահակը` Արթուր Հակոբյանը, և փորձել հանգստացնել Սամվելին և Անդրանիկին, սակայն վերջինները բռունցքներով մի քանի անգամ հարվածել են նաև Արթուրին: Այդ պահին իրենց են մոտեցել ոստիկանության աշխատակիցները, և ինքը, տեսնելով նրանց և օգտվելով հավաքված բազմության հանգամանքից, կարողացել է աննկատ հեռանալ, քանի որ չի ցանկացել ավելորդ անախորժություն ստեղծել ինչպես Սամվելի ու Անդրանիկի, այնպես էլ իրենց համար: Սակայն մի քանի րոպե անց սրճարանի աշխատողներից մեկը զանգահարել է իրեն և հայտնել, որ Արթուրին և մյուս երկու տղաներին ոստիկանները տարել են: Ինքն անմիջապես ինքնակամ գնացել և ներկայացավել է ոստիկանության Կենտրոնականի բաժին: Վիճաբանությունն արագ զարգանալով` անսպասելիորեն վերածվել է ծեծկռտուքի, և ինքը չի հասցրել հասկանալ, թե որ պահին են անհետացել օտարերկրացիները: Ինքը Սամվելին կամ Անդրանիկին հարվածել և հրել է այն բանից հետո, երբ վերջիններն առաջինն են հրել և հարվածել, ապա տվել սեռական բնույթի անհասցե հայհոյանքներ, իսկ ինքը նրանց չի հայհոյել: Հավաքված բազմության մեջ եղել են նաև իրենց սրճարանի աշխատակիցներ, իսկ վիճաբանության պատճառով խախտվել է իրենց սրճարանի բնականոն աշխատանքը, քանի որ մատուցողները չեն կարողացել սպասարկել հաճախորդներին: Ընդ որում` վերջինների մի մասը հավաքվել է իրենց շուրջը և դիտել վիճաբանությունը: Վիճաբանությունը տևել է 8-10 րոպե: Ինքը տեղյակ չէ, թե ինչ է տեղի ունեցել «Օպերա» ակումբում:
Տուժող Արթուր Հակոբյանը դատական քննության ընթացքում ցուցմունք տվեց այն մասին, որ 2010 թվականի սեպտեմբերի 1-ին` ժամը 24:00-ից 24:30-ի սահմաններում, «Գլամուր» սրճարանի ետնամասից լսվել են գորգոռոցներ և հայհոյանքներ, որոնք խանգարել են հաճախորդներին: Ինքը գնացել է այդտեղ և տեսել, որ Անդրանիկը քաշքշում է իրենց սրճարանի մենեջեր Սամվել Ասոյանին, իսկ նրանց կողքին եղել են հավաքված այլ անձինք: Ինքն ասել է, որպեսզի նրանք վերջ տան, քանի որ խանգարել են հաճախորդներին: Երբ Անդրանիկը հարվածել է մենեջեր Սամվելին, ինքը կոպիտ կերպով ասել է, որ նրանք հեռանան այդտեղից: Այդ ժամանակ Անդրանիկը շրջվել է և հարվածել իրեն, իսկ Սամվել Հովհաննիսյանը մի կողմ է քաշել Սամվել Ասոյանին և ասել, որ վերջ տան: Այդ պահին եկել են ոստիկաններն և իրենց տարել ոստիկանություն: Վիճաբանությունը տևել է 3-4 րոպե, որի ընթացքում հնչել են հայհոյանքներ, սակայն դրանք տվել է կամ Անդրանիկ Էլոյանը, կամ Սամվել Հովհաննիսյանը, կամ էլ երկուսով միասին, իսկ Սամվել Ասոյանը հայհոյանք չի տվել: Նախնական քննության ընթացքում իր տված ցուցունքը համապատասխանում է իրականությանը:
Տուժող Արթուր Հակոբյանը նախնական քննության ընթացքում ցուցմունք է տվել այն մասին, որ 2010 թվականի օգոստոսի 2-ից աշխատել է Երևան քաղաքի Սայաթ-Նովա 1/1 հասցեում գործող «Գլամուր» բացօթյա սրճարանում որպես պահակ: Իր աշխատանքային պարտականությունների մեջ է մտել սրճարանի տարածքի հսկումը և սրճարանում կարգուկանոնի պահպանումը: 2010 թվականի սեպտեմբերի 1-ին` ժամը 01:00-ից մինչև 01:30-ն ընկած ժամանակահատվածում, ինքը զբաղված է եղել իր առօրյա աշխատանքով, երբ հանկարծակի սրճարանի ետնամասից բարձր հայհոյանքի ձայներ է լսել, որոնք լսելի են եղել նաև այդ պահին սրճարանում գտնվող հաճախորդներին: Ինքը, ցանկանալով պարզել, թե ինչ է կատարվում, միանգամից գնացել է սրճարանի ետնամաս, որտեղ նկատել է կիսավարտիքով երկու տղաների` Սամվել Հովհաննիսյանին և Անդրանիկ Էլոյանին: Սամվել Հովհաննիսյանն ու Անդրանիկ Էլոյանը բարձրաձայն հայհոյել են մի խումբ օտարերկրացիների և իրենց մենեջեր Սամվել Ասոյանին: Սամվել Հովհաննիսյանի, Անդրանիկ Էլոյանի ու Սամվել Ասոյանի միջև քաշքշուկ է եղել: Ինքը Սամվել Հովհաննիսյանին և Անդրանիկ Էլոյանին հանգստացնելու համար մոտեցել է նրանց, սակայն այդ ընթացքում նրանցից մեկը մի քանի անգամ բռունցքով հարվածել է Սամվել Ասոյանի կրծքավանդակին, իսկ մյուսը հրել է նրան: Ինքն անմիջապես մոտեցել է նրանց և ասել, որպեսզի հանգստանան, չհայհոյեն և չկռվեն, քանի որ եղել են նստած մարդիկ: Սակայն Սամվել Հովհաննիսյանը և Անդրանիկ Էլոյանն իրեն և նրանց կարգի հրավիրող Սամվել Ասոյանին չեն լսել և շարունակել են բարձրաձայն տալ սեռական բնույթի հայհոյանքներ, ինչպես նաև մի քանի անգամ բռունցքով հարվածել են իրեն, իսկ ինքը պաշտպանվելու համար մեկ-երկու անգամ հարվածել է նրանց: Այդ ժամանակ իրենց են մոտեցել ոստիկանության աշխատակիցները և բերման ենթարկել ոստիկանության Կենտրոնականի բաժին: Վիճաբանությունը տևել է մոտ հինգ րոպե` սկսած իր մոտենալու պահից: Վիճաբանությանն ականատես են եղել ինչպես պատահական անցորդներ, այնպես էլ սրճարանի հաճախորդներ, որոնցից մի քանիսին ինքն անձամբ տեսել է վիճաբանողներին մոտենալիս: Երբ այդ անձինք գնացել են վիճաբանությունը դիտելու, մի քանի մատուցող, փաստացի թողելով իրենց գործը, նույնպես դիտել են վիճաբանությունը, սակայն նրանցից որևէ մեկը վիճաբանությանը չի միջամտել:
Վկա Գրիգոր Միրոյանը դատական քննության ընթացքում ցուցմունք տվեց այն մասին, որ 2010 թվականի սեպտեմբերի 1-ին Նարեկ Սահակյանի հետ ծառայություն է իրականացրել Սայաթ-Նովա պողոտայում: Ժամը 01:00-ի սահմաններում «Գլամուր» սրճարանից մոտ 10 մետր հեռավորության վրա իրենք լսել են վիճաբանության ձայներ, որի պատճառով մոտեցել են և տեսել, որ Սայաթ-Նովա պողոտայի մայթի մոտ Անդրանիկ Էլոյանը և նրա ընկերը վիճում են սրճարանի երկու աշխատողների հետ և հարվածում միմյանց: Ինքը բռնել է Անդրանիկ Էլոյանին, իսկ Նարեկ Սահակյանը Անդրանիկի ընկերոջն ու սրճարանի աշխատողին, և նրանց բերման ենթարկել ոստիկանություն: Երկու կողմն էլ եղել են ագրեսիվ: Այդ ժամանակ եղել են հավաքված մարդիկ` անցորդներ և սրճարանի հաճախորդներ, որոնց ուշադրությունը գրավել էր այդ գործողությունները:
Վկա Գրիգոր Միրոյանը նախնական քննության ընթացքում ցուցմունք է տվել այն մասին, որ ծառայում է ՀՀ ոստիկանության ՊՊԾ գնդի 3-րդ հատուկ գումարտակի 1-ին վաշտի 1-ին դասակում որպես ոստիկան: 2010 թվականի սեպտեմբերի 1-ին նույն վաշտի ոստիկան Նարեկ Սահակյանի հետ շրջիկ ծառայություն են իրականացրել 0327 երթուղում: Ժամը 01:30-ի սահմաններում, երբ հասել են Սայաթ-Նովա 1/1 հասցեի մոտակայք, «Գլամուր» սրճարանի մոտից լսել են աղմուկ, որը նման է եղել վիճաբանության ձայների, ինչում համոզվել են, երբ լսել են բարձրաձայն հնչող սեռական բնույթի հայհոյանքներ: Իրենք անմիջապես գնացել են «Գլամուր» սրճարանի ուղղությամբ, ետևի մուտքից մտել «Գլամուր» սրճարան և նկատել միմյանց հետ վիճաբանող Սամվել Հովհաննիսյանին, Անդրանիկ Էլոյանին, Արթուր Հակոբյանին և Սամվել Ասոյանին: Սամվել Հովհաննիսյանը և Անդրանիկ Էլոյանն ակտիվորեն բռունցքներով և ոտքերով հարվածել են Արթուր Հակոբյանին և Սամվել Ասոյանին, ովքեր իրենց հերթին փոխադարձ հարվածներ են հասցրել նրանց: Վիճաբանության արդյունքում խախտվել է հասարակական կարգը, ինչն արտահայտվել է նրանում, որ ստվար բազմություն է հավաքվել, որոնց մեջ եղել են անցորդներ, սպասարկող անձնակազմից և հաճախորդներ, ովքեր որևէ կերպ չեն միջամտել վիճաբանությանը: Միջադեպի ժամանակ հնչել են սեռական բնույթի հայհոյանքներ, հիմնականում Անդրանիկ Էլոյանի և Սամվել Հովհաննիսյանի կողմից, ովքեր եղել են առավել ակտիվ: Այդ ժամանակ Նարեկ Սահակյանը բռնել է Սամվել Հովհաննիսյանին և Արթուր Հակոբյանին, ինքը` Անդրանիկ Էլոյանին, իսկ Սամվել Ասոյանն այդ ընթացքում կարողցել է աննկատ հեռանալ իրենցից: Անդրանիկ Էլոյանին բռնելուց հետո նա չի հանգստացել, շարունակել է բարձրաձայն տալ սեռական բնույթի հայհոյանքներ և անընդհատ փորձել է դուրս պրծնել իր ձեռքից, սակայն դա նրան չի հաջողվել: Վիճաբանությունն ընդհանուր առմամբ տևել է 4 րոպեից ավելի, սակայն կոնկրետ չի կարող ասել, թե որքան: Ինքը տեղյակ չէ, թե ինչ պատճառով է սկսվել վիճաբանությունը:
Վկա Նարեկ Սահակյանը դատական քննության ընթացքում ցուցմունք տվեց այն մասին, որ աշխատում է ՀՀ ոստիկանության Երևան քաղաքի վարչության պահակապարեկային ծառայության 3-րդ հատուկ ստորաբաժանումում: Դեպքի օրն ինքը և նույն գումարտակի ոստիկան Գրիգոր Միրոյանը ծառայություն են իրականացրել թիվ 0327 երթուղում, այդ թվում` Սայաթ-Նովա պողոտայում: Բավական ուշ ժամի իրենք լսել են ձայներ և արագ գնացել են «Գլամուր» բացօթյա սրճարանի մայթի մոտ, որտեղ չորս երիտասարդներ, այդ թվում` Սամվել Հովհաննիսյանը, Անդրանիկ Էլոյանը և Արթուր Հակոբյանը քաշքշել ու հարվածել են միմյանց: Ինքը լսել է նաև սեռական բնույթի հայհոյանքներ: Այնտեղ եղել են նաև այլ մարդիկ, ովքեր չեն վիճաբանել: Իրենք բաժանել են նրանց և բերման ենթարկել ոստիկանության մոտակա բաժին: Նախնական քննության ընթացքում իր տված ցուցմունքը համապատասխանում է իրականությանը:
Վկա Նարեկ Սահակյանը նախնական քննության ընթացքում ցուցմունք է տվել այն մասին, որ 2009 թվականից ծառայում է ՀՀ ոստիկանության ՊՊԾ գնդի 3-րդ հատուկ գումարտակում: 2010 թվականի սեպտեմբերի 1-ին նույն վաշտի ոստիկան Գրիգոր Միրոյանի հետ շրջիկ ծառայություն են իրականացրել թիվ 0327 երթուղում: Ժամը 01:30-ի սահմաններում, երբ գտնվել են Երևան քաղաքի Սայաթ-Նովա պողոտայում գտնվող «Գլամուր» սրճարանի մոտակայքում, լսել են վիճաբանության բարձր ձայներ, որոնք ուղեկցվել են սեռական բնույթի բարձրաձայն հայհոյանքներով: Իրենք ետևի մասից անմիջապես մոտեցել են սրճարանին և նկատել միմյանց հետ վիճաբանող չորս անձանց` Սամվել Հովհաննիսյանին, Անդրանիկ Էլոյանին, Արթուր Հակոբյանին և Սամվել Ասոյանին: Վիճաբանության ընթացքում նրանք փոխադարձ հարվածել են միմյանց, որի ընթացքում հնչել են սեռական բնույթի բարձրաձայն հայհոյանքներ, որոնք լսելի են եղել «Գլամուր», «Մաեստրո» և «Գրեմմի» սրճարանների հաճախորդներին ու սպասարկող անձնակազմին: Բացի այդ, վիճաբանության ընթացքում հավաքվել է ստվար բազմություն և դիտել վիճաբանությունը, որոնց մեջ եղել են սրճարանների հաճախորդներ, սպասարկող անձնակազմի անձինք և պատահական անցորդներ: Վիճաբանության ընթացքում առավել ակտիվ և ագրեսիվ են եղել Սամվել Հովհաննիսյանն ու Անդրանիկ Էլոյանը, ովքեր բռունցքներով և ոտքերով հարվածել են Արթուր Հակոբյանին և Սամվել Ասոյանին` հարվածների հետ տալով սեռական բնույթի բարձրաձայն հայհոյանքներ: Վերջիններն իրենց հերթին բռունցքներով պատասխան հարվածներ են հասցրել Սամվել Հովհաննիսյանին ու Անդրանիկ Էլոյանին: Իրենք Սամվել Հովհաննիսյանին, Անդրանիկ Էլոյանին և Արթուր Հակոբյանին տարել են ոստիկանության Կենտրոնականի բաժին, իսկ Սամվել Ասոյանը կարողացել է խույս տալ իրենցից, սակայն հետո ինքնակամ ներկայացել է ոստիկանություն:
Վկա Նատալյա Խաչատրյանը դատական քննության ընթացքում ցուցմունք տվեց այն մասին, որ ինքն աշխատել է «Գլամուր» սրճարանում: Դեպքի օրն ինքը եղել է աշխատանքի, որի ընթացքում աղմուկ է լսել և, շրջվելով այդ կողմ, տեսել է, որ ամբաստանյալները և իրենց աշխատակից Սամվելն ու Արթուրը քաշքշում են միմյանց և բարձր ձայնով խոսում: Ամբաստանյալները եղել են ագրեսիվ: Ինքը հայհոյանքներ չի լսել: Այդ ժամանակ սրճարանում հաճախորդներ են եղել, որոնց ուշադրությունը շեղվել է դեպքի այդ կողմ:
Վկա Նատալյա Խաչատրյանը նախնական քննության ընթացքում ցուցմունք է տվել այն մասին, որ աշխատում է «Գլամուր» սրճարանի բացօթյա հատվածում որպես մատուցողուհի: 2010 թվականի սեպտեմբերի 1-ին ինքը զբաղված է եղել իր աշխատանքով, երբ սրճարանի ետնամասից լսել են վիճաբանության և հայհոյանքների ձայներ: Այնուհետև գնացել է այդ ձայների ուղղությամբ և նկատել, որ երկու անծանոթ տղաներ քաշքշում և ձեռքերով հարվածներ են հասցնում սրճարանի մենեջեր Սամվելին և պահակին: Այդ ժամանակ սրճարանում շատ հաճախորդներ են եղել և նրանց լսելի են եղել այդ հայհոյանքները: Այնուհետև եկել են ոստիկանները և նրանց տարել ոստիկանություն: Վիճաբանությանը տևել է 8-10 րոպե:
Վկա Արման Գրիգորյանը դատական քննության ընթացքում ցուցմունք տվեց այն մասին, որ ինքն աշխատել է «Գլամուր» սրճարանում որպես մատուցող: Դեպքի օրն ինքը լսել է վիճաբանության ձայներ, այնուհետև եկել են ոստիկանները և դադարեցրել վիճաբանությունը: Այդ ժամանակ սրճարանում հաճախորդներ եղել են, որոնք նույնպես նկատել են այդ վիճաբանությունը: Այդ ժամանակ ցածր ձայնով հնչել են հայհոյանքներ:
Վկա Արման Գրիգորյանը նախնական քննության ընթացքում ցուցմունք է տվել այն մասին, որ ինքն աշխատել է «Գլամուր» սրճարանում: 2010 թվականի սեպտեմբերի 1-ին ինքը եղել է սրճարանում և կատարել է իր աշխատանքային պարտականությունները, երբ հանկարծակի սրճարանի ետնամասից վիճաբանության և հայհոյանքի ձայներ են լսվել: Ինքը գնացել է այդ ձայների ուղությամբ և տեսել, որ երկու անծանոթ տղաներ քաշքշում և ձեռքերով հարվածում են սրճարանի մենեջերին` Սամվելին և պահակին` Արթուրին: Այդ ժամանակ սրճարանում շատ հաճախորդներ են եղել և այդ հայհոյանքները լսելի է եղել նաև նրանց: Այնուհետև եկել են ոստիկանները և վիճաբանող տղաներին տարել ոստիկանություն: Այդ վիճաբանությունը տևել է 8-10 րոպե: Միջադեպի մասնակիցներից յուրաքանչյուրի գործողությունները չի նկատել, միայն կարող է նշել, որ երկու անծանոթ տղաներն անընդհատ հայհոյել են և հարվածներ են հասցրել ինչպես սրճարանի մենեջերին, այնպես էլ պահակին, ովքեր ամեն կերպ փորձել են դադարեցնել վիճաբանությունը:
Վկա Նվեր Բաղդասարյանը դատական քննության ընթացքում ցուցմունք տվեց այն մասին, որ ինքը ոստիկան է և ծառայություն է իրականացնում «Օպերա» ակումբում: Դեպքի օրն ամբաստանյալները եկել են «Օպերա» ակումբ, այնուհետև բորբոքված, հայհոյելով դուրս են եկել ակումբից, ինչի պատճառով ինքը նրանց զգուշացրել է, որ չհայհոյեն: Այդ օրն «Օպերա» ակումբում պարսկական երեկո է եղել և ակումբի շրջակայքում շատ պարսիկներ են եղել:
Վկա Նվեր Բաղդասարյանը նախնական քննության ընթացքում ցուցմունք է տվել այն մասին, որ ծառայում է ՀՀ ոստիկանությունում: 2010 թվականի սեպտեմբերի 1-ին ոստիկանի համազգեստով ծառայություն է իրականացրել «Օպերա» ակումբում: Այդ օրը` ժամը 01:30-ի սահմաններում, ակումբ են եկել երկու հայ երիտասարդներ, ովքեր եղել են կիսավարտիքներով: Նրանք մոտեցել են ակումբի աշխատակից Լուիզա Շահբազյանին և ցանկացել տոմս գնել, սակայն Լուիզան հրաժարվել է նրանց տոմս վաճառել` պատճառաբանելով, որ նրանց հագուստները պատշաճ չեն: Այդ երկու երիտասարդները սկսել են մի փոքր կոպիտ ձևով ասել, թե ինչպես է, որ պարսիկներին թույլ են տալիս, իսկ իրենց ոչ: Այդ ժամանակ ինքը միջամտել է և խնդրել նրանց դուրս գալ: Նրանք դուրս են եկել ակումբից և դրսում սկսել սեռական բնույթի հայհոյանքներ տալ պարսիկների հասցեին:
Այլ փաստաթուղթն ապացույց ճանաչելու մասին 2010 թվականի դեկտեմբերի 25-ի որոշումների համաձայն` «Շտապօգնություն» ՊՓԲ ընկերության կողմից կազմված թիվ 102501 արձանագրությունը և Անդրանիկ Բորիսի Էլոյանի 2010 թվականի սեպտեմբերի 1-ի բացատրությունը ճանաչվել են ապացույց:
Բացատրություն վերցնելու մասին 2010 թվականի սեպտեմբերի 1-ի արձանագրության համաձայն` Անդրանիկ Էլոյանը հայտնել է, որ 2010 թվականի օգոստոսի 31-ին տանն ընկերոջ` Սամվել Հովհաննիսյանի հետ ոգելից խմիչք է օգտագործել: Ժամը 01:30-ի սահմաններում իրենք գնացել են Երևան քաղաքի Ազատության հրապարակում գտնվող «Օպերա» ակումբ: Ինքն ու Սամվելը եղել են կիսավարտիքով, ինչի պատճառով «Օպերա» ակումբի աշխատակցուհին իրենց ներս չի թողել: Իրենք այդ աշխատակցուհուն հարցրել են, թե ինչու պարսիկներին թողնում են, իսկ իրենց ոչ: Իրենք սկսել են վիճաբանել այդ աղջկա հետ, և իրենց ձայնը լսել են քիչ այն կողմ գտնվող պարսիկները: Նրանցից մեկը հասկացել է հայերեն, վիրավորվել իրենց խոսքերից և 3-4 անձանց հետ սկսել է վիճաբանել իրենց հետ: Այդ ընթացքում իրենք և պարսիկները բարձրաձայն բղավել են և քաշքշել միմյանց: Ինքը հարվածել է պարսիկին, որից հետո միջամտել են «Օպերա» ակումբի և մոտակա սրճարանի աշխատակիցները և փորձել բաժանել իրենց: Միջադեպի ժամանակ հավաքվել են մոտ 10 քաղաքացիներ: Ինքը վիճաբանել է պարսիկներից մեկի հետ, որի ընթացում փոխադարձ հարվածել են միմյանց: Սրճարանի աշխատակիցներն ասել են, որպեսզի իրենք վերջացնեն, սակայն իրենք շարունակել են վիճաբանությունը: Իրենք հայհոյանքներ չեն տվել, սակայն բարձրաձայն գորգոռացել են: Այդ ժամանակ եկել են ոստիկանության աշխատակիցները և իրենց բերման ենթարկել ոստիկանություն, իսկ պարսիկները դիմել են փախուստի: Ինքը չի նկատել, թե իր ընկերն ում հետ է վիճել, քանի որ այնտեղ եղել են 10-15 անձինք: Այդ պարսիկներին ինքը չի ճանաչել և տեսել է առաջին անգամ: Միջադեպը տևել է մոտ 5 րոպե, որի ժամանակ իրենք վիճաբանել և գորգոռացել են պարսիկների հետ:
Սթափության վիճակի զննության թիվ 102501 արձանագրության համաձայն` 2010 թվականի սեպտեմբերի 1-ին` ժամը 03:55-ին, կատարված զննությամբ Սամվել Գրիշայի Հովհաննիսյանը գտնվել է երկրորդ աստիճանի հարբածության վիճակում:
Սթափության վիճակի զննության թիվ 102502 արձանագրության համաձայն` 2010 թվականի սեպտեմբերի 1-ին` ժամը 04:00-ին, կատարված զննությամբ Անդրանիկ Բորիսի Էլոյանը գտնվել է սթափ վիճակում:
Կոտայքի մարզի Զովք համայնքի ղեկավարի կողմից տրված բնութագրերի համաձայն` Անդրանիկ Բորիսի Էլոյանը և Սամվել Գրիշայի Հովհաննիսյանը բնութագրվում են դրականորեն:
ՀՀ ՊՆ թիվ 88865 զորամասի հրամանատարի կողմից 2008 թվականի հունիսի 26-ին տրված տեղեկանքի համաձայն` Անդրանիկ Բորիսի Էլոյանը ճանաչվել է ոչ պիտանի զինվորական ծառայությանը:
ՀՀ առողջապահության նախարարությանը կից ամբուլատոր դատահոգեբուժական փորձաքննությունների հանձնաժողովի 2010 թվականի դեկտեմբերի 9-ի թիվ 405/10 եզրակացության համաձայն` Անդրանիկ Բորիսի Էլոյանը որևէ հոգեկան հիվանդությամբ չի տառապել և չի տառապում, նրա մոտ հայտնաբերվում են բնավորության փսիխոսպատիկ գծեր: Որպես հոգեկան հիվանդությամբ չտառապող անձնավորություն փորձաքննվողը կարող է հաշիվ տալ իրեն իր գործողությունների համար և ղեկավարել դրանք, ինչպես իրավախախտումը կատարելու պահին, այնպես էլ ներկայում: Ուստի Անդրանիկ Բորիսի Էլոյանին իրեն մեղսագրվող արարքի նկատմամբ հարկ է ճանաչել մեղսունակ: Իր ներկա հոգեկան վիճակով նա կարող է մասնակցել դատաքննչական գործողություններին:
Ձերբակալման 2010 թվականի սեպտեմբերի 1-ի արձանագրության համաձայն` 2010 թվականի սեպտեմբերի 1-ին` ժամը 20:00-ին, Անդրանիկ Բորիսի Էլոյանը ձերբակալվել է:
Ձերբակալման 2010 թվականի սեպտեմբերի 1-ի արձանագրության համաձայն` 2010 թվականի սեպտեմբերի 1-ին` ժամը 21:00-ին, Սամվել Գրիշայի Հովհաննիսյանը ձերբակալվել է:
ՀՀ ոստիկանության ինֆորմացիոն կենտրոնի պահանջագրի համաձայն` Անդրանիկ Բորիսի Էլոյանը նախկինում դատապարտված չի եղել:
ՀՀ ոստիկանության ինֆորմացիոն կենտրոնի պահանջագրի համաձայն` Սամվել Գրիշայի Հովհաննիսյանը նախկինում դատապարտված չի եղել:
Խափանման միջոց կալանավորում կիրառելու մասին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 2010 թվականի սեպտեմբերի 4-ի որոշման համաձայն` մեղադրյալ Անդրանիկ Բորիսի Էլոյանի նկատմամբ որպես խափանման միջոց է ընտրվել կալանավորումը: Միաժամանակ մեղադրյալ Անդրանիկ Բորիսի Էլոյանի նկատմամբ որպես կալանավորման այլընտրանքային խափանման միջոց կիրառվել է գրավը` 500.000 ՀՀ դրամի չափով:
Խափանման միջոց կալանավորում կիրառելու մասին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 2010 թվականի սեպտեմբերի 4-ի որոշման համաձայն` մեղադրյալ Սամվել Գրիշայի Հովհաննիսյանի նկատմամբ որպես խափանման միջոց է ընտրվել կալանավորումը: Միաժամանակ մեղադրյալ Սամվել Գրիշայի Հովհաննիսյանի նկատմամբ որպես կալանավորման այլընտրանքային խափանման միջոց կիրառվել է գրավը` 500.000 ՀՀ դրամի չափով:
Մեղադրյալին կալանքից ազատելու մասին 2010 թվականի սեպտեմբերի 4-ի որոշման համաձայն` մեղադրյալ Անդրանիկ Բորիսի Էլոյանն ազատվել է կալանքից:
Մեղադրյալին կալանքից ազատելու մասին 2010 թվականի սեպտեմբերի 4-ի որոշման համաձայն` մեղադրյալ Սամվել Գրիշայի Հովհաննիսյանն ազատվել է կալանքից:
3. Դատարանի իրավական վերլուծությունները.
Վերը նշված ապացույցները վերլուծելու և համադրելու արդյունքում Դատարանը գալիս է այն եզրահանգման, որ Անդրանիկ Բորիսի Էլոյանը, Սամվել Գրիշայի Հովհաննիսյանի հետ, 2010 թվականի սեպտեմբերի 1-ին` ժամը 01:00-ից 01:30-ի սահմաններում, Երևան քաղաքի Սայաթ-Նովա 1/1 հասցեում գործող «Գլամուր» սրճարանի հարևանությամբ գտնվող «Օպերա» ակումբի մոտ, հայհոյել և հարվածել է գործով չպարզված անձանց, որից հետո հարվածել է Սամվել Ասոյանին և Արթուր Հակոբյանին, ովքեր փորձել են խափանել նրանց գործողությունները: Այսինքն` Անդրանիկ Բորիսի Էլոյանը, Սամվել Գրիշայի Հովհաննիսյանի հետ, հասարակության նկատմամբ բացահայտ անհարգալից վերաբերմունք դրսևորելով, դիտավորությամբ կոպիտ կերպով խախտել է հասարակական կարգը, որը զուգորդվել է գործով չպարզված անձանց նկատմամբ բռնություն գործադրելով և հասարակական կարգի խախտումը խափանող անձանց դիմադրություն ցույց տալով, ինչը համապատասխանում է ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերի հատկանիշներին:
Ապացուցված է Անդրանիկ Բորիսի Էլոյանի մեղավորությունը ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով նախատեսված հանցանքը կատարելու մեջ:
Անդրանիկ Էլոյանի անձը դրականորեն բնութագրող հանգամանքներ են առաջադրված մեղադրանքում իրեն մեղավոր ճանաչելը և կատարածի համար զղջալը:
Դատարանը գտնում է, որ Անդրանիկ Էլոյանի պատասխանատվությունն ու պատիժը մեղմացնող հանգամանքներ պետք է դիտել նախկինում արատավորված` դատապարտված չլինելը, դրականորեն բնութագրվելը և վատառողջ լինելը:
Դատարանը միաժամանակ արձանագրում է, որ սույն գործում Անդրանիկ Էլոյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Անդրանիկ Էլոյանը ենթակա է քրեական պատասխանատվության և պատժի:
Դատարանը, հաշվի առնելով Անդրանիկ Էլոյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պատիժ պետք է նշանակել տուգանքի ձևով:
ՀՀ քրեական օրենսգրքի 69-րդ հոդվածի 5-րդ մասի համաձայն` մինչև դատական քննությունը կալանքի տակ գտնվող անձի նկատմամբ տուգանքի ձևով պատիժ նշանակելիս դատարանը, հաշվի առնելով կալանքի տակ պահելու ժամկետը, մեղմացնում է նշանակված պատիժը կամ լրիվ ազատում է պատիժը կրելուց, իսկ ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից: Դատարանը, նկատի ունենալով, որ սույն գործով ամբաստանյալ Անդրանիկ Էլոյանը 2010 թվականի սեպտեմբերի 1-ից 4-ը գտնվել է կալանքի տակ, գտնում է, որ նրա նկատմամբ տուգանքի ձևով նշանակվող պատժի չափը պետք է մեղմացնել:
Դատարանը գտնում է, որ Անդրանիկ Էլոյանի նկատմամբ ընտրված խափանման միջոցը` գրավը, պետք է թողնել անփոփոխ` մինչև դատավճռի օրինական ուժի մեջ մտնելը։
Վերը նշված ապացույցները վերլուծելու և համադրելու արդյունքում Դատարանը գալիս է այն եզրահանգման, որ Սամվել Գրիշայի Հովհաննիսյանը, Անդրանիկ Բորիսի Էլոյանի հետ, 2010 թվականի սեպտեմբերի 1-ին` ժամը 01:00-ից 01:30-ի սահմաններում, Երևան քաղաքի Սայաթ-Նովա 1/1 հասցեում գործող «Գլամուր» սրճարանի հարևանությամբ գտնվող «Օպերա» ակումբի մոտ, հայհոյել և հարվածել է գործով չպարզված անձանց, որից հետո հարվածել է Սամվել Ասոյանին և Արթուր Հակոբյանին, ովքեր փորձել են խափանել նրանց գործողությունները: Այսինքն` Սամվել Գրիշայի Հովհաննիսյանը, Անդրանիկ Բորիսի Էլոյանի հետ, հասարակության նկատմամբ բացահայտ անհարգալից վերաբերմունք դրսևորելով, դիտավորությամբ կոպիտ կերպով խախտել է հասարակական կարգը, որը զուգորդվել է գործով չպարզված անձանց նկատմամբ բռնություն գործադրելով և հասարակական կարգի խախտումը խափանող անձանց դիմադրություն ցույց տալով, ինչը համապատասխանում է ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերի հատկանիշներին:
Ապացուցված է Սամվել Գրիշայի Հովհաննիսյանի մեղավորությունը ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով նախատեսված հանցանքը կատարելու մեջ:
Սամվել Հովհաննիսյանի անձը դրականորեն բնութագրող հանգամանքներ են առաջադրված մեղադրանքում իրեն մեղավոր ճանաչելը և կատարածի համար զղջալը:
Դատարանը գտնում է, որ Սամվել Հովհաննիսյանի պատասխանատվությունն ու պատիժը մեղմացնող հանգամանքներ պետք է դիտել նախկինում արատավորված` դատապարտված չլինելը և դրականորեն բնութագրվելը:
ՀՀ քրեական օրենսգրքի 63-րդ հոդվածի 1-ին մասի 14-րդ կետի համաձայն` պատասխանատվությունը և պատիժը ծանրացնող հանգամանք է` հանցանքն ալկոհոլի ազդեցության տակ կատարելը:
Դատարանը, նկատի ունենալով, որ Սամվել Հովհաննիսյանը քրեական օրենսգրքով նախատեսված արարքը կատարել է ալկոհոլի ազդեցության տակ, գտնում է, որ նրա պատասխանատվությունն ու պատիժը ծանրացնող հանգամանք է հանցանքն ալկոհոլի ազդեցության տակ կատարելը:
Կատարած արարքի համար ամբաստանյալ Սամվել Հովհաննիսյանը ենթակա է քրեական պատասխանատվության և պատժի:
Դատարանը, հաշվի առնելով Սամվել Հովհաննիսյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ինչպես նաև այն, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պատիժ պետք է նշանակել տուգանքի ձևով:
Դատարանը, նկատի ունենալով, որ սույն գործով ամբաստանյալ Սամվել Հովհաննիսյանը 2010 թվականի սեպտեմբերի 1-ից 4-ը գտնվել է կալանքի տակ, վերոգրյալ հիմնավորումներով գտնում է, որ նրա նկատմամբ տուգանքի ձևով նշանակվող պատժի չափը պետք է մեղմացնել:
Դատարանը գտնում է, որ Սամվել Հովհաննիսյանի նկատմամբ ընտրված խափանման միջոցը` գրավը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերն ամբաստանյալներ Անդրանիկ Էլոյանից և Սամվել Հովհաննիսյանից ենթակա չեն բռնագանձման, քանի որ տուժողները, հնարավորություն ունենալով ներկայացնելու իրենց շահերը, ամբաստանյալներին որևէ պահանջ չեն ներկայացրել: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մասի 2-6-րդ կետերով նախատեսված դատական ծախսերին, ապա դրանք նույնպես ամբաստանյալներից ենթակա չեն բռնագանձման, քանի որ 4-6-րդ կետերով նախատեսված դատական ծախսեր ընդհանրապես չկան, իսկ 2-րդ և 3-րդ կետերով նախատեսված ծախսերի վերաբերյալ տվյալները բացակայում են, ավելին` նման պահանջ Դատարան չի ներկայացվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը

ՎՃՌԵՑ

Անդրանիկ Բորիսի Էլոյանին մեղավոր ճանաչել ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով և պատիժ նշանակել տուգանք` նվազագույն աշխատավարձի չորսհարյուրապատիկի չափով:
ՀՀ քրեական օրենսգրքի 69-րդ հոդվածի 5-րդ մասի կիրառմամբ Անդրանիկ Բորիսի Էլոյանի նկատմամբ նշանակված պատիժը մեղմացնել և վերջնական պատիժ նշանակել տուգանք` նվազագույն աշխատավարձի երեքհարյուրութսունապատիկի չափով:
Անդրանիկ Բորիսի Էլոյանի նկատմամբ ընտրված խափանման միջոցը` գրավը, թողնել անփոփոխ` մինչև դատավճռի օրինական ուժի մեջ մտնելը:
Սամվել Գրիշայի Հովհաննիսյանին մեղավոր ճանաչել ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով և պատիժ նշանակել տուգանք` նվազագույն աշխատավարձի չորսհարյուրապատիկի չափով:
ՀՀ քրեական օրենսգրքի 69-րդ հոդվածի 5-րդ մասի կիրառմամբ Սամվել Գրիշայի Հովհաննիսյանի նկատմամբ նշանակված պատիժը մեղմացնել և վերջնական պատիժ նշանակել տուգանք` նվազագույն աշխատավարձի երեքհարյուրութսունապատիկի չափով:
Սամվել Գրիշայի Հովհաննիսյանի նկատմամբ ընտրված խափանման միջոցը` գրավը, թողնել անփոփոխ` մինչև դատավճռի օրինական ուժի մեջ մտնելը:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ